Paulo adanemba kuti: ‘Mwa lamulo inepano ndidafa mu lamulolo, kuti ndikhale na moyo kuna Mulungu.’—Wagalata 2:19.

Bzomwe Paulo adanemba bzikubverana na bzomwe magwere mazinji ya ku Galatiya yakhacita. Kumweko, Akristau winango akhadadzayamba kukhulupira bzomwe apfunzisi wakunama akhapfunzisa. Apfunzisiwo akhapfunzisa kuti, kuti munthu adzapulumuke akhafunika kubvera cakutonga ca Mozeji, maka-maka pakulewa bza nkhani ya m’gwatidwe. Tsono Paulo akhadziwa kuti Mulungu akhalibe nayo basa nkhani imweyi. Pauloyo adaceza nawo bwino-bwino kuti awathandize kubvesesa kuti bzipfunziso bzimwebzo bzikhali bzakunama. Ndipo adalimbisa cikhulupiro comwe abalewo akhanaco pa ntsembe ya cakulombolera ya Jezu Kristu.—Wagalata 2:4; 5:2.

Bibliya limbalewa kuti munthu akafa, ambadziwa lini cinthu na cibodzico ndipo palibe cinthu comwe cingamucitikire. (Mpalizi 9:5) Pomwe Paulo adalewa kuti: ‘Ndidafa mu lamulolo,’ iye akhafuna kulewa kuti cakutonga ca Mozeji cingadaphata lini pomwe basa pa moyo wace. Mwakusiyana na bzimwebzi, Paulo akhadatsimikiza kuti mwakukhulupira ntsembe ya cakulombolera iye angadakhala na ‘moyo kuna Mulungu.’

Cakutongaco cidacitisa kuti bzinthu bzicinje pa moyo wa Paulo. Kodi bzidafamba tani? Iye adafotokoza kuti ‘munthu ambawonedwa kukhala wakulungama thangwe ra kukhulupira Jezu Kristu, sikuti thangwe ra mabasa ya malamulo.’ (Wagalata 2:16) N’cadidi kuti cakutongaco cikhadakwanirisa kale cinthu cakufunika kwene-kwene. Paulo adafotokozera Agalatiya kuti: ‘Ico cidaperekedwa kuti cilatize padeca pikado, mpaka kufika kwa mwana wa Abalahamu omwe adacitiridwa lumbirolo.’ (Wagalata 3:19) Inde, cakutongaco cikhalatiza padeca kuti wanthu wakuperewera na wa pikado angadakwanisa lini kubvera lamulo mu njira yakulungamiratu, nakuti pakhafunikira ntsembe yakumalizira yakulungamiratu. Tenepo, cakutongaco cidatsogolera wanthu kuna ‘mwana wa Abalahamu,’ omwe ni Kristu. Munthu omwe angadakhulupira Jezu Kristu, angadawonedwa na Mulungu kuti ngwakulungama. (Wagalata 3:24) Paulo adawonedwa kuti akhali wakulungama thangwe mwakuphatisa basa cakutonga iye adabvuma ndipo adakhulupira Jezu. Tenepo, Paulo ‘adafa mu lamulo’ ndipo adakhala na ‘moyo kuna Mulungu.’ Cakutonga cikhalibe pomwe mphanvu kuna iye, tsono Mulungu ndiye omwe akhamutsogolera.

Paulo adanemba mafala mabodzi-bodziya mu tsamba lomwe adatumizira abale wa ku Roma. Iye adanemba kuti: ‘Abale wangu, imwepo mudafambo mu Lamulo mwa thupi la Kristu . . . Tatsudzulidwa ku Lamulo, thangwe ra kuti tidafa kwa cire comwe cikhatimanga.’ (Waroma 7:4, 6) Cinembo cimweci pabodzi na cinembo ca Wagalata 2:19, bzikulatiza kuti Paulo akhalewa lini bza kufa ninga nyapikado omwe alibe kubvera cakutonga. M’mbuto mwace, iye akhalewa bza kutsudzulidwa ku pikado. Iye na wanthu winango akhatsogoleredwa lini pomwe na cakutonga. Iwo akhadatsudzulidwa ku pikado mwakukhulupira ntsembe ya cakulombolera ya Kristu.