Wanthu winango omwe ambawerenga nkhaniyi mwakuthamanga-thamanga ambakhala na mbvunzo umweyu. Tsono pamwepa pambalewa bza wanthu awiri omwe akhana dzina lakuti Mefibozeti ndipo ifepano tingapfunze na nkhaniyi tikawona bzomwe bzidacitika.

Sauli, omwe akhali mambo wa Jirayeri, akhana wana 7 wacimuna na awiri wacikazi. Mwanace wakuyamba akhacemeredwa Jonatani. Ndipo Sauli adadzakhala pomwe na mwana wakucemeredwa Mefibozeti, omwe iye adabereka na Rizipa. Tsono Jonatani akhana mwana wakucemeredwambo Mefibozeti. Ndipopa Mambo Sauli akhana mwana wakucemeredwa Mefibozeti na mzukulu omwe akhana dzina libodzi-bodziri.

Pa nthawe inango, Mambo Sauli adayamba kuwenga kwene-kwene Agibeyoni omwe akhakhala pakati pa Ajirayeri ndipo adayezera kuwapha wentse. Bzikuwoneka kuti iye adapha Agibeyoni azinji. Bzimwebzi bzikhali bzakuphonyeka. Thangwe ranyi? Thangwe mu nthawe ya Djoswe akulu-akulu wa Jirayeri adacita mpangano wa mtendere na Agibeyoni.—Djoswe 9:3-27.

Mpangano umweyu ukhapitiriza kuphata basa mu nthawe ya Mambo Sauli. Tsono Mambo Sauli adayezera kucita cinthu cakusiyana na mpanganoyo ndipo adafuna kupha Agibeyoni wentse. Bzimwebzi bzidacitisa kuti ‘Sauli na wanthu wa pamui pace akhale na mulandu wa mulopa.’ (2 Samuweri 21:1) Pomwe padapita nthawe, Davide adadzakhala mambo. Ndipo Agibeyoni omwe adapulumuka adadzamuuza cinthu cakuipa comwe Sauli adacita. Tsono Davide adawabvunza kuti n’ciyani comwe cikhafunika kucitidwa kuti pikado ya Sauli ilekereredwe kuti Yahova asimbe dzikolo. Agibeyoni alibe kukumbira kobiri. Koma adakumbira kuti wana wa munthu omwe “akhafuna kuwaphayo” aperekedwe kwa iwo kuti awaphe. (Mirewengo 35:30, 31) Davide adacita bzomwe iwo adakumbira.—2 Samuweri 21:2-6.

Pa nthawe imweyire Sauli na Jonatani akhadafa kale koma Mefibozeti, mwana wa Jonatani, akhana moyo. Iye adacita ngozi pomwe akhali mwana acipunduka. Ndipo iye pakhalibe pa nthawe yomwe yavu wace adakapha Agibeyoni. Davide akhadacita mpangano wa uxamwali na Jonatani, omwe ungadacitisa kuti wana wa Jonataniyo agumane phindu na Mefibozeti kubodzi. (1 Samuweri 18:1; 20:42) Nkhaniyi imbalewa kuti: “Mambo [Davide] adabvera ntsisi Mefibozeti mwana Jonatani, mwana wa Sauli thangwe ra lumbiro lomwe Davide adalicita na Jonatani mwana wa Sauli patsogolo pa Yahova.”—2 Samuweri 21:7.

Tsono Davide adacita basi bzomwe Agibeyoni adakumbira. Iye adatenga wana awiri wa Sauli m’bodzi wa iwo wakucemeredwa Mefibozeti na azukulu wace wacimuna axanu aciwapereka kwa Agibeyoni. (2 Samuweri 21:8, 9) Bzomwe Davide adacitabzi bzidamalisa mulandu wa mulopa m’dzikolo.

Nkhani imweyi ingatipfunzise cinthu cinango. Lamulo la Mulungu likhalewa mwakubveka bwino kuti: “Mwana an’funika lini kufa thangwe ra kuphonya kwa pai wace.” (Bzakutonga 24:16) Ndipopa Yahova angadabvuma lini kuti wana awiri wa Sauli pabodzi na azukulu wace axanu aphedwe, bzingadakhala kuti iwo alibe mulandu. Ndipo lamulolo likhalewa pomwe kuti: “Munthu ali-wentse an’funika kufa thangwe ra pikado yace basi.” Bzikuwoneka kuti wana na azukulu wa Sauli omwe adafawa adathandizirambo kuti Agibeyoni aphedwe. Thangwe ra bzimwebzi, iwo adatambira nyathwa thangwe ra kuphonya kwawo.

Nkhani imweyi ikutithandiza kuwona kuti munthu an’funika lini kucita cinthu cakuphonyeka utowa acimbakumbuka kuti alibe mulandu thangwe rakuti acita kuuzidwa. Malango yabwino ya pa Mimwani yambalewa kuti: “Nyalalisa njira ya minyendo yako, ndipo njira zako zentse zin’dzakhala zakukhotcerereka.”—Mimwani 4:24-27; Aefezo 5:15.