NKHANI YAKUPFUNZA 39
Wadzinza Wanu Akasiya Yahova
‘Nthawe zizinji iwo . . . [akhambamukhumudwisa].’—MASALIMO 78:40.
NYIMBO 102 Timbathandize Wale Omwe Mbakutepa
BZOMWE TIN’PFUNZA *
1. Kodi ifepano tingabve tani wadzinza wathu akacosedwa m’gwere?
KODI imwepo muna wadzinza wanu omwe adacosedwa m’gwere? Penu mun’ti inde, bzimwebzi bzingakhale bzakuwawa kwene-kwene! Mpfumakazi yakucemeredwa Hilda, idalewa kuti: “Pomwe mwamuna wangu adasaika, pambuyo pa magole 41 ya malowozi yathu, ndidawona kuti bzomwe bzidandicitikirabzo bzikhali cinthu cakuwawa kwene-kwene. * Tsono pomwe mwana wangu, mkazace na wana wace adacosedwa m’gwere, bzidakhala bzakundiwawa kwene-kweneletu.”
Yahova ambabvesesa kuwawidwa kwanu, munthu omwe mumbamufuna akasiya kumutumikira (Onani ndime 2-3) *
2-3. Mwakubverana na Masalimo 78:40, 41, kodi Yahova ambabva tani atumiki wace akasiya kumutumikira?
2 Kumbukirani momwe Yahova adabvera pomwe anjo winango, omwe akhacita mbali ya banja lace, adasiya kumubvera! (Djuda 6) Ndipo kumbukiranimbo momwe iye adabvera kuwawa pomwe wanthu wace omwe akhawafuna, omwe ni Ajirayeri, adamupandukira kazinji-kentse. (Werengani Masalimo 78:40, 41.) Tsimikizani kuti Baba wathu wa kudzulu Yahova ambabvambo kuwawa wadzinza wathu akasiya kumutumikira. Iye ambabvesesa momwe imwepo mumbabvera kuwawa bzimwebzi bzikakucitikirani. Thangwe ra ntsisi, iye an’dzakulimbikisani na kukuthandizani.
3 Mu nkhani ino, tin’cezerana bzomwe tingacite kuti titambire thandizo la Yahova, wadzinza wathu akacosedwa m’gwere. Ndipo tin’pfunzambo bzomwe tingacite kuti tithandize abale wa m’gwere omwe adzinza wawo acosedwa m’gwere. Tsono cakuyamba bwerani ticezerane bzomwe tingacite kuti titcenkhe makumbukidwe yakuipa yomwe yangatibwerere.
LEKANI KUMBABZIPASA MULANDU
4. Kodi abereki ambabva tani mwana wawo akasiya kutumikira Yahova?
4 Mwana wacimuna ayai wacikazi akasiya kutumikira Yahova, abereki kazinji-kazinji ambakumbuka kuti pinango pana cinthu comwe iwo angadacita kuti athandize mwanayo kuti apitirize kutumikira Yahova. Pomwe mwana wace wacimuna adacosedwa m’gwere, m’bale wakucemeredwa Luke adalewa kuti: “Ndikhabzipasa mulandu ndipo ndikhasaya tulo. Nthawe zinango ndikhambalira ndipo ndikhabva kuwawa mu mtima.” Mpfumakazi Elizabeth, yomwe idagumanambo na bvuto lakundendemerana na limweri, idadandaula mwakuwawidwa ndipo idalewa kuti: “Pinango ndidacita bzinthu bzakuphonyeka kuna mwananguyo. Ndidabzibva kuti ndiribe kucita bzizinji kuti ndimupfunzise kufuna Yahova.”
5. Kodi mbani omwe ambapasidwa mulandu munthu akasiya kutumikira Yahova?
5 Ifepano tin’funika kukumbukira kuti Yahova adatipasa mphaso ya ufulu bwakusankhula. Bzimwebzi bzin’funa kulewa kuti ifepano tingasankhule kumubvera ayai kusaya kumubvera. Napo kuti wana winango adakhala na abereki omwe akhalibe ciratizo cabwino, koma iwo adasankhula kutumikira Yahova mwakukhulupirika. Tsono winango omwe adaleredwa na abereki wawo, omwe adawapfunzisa cadidi mwakubverana na Bzinembo, na kupita kwa nthawe pomwe iwo adadzakula adasankhula kusiya kupfunza cadidico. Napo bziri tenepo, munthu ali-wentse angasankhule penu an’dzatumikira Yahova. (Djosuwe 24:15) Tenepo, abereki omwe adasunama thangwe rakuti wana wawo asiya kutumikira Yahova, iwo an’funika lini kubzipasa mulandu wakuti alibe kuwapfunzisa bwino.
6. Kodi wana ambabva tani abereki wawo akasiya kutumikira Yahova?
6 Nthawe zinango, mai ayai pai ambasiya kutumikira Yahova ndipo ambasiyambo banja lace. (Masalimo 27:10) Bzimwebzi bzimbakhala bzakunesa kwene-kwene kuna wana bzikakhala kuti aberekiwo asiya kukhala ciratizo cabwino. Esther, pomwe pai wace adacosedwa, adalewa kuti: “Inepano ndikhandokhalira kulira nthawe zentse thangwe rakuti iwo akhafunikira lini kusiya cadidi. Iwo adasankhula kucita bzinthu bzomwe bzidalatiza kuti an’funa lini pomwe ne na pang’onopo kutumikira Yahova. Nimbafuna kwene-kwene pai wangu. Tenepo, pomwe iwo adacosedwa, ndidacita thupo kwene-kwene na moyo wawo. Thangwe ra bzimwebzi, thupo langu limbathimizirika kwene-kwene.”
7. Kodi Yahova ambabva tani na wana omwe abereki wawo acosedwa m’gwere?
7 Wanamwe, penu abereki wanu acosedwa m’gwere, dziwani kuti ifepano timbawawidwambo ninga imwepo. Ndipo tsimikizani kuti Yahova akudziwambo momwe imwepo mukubvera kuwawa. Iye ambakufunani ndipo ambakomedwa na kukhulupirika kwanu, ndipo ifepano abale na mpfumakazi zanufe timbakufunanimbo. Kumbukiranimbo kuti imwepo mulibe mulandu thangwe ra bzomwe abereki wanu asankhula kucita. Ninga momwe talewera kale pakuyamba, Yahova adapasa munthu ali-wentse ufulu bwakusankhula. Ndipo munthu ali-wentse omwe adabzipereka acibatizidwa, “an’dzanyamula mtolo wace.”—Agalatiya 6:5.
8. Kodi n’ciyani comwe tingacite pomwe tikudikhirira kuti munthu omwe timbamufuna abwerere kwa Yahova? (Onani kwadru yakuti: “ Bwererani kwa Yahova.”)
8 Pomwe munthu omwe mumbamufuna wasiya kutumikira Yahova, imwepo mun’funika kukhala na cidikhiro cakuti kutsogolo iye an’dzabwerera pomwe acitumikira Yahova. Kodi n’ciyani comwe mun’funika kucita pa nthawe yomwe mukudikhirira kuti munthuyo adzabwerere? Mungacite ciri-centse comwe mungakwanise kuti mulimbise cikhulupiro canu. Mukacita bzimwebzo, imwepo mun’dzakhala ciratizo cabwino kwa wanthu winango m’banjamo, kuphatanidzambo kuna munthu omwe acosedwayo. Tenepo, mun’dzakhala na mphanvu yomwe in’dzakuthandizani kukunda makumbukidwe yakuipa. Bwerani tiwone bzinthu bzinango bzomwe bzingakuthandizeni kulimbisa cikhulupiro canu.
BZOMWE MUNGACITE KUTI MUPITIRIZE KUKHALA NA CIKHULUPIRO CAKULIMBA
9. Kodi mungacite ciyani kuti mupitirize kukhala na cikhulupiro cakulimba? (Onani kwadru yakuti: “ Bzinembo Bzakulimbikisa Wadzinza Wanu Akasiya Yahova.”)
9 Citani ciri-centse comwe mungakwanise kuti mupitirize kukhala na cikhulupiro cakulimba. Mpsabwino kwene-kwene kuna imwepo kupitiriza kubzilimbikisa na kulimbikisambo wanthu wa m’banja mwanu. Kodi mungacite tani bzimwebzi? Gumanani mphanvu kwa Yahova mwa kupitiriza kuwerenga Fala la Mulungu, kumbakumbukira bzomwe mwawerengabzo na kumbayenda ku mitsonkhano yacikristau. Mpfumakazi Joanna, yomwe pai wace na m’bale wace mkazi adasiya cadidi, idalewa kuti: “Ndikambawerenga Bibliya pa nkhani ya Abigayeli, Estere, Djobi, Zuze na Jezu, nimbatsangalazidwa kwene-kwene. Bziratizo bzawo bzimbandilimbikisa ndipo bzimbandithandiza kukhala na makumbukidwe yabwino. Nyimbo za programa ya Broadcasting zimbandilimbikisa pomwe.”
10. Kodi Masalimo 32:6-8 ambatithandiza tani kupirira mabvuto yomwe tikugumana nayo?
10 Tulirani Yahova thupo lanu lentse. Pomwe mukubzibva kuti mudasunama lekani kusiya kupemba kwa iye. Pitirizani kukumbira Mulungu wathu wa lufoyi kuti akuthandizeni kuwona bzinthu ninga momwe iye ambawonera, ndipo iye ‘an’dzakucitisani kukhala wakuzindikira na kukupfunzisani njira yomwe mun’funikira kufamba.’ (Werengani Masalimo 32:6-8.) Pinango bzingakuneseni kumufotokozera bwino-bwino Yahova momwe mukubvera. Koma Yahova ambabvesesa bwino-bwino kuwawa komwe mukubva mu mtima. Iye ambakufunani kwene-kwene ndipo akukukumbirani kuti mumufotokozere bzomwe bziri mu mtima mwanu.—Kufuluka 34:6; Masalimo 62:7, 8.
11.Mwakubverana na Ahebereu 12:11, thangwe ranyi tin’funika kuthandizira cirango ca lufoyi ca Yahova? (Onani kwadru yakuti: “ Kucosedwa ni Cirango ca Lufoyi la Yahova.”)
11 Thandizirani bzomwe akulu asankhula kucita. Nkhani yakucosedwa kwa munthu m’gwere ni makonzedwe ya Yahova. Ni njira yabwino yomwe imbathandiza munthu ali-wentse m’gwere, kuphatanidzambo munthu omwe waphonya. (Werengani Ahebereu 12:11.) Wanthu winango m’gwere angalewe kuti akulu aphonya kucosa munthu m’gwere, tsono kumbukirani kuti wanthu amwewa kawiri-kawiri ambafuna lini kulewa bzomwe nyakuphonyayo wacita. Bzimwebzi bzikacitika, ifepano timbakhala tiribe umboni bwentse bwakukwanira. Ndipo cinthu canzeru comwe tingacite ni kukhulupira kuti akulu omwe atonga nkhaniyo, acita nyongo yakuphatisa basa Bibliya kuti ‘ayeruzire Yahova.’—2 Nkhani 19:6.
12. Kodi ni phindu liponi lomwe winango adakhala nalo thangwe ra kuthandizira makonzedwe ya cirango ca Yahova?
12 Mukambathandizira makonzedwe ya akulu yakucosa munthu m’gwere omwe mumbamufuna, mumbakhala mukuthandiza munthuyo kuti abwerere kwa Yahova. Elizabeth, omwe tamufotokoza m’mbuyomu, adalewa kuti: “Pomwe mwana wathu mkulu adacosedwa m’gwere, bzidakhala bzakunesa kwene-kwene kuleka kumbaceza naye. Koma pomwe iye adadzabwerera kwa Yahova, mwana wathuyo adadzalewa kuti bzidakhala bwino kucosedwako. Pomwe padapita nthawe, iye adadzalewa kuti ndidapfunza bzinthu bzizinji bzabwino. Ndidapfunza kuti cirango ca Yahova nthawe zentse n’cabwino.” Mwamuna wace Mark adalewambo kuti: “Pomwe padapita nthawe, mwana wathuyo adandiuza kuti, cinthu cibodzi comwe cidamucitisa kubwerera ni thangwe rakuti tikhacita lini naye tsantsa. Nimbatenda kwene-kwene Yahova thangwe rakuti adatithandiza kukhala wakubvera.”
13. Kodi n’ciyani comwe mungacite mukakhala kuti mukuwawidwa mu mtima mwanu?
13 Mbacezani na axamwali omwe ambabvesesa momwe mukubvera. Mbacezani na Akristau wakukhwima omwe angakuthandizeni kupitiriza kukhala na cidikhiro. (Mimwani 12:25; 17:17) Joanna, omwe tamufotokoza m’mbuyomu, adalewa kuti: “Nthawe zinango mu mtimamu nimbabzibva kuti ndiri ndekha. Tsono kuceza na axamwali wakukhulupirika kwandithandiza kwene-kwene.” Kodi mungacite ciyani penu munthu mu gwere mwanu akucitirani cinthu comwe mulibe kukomedwa naco?
14. Thangwe ranyi ifepano tin’funika kupitiriza “kupirirana na kulekererana na mtima wentse”?
14 Mbapirirani na abale na mpfumakazi zanu. Tin’funika lini kudikhirira kuti nthawe zentse munthu an‘dzalewa mafala yabwino. (Tiyago 3:2) Tentsenefe ndife wakuperewera, tenepo tin’funika lini kudabwa munthu akasaya cakulewa ayai akalewa cinthu comwe cingatidekere lini, napo kuti iye akhafuna lini kulewa bzimwebzo. Kumbukirani malango yomwe mpostolo Paulo adayalewa, iye adati: “Pitirizani kupirirana na kulekererana na mtima wentse, napo penu munayo mathangwe yakukhalira wakukalipa.” (Akolose 3:13) Mpfumakazi inango, yomwe m’bodzi wa adzinza wace akhadacosedwa, idalewa kuti: “Yahova adandithandiza kulekerera abale omwe adacita bzinthu bzomwe bziribe kundidekera, napo kuti adacita bzimwebzo thangwe ra kufuna kundilimbikisa.” Kodi abale m’gwere angathandize tani wanthu wa m’banja la munthu omwe wacosedwa?
GWERE LINGATHANDIZEMBO
15. Kodi n’ciyani comwe tingacite kuti tithandize adzinza wa munthu omwe acosedwa m’gwere tsapanopa?
15 Mbakhalani munthu wakudeka mtima ndipo mbacitani uxamwali na wanthu wa m’banja la munthu omwe wacosedwa. Mpfumakazi yakucemeredwa Miriam idalewa kuti ikhacita thupo kuyenda ku mitsonkhano ya gwere pomwe m’bale wace adacosedwa. Mpfumakaziyo idalewa kuti: “Ndikhacita mantha kuti abale angadalewa ciyani. Tsono kumweko akhalipombo abale na mpfumakazi omwe akhalibembo kukomedwa na bzomwe bzidacitikabzo ndipo iwo alibe kulewa kuipa m’bale wanguyo. Nimbatenda abalewo thangwe ra kundithandiza kuleka kubzibva kuti ndiri ndekha.” Mpfumakazi inango idalewambo kuti: “Pomwe mwana wathu adacosedwa m’gwere, azixamwali wathu adabwera kudzatitsangalaza. Winango wa axamwali wathuwo adalewa kuti akhalibe cakulewa. Winango adalira nande, ndipo winango adanditumizira tsamba lomwe likhana mafala yakundilimbikisa. Bzomwe iwo adacitabzo bzidandithandiza kwene-kwene.”
16. Kodi gwere lingapitirize tani kuthandiza na kutsangalaza wale omwe m’bale wawo acosedwa?
16 Pitirizani kuthandiza adzinza wa munthu omwe wacosedwa m’gwere. Iwo ambafuna kulatizidwa lufoyi na kulimbikisidwa, kuposa pa nthawe yomwe m’bale wawoyo akhanati kucosedwa m’gwere. (Ahebereu 10:24, 25) Nthawe zinango wanthu wa m’banja la munthu omwe wacosedwayo ambafika pakuwona kuti abale m’gwere ambafuna lini pomwe kuceza nawo, kukhala ninga kuti iwo acosedwambo. Ifepano tikufuna lini kuti iwo ambakumbuke tenepoyo. Ifepano timbafunikira kulimbikisa wanthu maka-maka wana omwe abereki wawo adasiya kutumikira Yahova. Mpfumakazi Maria, yomwe mwamuna wace adacosedwa m’gwere ndipo mwamunayo adacoka pamui, idalewa kuti: “Azixamwali wangu winango akhabwera kumui kwangu kudzandiphikira na kundithandiza kupfunzisa wana wangu. Iwo adabvesesa kuwawidwa kwangu ndipo adalira nande. Iwo akhandikhotcerera pomwe wanthu akhandilewa bzinthu bzakunama ndipo adandilimbikisa kwene-kwene.”—Aroma 12:13, 15.
Abale m’gwere angalatize lufoyi mwa kuthandiza adzinza wa munthu omwe wacosedwa (Onani ndime 17) *
17. Kodi akulu wa gwere angathandize tani wale omwe adasunama?
17 Akulu wa gwere ambaphatisa basa mpata omwe ungagumanike kuti alimbikise wanthu omwe m’bale wawo acosedwa m’gwere. Imwepo muna ugo bwa kutsangalaza wale omwe m’bale wawo asiya kutumikira Yahova. (1 Atesalonika 5:14) Pomwe mitsonkhano ikanati kuyamba ayai pomwe yamala, yambani ndimwepo kumbawalimbikisa. Ndipo nthawe zinango mbawazungirani ndipo mbapembani nawo pabodzi. Mbapalizirani nawo pabodzi ayai mbawacemerani kuti adzakhale namwe pa kunamata kwanu kwa pa banja. Akulu wa gwere an’funika kumbathandiza wale omwe adasunama, kuwabvera ntsisi, kuwafuna na kuwatetekera.—1 Atesalonika 2:7, 8.
PITIRIZANI KUKHALA NA CIKHULUPIRO NDIPO THEMBANI YAHOVA
18. Mwakubverana na 2 Pedru 3:9, kodi n’ciyani comwe Mulungu ambafuna kuna wale omwe adasiya kumutumikira?
18 Yahova “an’funa lini kuti munthu ali-wentse adzapfudzidwe, koma an’funa kuti wanthu wentse akungule.” (Werengani 2 Pedru 3:9.) Napo kuti munthu angacite pikado ikulu, moyo wace umbapitiriza kukhala wakufunika kwa Mulungu. Kumbukirani kuti Yahova adapagali pereso yakuumira, yomwe ni moyo wa Mwana wace, kupagaliri ali-wentse wa ifepano. Yahova mwa lufoyi ambayezera kuthandiza wale omwe adasiya kumutumikira kuti abwerere kwa iye. Iye akudikhirira kuti wanthuwo acite bzimwebzi ninga momwe timbawonera mu ciratizo ca Jezu cakulewa bza mwana wakutaika. (Luka 15:11-32) Azinji omwe akhadasiya kutumikira Yahova, adayamba pomwe kutumikira Baba wawo wakudzulu wa lufoyi. Ndipo gwere lidawatambira na manja mawiri. Elizabeth, omwe afotokozedwa pakuyamba ule, adakomedwa kwene-kwene pomwe mwana wace adabwezeresedwa. Iye adati: “Nimbatenda kwene-kwene abale omwe adatilimbikisa kuleka kubwerera m’mbuyo.”
19. Thangwe ranyi tingapitirize kukhulupira Yahova?
19 Nthawe zentse tin’funika kukhulupira Yahova. Malango yace yambatithandiza nthawe zentse. Iye ni Baba wakupasa na wa ntsisi omwe ana lufoyi likulu kuna wale omwe ambamufuna na kumunamata. Tsimikizani kuti Yahova an’dzakusiyani lini mwekha pa nthawe yomwe mudasunama. (Ahebereu 13:5, 6) Mark, omwe tamufotokoza pakuyamba ule, adalewa kuti: “Yahova cipo acitisiya tekha. Iye nthawe zentse an’dzatithandiza pomwe tikugumana na mabvuto.” Yahova an’dzapitiriza kukupasani “mphanvu yakuposa yacibadwa.” (2 Akolinto 4:7) Tenepo, imwepo mungapitirize kukhala wakukhulupirika, kukhalambo na cidikhiro, napo penu munthu omwe mumbamufuna wasiya kutumikira Yahova.
NYIMBO 44 Mpembo wa Munthu Wakutsautsika
^ ndi. 5 Wadzinza wathu akasiya kutumikira Yahova, ifepano timbawawidwa kwene-kwene. Mu nkhani ino, tiniwona kuti Yahova ambabva tani bzimwebzi bzikacitika. Ndipo tin’pfunza bzomwe angacite adzinza wa munthu omwe wacosedwa kuti akhale wakukhwimika nakuti apitirize kukhala wakukhulupirika. Ndipo tin’pfunzambo bzomwe abale wa m’gwere angacite kuti atsangalaze na kuthandiza adzinza wa munthu omwe wacosedwayo.
^ ndi. 1 Madzina yanango ya mu nkhani ino yacinjidwa.
^ ndi. 79 BZOMWE BZIKUCITIKA PA CITHUNZI-THUNZI: M’bale akasiya banja lace na kusiyambo kutumikira Yahova, mkazi wace na wana wace ambabonera.
^ ndi. 81 BZOMWE BZIKUCITIKA PA CITHUNZI-THUNZI: Akulu awiri akulimbikisa banja m’gwere.
