NKHANI YAKUPFUNZA 21
Yahova An’dzakupasani Mphanvu
‘Ndikatepa, ni pomwe nimbakhala wamphanvu.’—2 WAKOLINTO 12:10.
NYIMBO 73 Tithandizeni Kukhala Wakukhwimika
BZOMWE TIN’PFUNZA *
1-2. Kodi ni mabvuto yaponi yomwe Mboni za Yahova zizinji zimbagumana nayo?
MPOSTOLO Paulo adapasa mphanvu Timotio pabodzi na Akristau wentse kuti akwanirise mbali zentse za utumiki bwawo. (2 Timotio 4:5) Tenepo, timbabvera malango ya Paulo ndipo timbatumikira Mulungu ninga momwe tingakwanisire. Tsono nthawe zinango bzimbatinesa kucita bzimwebzi. Abale na mpfumakazi zathu zizinji ambafunika kukhala wakukhwimika kuti acite basa lakupalizira. (2 Timotio 4:2) Mwa ciratizo, kumbukirani abale wathu omwe akukhala m’madziko yomwe basa lathu ndakuletsedwa. Iwo ambapalizira basi, napo acidziwa kuti akaphatidwa an’fungiridwa m’kawoko!
2 Wanthu wa Yahova ambagumana na mabvuto yakusiyana-siyana yomwe yambawamalisa mphanvu. Mwa ciratizo, abale azinji ambamala nthawe izinji akuphata basa kuti akwanise kudyesa mabanja yawo. Iwo ambafuna kucita bzizinji mu utumiki, tsono kuphampha kwa sumana ambakhala alibe mphanvu yakucita bzimwebzi. Winango thangwe ra kuduwala ayai kukalamba, ambakwanisa lini kucita bzinthu bzizinji pakutumikira Yahova, ndipo ambandokhala ali pamui pawo. Winangombo nthawe zentse ambabziwona kuti mbakusaya kufunika kwa Yahova. Mpfumakazi Mary, * idalewa kuti: “Bzimbafunika nyongo kuti ndicose makumbukidwe yakuipa yomwe yambandiboneresa. Nimbabzipasa mulandu, thangwe kucita bzimwebzi kumbandimalira nthawe na mphanvu zomwe ningadaphatisa basa mu utumiki.”
3. Kodi tin’cezerana ciyani mu nkhani ino?
3 Bziribe basa kuti ni mabvuto yaponi yomwe tikugumana nayo, Yahova angatipase mphanvu kuti tipitirize kumutumikira ninga momwe tingakwanisire. Tsapano tikanati kucezerana momwe Yahova angatithandizire, bwerani tiwone momwe iye adapasira mphanvu Paulo na Timotio kuti akwanirise utumiki bwawo, napo kuti iwo akhagumana na mabvuto.
YAHOVA AMBATIPASA MPHANVU KUTI TIPITIRIZE KUPALIZIRA
4. Kodi Paulo adagumana na mabvuto yaponi?
4 Paulo adagumana na mabvuto mazinji. Iye akhafunikira mphanvu, maka-maka pomwe adamenyedwa, adabomedwa na minyala na pomwe adaikhidwa m’kawoko. (2 Wakolinto 11:23-25) Paulo alibe kubva manyazi kulewa kuti iye nthawe zinango akhacita nyongo kuti amalise makumbukidwe yakuipa. (Waroma 7:18, 19, 24) Iye adapirirambo matenda yomwe yakhali ninga ‘munga m’thupi’ omwe akhafunisisa kuti Mulungu amucosere.—2 Wakolinto 12:7, 8.
Kodi n’ciyani cidathandiza Paulo kuti akwanise kucita utumiki bwawo? (Onani ndime 5-6) *
5. Kodi Paulo adacita ciyani napo kuti akhagumana na mabvuto?
5 Yahova adapasa mphanvu Paulo kuti apitirize kucita utumiki bwace, napo kuti akhagumana na mabvuto. Onani bzomwe Paulo adacita. Mwa ciratizo, pa nthawe yomwe Paulo akhali m’kawoko m’nyumba ku Roma, iye adacita nyongo yakukhotcerera mafala ya Mulungu pakati pa akulu-akulu wa Adjuda ndipo pinango pakati pa akulu-akulu wa boma. (Mabasa 28:17; Wafiripo 4:21, 22) Pa nthawe ibodzi-bodziyo, Mulungu adaphatisa basa Paulo kuti anembe matsamba yomwe yadathandiza Akristau wacadidi wakale-kale ndipo yakupitiriza kuthandizambo Akristau wa ntsiku zino. Ndipo ciratizo ca Paulo cidalimbikisa gwere la ku Roma, lomwe likhana abale omwe adathumizira ‘kwene-kwene kukhwimika kwawo pakulewalewa mafala ya Mulungu mwakusaya mantha.’ (Wafiripo 1:14) Napo kuti pa nthawe inango Paulo angadakwanisa lini kucita bzinthu bzizinji bzomwe akhafuna, iye adacita bzinthu mwakubverana na momwe moyo wace ukhaliri, ndipo bzimwebzi bzidathandiza wanthu azinji kuti adziwe bzipsa bzabwino.—Wafiripo 1:12.
6. Mwakubverana na 2 Wakolinto 12:9, 10, kodi n’ciyani cidathandiza Paulo kuti akwanirise utumiki bwace?
6 Paulo adadziwa kuti bzentse bzomwe adacita pakutumikira Yahova, adabzicita sikuti na mphanvu zace, koma na mphanvu za Mulungu. Ndipo adalewa kuti mphanvu ya Mulungu ‘imbakhala yakukwana ukakhala wakutepa.’ (Werengani 2 Wakolinto 12:9, 10. *) Yahova adapasa mphanvu Paulo mwakuphatisa basa mzimu wace wakucena kuti Pauloyo akwanirise utumiki bwace bwino-bwino, napo kuti akhaboneresedwa, akhadafungiridwa m’kawoko na kugumanambo na mabvuto yanango.
Kodi n’ciyani cidathandiza Timotio kuti akwanise kucita utumiki bwawo? (Onani ndime 7) *
7. Kodi ni mabvuto yaponi yomwe Timotio akhafunika kuyakunda kuti akwanirise utumiki bwace?
7 Timotio, mwanzace wa Paulo, adathembambo mphanvu za Mulungu kuti akwanise kucita utumiki bwace. Timotio adaperekeza Paulo pomwe akhambacita maulendo ya umisiyonario. Ndipo Paulo adauzambo Timotio kuti acite ulendo bwakuyenda kukazungira magwere na kukayalimbikisa. (1 Wakolinto 4:17) Pinango Timotio adabzibva kuti akhalibe kuthemera kucita bzimwebzi. Ndipopa Paulo adamuuza kuti: ‘Leka kubvuma kuti ali-wentse akunyoze pakuwona kuti ndiwe mng’ono.’ (1 Timotio 4:12) Tenepo, pa nthawe imweyi Timotio akhana munga wace m’thupi, komwe kukhali ‘kudwala-dwala.’ (1 Timotio 5:23) Napo bzikhali tenepo, Timotio akhadziwa kuti mphanvu ya mzimu wakucena wa Yahova, ingadamukhwimisa acipitiriza kupalizira bzipsa bzabwino na kutumikira abale wace.—2 Timotio 1:7.
YAHOVA AMBATIPASA MPHANVU KUTI TIPITIRIZE KUKHALA WAKUKHULUPIRIKA NAPO PA MABVUTO
8. Kodi Yahova ambatipasa tani mphanvu ntsiku zino?
8 Ntsiku zino Yahova ambapasa wanthu wace ‘mphanvu yakuposa yacibadwa’ kuti iwo apitirize kumutumikira mwakukhulupirika. (2 Wakolinto 4:7) Mbaticezeraneni bzinthu bzinai bzomwe Yahova ambatipasa kuti bzitithandize kukhala wakukhwimika na kutithandiza kuti tipitirize kukhala wakukhulupirika kuna iye. Bzinthubzo ni: mpembo, Bibliya, ciphatano cathu cacikristau na utumiki bwathu.
Yahova ambatilimbikisa mwakuphatisa basa mpembo (Onani ndime 9)
9. Kodi mpembo ungatithandize tani?
9 Timbakhala na mphanvu tikambacita mpembo. Pa Wayefezo 6:18, Paulo adatiuza kuti timbapembe kwa Mulungu pa ‘cakucitika ciri-centse.’ Ndipo Mulunguyo an’dzatitawira mwa kutithandiza. Jonnie, omwe ambakhala ku Bolívia, adawona momwe Yahova adamuthandizira pomwe iye akhagumana na mabvuto yakusiyana-siyana. Mkazace na abereki wace, adaduwala kwene-kwene pa nthawe ibodzi-bodzi. Bzidakhala bzakunesa kwene-kwene kuna Jonnie kucita bzentsene bzomwe iye akhafunika kucita kuti asamalire wentsenewo. Mai wace adadzasaika, ndipo padamala nthawe izinji kuti mkazace na pai wace alimbe matenda yomwe akhaduwala. Jonnie adalewa kuti: “Ndikanyang’anisa m’mbuyo, cinthu comwe cidandithandiza pa nthawe yomwe ndikhagumana na mabvuto, ni kupemba kwa Yahova ntsiku zentse na kumufotokozera momwe ndikhabvera.” Yahova adapasa Jonnie mphanvu yomwe akhafunikira kuti apirire. Ku Bolívia, Ronald, omwe ni mkulu wa gwere, adadziwa kuti mkazace akhana kankro. Mkazi waceyo adadzasaika pomwe padapita mwezi m’bodzi. Kodi n’ciyani cidathandiza Ronald kuti apirire pa nthawe yakunesayi? Iye adati: “Kupemba kwa Yahova nthawe zentse kumbandithandiza kukhala wakutsudzuka na kumufotokozera momwe ndikubvera. Nimbadziwa kuti iye ambandibvesesa bwino-bwino kuposa munthu ali-wentse, ndipo ambandibvesesambo kuposa momwe nimbabzidziwira ndekha.” Nthawe zinango, ifepano tingabzibve kuti tamala mphanvu, ayai tingadziwe lini bzinthu bzomwe tin’funika kubzipempherera. Tsono Yahova akutikumbira kuti timbapembe kwa iye, napo tikawona kuti bzikutinesa kumufotokozera bzomwe tikukumbuka na momwe tikubvera.—Waroma 8:26, 27.
Yahova ambatilimbikisa mwakuphatisa basa Bibliya (Onani ndime 10)
10. Mwakubverana na Wahebereu 4:12, thangwe ranyi mpsakufunika kwene-kwene kumbawerenga Bibliya na kumbakumbukira bzomwe tikuwerengabzo?
10 Timbakhala na mphanvu tikambawerenga Bibliya. Paulo akhambawerenga Bzinembo kuti akhale na mphanvu na mtsangalazo. Ifepano tin’funika kumbacitambo bzibodzi-bodzibzi. (Waroma 15:4) Tikambawerenga Fala la Mulungu na kumbalikumbukira, Yahova an’dzaphatisa basa mzimu wace wakucena kuti utithandize kubvesesa bwino-bwino bzinembo na kuwona momwe tingabziphatise basa pa moyo wathu. (Werengani Wahebereu 4:12. *) Ronald, omwe afotokozedwa ule adalewa kuti: “Nimbatenda thangwe ra nyongo yomwe ndidacita ya kumbawerenga Bibliya usiku bwentse. Nimbakumbukira kwene-kwene makhalidwe ya Yahova na momwe iye ambasamalirira wanthu wace mwa lufoyi. Bzimwebzi bzimbandipasa mphanvu kwene-kwene.”
11. Kodi Bibliya lidalimbikisa tani mpfumakazi ibodzi yomwe ikhadasunama?
11 Tikambakumbukira bzomwe Fala la Mulungu limbalewa, bzimbatithandiza kukhala na makumbukidwe yabwino bzikakhala kuti tiri pa mabvuto. Onani momwe Bibliya lidathandizira mkazi mansiwa. Mkulu munango wa gwere adalewa kuti mkaziyo angapfunze nfundo zakufunika kwene-kwene akambawerenga bukhu la Djobi. Pomwe mkaziyo adadzacitadi bzimwebzi, iye adandothamangira kulewa makumbukidwe yakuphonyeka ya Djobi. M’makumbukidwe mwace, mkaziyo adalewa kuti: “Djobi! Leka kundokhala ucikumbukira mabvuto yako!” Tsono na kupita kwa nthawe, mkaziyo adadzawona kuti makumbukidwe yace yakhali yakundendemerana kwene-kwene na makumbukidwe ya Djobi. Bzimwebzi bzidathandiza mkaziyo kucinja momwe akhawonera bzinthu, ndipo adakhala na mphanvu yomwe idamuthandiza kupirira msunamo omwe akhanawo thangwe ra kufedwa bayace.
Yahova ambatilimbikisa mwakuphatisa basa Ciphatano cacikristau, na (Onani ndime 12)
12. Kodi Yahova ambatithandiza tani kukhala wakukhwimika mwakuphatisa basa Akristau anzathu?
12 Ciphatano cacikristau cimbatithandiza kukhala wakukhwimika. Njira inango yomwe Yahova ambatithandiza nayo kuti tikhale wakukhwimika, ni kuphatisa basa Akristau anzathu. Paulo adanemba kuti iye akhakhumba kulimbikisana na abale na mpfumakazi zace zacikristau. (Waroma 1:11, 12) Mary, omwe afotokozedwa kumayambiriro ule, ambafuna kukhala na abale pabodzi na mpfumakazi. Iye adati: “Yahova akhala akuphatisa basa abale na mpfumakazi omwe akhadziwa lini ne na pang’onopo mabvuto yangu. Iwo adalewa cinthu ayai adandinembera mafala yomwe yadandilimbikisa. Ndipo bzimwebzi ni bzomwe ndikhafunisisa. Ndipo bzidandithandizambo kukhala wakutsudzuka kuceza na mpfumakazi zomwe zikhagumanambo na mabvuto mabodzi-bodziya ndipo ndidapfunzambo na bzomwe mpfumakazizo zidacita. Kuthimizira bzimwebzi, akulu wa gwere ambandithandizambo kubzibva kuti abale na mpfumakazi m’gwere ambandifuna.”
13. Kodi ifepano tingalimbikisane tani pa mitsonkhano?
13 Mbuto yabwino yomwe tingambalimbikisirane, ni pa mitsonkhano yathu ya gwere. Mukambayenda ku mitsonkhano mungayezere kulimbikisa anzanu na mafala ya lufoyi na kutenda bzomwe iwo ambacita. Mwa ciratizo, ntsiku inango pomwe mtsonkhano ukhanati kuyamba, mkulu wa gwere wakucemeredwa Peter adauza mpfumakazi yomwe ina mwamuna omwe ni Mboni lini ya Yahova kuti: “Ifepano timbalimbikisidwa kwene-kwene tikambakuwonani mukubwera pa mitsonkhano. Imwepo nthawe zentse mumbabwera pa mitsonkhano na wana wanu atanthatu ndipo mitawiro yomwe mumbaipereka imbalatiza kuti mumbakhala mudakonzekera.” Maiyo pakutenda, adagwesa misozi ndipo adalewa kuti: “Yamweya ni mafala yomwe ndikhafunisisa kuyabva lero.”
Yahova ambatilimbikisa mwakuphatisa basa utumiki (Onani ndime 14)
14. Kodi kupalizira kumbatithandiza tani?
14 Timbalimbikisidwa tikambacita basa lakupalizira. Ifepano tikambapalizira cadidi ca m’Bibliya pabodzi na anzathu, timbagumana mtsangalazo na mphanvu, bziribe basa penu wanthu abvume ayai aleke kubvuma kutitetekera. (Mimwani 11:25) Mpfumakazi yakucemeredwa Stacy idawona momwe utumiki bumbatilimbikisira. Pomwe munthu m’bodzi wa m’banja lace adacosedwa, mpfumakaziyo idasumana kwene-kwene ndipo ikhabzibvunza kuti: ‘Kodi pana cinthu comwe ningacite kuti ndithandize munthu wa m’banja mwanguyu?’ Bzikhali bzakunesa kwene-kwene kuna mpfumakaziyi kusiya kukumbukira bzomwe bzidacitikabzi. Kodi n’ciyani cidathandiza mpfumakaziyi kukunda bvuto limweri? Ni utumiki. Pomwe mpfumakaziyi ikhapalizira, idayamba kukumbukira wanthu wa mu gawo, omwe iye akhawapalizira, omwe akhafunikira thandizo lace. Iye adati: “Pa nthawe imweyire, Yahova adandipasa nyakupfunza wa Bibliya omwe adayenda patsogolo mwakamfulumize. Bzimwebzi bzidandilimbikisa kwene-kwene. Cinthu comwe cidandithandiza kwene-kwene, ni kucita basa lakupalizira.”
15. Kodi mukupfunza ciyani na bzomwe Mary adalewa?
15 Abale winango angabzibve kuti an’kwanisa lini kucita bzinthu bzizinji mu utumiki thangwe ra momwe bzinthu bziriri pa moyo wawo. Penu imwepo mukubzibvambo tenepoyo, kumbukirani kuti Yahova ambakomedwa na nyongo yomwe mukulatiza pa kumutumikira. Onani pomwe ciratizo ca Mary. Pomwe iye adayenda ku mbuto komwe kuna wanthu omwe ambalewalewa cirewedwe cakusiyana na cace, adabzibva kuti akucita lini bzizinji mu utumiki. Iye adati: “Pa nthawe inango cinthu comwe ndikhakwanisa kucita, kukhali kundopereka mtawiro wa cigwatho ayai kuwerenga vesi la m’Bibliya, ayai kupereka tumatsamba mu utumiki.” Bzimwebzi bzidamucitisa kubziwona kukhala wakusaya kufunika pa kubzindendemezera na abale wakumwekowo. Napo bzikhali tenepo, iye adadzacinja momwe akhawonera bzinthu. Iye adayamba kuwona kuti Yahova angamuphatise basa napo kuti ambadziwa lini kulewalewa bwino-bwino cirewedwe ca kumweko. Mary adalewa pomwe kuti: “Cadidi ca m’Bibliya n’cakupusa kubvesesa ndipo cimbacinja moyo wa wanthu.”
16. Kodi n’ciyani comwe cingathandize wale omwe akukwanisa lini kucoka pamui kuti akwanise kupalizira?
16 Yahova ambawona ndipo ambatenda nyongo yathu yomwe timbalatiza mu utumiki, napo penu tikukwanisa lini kucoka pamui thangwe ra mabvuto yakusiyana-siyana. Yahova angatipase mipata kuti tipalizire wale omwe ambatisamalira pamui ayai adotolo. Tikambandendemezera bzomwe tikhacita kale-kale, bzingatigobole m’mabondo. Tsono tikakumbukira momwe Yahova akutithandizira tsapano, tin’dzagumana mphanvu zomwe tikufunikira kuti tipirire mabvuto yali-yentse ticikhala wakukondwa.
17. Mwakubverana na Mpalizi 11:6, thangwe ranyi tin’funika kupitiriza kupalizira napo wanthu alambe kutitetekera?
17 Ifepano timbadziwa lini kuti ni mbewu ziponi zacadidi zomwe tikabzala zingamere ziciyamba kukula. (Werengani Mpalizi 11:6. *) Mwa ciratizo, mpfumakazi yakucemeredwa Barbara ya magole 80 yakubadwa, kawiri-kawiri imbapalizira mwakuphatisa basa mtedwe na kunemba matsamba. Mu envolope momwe adaikha tsamba lomwe iye adanemba, adaikhambo Ntsanza ya Mulindiri ya 1 Março, 2014, yomwe ina msolo wakuti “Kodi Ndi Zinthu Ziti Zimene Mulungu Wakuchitirani?” Ndipo mwakusaya kudziwa, mpfumakaziyo idatumiza tsambalo kuna banja lomwe likhadasiya kukhala Mboni za Yahova. Iwo adawerenga kwene-kwene Ntsanza ya Mulindiriyo. Mwamuna adabva ninga kuti Yahova akulewaleweratu na iye. Banjalo lidayamba pomwe kutsonkhana pinango-pentse pambuyo pa magole 27, iwo adadzayamba kutumikira pomwe Yahova mwamphanvu. Barbara adalimbikisidwa kwene-kwene thangwe ra kudziwa kuti tsamba lace lidaphata basa mwa njira imweyi.
Yahova ambatilimbikisa mwakuphatisa basa (1) mpembo, (2) Bibliya, (3) Ciphatano cacikristau, na (4) utumiki (Onani ndime 9-10, 12, 14)
18. Kodi n’ciyani comwe tingacite kuti tigumane phindu na mphanvu za Mulungu?
18 Yahova ambatipasa mphanvu zace mu njira zakusiyana-siyana. Tikambaphatisa basa njira zacezo ninga mpembo, Bibliya, ciphatano cathu cacikristau na utumiki, timbalatiza kuti timbakhulupira kuti iye angatithandize ndipo iye ambafunisisa kucita bzimwebzo. Tenepo, nthawe zentse timbathembe Baba wathu wakudzulu omwe ambafuna kulatiza ‘mphanvu zace kwa wale omwe mtima wawo ngwakusaya kugawanika.’—2 Nkhani 16:9.
NYIMBO 61 Yendani Patsogolo Abale!
^ ndi. 5 Ifepano tikukhala mu nthawe zakunesa, tsono Yahova ambatithandiza kuti tipirire. Mu nkhani ino tiniwona momwe Yahova adathandizira mpostolo Paulo na Timotio kuti apitirize kumutumikira napo kuti akhagumana na mabvuto. Ndipo tin’cezerana bzinthu bzinai bzomwe Yahova ambatipasa kuti bzitithandize kupirira ntsiku zino.
^ ndi. 2 Dzinali lacinjidwa.
^ ndi. 6 2 Wakolinto 12:9 Koma iye adandiuza kuti: “Kudeka mtima kwangu n’kwakukwanira kwa iwepo, pakuti mphanvu yangu imbakhala yakukwana ukakhala wakutepa.” Na kukondwa kukulu, ndidapemba thangwe ra kutepa kwangu, kuti mphanvu ya Kristu ipitirize kukhala mwa ine ninga tendi. 10 Tenepo, nimbakomedwa pa kutepa, pa kutukanidwa, pa nthawe zakusaya, pa mazunzo pa mabvuto, thangwe ra Kristu. Pakuti ndikatepa, ni pomwe nimbakhala wamphanvu.
^ ndi. 10 Wahebereu 4:12 Pakuti fala la Mulungu ndamoyo ndipo ndamphanvu. Ndakuthwa kuposa mphanga iri-yentse yakuthwa kwentse-kwentse. Limbalasa munthu m’mtima mpaka kusiyanisa moyo na mzimu, pabodzi na nfundo za mafupa na muwongola. Ndipo limbakwanisa kuzindikira bzomwe munthu ambakumbuka na bzomwe ambalinga mu mtima mwace.
^ ndi. 17 Mpalizi 11:6 Bzala mbeu zako macibese ndipo boko lako lireke kupuma mpaka ku maulo; pakuti un’dziwa lini kuti n’ziponi zomwe zin’phata, penu ni izi ayai zire ayai pinango ni zentse.
