NKHANI YAKUPFUNZA 4
Yahova Ambatisimba Tikacita Nyongo ya Kuyenda ku Cikumbuso
“Pitirizani kumbacita bzimwebzi pakundikumbukira.” — LUKA 22:19.
NYIMBO 19 Ciraliro ca Mbuya
BZOMWE TIN’PFUNZA a
1-2. Thangwe ranyi timbacita Cikumbuso gole liri-lentse?
PAFUPI-FUPI magole 2000 m’mbuyomu, Jezu adapereka moyo wace kuti atifere ndipo bzimwebzi bzidatipasa mwayi wakuti tidzatambire moyo wakusaya kumala. Usiku bwakuti mangwana yace angadaphedwa, Jezu adauza ateweri wace kuti ambakumbukire lufoyi likulu lomwe iye adatilatiza. Iye adayambisa msinda wakufunika kwene-kwene mwa kuphatisa basa pau na vinyu. — 1 Akolinto 11:23-26.
2 Ifepano timbabvera lamulo la Jezu thangwe rakuti timbamufuna kwene-kwene Jezuyo. (Juwau 14:15) Gole liri-lentse, pa nthawe ya Cikumbuso, ifepano timbalatiza kutenda kwathu mwa kumbakumbukira bzomwe Jezu adaticitira na kumbapemba kwene-kwene. Ndipo pa nthawe imweyi timbapalizirambo kwene-kwene. Timbacemera wanthu azinji kuti adzabwerembo pa msinda umweyu. Ndipo ifepanombo timbacita nyongo kuti tileke kudzatazira kuyenda ku Cikumbuso.
3. Kodi tin’pfunza ciyani mu nkhani ino?
3 Mu nkhani ino, tiniwona bzinthu bzitatu bzomwe atumiki wa Yahova akucita kuyambira kale-kale kuti abvere lamulo la Jezu lakuti ambakumbukire infa yace. Bzinthubzo mpsibzi: (1) kutewezera bzomwe Jezu adacita pomwe adayambisa msindayu, (2) kucemera anzathu kuti adzabwerembo ku Cikumbuso na (3) kucita nyongo yakucita Cikumbuso napo kuti tikugumana na mabvuto.
KUTEWEZERA BZOMWE JEZU ADACITA PA MSINDA WA CIKUMBUSO
4. Kodi ni nfundo ziponi zomwe zimbafotokozedwa pa Cikumbuso gole liri-lentse, ndipo thangwe ranyi ni mwayi kwa ifepano kudziwa bzimwebzi? (Luka 22:19, 20)
4 Gole liri-lentse pa Cikumbuso, ifepano timbabva nkhani ya m’Bibliya yomwe imbatawira mibvunzo mizinji. Timbadziwa kuti thangwe ranyi wanthufe tikhafunikira cakulombolera nakuti bzidacitika tani kuti infa ya munthu m’bodzi ipagali pikado za wanthu azinji. Timbakumbusidwambo kuti pau na vinyu bzimbathandauza ciyani ndipo timbadziwambo wanthu omwe angadye pauyo na kumwa vinyuyo. (Werengani Luka 22:19, 20.) Ndipo timbakumbukirambo bzinthu bzabwino bzomwe an’dzatambira wanthu omwe an’dzakhala pa dziko la pantsi. (Zaiya 35:5, 6; 65:17, 21-23) Tsono tin’funika lini kukumbuka kuti wanthu wentse ambadziwa kale bzimwebzi. Pana wanthu azinji omwe akanati kudziwa bzimwebzi ndipo ambatenda lini ntsembe yomwe Jezu adapereka. Iwo ambacita lini Cikumbuso ca infa yace ninga momwe mwenekaciro adacitira pakuyamba. Thangwe ranyi?
5. Pomwe apostolo azinji adamala kufa, kodi wanthu adadzayamba kumbakumbukira tani infa ya Jezu?
5 Pomwe apostolo azinji wa Jezu adamala kufa, Akristau wakunama adapita m’gwere. (Mateu 13:24-27, 37-39) Iwo akhalewa “bzinthu bzakuphonyeka, kuti apumpse anyakupfunza kuti akhale ku mbali yawo.” (Mabasa 20:29, 30) Cinthu cibodzi pa “bzinthu bzakuphonyeka” bzomwe Akristau wakunamawa akhapfunzisa cikhali cakuti Jezu akhafunika kufa kazinji-kentse kuti ntsembe yace ikwanise kumalisa pikado za wanthu azinji. Tsono Bibliya limbalewa mwakubveka bwino kuti iye adapereka ntsembe “kabodzi kokha mpaka kale-kale, kuti anyamule pikado za wanthu azinji.” (Ahebereu 9:27, 28) Ntsiku zino, wanthu wa mitima yabwino ambakhulupira cipfunziso cakunamaci. Iwo ambayenda m’magereja ndipo nthawe zinango ambakumbukirambo infa ya Jezu. Iwo ambacemera msinda umweyu kuti “Paskwa.” b Magereja manango yambakumbukira lini infa ya Jezu, ndipopa wanthu omwe ambanamata magereja yamweya ambadziwa lini phindu la ntsembe ya Jezu. Nthawe zinango iwo ambabvunza kuti: ‘Kodi pikado zangu zingalekereredwe thangwe ra ntsembe ya Jezu?’ Thangwe ranyi ambabvunza tenepoyo? Iwo ambabvunza tenepoyo thangwe rakuti ambanamizidwa na wanthu omwe ambakhulupira lini kuti ntsembe ya Jezu ina mphanvu ya kulekerera pikado zathu. Kodi ateweri wa Jezu adathandiza tani wanthu azinji kubvesesa thandauzo la ntsembe ya Jezu na bzomwe angacite kuti ambakumbukire infa yace?
6. Kodi n’ciyani comwe anyakupfunza wa Bibliya adabvesesa mu 1872?
6 Pomwe gole la 1900 likhanati kufika, kagrupo ka anyakupfunza wa Bibliya komwe kakhatsogoleredwa na Charles Taze Russell kadayamba kupfunza Bibliya mwakamderekho. Iwo akhafuna kudziwa cadidi pa nkhani ya ntsembe ya Jezu na bzomwe wanthu angafunike kucita pa kukumbukira infa yaceyo. Mu 1872, iwo adabvesesa kuti Jezu adapereka ntsembe ya moyo wace kabodzi kuti alombole wanthu wentse pa dziko la pantsi. Pomwe iwo adadziwa bzimwebzi alibe kundokhala tenepo. Koma adayamba kuuzambo anzawo bzimwebzi mwakuphatisa basa mabukhu, majornale na marevista. Ndipo pakufuna kutewezera Akristau wakuyambirira, iwo adayambambo kumbacita Cikumbuso kabodzi pa gole.
7. Kodi kufufudza komwe anyakupfunza wa Bibliya adacita kudatithandiza tani?
7 Bzinthu bzomwe Akristau wakukhulupirikawa adadziwa pomwe akhafufudza bzimbatithandiza ntsiku zino. Thangwe ranyi tikulewa tenepoyo? Thangwe kufufudza kwawoko pabodzi na thandizo la Yahova bzidacitisa kuti tidziwe mphanvu ya ntsembe yomwe Jezu adapereka. (1 Juwau 2:1, 2) Ifepano tidakwanisambo kudziwa kuti pana magrupo mawiri ya wanthu omwe akudikhirira bzinthu bziwiri bzakusiyana. Grupo lakuyamba nda wanthu omwe an’kakhala na moyo omwe umbafa lini kudzulu ndipo grupo laciwiri nda wanthu azinji omwe an’dzakhala na moyo wakusaya kumala pantsi pano. Kudziwa kuti Yahova ambatifuna kwene-kwene na kudziwambo kuti ntsembe ya Jezu imbatithandiza kwacitisa kuti tikhale axamwali wa Yahova. (1 Pedru 3:18; 1 Juwau 4:9) Ndipopa, ifepano timbacemera anzathu kuti adzakhale nafe pabodzi pa Cikumbuso, ninga momwe abale wathu wakukhulupirika adacitira m’mbuyomu. Ndipo timbacita Cikumbusoco ninga momwe Jezu adapfunzisira ateweri wace.
ATUMIKI WA YAHOVA AMBACEMERA WANTHU KU CIKUMBUSO
N’ciyani comwe imwepo mungacite kuti mupalizire kwene-kwene pa kampanya yakucemerera wanthu ku Cikumbuso? (Onani ndime 8-10) e
8. Kodi n’ciyani comwe atumiki wa Yahova akucita kuti acemere wanthu kuti abwere ku Cikumbuso? (Onani cithunzi-thunzi.)
8 Atumiki wa Yahova adayamba kale-kale kucemera anzawo ku Cikumbuso. Kumayambiriro kwa gole la 1881, abale na mpfumakazi wa ku Estados Unidos akhambacemeredwa kuti akatsonkhane mu nyumba za abale wawo ku Allegheny, Pennsylvania, kuti akacite msinda wakufunikayu. Ndipo pomwe padapita nthawe, gwere liri-lentse likhambadzacita msinda wa Cikumbuso. Mu Março, 1940, apalizi adauzidwa kuti ambacemere wanthu omwe akufuna kudziwa bzizinji mu mphimpha yawo. Mu 1960, Beteli idadinda micemo iciitumiza ku magwere kuti aiphatise basa pa kucemera wanthu. Kucokera nthawe imweyi, micemo mizinji ikudindidwa kuti itithandize kucemerera wanthu ku Cikumbuso. Thangwe ranyi timbacita nyongo yakucemera wanthu kuti abwere ku Cikumbuso?
9-10. Kodi timbacita nyongo yakucemera wanthu aponi kuti abwere ku Cikumbuso, ndipo ni phindu liponi lomwe iwo ambakhala nalo akabwera? (Juwau 3:16)
9 Thangwe libodzi lomwe limbaticitisa kucemera anzathu kuti abwere ku Cikumbuso ndakuti iwo adziwe bzomwe Yahova na Jezu adaticitira. (Werengani Juwau 3:16.) Ifepano timbakhulupira kuti bzomwe iwo aniwona na kubva pa Cikumbusoco bzingawacitise kupfunza Bibliya acikhalambo atumiki wa Yahova. Tsono pana wanthu pomwe winango omwe ambagumana phindu.
10 Ifepano timbacemerambo wanthu omwe adasiya kutumikira Yahova. Timbacita bzimwebzi kuti tiwakumbuse kuti Mulungu akadawafuna. Azinji wa iwo ambabwera ku Cikumbuso ndipo ifepano timbakomedwa tikawona bzimwebzi. Kubwera kwawo pa Cikumbuso kumbawakumbusa nthawe zomwe akhana moyo wabwino pomwe akhatumikira Yahova. Onani bzomwe bzidacitikira Monica. c Iye akhadasiya kutumikira Yahova. Tsono pa nthawe ya matenda ya COVID-19, abale adamuthandiza kuyamba pomwe kutumikira Yahova. Pomwe msinda wa Cikumbuso wa mu 2021 udamala, iye adati: “Cikumbusoci candidekera kwene-kwene. Ndamala magole 20 ndikupalizira lini. Ndipo gole lino inepano ndakhala na mwayi wakucemera wanthu kuti abwere ku Cikumbuso. Inepano ndacita bzimwebzi na mtima wangu wentse thangwe ra kutenda bzomwe Yahova na Jezu adandicitira.” (Salimo 103:1-4) Ifepano timbacita nyongo yakucemera wanthu azinji kuti abwere ku Cikumbuso thangwe timbadziwa kuti Yahova ambakomedwa na nyongo yathu, napo penu wanthuwo an’dzabwera ayai ne.
11. Kodi Yahova akutisimba tani thangwe ra nyongo yomwe timbailatiza pa kucemera wanthu kuti abwere ku Cikumbuso? (Hagai 2:7)
11 Yahova ambatisimba kwene-kwene thangwe ra nyongo yomwe timbailatiza pakucemera wanthu kuti abwere ku Cikumbuso. Mu 2021, tiribe kucita mitsonkhano maso na maso thangwe ra matenda ya COVID-19. Tsono wanthu omwe adabwera ku Cikumbuso adakwana 21 367 603. Número imweyi ikusala pang’ono kubwerezera kawiri na meya pa número ya Mboni za Yahova zentse. Tsono Yahova ambandokomedwa lini na kuwanda kwa wanthu. Iye ambakomedwa na munthu ali-wentse pa yekha. (Luka 15:7; 1 Timotio 2:3, 4) Ndipopa tikukhulupira kuti Yahova ambaphatisa basa kampanya yakucemerera wanthu ku Cikumbuso kuti iye agumane wanthu omwe ana mtima wabwino. — Werengani Hagai 2:7.
ATUMIKI WA YAHOVA AMBACITA CIKUMBUSO NAPO AKUGUMANA NA MABVUTO
Yahova ambatisimba akatiwona tikucita nyongo kuti ticite Cikumbuso (Onani ndime 12) f
12. Kodi ni mabvuto yaponi yomwe yangatitazise kucita Cikumbuso? (Onani cithunzi-thunzi.)
12 Jezu adalewa kuti mu ntsiku zakumalizira tingadadzagumana na mabvuto yakusiyana-siyana, ninga kuboneresedwa na famidya yathu, kuzunzidwa, nkhondo, matenda na mabvuto yanango. (Mateu 10:36; Marko 13:9; Luka 21:10, 11) Nthawe zinango, mabvuto yamweya yangatitazise kukumbukira infa ya Jezu. Tsono n’ciyani comwe abale wathu akucita kuti akunde mabvuto yamweya, ndipo Yahova akuwathandiza tani?
13. Kodi Yahova adasimba tani Artem thangwe ra kukhwimika kwace kuti acite Cikumbuso m’kawoko?
13 Tikakhala tiri m’kawoko. Abale wathu omwe ali m’kawoko thangwe ra cikhulupiro cawo ambacita nyongo kuti akumbukire infa ya Jezu. Onani bzomwe Artem adacita. Pa nthawe ya Cikumbuso mu 2020, iye akhali m’kawoko. Kawokoyo ikhali ing’ono kwene-kwene ndipo ikhana wanthu axanu. Koma iye adanyang’ana pau na vinyu ndipo adakumbuka bza kubzifotokozera yekha nkhani ya Cikumbuso. Tsono anzace wa m’kawokomo akhafumali na kumbacita baludya kwene-kwene. N’ciyani comwe iye adacita? Iye adawakumbira kuti akhale ora ibodzi ne kucita baludya na kufumali. Napo kuti Artem akhadziwa lini kuti iwo angadabvuma, anzace wa m’kawokowo adabvuma bzimwebzo. Artem adati: “Ndidawakumbira kuti ticite pabodzi Cikumbuso.” Iwo adalamba, tsono adabva basi ndipo adawona bzentse bzomwe Artem adacita pomwe akhacita Cikumbuso. Pomwe adamala, iwo adamubvunza bza Cikumbusoco.
14. Kodi n’ciyani comwe Atumiki wa Yahova adacita kuti akwanise kucita Cikumbuso pa nthawe ya matenda ya COVID-19?
14 Pa nthawe ya matenda ya COVID-19. Pomwe matendaya yadayamba, atumiki wa Yahova alibe kukwanisa kucita Cikumbuso maso na maso. Tsono bzimwebzi bziribe kucitisa kuti iwo aleke kucita Cikumbusoco. d Magwere yomwe yakhakwanisa kupita pa interneti, yakhacita Cikumbuso na programa za videoconferência. Tsono tanimbo kwa wanthu azinji omwe ambakwanisa lini kupita pa interneti? M’madziko manango padacitidwa makonzedwe kuti nkhani ya Cikumbuso igravaridwi iciwonesedwa pa televisão na kubvedwa pa radio. Ndipo mthambi zinango zidagravari nkhaniyi mu bzirewedwe bzakupitirira 500 ziciitumiza ku mbuto zakutali. Ndipo abale wakukhulupirika akhambatumizira anzawo omwe akhakhala ku mbuto zimwezi nkhani za Cikumbusozo. Bzimwebzi bzidacitisa kuti abale wentse akwanise kucita Cikumbuso.
15. Kodi mwapfunza ciyani na bzomwe nyakupfunza wa Bibliya wakucemeredwa Sue adacita?
15 Tikakhala tikuletsedwa na famidya yathu. Cinthu cikulu comwe cimbacitisa kuti abale winango atazire kuyenda ku Cikumbuso ni kuletsedwa na famidya yawo. Onani bzomwe bzidacitikira nyakupfunza munango wa Bibliya wakucemeredwa Sue. Mu 2021, pomwe pakhadasala ntsiku ibodzi kuti ntsiku ya Cikumbuso ifike, Sue adauza mpfunzisi wace wa Bibliya kuti angadakwanisa lini kuyenda ku Cikumbuso thangwe akhaletsedwa na famidya yace. Mpfumakazi yomwe ikhamupfunzisayo idawerenga Luka 22:44. Ndipo idamufotokozera kuti tikakhala tikugumana na mabvuto tin’funika kucita bzomwe Jezu adacita. Tin’funika kupemba kwa Yahova ticikhulupira na mtima wentse kuti iye an’tithandiza. Mangwana yace, Sue adakonza pau na kugula vinyu ndipo adawona vidiyo ya Kucezerana Vesi la Ntsiku pa jw.org. Pomwe kudadoka, iye adayenda m’kwartu mwace ndipo adacita Cikumbuso na telefoni yace. Pomwe adamala, Sue adanembera mensaje mpfunzisi wace wa Bibliya ndipo adamuuza kuti: “Imwepo mudandilimbikisa kwene-kwene dzulo. Ndacita Cikumbuso. Ndipo Yahova wandithandiza. Inepano ndikutaza kutenda kwace!” Kodi imwepo mukuwona kuti Yahova angakuthandizenimbo mukakhala mukugumana na bvuto ninga limweri?
16. Thangwe ranyi tikukhulupira kuti Yahova an’dzatisimba tikacita nyongo yakucita Cikumbuso? (Aroma 8:31, 32)
16 Yahova ambakomedwa kwene-kwene akatiwona tikucita nyongo kuti tikumbukire infa ya Jezu. Ndipo ifepano tikudziwa kuti iye an’dzatisimba kwene-kwene akatiwona tikucita bzimwebzi, thangwe bzimbalatiza kuti timbatenda bzomwe iye adaticitira. (Werengani Aroma 8:31, 32.) Ndipopa bwerani tentse ticite nyongo kuti tileke kuluza Cikumbuso gole lino ndipo bweranimbo ticite nyongo pa basa lakufunika kwene-kwene la kucemera wanthu kuti abwere ku Cikumbuso.
NYIMBO 18 Tinkutenda Cakulombolera
a Pa ntsiku ya cipiri, 4 Abril, 2023, wanthu azinji pa dziko lentse la pantsi an’dzacita Cikumbuso pa kukumbukira infa ya Jezu. Kwa wanthu anango kan’dzakhala kakuyamba kucita bzimwebzi. Ndipo wanthu omwe akhadasiya kutsonkhana na Mboni za Yahova an’dzabwerambo ku Cikumbusoci. Ndipo anango angadzagumane na mabvuto yomwe yangadzawatazise kubwera ku msinda umweyu. Tsono Yahova an’dzakomedwa kwene-kwene akadzawona tentse tikucita msindayu.
b Wanthu wa m’magereja mazinji ambakhulupira kuti pa msinda wa kukumbukira infa ya Jezu, pau na vinyu bzimbacinja bzicisanduka thupi na mulopa wa Jezu. Iwo ambakumbuka kuti thupi la Jezu na mulopa wace ndibzo bzimbacitisa kuti iwo alekereredwe pikado zawo. Ndipopa iwo ambakumbuka kuti munthu omwe an’funa kuti pikado zace zilekereredwe an’funika kudya pauyo na kumwa vinyuyo.
c Madzina yanango yacinjidwa.
d Onani nkhani zakuti “Mwambo Wokumbukira Imfa ya Khristu wa 2021” pa jw.org (Chichewa).
e BZOMWE BZIKUCITIKA PA CITHUNZI-THUNZI: Kuyambira mu gole la 1960, micemo ya Cikumbuso ikukonzedwa mwakusiyana-siyana, ndipo tsapano ikugumanikambo pa interneti.
f BZOMWE BZIKUCITIKA PA CITHUNZI-THUNZI: Cithunzi-thunzi cakuyezezera cakulatiza abale na mpfumakazi akucita Cikumbuso pa nthawe ya nkhondo.
