WANTHU azinji ambaidziwa bwino nkhani yakuti Jezu adakhomereredwa pa muti na akapondo awiri. (Mateu 27:35-38) Tsono, wanthu winango ambakumbuka kuti bzomwe Bibliya limbalewa bzakuti thupi la Jezu lidadzacosedwa pa mutipo licipendesedwa mpsacadidi lini.  —  Marko 15:42-46.

Wanthu winango omwe ambagaza bzomwe mabukhu yakufotokoza bza moyo wa Jezu yambalewa, ambakhulupira lini kuti munthu omwe akhaphedwa mwakucita kukhomereredwa pa muti akhapendesedwambo mwaulemu. Iwo ambakhulupira kuti wanthu omwe akhacita kukhomereredwa pa muti akhacitiridwa bzinthu mwakusiyana kwene-kwene. Mtolankhani wakucemeredwa Ariel Sabar, adanemba thangwe lomwe limbacitisa wanthuwo kukhulupira bzimwebzo mu revista yakucemeredwa Smithsonian. Iye adati: “Kukhomerera pa muti cikhali cirango comwe cikhaperekedwa kwa wanthu wakuipa kwene-kwene. Ndipopa adziwi winango ambakhulupira lini kuti Aroma angadabvumiza wanthu amwewa kupendesedwa mwaulemu.” Aroma akhakhomerera pa muti wanthu wakuipawa kuti awanyazise, ndipo mathupi yawoyo yakhadzacosedwa pa mutipo yaciperekedwa kwa bzirombo kuti bziyadye. Mbali za thupi zomwe zikhasala zikhaikhidwa m’dindi libodzi.

Tsono bzinthu bzakale-kale bzomwe bzidafukulidwa pantsi, bzidalatiza kuti bzomwe wanthu amwewa ambakumbuka mpsacadidi lini. Bzinthubzo bzimbalatiza momwe Adjuda winango adaphedwera. Mu 1968, padagumanidwa mafupa ya munthu omwe adaphedwa mu nthawe ya Akristau wakuyambirira. Mafupa yamweya yadagumanidwa m’thenje la banja libodzi Lacidjuda pafupi na mzinda wa Jeruzalemu. M’thenjemo mukhana kaxa yomwe ikhana mafupa. Ndipo pfupa libodzi lomwe likhalipombo m’mwemo nda mwendo. Pfupalo likhadakhomereredwa pa tabwa na perego yakutalimpha masentimetro 11.5. Sabar adati: “Mwendoyo ukhali wa munthu m’bodzi wakucemeredwa Jehokanani. Ndipo nkhani imweyi idathandiza kumalisa kusaya kubvesesana pa maceza yomwe yadamala nthawe ikulu yakucitika yakulewa bza nkhani ya m’Bibliya yakuti Jezu adapendesedwa. Pfupa la Jehokanani likutithandiza kubvesesa kuti Aroma adabvumiza kuti Adjuda winango mu nthawe ya Jezu omwe adakhomereredwa pa muti apendesedwe.”

Ntsiku zino, wanthu akana nzeru zakusiyana pa nkhani yakuti Jezu adakhomereredwa tani pa muti mwakubverana na bzomwe adawona pa pfupa la Jehokanani. Tsono pfupa limweri likulatiza padeca kuti akapondo winango omwe adaphedwa mwakucita kukhomereredwa pa muti adapendesedwa. Ndipopa, bzomwe Bibliya limbalewa bzakuti thupi la Jezu lidacosedwa pa muti liciikhidwa m’thenje mpsacadidi. Ndipo umboni bwa pfupa la Jehokanani bukutsimikizira bzimwebzi.

Ndipo kuposa bzentse, comwe cimbatitsimikizira kuti bzimwebzi bzidacitikadi n’cakuti Yahova akhadalewa kale kuti Jezu angadadzapendesedwa m’thenje la munthu wakudala. Ndipo palibe munthu omwe angatazise mafala ya Mulungu kukwanisika. —Zaiya 53:9; 55:11.