NKHANI YAKUPFUNZA 48
NYIMBO 97 Fala la Mulungu Limbatipasa Moyo
Bzomwe Tingapfunze na Cakudabwisa ca Pau Comwe Jezu Adacita
“Inepano ndine pau ya moyo, ali-wentse omwe an’bwera kwa ine an’dzabva lini pomwe njala.” — JUWAU 6:35.
CAKULINGA CA NKHANIYI
Tin’pfunza nkhani ya mu kapitulo 6 ya bukhu la Juwau, yomwe imbalewa bza cakudabwisa comwe Jezu adacita pomwe adadyesa wanthu azinji na pau zixanu na ntsomba ziwiri.
1. Kodi fala lakuti pau mu Bibliya limbathandauza ciyani?
PAU cikhali cakudya comwe cikhadyedwa na wanthu azinji mu nthawe za m’Bibliya. (Genesesi 14:18; Luka 4:4) Ndipopa nthawe zinango Bibliya limbaphatisa basa fala lakuti “pau” pakufuna kuthandauza cakudya ciri-centse. (Mateu 6:11; Mabasa 20:7) Jezu adaphatisambo basa pau pa bzakudabwisa bziwiri bzomwe iye adacita. (Mateu 16:9, 10) Timbawerenga cibodzi mwa cakudabwisa cimweci pa Juwau kapitulo 6. Pomwe tikucezerana bza nkhaniyi, tiniwona bzomwe tin’pfunza na momwe tingabziphatisire basa ntsiku zino.
2. N’ciyani comwe cidacitika kuti thimu la wanthu lifunikire cakudya?
2 Pomwe apostolo wa Jezu adamala nthawe izinji akupalizira, iwo pabodzi na Jezuyo adapakira mwadiya aciyenda ku ng’ambu inango ya Nyanza ya Galileya kuti akapume. (Marko 6:7, 30-32; Luka 9:10) Ndipo iwo adayenda ku mbuto ya okha-okha pafupi na mzinda wa Betsaida. Tsono wanthu adadziwa kuti Jezu akhali kumweko, ndipopa mwakusaya kucedwa thimu la wanthu lidafika kuti limuwone. Tsono Jezu alibe kundowasiya tenepoyo, koma iye adayamba kuwapfunzisa bza Umambo na kupozambo atenda. Pakuti kukhadoka, anyakupfunza wa Jezu akhakumbukira komwe angadagumana cakudya comwe cingadakwana wanthu wentse wale. Wanthu winango akhadanyamula cakudya pang’ono, tsono azinji akhalibe, ndipopa akhafunikira kuyenda kukagula cakudyaco. (Mateu 14:15; Juwau 6:4, 5) Kodi n’ciyani comwe Jezu angadacita?
CAKUDABWISA COMWE JEZU ADACITA NA PAU
3. Kodi n’ciyani comwe Jezu adauza apostolo wace? (Onani cithunzi-thunzi lakuyamba.)
3 Jezu adauza apostolo wace kuti: “Iwo an’funika lini kuyenda; apaseni imwepo cakudyaco.” (Mateu 14:16) Tsono bzimwebzi bzikhawoneka ninga kuti mpsakukwanisika lini thangwe pakhana amuna wakukwana 5000. Ndipo tikafuna kuphatanidza akazi na wana omwe akhalipo pamwepo, pinango wanthu wentse akhakwana 15 000. (Mateu 14:21) Andereya adalewa kuti: “Pano, pana mulumbwana omwe ana pau zixanu zakukonzedwa na mpunga na tuntsomba tuwiri. Tsono kodi bzimwebzi bzingakwane thimu lentse la wanthuli?” (Juwau 6:9) Pau zakukonzedwa na mpunga cikhali cakudya comwe cikhadyedwa na wanthu azinji. Tuntsomba tung’ono-tung’onoto tukhali twakuuma ndipo tukhana munyu. Tsono pau na ntsomba zomwe mulumbwana ule akhanazo zingadakwana lini kudyesa thimu lentse lire!
Pomwe Jezu adamala kupfunzisa wanthu bza Yahova, iye adawapasa cakudya kuti adye (Onani ndime 3)
4. Kodi tikupfunza ciyani pa Juwau 6:11-13? (Onani bzithunzi-thunzi.)
4 Pakufuna kulatiza khalidwe la kutambira bwino alendo, Jezu adauza wanthuwo kuti akhale pantsi tumathimu pa mauswa yakupswipirira. (Marko 6:39, 40; werengani Juwau 6:11-13.) Ifepano timbawerenga kuti Jezu adatenda Pai wace thangwe ra pau na ntsomba zire. Bzikhali bzakufunika kutenda Mulungu thangwe rakuti iye ndiye omwe ambapereka cakudya. Ifepano tingatewezere Jezu mwa kumbapemba pomwe tikanati kudya napo pomwe tiri tekha ku basa, ku xikola ayai ku mbuto iri-yentse. Jezu adauza anyakupfunza wace kuti agawanise cakudyaco wanthuwo ndipo iwo adadya acikhuta. Pakuti cakudyaco cikhali cizinji, wanthuwo alibe kukwanisa kucimaliza. Tsono Jezu akhafuna lini kuti cakudyaco citaidwe, ndipopa iye adauza anyakupfunza wace kuti akonkhobze cakudya comwe cikhadasalaco kuti adzaciphatise pomwe basa nthawe inango. Jezu adaphatisa basa bzinthu bzomwe akhanabzo mwa nzeru ndipo ifepanombo tin’funika kucita bzibodzi-bodzibzi. Penu imwepo ndimwe pai ayai mai mungaphatise basa nkhani imweyi kuti mupfunzise wana wanu kufunika kwa kumbapemba pomwe akanati kudya, kutambira bwino alendo na kukhalambo wakupasa ninga momwe Jezu adacitira.
Bzibvunzeni kuti: ‘Kodi inepano nimbatewezera Jezu mwa kumbapemba pomwe ndikanati kudya?’ (Onani ndime 4)
5. N’ciyani comwe wanthu adacita pomwe adawona cakudabwisa ca Jezu, ndipo n’ciyani comwe Jezuyo adacita?
5 Wanthu adadabwa na momwe Jezu akhapfunzisira na momwe akhacitira bzakudabwisa. Iwo akhadziwa kuti Mozeji akhadalewa kale kuti Mulungu angadadzatumiza mpolofeta mkulu. (Deuteronomiyo 18:15-18) Tenepo, pinango-pentse iwo adayamba kukumbuka kuti Jezuyo ndiye akhali mpolofeta mkulu omwe angadadzatumizidwayo ndipo adakumbukambo kuti iye angadakwanisa kupereka cakudya kwa wanthu wentse mu Jirayeri. Thangwe ra bzimwebzi, wanthuwo akhafuna ‘kumuphata kuti amuikhe kukhala mambo.’ (Juwau 6:14, 15) Jezu angadabvuma kuti bzimwebzi bzicitike, iye angadakhala akucitambo mbali ya Adjuda omwe akhatongedwa na boma la Roma. Tenepo iye alibe kucita bzimwebzo. N’ciyani comwe iye adacita? Bibliya limbalewa kuti iye adawathawa aciyenda ‘kuphiri.’ Napo kuti wanthu adamungingimiza kuti acite mbali ya ndale, iye alibe kubvuma bzimwebzo. Limweri ni pfunziro lakufunika kwene-kwene kwa ifepano!
6. Kodi tingatewezere tani Jezu? (Onani cithunzi-thunzi.)
6 Wanthu angatikumbire lini kuti tiwapase cakudya mwakudabwisa, tiwapoze matenda yawo ayai kutiikha kuti tikhale mambo wawo. Tsono iwo angaticitise kupitira nkhani za ndale mwa kutikumbira kuti tivote ayai kuti tithandizire munthu omwe iwo akumuwona kuti angadzakhale mtongi wabwino ayai kuti angadzacinje bzinthu. Pa nkhani ninga zimwezi, ifepano tin’funika kutewezera Jezu. Iye adalamba kucita mbali ya ndale, ndipopa patsogolo pace adadzalewa kuti: “Umambo bwangu bumbacita lini mbali ya dzikoli.” (Juwau 17:14; 18:36) Ifepano tin’funika kukumbuka ninga momwe iye akhakumbukirira na kutewezera bzomwe iye adacita. Ndipo ninga iye, ifepano timbathandizira Umambo bwa Mulungu mwa kuuzambo winango bza Umambobo na kupemphererambo kuti bzimwebzi bzicitike. (Mateu 6:10) Tingapfunzembo bzinthu bzizinji na cakudabwisa ca pau comwe Jezu adacita.
Jezu alibe kucita mbali ya ndale. Ifepano tin’funikambo lini kucita mbali ya ndale (Onani ndime 6)
“THANDAUZO LA PAUZO”
7. N’ciyani comwe Jezu na apostolo wace adacita? (Juwau 6:16-20)
7 Pomwe Jezu adamala kudyesa thimu la wanthu, iye adauza apostolo wace kuti apakire mwadiya aciyenda ku Kafarnau ndipo iye adayenda ku phiri thangwe thimu la wanthulo likhafuna kumuikha kuti akhale mambo. (Werengani Juwau 6:16-20.) Pomwe apostolowo akhali m’mwadiyamo, madzi yadayamba kucita mabimbi thangwe ra conzi ca mphanvu. Tenepo Jezu adayenda kwa apostolo wacewo acimbafamba padzaulu pa madzi. Ndipo iye adauza Pedru kuti afambembo padzaulu pa madzi. (Mateu 14:22-31) Tsono pomwe Jezu adapakira m’mwadiyamo, conzico cidalekeza. Na bzimwebzi, anyakupfunzawo adadabwa kwene-kwene ndipo adalewa kuti: “Imwepo ndimwedi Mwana wa Mulungu.” a (Mateu 14:33) Anyakupfunza wa Jezu adalewa mafala yamweya pa nthawe yomwe iye adafamba padzaulu pa madzi sikuti pa nthawe yomwe adacita cakudabwisa ca pau. Onani bzomwe Marko adanemba pakulewa bza nkhani ibodzi-bodziyi. Iye adanemba kuti: “[Apostolowo] adadabwa kwene-kwene, ndipo pakuti iwo akhalibe kubvesesa thandauzo la pauzo, mitima yawo idapitiriza kusaya kubvesesa.” (Marko 6:50-52) Anyakupfunzawo akhabvesesa lini kuti Yahova akhadapasa Jezu mphanvu zakucita bzakudabwisa bzizinji sikuti cakudabwisa ca pau basi. Patsogolo pace, Jezu adalewa pomwe bza cakudabwisa ca pau comwe iye adacita na bzomwe tingapfunze.
8-9. Thangwe ranyi thimu la wanthu lidatewera Jezu? (Juwau 6:26, 27)
8 Wanthu omwe adadyesedwa na Jezu wale akhandofuna bzinthu bzakuthupi bzokha. Thangwe ranyi tikulewa tenepo? Thangwe mangwana yace iwo adafika pa mbuto yomwe adadyesedwa na Jezu pale, tsono iwo alibe kugumana Jezu na anyakupfunza wace. Tenepo iwo adapakira mimwadiya yomwe ikhadafika kucokera ku Tiberiya aciyenda ku Kafarnau kuti akanyang’ane Jezu. (Juwau 6:22-24) Kodi iwo adacita bzimwebzi thangwe rakuti akhafuna kudziwa bzizinji pakulewa bza Umambo? Ne. Iwo akhandofuna kuti Jezu awapase pomwe pau. Kodi tikudziwa tani bzimwebzi?
9 Onani bzomwe bzidacitika pomwe wanthuwo adagumana na Jezu pafupi na ku Kafarnau. Jezu adawauza kuti iwo akhamunyang’ana thangwe rakuti akhafuna cakudya. Iye adazindikira bzimwebzi ‘thangwe rakuti wanthuwo akhadadya pau acikhuta.’ Tsono cimweci cikhali “cakudya comwe cimbamala.” Ndipopa iye adawalimbikisa kuti aphatire “basa cakudya comwe cimbamala lini comwe cimbatsogolera ku moyo wakusaya kumala.” (Werengani Juwau 6:26, 27.) Ndipo iye adawauzambo kuti Pai wace angadawapasa cakudya cimweci. Pomwe wanthuwo adabva kuti pakhana cakudya comwe cingadawapasa moyo wakusaya kumala, pinango iwo adadabwa kwene-kwene! Kodi ni cakudya ciponi cimweci, ndipo iwo angadacita tani kuti acigumane?
10. Kodi n’ciyani comwe wanthuwo akhafunika kucita kuti adzatambire moyo wakusaya kumala?
10 Bzikuwoneka kuti Adjudawo akhakumbuka kuti akhafunika kucita bzinthu bzinango ayai mabasa manango kuti athemere kupasidwa cakudyaco. Pinango iwo akhakumbuka kuti akhafunika kucita “mabasa” yomwe yambalewedwa mu Lamulo la Mozeji. Tsono Jezu adawauza kuti: “Iri ndiro basa la Mulungu lomwe mun’funika kucita, khulupirani ule omwe iye adamutuma.” (Juwau 6:28, 29) Iwo akhafunika kukhulupira Jezu kuti “adzakhale na moyo wakusaya kumala.” Jezuyo akhadawafotokozera kale bzimwebzi. (Juwau 3:16-18, 36) Ndipo na kupita kwa nthawe, Jezuyo adadzalewa pomwe bzomwe tin’funika kucita kuti tidzakhale na moyo wakusaya kumala. — Juwau 17:3.
11. Kodi Adjuda adalatiza tani kuti akhandofuna cakudya basi? (Salimo 78:24, 25)
11 Adjudawo akhakhulupira lini nfundo yakuti iwo akhafunika kukhulupira Jezu. Iwo adamukumbira kuti acite pomwe cakudabwisa cinango mwa kumuuza kuti: “Kodi ni bzizindikiro bziponi bzomwe mun’dzacita kuti ife tiwone ticikukhulupirani?” (Juwau 6:30) Iwo adalewa kuti mu nthawe ya Mozeji, makolo yawo yakhatambira mana mwakudabwisa, comwe cikhali cakudya cawo ca ntsiku na ntsiku. (Nehemiya 9:15; werengani Salimo 78:24, 25.) Bzikuwonekeratu kuti iwo akhandokumbukira bza cakudya cakuthupi cokha. Ndipopa pomwe Jezu adawauza bza “pau caiyo yakucokera kudzulu” yomwe ingadawapasa moyo wakusaya kumala, iwo alibe na kubvunzako kuti iye akhathandauza ciyani na mafala yamweya. (Juwau 6:32) Makumbukidwe yawo yakhali pa bzinthu bzakuthupi. Ndipopa iwo alibe kubvesesa pomwe Jezu akhayezera kuwapfunzisa momwe angagumanire moyo wakusaya kumala. Kodi tingapfunzembo ciyani na nkhaniyi?
CINTHU CAKUFUNIKA KWENE-KWENE KWA IFEPANO
12. Kodi Jezu adalatiza kuti cinthu cakufunika kwene-kwene n’ciponi?
12 Ifepano tikupfunza cinthu cakufunika kwene-kwene pa Juwau kapitulo 6. Cinthu cakufunika kwene-kwene kwa ifepano ni kubvera Yahova na kukhala pa uxamwali na iye. Pomwe Jezu adayezedwa na Sathani, iye adalatiza kuti kubvera Yahova cikhali cinthu cakufunika kwene-kwene kwa iye kuposa cakudya cakuthupi. (Mateu 4:3, 4) Ndipo pa Nkhani yace ya pa Phiri, iye adafotokoza kufunika kwa kukhala pa uxamwali na Mulungu. (Mateu 5:3) Ndipopa mpsakufunika kubzibvunza kuti: ‘Kodi bzomwe nimbacita pa moyo wangu bzimbalatiza kuti uxamwali bwangu na Yahova ni cinthu cakufunika kuposa bzinthu bzakuthupi?’
13. (a) Thangwe ranyi n’kuphonyeka lini kufuna cakudya? (b) Kodi Paulo adaticenjeza kuti tin’funika kukhala tceru na ciyani? (1 Akolinto 10:6, 7, 11)
13 N’kuphonyeka lini kupemba ticikumbira bzomwe tikufunikira pa moyo wathu. (Luka 11:3) Ndipo Bibliya limbalewa kuti ni cinthu cabwino kuti munthu ‘adye, amwe’ na kukondwa pa basa lace lomwe aphata na nyongo thangwe “bzimwebzi bzimbacokerambo m’manja mwa Mulungu wacadidi.” (Mpalizi 2:24; 8:15; Tiyago 1:17) Tsono tin’funika kucita mphole kuti bzinthu bzakuthupi bzileke kukhala bzakufunika kwene-kwene pa moyo wathu. Tingapfunze bzizinji na bzomwe Paulo adanembera Akristau omwe adakhala na moyo pomwe Jeruzalemu akhadasala pang’ono kupfudzidwa. Iye adalewa bzinthu bzakuipa bzomwe Ajirayeri adacita pomwe akhali m’dambo kuphatanidzambo bzomwe adacita pomwe akhali pa Phiri la Sinai. Iye adacenjeza Akristauwo kuti aleke “kumbakhumba bzinthu bzakuipa ninga momwe [Ajirayeri] adacitira.” (Werengani 1 Akolinto 10:6, 7, 11.) Yahova adapasa Ajirayeri cakudya mwakudabwisa, tsono thangwe ra kufunisisa kudya, cakudyaco cidakhala ‘cinthu cakuipa’ kwa iwo. (Numero 11:4-6, 31-34) Ndipo pomwe adanamata kamphulu ka oro, Ajirayeri adalatiza kuti cinthu cakufunika kwene-kwene kwa iwo cikhali kumwa, kudya na kusenzeka kuposa kubvera Yahova. (Ekisodo 32:4-6) Paulo adalewa bzimwebzi kuti acenjeze Akristau omwe adakhala na moyo pa nthawe yomwe Jeruzalemu akhanati kupfudzidwa mu gole la 70 pomwe Kristu akhadabwera kale. Tenepo, ifepano tikukhalambo mu nthawe yomwe dzikoli lasala pang’ono kuti lipfudzidwe, ndipopa mpsakufunika kuti tiphatise basa mcenjezo wa Pauloyu.
14. N’ciyani comwe Bibliya limbalewa pakulewa bza cakudya mu dziko lipsa?
14 Pomwe Jezu adatipfunzisa kuti timbapembe kwa Mulungu kuti atipase “cakudya cathu ca ntsiku ya lero,” iye adatipfunzisambo kuti timbapembe kuti kufuna kwa Mulungu kucitike “pantsi pano, ninga kudzulu.” (Mateu 6:9-11) Kodi bzinthu bzin’dzakhala tani kutsogoloku? Bibliya limbalatiza kuti Mulungu ambafuna kuti pa dzikoli pakhale na cakudya cizinji. Pa Zaiya 25:6-8 pambalewa kuti pa dzikoli pan’dzakhala na cakudya cizinji cakupasa thanzi. Pa Salimo 72:16 pambalewa kuti: “Pa dziko lentse la pantsi pan’dzakhala na cakudya cizinji; padzulu pa mapiri pan’dzakhala na cakudya cizinji kwene-kwene.” Kodi imwepo mukudikhirira na mtima wentse kudzaphika cakudya comwe mumbacifuna ayai cakudya comwe mukanati kuciphika kale? Imwepo mun’dzalima minda ya uva mucidzadya bzisapo bzace. (Zaiya 65:21, 22) Ndipo wanthu wentse pa dziko la pantsi an’dzadya acikhuta.
15. Kodi wanthu omwe an’dzalamusidwa an’dzapfunza ciyani? (Juwau 6:35)
15 Werengani Juwau 6:35. Kodi n’ciyani comwe cin’dzacitikira wale omwe adadya pau na ntsomba zomwe Jezu adawapasa? Napo kuti azinji wa iwo alibe kukhulupira Jezu, winango wa iwo angadzalamusidwe pa nthawe ya kulamusidwa kwa anyakufa ndipo imwepo mungadzawonane nawo. (Juwau 5:28, 29) Wanthu amwewa an’dzapfunza thandauzo la mafala ya Jezu yakuti: “Inepano ndine pau ya moyo, ali-wentse omwe an’bwera kwa ine an’dzabva lini pomwe njala.” Iwo an’dzafunika kukhulupira kuti Jezu adapereka moyo wace thangwe ra iwo. Pa nthawe imweyo, anyakulamusidwawo pabodzi na wana omwe an’dzabadwa mu dziko lipsa an’dzapfunza bza Yahova na cakulinga cace. Tin’dzakomedwa kwene-kwene kuwathandiza na kuwapfunzisa bzinthu bzimwebzi! Kuthandiza wanthu kuti akhale pa uxamwali na Yahova cin’dzakhala cinthu cakukondwesa kwene-kwene kuposa kudya pau caiyo.
16. Kodi tin’dzacezerana ciyani mu nkhani yomwe ikubwerayi?
16 Mu nkhani ino, tacezerana pang’ono nkhani ya pa Juwau kapitulo 6, tsono Jezu akhana bzizinji bzakufuna kupfunzisa Adjuda pakulewa bza “moyo wakusaya kumala.” Adjudawo akhafunika kukhala tceru kuti abvesese bzomwe Jezu akhafuna kulewa ndipo ndibzo bzomwe ifepano tin’funikambo kucita. Mu nkhani yomwe ikubwerayi, tin’dzapitiriza kucezerana Juwau kapitulo 6.
NYIMBO 20 Mudapereka Mwana Wanu Wakubadwa Yekha
a Kuti mudziwe bzizinji bza nkhaniyi, onani bukhu lakuti Jezu ni Njira, Cadidi na Moyo, tsa. 131 na bukhu lakuti Tsanzirani Chikhulupiriro Chawo, tsa. 185.
