NKHANI YAKUPFUNZA 36
Nyamulani Bzomwe Mpsakufunika Ndipo Tayani Bzomwe Mpsakusaya Kufunika
“Mbaticoseni cinthu ciri-centse cakulemera . . . , ndipo bwerani tithamange mwakupirira pa kuthamanga komwe kwaikhidwaku.” — AHEBEREU 12:1.
NYIMBO 33 Tulirani Yahova Thupo Lanu
BZOMWE TIN’PFUNZA a
1. Mwakubverana na Ahebereu 12:1, kodi n’ciyani comwe tin’funika kucita kuti tipitirize kuthamanga mpaka kuphampha?
BIBLIYA limbandendemezera moyo wa Akristaufe na kuthamanga. Anyakuthamanga omwe ambafika kuphampha an’dzasimbidwa na moyo wakusaya kumala. (2 Timotio 4:7, 8) Tin’funika kucita nyongo ya kupitiriza kuthamanga thangwe tasala pang’ono kufika. Mpostolo Paulo, omwe adathamanga mpaka kuphampha, adafotokoza bzinthu bzomwe bzingatithandize. Iye adatiuza kuti: “Mbaticoseni cinthu ciri-centse cakulemera . . . , ndipo bwerani tithamange mwakupirira pa kuthamanga komwe kwaikhidwaku.” — Werengani Ahebereu 12:1.
2. Kodi ‘kucosa cinthu ciri-centse cakulemera’ kumbathandauza ciyani?
2 Pomwe Paulo adanemba kuti ‘ticose cinthu ciri-centse cakulemera,’ kodi iye akhafuna kulewa kuti Mkristau an’funika lini kunyamula mtolo uli-wentse? Ne, ndibzo lini bzomwe iye akhafuna kulewa. M’mbuto mwace, iye akhafuna kulewa kuti tin’funika lini kunyamula mitolo yakusaya kufunika. Mitolo imweyi ingatisokoneze na kutinetesa. Kuti tileke kuneta, tin’funika kudziwa bzinthu bzakusaya kufunika bzomwe bzingatinetese na kubzitaya mwakamfulumize ndipo pa nthawe ibodzi-bodziyo, tin’funika lini kusiya mitolo yomwe tin’funika kuinyamula. Tikasaya kucita tenepoyo bzingakhale bzakunesa kuti tithamange. (2 Timotio 2:5) Kodi ni mitolo iponi yomwe tin’funika kunyamula?
3. (a) Mwakubverana na Agalatiya 6:5, kodi ni mtolo uponi omwe tin’funika kunyamula? (b) N’ciyani comwe tin’cezerana mu nkhani ino, ndipo thangwe ranyi?
3 Werengani Agalatiya 6:5. Paulo adalewa bzinthu bzomwe tin’funika kunyamula. Iye adanemba kuti: “Ali-wentse an’dzanyamula mtolo wace.” Mtolo omwe Paulo akhalewa pamwepa ni udindo bomwe ali-wentse anganyamule pamaso pa Mulungu payekha. Mu nkhani ino, tiniwona kuti “mtolo umweyu” n’ciyani ndipo tingaunyamule tani. Ndipo tin’kwanisambo kudziwa mitolo yakusaya kufunika yomwe tikuinyamula na kudziwa momwe tingaitayire. Kunyamula mtolo wathu na kutaya mitolo yakusaya kufunika, bzin’dzatithandiza kuthamanga mu njira ya ku moyo.
MITOLO YOMWE TIN’FUNIKA KUINYAMULA
Kunyamula mtolo wathu kumbaphatanidza lumbiro lomwe tidacita kwa Yahova, kukwanirisa udindo bwathu m’banja na kubvuma bzakutewera pa bzakusankhula bzathu bzakuphonyeka (Onani ndime 4-9)
4. Thangwe ranyi lumbiro lathu la kubzipereka kwa Yahova ni mtolo lini wakulemera? (Onani cithunzi-thunzi.)
4 Lumbiro la kubzipereka kwathu. Pomwe ifepano tidabzipereka kwa Yahova, tidalumbira kuti tin’dzamutumikira na kucita kufuna kwace. Tin’funika kupitiriza kukwanirisa lumbiro lathu. Kukhala na moyo mwakubverana na lumbiro lathu ni cinthu cakufunika kwene-kwene, tsono ni mtolo lini wakulemera. Thangwe ranyi? Thangwe Yahova adatilenga kuti timbacite kufuna kwace. (Apokalipse 4:11) Iye adatilenga na cikhumbo cakufuna kumutumikira ndipo adatilenga m’cifanikiso cace. Ndipopa, tingakhale pa uxamwali na iye ticipitiriza kucita kufuna kwace. (Salimo 40:8) Ndipo ifepano tikacita bzomwe Mulungu ambafuna na kutewezera Mwana wace, ‘tin’dzagumana mtsangalazo.’ — Mateu 11:28-30.
(Onani ndime 4-5)
5. N’ciyani comwe cingakuthandizeni kuti mukwanirise lumbiro lanu? (1 Juwau 5:3)
5 Kodi imwepo munganyamule tani mtolo umweyu? Pana bzinthu bziwiri bzomwe bzingakuthandizeni. Cakuyamba, pitirizani kulimbisa lufoyi lanu kwa Yahova. Imwepo mungacite bzimwebzo mwa kumbakumbukira bzisimbo bzomwe wakupasani na bzinthu bzabwino bzomwe mukubzidikhirira kutsogolo. Lufoyi lanu kwa Mulungu likakula, bzin’dzakhala bzakupusa kumubvera. (Werengani 1 Juwau 5:3.) Caciwiri, tewezerani Jezu. Jezu adacita kufuna kwa Mulungu thangwe akhapemba kwa iye na kumukumbira kuti amuthandize ndipo akhambakumbukirambo bzisimbo bzomwe angadadzatambira. (Ahebereu 5:7; 12:2) Ninga Jezu, pitirizani kupemba kwa Yahova kuti mukhale wamphanvu ndipo mbakumbukirani cidikhiro comwe munaco ca dziko lipsa. Lufoyi lanu kwa Mulungu likakula na kutewezera Mwana wace, imwepo mun’dzakwanirisa lumbiro lanu.
6. Thangwe ranyi tin’funika kukwanirisa udindo bwathu m’banja? (Onani cithunzi-thunzi.)
6 Udindo bomwe tinabo m’banja mwathu. Pomwe tikuthamanga mu njira ya ku moyo, tin’funika kufuna Yahova na Jezu kuposa momwe timbafunira wanthu wa m’banja mwathu. (Mateu 10:37) Bzimwebzi bzin’funa lini kulewa kuti tin’funika lini kukwanirisa udindo bwathu m’banja ninga kuti udindobo bumbatitazisa kukondwesa Yahova na Jezu. M’mbuto mwace, kuti Mulungu pabodzi na Kristu atifune, tin’funika kukwanirisa udindo bwathu m’banja. (1 Timotio 5:4, 8) Tikakwanirisa udindo bwathu tin’dzakhala wakukondwa. Yahova adalenga mabanja kuti yambakhale yakukondwa mwamuna na mkazi akambalemekezana na kucitirana bzinthu mwalufoyi, abereki akambafuna na kupfunzisa wana wawo ndipo wana akambabvera abereki wawo. — Aefezo 5:33; 6:1, 4.
(Onani ndime 6-7)
7. Kodi imwepo mungacite ciyani kuti mukwanirise udindo bwanu m’banja?
7 Kodi imwepo munganyamule tani mtolo umweyu? Penu ndimwe mwamuna, mkazi ayai mwana, mbakhulupirani malango ya m’Bibliya. Lekani kutewezera nzeru zanu ayai bzomwe bzimbacitika komwe mumbakhala ayai bzomwe adziwi ambalewa kuti mucite. (Mimwani 24:3, 4) Phatisani bwino basa mabukhu yathu yomwe yambafotokoza bza Bibliya. Mabukhu yamweya yambatithandiza momwe tingaphatisire basa malango ya m’Bibliya. Mwa ciratizo, nkhani zakusiyana-siyana za mu webisaite yathu pa mbali yakuti “Mfundo zothandiza mabanja” zidakonzedwa kuti zithandize mabanja, abereki na maswaka pa mabvuto yomwe iwo akugumana nayo ntsiku zino. b Phatisani basa malango ya m’Bibliya napo kuti wanthu winango wa m’banja mwanu akucita lini bzimwebzo. Mukacita bzimwebzi, banja lanu lin’dzagumana phindu ndipo mun’dzatambira bzisimbo bzakucokera kwa Yahova. — 1 Pedru 3:1, 2.
8. Kodi n’ciyani comwe cin’dzacitika tikasankhula bzinthu mwakuphonyeka?
8 Bzakutewera bza bzakusankhula bzathu. Yahova adatipasa ufulu bwakusankhula ndipo iye akufuna kuti tigumane phindu na bzakusankhula bzomwe timbacita. Iye angatikhotcerere lini ku bzakuipa bzomwe bzimbabwera thangwe ra kusankhula mwakuphonyeka. (Agalatiya 6:7, 8) Ndipopa tin’funika kubvuma bzakutewera bzomwe bzingabwere thangwe ra kusankhula mwakuphonyeka, mafala yomwe timbalewalewa mwakusaya kukumbuka bwino na kucita bzinthu mwaphumapuma. Tikacita bzinthu bzakuphonyeka, cikumbu-mtima cathu cingatibonerese. Tikadziwa kuti tina udindo pa bzentse bzomwe timbasankhula, tingazimbule pikado zathu, kukonzesa bzomwe taphonyesa na kuleka kubzibwerezera pomwe. Bzimwebzi bzingatithandize kupitiriza kuthamanga mu njira yakuyenda ku moyo.
(Onani ndime 8-9)
9. N’ciyani comwe mungacite penu mwacita cakusankhula cakuphonyeka? (Onani cithunzi-thunzi.)
9 Kodi imwepo munganyamule tani mtolo umweyu? Penu imwepo mwacita cakusankhula cakuphonyeka, n’ciyani comwe mungacite? Dziwani kuti imwepo mungacinje lini bzinthu bza m’mbuyo. Lekani kudzonga nthawe yanu na mphanvu zanu kuti mulatize kuti mulibe kuphonya ayai kupasa mulandu anzanu thangwe ra bzakuphonya bzanu. M’mbuto mwace, bvumani bzakuphonya bzanubzo ndipo citani bzomwe mungakwanise tsapano. Imwepo mukabzipasa mulandu thangwe ra bzomwe mwaphonya, pembani kwa Yahova mwakubzicepesa, bvumani kuphonya kwanuko ndipo mukumbireni kuti akulekerereni. (Salimo 25:11; 51:3, 4) Kumbirani wale omwe mwawaphonyera kuti akulekerereni ndipo bzikakhala bzakufunika kumbirani akulu kuti akuthandizeni. (Tiyago 5:14, 15) Pfunzani na bzomwe mwaphonya ndipo lekani kubzibwerezera pomwe. Mukacita bzimwebzo, Yahova an’dzakubverani ntsisi ndipo an’dzakupasani thandizo lomwe mungafunikire. — Salimo 103:8-13.
MITOLO YOMWE TIN’FUNIKA KUITAYA
10. Thangwe ranyi kudikhirira bzinthu bzomwe tingakwanise lini kukhala nabzo ungakhale mtolo wakulemera? (Agalatiya 6:4)
10 Bzinthu bzomwe bzingacitike lini. Tikambabzindendemezera na anzathu tingambakumbukire bzinthu bzomwe tin’kwanisa lini kukhala nabzo. (Werengani Agalatiya 6:4.) Tikambabzindendemezera na anzathu, nthawe zentse tin’dzakhala wa njiru na wa mpikisano. (Agalatiya 5:26) Tikafuna kucita bzinthu bzomwe anzathu akucita napo kuti tingakwanise lini kubzicita tingabzibweresere mabvuto. Penu ‘cinthu comwe tikhacidikhirira cikasaya kucitika, cimbaduwalisa mtima,’ bzimbatiwawiratu kudikhirira cinthu comwe tingakwanise lini kukhala naco! (Mimwani 13:12) Kucita bzimwebzo kungacepese mphanvu yathu ndipo kungaticedwese kuthamanga mu njira ya ku moyo. — Mimwani 24:10.
11. N’ciyani comwe mungacite kuti mutcenkhe kucita bzinthu bzomwe mungabzikwanise lini?
11 Kodi imwepo mungautaye tani mtolo umweyu? Yahova ambadziwa bzomwe mungakwanise kucita na bzomwe mungakwanise lini kucita. Iye ambadikhirira lini kuti mumupase bzomwe imwepo mulibe. (2 Akolinto 8:12) Khalani na citsimikizo cakuti Yahova ambandendemezera lini bzomwe imwepo mumbacita na bzomwe anzanu ambacita. (Mateu 25:20-23) Iye ambatenda basa lanu lentse, kukhulupirika kwanu na kupirira kwanu. Bvumani mwakubzicepesa kuti magole yanu, thanzi lanu na bzakucitika bzinango bzingacitise kuti muleke kukwanisa kucita bzinthu bzinango. Ninga Barzilai, khalani wakukonzeka kulamba mabasa manango penu muna bvuto la thanzi. (2 Samuyeli 19:35, 36) Ninga Mozeji, mbapasani maudindo wanthu winango omwe mbakuthemera. (Ekisodo 18:21, 22) Kubzicepesa kumweku kun’dzakuthandizani kuleka kudikhirira bzinthu bzomwe mungakwanise lini kukhala nabzo ndipo mun’dzaneta lini pa kuthamanga mu njira ya ku moyo.
12. Kodi tin’funika kubzipasa mulandu pa bzakusankhula bzakuipa bzomwe anzathu ambacita? Fotokozani.
12 Kubzipasa mulandu pa bzakusankhula bzakuipa bzomwe winango acita. Ifepano tingacitire lini bzakusankhula wanthu winango ndipo tingawakhotcerere lini ku bzakutewera bzomwe angakhale nabzo pa bzakusankhula bzakuipa bzomwe iwo acitabzo. Mwa ciratizo, mwana wacimuna ayai wacikazi angasankhule kusiya kutumikira Yahova. Cakusankhula cimweci cingasunamise kwene-kwene abereki wace. Na tenepo, abereki omwe ambabzipasa mulandu pa bzakusankhula bzakuipa bzomwe wana wawo ambacita ambanyamula mtolo wakulemera. Yahova ambadikhirira lini kuti iwo anyamule mtolo umweyu. — Aroma 14:12.
13. N’ciyani comwe m’bereki angacite mwana wace akacita cakusankhula cakuphonyeka?
13 Kodi imwepo mungataye tani mtolo umweyu? Kumbukirani kuti Yahova adapasa tentsenefe ufulu bwakusankhula. Iye ambalekerera kuti ali-wentse acite yekha cakusankhula. Bzimwebzi bzimbaphatanidzambo penu tingasankhule kumutumikira. Yahova ambadziwa kuti imwepo ndimwe lini m’bereki wakulungama; iye ambafuna kuti imwepo mucite bzomwe mungakwanise. Cakusankhula comwe mwana wanu angacite ni udindo bwace sikuti bwanu. (Mimwani 20:11) Napo bziri tenepo, imwepo mungacite thupo na bzinthu bzakuphonyeka bzomwe mwacita. Na tenepo, muuzeni Yahova momwe mukubvera ndipo mukumbireni kuti akulekerereni. Iye ambadziwa kuti imwepo mungakwanise lini kucinja bzinthu bzomwe bzidacitika m’mbuyo. Pa nthawe ibodzi-bodziyo, iye ambadikhirira lini kuti imwepo mucitise mwana wanu kuti aleke kugumana na bzakutewera pa bzakusankhula bzomwe wacita. Kumbukirani kuti mwana wanu akacita ciri-centse kuti abwerere kwa Yahova, Yahovayo an’dzamutambira mwakukondwa. — Luka 15:18-20.
14. Thangwe ranyi kubzipasa mulandu mwakunyanyira ni mtolo omwe tin’funika kuutaya?
14 Kubzipasa mulandu mwakunyanyira. Mpsakubveka kuti tikaphonya, timbabzipasa mulandu. Tsono, kubzipasa mulandu mwakunyanyira ni mtolo omwe tin’funika lini kuunyamula. Ni mtolo omwe tin’funika kuutaya. Tingadziwe tani kuti tikubzipasa mulandu mwakunyanyira? Tikazimbula pikado zathu, kukungula na kutcenkha kubwerezera pomwe pikadozo, tingakhale na citsimikizo cakuti Yahova atilekerera. (Mabasa 3:19) Tikateweza njira zimwezi, Yahova an’funa kuti tileke kumbabzipasa mulandu pa pikado zomwe tidacita. Iye ambadziwa kuti kubzipasa mulandu kwene-kwene kungatidzonge. (Salimo 31:10) Tikabzipasa mulandu mwakunyanyira tingasiye kuthamanga mu njira ya ku moyo. — 2 Akolinto 2:7.
Mukakungula kucokera pantsi pa mtima, Yahova an’dzakumbukira lini pomwe pikado zanu ndipo imwepombo lekani kumbazikumbukira (Onani ndime 15)
15. N’ciyani comwe mungacite mukakhala kuti mukubzipasa mulandu mwakunyanyira? (1 Juwau 3:19, 20) (Onani cithunzi-thunzi.)
15 Kodi imwepo mungautaye tani mtolo umweyu? Penu mukubzipasa mulandu mwakunyanyira, kumbukirani kuti Mulungu “ambalekereradi.” (Salimo 130:4) Pa nkhani yakulekerera wale omwe akungula na mtima wentse, iye adapicira kuti: “Nin’dzakumbukira lini pomwe pikado zawo.” (Jeremiya 31:34) Bzimwebzi bzimbathandauza kuti Yahova an’dzakupasani lini pomwe mulandu thangwe ra pikado zomwe mudacita kale-kale. Tenepo, lekani kumbakumbuka kuti mabvuto yomwe mukugumana nayo yakulatiza kuti Mulungu alibe kukulekererani. Ndipo lekani kumbabzipasa mulandu, thangwe pikado zanu za m’mbuyo zingakutaziseni kucita bzizinji pa kutumikira Yahova. Yahova ambakhala lini akukumbukira pikado zanu ndipo imwepo lekani kumbazikumbukirambo. — Werengani 1 Juwau 3:19, 20.
THAMANGANI KUTI MUDZATAMBIRE MABAIBAI
16. Ninga anyakuthamanga, n’ciyani comwe tin’funika kuzindikira?
16 Pomwe tikuthamanga mu njira ya ku moyo, tin’funika ‘kuthamanga kuti tikwanise kudzatambira mabaibai.’ (1 Akolinto 9:24) Tingakwanise kucita bzimwebzi tikakwanisa kuzindikira mitolo yomwe tin’funika kunyamula na yomwe tin’funika kutaya. Mu nkhani ino, tacezerana bziratizo bza mitolo yomwe tin’funika kunyamula na yomwe tin’funika kutaya. Tsono pana bzinthu bzinango bzomwe tiribe kubzifotokoza. Jezu adalewa kuti lekani “kulemedwa na kudya kwene-kwene, kumwa kwene-kwene pabodzi na thupo la pa moyo.” (Luka 21:34) Cinembo cimweci na bzinango bzingatithandize kuzindikira bzinthu bzomwe tingafunike kucinja pa kuthamanga pa njira ya ku moyo.
17. Thangwe ranyi tingakhale na citsimikizo cakuti tin’dzathamanga mpaka kuphampha?
17 Tingakhale na citsimikizo cakuti tin’dzathamanga mpaka kuphampha thangwe Yahova an’dzatipasa mphanvu yakufunikira. (Zaiya 40:29-31) Tenepo, lekani kuneta! Tewezerani mpostolo Paulo omwe adacita ciri-centse kuti akatambire mabaibai. (Afilipi 3:13, 14) Palibe munthu omwe angakuthamangireni, koma na thandizo la Yahova imwepo mungathamange mpaka kuphampha. Yahova angakuthandizeni kunyamula mitolo yanu na kutaya mitolo yakusaya kufunika. (Salimo 68:19) Na thandizo la Yahova, imwepo mungathamange mwakupirira mucifika kuphampha!
NYIMBO 65 Tipitirize Kuyenda Patsogolo!
a Nkhani ino in’tithandiza kuthamanga pa njira ya ku moyo. Ninga anyakuthamanga, tina mitolo yomwe tin’funika kunyamula. Mitoloyo ni kubzipereka kwathu kwa Yahova, udindo bwathu m’banja na bzakusankhula bzathu. Tsono, tin’funika kutaya bzinthu bzakusaya kufunika bzomwe bzingatitazise kuthamanga. Kodi bzinthu bzimwebzi mpsiponi? Nkhani ino in’tawira mbvunzo umweyu.
b Mungagumane nkhani zomwe zingathandize mabanja pa jw.org pa mbali yakuti “Mfundo zothandiza mabanja.” Nkhani zinango zomwe ziripo pa mbaliyi kwa anyakulowolana ni izi: “Kodi Mungasonyezane Bwanji Ulemu?” na “Kodi Mungasonyeze Bwanji kuti Mumayamikira Zimene Mwamuna Kapena Mkazi Wanu Amachita?”; kwa abereki: “Phunzitsani Ana Anu Kugwiritsa Ntchito Foni Mosamala” na “Zimene Mungachite Kuti Muzimasukirana ndi Mwana Wanu”; ndipo kwa maswaka: “Kodi Mungatani Kuti Musamangotengera Zochita za Anzanu?” na “Kodi Mungatani Ngati Mumasowa Wocheza Naye?”
