NKHANI YAKUPFUNZA 14
“Na Bzimwebzi, Wentse An’dzadziwa Kuti Ndimwe Anyakupfunza Wangu”
“Na bzimwebzi, wentse an’dzadziwa kuti ndimwe anyakupfunza wangu mukambafunana.” — JUWAU 13:35.
NYIMBO 106 Kulisani Khalidwe la Lufoyi
BZOMWE TIN’PFUNZA a
Kodi n’ciyani comwe wanthu azinji ambalewa akawona lufoyi lomwe Mboni za Yahova zimbalatizana?(Onani ndime 1)
1. N’ciyani comwe wanthu azinji ambawona akayamba kutsonkhana nafe? (Onani cithunzi-thunzi.)
KUMBUKIRANI bza banja lomwe layamba kutsonkhana na Mboni za Yahova mu Nyumba ya Umambo. Iwo akukomedwa kwene-kwene na momwe atambiridwira na kuwonambo lufoyi lomwe wentse ambalatizana m’gweremo. Pomwe banjalo likhabwerera ku mui, mkazi adauza bayace kuti: ‘Mboni za Yahova ni wanthu wakusiyana kwene-kwene na wanthu winango.’
2. Thangwe ranyi wanthu winango ambasiya kutumikira Yahova?
2 Wanthu ambakwanisa kuwona kuti Mboni za Yahova zimbafunana. Koma iwo ni wanthu wakuperewerambo. (1 Juwau 1:8) Tikawadziwa bwino abale wathu, timbakwanisambo kuwona bzakuphonya bzawo. (Aroma 3:23) Tsono wanthu winango ambalekerera kuti bzakuphonya bza winango bziwacitise kusiya kutumikira Yahova.
3. Kodi wanthu angawazindikire tani Akristau wacadidi? (Juwau 13:34, 35)
3 Onani pomwe msolo omwe ukutsogolera nkhani ino. (Werengani Juwau 13:34, 35.) N’ciyani comwe cingathandize wanthu kuwazindikira Akristau wacadidi? Ni lufoyi, sikuti kukhala wakulungama. Onani kuti Jezu alibe kulewa kuti: ‘Na bzimwebzi, imwepo mun’dzadziwa kuti ndimwe anyakupfunza wangu.’ Koma iye adati: “Na bzimwebzi, wentse an’dzadziwa kuti ndimwe anyakupfunza wangu.” Na mafalaya, Jezu alibe kulewa kuti anyakupfunza wace angadadzadziwa kuti ambalatizana lufoyi. Koma adalewa kuti wanthu omwe ni anyakupfunza lini wa Jezu angadadzadziwa kuti anyakupfunza wa Jezuwo ambalatizana lufoyi.
4. Kodi wanthu angabzicite mibvunzo iponi?
4 Wanthu omwe ni Mboni lini za Yahova angabzibvunze kuti: ‘Kodi lufoyi limbazindikirisa tani Akristau wacadidi? Kodi Jezu adalatiza tani lufoyi kwa ateweri wace? Ndipo tingamutewezerembo tani Jezu ntsiku zino?’ Ifepano tin’funikambo basi kukumbukira mitawiro ya mibvunzo imweyi. Tikacita bzimwebzi, bzin’dzatithandiza kulatiza lufoyi kwa anzathu tikapitana nawo. — Aefezo 5:2.
THANGWE RANYI LUFOYI NDIRO LOMWE LIMBAZINDIKIRISA AKRISTAU WACADIDI?
5. Kodi Jezu adalewa ciyani pa Juwau 15:12, 13?
5 Jezu adalewa kuti anyakupfunza wace angadadzalatizana lufoyi likulu kwene-kwene. (Werengani Juwau 15:12, 13.) Onani kuti Jezu adalewa kuti: “Mumbafunane ninga momwe inepano ndidakufunirani.” Kodi bzimwebzi bzimbathandauza ciyani? Ninga momwe Jezu adalewera, bzimwebzi bzimbathandauza kuti tin’funika kufuna anzathu na kubvuma kuwafera bzikafunikira. b
6. Kodi Fala la Mulungu limbalatiza tani kuti lufoyi ndakufunika?
6 Bibliya limbalatiza kuti lufoyi ndakufunika kwene-kwene. Wanthu azinji ambafuna mavesi ya m’Bibliya ninga yomwe yambalewa kuti: “Mulungu ni lufoyi.” (1 Juwau 4:8) “Umbafune mwanzako ninga momwe umbabzifunira wekha.” (Mateu 22:39) “Lufoyi limbampsinkha pikado zizinji.” (1 Pedru 4:8) “Lufoyi limbamala lini.” (1 Akolinto 13:8) Mavesi yamweya na yanango yambalatiza padeca kuti mpsakufunika kumbalatizana lufoyi.
7. Thangwe ranyi Sathani angakwanise lini kucitisa wanthu kuti ambabverane?
7 Wanthu azinji ambabzibvunza kuti: ‘Kodi ningaizindikire tani gereja yacadidi? Magereja yentse yambalewa kuti yambapfunzisa cadidi, tsono gereja iri-yentse imbapfunzisa bzinthu bzakusiyana pakulewa bza Mulungu.’ Sathani adacitisa kuti pakhale magereja mazinji ndipo bzimwebzi bzimbacitisa kuti wanthu aleke kuizindikira gereja yacadidi. Koma iye angakwanise lini kucitisa kuti wanthu wa pa dziko lentse la pantsi akhale wakubverana. Ni Yahova yekha omwe angakwanise kucita bzimwebzi. Timbadziwa bzimwebzi thangwe lufoyi limbacokera kwa Yahova, ndipo wale omwe akusimbidwa na iye na omwe ana mzimu wace ndiwo angakwanise kulatiza lufoyi limweri. (1 Juwau 4:7) Ndipo Jezu adalewa kuti ni lufoyi lokha lomwe lingadawazindikirisa kuti ni Akristau wacadidi.
8-9. Kodi wanthu adazindikira ciyani pakuwona lufoyi lomwe Mboni za Yahova zimbalatizana?
8 Ninga momwe Jezu adalewera, wanthu azinji ambawazindikira Akristau wacadidi thangwe ra lufoyi lomwe iwo ambalatizana. M’bale munango wakucemeredwa Yan ambakumbukira bza mtsonkhano omwe iye adayenda omwe udacitikira pafupi na ku mui kwace mu kampo yakumenyera bola. Iye akhambayenda ku kampoko kukawona bola pomwe ntsiku ya mtsonkhanoyo ikhanati kufika. Iye adati: “Wanthu omwe akhali pa mtsonkhanoyo akhali wakusiyana kwene-kwene na wanthu omwe akhambayenda kumweko kukawona bola. Mboni za Yahova ni wanthu wakupfunzisika, ambabvala bwino ndipo wana wawo mbakubvera.” Iye adalewa pomwe kuti: “Wanthu amwewale akhali wakukondwa na wa mtendere, ndipo ndibzo bzomwe ndikhafuna pa moyo wangu. Inepano ndikukumbukira lini bza nkhani zomwe zidafotokozedwa ntsiku imweyire, koma ndikukumbukira bza khalidwe lomwe Mboni za Yahova zikhalatizana.” c Bzimwebzi bzimbakwanisika thangwe ra lufoyi lomwe timbalatizana pakati pathu. Pakuti timbafuna kwene-kwene abale na mpfumakazi zathu, tin’funika kumbawalemekeza na kumbawacitira bzinthu bzabwino.
9 M’bale munango wakucemeredwa John adadabwambo pomwe adayenda kukatsonkhana ku Nyumba ya Umambo. Iye adati: “Ndidadabwa kwene-kwene na kuwona momwe a Mboni za Yahova akhacitira bzinthu, ndipo ndidayamba kukumbuka kuti iwo mbakuperewera lini. Lufoyi lomwe iwo akhalatizana lidanditsimikizira kuti ndagumanadi gereja yacadidi.” d Bzimwebzi bzikulatiza kuti Mboni za Yahova ni Akristau wacadidi.
10. Kodi ni pa nthawe iponi yomwe tingalatize lufoyi? (Onani mafala ya m’nyantsi.)
10 Ninga momwe tawonera kale kumayambiriro kwa nkhani ino, abale na mpfumakazi zathu mbakuperewera. Nthawe zinango iwo angalewe ayai angacite cinthu comwe cingatikalipise. e (Tiyago 3:2) Pa nthawe imweyi, ifepano tin’funika kucita bzinthu bzomwe bzinilatiza kuti tina lufoyi. N’ciyani comwe tingapfunze na bzomwe Jezu adacita pa nkhani imweyi? — Juwau 13:15.
JEZU ADALATIZA LUFOYI KWA ANYAKUPFUNZA WACE
Jezu adalatiza lufoyi kwa apostolo wace napo kuti iwo akhaphonya kazinji-kentse (Onani ndime 11-13)
11. Kodi Tiyago na Juwau adalatiza khalidwe liponi? (Onani cithunzi-thunzi.)
11 Jezu akhadziwa kuti anyakupfunza wace ni wanthu wakuperewera. Ndipopa iye mwa lufoyi adawathandiza kuti acinje makhalidwe yawo yakuipa acikhala na makhalidwe yabwino kuti abvumidwe na Mulungu. Pa nthawe inango apostolo awiri, Tiyago na Juwau, adauza mai wawo kuti akumbire Jezu kuti adzawapase mbuto zakulemekezeka kudzulu. (Mateu 20:20, 21) Bzomwe Tiyago na Juwau adacitabzi bzidalatiza kuti iwo akhali wakubzikuza ndipo akhabziwona kuti akhali wakufunika kwene-kwene kuposa anzawo. — Mimwani 16:18.
12. Kodi ni Tiyago na Juwau wokha omwe adalatiza khalidwe la kubzikuza? Fotokozani.
12 Tiyago na Juwau ndiwo lini wokha omwe adalatiza khalidwe la kubzikuza pa nthawe imweyire. Onanimbo bzomwe apostolo winango wale adacita: “Pomwe anyakupfunza 10 wale adabva bzomwe Tiyago na Juwau adacita, iwo adakalipa.” (Mateu 20:24) Bzimwebzi bzikulatiziratu kuti Tiyago na Juwau pabodzi na apostolo winangowo adapopotezana. Pinango winango akhambalewa kuti: ‘Kodi imwepo ndimwe yani kuti mukumbire mbuto zakulemekezeka kudzulu? Ndimwe lini mwekha omwe mukuphata basa pabodzi na Jezu. Ifepano ndife wakuthemera kutambirambo mbuto zimwezi!’ Napo kuti tikudziwa lini bwino-bwino bzomwe iwo adalewa, koma bzomwe tikudziwa mpsakuti adapopotezana ndipo bzimwebzi bzikulatiza kuti iwo adayebwa kulatizana lufoyi.
13. Kodi Jezu adacita tani bzinthu na apostolo wace? (Mateu 20:25-28)
13 Kodi n’ciyani comwe Jezu adacita pa nkhani imweyi? Iye alibe kuwakalipira. Iye alibe kulewa kuti iwo ni wanthu wakuipa ndipo angadayenda kukanyang’ana apostolo winango omwe ambalatizana lufoyi. Koma iye adaceza nawo mwakugwa nfuwa, thangwe akhadziwa kuti iwo akhafuna kucita bzinthu bzabwino. (Werengani Mateu 20:25-28.) Iye adapitiriza kucita nawo bzinthu mwa lufoyi napo kuti kamweka kakhali lini kakuyamba kunesana. — Marko 9:34; Luka 22:24.
14. Kodi wanthu akhana makhalidwe yaponi mu nthawe ya apostolo wa Jezu?
14 Jezu akhadziwa bwino-bwino makhalidwe ya wanthu wa komwe apostolowo adakulira. (Juwau 2:24, 25) Pa nthawe imweyire, Adjuda na atsogoleri wa bzipembedzo akhambawona kuti munthu omwe ana udindo ndiye akhali wakufunika kwene-kwene. (Mateu 23:6; ndendemezerani na nkhani yakuti “Sunagoge Anali Malo Amene Yesu ndi Ophunzira Ake Ankakonda Kulalikira” mu Ntsanza ya Mulindiri ya 1 Abril, 2010, matsa. 16-18.) Akulu-akulu wa magerejawo akhambabziwona kuti mbakulungama kuposa anzawo. f (Luka 18:9-12) Jezu akhadziwa kuti apostolowo akhacita bzimwebzire thangwe ra kutewezera atsogoleri wa bzipembedzowo. (Mimwani 19:11) Ndipopa, iye akhadziwa kuti nthawe zinango apostolowo angadacita bzinthu bzakuphonyeka, ndipo akhapirira nawo. Iye akhadziwa kuti iwo ana mtima wabwino. Ndipopa adawathandiza mwakugwa nfuwa kuti aleke kukhala wakubzikuza acikhala na lufoyi.
TEWEZERANI BZOMWE JEZU ADACITA
15. Kodi tikupfunza ciyani na bzomwe bzidacitika pakati pa Tiyago na Juwau na anyakupfunza winango wa Jezu?
15 Ifepano tingapfunze bzizinji na bzomwe Tiyago na Juwau adacita. Pomwe iwo adakumbira mbuto zakulemekezeka kudzulu, adaphonya kwene-kwene. Ndipo bzomwe apostolo winango wale adacita bzikhali bzakuphonyekambo, thangwe adalekerera kuti mbverano wawo udzongeke. Koma Jezu adathandiza apostolo wace 12 wale mwa lufoyi. Kodi tingapfunze ciyani na bzimwebzi? Tikakhala tapitana na anzathu, cakufunika kwene-kwene ni momwe timbacitira bzinthu na anzathuwo sikuti kukumbukira kwene-kwene bzomwe iwo acita. Kodi n’ciyani comwe cingatithandize? Mwanzathu akaticitira cinthu comwe tiribe kukomedwa naco, tingabzibvunze kuti: ‘Thangwe ranyi bzomwe iye wacitabzi bzikundiwawa? Kodi bzimwebzi bzikulatiza kuti pana mbali inango yomwe nin’funika kucinja? Kodi munthu omwe wandiphonyerayi akugumana na bvuto pa moyo wace? Napo penu ndina lazau, kodi ningalatize lufoyi mwa kundoisiyambo tenepoyo nkhaniyi?’ Tikambacita bzinthu mwa lufoyi na anzathu tin’dzalatiza kuti ndife ateweri wa Jezu.
16. Kodi tingapfunze ciyani na bzomwe Jezu adacita?
16 Bzomwe Jezu adacita bzingatipfunzise momwe tingacitire bzinthu na Akristau anzathu. (Mimwani 20:5) Jezu akhakwanisa kuwona bzomwe bziri mu mtima mwa munthu, koma ifepano tingakwanise lini. Tsono ifepano tingakwanise kulekerera abale na mpfumakazi zathu akatiphonyera. (Aefezo 4:1, 2; 1 Pedru 3:8) Bzingakhale bzakupusa kucita bzimwebzo tikawadziwa bwino abale wathuwo. Mbaticezeraneni nkhani ibodzi yomwe ingatithandize kuwona momwe tingacitire bzimwebzi.
17. Kodi ni phindu liponi lomwe nyakunyang’anira dera munango adagumana thangwe ra kumudziwa bwino m’bale wace wacikristau?
17 Nyakunyang’anira dera munango omwe ambatumikira Kumabvadzuwa kwa África ambakumbukira bza m’bale m’bodzi omwe iye akhamuwona ninga kuti alibe ntsisi na wanthu. Kodi n’ciyani comwe nyakunyang’anira derayo adacita? Iye adati: “Inepano ndiribe kusiya kuceza naye m’baleyo koma ndidayezera kumudziwa bwino.” Bzimwebzi bzidathandiza nyakunyang’anira derayo kuzindikira kuti m’baleyo akhacita bzimwebzire thangwe ra komwe adakulira. Nyakunyang’anira derayo adalewa pomwe kuti: “Ndidadabwa kwene-kwene pomwe ndidawona kuti m’baleyo akhacita nyongo kuti acinje khalidwe lacero. Iye adadzakhala xamwali wangu wapamtima.” Kulewa cadidi, tikawadziwa bwino abale na mpfumakazi zathu, bzin’dzatinesa lini kuti tiwalatize lufoyi.
18. Kodi tin’funika kubzicita mibvunzo iponi m’bale wathu akatiphonyera? (Mimwani 26:20)
18 M’bale akatiphonyera, nthawe zinango tingawone kuti bziri bwino kucezerana naye. Tsono pomwe tikanati kucita bzimwebzo, tingacite bwino kubzibvunza kuti: ‘Kodi ndikuibvesesa bwino nkhaniyi?’ (Mimwani 18:13) ‘Kodi iye wandikalipisa utowa?’ (Mpalizi 7:20) ‘Kodi ca ntsiku ndidaphonyerambo kale munthu tenepa?’ (Mpalizi 7:21, 22) ‘Ndikayenda kuti ndikaceze naye, kodi nkhaniyi inkamala bwino ayai inkakula-kula?’ (Werengani Mimwani 26:20.) Tikakhala na nthawe ya kukumbukira mibvunzo imweyi, tin’dzakwanisa kulatiza lufoyi kuna abale na mpfumakazi zathu ndipo tin’dzawalekerera mwakusaya kunesa.
19. Kodi n’ciyani comwe tentsenefe tin’funikira kucita?
19 Mboni za Yahova zimbadziwika kuti ni Akristau wacadidi thangwe ra lufoyi lomwe zimbalatizana. Ifepano tin’dzalatiza kuti ndife ateweri wa Jezu tikambalatiza lufoyi kuna abale na mpfumakazi zathu akatiphonyera. Tikacita bzimwebzi, wanthu an’dzadziwa kuti ndifedi Akristau wacadidi ndipo an’dzafunambo kunamata nafe pabodzi Yahova, Mulungu wathu walufoyi. Ndipopa, mbatipitirizeni kulatiza lufoyi thangwe iro limbazindikirisa Akristau wacadidi.
NYIMBO 17 “Ndin’funa”
a Wanthu azinji ambafuna kupfunza Bibliya thangwe ra kuwona lufoyi lomwe timbalatizana pakati pathu. Pakuti ndife wanthu wakuperewera, nthawe zinango bzingatinese kulatiza lufoyi kwa Mkristau mwanzathu omwe tapitana naye. Mu nkhani ino, tiniwona kuti thangwe ranyi mpsakufunika kulatizana lufoyi ndipo tiniwonambo kuti tingatewezere tani Jezu tikapitana na anzathu.
b Onani bukhu lakuti “Bwera Ukhale Wotsatira Wanga” msolo 17, ndi. 10-11.
c Onani nkhani yakuti “Tsopano ndinapeza cholinga cha moyo wanga” mu Ntsanza ya Mulindiri ya 1 Novembro, 2012, matsa. 13-14 (Chichewa).
d Onani nkhani yakuti “Zinthu zinkaoneka ngati zikundiyendera bwino” mu Ntsanza ya Mulindiri ya 1 Maio, 2012, matsa. 18-19 (Chichewa).
e Nkhani ino ikufotokoza lini bza pikado zikulu-zikulu zomwe zin’funika kufika kwa akulu, ninga zire zomwe zimbagumanika pa 1 Akolinto 6:9, 10.
f Mtsogoleri m’bodzi wa cipembedzo adadzacita kulewa kuti: “M’dzikoli muna wanthu ang’ono-ng’ono wakulungama ninga Abalahamu. Penu wanthuwo alipo 30, inepano na mwana wangu tiri pamwepombo; penu alipo 10, inepano na mwana wangu tiri pamwepombo; penu alipo 5, inepano na mwana wangu tiri pamwepombo; penu alipo awiri, wanthu amwewo ndinepano na mwana wangu; penu alipo m’bodzi basi, munthu umweyo ndine pano.”
