POMWE Lisa * adabvunzidwa kuti n’ciyani cidamucitisa kuti abvume kupfunza cadidi, iye adatawira kuti: “Kudeka mtima kwa abale na mpfumakazi ndiko komwe kudandicitisa.” Mpsibodzi-bodzimbo na mpfumakazi yakucemeredwa Anne. Pomwe iyo idabvunzidwambo, idatawira kuti: “Comwe cidandicitisa kuti ndibvume kupfunza Bibliya ndico kudeka mtima kwa abale kuposa bzinthu bzomwe ndikhapfunzabzo.” Ntsiku zino, mpfumakazi ziwirizi zimbakomedwa kuwerenga Bibliya na kukumbukira bzomwe awerengabzo. Koma comwe cidawacitisa kuti abvume kupfunza cadidi ndico kudeka mtima.

Kodi tingalatize tani kudeka mtima komwe kungalimbikise anzathu? Mu nkhani ino tiniwona njira ziwiri: pomwe tikulewalewa na bzicito bzathu. Ndipo tikamala tiniwona kuti tingalatize kudeka mtima kumweku kwa mbani.

Mkazi wanzeru omwe ambafotokozedwa pa Mimwani kapitulo 31 ambalatiza “lamulo la kudeka mtima” pakulewalewa. (Mimwani 31:26) Iye ambabvuma kuti kudeka mtima kumutsogolere pomwe akulewalewa. Ndipo azipai an’funikambo kukhala wakudeka mtima pomwe akulewalewa. Abereki azinji ambadziwa kuti akalewalewa na wana wawo mwaukali, wanawo angawatetekere lini ayai angacite lini bzomwe akuwauzabzo. Ndipopa abereki an’funika kukhala wakudeka mtima pomwe akulewalewa na wana wawo kuti wana wawowo awatetekere na kuwabvera.

Kodi mungacite tani kuti mukwanise kutsogolera lirime lanu kuti mumbalewelewe mwakudeka mtima napo penu ndimwe lini m’bereki? Comwe cingatithandize kudziwa bzakucita ndico kuwona bzomwe Mimwani 31:26 ambalewa. Vesiri limbati: “Iye ambalewalewa mwanzeru.” Bzimwebzi bzin’funa kulewa kuti pomwe tikanati kulewalewa, tin’funika kusankhula bwino mafala yomwe tiniyalewa. Pomwe tikanati kulewalewa bzingakhale bwino kubzibvunza kuti: ‘Kodi bzomwe nin’funa kulewabzi bzin’citisa kuti munthu m’bodzi akalipe, ayai bzin’citisa nkhaniyi imbombowe?’ (Mimwani 15:1) Mpsabwino kwene-kwene kukumbukira bzomwe bzingacitike pomwe tikanati kulewalewa.

Mwani unango umbalewa kuti: “Alipo munthu omwe ambalewalewa mwakusaya kukumbuka ninga kulasa kwa xipada.” (Mimwani 12:18) Tikayamba kukumbuka bwino pomwe tikanati kulewalewa, tin’dzakwanisa kulewalewa mafala yabwino. Kuphatisa basa lamulo la kudeka mtima pomwe tikulewalewa na anzathu, kun’dzatithandiza kutcenkha kulewa mafala yomwe yangapweteke anzathu. (Aefezo 4:31, 32) Kucita bzimwebzi kun’dzatithandiza kutcenkha mafala yakuipa ticilewa mafala yabwino. Yahova adatithandiza kuwona momwe tingacitire bzimwebzi pomwe adalimbikisa mtumiki wace Eliya. Anjo omwe adatumidwa kuti akalewelewe na Eliya “adalewalewa mwakugwa na mafala ya pantsi-pantsi.” (1 Wamambo 19:12) N’cadidi kuti kukhala wakudeka mtima kumbandothandauza lini kulewa mafala yabwino. Ifepano tin’funikambo kucita bzinthu bzakulatiza kuti ndife wakudeka mtima. Kodi tingacite tani bzimwebzi?

Tikambatewezera Yahova mwakukhala wakudeka mtima, tin’dzambandolewalewa lini mafala yabwino kwa anzathu, koma tin’dzalatizambo kudeka mtimako mwa bzicito bzathu. (Aefezo 4:32; 5:1, 2) Lisa, omwe tamulewa kumayambiriro ule, adalatizidwa kudeka mtima na Mboni za  Yahova. Iye adati: “Pomwe abereki wangu adafunika kufuluka mwakamfulumize, mabanja mawiri ya Mboni za Yahova yadatithandiza kulongedza bzombo. Pa nthawe imweyire ndikhanati kuyamba kupfunza Bibliya.” Bzinthu bzabwino bzomwe abalewa adacita ndibzo bzidacitisa Lisa kufuna kupfunza Bibliya.

Anne, omwe tamulewa ule, adakomedwa kwene-kwene na kudeka mtima komwe Mboni za Yahova zidamulatiza. Iye adati: “Inepano ndikhambakhulupira lini wanthu thangwe rakuti wanthu azinji m’dzikoli ambacita lini bzinthu mwakudeka mtima.” Ndipo iye adalewa pomwe kuti: “Pomwe ndidadziwana na Mboni za Yahova ndikhambabzibvunza kuti: ‘Thangwe ranyi amwewa ambalatiza kuti ambakomedwa nande?’ Mpfumakazi yomwe ikhandipfunzisa Bibliya idandilatiza kudeka mtima kwene-kwene. Bzimwebzi ndibzo bzidacitisa kuti inepano ndiyambembo kuikhulupira.” Kodi n’ciyani cidadzacitika? Anne adadzalewa pomwe kuti: “Ndidayamba kukhala tceru kuti ndibvesese bzomwe ndikhapfunza.”

Onani kuti Lisa na Anne adafuna kupfunza Bibliya thangwe ra kuwona bzinthu bzabwino bzomwe adacitiridwa na abale wa m’gwere. Kudeka mtima komwe gwere lidawalatiza kudawathandiza kukhulupira Yahova na wanthu wace.

Wanthu winango ambalewalewa mwakudeka mtima na mwantsangala thangwe rakuti komwe adakulirako wanthu adakhala tenepoyo. Tikambacita bzimwebzi thangwe rakuti tidazolowera ayai tidabadwa tenepoyo, mpsabwino. Tsono kucita bzimwebzi kun’funa lini kulewa kuti tikutewezera Mulungu.  —  Ndendemezerani na Mabasa 28:2.

Kudeka mtima kumbacita mbali ya bzisapo bza mzimu wa Mulungu. (Agalatiya 5:22, 23) Ndipopa, kuti tikhale na kudeka mtima caiko tin’funika kubvuma kuti mzimu wa Mulungu utsogolere nzeru zathu na bzomwe timbacita. Tikambacita tenepoyo tin’dzakhala tikutewezera Yahova na Jezu. Ndipo ifepano timbatewezerambo Jezu mwa kumbafuna abale wathu. Ndipopa timbacita bzimwebzi thangwe ra lufoyi lomwe tinalo kwa Yahova na kuna anzathu. Tikacita bzimwebzi, timbalatiza na mtima wathu wentse kuti ndife wakudeka mtima ndipo ni kudeka kumweku komwe Mulungu ambakomedwa nako.

Bzimbakhala bzakupusa kudekera mtima munthu omwe timbamudziwa ayai omwe ambaticitirambo bzinthu mwakudeka mtima. (2 Samuweri 2:6) Cinthu cibodzi comwe tingacite kuti tilatize kuti ndife wakudeka mtima ndico kutenda. (Akolose 3:15) Tsono, tani penu tawona kuti pana munthu omwe an’themera lini kumudekera mtima?

Kumbukirani ibzi: Yahova adalatiza kale kuti ngwakudeka mtima kwene-kwene ndipo Fala lace limbatithandiza kudziwa kufunika kwa kukhala na khalidwe limweri. Mafala yakuti “kudeka mtima kukulu” yambaphatisidwa basa kazinji-kentse mu Bzinembo Bzacigerego Bzacikristau. Tsono, kodi Mulungu ambatidekera tani mtima?

Kumbukirani wanthu wentse omwe Yahova adawalatiza kale kudeka mtima mwa kuwapasa bzinthu bzakufunika pa moyo kuti apitirize kukhala na moyo. (Mateu 5:45) Napo pomwe tikhanati kumudziwa Yahova, iye akhadatilatiza kale kudeka mtima kwace. (Aefezo 2:4, 5, 8) Iye adacita cinthu cikulu kwene-kwene mwa kupereka Mwana wace wakubadwa-yekha kuti apulumuse wanthu wentse. Mpostolo Paulo adalewa kuti Yahova adapereka cakulombolera “mwakubverana na kudeka mtima kwace kukulu.” (Aefezo 1:7) Ndipo cinango n’cakuti ifepano nthawe zinango timbaphonya ndipo timbasunamisa Yahova. Koma iye ambapitiriza basi kutitsogolera na kutipfunzisa. Malango yace yambakhala ninga “nvula yakuwazira mauswa.” (Bzakutonga 32:2) Ifepano tingakwanise lini kubwezera Yahova kudeka mtima kukulu komwe iye ambatilatiza. Ndipo tikudziwa kuti tin’dzakhala na moyo wakusaya kumala kutsogoloku thangwe ra kudeka mtima kwace kukulu.  —  Ndendemezerani na 1 Pedru 1:13.

Tawona kuti kudeka mtima komwe Yahova ambatilatiza kumbatipasa mphanvu, ndipopa tin’funika lini kucita kusankhula wanthu omwe tingawadekere mtima. Ndipo tin’funika kucita nyongo yakutewezera Yahova mwa kumbalatiza khalidwe limweri ntsiku zentse. (1 Atesalonika 5:15) Tikambalatiza kudeka mtima, ifepano timbakhala ninga moto omwe umbathumisa munthu pa nthawe ya mphepo. Timbakwanisa kutsangalaza wanthu wa m’banja mwathu, Akristau anzathu, anzathu wa ku basa, anzathu wa ku xikola na avizinyu wathu.

Kumbukirani wanthu wa m’banja mwanu ayai wa m’gwere mwanu omwe angakomedwe kwene-kwene mukawalatiza kudeka mtima mwa mafala na bzicito bzanu. Pinango mu gwere mwanu mungakhale na munthu omwe angakomedwe kwene-kwene mukamutungira madzi, kumucitira mabasa manango ya pamui ayai kuyenda kukamugulira bzinthu. Ndipo tani penu mwagumana na munthu mu upalizi omwe akufuna kuthandizidwa, kodi mungamuthandize?

Bwerani tentse tilatize mwa mafala na bzicito bzathu kuti timbatsogoleredwa na “lamulo la kudeka mtima.”