1. Kodi n’ciyani cidacitikira Davide?

DAVIDE akhathawa kuti apulumuse moyo wace thangwe Sauli, mambo wamphanvu mu Jirayeri, akhafuna kumupha. Pomwe Davide akhafunikira thandizo, iye adaima mu mzinda wa Nobe, komwe mwakubzicepesa adakumbira pau zixanu. (1 Samuweri 21:1, 3) Patsogolo pace, iye na acikunda wace adathawira kucimphako. (1 Samuweri 22:1) Kodi n’ciyani cidacitika kuti Davide akabisalike kucimphakoko?

2. Kodi Sauli adaikha tani moyo wace pa ngozi? (1 Samuweri 23:16, 17)

² Sauli akhawenga kwene-kwene Davide thangwe ra kubvekera kwace na kukunda kwace nkhondo zizinji. Sauli akhadziwambo kuti Yahova akhadamulamba ninga mambo thangwe ra kusaya kubvera kwace, nakuti Yahovayo akhadasankhula Davide kuti akhale mambo m’mbuto mwace. (Werengani 1 Samuweri 23:16, 17.) Tsono ninga mambo wa Jirayeri, Sauli akhana thimu la anyankhondo likulu na anyakumuthandiza azinji, ndipopa Davide akhathawa kuti apulumuse moyo wace. Kodi Sauli akhakumbuka kuti angadakwanisa kutazisa bzomwe Mulungu akhafuna kuna Davide? (Zaiya 55:11) Bibliya limbalewa lini, koma tingakhale na citsimikizo centse cakuti: Sauli akhaikha moyo wace pa ngozi. Thangwe wale omwe ambalimbana na Mulungu nthawe zentse ambaluza!

3. Kodi Davide akhabzibva tani napo kuti akhagumana na mabvuto?

³ Davide akhali lini munthu wakubzikuza. Iye alibe kubzisankhula kuti akhale mambo wa Jirayeri koma Yahova ndiye omwe adamusankhula. (1 Samuweri 16:1, 12, 13) Sauli adayamba kuwona Davide ninga nyamadulanthaka wace omwe angadakwanisa  kumupha. Tsono Davide alibe kupasa mulandu Yahova thangwe ra bzomwe bzikhamucitikirabzo; ndipo alibe kudandaula thangwe ra kukhala na cakudya cakucepa ne thangwe rakuti akhakhala m’cimphako. Pinango ni pa nthawe yomwe akhadabisalika m’cimphako pomwe iye adanemba mafala ya nyimbo yakutumbiza Yahova yomwe yakuphatanidzambo mafala ya mu vesi lakutsogolera nkhani yathuyi, yakuti: “Omwe ambalinga Yahova an’dzasaya lini cinthu ciri-centse cabwino.”—Salimo 34:10.

4. Kodi mu nkhani ino tin’cezerana mibvunzo iponi, ndipo thangwe ranyi mibvunzoyo njakufunika?

⁴ Ntsiku zino atumiki azinji wa Yahova ambasayambo cakudya na bzinthu bzinango bzakufunikira pa moyo wawo. * Bzimwebzi bzikucitika kwene-kwene pa nthawe ino ya matenda ya coronavirus. Ndipo na kufendera kwa “citsautso cikulu,” tingadikhire kugumana na mabvuto manango mazinji. (Mateu 24:21) Tsono pomwe tikukumbukira bzimwebzi, bwerani titawire mibvunzo minai yakuti: Kodi ni mwa njira iponi Davide alibe “[kusaya] cinthu ciri-centse cabwino”? Thangwe ranyi tin’funika kupfunza kumbakomedwa na bzomwe tinabzo? Thangwe ranyi tingakhale na citsimikizo centse cakuti Yahova an’dzatithandiza? Ndipo kodi tingakonzekereretu tani bzakutsogolo?

5-6. Kodi cinembo ca Salimo 23:1-6 cimbatithandiza tani kubvesesa bzomwe Davide akhathandauza pomwe adalewa kuti atumiki wa Mulungu “an’dzasaya lini cinthu ciri-centse cabwino”?

⁵ Kodi Davide akhathandauza ciyani pomwe adalewa kuti atumiki wa Yahova “an’dzasaya lini cinthu ciri-centse cabwino”? Tingadziwe bzomwe iye akhafuna kulewa mwakuwona mafala yakugumanika mu kapitulo 23 ya Salimo. (Werengani Salimo 23:1-6.) Iye adayamba salimo limweri na mafala yakuti: “Yahova ni M’busa wangu, nin’dzasaya lini cinthu.” Ndipo mu salimo libodzi-bodziri, Davide adafotokoza bzinthu bzomwe mpsakufunika kwene-kwene, ninga kuwanda kwa bzisimbo bzauzimu bzomwe iye adatambira thangwe ra kubvuma Yahova kuti ni M’busa wace. Yahova adatsogolera Davide  “mu njira zacilungamo,” ndipo mwakudeka mtima adamuthandiza pa nthawe zabwino na zakunesa. Davide akhadziwa kuti napo kuti ‘akhatsogoleredwa’ na Yahova, iye angadagumana na mabvuto. Nthawe zinango, pinango Davide akhasunama, bzomwe bzikhamucitisa kubva ninga kuti akufamba “m’cigwa ca mdima,” thangwe akhana anyamadulanthaka. Tsono pakukhala na Yahova ninga M’busa wace, Davide “[akhagopa] lini cinthu ciri-centse.”

⁶ Tsapano tagumana mtawiro wa mbvunzo wathu wakuti: Kodi ni mwa njira iponi Davide alibe “[kusaya] cinthu ciri-centse cabwino”? Pakuphatisa basa makumbukidwe yauzimu, tingalewe kuti iye akhana bzentse bzomwe akhafunikira. Thangwe mpfatso wace ukhathemba lini bzinthu bzakuthupi bzokha. Koma iye akhakomedwa na bzomwe Yahova akhamupasa. Cakufunika kwene-kwene kwa iye cikhali kusimbidwa na kukhotcereredwa na Mulungu.

7. Mwakubverana na Luka 21:20-24, kodi ni mabvuto yaponi yomwe Akristau wakuyambirira wa ku Djudeya adagumana nayo?

⁷ Na mafala ya Davideya tingakwanise kuwona kuti thangwe ranyi mpsakufunika kuwona bzinthu bzakuthupi mu njira yakuthemera. Tingapfatse na bzinthu bzomwe tinabzo pa moyo wathu, tsono tin’funika lini kuwona bzinthubzo kuti mpsakufunika kwene-kwene pa moyo wathu. Cimweci ni cadidi cakufunika comwe Akristau wakuyambirira omwe akhakhala ku Djudeya adadzacibvesesa. (Werengani Luka 21:20-24.) Jezu adacenjeza Akristauwo kuti ingadafika nthawe yomwe mzinda wa Jeruzalemu ‘ungadadzazunguliridwa na acikunda.’ Pomwe angadawona bzimwebzi bzikucitika, iwo akhafunika ‘kudzathawira ku mapiri.’ Kuthawako kungadawathandiza kuti apulumuke, tsono kungadawacitisa kuluza bzinthu bzinango. Ntsanza ya Mulindiri inango idafotokoza bza nkhaniyi kuti: “Iwo adasiya minda na nyumba, ndipo alibe kukwanisa kukonkhobza bzinthu bzawo m’nyumba zawo. Thangwe ra kukhulupira kuti Yahova aniwathandiza, iwo adaikha kunamata patsogolo pa cinthu ciri-centse comwe cikhawoneka ninga kuti n’cakufunika.”

8. Kodi ni nfundo iponi yakufunika yomwe tingapfunze kucokera pa bzomwe bzidacitikira Akristau wakuyambirira omwe akhakhala ku Djudeya?

⁸ Kodi ni nfundo iponi yakufunika yomwe tingapfunze kucokera pa bzomwe bzidacitikira Akristau wakuyambirira omwe akhakhala ku Djudeya? Ntsanza ya Mulindiri yomwe yalewedwayi, idalewa kuti: “Kutsogoloku tingadzayezedwe kusiya bzinthu bzomwe tinabzo; kodi bzinthubzo bzin’dzakhala bzakufunika kwene-kwene kuposa kupulumusidwa na Yahova? Kuthawa kwathu kungadzatibwereserembo mabvuto na kusaya bzinthu bzinango bzakufunikira. Tin’dzafunika kukhala wakukonzeka kucita ciri-centse cakufunikira, ninga momwe Akristau anzathu adacitira m’magole yakuyambirira omwe adathawa ku Djudeya.” *

9. Kodi malango ya mpostolo Paulo yomwe iye adanembera Ahebereu yakutilimbikisani tani?

⁹ Ndokumbukirani momwe bzikhaliri bzakunesa kuna Akristau wakuyambirira wale kusiya bzinthu bzawo acikayamba papsa bzinthu bzentse. Tsono iwo akhafunika cikhulupiro kuti athembe kuti Yahova aniwapasa bzomwe akufunikira pa moyo wawo. Ndipo iwo adathandizidwa kukhala na cikhulupiroco. Magole maxanu pomwe Aroma akhanati kuzungulira mzinda wa Jeruzalemu, mpostolo Paulo adapasa Ahebereu malango yakufunika yakuti: “Lekani kumbafuna kwene-kwene kobiri, m’mbuto mwace mbakomedwani na bzomwe munabzo, thangwe Mulungu adalewa kuti: ‘Inepano nin’dzakusiya lini ndipo cipo ndicidzakuthawa.’ Kuti tikhale wakukhwimika kwene-kwene ticilewa kuti: ‘Yahova ni mthandizi wangu, nin’dzagopa lini cinthu. Kodi munthu angandicitenyi?’” (Ahebereu 13:5, 6)  Kulewa cadidi, wale omwe adaphatisa basa malango ya Paulo pomwe Aroma akhanati kuzungulira mzinda wa Jeruzalemu bziribe kuwanesa kukhala na moyo wakusaya kufuna bzinthu bzizinji pomwe adayenda kukakhala ku mbuto inango. Iwo akhatsimikiza kuti Yahova aniwapasa bzomwe akufunikira pa moyo wawo. Mafala ya Paulo yakutitsimikizira kuti ifepano tingakhulupirembo bzimwebzi.

10. Kodi Paulo adatiuza “cintsintsi” ciponi?

¹⁰ Paulo adapereka malango yakundendemerana na yamweya kuna Timotio ndipo malangoya yangaphatembo basa kuna ifepano. Iye adalewa kuti: “Na tenepo, tikakhala na cakudya na bzakubvala, tin’dzakomedwa na bzinthu bzimwebzi.” (1 Timotio 6:8) Kodi bzimwebzi bzikuthandauza kuti ifepano tin’funika lini kumbapfatsa na cakudya cabwino, kukhala na nyumba yabwino ayai kumbagula bzakubvala bzabwino nthawe zinango? Ne, bzimwebzi ndibzo lini bzomwe Paulo akhafuna kulewa. Paulo akhafuna kulewa kuti ifepano tin’funika kumbakomedwa na bzinthu bzomwe tinabzo pa moyo wathu. (Afilipi 4:12) Cimweci cikhali “cintsintsi” ca Paulo kuti bzinthu bzimufambire bwino. Cinthu cakufunika kwene-kwene pa moyo wathu ni uxamwali bwathu na Mulungu, sikuti bzinthu bzomwe tinabzo.—Habakuki 3:17, 18.

11. Kodi tikupfunza ciyani na mafala yomwe Mozeji adauza Ajirayeri?

¹¹ Momwe ifepano timbawonera bzinthu bzafunika pa moyo wathu, kungakhale kwakusiyana na momwe Yahova ambawonera. Kumbukirani bzomwe Mozeji adauza Ajirayeri pambuyo pa magole 40 ali m’dambo. Iye adati: “Yahova Mulungu wako akusimba bzentse bzomwe  ukucita. Iye akudziwa bwino momwe mwapita namo mu dambo likululi. Yahova Mulungu wanu akhanamwe magole 40 yentseya ndipo mulibe kusaya cinthu.” (Bzakutonga 2:7) M’magole 40 yale, Yahova adapasa Ajirayeri mana kuti ambadye. Bzakubvala bzawo bzomwe adacoka nabzo ku Edjipito bziribe kusakala. (Bzakutonga 8:3, 4) Napo kuti wanthu winango akhawona mana ninga cakudya cakunyozeka, Mozeji adakumbusa Ajirayeriwo kuti iwo akhana bzentse bzomwe akhafunikira pa moyo wawo. Yahova ambakomedwa kwene-kwene ifepano tikambatenda na kukomedwa na bzinthu bzomwe iye ambatipasa napo bzicikhala bzing’ono-ng’ono, ndipo ticimbawona bzinthubzo kuti ni bzisimbo bzakucokera kwa iye.

12. Kodi tikudziwa tani kuti Davide akhathemba Yahova sikuti kubzithemba yekha?

¹² Davide akhadziwa kuti Yahova ngwakukhulupirika ndipo ambathandiza wale omwe ambamufuna. Napo kuti moyo wa Davide ukhali pa ngozi pomwe iye adanemba Salimo 34, na maso ya cikhulupiro iye adawona “anjo wa Yahova” adaima ‘pafupi’ na iye. (Salimo 34:7) Pinango-pentse Davide akhandendemezera anjo wa Yahova na mcikunda omwe adaima mthengo, ndipo nthawe zentse ali tceru kuti awone nyamadulanthaka. Napo kuti Davide akhali mcikunda wamphanvu ndipo Yahova adamuuza kuti an’dzakhala mambo, iye alibe kuthemba luso lace lakudziwa kuphatisa basa skopo ayai xipada kuti akunde anyamadulanthaka wace. (1 Samuweri 16:13; 24:12) Davide adathemba Mulungu, acikhulupira kuti anjo wa Yahova ‘ambapulumusa omwe ambamugopa.’ N’cadidi kuti ntsiku zino ifepano timbadikhirira lini kuti tin’khotcereredwa mwakudabwisa. Tsono timbadziwa kuti palibe munthu omwe ambathemba Yahova an’dzabonera na mabvuto mpaka kale-kale.

13. Thangwe ranyi ifepano tin’dzawoneka ninga wanthu wakusaya kukhotcerereka Gogi wa Magogi akadzaphindukira atumiki wa Mulungu, tsono n’citsimikizo ciponi comwe tin’dzakhala naco? (Onani cithunzi-thunzi ca pa tsamba lakuyamba.)

¹³ Mwakusaya kucedwa, kuthemba kwathu luso la Yahova lakutikhotcerera kuniyezedwa. Mbverano wa mitundu ya wanthu wakucemeredwa Gogi wa Magogi ukadzaphindukira wanthu wa Mulungu, moyo wathu un’dzawoneka ninga kuti uli pa ngozi. Ifepano tin’dzafunika kukhala na citsimikizo cakuti Yahova an’dzatipulumusa. (Zakiyeri 38:10-12) Tin’dzakhala tiribe bzifuzo bza nkhondo ndipo tin’dzakhala wanthu wakusaya kudziwa kumenya nkhondo. Mitundu ya wanthu in’dzatiwona ninga wanthu wakusaya kukhotcerereka. Iwo an’dzakwanisa lini kuwona bzomwe ifepano tin’dzawona na maso yathu ya cikhulupiro, bzomwe ni thimu la anjo lomwe lin’dzakhala ku mbali ya atumiki wa Mulungu kuti liwakhotcerere. Anyamadulanthaka wathuwo alibe maso yauzimu ndipopa an’dzakwanisa lini kuwona anjowo. Kulewa cadidi, iwo an’dzadzidzimuka akadzawona gulu la anyankhondo la Yahova likubwera kudzatikhotcerera!—Apokalipse 19:11, 14, 15.

14. Kodi n’ciyani comwe tingacite tsapano kuti tikonzekere bzomwe bzikubwera kutsogolo?

¹⁴ Kodi n’ciyani comwe tingacite tsapano kuti tikonzekere bzomwe bzikubwera kutsogolo? Cakuyamba pa bzentse, ifepano tin’funika kuwona bzinthu bzomwe tinabzo mu njira yakuthemera, ticimbadziwa kuti ntsiku inango tin’dzabzisiya. Ifepano tin’funikambo kumbakomedwa na bzomwe tinabzo ticimbakondwa thangwe ra kukhala pa uxamwali na Yahova. Tikamudziwa bwino Mulungu wathu, tin’dzakhala na citsimikizo centse cakuti iye an’dzakwanisa kutikhotcerera tikadzaphindukiridwa na Gogi wa Magogi.

15. Thangwe ranyi Davide akhakhulupira kuti Yahova angadamuthandiza?

 ¹⁵ Onani cinthu cinango comwe cidathandiza Davide comwe cingatithandizembo kukonzekera bzineso bzomwe bzikubwera kutsogolo. Davide adati: “Lawidzani, muciwona kuti Yahova ngwabwino; ngwakusimbidwa munthu wamphanvu wakuthawira kwa iye.” (Salimo 34:8) Mafala yamweya yakulatiza thangwe lomwe likhacitisa Davide kukhulupira kuti Yahova angadamuthandiza. Nthawe zentse Davide akhathemba Yahova ndipo Yahova alibe kumusiya yekha. Pomwe Davide akhali tswaka, iye adafunika kumenyana na Mfiristi munango wakucemeredwa Goliyati ndipo adamuuza kuti: “Yahova an’kupereka m’manja mwangu lero.” (1 Samuweri 17:46) Na kupita kwa nthawe, pomwe Davide akhatumikira ku nyumba ya mambo Sauli, Sauliyo adayezera kazinji-kentse kupha Davide. Tsono “Yahova akhana” Davide. (1 Samuweri 18:12) Pakuti Davide akhadawona kale Yahova akumuthandiza, Davideyo akhakhulupira kuti iye angadamusiya lini pa bzineso bzomwe akhagumana nabzo pa nthawe imweyo.

16. Kodi ‘tingalawidze’ tani ticiwona kuti Yahova ngwabwino?

¹⁶ Tikambalinga Yahova kuti atitsogolere tsapano, tin’dzakhala na citsimikizo centse cakuti iye an’dzatipulumusa kutsogolo. Pambafunika cikhulupiro camphanvu kuti tithembe Yahova kuti tikumbire patrau wathu kuti atipase nthawe yakugumanika pa mtsonkhano wa dera ayai wa cigawo ayai kuti atipase nthawe yakugumanika pa mitsonkhano yentse na kumbayenda mu utumiki bwakumunda. Tsono tani patrau wathuyo acilamba mkumbiro wathu ndipo aciticosa basa? Kodi tin’dzakhala na cikhulupiro cakuti Yahova an’dzatisiya lini nakuti iye nthawe zentse an’dzatipasa bzakufunikira pa moyo wathu? (Ahebereu 13:5) Atumiki azinji wa nthawe zentse angafotokoze bzomwe bzidawacitikira bzakulatiza momwe Yahova adawathandizira pomwe iwo akhafunikira thandizo lace. Kulewa cadidi Yahova ngwakukhulupirika.

17. Kodi vesi la gole la 2022 ndiponi, ndipo thangwe ranyi ndakuthemera?

¹⁷ Na Yahova ku mbali yathu, tiribe mathangwe yagopera bza kutsogolo. Mulungu wathu cipo acidzatisiya malinge tikapitiriza kuikha bzomwe ambafuna pa mbuto yakuyamba pa moyo wathu. Kuti Bungwe Lakutonga litithandize kukumbukira bza kufunika kwa kukonzekereratu bzineso bzomwe bzikubwera kutsogolo, lasankhula cinembo ca Salimo 34:10 kuti likhale vesi la gole la 2022. Cinemboci cimbati: “Omwe ambalinga Yahova an’dzasaya lini cinthu ciri-centse cabwino.”