1-2. Penu imwepo mukanati kukonzeka kuti mubatizidwe, n’thangwe ranyi mun’funika lini kubwerera m’mbuyo? (Onani cithunzi-thunzi ca pa tsamba lakuyamba.)

 PENU imwepo mukufuna kubatizidwa, ndiye kuti mukufuna cinthu cabwino kwene-kwene. Kodi mwakonzeka kuti mubatizidwe? Penu imwepo mukuwona tenepoyo ndipo akulu wa gwere lanu akubverana nabzo, lekani kugopa kubatizidwa. Mukabatizidwa, Yahova an’dzakusimbani kwene-kwene.

² Kodi alipo munthu omwe adakuuzani bzomwe mun’funika kucita kuti mubatizidwe? Ayai mudazindikira mwekha kuti pana bzinthu bzomwe mun’funika kucita kuti mubatizidwe? Penu mukanati kukonzeka kuti mubatizidwe, lekani kubwerera m’mbuyo. Imwepo mungakwanise kucinja bzomwe bzikufunikira pa moyo wanu mucifika pakubatizidwa, napo kuti ndimwe tswaka ayai wacikulire.

3. Kodi ni mbvunzo uponi omwe mwamuna wa ku Etiyopiya adabvunza Filipi, ndipo ni mbvunzo uponi omwe tingakhale nawo? (Mabasa 8:36, 38)

³ Werengani Mabasa 8:36, 38. Mwamuna munango wa ku Etiyopiya adabvunza Filipi kuti: “Kodi n’ciyani comwe cingandiletse kubatizidwa?” Mwamunayu akhafunisisa kubatizidwa, tsono kodi akhalidi wakukonzeka kuti abatizidwe?

4. Kodi mwamuna wa ku Etiyopiya adalatiza tani kuti akhafuna kupitiriza kupfunza?

⁴ Mwamuna wa ku Etiyopiya “akhadayenda ku Jeruzalemu kuti akanamate.” (Mabasa 8:27) Iye akhadabvuma cipfunziso ca Adjuda. Iye adapfunza bza Yahova kucokera m’Bzinembo bza Cihebereu. Ndipo iye akhafunisisa kupfunza bzizinji. Pomwe Filipi adayenda kukagumana naye, kodi adamuwona  akucita ciyani? Adamuwona akuwerenga mwakukuwa bukhu la mpolofeta Zaiya. (Mabasa 8:28) Bzomwe iye akhawerengabzo bzikhali bzakunesa kubvesesa. Mwamunayo akhandofuna lini kupfunza bzinthu bzakucepa; koma akhafuna kupitiriza kupfunza bzinthu bzizinji.

5. Kodi mwamuna wa ku Etiyopiya adaphatisa tani basa bzomwe adapfunza?

⁵ Mwamunayo akhali nyabasa mkulu wa mu utongi bwa Kandasi, mambo wacikazi wa ku Etiyopiya; iye “akhanyang’anira cuma centse ca mamboyo.” (Mabasa 8:27) Bzimwebzi bzikulatiza kuti iye akhana mabasa mazinji kuti acite. Koma iye akhakhala na nthawe yakuti anamate Yahova. Iye akhatondo lini kupfunza; koma akhaphatisambo basa bzomwe akhapfunzabzo. Ndipopa iye adacita ulendo kucokera ku Etiyopiya aciyenda ku Jeruzalemu kuti akanamate Yahova. Ku Jeruzalemu kukhali kutali, koma napo bzikhali tenepo, iye adacita nyongo yakuyenda kumweko kuti akanamate Yahova.

6-7. Kodi n’ciyani comwe mwamuna wa ku Etiyopiya adacita pakufuna kulatiza kuti lufoyi lace kwa Yahova likhakula?

⁶ Mwamuna wa ku Etiyopiya adapfunza bzinthu bzinango bzakufunika kwene-kwene na Filipi pakulewa bza Mesiya. (Mabasa 8:34, 35) Mwamunayu adakomedwa kwene-kwene pomwe adabva bzomwe Jezu adamucitira. N’ciyani comwe iye adacita pomwe adapfunza bzinthu bzimwebzi? Iye angadafuna, pambuyo pa kubzibva angadandobzisiyambo tenepoyo. Koma bziribe kukhala tenepo. Pomwe iye adabva bzimwebzi, lufoyi lace kwa Yahova na Jezu lidakula. Iye adacinja moyo wace acifuna kubatizidwa kuti akhale mteweri wa Jezu. Filipi adawona kuti mwamunayo akhadakonzeka kuti abatizidwe, ndipopa adamubatiza.

⁷ Imwepo mukatewezera bzomwe mwamuna wa ku Etiyopiya ule adacita, mungakhale wakukonzeka kuti mubatizidwe. Ndipo imwepo mungabzibvunzembo mwakutsimikiza kuti: “Kodi n’ciyani comwe cingandiletse kubatizidwa?” Bwerani tiwone kuti mungatewezere tani bzomwe mwamuna wa ku Etiyopiya ule adacita: Iye adapitiriza kupfunza, adaphatisa basa bzomwe akhapfunzabzo ndipo adapitiriza kukulisa lufoyi lace kwa Mulungu.

8. Kodi mafala ya pa Juwau 17:3 yambakulimbikisani kuti mucite ciyani?

⁸ Werengani Juwau 17:3. Kodi mafala ya Jezuya yakukucitisani kuti mufune kupfunza Bibliya? Bzimwebzi ndibzo bzomwe tentsenefe timbafuna. Tsono kodi tin’funika kupitiriza kupfunza? Inde. Ifepano tin’dzasiya lini ‘kupfunza bza Mulungu wacadidi.’ (Mpalizi 3:11) Tin’dzapitiriza kupfunza bza iye mpaka muyaya. Tikapitiriza kupfunza bza Yahova, uxamwali  bwathu na iye bun’dzakhala bwakulimba. — Salimo 73:28.

9. N’ciyani comwe tin’funika kucita tikadziwa bzipfunziso bzakuyambirira bza m’Bibliya?

⁹ Tikayamba kupfunza Bibliya timbapfunza bzinthu bzakusaya kunesa. Mu tsamba lomwe adanembera Ahebereu, mpostolo Paulo adacemera bzipfunziso bzimwebzi kuti “bzinthu bzakuyambirira.” Iye akhalewa lini kuti ‘bzipfunziso bzakuyambirirabzo’ bzikhali bzakusaya kufunika; koma akhabzindendemezera na mkaka wa mwana. (Ahebereu 5:12; 6:1) Iye adalimbikisa Akristau kuti apitirize kupfunza bzizinji bza m’Fala la Mulungu. Kodi imwepo mumbafuna kupfunza bzinthu bzakunesa bza m’Bibliya? Kodi mukufuna kupitiriza kupfunza bzizinji pakulewa bza Yahova na kucita bzomwe iye ambafuna?

10. Thangwe ranyi wanthu winango angakumbuke kuti an’kwanisa lini kupfunza?

¹⁰ Azinji wa ifepano bzimbatinesa kupfunza. Tani kwa imwepo? Pomwe mukhali ku xikola, imwepo mudapfunza kuwerenga. Kodi mukhakomedwa na kupfunzako? Ayai mukhawona kuti mungadakwanisa lini kupfunzako? Wanthu winango ambawona kuti angakwanise lini kupfunza mwakuphatisa basa mabukhu. Penu muli ninga iwo, dziwani kuti Yahova angakuthandizeni. Iye ni Mpfunzisi wabwino kwene-kwene.

11. Kodi Yahova ambalatiza tani kuti ni ‘Mpfunzisi Mkululetu’?

¹¹ Yahova ni “Mpfunzisi [wathu] Mkululetu.” (Zaiya 30:20, 21) Iye ni Mpfunzisi wakudeka mtima na wa ntsisi. Iye ambafuna kuthandiza anyakupfunza wace. (Salimo 130:3) Ndipo iye ambadikhirira lini kuti ticite bzinthu bzomwe tingakwanise lini kucita. Onani kuti iye adatipasa mphaso yabwino kwene-kwene yomwe ni ulupi. (Salimo 139:14) Iye adatilenga na mtima wakufuna kupfunza. Mulengi wathu, Yahova, akufuna kuti timbakomedwe na kupfunza. Ndipopa ni cinthu canzeru ‘kufunisisa’ kupfunza Fala la Mulungu, Bibliya. (1 Pedru 2:2) Tenepo, mbacitani nyongo yakuwerenga Bibliya na kulipfunza nthawe zentse. (Djoswe 1:8) Na thandizo la Yahova, imwepo mun’dzakomedwa kuwerenga na kupfunza bzizinji pakulewa bza Yahova.

12. Thangwe ranyi tin’funika kumbakumbukira bza moyo wa Jezu pomwe tikupfunza?

¹² Mbakhalani na nthawe yakukumbukira bza moyo wa Jezu na utumiki bwace. Tikatewezera Jezu tin’dzakwanisa kutumikira Yahova, maka-maka mu ntsiku zakumalizira zino. (1 Pedru 2:21) Jezu adauza anyakupfunza wace bza mabvuto yomwe angadadzagumana nayo. (Luka 14:27, 28) Tsono iye akhadziwa kuti anyakupfunza wace angadapitiriza kukhala wakukhulupirika kwa Yahova ninga momwe iye adacitira. (Juwau 16:33) Pfunzani bza moyo wa Jezu ndipo onani momwe mungamutewezerere.

13. N’ciyani comwe tin’funika kupitiriza kumukumbira Yahova, ndipo n’thangwe ranyi?

¹³ Kundodziwa bzomwe tin’funika kucita n’kwakukwanira lini. Cakufunika kwene-kwene ndico kukhala na makhalidwe yomwe Yahova ambakomedwa nayo, ninga lufoyi na kumukhulupira. (1 Akolinto 8:1-3) Pomwe tikupfunza, tin’funika kumbakumbira Yahova kuti atithandize kukhala na cikhulupiro cakulimba. (Luka 17:5) Iye ngwakukonzeka kutawira mipembo yathu. Tikakhala na cikhulupiro cakulimba kwa Mulungu, iye an’dzatithandiza kuyenda patsogolo mwauzimu. — Tiyago 2:26.

14. Kodi mpostolo Pedru adalewa bza ciyani kuti atithandize kudziwa kufunika kwa kumbaphatisa basa bzomwe tikupfunza? (Onani cithunzi-thunzi.)

¹⁴ Mpostolo Pedru adalewa kuti mpsabwino kwene-kwene kwa anyakupfunza wa Jezu kupitiriza kumbaphatisa basa bzomwe iwo ambapfunza.  Iye adafotokoza bza nkhani ya Nowa. Yahova adauza Nowa kuti iye angadapfudza wanthu omwe akhacita bzinthu bzakuipa mwakuphatisa basa cigumula ca madzi. Kundodziwa kuti Cigumula cire cingadabwera kungadapulumusa lini Nowa na banja lace. Pomwe Pedru adalewa kuti “cingalawa cikhamangidwa” akhalewa bza nthawe yomwe Cigumula cikhanati kucitika. (1 Pedru 3:20) Nowa na banja lace adalatiza kuti akhaphatisa basa bzomwe akhapfunza mwa kumanga cingalawa. (Ahebereu 11:7) Pedru adandendemezera bzomwe Nowa adacita na ubatizo. Iye adanemba kuti: “Bzomwe bzidacitika mu ntsiku zimwezire, tingabzindendemezere na ubatizo bomwe tsapano bukukupulumusani.” (1 Pedru 3:21) Bzomwe Nowa adacita pakumanga cingalawa tingabzindendemezerembo na bzomwe imwepo mukucita kuti mubatizidwe. Kodi mungakonzekere tani kuti mubatizidwe?

15. Kodi tingalatize tani kuti takunguladi na mtima wentse?

¹⁵ Cinthu cibodzi comwe mun’funika kucita ni kukungula pikado zanu. (Mabasa 2:37, 38) Imwepo mukakungula na mtima wentse, bzinthu bzin’dzakufambirani bwino pa moyo wanu. Kodi imwepo mudasiya kucita bzinthu bzomwe Yahova ambabziwenga, ninga upombo, kufumali na nthabwala zakutukwana? (1 Akolinto 6:9, 10; 2 Akolinto 7:1; Aefezo 4:29) Penu mukanati kusiya kucita bzimwebzi, citani nyongo kuti mubzisiye. Kumbirani thandizo kwa munthu omwe ambapfunza namwe Bibliya ayai kwa akulu wa gwere. Penu ndimwe tswaka ndipo mukukhala pabodzi na abereki wanu, auzeni kuti akuthandizeni kusiya kucita bzinthu bzakuipa bzomwe bzingakutaziseni kubatizidwa.

16. Kodi n’ciyani comwe tin’funika kucita penu tikufuna kupitiriza kunamata Yahova?

¹⁶ Cinthu cinango comwe tin’funika kucita kuti tipitirize kunamata Yahova ndico kumbayenda ku mitsonkhano nthawe zentse na kukhala na ndondomeko yabwino yauzimu. (Ahebereu 10:24, 25) Imwepo mukabvumizidwa kuti mumbapalizire, mbacitani nyongo yakucita bzimwebzi nthawe zentse. Imwepo mukambapalizira, mun’dzakhala wakukondwa kwene-kwene. (2 Timotio 4:5) Penu ndimwe tswaka ndipo mukukhala pabodzi na abereki wanu, bzibvunzeni kuti: ‘Kodi nimbacita kuuzidwa na abereki wangu kuti ndiyende ku  mitsonkhano na mu upalizi? Ayai nimbadikhirira lini kuuzidwa?’ Mukacita tenepo, imwepo mun’dzalatiza kuti mumbamufuna Yahova ndipo mumbatenda bzinthu bzentse bzabwino bzomwe iye adakucitirani. Bzimwebzi bzin’dzalatizambo kuti ndimwe “wakubzipereka kwa Mulungu.” (2 Pedru 3:11; Ahebereu 13:15) Mphaso zomwe timbapereka kwa Yahova mwakusaya kukakamizika zimbamukondwesa. (Ndendemezerani na 2 Akolinto 9:7.) Ifepano timbakomedwa kwene-kwene tikacita bzomwe Yahova ambafuna.

17-18. Kodi ni khalidwe liponi lomwe lingakuthandizeni kuti mufike pa kubatizidwa, ndipo n’thangwe ranyi? (Mimwani 3:3-6)

¹⁷ Pomwe mukucita nyongo kuti mubatizidwe, imwepo mun’dzagumana na mabvuto. Pinango wanthu angakunyozeni thangwe ra cikhulupiro canu. (2 Timotio 3:12) Pinango imwepo mukucita nyongo kuti musiye kucita bzinthu bzakuipa, tsono bzikukunesani. Pinango mungacite ciya thangwe rakuti mukutazira kucita bzomwe mukufuna. N’ciyani comwe cingakuthandizeni kupirira mpaka kufika pa kubatizidwa? Ni lufoyi lanu kwa Yahova.

¹⁸ Lufoyi lanu kwa Yahova ni cinthu cakufunika kwene-kwene. (Werengani Mimwani 3:3-6.) Tikakhala na lufoyi kwa Yahova tin’dzabwerera lini m’mbuyo pomwe tikugumana na mabvuto. Bibliya limbalewa kuti Yahova ana lufoyi lacadidi kuna atumiki wace. Ndipo lufoyi limweri limbamala lini. (Salimo 100:5) Imwepo mudalengedwa m’cifanikiso ca Mulungu. (Ciyambo 1:26) Kodi lufoyiro tingalilatizembo tani?

19. Kodi n’ciyani comwe mungacite kuti mumbatende bzomwe Yahova adakucitirani? (Agalatiya 2:20)

¹⁹ Mbayambani ntsiku iri-yentse na kutenda Yahova. (1 Atesalonika 5:18) Ntsiku iri-yentse, mbabzibvunzani kuti: ‘Kodi Yahova ambalatiza tani kuti ambandifuna?’ Mukamala pembani kwa Yahova mucimutenda pa bzinthu bzomwe ambakucitirani. Ninga momwe mpostolo Paulo adazindikirira kuti Yahova adamucitira bzinthu bzizinji kwene-kwene, imwepo mbazindikiranimbo bzomwe Yahova ambakucitirani pamwekha. (Werengani Agalatiya 2:20.) Bzibvunzeni kuti: ‘Kodi ningalatize tani kuti nimbamufunambo Yahova?’ Lufoyi lanu kwa Yahova lin’dzakuthandizani kuti mudzakunde mabvuto yomwe mungadzagumane nayo. Ndipo lin’dzakuthandizanimbo kukhala na ndondomeko  yabwino yauzimu na kulatizambo kuti mumbafuna Yahova ntsiku iri-yentse.

20. N’ciyani comwe mun’funika kucita kuti mubzipereke kwa Yahova, ndipo n’thangwe ranyi?

²⁰ Na kupita kwa nthawe, lufoyi lanu kwa Yahova lin’dzakucitisani kuti mucite mpembo wakubzipereka kwa iye. Mukacita bzimwebzi, imwepo mun’dzakhala pa uxamwali bwakulimba na Yahova mpaka kale-kale. Mukabzipereka kwa Yahova, imwepo mumbakhala mukumuuza kuti: Mun’dzamutumikira pa moyo wanu wentse. Ndipo imwepo mun’dzafunikira lini kucita piciroli kawiri. Mukabzipereka kwa Yahova, mumbakhala mwacita cakusankhula cabwino kwene-kwene. Dziwani ibzi: Pa moyo wanu, imwepo mun’dzacita bzakusankhula bzizinji, koma kusankhula kutumikira Yahova ni cakusankhula cakufunika na cabwino kwene-kwene. (Salimo 50:14) Sathani an’dzayezera kukucitisani kuti musiye kukhala wakukhulupirika kwa Yahova. Lekani kulekerera kuti iye akukundeni! (Djobi 27:5) Lufoyi lanu kwa Yahova lin’dzakucitisani kuti mupitirize kukhala naye pa uxamwali bwakulimba na kumutumikira mpaka kale-kale.

21. Thangwe ranyi ubatizo n’kumala lini kwa bzinthu bzentse?

²¹ Pambuyo pa kubzipereka kwa Yahova, cezani na akulu wa m’gwere lanu kuti akuthandizeni kudziwa bzinthu bzinango bzomwe mun’funika kucita. Nthawe zentse mbakumbukirani kuti ubatizo ni kumala lini kwa bzentse. Cimweci cimbakhala ciyambi cakutumikira Yahova. Ndipopa, kulisani lufoyi lanu kwa Yahova. Ndipo mbacitani nyongo yakukulisa lufoyiro ntsiku iri-yentse. Bzimwebzi bzin’dzakuthandizani kuti mubatizidwe. Ntsiku imweyo in’dzakhala yakudekeza kwene-kwene. Tsono cimweci ni ciyambi basi. Na tenepo, pitirizani kukulisa lufoyi lanu kwa Yahova na kwa Mwana wace, Jezu Kristu, mpaka kale-kale!