NKHANI YAKUPFUNZA 10
Thangwe Ranyi Imwepo Mun’funika Kubatizidwa?
“Ali-wentse abatizidwe.” — MABASA 2:38.
NYIMBO 34 Kufamba Mwakukhulupirika
BZOMWE TIN’PFUNZA a
1-2. N’ciyani cimbacitika wanthu akakhala akubatizidwa, ndipo tin’pfunza ciyani mu nkhani ino?
KODI imwepo mudawona kale wanthu akuyenda kukabatizidwa? Iwo ambatawira mwakukondwa mibvunzo miwiri yakufunika kwene-kwene. Ndipo famidya zawo na axamwali wawo ambakomedwambo kwene-kwene. Anyakubatizidwawo akabula m’madzi, abale ambamenya m’manja thangwe ra kukomedwa. Sumana iri-yentse, wanthu azinji ambabzipereka acibatizidwa, ndipo ambakhala Mboni za Yahova.
2 Kodi imwepo mukufunambo kubatizidwa? Penu munti inde, ndiye kuti mwasankhula cinthu cabwino kwene-kwene mu dziko lakuipali, ndipo mwalatiza kuti mukufunisisa “kumunyang’ana Yahova.” (Salimo 14:1, 2) Dziwani kuti nkhaniyi yanembedwera imwepo, bziribe basa penu ndimwe mkulu ayai mukali mwana. Tsono kuna ife omwe tidabatizidwa kale, nkhaniyi in’tithandiza kulimbisa cikhulupiro cathu kuti tipitirize kutumikira Yahova. Mbaticezeraneni bzinthu bzitatu bzomwe bzimbaticitisa kufuna kutumikira Yahova.
IMWEPO MUMBAFUNA CADIDI NA CIRUNGAMO
Kuyambira kale-kale Sathani akupswipiza dzina la Yahova ndipo akupitiriza kucita bzimwebzi ntsiku zino (Onani ndime 3-4)
3. Thangwe ranyi atumiki wa Yahova ambafuna cadidi na cirungamo? (Salimo 119:128, 163)
3 Yahova adauza wanthu wace kuti “ambafune cadidi.” (Zakariya 8:19) Jezu adauzambo ateweri wace kuti ambacite bzinthu bzakulungama. (Mateu 5:6) Bzimwebzi bzikulatiza kuti ifepano tin’funika kumbafuna kucita bzinthu bzabwino. Kodi imwepo mumbafuna cadidi na cirungamo? Tikudziwa kuti mtawiro wanu ngwakuti inde. Imwepo mumbanama lini ndipo mumbawenga bzinthu bzentse bzakuipa. (Werengani Salimo 119:128, 163.) Munthu omwe ambanama ambatewezera Sathani, omwe ni mtongi wa dzikoli. (Juwau 8:44; 12:31) Bzomwe Sathani ambafuna ni kupswipiza dzina la Yahova Mulungu. Sathani adayambira kale-kale kulewa bzinthu bzakunama pakulewa bza Yahova. Iye adayambira mu zunde la Edeni. Iye ambayezera kucitisa wanthu kukumbuka kuti Yahova ni Munthu wakuipa ndipo ambamana wanthu wace bzinthu bzabwino. (Ciyambo 3:1, 4, 5) Sathani akadapitiriza kucita bzimwebzi. Iye akadapitiriza kudzonga nzeru za wanthu. Iye ambawacitisa kufuna kucita bzinthu bzakuipa, ndipopa iwo akusankhula kusaya “kufuna cadidi.” — Aroma 1:25-31.
4. Kodi Yahova ambalatiza tani kuti ni “Mulungu wacadidi”? (Onani cithunzi-thunzi.)
4 Yahova ni “Mulungu wacadidi,” ndipo iye ambapfunzisa wanthu omwe ambamufuna cadidico. (Salimo 31:5) Bzimwebzi bzimbawathandiza kuti aleke kunamizidwa na Sathani. Yahova ambapfunzisambo atumiki wace kuti akhale wakukhulupirika na wakulungama. Bzimwebzi bzimbacitisa kuti iwo akhale wakukondwa. (Mimwani 13:5, 6) Kodi Yahova adakucitiranimbo kale bzimwebzi pomwe imwepo mukhapfunza Bibliya? Imwepo mudapfunza kuti bzomwe Mulungu ambacita mpsabwino kwa wanthu wentse. (Salimo 77:13) Ndipopa imwepo mumbafuna kucita bzomwe Mulunguyo ambafuna. (Mateu 6:33) Imwepo mumbafuna kukhotcerera cadidi na kulatiza kuti bzomwe Sathani ambalewa mpsakunama. Tsono kodi mungacite tani bzimwebzi?
5. Kodi imwepo mungalatize tani kuti mumbafuna cadidi na cirungamo?
5 Imwepo mungasankhule kulamba kutetekera Sathani mucifuna cadidi. Imwepo muna mphanvu yakulewa kuti: ‘Nin’funa lini kutetekera Sathani, koma ndikufuna kuphatisisa cadidi. Ndikufuna kuti Yahova akhale Mtongi wangu, ndipo ndikufuna kucita bzinthu bzomwe iye ambalewa kuti mpsabwino.’ Kodi mungacite tani bzimwebzi? Mungacite bzimwebzi mwa kucita mpembo kwa Yahova mucibzipereka. Ndipo mukamala mungabatizidwe kuti wanthu wentse adziwe kuti mwabzipereka kwa iye. Kufuna cadidi na cirungamo ndiko kungakucitiseni kuti mubatizidwe.
IMWEPO MUMBAFUNA JEZU KRISTU
6. Thangwe ranyi imwepo mumbafuna Jezu? (Salimo 45:4)
6 Thangwe ranyi imwepo mumbafuna Jezu Kristu? Onani bzinthu bzomwe bzimbaticitisa kufuna Jezu pa Salimo 45:4. (Werengani.) Jezu ambafuna cadidi, ngwakubzicepesa ndipo ngwacirungamo. Penu imwepo mumbafuna cadidi na cirungamo, ndiye kuti mumbamufunambo Jezu Kristu. Jezu adakhotcerera cadidi mwakukhwimika. (Juwau 18:37) Kodi Jezu adalatiza tani kuti ngwakubzicepesa?
7. Kodi n’ciyani comwe mumbafuna kucita thangwe ra kubzicepesa kwa Jezu?
7 Pomwe Jezu akhali pa dziko la pantsi iye adalatiza kuti ngwakubzicepesa. Iye adacita bzimwebzi mwa kutumbiza Baba wace sikuti kubzitumbiza yekha. (Marko 10:17, 18; Juwau 5:19) Kodi mumbabzibva tani thangwe ra kubzicepesa kwa Jezu? Kulewa cadidi, bzimwebzi bzimbakucitisani kuti mufune Mwana wa Mulungu na kumutewezerambo. Thangwe ranyi Jezu ngwakubzicepesa? Thangwe iye ambafuna ndipo ambatewezera Baba wace omwe ngwakubzicepesambo. (Salimo 18:35; Ahebereu 1:3) Kodi imwepo mumbakomedwa lini thangwe ra kudziwa kuti Jezu ana makhalidwe ninga ya Baba wace?
8. Thangwe ranyi timbafuna kuti Jezu akhale Mambo wathu?
8 Ifepano timbafuna kuti Jezu akhale Mambo wathu thangwe iye ni Mtongi wabwino. Ndipo Yahova adakonzekeresa Mwana wace kuti athemere kutonga. (Zaiya 50:4, 5) Jezu adalatiza lufoyi likulu kwene-kwene. (Juwau 13:1) Pakuti Jezu ni Mambo wathu, ifepano tin’funika kumbamufuna. Iye adalewa kuti wanthu omwe ambamufuna na kubvera malamulo yace mbaxamwali wace. (Juwau 14:15; 15:14, 15) Kukhala xamwali wa Mwana wa Mulungu ni mwayi ukulu kwene-kwene!
9. Kodi ubatizo bwa Akristau n’bwakundendemerana tani na bwa Jezu?
9 Jezu adalewa kuti ateweri wace an’funika kubatizidwa. (Mateu 28:19, 20) Iye adalatiza kuti kubatizidwa ni cinthu cakufunika kwene-kwene thangwe pomwe akhanati kuyamba utumiki bwace adabatizidwambo. Tsono, ubatizo bwa Jezu na bwa ateweri wace n’bwakusiyana. (Onani kwadru yakuti “ Kodi Ubatizo bwa Jezu Budasiyana Tani na bwa Ateweri Wace?”) Koma mwa njira inango ibo budandendemerana. Pomwe Jezu adabatizidwa, iye adalatiza kuti akhafuna kucita bzomwe Baba wace ambafuna. (Ahebereu 10:7) Mpsibodzi-bodzimbo na ateweri wa Jezu. Iwo akabatizidwa ambakhala akulatiza padeca kuti akufuna kucita bzomwe Yahova ambafuna. Iwo akabatizidwa cinthu cakufunika kwene-kwene pa moyo wawo cimbakhala kucita bzomwe Mulungu ambafuna sikuti bzomwe iwo ambafuna. Iwo akacita bzimwebzi ambalatiza kuti akutewezera Jezu.
10. Kodi tingalatize tani kuti timbafuna Jezu?
10 Imwepo mumbakhulupira kuti Jezu ni Mwana wa Mulungu ndipo mumbakomedwa kudziwa kuti iye adasankhulidwa na Yahova kuti akhale Mambo wathu. Imwepo mumbadziwa kuti Jezu ngwakubzicepesa ndipo ambatewezera makhalidwe ya Baba wace. Imwepo mudapfunza kuti iye adapasa cakudya wanthu omwe akhana njala, adalimbikisa omwe akhadawofoka ndipo adapoza omwe akhaduwala. (Mateu 14:14-21) Ndipo imwepo mukuwona kuti iye akutsogolera gwere lacikristau ntsiku zino. (Mateu 23:10) Ndipo imwepo mukudziwa kuti iye an’dzacita bzizinji kwene-kwene akadzatonga dzikoli. Kodi mungalatize tani kuti mumbamufuna Jezu? Imwepo mungacite bzimwebzi mwa kutewezera bzomwe iye adacita. (Juwau 14:21) Ndipo njira ibodzi yakucitira bzimwebzi ni kubzipereka na kubatizidwa.
IMWEPO MUMBAFUNA YAHOVA MULUNGU
11. Kodi ndiponi thangwe likulu lomwe lin’funika kuticitisa kubatizidwa, ndipo n’thangwe ranyi?
11 Kodi ndiponi thangwe likulu lomwe limbaticitisa kuti tibatizidwe? Jezu adalewa kuti lamulo likulu kwene-kwene pa malamulo yentse ndakuti: “Umbafune Yahova Mulungu wako na mtima wako wentse, moyo wako wentse, nzeru zako zentse na mphanvu zako zentse.” (Marko 12:30) Mafala yamweya yakulatiza kuti tin’funika kumbamufuna kwene-kwene Yahova.
Yahova ndiye ambatipasa bzinthu bzabwino bzomwe ifepano tinabzo (Onani ndime 12-13)
12. Thangwe ranyi imwepo mumbamufuna Yahova? (Onani cithunzi-thunzi.)
12 Pana bzinthu bzizinji bzomwe bzingaticitise kuti timbafune Yahova. Imwepo mudakwanisa kubvesesa kuti iye ni “mwenekaciro moyo” ndipo “mphaso iri-yentse yabwino na yakulungama” imbacokera kwa iye. (Salimo 36:9; Tiyago 1:17) Bzinthu bzentse bzabwino bzomwe imwepo munabzo bzimbacokera kwa Baba wathu wa lufoyi, Yahova.
13. Thangwe ranyi cakulombolera ni mphaso ikulu kwene-kwene?
13 Cakulombolera ni mphaso yabwino kwene-kwene yomwe Yahova adatipasa. Thangwe ranyi tikulewa tenepoyo? Yahova na Mwana wace ambafunana kwene-kwene. Jezu adati: “Baba wangu ambandifuna” ndipo “[ine] nimbafuna Baba.” (Juwau 10:17; 14:31) Uxamwali bwawo budakula kwene-kwene thangwe adamala magole mazinji akuphata basa pabodzi. (Mimwani 8:22, 23, 30) Tsapano kumbukirani kuti Yahova adabva tani pomwe adawona Mwana wace akuboneresedwa na kuphedwa. Yahova ambafuna kwene-kwene wanthu, kuphatanidzambo imwepo, ndipopa iye adapereka Mwana wace wapamtima kuti aphedwe kuti tidzakhale na moyo wakusaya kumala. (Juwau 3:16; Agalatiya 2:20) Tikakumbukira bzimwebzi, ifepano tin’funika kumufuna kwene-kwene Mulungu.
14. Kodi mun’funika kusankhula kucita ciyani pa moyo wanu?
14 Lufoyi lanu kwa Yahova lidakula pomwe imwepo mudapfunza bzizinji pakulewa bza iye. Imwepo mukufunisisa kukhala xamwali wace ndipo mukufuna kuti uxamwalibo buyenderere. Iye ambafuna kuti mukondwese mtima wace. (Mimwani 23:15, 16) Kuti iye akomedwe, mun’funika lini kumbandolewa kuti tin’funika kucita bzinthu bzabwino, koma mucileka kucita bzinthu bzabwinobzo. Bzomwe imwepo mumbacita pa moyo wanu bzin’dzalatiza kuti mumbamufuna Yahova ayai ne. (1 Juwau 5:3) Cimweci ndico cinthu cabwino kwene-kwene comwe mungasankhule kucita pa moyo wanu.
15. Kodi mungalatize tani kuti mumbamufuna Yahova?
15 Kodi mungalatize tani kuti mumbafuna Yahova? Cakuyamba, citani mpembo wa kubzipereka kwa Yahova. (Salimo 40:8) Ndipo latizani kuti mwabzipereka kwa Yahova mwa kubatizidwa. Kumayambiriro kwa nkhani yathuyi tacezerana kuti imwepo mukabatizidwa mun’dzakhala na moyo wabwino kwene-kwene. Imwepo mukabatizidwa, mun’dzayamba moyo unovu. Mun’dzakhala na moyo sikuti wakubzikondwesa mwekha, koma wakuti mukondwese Yahova. (Aroma 14:8; 1 Pedru 4:1, 2) Cimweci ni cinthu cakufunika kwene-kwene comwe mungacite. Tsono mukacicita, mun’dzakhala na moyo wabwino kwene-kwene. Thangwe ranyi tikulewa tenepoyo?
16. Kodi Yahova ambasimba tani wanthu omwe ambapitiriza kumutumikira? (Salimo 41:12)
16 Yahova ni Munthu wabwino kwene-kwene. Bzinthu bzomwe Yahova ambaticitira nthawe zentse bzimbakhala bzizinji kuposa bzomwe ifepano timbamucitira. (Marko 10:29, 30) Iye angakuthandizeni kukhala na moyo wabwino tsapano na kutsogolo. Mukabatizidwa, bzin’funa lini kulewa kuti mwamaliza bzentse. Cimweci ni ciyambi basi. Imwepo mun’funika kupitiriza kutumikira Baba wanu wa lufoyi mpaka kale-kale. Mukacita bzimwebzi, lufoyi lanu kwa Yahova lin’dzapitiriza kukula, ndipo imwepo mun’dzakhala na mwayi wa kudzatambira moyo wakusaya kumala. — Werengani Salimo 41:12.
17. Kodi mungalatize tani kuti mumbatenda bzomwe Yahova adakucitirani?
17 Imwepo mukabzipereka kwa Yahova mucibatizidwa, mumbakhala na mwayi wakupasa Baba wanu Yahova cinthu cabwino kwene-kwene. Iye adakupasani bzinthu bzabwino kwene-kwene. Ndipo imwepo mungalatize kuti mumbatenda bzomwe Yahova adakucitiranibzi mwa kucita bzizinji pa kumutumikira. (Djobi 1:8; 41:11; Mimwani 27:11) Bzimwebzi ni bzinthu bzabwino bzomwe mungacite pa moyo wanu. Kulewa cadidi, lufoyi lathu kwa Yahova ndiro lingaticitise kuti tibatizidwe.
KODI MWAKONZEKA KUTI MUBATIZIDWE?
18. Kodi ni mibvunzo iponi yomwe imwepo mun’funika kubzibvunza?
18 Kodi mungatawire tani mbvunzo wakuti: Kodi imwepo mun’batizidwa? Palibe munthu omwe angakutawirireni mbvunzo umweyu. Tsono kuti mukwanise kuutawira, pinango bzingakhale bwino kubzibvunza kuti: ‘N’ciyani cikunditazisa kubatizidwa?’ (Mabasa 8:36) Kumbukirani bzinthu bzitatu bzomwe tacezerana mu nkhani ino. Cakuyamba, imwepo mumbafuna cadidi na cirungamo. Bzibvunzeni kuti: ‘Kodi inepano ndikufunisisa kudzawona wanthu wentse pa dzikoli akucita bzinthu bzabwino?’ Caciwiri, imwepo mumbafuna Jezu. Bzibvunzeni kuti: ‘Kodi inepano ndikufuna kuti Jezu akhale Mambo wangu na kutewezera bzomwe iye adacita?’ Cacitatu, comwe n’cakufunika kwene-kwene, imwepo mumbafuna Yahova. Bzibvunzeni kuti: ‘Kodi inepano ndikufuna kukondwesa mtima wa Yahova mwa kumutumikira?’ Penu mtawiro wa mibvunzo yentseneyi ngwakuti inde, thangwe ranyi mun’saya kubatizidwa? Kodi mukudikhira ciyani? — Mabasa 16:33.
19. Thangwe ranyi imwepo mun’funika lini kuzeza kubatizidwa? Fotokozani. (Juwau 4:34)
19 Penu imwepo mukuzeza kubatizidwa, kumbukirani bzomwe Jezu adalewa. (Werengani Juwau 4:34.) Jezu adayezezera kucita bzomwe Baba wace ambafuna na cakudya. Thangwe ranyi? Cakudya n’cabwino kwa ifepano. Jezu akhadziwa kuti bzentse bzomwe Yahova ambatiuza kuti ticite mpsabwino kwa ifepano. Yahova angatiuze lini kuti ticite cinthu cakuipa. Kodi bzomwe Yahova akufuna mpsakuti imwepo mubatizidwe? Inde. (Mabasa 2:38) Penu imwepo mungazeze lini kudya cakudya cakukoma, thangwe ranyi mukuzeza kubatizidwa? Imwepo mukabatizidwa, dziwani kuti mun’dzagumana phindu likulu kwene-kwene.
20. Kodi tin’dzacezerana ciyani mu nkhani ikubwerayi?
20 Thangwe ranyi wanthu winango ambazeza kubatizidwa? Azinji ambatawira kuti: “Ndikanati kukonzeka.” Kusankhula kubzipereka kwa Yahova na kubatizidwa ni cinthu cakufunika kwene-kwene. Ndipopa mun’funika kuikumbukira bwino nkhani imweyi. Penu imwepo mukufunisisadi kubatizidwa, n’ciyani comwe mun’funika kucita tsapanopali? Tin’dzacezerana bzimwebzi mu nkhani ikubwerayi.
NYIMBO 28 Kukhala Xamwali wa Yahova
a Ubatizo ni cinthu cakufunika kwene-kwene comwe nyakupfunza wa Bibliya ali-wentse an’funika kucita. N’ciyani cingacitise nyakupfunza wa Bibliya kufuna kubatizidwa? Ni lufoyi. Kodi lufoyiro an’funika kulilatiza kwa mbani? Mu nkhani ino, tin’gumana mtawiro wa mbvunzo umweyu, ndipo tiniwona momwe moyo wace un’dzakhalira akabatizidwa.
