Pomwe tikuwerenga Bibliya, tingafufudze kuti tibvesese bzomwe tikuwerengabzo. Tsono tin’funika lini kupfunza kuti tindothimizire bzomwe timbadziwa pa nkhani za m’Bibliya. Tikufuna kupfunza bzizinji bza makhalidwe ya Yahova bzomwe bzin’citisa kuti lufoyi lathu kwa iye lithimizirike. Ndipopa, tin’funika kumbabzibvunza kuti: ‘Kodi nkhani yomwe ndikuwerengayi ikundipfunzisa ciyani bza Yahova?’

Pomwe mukupfunza, mungayezere kuwona momwe nkhaniyo ikulatizira kuti Yahova ana lufoyi, nzeru, cirungamo na mphanvu. Tsono, makhalidwe ya Yahova ni manaiya lini basi. Iye ana makhalidwe pomwe manango yabwino kwene-kwene. Kodi n’kuponi komwe tingagumane nkhani zomwe zikufotokoza bza makhalidwe yace?

Onani lista ya makhalidwe yanango ya Yahova yakupitirira 50 mu Índice das Publicações da Torre de Vigia pa kamsolo kakuti “Jeová” pomwe padanemba kuti “Lista de qualidades.” Nyang’anani makhalidwe yomwe yakubverana na nkhani yomwe mukuwerengayo. (Penu muna Bukhu la Kufufudzira Nkhani la Mboni za Yahova lokha, mungawone pa kamsolo kakuti “Yahova Mulungu” ndipo patsogolo pace pa kamsolo kakuti “Makhalidwe ya Yahova.”)