1-2. (a)  Thangwe ranyi omwe alowolana tsapanopa an’funika kuthemba Yahova? (Salimo 37:3, 4) (b) Kodi mu nkhani ino tin’pfunza ciyani?

KODI imwepo mukufuna kukhala na banja, ayai kodi muli kale pa banja? Penu mun’ti inde, ndiye kuti mukufuna kukhala na moyo wa banja wakukondwa pabodzi na munthu omwe mumbamufuna kwene-kwene. Tsono banja ni nkhani lini yamasenzeka. Bzomwe mumbacita mukagumana na mabvuto na bzomwe mumbasankhula kucita ndibzo bzin’dzacitisa kuti mukhale wakukondwa magole mazinji. Imwepo mukathemba Yahova, mun’dzasankhula bzinthu mwanzeru, banja lanu lin’dzakhala lakulimba ndipo mun’dzakhala wakukondwa. Tsono mukasaya kuphatisa basa malango ya Mulungu mungadzagumane na mabvuto yomwe yangadzacitise banja lanu kunesa ndipo mun’dzakhala lini wakukondwa.—Werengani Salimo 37:3, 4.

² Napo kuti nkhani ino ikupereka malango kuna omwe alowolana tsapanopa, iyo ikufotokozambo bza mabvuto yomwe mabanja yentse yangagumane nayo. Ndipo ikufotokoza bzomwe tingapfunze na bziratizo bza amuna na akazi wakufotokozedwa m’Bibliya. Bziratizo bza m’Bibliya bzimwebzi, bzimbatipfunzisa nfundo zomwe tingaziphatise basa m’mbali zakusiyana-siyana za moyo wathu kuphatanidzambo m’banja. Ndipo tiniwonambo bzomwe tingapfunze na bziratizo bza mabanja manango ya mu nthawe zathu zino.

3-4. Kodi wale omwe alowolana tsapanopa angagumane na mabvuto yaponi?

³ Wanthu winango ambauza omwe alowolana tsapanopa kuti akhale na moyo ninga momwe wanthu wentse ambakhalira.  Mwa ciratizo, abereki na adzinza angauze omwe alowolana tsapanopawo kuti akhale na wana mwakamfulumize. Ayai axamwali na adzinza winango angawauze kuti agule nyumba acidzaza nyumbayo na bzombo bzizinji.

⁴ Omwe alowolana tsapanopawo akasaya kuwona bwino angacite bzinthu bzomwe bzingawacitise kukhala na mangawa makulu kwene-kwene. Ndipo bzimwebzi bzingacitise omwe alowolanawo kuphata basa ora zizinji kuti akwanise kupagali mangawayo. Basalo lingawacitise kusaya kukhala na nthawe yakucita pfunziro lapawokha, kunamata kwa pa banja na kupalizira. Ndipo banjalo lingaluze mitsonkhano thangwe ra kuphata basa nthawe zizinji kuti atambire kobiri zakuthimizirika ayai kuti aleke kucosedwa basa. Thangwe ra bzimwebzi, iwo angaluze mwayi wabwino wakuthimizira utumiki bwawo kwa Yahova.

5. Kodi mukupfunza ciyani na ciratizo ca Klaus na Marisa?

⁵ Mpsakudziwikiratu kuti kundokhala ticinyang’ana bzinthu bzizinji kungacitise lini kuti tikhale na mpfantso. Onani bzomwe banja la Klaus na Marisa lidapfunza pa nkhani imweyi. * Pomwe iwo adalowolana, wentse awiri akhaphata basa kuti akhale na bzinthu bzizinji. Tsono iwo alibe kudzakhala na mpfantso caiwo pa moyo wawo. Klaus adalewa kuti: “Tikhana bzentse bzomwe tikhafuna pa moyo wathu, tsono tikhalibe nzeru yakufuna kuthimizira utumiki bwathu kwa Yahova. Kulewa cadidi moyo wathu ukhana mphitca zizinji ndipo ukhatipasa msolo kuwawa.” Pinango imwepo mwawonambo kale mwekha kuti munthu akambafuna kwene-kwene bzinthu bzizinji ambakhala lini wakukondwa. Penu bziri tenepo, lekani kuwofoka. Kupfunza bziratizo bzabwino bza wanthu winango kungakuthandizeni kucinja bzinthu pa moyo wanu. Cakuyamba, bwerani tiwone bzomwe amuna angapfunze na Mambo Jewosafati.

6. Mwakubverana na malango yomwe yali pa Mimwani 3:5, 6, kodi Mambo Jewosafati adacita ciyani pomwe adagumana na bvuto likulu?

⁶ Amunamwe, kodi nthawe zinango imwepo mumbacita thupo thangwe ra udindo bomwe munabo? Penu n’tenepo, imwepo mungapfunze na bzomwe bzidacitika na Mambo Jewosafati. Pakuti akhali mambo, Jewosafati akhana udindo bwakukhotcerera mtundu wentse wa Ajirayeri! Kodi iye adacita ciyani kuti akwanise kucita bzimwebzi? Jewosafati adacita ciri-centse comwe adakwanisa kuti akhotcerere wanthuwo. Iye adakonza malitsito ya mizinda ya Djuda ndipo adakonzekeresa acikunda wakupitirira 1 160 000. (2 Nkhani 17:12-19) Na kupita kwa nthawe, Jewosafati adadzagumana na bvuto likulu. Thimu likulu la acikunda wa Amoni, Amoabe na amuna wa kumapiri ya Seiri adamugopswa, adagopswa banja lace na wanthu wace. (2 Nkhani 20:1, 2) Kodi Jewosafati adacita ciyani? Iye adakumbira Yahova kuti amuthandize na kumupasa mphanvu. Bzimwebzi bzikubverana na malango ya nzeru yomwe yakugumanika pa Mimwani 3:5, 6.  (Werengani.) Mpembo wakubzicepesa wa Jewosafati, omwe uli pa 2 Nkhani 20:5-12, umbalatiza kuti iye akhathemba Baba wace walufoyi wakudzulu. Kodi Yahova adatawira tani mpembo wa Jewosafati?

7. Kodi Yahova adatawira tani mpembo wa Jewosafati?

⁷ Yahova adalewalewa na Jewosafati mwakuphatisa basa Mlevi wakucemeredwa Jaaziyeri. Yahova adalewa kuti: ‘Kapitirizeni kuima m’mbuto zanu, mucikawona cipulumuso ca Yahova.’ (2 Nkhani 20:13-17) Imweyi ikhali nkhani yacirendo kuna iwo! Tsono malango yamweya yakhacokera lini kwa munthu koma yakhacokera kwa Yahova. Pakuti akhathemba Mulungu na mtima wace wentse, Jewosafati adacita bzomwe adauzidwa. Pomwe iye na wanthu wace adayenda kuti akagumane na anyamadulanthaka wawo, Jewosafatiyo alibe kuikha acikunda wa luso kutsogolo kwa acikunda wentse, koma adaikha anyakuimba. Yahova alibe kulekerera Jewosafati kukundidwa. Iye adakunda acikunda wa anyamadulanthaka wawo.—2 Nkhani 20:18-23.

8. Kodi amuna angapfunze ciyani na ciratizo ca Jewosafati?

⁸ Amunamwe, imwepo mungapfunze na ciratizo ca Jewosafati. Imwepo muna udindo bwakukhotcerera banja lanu. Ndipopa imwepo mumbaphata basa na nyongo kuti mukhotcerere na kuthandiza banja lanu. Pomwe mukugumana na mabvuto, pinango mungabzithembe, mucikumbuka kuti mungakwanise kumalisa mabvutoyo mwekha. Tsono citani nyongo kuti muleke kukhala na nzeru zakumbabzithemba mwekha. Koma mbapembani kwa Yahova pamwekha kuti iye akuthandizeni. Kuthimizira bzimwebzi, mbapembani na mkazanu na mtima wentse. Mbafunani malango ya Yahova mwakupfunza Bibliya na mabukhu yomwe yambakonzedwa na gulu la Mulungu, ndipo mbaphatisani basa malango yomwe mwagumanayo. Wanthu winango angabverane lini na bzomwe mwasankhula kucita kucokera m’Bibliya, ndipo iwo angalewe kuti imwepo mulibe nzeru. Ndipo iwo angalewe kuti kobiri na bzinthu bzomwe kobirizo zingagule ndibzo bzomwe bzingakhotcerere banja lanu. Tsono kumbukirani ciratizo ca Jewosafati. Bzomwe iye adacita bzimbalatiza kuti adathemba Yahova. Yahova alibe kumusiya munthu wakukhulupirikayu ndipo iye an’dzakusiyanimboni lini. (Salimo 37:28; Ahebereu 13:5) Kodi n’ciyani cinango comwe mabanja yangacite kuti yakhale yakukondwa?

9. Kodi tingalewe ciyani pa nkhani ya mpolofeta Zaiya na mkazace?

⁹ Mpolofeta Zaiya na mkazace adaikha nzeru zawo pa kutumikira Yahova. Zaiya akhali mpolofeta. Ndipo bzikuwoneka kuti mkazace akhacitambo basa la upolofeta, ndipopa iye akhacemeredwa ‘mpolofeta wacikazi.’ (Zaiya 8:1-4) Ninga banja, bzikuoneka kuti Zaiya na mkazace akhaikha nzeru zawo pa kunamata Yahova. Iwo ni ciratizo cabwino kwene-kwene kuna mabanja ntsiku zino!

10. Kodi kupfunza mapolofesiya ya m’Bibliya kumbathandiza tani mabanja kufuna kucita bzizinji pa kutumikira Yahova?

¹⁰ Ntsiku zino mabanja yangaikhe nzeru zawo pa kutumikira Yahova mwa kucita ciri-centse comwe yangakwanise pa basa lace. Comwe cimbawathandiza kupitiriza kuthemba Yahova ndico kupfunza mapolofesiya ya m’Bibliya pabodzi na kuwona momwe mapolofesiyayo yambalatizira kuti njacadidi nthawe zentse. * (Tito 1:2) Iwo angakumbukire bzomwe angacite kuti athandizire pa kukwanirisidwa kwa mapolofesiyayo. Mwa ciratizo, iwo angacite mbali pa kukwanisidwa kwa polofesiya ya Jezu yakulewa  bza kupaliziridwa kwa mafala yabwino pa dziko lentse la pantsi pomwe cimaliziro cikanati kufika. (Mateu 24:14) Banja likatsimikizira kuti mapolofesiya ya m’Bibliya yakukwanirisidwa, nyongo yawo yakufuna kucita bzizinji kwa Yahova in’dzathimizirika.

11. Kodi Akila na Prisila adakwanisa kucita ciyani, ndipo n’thangwe ranyi?

¹¹ Wanthu omwe alowolana tsapanopa angapfunze na ciratizo ca Akila na Prisila, banja lacidjuda lomwe likhakhala mu mzinda wa Roma. Iwo adabva mafala yabwino yakulewa bza Jezu ndipo adakhala Akristau. Mpsakudabwisa lini kuti iwo akhakomedwa kwene-kwene na moyo omwe akhanawo. Tsono na kupita kwa nthawe, moyo wawo udadzacinja pomwe Mtongi Klaudiyo adauza Adjuda kuti acoke ku Roma. Kumbukirani momwe Akila na Prisila adabvera. Iwo akhafunika kumwazana na wanthu omwe akhadazolowerana nawo, kusiya nyumba yawo, acikayamba moyo upsa wakukonza na kugulisa matendi ku mbuto inango. Kodi moyo upsa omwe iwo adakakhala nawo udawatazisa kucita bzizinji pa kutumikira Yahova? Pinango imwepo mukudziwa mtawiro wa mbvunzoyu. Mu mzinda wa Kolinto, omwe adakakhala, Akila na Prisila adakakhala wakuphatana na gwere la kumweko ndipo adaphatambo basa pabodzi na Paulo pakulimbikisa abale wa kumweko. Patsogolo pace, iwo adafulukira ku mzinda unango omwe ukhafunikira apalizi azinji. (Mabasa 18:18-21; Aroma 16:3-5) Banjalo lidakhala na moyo wakukondwa kwene-kwene.

12. Kodi n’ciyani comwe mabanja yan’funika kucita kuti yakhale na bzakulinga bzauzimu?

¹² Mabanja ntsiku zino yangatewezerembo Akila na Prisila mwa kuikha Umambo pa mbuto yakuyamba. Nthawe yabwino yomwe mabanja yangambacezerane cakulinga cawo pa moyo ni pomwe akali pa umakhadzi. Mabanja yakambacita pabodzi bzinthu bzauzimu, yambakhala na mwayi wakuwona mzimu wa Yahova ukuphata basa pa moyo wawo. (Mpalizi 4:9, 12) Onani ciratizo ca Russell na Elizabeth. Russell adalewa kuti: “Pomwe tikhali pa umakhadzi, ifepano tikhambaceza nkhani ya bzakulinga bzathu bzauzimu.” Elizabeth adati: “Tikhambaceza nkhani zimwezi na cakulinga cakuti kutsogolo tikasankhula kucita bzinthu tidzatsimikizire kuti bzomwe tin’dzasankhula kucitabzo bzidzaleke kutitazisa kukwanirisa bzakulinga  bzathu.” Russell na Elizabeth adakwanisa kufulukira ku Micronésia komwe kukhafunika apalizi azinji.

13. Mwakubverana na Salimo 28:7, kodi n’ciyani comwe cin’dzacitika tikathemba Yahova?

¹³ Ninga Russell na Elizabeth, mabanja mazinji yambatcenkha kukhala na bzakucita bzizinji kuti yakhale na nthawe yakupalizira na kupfunzisa. Banja likambakhala na bzakulinga pa kutumikira Yahova, liciphata basa pabodzi kuti likwanise bzakulingabzo, moyo wawo umbawafambira bwino. Iwo an’dzakwanisa kuwona Yahova kuti akuwathandiza, an’dzamuthemba kwene-kwene, ndipo an’dzakhala wakukondwa.—Werengani Salimo 28:7.

14. Kodi Pedru na mkazace adalatiza tani kuti akhakhulupira bzomwe Bibliya limbalewa pa Mateu 6:25, 31-34?

¹⁴ Mabanja yangapfunze pomwe na ciratizo ca mpostolo Pedru na mkazace. Pomwe padapita minyezi 6 kucokera pomwe Pedru adawonana na Jezu kakuyamba, iye akhafunika kusankhula bzakucita. Pedru akhaphata basa lakupha ntsomba kuti adyese banja lace. Pomwe Jezu adacemera Pedru kuti akhale mteweri wace, cakuyamba iye akhafunika kukumbukira mkazace. (Luka 5:1-11) Pedru adasankhula kutewera Jezu kuti aphate basa lakupalizira. Iye adasankhula bzinthu mwanzeru! Ndipo tina mathangwe yakubveka yakulewera kuti mkazi wa Pedru adamuthandizambo pa bzomwe adacitabzo. Bibliya limbalatiza kuti pambuyo pa Jezu kulamusidwa, mkazi wa Pedru adaperekeza bayace pa ulendo bunango bomwe Pedru adacita. (1 Akolinto 9:5) Kulewa cadidi, ciratizo ca mkazi wa Pedru, pakukhala mkazi wacikristau, cidapasa mphanvu Pedru kuti apereke malango kuna amuna na akazi wacikristau. (1 Pedru 3:1-7) Bzikuwoneka kuti Pedru na mkazace adakhulupira bzomwe Yahova adalewa bzakuti iye an’dzawapasa bzomwe iwo akufunikira pa moyo wawo akaikha Umambo pa mbuto yakuyamba.—Werengani Mateu 6:25, 31-34.

15. Kodi imwepo mwapfunza ciyani na ciratizo ca Tiago na Esther?

¹⁵ Penu imwepo mudalowolana kale-kale, kodi mungapitirize tani kukulisa cikhumbo cakufuna kuthimizira utumiki bwanu? Cinthu cibodzi comwe cingakuthandizeni ndico kumbapfunza na bziratizo bza mabanja yanango. Mwa ciratizo, imwepo mungawerenge nkhani zakutewerana zakuti: “Iwo Adabzipereka na Mtima Wentse.” Nkhani zimwezi zidathandiza Tiago na Esther, banja lomwe limbakhala ku Brasil, kuti akulise cikhumbo cawo cakufuna kukapalizira ku mbuto komwe kukufunikira apalizi azinji. Tiago adalewa kuti: “Pomwe tikhambawerenga bziratizo bza momwe Yahova ambathandizira atumiki wace ntsiku zino, ifepano tikhafunambo kuwona kuti Yahova akutitsogolera na kutithandiza.” Tenepo, iwo adafuluka aciyenda ku Paraguai, komwe adakatumikira mu gawo la Cipwitikizi kuyambira mu 2014. Esther adalewa kuti: “Cinembo comwe ifepano timbacifuna kwene-kwene ni Aefezo 3:20. Nthawe zizinji tikhambawona mafala yamweya yakukwanisika pa utumiki bwathu kwa Yahova.” Mu tsamba lomwe Paulo adanembera Aefezo, iye adalewa kuti Yahova an’dzatipasa bzinthu bzizinji kuposa bzomwe tingakumbire. Mafala yamweya ngacadidi!

16. Kodi mabanja yomwe yalowolana tsapanopa yangagumane kuponi malango kuti yakwanirise bzakulinga bzawo?

¹⁶ Mabanja yomwe yalowolana tsapanopa yangagumane phindu na bziratizo bza wale omwe adapfunza kuthemba Yahova. Pana mabanja manango yomwe yamala magole mazinji yakucita utumiki bwa nthawe zentse. Penu imwepo mukufuna kucita bzizinji pa moyo wanu, abvunzeni kuti akuthandizeni kudziwa momwe  adakwanisira kucita utumiki bwawo. Imweyi ni njira inango yakulatizira kuti timbathemba Yahova. (Mimwani 22:17, 19) Akulu m’gwere angathandizembo mabanja yomwe yalowolana tsapanopa kuti yakwanirise bzakulinga bzawo bzauzimu.

17. Kodi n’ciyani comwe cidacitika na Klaus na Marisa, ndipo ifepano tikupfunzambo ciyani na ciratizo cawo?

¹⁷ Tsono nthawe zinango cakulinga cakufuna kuthimizira utumiki bwathu cingacitike lini ninga momwe tikufunira. Tewezerani ciratizo ca Klaus na Marisa, omwe afotokozedwa kumayambiriro kwa nkhaniyi. Pambuyo pa magole matatu ya malowozi yawo, iwo adacoka m’dziko lawo ndipo adayenda kukathandizira basa lakumanga-manga ku mthambi ya ku Finlândia. Tsono pomwe iwo adafika kumweko, adadziwa kuti angadabvumizidwa lini kukhala minyezi yakupitirira mitanthatu. Pakuyamba, bzimwebzi bzidawawawa. Tsono pomwe padandopita nthawe pang’ono, adacemeredwa kuti akapfunze Ciarabe, ndipo tsapano iwo akukomedwa kutumikira m’gwere la cirewedwe ca Ciarabe ku dziko linango. Marisa adati: “Inepano ndikhacita mantha kucita cinthu comwe ndikhanati kucicita kale ndipo ndikhafunika kuthemba Yahova na mtima wangu wentse. Tsono ndikhakwanisa kuwona thandizo la Yahova nthawe zentse mu njira yomwe tikhaidikhirira lini. Thangwe ra bzimwebzi, inepano ndidayamba kumbathemba kwene-kwene Yahova.” Ninga momwe bziratizobzi bzikulatizira, imwepo mungatsimikize kuti Yahova nthawe zentse an’dzakusimbani mukamuthemba na mtima wanu wentse.

18. Kodi mabanja yangacite ciyani kuti yapitirize kukhulupira Yahova?

¹⁸ Malowozi ni mphaso yakucokera kwa Yahova. (Mateu 19:5, 6) Iye ambafuna kuti wanthu wakulowolana akomedwe na mphaso imweyi. (Mimwani 5:18) Imwe omwe mwalowolana tsapanopa, mbawonani momwe mukuphatisira basa moyo wanu. Kodi mumbacita ciri-centse comwe mungakwanise kuti mulatize kuti mumbatenda bzomwe Yahova adakupasani? Mbalewalewani na Yahova mu mpembo. Fufudzani m’Bibliya kuti mugumane nfundo zomwe zikubverana na momwe bzinthu bziriri pa moyo wanu. Ndipo phatisani basa malango yomwe Yahova ambakupasani. Imwepo mukambaikha nzeru zanu pa kutumikira Yahova, mun’dzakhala wakukondwa ndipo moyo wanu un’dzakhala wakusimbidwa!