NKHANI YAKUPFUNZA 22
Thandizani Anyakupfunza Wanu Kuti Afike pa Kubatizidwa
‘Munthu ali-wentse atambire batismo.’—MABASA 2:38.
NYIMBO 72 Kudziwisa Cadidi ca Umambo
BZOMWE TIN’PFUNZA *
1. Kodi anyakupfunza wa Jezu adauza wanthu kuti acite ciyani?
THIMU likulu la amuna na akazi wakucokera madziko mazinji na bzirewedwe bzakusiyana-siyana likhadakonkhana pa mbuto ibodzi. Pa ntsiku imweyo padacitika cinthu cakudabwisa kwene-kwene. Adjuda winango mwadzidzi adayamba kulewalewa bzirewedwe bzakusiyana-siyana bza wanthu wa madziko yakusiyana-siyana. Bzimwebzi bzidadabwisa wanthuwo. Tsono bzomwe Adjuda wale adauza wanthuwo na bzomwe mpostolo Paulo adauza wentsene, bzidawadabwisiratu kwene-kwene. Bzomwe bzidawadabwisabzo, bzikuphatanidza mafala yomwe adapfunzisidwa yakuti iwo angadadzapulumusidwa thangwe ra kukhulupira ntsembe ya Jezu Kristu. Thimulo lidakomedwa kwene-kwene na mafalayo. Wanthuwo adadabwa, mpaka adabvunza kuti: ‘Kodi ticite ciyani kani?’ Pedru adawatawira kuti: ‘Munthu ali-wentse atambire batismo.’—Mabasa 2:37, 38.
M’bale pabodzi na mkazace akucitisa pfunziro tswaka mwakuphatisa basa bukhu lakuti Khalani na MoyoWakukondwa Mpaka Kale-kale! (Onani ndime 2)
2. Kodi tin’pfunza ciyani mu nkhani ino? (Onani cithunzi-thunzi pa tsamba lakuyamba.)
2 Bzomwe bzidadzacitika bzikhali bzakudabwisa kwene-kwene. Wanthu wakukwana 3.000 adabatizidwa acikhala anyakupfunza wa Kristu. Kumweku kukhali kuyamba kwa basa likulu lakupfunzisa wanthu lomwe Jezu adauza anyakupfunza wace kuti alicite. Ateweri wace akupitiriza kucita basa limweri mpaka ntsiku zino. Lero lino, ifepano tingakwanise lini kuthandiza munthu nthawe ing’ono-ng’ono, munthuyo acibatizidwiratu. Pangatenge minyezi ayai magole kuti nyakupfunzayo afike pa kubatizidwa. Penu mumbapfunzisa munthu Bibliya, imwepo mumbadziwa kuti kupfunzisako kumbanesa. Mu nkhani ino tin’pfunza momwe tingathandizire nyakupfunza wathu kuti afike pa kubatizidwa.
THANDIZANI NYAKUPFUNZA WANU WA BIBLIYA KUTI APHATISE BASA BZOMWE AKUPFUNZA
3. Mwakubverana na Mateu 28:19, 20, kodi nyakupfunza an’funika kucita ciyani kuti ayende patsogolo mpaka kubatizidwa?
3 Pomwe nyakupfunza akanati kubatizidwa, iye an’funika kuphatisa basa bzomwe Bibliya limbapfunzisa. (Werengani Mateu 28:19, 20. *) Nyakupfunza wa Bibliya akambaphatisa basa bzomwe ambapfunza ambakhala ninga ‘munthu wakucenjera’ wa mu ciratizo ca Jezu, omwe ambacera pantsi mpaka kuphata mwala acimanga nyumba yace pa mwalapo. (Mateu 7:24, 25; Luka 6:47, 48) Kodi tingathandize tani nyakupfunza kuti aphatise basa bzomwe akupfunza? Mbaticezeraneni bzinthu bzitatu bzomwe tingacite.
4. Kodi tingathandize tani nyakupfunza kuti apitirize kucita nyongo kuti athemere kubatizidwa? (Onanimbo kwadru yakuti “ Thandizani Nyakupfunza Wanu Kuti Akhale na Bzakulinga Acibzikwanirisa.”)
4 Thandizani nyakupfunza wanu kuti akhale na bzakulinga. Kodi mungacite tani bzimwebzi? Kumbukirani ciratizoci: Pomwe mukucita ulendo bwa mtantho utali, imwepo mungakumbuke kuima pa mbuto inango yabwino, ninga m’mikulo ayai m’mapiri. Bzimwebzi bzingakuthandizeni kuti muleke kubva kuwawa mtanthoyo. Mpsibodzi-bodzimbo na nyakupfunza wa Bibliya, iye akambakwanisa kucinja bzinthu bzinango pa moyo wace, an’dzawona kuti mpsakukwanisika kufika pa kubatizidwa. Phatisani basa kwadru yakuti “Citani ibzi” mu bukhu lakuti Khalani na Moyo Wakukondwa Mpaka Kale-kale! kuti muthandize nyakupfunza kuti ayende patsogolo. Kuphampha kwa pfunziro liri-lentse mufotokozereni cakulinga comwe iye an’funika kucikwanirisa na momwe cingamuthandizire kuphatisa basa bzomwe amala kupfunza. Penu mukukumbukira bzinthu bzinango bzomwe mukufuna kuti iye acite, nembani bzinthubzo pa mbuto yomwe idanemba kuti “Cinthu cinango.” Phatisani basa mbutoyi kuti mumufotokozere bzinthu bzomwe angamale nthawe ing’ono-ng’ono akubzicita ayai nthawe izinji.
5. Mwakubverana na Marko 10:17-22, kodi Jezu adauza munthu wakudala kuti acite ciyani?
5 Thandizani nyakupfunza wanu kuti acinje moyo wace. (Werengani Marko 10:17-22. *) Jezu akhadziwa kuti bzingadakhala bzakunesa kuna munthu wakudala kugulisa bzinthu bzace bzentse. (Marko 10:23) Napo bzikhali tenepo, Jezu adauza munthuyo kuti acite bzinthu bzakunesabzi pa moyo wace. Thangwe ranyi? Thangwe rakuti Jezu akhamufuna kwene-kwene. Nthawe zinango ifepano tingazeze kulimbikisa nyakupfunza wa Bibliya kuti aphatise basa bzomwe akupfunza thangwe ra kukumbuka kuti iye alibe kukonzeka kuti acinje bzinthu pa moyo wace. Pangatenge nthawe kuti wanthu acinje unthu bwawo acibvala unthu bupsa. (Wakoloso 3:9, 10) Tsono tikafulumiza kuceza na nyakupfunza bzinthu bzomwe an’funika kucinja, iye an’dzacinja mwakamfulumize. Mukacita bzimwebzi, imwepo mun’dzalatiza kuti mumbacita naye thupo.—Psalymo 141:5; Mimwani 27:17.
6. Kodi tingaphatise tani basa mibvunzo kuti tithandize nyakupfunza kukumbuka?
6 Mpsakufunika kubvunza nyakupfunza bzomwe akukumbuka pa nkhani yomwe tikuceza nayeyo. Thangwe kubvunza kun’dzatithandiza kudziwa bzomwe nyakupfunza wathu abvesesa na bzomwe iye ambakhulupira. Mukambacita bzimwebzi nthawe zentse, bzin’dzakupusirani kutsogolo kuceza naye nkhani zomwe zingadzamunese kuzibvesesa. Bukhu lakuti Khalani na Moyo Wakukondwa Mpaka Kale-kale! lina mibvunzo mizinji yomwe imbatithandiza kudziwa bzomwe nyakupfunza wa Bibliya akukumbuka. Mwa ciratizo, pfunziro 04 lina mbvunzo wakuti: “Kodi imwepo mukukumbuka kuti Yahova ambabzibva tani mukambaphatisa basa dzina lace?” Pfunziro 09 lina mbvunzo wakuti: “Kodi ni bzinthu bzinango bziponi bzomwe mun’funika kumbabzikumbukira?” Pinango nyakupfunza wanu angafunikire nthawe kuti akumbuke mtawiro wa mibvunzo imweyi. Imwepo mungamuthandize kuti aphatise basa bzinembo na bzithunzi-thunzi kuti akumbuke momwe angatawirire.
7. Kodi tingaphatise tani bwino basa bziratizo bzomwe bzidacitika pa moyo wa wanthu winango?
7 Nyakupfunza wanu wa Bibliya akabvesesa bzomwe an’funika kucita, phatisani basa nkhani yomwe idacitikadi kuti mumulimbikise kucita bzomwe apfunzabzo. Mwa ciratizo, penu nyakupfunza wanu akukwanisa lini kuyenda ku mitsonkhano nthawe zentse, mungamulatize vidiyo yakuti Yahova akhandisamalira, yomwe ikugumanika mu pfunziro 14 pa mbuto yakuti “Onani pomwe ibzi.” Imwepo mun’dzagumana bziratizo bzimwebzi pa mbuto yakuti “Fufudzani bzinango” ayai “Onani pomwe ibzi” m’mapfunziro mazinji mu bukhu lakuti Khalani na Moyo Wakukondwa Mpaka Kale-kale! * Tsono citani bwino kuti muleke kundendemezera nyakupfunza wanuyo na munthu munango, mwakulewa kuti: “Penu iye angacite bzimwebzi, imwepo mungacitembo.” Siyani kuti nyakupfunzayo awone yekha bzimwebzi. Koma fotokozani bzinthu bzomwe bzidathandiza munthu wa mu vidiyoyo kuti aphatise basa bzomwe Bibliya limbapfunzisa. Pinango mungamufotokozere cinembo ayai cinthu cinango comwe cikhacitika. Tsono nthawe zentse mbatsindikani momwe Yahova adathandizira munthuyo.
8. Kodi tingathandize tani nyakupfunza wathu kuti afike pakufuna Yahova?
8 Thandizani nyakupfunza kuti afune Yahova. Kodi mungacite tani bzimwebzi? Nyang’anani mipata kuti muthandize nyakupfunza wanu kuti apfunze makhalidwe ya Yahova, aciwonambo kuti iye ni Mulungu wakukondwa, omwe ambathandiza wanthu omwe ambamufuna. (1 Timotio 1:11; Wahebereu 11:6) Muuzeni nyakupfunza wanu kuti an’dzagumana phindu akambaphatisa basa bzomwe akupfunza, nakuti phindu lomwe an’dzaligumanalo limbalatiza kuti Yahova ambamufuna. (Zaiya 48:17, 18) Lufoyi lomwe nyakupfunza wanu analo kuna Yahova likakula, iye an’dzafunisisa kucinja bzinthu pa moyo wace.—1 Juwau 5:3.
MUDZIWISENI KUNA ABALE WANU WACIKRISTAU
9. Kodi mafala yomwe yali pa Marko 10:29, 30 yangathandize tani munthu kucinja acikhala nyakupfunza wakubatizidwa?
9 Kuti nyakupfunza ayende patsogolo mpaka kufika pa kubatizidwa, iye an’funika kucita bzinthu bzinango pa moyo wace napo bzikhale bzakunesa. Ninga munthu wakudala omwe afotokozedwa kale ule, anyakupfunza winango angafunike kusiya bzinthu bzinango. Penu basa lomwe ambaphata likubverana lini na mitemo ya m’Bibliya, iwo angafunike kusiya basalo acinyang’ana linango. Winango angafunike kumalisa uxamwali bomwe anabo na wanthu omwe ambafuna lini Yahova. Winango angalambidwe na adzinza wawo omwe ambafuna lini Mboni za Yahova. Jezu adalewa kuti wanthu winango bzingadadzawanesa kucita bzimwebzi. Tsono iye adalewa kuti wale omwe an’dzamutewera an’dzasunama lini, koma Yahova an’dzawasimba mwakuwapasa banja lomwe limbawafuna pakati pa wanthu wace. (Werengani Marko 10:29, 30. *) Kodi imwepo mungathandize tani nyakupfunza wanu kuti agumane phindu na mphatso yabwinoyi?
10. Kodi mwapfunza ciyani na bzomwe Manuel adalewa?
10 Kulisani uxamwali na nyakupfunza wanu. Mpsakufunika kwene-kwene kuti mumbalatize nyakupfunza wanu kuti mumbacita naye thupo. Thangwe ranyi? Onani bzomwe adalewa Manuel, omwe ambakhala ku México. Pakukumbukira pomwe akhali nyakupfunza wa Bibliya, iye adalewa kuti: “Pomwe tikanati kucita pfunziro liri-lentse, mpfunzisi wangu akhandibvunza penu ndiri bwino. Iye akhandithandiza kukhala wakutsudzuka ndicimufotokozera cinthu ciri-centse comwe cikhandicitikira. Bzimwebzi bzikhandithandiza kubzibva kuti iye akhacita nande thupo.”
11. Kodi ni phindu liponi lomwe anyakupfunza wathu ambakhala nalo tikambamala nthawe ikulu tikuceza nawo?
11 Mbakhalani na nthawe yakumbaceza na anyakupfunza wanu ninga momwe Jezu akhacitira na anyakupfunza wace. (Juwau 3:22) Penu bzingakwanisike, mucemereni nyakupfunza wanu omwe akuyenda patsogolo kuti abwere kumui kwanu kuti mudzadye naye cakudya, ayai kuti mudzawone naye mavidiyo yathu ya Broadcasting, yomwe yambacosedwa mwezi uli-wentse. Pinango nyakupfunza wanu angakomedwe mukamucemera kuti abwere kumui kwanu pa ntsiku za feriado pomwe adzinza wace na axamwali wace ambakhala akucita maphwando, thangwe pa nthawe imweyi iye ambabzibva kuti ali yekha. Kazibwe, omwe ambakhala ku Uganda, adalewa kuti: “Ndikuwona kuti ndidapfunza bzizinji pa nthawe yomwe ndikhaceza na mpfunzisi wangu kuposa pa nthawe yomwe tikhacita pfunziro lathu. Ndidawona momwe Yahova ambathandizira wanthu wace na momwe iwo ambakhalira wakukondwa. Mpsimwebzi bzomwe inepano ndikhafuna pa moyo wangu.”
Mukambayenda na apalizi wakusiyana-siyana ku pfunziro lanu la Bibliya, bzin’dzakhala bzakupusa kuna iye kuti ambayende ku mitsonkhano ya gwere (Onani ndime 12) *
12. Thangwe ranyi tin’funika kumbayenda kukacitisa pfunziro la Bibliya na apalizi wakusiyana-siyana?
12 Mbayendani na apalizi wakusiyana-siyana kukacitisa pfunziro la Bibliya. Nthawe zinango tingakumbuke kuti mpsakupusa kumbayenda tekha ayai kumbayenda na mpalizi m’bodzi-bodziyo kukacitisa pfunziro lathu. Napo kuti bzimwebzi bzingakhale bzakupusa kuna imwepo, tsono dziwani kuti nyakupfunza wanu an’dzagumana phindu mukambayenda na apalizi wakusiyana-siyana kukapfunza naye. Dmitrii, omwe ambakhala ku Moldova, adalewa kuti: “Mpalizi ali-wentse omwe akhabwera ku pfunziro langu akhafotokoza bzinthu mu njira yakusiyana na mwanzace. Bzimwebzi bzikhandithandiza kuwona nkhani yomwe tikucezeranayo mu njira zakusiyana-siyana. Pa ntsiku yakuyamba kufika pa mitsonkhano ndiribe kucita manyazi kwene-kwene thangwe abale na mpfumakazi winango ndikhadziwana nawo kale.”
13. Thangwe ranyi tin’funika kuthandiza nyakupfunza kuti ambayende ku mitsonkhano?
13 Thandizani nyakupfunza wanu kuti ambayende ku mitsonkhano ya gwere. Thangwe ranyi? Thangwe Yahova adauza atumiki wace kuti ambatsonkhane pabodzi, ndipo bzimwebzi bzimbacita mbali yakunamata kwathu. (Wahebereu 10:24, 25) Kuthimizira bzimwebzi, abale na mpfumakazi zathu ni banja lathu lacikristau. Tikakhala tiri nawo pabodzi pa mitsonkhano, bzimbakhala ninga kuti tikudya nawo cakudya kumui kwathu. Imwepo mukathandiza nyakupfunza wanu wa Bibliya kuti ambayende ku mitsonkhano, mumbakhala mukumuthandiza kucita cinthu cakufunika kwene-kwene kuti afike pa kubatizidwa. Tsono pinango bzingamunese kuyamba kuyenda ku mitsonkhano. Kodi bukhu lakuti Khalani na Moyo Wakukondwa Mpaka Kale-kale! lingathandize tani nyakupfunza wanu kukunda mabvuto yomwe angagumane nayo?
14. Kodi tingalimbikise tani nyakupfunza wathu kuti ambayende ku mitsonkhano?
14 Phatisani basa pfunziro 10 la bukhu lakuti Khalani na Moyo Wakukondwa Mpaka Kale-kale! kuti likuthandizeni kulimbikisa nyakupfunza wanu. Apalizi wa luso omwe adakumbiridwa kuti aphatise basa pfunziro 10 la bukhuli pomwe likhanati kucosedwa, bzinthu bzidawafambira bwino pomwe akhathandiza anyakupfunza wawo kuti ambayende ku mitsonkhano. Tsono lekani kudikhirira kuti mucite kufika pa pfunziro 10 kuti mucemere nyakupfunza wanu wa Bibliya kuti ayende ku mitsonkhano yathu. Bzikakwanisika mucemereniretu, ndipo pitirizani kucita bzimwebzi nthawe zentse. Anyakupfunza wa Bibliya ambagumana na mabvuto yakusiyana-siyana. Ndipopa khalani tceru kuti muwone bzomwe nyakupfunza wanu akufunikira na momwe mungamuthandizire. Lekani kugoboka m’mabondo mukawona kuti pakupita nthawe iye akanati kuyamba kufika pa mitsonkhano. Pirirani ndipo pitirizani kumucemera.
THANDIZANI NYAKUPFUNZA WANU KUTI AMALISE MANTHA
15. Kodi nyakupfunza wathu angakhale na mantha yaponi?
15 Kodi imwepo mukukumbukira mantha yomwe mudakhala nayo pomwe mukhakumbuka kukhala m’bodzi wa Mboni za Yahova? Pinango mukhakumbuka kuti mun’dzakwanisa lini kupalizira mui na mui, ayai pinango mudabva mantha kuti adzinza wanu ayai axamwali wanu angadaipidwa na bzimwebzo. Penu bziri tenepo, imwepo mun’dzabvesesa momwe nyakupfunza wa Bibliya akubvera. Jezu adalewa kuti wanthu winango angakhalembo na mantha ninga yamweya. Tsono iye adacenjeza ateweri wace kuti aleke kulekerera mantha yawatazise kutumikira Yahova. (Mateu 10:16, 17, 27, 28) Kodi Jezu adathandiza tani ateweri wace kuti amalise mantha? Ndipo imwepo mungamutewezere tani?
16. Kodi tingathandize tani nyakupfunza wathu kuti ambauzembo winango bzomwe akupfunza?
16 Pang’ono na pang’ono pfunzisani nyakupfunza wanu kuti ambafotokoze bza cikhulupiro cace. Anyakupfunza wa Jezu pinango adacita thupo pomwe iye adawatuma kuti akapalizire. Tsono Jezu adawathandiza mwa kuwauza komwe angadakapalizira na mafala yomwe angadayapalizira. (Mateu 10:5-7) Kodi mungatewezere tani Jezu? Thandizani nyakupfunza wanu kuti adziwe komwe angakapalizire. Mwa ciratizo, mubvunzeni penu akudziwa munthu omwe angagumane phindu akapfunza cadidi cinango ca m’Bibliya. Muthandizeni kudziwa bzomwe angakalewe mwa kumufotokozera njira yakupusa ya momwe angakafotokozere cadidi ca m’Bibliya. Penu bzingakwanisike mungakonzekere naye mwa kuphatisa basa kamsolo kakuti “Wanthu Winango Ambalewa kuti” na kakuti “Wanthu Winango Ambabvunza Kuti,” mu bukhu lakuti Khalani na Moyo Wakukondwa Mpaka Kale-kale! Pomwe mukucita bzimwebzi, yezerani kuthandiza nyakupfunza wanuyo kuphatisa basa Bibliya kuti apereke mitawiro yakupusa na yakubveka bwino.
17. Mwakubverana na Mateu 10:19, 20, 29-31, kodi tingathandize tani nyakupfunza wathu kuti ambathembe Yahova?
17 Thandizani nyakupfunza wanu kuti ambathembe Yahova. Jezu adauza anyakupfunza wace kuti Yahova angadadzawathandiza thangwe ambawafuna. (Werengani Mateu 10:19, 20, 29-31. *) Kumbusani nyakupfunza wanu kuti Yahova an’dzamuthandizambo. Imwepo mungamuthandize nyakupfunza wanu mwa kumbapemba naye pabodzi, muciguma cakulinga comwe iye anaco. Franciszek, omwe ambakhala ku Polônia, adalewa kuti: “Nthawe zizinji mpfunzisi wangu akhambaguma mu mpembo bzinthu bzomwe ndikufuna kucita. Pomwe ndidawona kuti Yahova akhatawira mipembo ya mpfunzisi wangu, mwakamfulumize ndidayambambo kumbapemba. Ndidawona kuti Yahova adandithandiza pomwe ndidakumbira kuti ndileke kumbayenda ku basa ntsiku zinango kuti nimbayende ku mitsonkhano ya gwere na ku mtsonkhano wacigawo.”
18. Kodi Yahova ambabzibva tani na basa lomwe atumiki wace akulicita na nyongo?
18 Yahova ambacita thupo kwene-kwene na nyakupfunza wathu wa Bibliya. Iye ambatenda kwene-kwene basa lomwe atumiki wace ambalicita na nyongo kuti athandize wanthu kuti akhale naye pa uxamwali ndipo Yahovayo ambafuna atumiki wacewo thangwe ra bzomwe ambacitabzi. (Zaiya 52:7) Penu mukalibe pfunziro la Bibliya, imwepo mungathandize nyakupfunza wa Bibliya kuyenda patsogolo acifika pa kubatizidwa mwa kuperekeza winango ku mapfunziro yawo ya Bibliya.
NYIMBO 60 Omwe An’dzapulumuka
^ ndi. 5 Mu nkhani ino ifepano tin’pfunza momwe Jezu adathandizira wanthu kuti akhale anyakupfunza wace. Tiniwona momwe tingamutewezerere. Ndipo tiniwonambo momwe tingaphatisire basa bukhu lakuti Khalani na Moyo Wakukondwa Mpaka Kale-kale! Bukhu limweri lidakonzedwa kuti lithandize anyakupfunza wathu wa Bibliya kuti ayende patsogolo acifika pa kubatizidwa.
^ ndi. 3 Imwepo mungagumane pomwe bziratizo bza moyo wa wanthu winango mu JW Library pomwe padanemba kuti “Media,” mukamala muyende pomwe padanemba kuti “Bzomwe Bzidandicitikira pa Moyo Wangu,” “Bibliya Limbacinja Moyo wa Wanthu.”
^ ndi. 5 Mateu 28:19 Tenepo, ndokoni mukapfunzise wanthu wa mitundu yentse, muciwabatiza m’dzina la Baba, na la Mwana, na la mzimu wakucena, 20 na kuwapfunzisa kubvera bzinthu bzentse bzomwe ndidakuuzani. Ndipo dziwani kuti ine ndiri pabodzi na imwe ntsiku zentse mpaka kuphampha kwa dziko lino.
^ ndi. 7 Marko 10:17 Pomwe Jezu akhacoka, mwamuna munango adamuthamangira, ndipo adamugodamira, acimubvunza kuti: “Mpfunzisi Wabwino, kodi n’ciyani comwe nin’funika kucita kuti ndidzatambire moyo wakusaya kumala?” 18 Jezu adati kwa munthuyo: “Thangwe ranyi ukundicemera wabwino? Palibe wabwino, koma Mulungu yekha. 19 Imwepo mumbayadziwa malamulo yakuti: ‘Leka kupha, leka kucita upombo, leka kuba, leka kupereka umboni bwakunama, leka kukhulukha, lemekeza pai wako na mai wako.’” 20 Mwamunayo adauza Jezu kuti: “Mpfunzisi, bzentsebzi nimbabzicita, kuyambira ubwana bwangu.” 21 Jezu adamunyang’anisa ndipo adamufuna kwene-kwene. Tenepo adamuuza kuti: “Cikusala cinthu cibodzi: Ndoko ndipo kagulise bzinthu bzomwe unabzo, ndipo kobiriyo ukagawanise anyakusauka, ndipo iwepo un’dzakhala na cuma kudzulu, ukamala ubwere ucidzakhala mteweri wangu.” 22 Tsono iye alibe kukomedwa na mtawiroyo ndipo adayenda wakusunama, pakuti iye akhana bzinthu bzizinji.
^ ndi. 9 Marko 10:29 Jezu adati: “Cadidi ndikukuuzani kuti: Palibe munthu omwe adasiya nyumba ayai abale ayai mpfumakazi ayai mai ayai baba ayai wana ayai minda thangwe ra inepano na thangwe ra bzipsa bzabwino, 30 acisaya kutambira bzizinji kubwerezera maulendo dzana, mu nthawe ino, nyumba, abale, mpfumakazi, azimai, wana, minda, na mazunzo, ndipo mu nthawe yakutsogolo acidzatambira moyo wakusaya kumala.”
^ ndi. 17 Mateu 10:19 Tsono akakakuperekani, lekani kucita thupo na bzomwe mun’kalewa ayai na momwe mun’kalewalewera, thangwe pa nthawe imweyo, mun’dzapasidwa bzomwe mulewe, 20 pakuti omwe an’dzalewalewa mun’dzakhala lini imwepo mwekha, koma mzimu wa Baba wanu ndiwo omwe un’dzalewalewa mwa imwepo. 29 Kodi tumbalame tuwiri, tumbagulisiwa lini na kobiri ibodzi yakucepa mphanvu? Tenepo, palibe ne kabodzi ka tumbalametu komwe kangagwe pantsi Baba wanu acisaya kudziwa. 30 Ndipo napo tsisi la mu msolo mwanu, ambalilewenga lentse. 31 Tenepo, lekani kugopa. Ndimwe wakufunika kwene-kwene kuposa mbalame zizinji.
^ ndi. 66 BZOMWE BZIKUCITIKA PA CITHUNZI-THUNZI: M’bale pabodzi na mkazace akucitisa pfunziro tswaka. Nthawe zinango iye ambacitisa pfunziro lacero na abale wakusiyana-siyana.
