NKHANI YAKUPFUNZA 12
Pfunzani bza Yahova Kucokera m’Cirengedwe
“Makhalidwe yace yakusaya kuwoneka, ninga mphanvu zace zakusaya kumala na bzinthu bzomwe bzimbalatiza kuti iye ni Mulungu, bzimbawonekera padeca kucokera pomwe adalenga dziko la pantsi.” — AROMA 1:20.
NYIMBO 6 Kudzulu Kumbalatiza Mbiri ya Mulungu
BZOMWE TIN’PFUNZA a
1. Kodi n’ciyani cidathandiza Djobi kuti amudziwe bwino Yahova?
MACEZA yomwe Djobi adakhala nayo na Yahova yadaposa maceza yentse yomwe iye adakhala nayo pa moyo wace. Pa macezayo, Yahova adaphatisa basa cirengedwe kuti athandize Djobi kuzindikira kuti Yahova ni Mulungu wanzeru nakuti ambasamalira atumiki wace. Djobi adawona kuti Yahova angakwanise kumusamalira thangwe iye ambasamalira bzirombo. (Djobi 38:39-41; 39:1, 5, 13-16) Iye adapfunza bzinthu bzizinji pakulewa bza Yahova mwakuwona bzinthu bza m’cirengedwe.
2. Thangwe ranyi nthawe zinango mpsakunesa kupfunza bzinthu bza m’cirengedwe?
2 Tingapfunze bzizinji pakulewa bza Yahova tikambawona bzinthu bzomwe iye adalenga. Tsono nthawe zinango bzimwebzi bzingakhale bzakunesa. Penu timbakhala mu mzinda, mpsakunesa kwene-kwene kuwona bzinthu bza m’cirengedwe. Napo ticikhala ku mbuto komwe mpsakupusa kuwona bzinthu bza m’cirengedwe, tingasaye nthawe ya kumbapfunza bzinthu bza m’cirengedwebzo. Mu nkhani ino, tin’cezerana phindu lomwe tingakhale nalo tikakhala na nthawe yakumbawona bzinthu bza m’cirengedwe. Ndipo tin’cezeranambo momwe Yahova na Jezu ambaphatisira basa cirengedwe kuti atipfunzise, na bzomwe ifepano tingacite kuti tipfunze na cirengedweco.
THANGWE RANYI TIN’FUNIKA KUMBAWONA BZINTHU BZA M’CIRENGEDWE?
Yahova akhafuna kuti Adamu akomedwe na cirengedwe, ndipopa adamupasa basa lakuti apase madzina bzirombo (Onani ndime 3)
3. N’ciyani cikulatiza kuti Yahova akhafuna kuti Adamu akomedwe na cirengedwe?
3 Yahova akhafuna kuti Adamu akomedwe na bzinthu bza m’cirengedwe. Iye adamuikha mu paraizo wakudeka ndipo adamupasa basa lakuti asamalire paraizoyo. (Ciyambo 2:8, 9, 15) Kumbukirani momwe Adamu akhabvera pakuwona mbewu zomwe akhadabzala pabodzi na maluwa zikumera. Ukhali mwayi ukulu kwene-kwene kwa Adamu kukhala m’zunde la Edeni! Ndipo Yahova adam’pasa mwayi ukulu wakupasa madzina bzirombo. (Ciyambo 2:19, 20) Yahova angadafuna angadapereka yekha madzinayo. Pomwe Adamu akhanati kupereka madzinayo, iye adayamba kupfunza cirombo ciri-centse kuti acidziwe bwino. Adamu akhakomedwa kwene-kwene kucita bzimwebzi. Bzimwebzi bzidamuthandiza kudziwa kuti Yahova ni Mulungu wanzeru kwene-kwene ndipo adalenga bzinthu bzakudeka.
4. (a) Thangwe ranyi tin’funika kumbawona bzinthu bza m’cirengedwe? (b) N’ciyani comwe imwepo mumbakomedwa naco mukambawona bzinthu bza m’cirengedwe?
4 Ifepano tin’funika kumbawona bzinthu bza m’cirengedwe thangwe ndibzo bzomwe Baba wathu Yahova akufuna. Iye adalewa kuti: “Kwizani maso yanu kudzulu.” Ndipo adabvunza kuti: “Mbani adalenga bzinthubzi?” Tentsenefe tikuudziwa kale mtawiro wace. (Zaiya 40:26) Yahova adalenga bzinthu bza kudzulu na bza pa dziko la pantsi kuti atipfunzise makhalidwe yace. (Salimo 104:24, 25) Mbakumbukirani momwe iye adatilengera. Iye adalenga bzinthu bzakudeka kuti ifepano tikomedwe nabzo. Yahova adatilenga mu njira yakuti timbakwanise kuwona, kubva, kuphata, kulawidza na kubva mnuntci.
5. Kodi tin’dzagumana phindu liponi tikambapfunza cirengedwe ca Yahova? (Aroma 1:20)
5 Bibliya limbafotokoza bza phindu lomwe timbakhala nalo tikambawona cirengedwe. Phindulo ndakuti timbafika pa kudziwa makhalidwe ya Yahova. (Werengani Aroma 1:20.) Tikambawona bzinthu bzomwe Yahova adalenga timbazindikira kuti iye ni Mulungu wanzeru kwene-kwene. Kumbukirani bza cakudya cabwino comwe timbadya. Bzentsenebzi bzimbalatiza kuti Yahova ambatifuna kwene-kwene. Cinango n’cakuti tikambawona bzinthu bzomwe iye adalenga, timbamudziwa bwino ndipo bzimbaticitisa kuti tikhale naye pa uxamwali bwakulimba. Tsapano mbatiwoneni momwe Yahova adaphatisira basa cirengedwe cace kuti atipfunzise.
YAHOVA AMBAPHATISA BASA CIRENGEDWE KUTI ATIPFUNZISE BZA IYE
6. Kodi tingapfunze ciyani na momwe Yahova adaikhira nthawe kuna mbalame?
6 Yahova ambacita bzinthu pa nthawe yace. Mu nthawe ya Ajirayeri pakhana mbalame zinango zomwe zikhambambuluka zicimbayenda ku Norte kwa dziko la Jirayeri kuphampha kwa mwezi wa Fevereiro na pakati pa mwezi wa Maio. Yahova adauza Ajirayeri kuti: “Napo dokowe omwe ambambuluka m’mulenga-lenga ambadziwa bwino nthawe yace.” (Jeremiya 8:7) Ninga momwe Yahova adaikhiratu nthawe yakuti mbalame zimwezi zimbambuluke, iye adaikhambo nthawe yakuti adzapereke ciyeruzo. Ntsiku zino tikambawona mbalame zikumbuluka timbakhulupira kuti Yahova “adaikha nthawe” kuti amalise uipi bwentse bwa m’dzikoli. — Habakuki 2:3.
7. Kodi tikupfunza ciyani na momwe Yahova ambapasira mphanvu mphungu? (Zaiya 40:31)
7 Yahova ambapasa mphanvu atumiki wace. Mwakuphatisa basa mpolofeta Zaiya, Yahova adauza wanthu wace kuti angadadzawapasa mphanvu. Iye adalewa kuti iwo “an’dzambuluka ninga ana matenga ya mphungu” akadzakhala adasunama. (Werengani Zaiya 40:31.) Mphungu zikakhala zikumbuluka zimbayenda padzaulu kwene-kwene pomwe pana mphepo yakupsa. Bzimwebzi bzimbacitisa kuti izo zimbuluke mwakusaya kunesa. Ninga momwe Yahova ambapasira mphanvu mphungu kuti zimbuluke, iye angatipasembo mphanvu kuti tikwanise kukunda mabvuto yomwe tikugumana nayo! Mukambawona mphungu zikumbuluka padzaulu kwene-kwene, mbakumbukirani kuti Yahova angakupaseni mphanvu kuti mukwanise kukunda mabvuto yanu yentse.
8. Kodi Djobi adapfunza ciyani na cirengedwe ca Yahova, ndipo bzimwebzi bzikutipfunzisa ciyani?
8 Tin’funika kumbamukhulupira Yahova. Yahova adathandiza Djobi kuti apitirize kumbamukhulupira. (Djobi 32:2; 40:6-8) Pomwe Yahova akhaceza na Djobi, iye adaphatisa basa bzinthu bzizinji bza m’cirengedwe ninga nyenyezi, mitambo na bziphaliwali. Ndipo iye adalewambo bza bzirombo, ninga ng’ombe ya m’thengo na kavalo. (Djobi 38:32-35; 39:9, 19, 20) Bzentsenebzi bzimbalatiza kuti Yahova ngwanzeru, ana mphanvu ndipo ana lufoyi. Maceza yamweya yadacitisa kuti Djobi amukhulupire Yahova na mtima wentse. (Djobi 42:1-6) Ifepanombo tikambawona bzinthu bza m’cirengedwe, timbakwanisa kudziwa kuti Yahova ngwanzeru ndipo ana mphanvu kwene-kwene kuposa ifepano. Ndipo iye angamalisembo mabvuto yathu yentse. Bzimwebzi bzingatithandize kuti timukhulupire kwene-kwene Yahova.
JEZU ADAPHATISA BASA CIRENGEDWE KUTI APFUNZISE WANTHU BZA BABA WACE
9-10. Kodi dzuwa na nvula bzimbatipfunzisa ciyani bza Yahova?
9 Jezu akhadziwa bzinthu bzizinji bza m’cirengedwe. Ninga “misiri,” iye adakhala na mwayi wakuphata basa pabodzi na Yahova pakulenga dziko la pantsi. (Mimwani 8:30) Pomwe Jezu akhali pa dziko la pantsi pano, adaphatisa basa cirengedwe kuti apfunzise anyakupfunza wace bza Baba wace. Mbatiwoneni bzinthu bzinango bzomwe iye adapfunzisa.
10 Yahova ambalatiza lufoyi lace kwa wanthu wentse. Pa Nkhani ya pa Phiri, Jezu adaphatisa basa dzuwa na nvula thangwe bzikhali bzinthu bzomwe wanthuwo akhabzidziwa bwino. Bzinthu bziwiribzi mpsakufunika kuti wanthu akhale na moyo. Yahova angadafuna angadapasa lini bzinthu bzimwebzi wanthu omwe ambamutumikira lini. Tsono iye ambagasira dzuwa na kubvumbisira nvula wanthu wentse. (Mateu 5:43-45) Jezu adapfunzisa anyakupfunza wace kuti Yahova ambafuna kuti ifepano timbalatize lufoyi kwa wanthu wentse. Tikambawona kumira kwa dzuwa na nvula, ifepano timbakwanisa kuwona kuti Yahova ana lufoyi kwa wanthu wentse. Ndipo bzimwebzi bzimbatithandiza kuti timbalatizembo lufoyi kwa wanthu wentse mwa kuwapalizira.
11. Kodi timbalimbikisika tani tikambawona mbalame?
11 Yahova ambatipasa bzinthu bzomwe timbafunikira pa moyo wathu. Pa Nkhani ya pa Phiri ibodzi-ibodzi ire, Jezu adalewa kuti: “Nyang’anisisani mbalame; izo zimbabzala lini mbeu, zimbabvuna lini ne kukoya cakudya m’gwangwa, koma Baba wanu wakudzulu ambazidyesa.” Mwakusaya kupenukira, pomwe Jezu akhapfunzisa bzimwebzi wanthuwo akhakwanisa kuwona mbalame zikumbuluka. Iye adawabvunza kuti: “Kodi imwepo ndimwe lini wakufunika kuposa mbalamezo?” (Mateu 6:26) Na bzimwebzi, timbakwanisa kudziwa kuti Yahova ambatipasa bzomwe timbafunikira pa moyo wathu! (Mateu 6:31, 32) Bzomwe timbapfunza kucokera m’cirengedwe bzikupitiriza kuthandiza atumiki azinji wakukhulupirika. Mpfumakazi inango ya ku Espanha ikhadasunama thangwe ikhakwanisa lini kugumana mbuto yakukhala. Tsono pomwe idawona mbalame zikudya, iyo idatsangalazika. Iyo idalewa kuti: “Mbalame zire zidandikumbusa kuti Yahova ambazisamalira ndipo inepano angandisamalirembo.” Patsogolo pace, mpfumakaziyo idagumana mbuto yakukhala.
12. Kodi bzomwe Mateu 10:29-31 ambalewa bzimbatipfunzisa ciyani pakulewa bza Yahova?
12 Yahova ambasamalira ali-wentse payekha. Pomwe Jezu akhanati kutumiza ateweri wace kuti ayende kukapalizira, iye adawalimbikisa kuti aleke kukacita mantha. (Werengani Mateu 10:29-31.) Iye adacita bzimwebzi mwakuwafotokozera bza mbalame zomwe zikhadziwika kwene-kwene ku Jirayeri. Mu nthawe ya Jezu mbalame zimwezi zikhali lini zakufunika kwene-kwene. Koma Jezu adauza anyakupfunza wace kuti: “Palibe ne na kabodzi ka tumbalametu komwe kangagwe pantsi Baba wanu wakudzulu acisaya kudziwa.” Iye adalewa pomwe kuti: “Imwepo ndimwe wakufunika kwene-kwene kuposa tumbalame tuzinji.” Na mafala yamweya, Jezu adawatsimikizira kuti Yahova ambafuna mtumiki wace ali-wentse payekha. Ndipopa iwo akhafunikira lini kugopa cizunzo. Pomwe anyakupfunzawo akhawona tumbalame pomwe akhapalizira, mwakusaya kupenukira akhakumbukira mafala yomwe Jezu akhadawauza yale. Mukambawona mbalame, mbakumbukirani kuti Yahova ambakufunani pamwekha “thangwe ndimwe wakufunika kwene-kwene kuposa tumbalame tuzinji.” Ndipo na thandizo lace, imwepo mungakwanise kukunda cizunzo. — Salimo 118:6.
TINGAPFUNZE BZIZINJI PAKULEWA BZA YAHOVA MWAKUWONA CIRENGEDWE
13. N’ciyani comwe tin’funika kucita kuti tipfunze bzinthu bzizinji bza m’cirengedwe?
13 Ifepano tingapfunze pomwe bzinthu bzizinji pakulewa bza Yahova mwakuwona cirengedwe. Mwa njira iponi? Cakuyamba, mwakumbakhala na nthawe yakumbawona cirengedwe. Caciwiri, tin’funika kuwona momwe cirengedweco cikutipfunzisira pakulewa bza Yahova. Tsono kucita bzimwebzi kulibe kupusa. Mpfumakazi inango ya ku Cameroon, yakucemeredwa Géraldine, idalewa kuti: “Inepano ndidakulira mu mzinda, ndipopa ndikhafunikira kucita nyongo kuti ndiwone bzinthu bza m’cirengedwe.” Mkulu munango wa gwere wakucemeredwa Alfonso, adalewa kuti: “Ndidapfunza kuti ndikhafunikira kunyang’ana nthawe kuti nimbakhale kwandekha kuti ndikwanise kuwona cirengedwe ndicikumbukira momwe cirengedweco cikundipfunzisira pakulewa bza Yahova.”
Davide adapfunza bzizinji pakulewa bza Yahova mwakuwona na kukumbukira bzinthu bza m’cirengedwe (Onani ndime 14)
14. Kodi Davide adapfunza ciyani na bzinthu bza m’cirengedwe?
14 Davide akhakumbukira kwene-kwene bza cirengedwe ca Mulungu. Iye adauza Yahova kuti: “Ndikanyang’anisisa kudzulu, basa la bzala bzanu, mwezi na nyenyezi zomwe mudalenga, nimbabzibvunza kuti: Mbani munthu kuti mumukumbukire, ndipo mbani mwana wa munthu kuti mumusamalire?” (Salimo 8:3, 4) Pomwe Davide adawona nyenyezi alibe kundokhala tenepoyo, koma adakumbukirambo momwe nyenyezizo zikhamupfunzisira pakulewa bza Yahova. Ndipo adapfunzambo kuti Yahova ni Mkululetu. Davide adakwanisa kuzindikira kuti Yahova akhamuwona pomwe akhali m’mimba mwa mai wace. Bzimwebzi bzidamucitisa kuti akumbukire kuti Yahova ngwanzeru kwene-kwene. — Salimo 139:14-17.
15. Fotokozani bzinthu bzomwe mumbawona m’cirengedwe bzomwe bzimbakuthandizani kudziwa makhalidwe ya Yahova. (Salimo 148:7-10)
15 Ninga Davide, ifepanombo tinganyang’ane cinthu ca m’cirengedwe kuti timbacipfunze. Pana bzinthu bzizinji bzomwe bzingatithandize kumudziwa bwino Yahova. Timbapfunza bzizinji pakulewa bza Yahova tikambabva kuthuma kwa dzuwa. (Jeremiya 31:35) Tikambawona mbalame zikukonza citsa, bzimbalatiza kuti Yahova ngwanzeru. Kodi mukukumbuka kuti Yahova ambabva tani akambawona mbwaya ikusenzeka na mcira wace? Iye ambakomedwa kwene-kwene. Ndipo mbatendani Yahova thangwe ra lufoyi lace mukambawona mai akusenzeka na mwana wace. Tina mwayi ukulu kwene-kwene wakupfunza bzizinji bza m’cirengedwe ca Yahova thangwe bzentsenebzi bzimbamutumbiza, napo bzicikhala bzikulu ayai bzing’ono, bziri pafupi ayai bziri kutali. — Werengani Salimo 148:7-10.
16. Kodi n’ciyani comwe tentsenefe tin’funika kucita?
16 Mulungu wathu ngwanzeru, ngwalufoyi, ngwamphanvu ndipo bzentse bzomwe iye adalenga mpsakudeka kwene-kwene. Tingapfunze bzizinji pakulewa bza Yahova tikambawona bzinthu bza m’cirengedwe. Mbakhalani na nthawe yakumbawona bzinthu bza m’cirengedwe na kukumbukira momwe ibzo bzikukupfunzisirani pakulewa bza Yahova. Mukacita tenepo, mun’dzafendererana na Mulungu. (Tiyago 4:8) Mu nkhani ikubwerayi, tin’dzawona momwe abereki angaphatisire basa cirengedwe kuti apfunzise wana wawo kufendererana na Yahova.
NYIMBO 5 Mabasa Yakudabwisa ya Mulungu
a Cirengedwe ca Yahova n’cakudabwisa kwene-kwene. Tikambawona dzuwa, maluwa na bzinthu bzinango bzomwe iye adalenga timbadabwa kwene-kwene. Bzomwe timbawona m’cirengedwe bzimbatipfunzisa makhalidwe yomwe Yahova anayo. Mu nkhani ino, tiniwona kuti n’thangwe ranyi tin’funika kukhala na nthawe ya kumbawona bzinthu bza m’cirengedwe na momwe bzimwebzi bzingatithandizire kukhala wakufendererana na Mulungu wathu.
