Mu nkhani imweyire, tidapfunza kuti pana nkhani yakufunika kwene-kwene kwa wanthu wentse pabodzi na anjo, komwe ni kucenesedwa kwa dzina likulu la Yahova. Nkhani yakuti Yahova ambatonga bwino ayai ne imbacita mbali ya nkhani ikulu imweyi ya kucenesedwa kwa dzina la Yahova. Ndipo kukhulupirika kwa munthu ali-wentse kwa Yahova kumbacitambo mbali ya nkhani imweyi.

Thangwe ranyi tikulewa kuti nkhani ikulu ni kucenesedwa kwa dzina la Yahova? Mbaticezeraneni mathangwe matatu.

Cakuyamba, Sathani adapswipiza dzina la Yahova na mbiri yace, mu zunde la Edeni. Mbvunzo omwe Sathani adabvunza Eva ukhalatiza ninga kuti Yahova ngwakuipa ndipo malango yomwe adapasa Adamu na Eva yakhali yakusaya cirungamo. Patsogolo pace, Sathani adapitanisa bzomwe Yahova adalewa ndipo adalewambo kuti Yahova ambanama. Mwa njira imweyi, iye adapswipiza dzina la Yahova. Iye adakhala “Dyabu,” bzomwe bzimbathandauza “nyamagunkha.” (Juwau 8:44) Pakuti Eva adakhulupira magunkha ya Sathaniya, iye alibe kubvera Mulungu bzomwe bzidalatiza kuti adalamba kuti Mulungu akhale mtongi wace. (Genesesi 3:1-6) Ntsiku zino, Sathani akupitiriza kumwaza magunkha pakulewa bza Yahova. Wale omwe ambakhulupira magunkha yamweya ambabvera lini Yahova. Ndipopa, kwa wanthu wa Mulungu, kunyozedwa kwa dzina lakucena la Yahova m’kwakusaya cirungamo. Limweri ni thangwe lomwe lidacitisa kuti pa dziko la pantsi pakhale na mabvuto mazinji.

Caciwiri, kuti wanthu agumane phindu, Yahova ngwakukonzeka kucenesa dzina lace ku magunkha yentse yomwe ambamunamizira. Cimweci ndico cinthu cakufunika kwene-kwene kwa Yahova. Ndipopa, iye adalewa kuti: “Nin’dzacenesa dzina langu likulu.” (Ezekiyeli 36:23) Ndipo Jezu adabvekesa bwino kuti n’ciyani comwe cin’funika kukhala cinthu cakuyamba kwa mtumiki ali-wentse wa Yahova, pomwe adalewa kuti: “Dzina lanu licenesedwe.” (Mateu 6:9) Bibliya limbalewa mwakubwereza-bwereza kufunika kwa kucenesedwa kwa dzina la Yahova. Mbatiwoneni mavesi aya: “Mupaseni Yahova ulemerero pa dzina lace.” (1 Nkhani 16:29; Salimo 96:8) “Imbani nyimbo za kutumbiza dzina lace.” (Salimo 66:2) “Nin’dzatumbiza dzina lanu mpaka kale-kale.” (Salimo 86:12) Nthawe inango yomwe Yahova adalalewa kucokera kudzulu idacitika mu templo ya ku Jeruzalemu, pomwe Jezu adalewa kuti: “Baba lemekezani dzina lanu.” Yahova adatawirambo kuti: “Ndalilemekeza kale ndipo nin’dzalilemekeza pomwe.” — Juwau 12:28. a

Cacitatu, cakulinga ca Yahova n’cakubverana na dzina lace, ayai mbiri yace. Onani momwe dzina la Yahova lin’dzakhalira lakufunika pambuyo pa mayezo yakumalizira kuphampha kwa Utongi bwa Magole 1000 bwa Kristu. N’ciyani comwe cin’dzacitika? Kodi anjo na wanthu an’dzaliwona tani dzina la Yahova pa nthawe imweyo? Kuti titawire mbvunzo umweyu, mbatiwoneni bzinthu bziwiri bzomwe bzimbacita mbali yakucenesedwa kwa dzina la Yahova, komwe ni kukhulupirika kwa wanthu na katongedwe ka Yahova.  Kodi wanthu omwe adalatiza kuti mbakukhulupirika an’dzapitiriza kugumana na mabvuto yomwe yan’dzayeza kukhulupirika kwawoko? Ne. Iwo an’dzakhala wakulungama ndipo an’dzakhala adayezedwa kale. Iwo an’dzakhala adatambira moyo wakusaya kumala. Kodi pa nthawe imweyo wanthu an’dzapitiriza kunesana pa nkhani yakuti mbani omwe an’themera kutonga? Ne. Ndipo pan’dzafunikira lini pomwe kulatiza kuti Umambo bwa Mulungu n’bwabwino, thangwe pa nthawe imweyo kudzulu na pa dziko la pantsi wanthu an’dzakhala wakubverana ndipo wentse an’dzabvuma utongi bwa Yahova. Tsono, kodi pa nthawe imweyo dzina la Yahova lin’dzapitiriza kukhala cinthu cakufunika kwene-kwene kwa wanthu wace?

Pa nthawe imweyo munthu ali-wentse an’dzadziwa cadidi pakulewa bza Yahova ndipo dzina lace lin’dzacenesedwa ku magunkha yentse. Napo bziri tenepo, dzina la Yahova lin’dzapitiriza kukhala cinthu cakufunika kwene-kwene kwa atumiki wace wentse kudzulu na pa dziko la pantsi. Thangwe ranyi? Thangwe rakuti iwo an’dzapitiriza kuwona bzinthu bzabwino bzomwe Yahova an’dzacita. Kumbukirani: Pakuti Jezu mwakubzicepesa an’dzabwezera Umambo kwa Yahova, Yahovayo an’dzakhala “bzinthu bzentse kwa wanthu wentse.” (1 Akolinto 15:28) Patsogolo pace, wanthu wentse pa dziko la pantsi an’dzakhala na “ufulu bwa ulemerero bwa wana wa Mulungu.” (Aroma 8:21) Ndipo Yahova an’dzakwanirisa cakulinga cace cakukhala na banja la kuphatana la wana wace wa kudzulu na pa dziko la pantsi. — Aefezo 1:10.

Pambuyo pa bzinthu bzentsebzi kucitika, kodi wanthu wa m’banja la Yahova wakudzulu na wa pa dziko la pantsi an’dzabva tani? Mwa kusaya kupenukira, bzimwebzi bzin’dzaticitisa kuti tipitirize kutumbiza Yahova pabodzi na dzina lace. Nyakunemba salimo Davide adafuliziridwa kuti anembe kuti: “Yahova Mulungu atumbizidwe . . . Dzina lace litumbizidwe mpaka kale-kale.” (Salimo 72:18, 19) Ndipo ifepano tin’dzapitiriza kugumana mathangwe yakucitira bzimwebzi mpaka kale-kale.

Dzina la Yahova limbaimira bzentse pakulewa bza iye. Tikambakumbukira bza dzina la Yahova bzimbaticitisa kuti tikumbukirembo bza lufoyi lace. (1 Juwau 4:8) Tin’dzapitiriza kukumbukira lufoyi lomwe Yahova adatilatiza pa kutilenga na pa kutipasa cakulombolera. Ndipo tin’dzapitirizambo kuwona kuti katongedwe kace m’kakulungama na ka lufoyi. Koma tin’dzapitiriza kuwona momwe Yahova ambatilatizira lufoyi mpaka kale-kale ndipo tin’dzapitirizambo kukhala pa uxamwali na Pai wathu na kumuimbira nyimbo za kutumbiza dzina lace. — Salimo 73:28.