NKHANI YAKUPFUNZA 4
Thangwe Ranyi Timbagumanika pa Cikumbuso?
“Pitirizani kumbacita bzimwebzi pakundikumbukira.”—LUKA 22:19.
NYIMBO 20 Mudapereka Mwana Wanu Wakubadwa Yekha
BZOMWE TIN’PFUNZA *
1-2. (a) Kodi ni nthawe iponi maka-maka yomwe timbakumbukira wadzinza wathu omwe adasaika? (b) Kodi Jezu adayambisa ciyani usiku bwakuti mangwana yace angadaphedwa?
NAPO kuti pangapite nthawe itali kucokera pomwe adzinza wathu adasaika, ifepano timbapitiriza kuwakumbukira. Timbawakumbukira maka-maka ikakhala kuti ntsiku yomwe iwo adasaika yafika.
2 Gole liri-lentse, timbakhala pakati pa wanthu azinji kwene-kwene omwe ambatsonkhana kuti akumbukire infa ya munthu omwe timbamufuna kwene-kwene, Jezu Kristu. (1 Pedru 1:8) Timbatsonkhana kuti tikumbukire ule omwe adapereka moyo wace ninga cakulombolera kuti atipulumuse ku pikado na infa. (Mateu 20:28) Jezu akhafuna kuti ateweri wace ambakumbukire infa yace. Ndipopa pa usiku bwakuti mangwana yace angadaphedwa, iye adayambisa msinda wakufunika kwene-kwene, ndipo adalewa kuti: “Pitirizani kumbacita bzimwebzi pakundikumbukira.”—Luka 22:19.
3. Kodi tin’cezerana ciyani mu nkhani ino?
3 Pa wanthu omwe ambagumanika pa Cikumbuso ca infa ya Kristu ni ang’ono-ng’ono okha omwe ana cidikhiro cakukakhala kudzulu. Tsono mamidyau mazinji ya wanthu omwe ana cidikhiro cakudzakhala pa dziko la pantsi ambagumanikambo pa msindayu. Mu nkhani ino, tiniwona mathangwe yomwe yambacitisa magulu mawiriya kufunisisa kugumanika pa msinda wa Cikumbuso gole liri-lentse. Ndipo tiniwonambo phindu lomwe timbakhala nalo tikambagumanika pa Cikumbusoci. Tsono bwerani tiyambe kuwona kuti thangwe ranyi anyakudzozedwa ambagumanika pa Cikumbuso.
THANGWE RANYI ANYAKUDZOZEDWA AMBAGUMANIKA PA CIKUMBUSO?
4. Thangwe ranyi anyakudzozedwa ambadya pau na kumwa vinyu pa Cikumbuso?
4 Gole liri-lentse, anyakudzozedwa omwe ambagumanika pa Cikumbuso ambadya pau na kumwa vinyu. Thangwe ranyi iwo ambadya pau na kumwa vinyu pa Cikumbuso? Kuti titawire mbvunzoyu, onani bzomwe bzidacitika usiku bwakumalizira bwa moyo wa Jezu pa dziko la pantsi. Pomwe adamala kudya Paskwa, Jezu adayambisa msinda omwe udadzacemeredwa kuti Cilaliro ca Mbuya. Iye adapereka pau na vinyu kuna apostolo wace 11 wakukhulupirika ndipo adawauza kuti adye na kumwa. Jezu adawafotokozera bza mipangano miwiri, mpangano upsa na mpangano wa Umambo. * (Luka 22:19, 20, 28-30) Mipangano imweyi idafungula njira yakuti apostolowo na wanthu winango adzakhale amambo na antsembe kudzulu. (Apokalipse 5:10; 14:1) Anyakudzozedwa wakusala, * omwe ambacita mbali ya mipangano imweyi, ndiwo an’funika kudya pau na kumwa vinyu pa Cikumbuso.
5. Kodi anyakudzozedwa ambadziwa ciyani pakulewa bza cidikhiro comwe anaco?
5 Pana thangwe linango pomwe lomwe limbacitisa anyakudzozedwa kufunisisa kugumanika pa Cikumbuso: Kugumanikako kumbawapasa mwayi wa kukumbukira cidikhiro cawo. Yahova adawapasa cidikhiro cabwino kwene-kwene, cakukakhala kudzulu na moyo wakusaya kufa ne kudzongeka, kukaphata basa pabodzi na Jezu omwe adalamusidwa, kukaphata basa pabodzi na anzawo wa 144 000 omwe ali kale kudzulu, ndipo kuposa bzentse, kukakhala pabodzi na Yahova Mulungu! (1 Akolinto 15:51-53; 1 Juwau 3:2) Anyakudzozedwa ambadziwa kuti adasankhulidwa kuti akakhale na mwayi umweyu kudzulu. Tsono iwo ambadziwa kuti an’funika kupitiriza kukhala wakukhulupirika mpaka kufa kwawo kuti abvumizidwe kukakhala kudzuluko. (2 Timotio 4:7, 8) Anyakudzozedwa ambakomedwa kwene-kwene akambakumbukira bza cidikhiro cawo. (Tito 2:13) Tsono tanimbo pakulewa bza “mabira manango”? (Juwau 10:16) Kodi ni mathangwe manango yaponi yomwe yambawacitisa kugumanika pa Cikumbuso?
THANGWE RANYI MABIRA MANANGO YAMBAGUMANIKA PA CIKUMBUSO?
6. Thangwe ranyi mabira manango yambagumanika pa Cikumbuso gole liri-lentse?
6 Mabira manango yambagumanika pa Cikumbuso, tsono yambadya lini pau ne kumwa vinyu, koma yambakomedwa kugumanika pa msindayo. Mu 1938, wale omwe ana cidikhiro cakudzakhala pa dziko la pantsi adacemeredwa kakuyamba kuti akagumanike pa Cikumbuso. Ntsanza ya Mulindiri ya Cingerezi ya 1 Março 1938, idalewa kuti: “Mpsabwino ndipo mpsakuthemera kuti [mabira manango] yambagumanikembo pa mtsonkhano umweyu yaciwona bzomwe bzikucitika. . . . Imweyi in’funika kukhala nthawe yakuti iwombo ambakondwe.” Ninga wanthu omwe acemeredwa kuti adzagumanikembo pa msinda wa malowozi, mabira manango yambakomedwa kugumanika na kuwona bzomwe bzikucitika pa Cikumbuso.
7. Thangwe ranyi mabira manango yambafunisisa kugumanika pa Cikumbuso?
7 Ninga anyakudzozedwa, mabira manango yambakumbukirambo bza cidikhiro cawo. Iwo ambafunisisa kubva nkhani ya Cikumbuso, napo kuti nkhaniyo imbafotokoza kwene-kwene bzomwe Kristu na amambo anzace wakukwana 144 000 an’dzacitira wanthu wakukhulupirika mkati mwa Utongi bwa Magole 1000. Mwakutsogoleredwa na Mambo Jezu Kristu, wale omwe an’dzatonga naye pabodzi an’dzathandiza kukonza dziko la pantsi kuti likhale paraizo na kuthandiza wanthu wakubvera kukhala wakulungama. Mpsakudekeza kwene-kwene kuna mamidyau ya wanthu kugumanika pa Cikumbuso kuti akumbukire bza kukwanisika kwa mapolofesiya ya m’Bibliya, ninga yomwe yali pa Zaiya 35:5, 6; 65:21-23; na Apokalipse 21:3, 4. Iwo akambabzikumbukira kuti ali mu dziko lipsa pabodzi na adzinza wawo, ambalimbisa cidikhiro cawo ca kutsogolo na kufunisisa kwawo kupitiriza kutumikira Yahova.—Mateu 24:13; Agalatiya 6:9.
8. Kodi ni thangwe linango liponi lomwe limbacitisa mabira manango kugumanika pa Cikumbuso?
8 Onani thangwe linango lomwe limbacitisa mabira manango kuti yafunisise kugumanika pa Cikumbuso. Iwo ambafuna kulatiza lufoyi lawo kuna anyakudzozedwa na kulatizambo kuti ali ku mbali yawo. Fala la Mulungu lidaleweratu kuti anyakudzozedwa na wale omwe ana cidikhiro cakudzakhala pa dziko la pantsi an’dzaphata basa pabodzi mwakuphatana. Kodi bzimwebzi bzikucitika tani? Bwerani ticezerane bziratizo bzakucepa.
9. Kodi polofesiya yakunembedwa pa Zakariya 8:23 imbalatiza ciyani bza momwe mabira manango yambawonera anyakudzozedwa?
9 Werengani Zakariya 8:23. Polofesiya imweyi imbafotokoza bwino momwe mabira manango yambawawonera abale wawo wakudzozedwa. Mafala yakuti “Mdjuda” na “tiniyenda namwe” yambalewa bza thimu libodzi, lomwe ni anyakudzozedwa wakusala. (Aroma 2:28, 29) “Amuna khumi wa bzirewedwe bzentse bza wanthu wa mitundu” ambaimira mabira manango. Iwo “an’dzaphatirira mkanjo,” ayai kuti an’dzapitiriza kukhala wakuphatana mwakukhulupirika na anyakudzozedwa pa kunamata kwacadidi. Tenepo, usiku bwa ntsiku ya Cikumbuso, mabira manango yambalatiza kuti njakuphatana na anyakudzozedwa mwa kukhala nawo pabodzi pa Cikumbuso.
10. Kodi Yahova wacita ciyani kuti polofesiya yakugumanika pa Zakiyeri 37:15-19, 24, 25 ikwanisike?
10 Werengani Zakiyeri 37:15-19, 24, 25. Yahova akuteweza polofesiya imweyi mwa kucitisa anyakudzozedwa na mabira manango kuphata basa pabodzi mwakuphatana. Polofesiyayi imbalewa bza mpsimbo ziwiri. Omwe ana cidikhiro cakuyenda kudzulu ali ninga mpsimbo “ya Djuda” (Mdjuda likhali dzinza lomwe kukhacokera amambo wa Jirayeri), ndipo wale omwe ana cidikhiro cakudzakhala pa dziko la pantsi ali ninga mpsimbo “ya Efraimu.” * Yahova angadadzaphatanidza mathimu mawiriyo yacikhala “mpsimbo ibodzi.” Bzimwebzi bzin’funa kulewa kuti iwo angadadzatumikira Mambo wawo m’bodzi, Jezu Kristu, mwakuphatana. Gole liri-lentse, anyakudzozedwa na mabira manango ambagumanika pa Cikumbuso, sikuti ninga mathimu mawiri yakusiyana, koma ninga “thimu libodzi” la mabira lakutsogoleredwa na “makabusa m’bodzi.”—Juwau 10:16.
11. Kodi “mabira” yakufotokozedwa pa Mateu 25:31-36, 40 yambalatiza tani kuti yambathandizira abale wace wa Kristu?
11 Werengani Mateu 25:31-36, 40. “Mabira” yomwe yakufotokozedwa mu ciratizoci yakuimira wanthu wakulungama mu ntsiku zakumalizira zino omwe ana cidikhiro cakudzakhala pa dziko la pantsi, omwe ni mabira manango. Iwo ambathandizira mwakukhulupirika abale wace wa Kristu omwe akali pa dziko la pantsi mwa kuwathandiza kukwanirisa udindo bukulu kwene-kwene bwa kupalizira na kupfunzisa wanthu pa dziko lentse la pantsi.—Mateu 24:14; 28:19, 20.
12-13. Kodi ni njira zinango ziponi zomwe mabira manango yambalatiza kuti yakuthandizira abale wace wa Kristu?
12 Gole liri-lentse pakakhala pakusala midzinga ming’ono-ng’ono kuti Cikumbuso cicitike, mabira manango yambalatiza kuti yambathandizira abale wace wa Kristu mwakucita kampanya yakucemerera wanthu omwe akufuna kudziwa bzizinji kuti adzagumanike pa Cikumbuso. (Onani kwadru yakuti: “ Kodi Mukukonzekera Nthawe ya Cikumbuso?”) Iwo ambathandizambo mwakucita makonzedwe kuti msinda wa Cikumbuso udzacitike m’magwere yentse ya pa dziko la pantsi, napo kuti m’magwere mazinji mulibe anyakudzozedwa. Wa mabira manangowo ambafunisisa kuthandiza abale wace wa Kristu mwa njira imweyi. Mabiraya yambadziwa kuti Jezu ambawona bzomwe iwo akucitira abale wace wakudzozedwa ninga kuti akucitira iye.—Mateu 25:37-40.
13 Kodi ni mathangwe manango yaponi yomwe yambaticitisa tentse kugumanika pa Cikumbuso, napo kuti tina cidikhiro cakusiyana?
THANGWE RANYI TENTSE TIMBAGUMANIKA PA CIKUMBUSO?
14. Kodi Yahova na Jezu adalatiza tani lufoyi kuna ifepano?
14Timbalatiza kutenda kwathu lufoyi lomwe Yahova na Jezu adatilatiza. Yahova ambalatiza lufoyi lace kwa ifepano mu njira zizinji, tsono njira ikulu kwene-kwene yomwe adalatizira lufoyi lace kwa ifepano ndiyo kutumiza Mwana wace wakufunidwa kuti adzabonere na kutifera. (Juwau 3:16) Ndipo Jezu adalatizambo lufoyi likulu mwa kukhala wakukonzeka kupereka moyo wace kuti atipulumuse. (Juwau 15:13) Tingakwanise lini kubwezera lufoyi lomwe Yahova na Jezu adatilatiza. Koma tingalatize kutenda kwathu mwa bzomwe timbacita pa moyo wathu ntsiku zentse. (Akolose 3:15) Ndipo timbagumanika pa Cikumbuso thangwe rakuti timbafuna kukumbukira lufoyi lomwe iwo analo kuna ifepano na kuwalatizambo kuti timbawafuna.
15. Thangwe ranyi anyakudzozedwa na mabira manango ambatenda mphaso ya cakulombolera?
15Timbatenda kwene-kwene mphaso ya cakulombolera. (Mateu 20:28) Cakulombolera ni cinthu cakufunika kwene-kwene kuna anyakudzozedwa, thangwe ico cimbacitisa kuti iwo akhale na cidikhiro cakuyenda kudzulu. Thangwe ra kukhulupira ntsembe ya Kristu, Yahova ambawawona kuti mbakulungama ndipo adawacitisa kukhala wana wace. (Aroma 5:1; 8:15-17, 23) Mabira manango yambatendambo cakulombolera. Pakuti ana cikhulupiro pa ntsembe ya Kristu, iwo ambawonedwa kuti mbakucena pamaso pa Mulungu, mwakuti angamucitire mabasa yakucena ndipo ana cidikhiro ca kudzapulumuka pa “citsautso cikulu.” (Apokalipse 7:13-15) Njira ibodzi yomwe anyakudzozedwa na wa mabira manango ambalatizira kutenda cakulombolera ndiyo kugumanika pa Cikumbuso gole liri-lentse.
16. Kodi ni thangwe linango liponi lomwe limbaticitisa kugumanika pa Cikumbuso?
16 Thangwe linango lomwe limbaticitisa kugumanika pa Cikumbuso ndakuti timbafuna kubvera Jezu. Bziribe basa cidikhiro comwe tinaco, ali-wentse wa ifepano ambafuna kubvera lamulo lomwe Jezu adalipereka usiku bomwe adayambisa Cikumbuso, pomwe adati: “Pitirizani kumbacita bzimwebzi pakundikumbukira.”—1 Akolinto 11:23, 24.
PHINDU LOMWE TENTSE TIMBAKHALA NALO TIKAGUMANIKA PA CIKUMBUSO
17. Kodi Cikumbuso cimbatithandiza tani kukhala pa uxamwali bwakulimba na Yahova?
17Timbakhala wakufendererana na Yahova. (Tiyago 4:8) Ninga momwe tapfunzira, Cikumbuso cimbatipasa mwayi wakukumbukira cidikhiro comwe Yahova adatipasa na kukumbukirambo lufoyi likulu lomwe Yahova adatilatiza. (Jeremiya 29:11; 1 Juwau 4:8-10) Tikambakumbukira kuti cidikhiro cathu cakutsogolo n’cakutsimikizika nakuti lufoyi lomwe Mulungu analo kuna ifepano ndakusaya kumala, lufoyi lathu kwa Yahova limbakula ndipo uxamwali bwathu na iye bumbakhala bwakulimba.—Aroma 8:38, 39.
18. Kodi tikambakumbukira bza ciratizo ca Jezu, timbakhala wakutsimikiza kucita ciyani?
18Timbalimbikisidwa kutewezera ciratizo ca Jezu. (1 Pedru 2:21) Zikakhala kuti zasala ntsiku zing’ono-ng’ono kuti Cikumbuso cicitike, timbawerenga nkhani za m’Bibliya zomwe zimbalewa bza mdzinga wakumalizira wa Jezu pa dziko la pantsi, kufa kwace na kulamusidwa kwace. Ndipo pa ntsiku ya msindayo, nkhani ya Cikumbuso imbatikumbusa bza lufoyi la Jezu kwa ifepano. (Aefezo 5:2; 1 Juwau 3:16) Tikambawerenga na kukumbukira bza ntsembe ya Jezu, timbakhala wakutsimikiza “kucita bzinthu ninga momwe Jezu akhacitira.”—1 Juwau 2:6.
19. Kodi tingacite ciyani kuti tipitirize kufunidwa na Mulungu?
19Timbafunisisa kupitiriza kukhala axamwali wa Yahova. (Djuda 20, 21) Timbapitiriza kufunidwa na Mulungu tikambacita bzentse bzomwe tingakwanise kuti timubvere, kuti ticenese dzina lace na kumukondwesa. (Mimwani 27:11; Mateu 6:9; 1 Juwau 5:3) Kugumanika pa Cikumbuso kumbaticitisa kufunisisa kukhala na moyo omwe umbalatiza kuna Yahova kuti tikufuna ntsiku zentse kupitiriza kufunidwa na iye mpaka kale-kale!
20. Kodi ni mathangwe yakubveka yaponi yomwe yambaticitisa kugumanika pa Cikumbuso?
20 Bziribe basa penu cidikhiro cathu n’cakukakhala kudzulu ayai pa dziko la pantsi, tinayo mathangwe yakubveka yakuti timbagumanike pa Cikumbuso. Gole liri-lentse tikatsonkhana pabodzi pa ntsiku ya Cikumbuso, timbakumbukira infa ya munthu omwe timbamufuna kwene-kwene, Jezu Kristu. Kuposa bzentse, timbakumbukira lufoyi likulu kwene-kwene lomwe Yahova adatilatiza mwa kupereka Mwana wace ninga cakulombolera. Gole lino, Cikumbuso cin’dzacitika usiku bwa ntsiku ya cixanu, 15 Abril, 2022. Timbafuna kwene-kwene Yahova na Mwana wace, ndipopa ntsiku yomwe Jezu adafa njakufunika kwene-kwene mwakuti palibe cinthu cakufunika kwene-kwene kwa ifepano kuposa kukagumanika pa msinda umweyu.
NYIMBO 16 Tumbizani Yahova Thangwe ra Mwana Wace Wakudzozedwa
^ ndi. 5 Bziribe basa penu cidikhiro cathu n’cakukakhala kudzulu ayai n’cakudzakhala m’paraizo pantsi pano, timbafunisisa kugumanika pa Cikumbuso gole liri-lentse. Nkhani ino in’fotokoza mathangwe yakucokera m’Bibliya yomwe yambaticitisa kugumanika pa Cikumbuso na phindu lomwe timbakhala nalo tikacita bzimwebzi.
^ ndi. 4 Kuti mudziwe bzizinji pakulewa bza mpangano upsa na mpangano wa Umambo, onani nkhani yakuti “‘Mudzakhala Ufumu wa Ansembe’” mu Ntsanza ya Mulindiri ya 15 Outubro, 2014, matsa. 15-17, Chichewa.
^ ndi. 4 KAFOTOKOZEDWE KA MAFALA MANANGO: Mafala yakuti anyakudzozedwa wakusala yambalewa bza Akristau wakudzozedwa omwe akana moyo pa dziko la pantsi.
^ ndi. 10 Kuti mudziwe bzizinji pakulewa bza polofesiya yakulewa bza mpsimbo ziwiri yakugumanika pa Zakiyeri kapitulo 37, onani bukhu lakuti A Adoração Pura de Jeová É Restaurada!, matsa. 130-135, ndi. 3-17.
