Mbatiwoneni kuti Bibliya limbatawira yani mibvunzo imweyi.

Pa Mabasa 24:15 pambalewa kuti “kun’dzakhala kumuka kwa anyakufa, wakulungama na wakusaya kulungama.” Wanthu wakulungama ni wanthu omwe adabvera mitemo ya Yahova pomwe akhanati kufa, ndipopa madzina yawo yadanembedwa mu bukhu la moyo. (Malakiya 3:16) Tsono wanthu wakusaya kulungama ni wanthu omwe adafa koma alibe kukhala na mwayi wakupfunza bza Yahova ndipo madzina yawo yalibe kunembedwa mu bukhu la moyo.

Wanthu omwe ambafotokozedwa pa Juwau 5:28, 29 mbabodzi-bodzi na omwe ambafotokozedwa pa Mabasa 24:15. Pa mavesiya, Jezu adalewa kuti wanthu “omwe akhacita bzinthu bzabwino, an’dzamuka kuti atambire moyo, tsono wale omwe akhacita bzinthu bzakuipa, an’dzamuka kuti atongedwe.” Wanthu wakulungamawa akhacita bzinthu bzabwino pomwe akhanati kufa. Ndipopa iwo an’dzalamusidwa kuti atambire moyo thangwe madzina yawo yadanembedwa kale mu bukhu la moyo. Tsono wanthu wakusaya kulungama adacita bzinthu bzakuipa pomwe akhanati kufa ndipo madzina yawo yakanati kunembedwa mu bukhu la moyo. Ndipopa iwo an’dzatongedwa ayai an’dzapasidwa nthawe kuti awonedwe penu akuthemera kunembedwa madzina yawo mu bukhu la moyo. Pa nthawe imweyi, iwo an’dzakhala na mwayi wa kupfunza bza Yahova na kunembesa madzina yawo mu bukhu la moyo.

Pa Apokalipse 20:12, 13 pambalewa kuti wanthu wentse omwe an’dzalamusidwa an’dzafunika kubvera mafala ‘yomwe yadanembedwa m’mabukhu.’ Mabukhu yamweya ni mitemo ipsa yomwe Yahova an’dzatipasa mu dziko lipsa. Wanthu wentse omwe an’dzalamba kubvera mitemoyo an’dzaphedwa.  —  Zaiya 65:20.

Pa Daniyeli 12:2 pambalewa kuti wanthu winango omwe adafa an’dzalamusidwa “kuti akhale na moyo wakusaya kumala, koma winango an’dzanyozedwa ndipo an’dzawengedwa mpaka kale-kale.” Vesi limweri likulewa bza kutongedwa kwakumalizira kwa wanthu omwe an’dzalamusidwa. Wanthu winango an’dzatambira “moyo wakusaya kumala” ndipo winango “an’dzawengedwa mpaka kale-kale.” Ndipopa kuphampha kwa magole 1000, wanthu winango an’dzatambira moyo wakusaya kumala, ndipo winango an’dzapfudzidwa mwakuti an’dzawoneka lini pomwe.  —  Apokalipse 20:15; 21:3, 4.

Magrupo mawiri ya wanthu omwe an’dzalamusidwa tingayayezezere na wanthu omwe an’funa kukhala mu dziko la anekaciro. Tingalewe kuti wanthu wakulungama ni wanthu omwe abvumizidwa na boma kukhala m’dzikolo na kuwapasa ufulu bwa kucita bzomwe akufuna. Ndipo wanthu wakusaya kulungama ni wanthu omwe abvumizidwa na boma kukhala m’dzikolo koma mu kanthawe kakucepa. Alendo amwewa an’funika kuteweza malamulo ya m’dzikolo kuti abvumizidwe kupitiriza kukhala m’mwemo. Mpsibodzi-bodzimbo na wanthu wakusaya kulungama omwe an’dzalamusidwa. Iwo an’dzafunika kubvera mitemo ya Yahova kuti adzabvumizidwe kukhala m’paraizo. Kumbukirani kuti wanthu wentse omwe abvumizidwa kukhala m’dziko la anekaciro an’funika kuteweza malamulo ya dzikolo. Iwo akasaya kucita bzimwebzi ambathamangisidwa. Mpsibodzi-bodzimbo na wanthu omwe an’dzalamusidwa. Iwo akadzalatiza makhalidwe yabwino na kukhala wakukhulupirika, an’dzapitiriza kukhala mu dziko lipsa. Koma akadzalamba an’dzacosedwa.

N’cadidi kuti Yahova ni Mulungu wa ntsisi, koma iyembo ni Mulungu wa cirungamo. (Bzakutonga 32:4; Salimo 33:5) Iye an’dzalatiza lufoyi lace mwa kulamusa wanthu wakulungama na wakusaya kulungama kubodzi. Tsono iye an’dzafuna kuti wentsenewo apitirize kuteweza mitemo yace yakulungama. Wanthu omwe an’dzamubvera na kumufuna an’dzabvumizidwa kupitiriza kukhala na moyo mu dziko lipsa.