KALE-KALE Ajirayeri akhambapereka kobiri kuti zithandizire kunamata kwa cadidi. Tsono mu nthawe ya Jezu, Adjuda akhafunika kupereka mitsonkho mizinji, yomwe ikhacitisa moyo wawo kukhala wakunesa.

Kuti athandizire kunamata Mulungu pa tendi la mkonkhano ayai mu templo, Mdjuda ali-wentse omwe akhali mkulu akhapagali kati-yakati ya siklo (madrakima mawiri). Mu nthawe ya Jezu, mtsonkhoyo ukhathandizira mabasa yomwe yakhacitika pa templo yomwe Herode adamanga. Adjuda winango adabvunza Pedru kuti Jezu akhaiwona tani nkhani imweyi, tsono Jezuyo alibe kulewa kuti mpsakuphonyeka kupagali mtsonkho. Ndipo iye adauza Pedru kuti ayende kukanyang’ana kobiri ya kupagaliri mtsonkho.—Mateu 17:24-27.

Wanthu wa Mulungu akhafunika pomwe kupereka mtsonkho winango wakucemeredwa cakhumi. Bzimwebzi bzikufuna kulewa kuti iwo akhapereka mbali ya ci khumi ya bzisapo bzawo bza m’munda ayai kobiri zawo. (Mwambo 27:30-32; Mirewengo 18:26-28) Atsogoleri wa magereja akhacita kungingimiza wanthu kuti apereke cakhumi ‘tumbewu twa minti, diriri, na citowe.’ Jezu alibe kuletsa wanthu kupereka cakhumi, tsono iye adatsimula msambo wakuipa omwe anembi na Afarizi akhanawo pa nkhani imweyi.—Mateu 23:23.

Pa nthawe imweyire, Adjuda akhafunika kumbapereka pomwe mitsonkho mizinji kwa Aroma, omwe akhawatonga. Mwa ciratizo, wale omwe akhana minda, akhafunika kumbapereka mtsonkho wa kobiri ayai bzinthu bzomwe akhabvuna. Bzikuwoneka kuti mtsonkho wawoyo ukhali wa 20 ayai 25 por cento ya bzinthu bzomwe akhabvuna m’mindamo. Pakhana pomwe mtsonkho wa munthu ali-wentse omwe Adjuda akhafunika pomwe kupereka. Ni mtsonkho umweyu omwe Afarizi adabvunza Jezu. Tsono Jezuyo adalatiza momwe ifepano tin’funika kumbayiwonera nkhani yakupereka mtsonkho, pomwe adati: ‘Perekani kwa Sezare bzinthu bza Sezare, koma bza Mulungu, perekani kwa Mulungu.’—Mateu 22:15-22.

Pakhana pomwe mtsonkho wa malonda yomwe yakhapita ayai kucoka mu mzinda kuti yakagulisidwe. Wanthu akhakhomera mtsonkho umweyu pa mbuto zakuimisira xitima za m’madzi, m’miratho ayai ponti, mphepete mwa mseu na m’misuwo ya m’mizinda ayai pa mbuto zakucitira malonda.

Mitsonkho yentseneyi, yomwe ikhaperekedwa mu utongi bwa Aroma, ikhacitisa kuti moyo wa wanthu ukhale wakunesa. Mwakubverana na nyakunemba nkhani zakale-kale wa ku Roma, wakucemeredwa Tacitus, mkati mwa utongi bwa Tiberiyo, pomwe Jezu akhali pa dziko la pantsi, “madziko ya Siriya na Judeya, yadadandaula kuti awacepesere mitsonkho thangwe mitsonkhoyo ikhadawanda.”

Comwe cikhacitisa kuti moyo wa wanthu ukhale wakunesa ni njira zomwe anyakukhomesa mitsonkhowo akhaphatisira basa. Munthu akhafunika kucita kugula ugo bwakukhomesa mtsonkho na kobiri zizinji. Akulu-akulu wakukhomesa mitsonkho omwe akhagumana phindu na bzimwebzi, akhambapitisa basa wanthu winango kuti ambakhomese mtsonkhoyo; ndipo iwo akhambakhala na lucro. Bzikuwoneka kuti Zakeu akhanawombo wanthu omwe akhakhomesa mtsonkho. (Luka 19:1, 2) Mpsakubveka kuti wanthu akhakomedwa lini na bzimwebzi, ndipo akhakomedwambo lini na wanthu omwe akhakhomesa mitsonkhoyo.