1. Kodi wanthu wakukhulupirika angacemere Yahova kuti ni mbani wawo?

ATUMIKI wa Yahova omwe ambacita mbali ya banja lace akuphatanidza Jezu, omwe ni “wakuyamba kubadwa m’cirengedwe centse,” na anjo azinji. (Akolose 1:15; Masalimo 103:20) Pomwe Jezu akhali pa dziko la pantsi, iye adalatiza kuti wanthu wakukhulupirika angakwanise kuwona Yahova ninga Baba wawo. Pomwe iye akhaceza na anyakupfunza wace, adawauza kuti Yahova ni “Baba wangu omwe ni Baba wanumbo.” (Juwau 20:17) Ifepano tikabzipereka kwa Yahova ticibatizidwa, timbacita mbali ya banja la lufoyi la abale na mpfumakazi.—Marko 10:29, 30.

2. Kodi mu nkhani ino tin’pfunza ciyani?

² Wanthu winango bzimbawanesa kuwona Yahova kuti ni Baba wawo wa lufoyi. Ndipo winango ambadziwa lini kuti angalatize tani lufoyi kuna abale na mpfumakazi zawo. Mu nkhani ino, tin’pfunza momwe Jezu adatithandizirira kuwona kuti Yahova ni Baba wa lufoyi omwe tingakhale naye pa uxamwali. Ndipo tin’pfunzambo njira za momwe tingatewezerere Yahova pakucita bzinthu na abale na mpfumakazi zathu.

3. Kodi mpembo wa ciratizo umbatithandiza tani kufenderera Yahova?

³ Yahova ni Baba wa lufoyi. Jezu akufuna kuti ifepano tiwone Yahova ninga momwe iye ambamuwonera, kumuwona ninga m’bereki wa lufoyi, wakudeka mtima na omwe tingaceze naye nthawe iri-yentse, sikuti kumuwona ninga munthu wakunesa omwe mpsakunesa kuceza naye. Umboni bwa bzimwebzi ni bzomwe iye adalewa pomwe akhapfunzisa anyakupfunza wace kupemba. Iye adayamba mpembo wa ciratizo na mafala yakuti: “Baba wathu.” (Mateu 6:9) Jezu angadafuna angadatiuza kuti ticemere Yahova kuti “Wamphanvu-zentse,” “Mulengi” ayai “Mambo wa nthawe zentse” thangwe rakuti yamweya ni madzina yace ya ulemu yomwe yambagumanika m’Bibliya. (Ciyambo  49:25; Zaiya 40:28; 1 Timotio 1:17) Tsono Jezu adatiuza kuti timbacemere Yahova kuti “Baba.”

4. Kodi tikudziwa tani kuti Yahova akufuna kuti timufenderere?

⁴ Kodi imwepo bzimbakunesani kuwona Yahova ninga Baba wanu wa lufoyi? Winango wa ifepano bzimbatinesa. Penu baba wathu caiye akhatifuna lini pinango bzingatinese kukumbukira kuti pana Baba omwe ambatifuna. Bzimbatitsangalaza kudziwa kuti Yahova ambabvesesa momwe tikubvera. Iye akufuna kutifenderera. Ndipopa Fala lace limbatiuza kuti: “Fendererani Mulungu ndipo iye an’dzakufendereranimbo.” (Tiyago 4:8) Yahova ambatifuna ndipo akufuna kukhala Baba wathu wabwino kwene-kwene kuposa baba ali-wentse.

5. Mwakubverana na Luka 10:22, kodi Jezu angatithandize tani kumufenderera Yahova?

⁵ Jezu angatithandize kuti timufenderere Yahova. Jezu ambamudziwa bwino Yahova ndipo ambatewezera bwino-bwino makhalidwe yace. Ndipopa Jezuyo adalewa kuti: “Ule omwe wawona inepano wawonambo Baba.” (Juwau 14:9) Pakuti Jezu ali ninga m’bale wathu mkulu, iye ambatipfunzisa momwe tingalemekezere na kubvera Baba wathu, kutcenkha bzinthu bzomwe bzimbamudekera lini na bzomwe tingacite kuti iye atibvume. Iye adalatiza kuti Yahova ngwakudeka mtima na wa lufoyi, maka-maka pomwe akhali pa dziko la pantsi pano. (Werengani Luka 10:22.) Mbatiwoneni bziratizo bzinango.

6. Perekani bziratizo bzakulatiza kuti Yahova akhatetekera Jezu.

⁶ Yahova ambatetekera wana wace. Kumbukirani momwe Yahova adatetekerera Mwana wace wakuyamba kubadwa. Kulewa cadidi Yahova adatetekera mipembo mizinji yomwe Mwana wace adaicita pomwe akhali pa dziko la pantsi. (Luka 5:16) Iye adatetekera pomwe Jezu adapemba kuti acite cinthu cakufunika kwene-kwene, comwe cikhali kusankhula apostolo wace 12. (Luka 6:12, 13) Yahova adatetekera pomwe mpembo wa Jezu pomwe iye akhacita thupo kwene-kwene. Pomwe pakhadasala pang’ono kuti Jezu aperekedwe na Djuda, iye adapemba kuna Baba wace thangwe ra bzinthu bzomwe bzikhadasala pang’ono kumucitikira. Yahova alibe kundotetekera mpembo wa Jezu, koma adatumambo anjo kuti akalimbikise Mwana waceyo.—Luka 22:41-44.

7. Kodi timbabzibva tani tikawona kuti Yahova ambatetekera mipembo yathu?

 ⁷ Ntsiku zino, Yahova akupitiriza kutetekera mipembo ya atumiki wace ndipo iye ambatawira mipemboyo pa nthawe yabwino na mu njira yakuthemera. (Masalimo 116:1, 2) Mpfumakazi inango ya ku Índia idawona momwe Yahova adatawirira mipembo yace. Iyo ikhabonera kwene-kwene thangwe ra thupo, ndipo idapemba kwa Yahova kuti amuthandize kumalisa thupolo. Mpfumakaziyo idati: “Programa ya JW Broadcasting^® ya mwezi wa Maio, 2019, yakulewa bza momwe tingamalisire thupo, idandokhala ninga kuti idakonzedwera inepano. Ndidawona kuti programayo ikhali mtawiro wa mpembo wangu.”

8. Kodi Yahova adalatiza tani kuti ambafuna Jezu?

⁸ Yahova ambatifuna ndipo ambatithandiza, ninga momwe adafunira Jezu na kumuthandiza pa nthawe yomwe akhagumana na mabvuto pomwe akhacita utumiki bwace pa dziko la pantsi. (Juwau 5:20) Iye adathandiza Jezu kuti apitirize kukhala na cikhulupiro cakulimba na kumupasa bzomwe akhafunikira. Yahova adauza Mwana wace kuti ambamufuna na kukomedwa naye. (Mateu 3:16, 17) Jezu alibe kubzibva kuti akhali yekha thangwe rakuti akhakhulupira kuti Baba wace wakudzulu wa lufoyi angadamuthandiza.—Juwau 8:16.

9. Kodi tikudziwa tani kuti Yahova ambatifuna?

⁹ Tentsenefe timbawona momwe Yahova ambatilatizira lufoyi mu njira zakusiyana-siyana, ninga momwe adacitira na Jezu. Ndokumbukirani: Yahova adatibvuma kuti tikhale axamwali wace ndipo adatipasa abale na mpfumakazi azinji wa lufoyi omwe ambatikondwesa na kutilimbikisa tikakhala tidasunama. (Juwau 6:44) Yahova ambatipasambo bzinthu bzomwe timbafuna kuti tipitirize kukhala na cikhulupiro cakulimba. Ndipo iye ambatithandizambo kugumana bzinthu bzomwe timbafunikira pa moyo wathu kuti tikhale na moyo. (Mateu 6:31, 32) Tikambakumbukira kuti Yahova ambatifuna, lufoyi lathu kuna iye limbathimizirika.

10. Kodi tingapfunze ciyani na momwe Yahova ambacitira bzinthu na abale na mpfumakazi zathu?

¹⁰ Yahova ambafuna abale na mpfumakazi zathu. Tsono bziribe kupusa kuna ifepano kufuna abale na mpfumakazi zathuzo na kubzibva kuti timbafunidwambo. Bzimwebzi bzimbacitika thangwe rakuti tidakulira mbuto zakusiyana-siyana ndipo tina bzikhalidwe bzakusiyana. Ndipo tentsenefe timbacita bzinthu bzakuphonyeka bzomwe bzimbadekera lini anzathu. Tsono bzentsenebzi bziribe basa, tentsenefe tingalimbise lufoyi lomwe liripo pakati pathu. Kodi tingacite tani? Mwa kutewezera Baba wathu pakulatiza lufoyi kuna abale na mpfumakazi zathu. (Aefezo 5:1, 2; 1 Juwau 4:19) Mbatiwoneni bzomwe tingapfunze na ciratizo ca Yahova.

11. Kodi momwe Jezu adacitira bzinthu na wanthu bzimbalatiza tani kuti Yahova ngwa “ntsisi zikulu”?

¹¹ Yahova ambalatiza “ntsisi zikulu.” (Luka 1:78) Munthu wa ntsisi ambakomedwa lini akawona wanthu winango akubonera; ndipo iye ambanyang’ana njira zakuthandizira wanthuwo na kuwatsangalaza. Momwe Jezu akhacitira bzinthu na wanthu bzimbalatiza kuti Yahova ni Mulungu wa ntsisi. (Juwau 5:19) Pa nthawe inango pomwe Jezu adawona thimu la wanthu, iye “adawabvera ntsisi, thangwe wanthuwo akhali wakupwetekeka na wakumwazika ninga mabira yakusaya makabusa.” (Mateu 9:36) Jezu alibe kundowabvera ntsisi wanthuwo, koma iye adacita ciri-centse kuti awathandize. Iye adapoza atenda ndipo adatsangalaza wentse “wakuneta na wakulemedwa.”—Mateu 11:28-30; 14:14.

12. Kodi tingalatize tani kuti timbabvera ntsisi abale na mpfumakazi zathu?

¹² Tikambakumbukira mabvuto yomwe abale na mpfumakazi zathu ambagumana nayo, ifepano tin’dzawabvera ntsisi. Mwa ciratizo,  mpfumakazi ingakhale ikuduwala kwene-kwene. Tsono iyo ingalewe lini kuti ikuduwala, koma ingakomedwe kuthandizidwa. Kodi mpfumakaziyo in’kwanisa kupasa banja lace bzomwe iro likufunikira? Kodi ifepano tingakwanise kuiphikira cakudya ayai kuipukutira m’nyumba mwace? M’bale angacosedwe basa. Kodi ifepano tingamupasembo m’baleyo kobiri yomwe ingamuthandize mpaka iye kudzagumana basa linango?

13-14. Kodi tingakhale tani wakupasa ninga Yahova?

¹³ Yahova ngwakupasa. (Mateu 5:45) Ifepano tin’funika lini kucita kudikhirira kuti abale na mpfumakazi zathu ayambe ndiwo kubwera kudzatikumbira thandizo kuti tiwabvere bwino ntsisi. Ninga Yahova, tin’funika kuyamba ndifepano kuwabvera ntsisi na kuwathandiza pomwe iwo akanati kutibwerera. Yahova ambatiwonesa dzuwa ntsiku zentse napo kuti timbamukumbira lini kuti aticitire bzimwebzi. Dzuwalo limbandothandiza lini wanthu omwe ambamutenda koma limbathandiza wanthu wentse. Kodi imwepo mumbatsimikiza lini kuti Yahova ambatifuna mwakutipasa bzomwe timbafunikira pa moyo wathu? Ifepano timbamufuna kwene-kwene Yahova thangwe rakuti iye ngwakudeka mtima na wakupasa!

¹⁴ Abale na mpfumakazi zathu ambatewezera Yahova mwa kukhala wakupasa. Mwa ciratizo, mu gole la 2013, citeketeke cakucemeredwa Super Typhoon Haiyan cidadzonga kwene-kwene m’dziko la Filipinas. Abale na mpfumakazi zizinji adaluza nyumba zawo na bzinthu bzawo. Tsono abale wathu kuzungulira dziko lentse la pantsi adawathandiza. Azinji adapereka kobiri zawo ndipo winango adabzipereka kuti amange pomwe nyumba za abalewo zakukwana pafupi-fupi 750 mkati mwa gole libodzi! Pa nthawe ya matenda ya COVID-19 Mboni za Yahova zidaphata basa na nyongo kuti zithandize abale na mpfumakazi zawo. Tikambathandiza abale na mpfumakazi zathu mwakamfulumize, timbalatiza kuti timbawafuna.

15-16. Mwakubverana na Luka 6:36, kodi tin’funika kucita ciyani kuti titewezere Baba wathu wa kudzulu?

¹⁵ Yahova ngwa ntsisi na wakulekerera. (Werengani Luka 6:36.) Ntsiku zentse ifepano timbakwanisa kuwona kuti Baba wathu wa kudzulu ngwa ntsisi. (Masalimo 103:10-14) Ateweri wa Jezu akhali wakuperewera, napo bzikhali  tenepo, iye akhawabvera ntsisi na kuwalekerera. Iye adakhala wakukonzeka kupereka moyo wace kuti pikado zathu zilekereredwe. (1 Juwau 2:1, 2) Kodi imwepo mumbabzibva lini kuti ndimwe wakufendererana na Yahova na Jezu thangwe ra ntsisi na kutilekerera komwe iwo ambakulatiza?

¹⁶ Lufoyi lomwe liripo pakati pathu limbakhala lakulimba “[tikambalekererana] na mtima wentse.” (Aefezo 4:32) Tsono nthawe zinango bzimbatinesa kulekerera anzathu, tenepo timbafunikira kucita nyongo kuti tikwanise kucita bzimwebzi. Mpfumakazi inango idagumana phindu pomwe idawerenga nkhani ya mu Ntsanza ya Mulindiri yomwe ikhana msolo wakuti “Muzikhululukirana ndi Mtima Wonse.” * Iyo idalewa kuti: “Pomwe ndidapfunza nkhaniyo, ndidabvesesa kuti ni bwino kumbalekerera winango. Nkhaniyo idafotokoza kuti ukalekerera anzako bzin’funa lini kulewa kuti ukukomedwa na bzomwe iwo acitabzo ayai kuti bziribe kukuwawa. Koma kulekerera kumbathandauza kuleka kukoyera cakumtima mwanzako thangwe ra bzomwe aphonyabzo ucipitiriza kukhala na mtendere mu mtima mwako.” Ifepano tikambalekerera abale na mpfumakazi zathu na mtima wentse, timbalatiza kuti timbawafuna ndipo timbatewezera Baba wathu, Yahova.

17. Mwakubverana na Mateu 5:16, kodi tingalemekeze tani Baba wathu wa kudzulu?

¹⁷ Tina mwayi ukulu wakucita mbali ya banja la abale na mpfumakazi omwe ambafunana. Ifepano tikufuna kuti wanthu azinji anamate nafe pabodzi Mulungu wathu. Tenepo, tin’funika lini kucita bzinthu bzomwe bzingalewese kuipa Yahova ayai wanthu wace. Ndipopa nthawe zentse tin’funika kumbalatiza makhalidwe yabwino yomwe yangacitise wanthu azinji kufunambo kupfunza bza Yahova na kumutumikira.—Werengani Mateu 5:16.

18. Kodi n’ciyani comwe cingatithandize kuti tileke kucita mantha pomwe tikupalizira?

¹⁸ Nthawe zinango, wanthu angatinyoze ayai kutiboneresa thangwe rakuti timbabvera Baba wathu wa kudzulu. Kodi n’ciyani comwe tingacite penu tikubva mantha kufotokozera wanthu winango bzomwe timbakhulupira? Tin’funika  kukhulupira kuti Yahova na Mwana wace an’tithandiza. Jezu adauza anyakupfunza wace kuti aleke kukhala na thupo kuti an’kalewa ciyani na momwe angadakalewera. Thangwe ranyi adawauza tenepoyo? Jezu adawauza kuti: “Pa nthawe imweyo, mun’dzapasidwa bzomwe mudzalewe; thangwe omwe an’dzalewalewa ndimwepo lini mwekha, koma mzimu wa Baba wanu ndiye omwe un’dzalewalewa mwa imwepo.”—Mateu 10:19, 20.

19. Perekani ciratizo ca munthu omwe adapalizira mwakukhwimika.

¹⁹ Onani ciratizo ca m’bale Robert. Pomwe iye akhali nyakupfunza wa Bibliya ndipo akhadziwa lini bzinthu bzizinji bza m’Bibliya, pa nthawe inango iye adayenda ku nyumba ya mphala, ku África do Sul, kuti akafotokozere muyeruzi kuti thangwe ranyi akhalamba kucita basa la ucikunda. Iye mwakukhwimika adafotokozera nyumba ya mphalayo kuti iye akhafuna lini kupitira nkhani za ndale thangwe ra lufoyi lomwe iye akhanalo kuna abale wace wacikristau. Iye akhakomedwa kucita mbali ya banja lacikristau. Muyeruzi adamubvunza kuti: “Kodi abale wako mbani?” Robert akhadikhirira lini kubvunzidwa mbvunzo umweyu, tsono pa nthawe imweyo iye adakumbukira cinembo comwe cidamuthandiza kutawira mbvunzoyo. Cinemboco ni Mateu 12:50, comwe cimbati: “Ule omwe an’cita kufuna kwa Baba wangu wakudzulu, umweyo ndiye m’bale wangu, mpfumakazi yangu na mai wangu.” Napo kuti Robert akhali nyakupfunza wa Bibliya mupsa, mzimu wa Yahova udamuthandiza kutawira mbvunzo umweyo na mibvunzo minango mizinji yomwe akhaidikhirira lini. Tikupenukira lini kuti Yahova adakomedwa na bzomwe Robert adacita! Ndipo Yahova ambakomedwambo tikambamuthemba kuti ticite upalizi mwakukhwimika pa nthawe zakunesa.

20. Kodi tin’funika kutsimikiza kucita ciyani? (Juwau 17:11, 15)

²⁰ Bwerani tipitirize kutenda mwayi omwe tinawo wakucita mbali ya banja lacikristau lomwe lina lufoyi. Ifepano tina Baba wabwino pabodzi na abale na mpfumakazi omwe ambatifuna. Tin’funika kumbatenda nthawe zentse thangwe ra bzimwebzi. Sathani pabodzi na wanthu wace wakuipa omwe ambamuthandiza ambayeza kuticitisa kupenukira lufoyi la Baba wathu ndipo ambayeza kumalisa ciphatano cathu. Tsono Jezu adapemba kwa Baba wathu kuti atinyang’anire kuti banja lathu lipitirize kukhala lakuphatana. (Werengani Juwau 17:11, 15.) Yahova akutawira mpembo umweyu. Ninga Jezu, ifepano tin’funika lini kupenukira kuti Baba wathu wa kudzulu ambatifuna na kutithandiza. Tenepo mbatitsimikizeni kupitiriza kukhala wakuphatana na abale wathu wacikristau.