1. Kodi n’ciyani comwe pinango cidakudabwisani pomwe mudayamba kuuza wanthu winango mafala ya m’Bibliya?

KODI imwepo mukukumbukira pomwe mudawona kuti mwagumana cadidi cakucokera m’Bibliya? Bziribe kukunesani kubvesesa bzentse bzomwe mukhapfunza kucokera m’Bibliya, ndipo mudayamba kukumbuka kuti munthu ali-wentse angadakhulupirambo bzomwe imwepo mudayamba kukhulupira. Ndipo mudatsimikiza kuti mafala ya m’Bibliya, yangadathandiza wanthuwo kukhala na moyo wabwino tsapano, na kudikhira kudzakhala na moyo wabwino kutsogolo. (Psalymo 119:105) Tenepo thangwe ra kukomedwa, mudafotokozerambo axamwali na adzinza wanu cadidi comwe mudacigumanaco. Tsono n’ciyani comwe cidacitika pomwe mudawafotokozerapo? Mudadabwa thangwe rakuti wanthu azinji adalamba bzomwe mudawauzabzo.

2-3. Kodi wanthu azinji adacita ciyani pomwe Jezu akhali pa dziko la pantsi?

² Ifepano tin’funika lini kumbadabwa wanthu akambalamba mafala yomwe timbawapalizira. Pomwe Jezu akhali pa dziko la pantsi, wanthu azinji adamulamba napo kuti iye akhacita bzinthu bzakudabwisa bzakulatiza kuti iye akhadathandizidwa na Mulungu. Mwa ciratizo, Lazaro pomwe akhadafa, Jezu adamulamusa. Cimweci cikhali cinthu cakudabwisa mwakuti wale omwe akhamunyoza, alibe kugaza bzimwebzi. Napo bzikhali tenepo, atsogoleri wa Adjuda alibe kubvuma kuti Jezu akhali Mesiya. Tenepo, iwo adakhumba kupha Jezu na Lazaro kubodzi!—Juwau 11:47, 48, 53; 12:9-11.

³ Jezu akhadziwa kuti wanthu azinji angadadzamulamba kuti iye ni Mesiya. (Juwau 5:39-44) Iye adauza thimu la anyakupfunza wa Juwau Batista, kuti: ‘An’kondwa ngule omwe ambagumana lini cinthu cakusunamisa kwa inepano.’ (Mateu 11:2, 3, 6) Thangwe ranyi wanthu azinji adalamba Jezu?

4. Kodi tin’pfunza ciyani mu nkhani ino?

⁴ Mu nkhani ino na mu nkhani yakutewera, tiniwona mathangwe yomwe yadacitisa wanthu azinji kuleka kukhulupira Jezu pomwe akhali pa dziko la pantsi. Ndipo tiniwonambo kuti thangwe ranyi wanthu azinji  ambalamba mafala yomwe timbawapalizira. Ndipo cinthu cakufunika kwene-kwene, tin’pfunza thangwe ranyi mpsakufunika kukhala na cikhulupiro cakulimba kuti tireke kubvuma cinthu ciri-centse kuti cititazise kutewera Jezu.

5. Thangwe ranyi wanthu winango akhakumbuka kuti Jezu akhali lini Mesiya omwe adalewedwa kuti angadadzabwera?

⁵ Wanthu azinji adalamba Jezu thangwe ra komwe iye adakulira. Iwo akhabvuma kuti Jezu akhali mpfunzisi wabwino ndipo akhacita bzinthu bzakudabwisa. Tsono iwo akhambandokumbuka kuti Jezu ni mwana wa karipintero wakusauka basi. Ndipo iwo akhakumbukambo kuti Jezuyo akhali wa ku Nazaleti omwe ukhali mzinda ung’ono omwe ukhawoneka kuti ulibe na basalo. Napo Nataniyeri omwe adadzakhala nyakupfunza wa Jezu, pakuyamba adalewa kuti: ‘Kodi ku Nazaleti kungacoke cinthu cabwino?’ (Juwau 1:46) Pinango Nataniyeri akhakomedwa lini na mzinda omwe Jezu adadzakhala. Ayai pinango iye akhakumbukira polofesiya yomwe imbagumanika pa Mikeya 5:2 yomwe ikhadaleweratu kale kuti Mesiya angadadzabadwira ku Beremu, sikuti ku Nazaleti.

6. Kodi n’ciyani comwe cingadathandiza wanthu kuzindikira kuti Jezu akhali Mesiya?

⁶ Kodi Bzinembo bzimbalewa ciyani? Mpolofeta Zaiya akhadalewa kale kuti anyamadulanthaka wa Jezu angadadzafuna lini ‘kudziwa bza m’badwo wa [Mesiya].’ (Zaiya 53:8) Apolofeta akhadalewa kale bzinthu bzizinji bzomwe bzingadadzacitika pakulewa bza Mesiyayo. Tenepo, bzingadakhala kuti wanthuwo adapambula nthawe yakuti abvesese nkhani yentse, iwo angadadziwa kuti Jezu adabadwira ku Beremu ndipo iye akhali wa m’badwo wa Mambo Davide. (Luka 2:4-7) Na tenepo, mbuto yomwe Jezu adabadwira, ikhabverana na polofesiya ya pa Mikeya 5:2. Tsono n’ciyani comwe cikhali cakuphonyeka? Wanthuwo akhandothamanga na munyu uko nkhuku akanati kuiphata. Iwo akhalibe umboni bwakukwanira. Ndipopa thangwe ra bzimwebzi, iwo adalamba Jezu.

7. Thangwe ranyi wanthu azinji ambalamba kukhala Mboni za Yahova?

⁷ Kodi ntsiku zino timbagumanambo na bvuto ninga limweri? Inde. Atumiki azinji wa Yahova, ni wanthu wakusauka ayai ambawoneka ninga kuti alibe basa. Tenepo, wanthu azinji ambakumbuka kuti iwo ni wanthu ‘wakusaya kupfunza na wakunyozeka.’ (Mabasa 4:13) Ndipo wanthu winango ambakumbuka kuti atumiki wa Yahova an’funika lini kupfunzisa wanthu bzomwe Bibliya limbalewa, thangwe iwo alibe kucita mapfunziro yakulewa bza magereja. Winango ambalewa kuti Mboni za Yahova ni “gereja ya ku América.” Tsono cadidi n’cakuti Mboni za Yahova zizinji zimbakhala lini ku América. Ndipo wanthu winango ambauzidwa kuti Mboni za Yahova zimbakhulupira lini Jezu. Ndipo kuyambira kale-kale, wanthu ambacemera atumiki wa Yahova kuti “Makomunista,” “azondi wa ku América” na “wanthu wakugopswa.” Tenepo, wanthu azinji ambafuna lini kukhala Mboni za Yahova thangwe ra bzomwe iwo ambabvabzi, ndipo ambafuna lini kudziwa cadidi cakulewa bza atumiki wa Yahova.

8. Mwakubverana na Mabasa 17:11, kodi n’ciyani comwe wanthu an’funika kucita penu akufuna kudziwa Mboni za Yahova ntsiku zino?

⁸ Kodi n’ciyani cin’dzathandiza munthu kuleka kuluza cikhulupiro cace? Wanthu an’funika kucita ciri-centse kuti akhale na umboni bwakukwanira pakulewa bza nkhani yomwe abva. Bzimwebzi ndibzo bzomwe munembi wa Bibliya Luka adatsimikiza kucita. Iye akhafuna kuti anyakuwerenga ‘[atsimikize bzinthu bzomwe]’ akhadabva pakulewa bza Jezu. Tenepo iye adacita nyongo ya ‘kufufudza bzinthu bzentse bwino-bwino kuyambira paciyambi.’ (Luka 1:1-4) Adjuda wa ku Bereya akhali ninga Luka. Pomwe iwo adayamba kubva bzipsa bzabwino pakulewa bza Jezu, adafufudza m’Bzinembo bza Cihebereu kuti atsimikizire kuti bzomwe iwo akhapfunzisidwabzo bzikhali bzacadidi. (Werengani Mabasa 17:11. *) Mu njira ibodzi-bodziyi, wanthu ntsiku zino an’funika kumbafufudzambo kuti ambakhale na umboni bwakukwanira. Iwo an’funika kumbandendemeza bzomwe ambapfunzisidwa na atumiki wa Mulungu na bzomwe Bzinembo bzimbalewa. Ndipo an’funikambo kumbapfunza nkhani za  atumiki wa Yahova wa mu nthawe zathu zino. Tenepo, ninga momwe ambacitira patrau akafuna kupitisa munthu basa, iye ambayamba amufufudza kuti akhale na umboni bwakukwanira. Mpsibodzi-bodzimbo na iwo. Akambafufudza kuti akhale na umboni bwakukwanira, an’dzabvuma lini kuti tsankhulo ayai mabvera-bvera yawampsinkhe m’maso.

9. Kodi n’ciyani cidacitika pomwe Jezu adalamba kucita cizindikiro cakucokera kudzulu?

⁹ Kwa winango, bzinthu bzabwino bzomwe Jezu akhawapfunzisa, bzikhawakwanira lini. Iwo akhafuna bzizinji. Tenepo iwo adauza Jezuyo kuti alatize kuti ni Mesiya mwakucita ‘cizindikiro cakucokera kudzulu.’ (Mateu 16:1) Pinango iwo adamuuza kuti acite bzimwebzi thangwe ra kusaya kubvesesa mafala yomwe adayawerenga pa Danyeri 7:13, 14. Tsono imweyi ikhali lini nthawe yakuti Yahova acite bzomwe polofesiyayi imbalewa. Bzomwe Jezu akhapfunzisa, bzikhali bzakukwanira kuna wanthuwo kuti atsimikize kuti Jezu akhalidi Mesiya. Tsono pomwe Jezuyo adalamba kuwapasa cizindikiro comwe iwo akhafuna, wanthuwo adalamba kuti iye akhali Mesiya.—Mateu 16:4.

10. Kodi Jezu adakwanirisa tani mafala yomwe Zaiya adanemba pakulewa bza Mesiya?

¹⁰ Kodi bzinembo bzimbalewa ciyani? Pakulewa bza Mesiya, mpolofeta Zaiya adanemba kuti: ‘Iye an’dzakuwa lini ayai kubveka mafala yace, ndipo mafala yace yan’dzabvedwa lini mu mseu.’ (Zaiya 42:1, 2) Jezu adacita utumiki bwace mwakusaya kubziwonesa. Ndipo iye alibe kumanga templo, alibe kubvala bzakubvala bzakuumira ayai kucemeredwa na madzina yakusiyana-siyana ya magereja. Pomwe Jezu akhatongedwa mulandu, iye alibe kucita cinthu cakudabwisa kuti akondwese Mambo Herode, napo kuti moyo wace ukhali pa ngozi. (Luka 23:8-11) Jezu adacita bzinthu bzinango bzakudabwisa, tsono cinthu cakufunika kwene-kwene kwa iye, cikhali kupalizira bzipsa bzabwino. Ndipopa iye adauza anyakupfunza wace kuti: ‘Ndidabwerera cakulinga cimweci.’—Marko 1:38.

11. Kodi ni makumbukidwe yaponi yakuphonyeka yomwe wanthu anayo ntsiku zino?

¹¹ Kodi ntsiku zino timbagumanambo na bvuto ninga limweri? Inde. Ntsiku zino, wanthu azinji ambadabwa thangwe ra kuwona magereja momwe adayakonzera na bzinthu bzakudekesera bzakuumira kwene-kwene, ndipo iwo ambadabwambo na madzina ya atsogoleri wa magerejawo yomwe yambabveka ninga kuti iwo ni wanthu wakufunika kwene-kwene. Ndipo ambadabwa pomwe na miyambo yomwe wanthu azinji ambadziwa lini kuti idayamba tani. Tsono wanthu omwe ambanamata magereja yamweya  ambapfunza lini bzinthu bzizinji pakulewa bza Mulungu na bzomwe iye ambafuna. Wanthu omwe ambagumanika pa mitsonkhano yathu ambapfunza bzomwe Yahova ambafuna kwa ifepano ndipo ambacita bzinthu mwakubverana na bzomwe iye ambafuna. Nyumba zathu za Umambo, zidacena ndipo zidakonzedwa bwino, tsono zimbakhala ziribe bzakudekesera bzakuumira kwene-kwene. Ndipo wale omwe ambatsogolera, ambabvala lini bzakubvala bzakusiyana na bza anzawo ndipo iwo ambapasidwa lini madzina yomwe yambabveka ninga kuti iwo ni wanthu wakufunika kwene-kwene. Bzomwe ifepano timbapfunzisa na kukhulupira, bzimbacokera m’Bibliya. Napo bziri tenepo, wanthu azinji ntsiku zino ambalamba mafala yomwe timbawapalizira, thangwe rakuti tiribe bzakucita-cita bzizinji pa mitsonkhano yathu. Ndipo bzomwe ifepano timbapfunzisa ni bzinthu lini bzomwe wanthu ambadikhirira kuti angadabva.

12. Mwakubverana na Wahebereu 11:1, 6, kodi n’ciyani comwe cingakulise cikhulupiro cathu?

¹² Kodi n’ciyani comwe cin’dzatithandiza kuleka kuluza cikhulupiro cathu? Mpostolo Paulo adauza Akristau wa ku Roma kuti: ‘Cikhulupiro cimbabwera pambuyo pa kubva bzinthu, ndipo bzinthu bzakubvedwabzo bzimbakhala bzakucokera m’mafala yakulewa bza Kristu.’ (Waroma 10:17) Tenepo, ifepano timbakulisa cikhulupiro cathu mwakupfunza Fala la Mulungu sikuti na kanamatidwe komwe kambabverana lini na bzomwe Bibliya limbapfunzisa, napo kanamatidweko kawoneke ninga kuti n’kabwino ayai kakudekeza. Tin’funika kukulisa cikhulupiro cathu kucokera pa cidziwiso ca cadidi, thangwe ‘mwakusaya cikhulupiro, bzingakwanisike lini kukondwesa Mulungu.’ (Werengani Wahebereu 11:1, 6. *) Tenepo, tin’funika lini kucita kuwona cizindikiro cakucokera kudzulu kuti titsimikize kuti tagumana cadidi. Kupfunza bwino-bwino bzinthu bzakulimbikisa bza m’Bibliya n’kwakukwanira kuti titsimikizire kuti tagumana cadidi, ticileka kupenukira.

13. Kodi n’ciyani comwe cidacitisa kuti wanthu azinji alambe Jezu?

¹³ Mu nthawe ya Jezu, anyakupfunza wa Juwau Batista akhadabwa thangwe ra kuwona anyakupfunza wa Jezu akucita lini jejum. Jezu adalewa kuti iwo akhalibe mathangwe yakucitira jejum pomwe  iye akhana moyo. (Mateu 9:14-17) Napo bzikhali tenepo, Afarizi na anyamadulanthaka wace winango, adamupasa mulandu thangwe rakuti iye akhateweza lini miyambo yawo. Iwo adakalipa kwene-kwene pomwe Jezuyo adapoza munthu pa ntsiku ya Sabudu. (Marko 3:1-6; Juwau 9:16) Ndipo iwo akhalewa mwakucita kusamwa kuti akhalemekeza ntsiku ya Sabudu; tsono okha-okhawo akhawona kuti bziribe mulandu kucita malonda mu templo pa ntsikuyo. Tsono pomwe Jezu adawatsimula kuti thangwe ranyi akhacita bzimwebzo, iwo adakalipa. (Mateu 21:12, 13, 15) Ndipo wale omwe Jezu adawapalizira mu sinagoga ya ku Nazaleti, adakalipa kwene-kwene pomwe Jezuyo adaphatisa basa bziratizo bza moyo wa Ajirayeri kuti awalatize kuti iwo akhali wanthu wakubzifuna kwene-kwene na wakusaya cikhulupiro. (Luka 4:16, 25-30) Wanthu azinji adalamba Jezu thangwe rakuti Jezuyo alibe kucita bzinthu bzomwe iwo akhadikhirira kuti iye angadacita.—Mateu 11:16-19.

14. Thangwe ranyi Jezu adatsimula miyambo ya wanthu yomwe ikhabverana lini na Bzinembo?

¹⁴ Kodi Bzinembo bzimbalewa ciyani? Mwakuphatisa basa mpolofeta wace Zaiya, Yahova adalewa kuti: ‘Wanthu awa ambafendera kwa ine na pamulomo pawo, ndipo ambandilemekeza na miromo yawo basi, koma mtima wawo uli kutali na ine; Ndipo kundinamata kwawo kumbacokera pa miyambo ya wanthu, yomwe iwo adapfunzisidwa.’ (Zaiya 29:13) Jezu akhana ugo bwa kutsimula wanthu omwe akhacita miyambo yomwe ikhabverana lini na Bzinembo. Wale omwe akhakumbuka kuti malamulo na miyambo ya wanthu mpsakufunika kuposa Bzinembo, akhalamba Yahova na ule omwe adamutuma ninga Mesiya.

15. Thangwe ranyi wanthu azinji ntsiku zino ambakomedwa lini na Mboni za Yahova?

¹⁵ Kodi ntsiku zino timbagumanambo na bvuto ninga limweri? Inde. Wanthu azinji ambakomedwa lini akambawona kuti Mboni za Yahova zikucita lini nawo pabodzi miyambo yomwe imbabverana lini na Bibliya, ninga kusekerera ntsiku ya kubadwa na kucita Natale. Wanthu winango ambakalipa thangwe rakuti Mboni za Yahova zimbasekerera lini ntsiku za Feriado ayai zimbacita lini misinda ya nkhawa yomwe imbabverana lini na Fala la Mulungu. Wentse omwe ambakomedwa lini na bzomwe Mboni za Yahova zimbacita pa mathangwe yamweya, ambakhulupira kuti Mulungu ambabvuma momwe iwo ambamunamatira. Kulewa cadidi Mulungu ambakomedwa lini na wanthuwo akambacita miyambo yomwe imbabverana lini na bzomwe Bibliya limbalewa.—Marko 7:7-9.

16. Mwakubverana na Psalymo 119:97, 113, 163-165, kodi n’ciyani comwe tin’funika kucita, ndipo n’ciyani comwe tin’funika kutcenkha?

¹⁶ Kodi n’ciyani cin’dzatithandiza kuleka kuluza cikhulupiro cathu? Tin’funika kukulisa lufoyi lathu pa malamulo ya Yahova na mitemo yace. (Werengani Psalymo 119:97, 113, 163-165. *) Tikambafuna Yahova, ifepano tin’dzalamba miyambo yentse yomwe imbamukondwesa lini. Ndipo tin’dzabvuma lini kuti cinthu ciri-centse cititazise kufuna Yahova.

17. Kodi wanthu azinji akhadikhirira kuti Jezu angadawacitira ciyani?

¹⁷ Mu nthawe ya Jezu wanthu winango akhafuna kuti iye acinje utongi pa nthawe imweyire. Iwo akhadikhira kuti Mesiya angadadzawatsudzula ku utongi bwa Aroma bomwe bukhawapundiza. Tsono pomwe iwo adayeza kumusankhula kuti akhale Mambo, iye adalamba. (Juwau 6:14, 15) Antsembe na wanthu winango akhana mantha yakuti penu Jezu angadacinja utongi, Aroma angadatengera antsembewo ugo bomwe akhanabo. Thangwe ra thupo lawoli Adjuda azinji adalamba Jezu.

18. Kodi ni mapolofesiya yaponi ya m’Bibliya yakulewa bza Mesiya yomwe wanthu azinji akhalibe nayo basa?

¹⁸ Kodi Bzinembo bzimbalewa ciyani? Napo kuti mapolofesiya mazinji yakhadaleweratu kuti Mesiya angadadzakhala nyakukunda pa nkhondo, mapolofesiya manango yadalatiza kuti cakuyamba iye akhafunika kufera pikado zathu. (Zaiya 53:9, 12) Tsono thangwe ranyi iwo akhana makumbukidwe yakuipa  pakulewa bza Mesiya? Wanthu azinji mu nthawe ya Jezu akhalibe nabzo basa bza kufuna kudziwa bza mapolofesiya yomwe yakhalewa kuti Jezu angadacinja lini bzinthu pa nthawe imweyire.—Juwau 6:26, 27.

19. Kodi ni makumbukidwe yaponi yakuphonyeka yomwe yambacitisa wanthu kusaya kukomedwa nafe?

¹⁹ Kodi ntsiku zino timbagumanambo na bvuto ninga limweri? Inde. Wanthu azinji ntsiku zino ambakomedwa lini nafe thangwe rakuti timbapitira lini nkhani za ndale. Iwo ambafuna kuti tiyende ku kavota, tsono ifepano timbadziwa kuti tikasankhula munthu kuti akhale mtongi wathu, timbakhala tikulamba Yahova. (1 Samuweri 8:4-7) Pinango wanthu angakumbukembo kuti tin’funika kumbamanga maxikola, kumanga maxipitali na kucitambo mabasa yomwe yangathandize wanthu wa komwe timbakhala. Iwo ambaipidwa thangwe rakuti timbayikha basa lakupalizira pa mbuto yakuyamba pa moyo wathu, sikuti kuyeza kumalisa mabvuto ya dzikoli.

20. Mwakubverana na mafala ya Jezu yakugumanika pa Mateu 7:21-23, n’ciponi cinthu cakufunika kwene-kwene kwa ifepano?

²⁰ Kodi n’ciyani cin’dzatithandiza kuleka kuluza cikhulupiro cathu? (Werengani Mateu 7:21-23. *) Cinthu cakufunika kwene-kwene kuna ifepano ndico kucita basa lomwe Jezu adatiuza kuti ticite. (Mateu 28:19, 20) Tin’funika lini kutanganidwa na nkhani za ndale za m’dzikoli. Timbafuna wanthu ndipo timbafuna kuwathandiza akakhala akugumana na mabvuto. Tsono timbadziwa kuti njira yabwino yakuthandizira anzathu ndiyo kuwapfunzisa bza Umambo bwa Mulungu na kuwathandiza kuti akulise uxamwali bwawo na Yahova.

21. Kodi n’ciyani comwe tin’funika kutsimikiza?

²¹ Mu nkhani ino tapfunza bzinthu bzinai bzomwe bzidacitisa wanthu kulamba Jezu pomwe iye akhali pa dziko la pantsi pano, na bzomwe bzimbacitisa wanthu ntsiku zino kulamba ateweri wa Jezu. Tsono, kodi ni bzinthu bzimwebzi bzokha bzomwe tin’funika kutcenkha kuti tileke kuluza cikhulupiro cathu? Ne. Mu nkhani yakutewera, tin’dzawona pomwe bzinthu bzinai bzomwe bzingatitazise kukhala na cikhulupiro. Tenepo, tentse mbatitsimikizeni kulamba kuti cinthu ciri-centse cititazise kupitiriza kukhala na cikhulupiro cakulimba.