NKHANI YAKUPFUNZA 49
NYIMBO 147 Tinkudikhirira Moyo Wakusaya Kumala Kutsogolo
N’ciyani Comwe Mungacite Kuti Mudzatambire Moyo Wakusaya Kumala?
“Ali-wentse omwe an’zindikira mwana acimukhulupira, [an’dzatambira] moyo wakusaya kumala.” — JUWAU 6:40.
CAKULINGA CA NKHANIYI
Kubvesesa phindu lomwe anyakudzozedwa na Akristau wa mabira manango angakhale nalo thangwe ra ntsembe ya Jezu Kristu.
1. Kodi wanthu azinji ambakumbuka ciyani?
WANTHU azinji ambayezera kudya cakudya cabwino na kucita masenzeka yakulimbisa thupi nthawe zentse kuti akhale na thanzi labwino na kukhala na moyo magole mazinji. Napo bziri tenepo, iwo ambadziwa kuti angakhale lini na moyo kuyenda na kuyenda. Bzikuwoneka kuti iwo ambakumbuka kuti mpsakukwanisika lini kuti munthu akhale na moyo wakusaya kumala. Tsono pa Juwau 3:16 na 5:24, Jezu adalewa kuti wanthu angakhale na “moyo wakusaya kumala.”
2. Mwakubverana na Juwau 6:39, 40, n’ciyani comwe Jezu adauza thimu la wanthu?
2 Ntsiku inango, Jezu adacita cakudabwisa. Iye adadyesa thimu la wanthu mwakuphatisa basa pau na ntsomba. a Pomwe wanthuwo adawona bzimwebzi adadabwa, tsono bzomwe iye adadzalewa mangwana yace bzidadabwisiratu kwene-kwene wanthuwo. Wanthuwo adatewera Jezu mpaka ku Kafarnau pafupi na Nyanza ya Galileya ndipo kumweko iye adawauza kuti kutsogoloku anyakufa an’dzalamusidwa acikhala na moyo wakusaya kumala. (Werengani Juwau 6:39, 40.) Kodi bzimwebzi bzikuthandauza kuti adzinza wanu na axamwali wanu omwe adasaika angadzalamusidwe? Inde. Bzomwe Jezu adalewabzi bzimbatitsimikizira kuti wanthu omwe adafa angadzalamusidwe nakuti imwepo na adzinza wanu mungadzakhale na moyo wakusaya kumala! Tsono wanthuwo alibe kukwanisa kubvesesa bzomwe Jezu adadzalewa m’mavesi yakutsogolo ndipo mpsakunesambo kwa wanthu azinji ntsiku zino kuti abzibvesese. Kodi iye adalewa ciyani?
3. Kodi Jezu adalewa ciyani pa Juwau 6:51?
3 Pomwe Jezu adamala kudyesa wanthuwo, iwo adakumbukira bza mana yomwe Yahova adapasa Ajirayeri pomwe akhali mu dambo. Bibliya limbacemera mana kuti “pau yakucokera kudzulu.” (Salimo 105:40; Juwau 6:31) Jezu adaphatisa basa mana yomwe wanthu akhayadziwa bwino kuti awapfunzise cinthu cakufunika. Napo kuti mana cikhali cakudya comwe Yahova adacikonza mwakudabwisa kuti apase Ajirayeri, wanthu omwe adadya manayo na kupita kwa nthawe adafa. (Juwau 6:49) Tsono Jezu adabzilewa yekha kuti iye akhali “pau caiyo yakucokera kudzulu,” “pau ya Mulungu” na “pau ya moyo.” (Juwau 6:32, 33, 35) Jezu adalewa kusiyana komwe kulipo pakati pa mana na iye. Iye adati: “Inepano ndine pau ya moyo yomwe idacokera kudzulu ndipo ali-wentse omwe an’dya pau imweyi, an’dzakhala na moyo mpaka kale-kale.” (Werengani Juwau 6:51.) Pomwe Adjudawo adabva bzimwebzi, iwo adazunguzika. Iwo alibe kubvesesa kuti thangwe ranyi Jezu adabzilewa yekha kuti akhali “pau” yomwe ikhadacokera kudzulu nakuti pau imweyo ikhali yabwino kwene-kwene kuposa mana yomwe Yahova adapasa makolo yawo yakale. Kuti awathandize kubvesesa, Jezuyo adalewa kuti: “Pau yomwe nin’dzapereka ni thupi langu.” Kodi iye akhafuna kulewa ciyani na bzimwebzi? Mpsakufunika kwa ifepano kubvesesa bzomwe iye akhathandauza thangwe mtawiro wace umbatithandiza kudziwa bzomwe bzin’dzacitisa kuti adzinza wathu na ifepano tidzatambire moyo wakusaya kumala. Bwerani tibvesese mafala ya Jezuya.
THANDAUZO LA MAFALA YAKUTI “PAU YA MOYO” NA “THUPI LANGU”
4. Thangwe ranyi wanthu winango adaipidwa na mafala yomwe Jezu adalewa?
4 Wanthu winango omwe akhatetekera Jezu adaipidwa pomwe iye adalewa kuti: “Pau yomwe nin’dzapereka ni thupi langu, kuti wanthu wa pa dziko akhale na moyo.” Pinango iwo akhakumbuka kuti iye akhathandauza kuti iwo akhafunika kudya nyama caiyo ya thupi lace. (Juwau 6:52) Tsono patsogolo pace Jezu adadzalewa mafala yomwe yadadzawaipira kwene-kwene kuposa yakuyamba yale. Iye adati: “Mukasaya kudya thupi la Mwana wa munthu na kumwa mulopa wace, imwepo mun’dzakhala lini na moyo.” — Juwau 6:53.
5. Thangwe ranyi tikutsimikizira kuti Jezu akhalewa lini bzakuti wanthuwo akhafunika kumwa mulopa wace caiwo?
5 Mu nthawe ya Nowa, Yahova adaletsa wanthu kudya mulopa. (Genesesi 9:3, 4) Pomwe padapita nthawe, iye adaletsambo Ajirayeri kudya mulopa. Munthu ali-wentse omwe angadadya mulopa ‘angadaphedwa.’ (Levitiko 7:27) Jezu akhateweza lamulo limweri. (Mateu 5:17-19) Tenepo, iye angadakumbira lini Adjudawo kuti adye thupi lace cairo ayai kuti amwe mulopa wace caiwo. Koma pomwe Jezu adalewa mafala yamweya, iye akhafuna kuwapfunzisa wanthuwo bzomwe akhafunika kucita kuti adzatambire “moyo wakusaya kumala.” — Juwau 6:54.
6. Kodi timbadziwa tani kuti Jezu akhalewa mwa kuyezezera pa Juwau 6:53?
6 Kodi Jezu akhathandauza ciyani? Jezu akhalewa mwakuyezezera ninga momwe adauzira mkazi Msamariya kuti: “Ule omwe animwa madzi yomwe inepano nin’dzamupasa, an’dzabva lini pomwe nyota na pang’onopo, thangwe madzi yomwe nin’dzam’pasayo, yan’dzakhala ninga kamkulo ka madzi yakuyerera, yomwe yan’dzamupasa moyo wakusaya kumala.” (Juwau 4:7, 14) b Jezu akhalewa lini kuti mkazi Msamariyayo akhandofunika kumwa madzi caiyo yomwe angadapasidwa na iye yacimucitisa kukhala na moyo wakusaya kumala. Mwakundendemerana na bzimwebzi, Jezu akhafuna lini kulewa kuti wanthu wa ku Kafarnau angadakhala na moyo wakusaya kumala angadandodya thupi cairo la Jezu na kumwa mulopa wace caiwo.
NTHAWE INANGO YOMWE JEZU ADAPHATISA BASA KALEWEDWE KABODZI-BODZI
7. Kodi wanthu winango ambakumbuka kuti Jezu akhafuna kulewanyi na mafala ya pa Juwau 6:53?
7 Wanthu winango ambalewa kuti pomwe Jezu adalewa bza kudya thupi lace na kumwa mulopa wace pa Juwau 6:53, iye akhafotokoza bzomwe wanthu akhafunika kumbacita pa Cilaliro ca Mbuya thangwe iye adaphatisa basa mafala mabodzi-bodziya pa Mateu 26:26-28. Iwo ambalewa kuti munthu ali-wentse omwe an’gumanika pa Cilaliro ca Mbuya an’funika kudya pau na kumwa vinyu. Kodi bzin’funikadi kukhala tenepo? Mpsakufunika kudziwa mtawiro wa mbvunzo umweyu thangwe gole liri-lentse wanthu azinji ambagumanika pa msinda umweyu. Bwerani tiwone kusiyana komwe kulipo pakati pa mafala yomwe Jezu adalewa pa Juwau 6:53 na mafala yomwe iye adalewa pa Cilaliro ca Mbuya.
8. Kodi n’kusiyana kuponi komwe kulipo pakati pa mafala yomwe Jezu adayalewa ku Galileya na yomwe adalewa pa Cilaliro ca Mbuya? (Onani bzithunzi-thunzi.)
8 Bwerani ticezerane nfundo ziwiri zomwe zikulatiza kuti Jezu akhalewa bzinthu bzakusiyana. Yakuyamba, n’kuponi ndipo ni lini pomwe Jezu adafotokoza mafala yomwe yali pa Juwau 6:53-56? Iye adalewa mafala yamweya ku Galileya mu gole la 32 pomwe Kristu akhadabwera kale. Bzimwebzi bzidacitika pomwe likhadasala gole libodzi kuti acite msinda wa Cilaliro ca Mbuya. Yaciwiri, kodi iye akhauza yani mafala yamweya? Iye akhauza mafala yamweya thimu la Adjuda omwe akhandofuna cakudya cakuthupi ndipo akhalibe basa na kupfunza bza Yahova ayai bza Umambo bwace. (Juwau 6:26) Pomwe Jezu adalewa bzinthu bzinango bzomwe iwo alibe kubzibvesesa adasiyiratu kumukhulupira. Ndipo anyakupfunza wace winango adasiyambo kumukhulupira. (Juwau 6:14, 36, 42, 60, 64, 66) Wanthu amwewa akhali wakusiyana na apostolo 11 wa Jezu omwe akhanaye pabodzi pomwe adacita Cilaliro ca Mbuya mu gole la 33 pomwe Kristu akhadabwera kale. Pa nthawe imweyo, apostolo wace 11 akhanaye pabodzi napo kuti akhabvesesa lini bzinthu bzinango bzomwe iye akhapfunzisa. Koma iwo akhatsimikizira kuti Jezu akhali Mwana wa Mulungu omwe adabwera kucokera kudzulu. (Mateu 16:16) Jezu adatenda apostolo wacewo mwa kuwauza kuti: “Imwepo mulibe kundisiya napo pomwe ndikhagumana na mabvuto.” (Luka 22:28) Kusiyana kumweku kukulatiza kuti pa Juwau 6:53 Jezu akhafotokoza lini bzomwe bzingadadzacitika pa Cilaliro ca Mbuya. Tsono pana kusiyana pomwe kunango.
Juwau kapitulo 6 ambafotokoza bzomwe Jezu adalewa kuna thimu la Adjuda ku Galileya (kumadzere). Pomwe padapita gole libodzi, iye adalewalewa kuna apostolo wace ku Jeruzalemu (kumadidi) (Onani ndime 8)
KODI MAFALA YA JEZU YAKUTHANDAUZA CIYANI KWA IMWEPO?
9. Kodi Jezu akhauza yani mafala yomwe adayalewa pa Cilaliro ca Mbuya?
9 Pa Cilaliro ca Mbuya, Jezu adapasa apostolo wace pau yakusaya cakufufumisa ndipo adawauza kuti pauyo ikhaimira thupi lace. Patsogolo pace, iye adawapasa vinyu ndipo adalewa kuti vinyuyo ikhaimira “mulopa [wace] wa mpangano.” (Marko 14:22-25; Luka 22:20; 1 Akolinto 11:24) Bzomwe iye adalewa pakulewa bza mpangano umweyu mpsakufunika kwene-kwene. Iye adacemera mpangano umweyu kuti mpangano upsa. Umweyu ni mpangano omwe Yahova adaucita na “dzinza la Ajirayeri” ayai kuti wale omwe an’katonga pabodzi na Jezu “mu Umambo bwa Mulungu,” sikuti na wanthu wentse. (Ahebereu 8:6, 10; 9:15) Pa nthawe imweyire, apostolowo alibe kubvesesa bzentse pakulewa bza mpangano umweyu. Tsono iwo angadadzozedwa na mzimu wakucena ndipo angadacita mbali ya mpangano upsayo mwakuyenda kudzulu kuti akatonge pabodzi na Jezu. — Juwau 14:2, 3.
10. Kodi n’kusiyana kuponi kunango komwe kulipo pakati pa bzomwe Jezu adalewa ku Galileya na bzomwe adalewa pa Cilaliro ca Mbuya? (Onani cithunzi-thunzi.)
10 Bzomwe Jezu adalewa pa Cilaliro ca Mbuya adabzilewa kwa “kathimu ka mabira.” Apostolo wace wakukhulupirika omwe akhanaye pa ntsiku imweyire ndiwo omwe adayamba kucita mbali ya thimu limwelire. (Luka 12:32) Wanthu omwe angadadzacitambo mbali ya thimu limweri angadadzadyambo pau na kumwa vinyu pakucita Cilaliro ca Mbuya. Iwo ndiwo omwe an’dzakatonga pabodzi na Jezu kudzulu. Kumweku ni kusiyana kunango komwe kulipo pakati pa bzomwe Jezu adalewa pa Cilaliro ca Mbuya na bzomwe adauza thimu la wanthu ku Galileya. Mafala yomwe Jezu adayalewa pa Cilaliro ca Mbuya yakulewa bza wanthu ang’ono-ng’ono. Tsono mafala yomwe adayalewa ku Kafarnau yakuyenda kwa wanthu azinji.
Omwe ambadya pau na kumwa vinyu ambacita mbali ya kathimu kang’ono. Koma munthu “ali-wentse” angakhulupire Jezu acidzatambira moyo wakusaya kumala (Onani ndime 10)
11. Kodi n’ciyani comwe Jezu adalewa ku Galileya comwe cikulatiza kuti akhalewa lini kwa wanthu ang’ono-ng’ono?
11 Pomwe Jezu akhali ku Galileya mu gole la 32, wanthu azinji omwe akhalewalewa nawo wale akhandofuna cakudya. Tsono iye adawathandiza kubvesesa kuti pakhana cinthu cakufunika kwene-kwene kuposa cakudya, cinthu comwe cingadawapasa moyo wakusaya kumala. Ndipo Jezu adalewa kuti wale omwe akhadafa angadadzalamusidwa acidzakhala na moyo wakusaya kumala. Mwakusiyana na bzomwe adalewa pa Cilaliro ca Mbuya ku Galileya, Jezu akhalewa lini bza bzisimbo bzomwe wanthu ang’ono-ng’ono okha ndiwo omwe angadatambira. Iye akhalewa bza bzisimbo bzomwe wanthu wentse angadakwanisa kutambira. Jezuyo adati: “Ali-wentse omwe an’dya pau imweyi, an’dzakhala na moyo mpaka kale-kale, . . . pau yomwe nin’dzapereka ni thupi langu, kuti wanthu wa pa dziko akhale na moyo.” — Juwau 6:51. c
12. Kodi n’ciyani comwe wanthu an’funika kucita kuti adzatambire moyo wakusaya kumala?
12 Kodi Jezu akhafuna kulewa kuti wanthu wentse an’dzatambira moyo wakusaya kumala? Ne. Wanthu omwe an’dzatambira moyo wakusaya kumala mbale omwe ‘anidya thupi’ la Jezu ayai kuti omwe an’khulupira Jezu. Wanthu azinji omwe ambabziti ni Akristau ambakumbuka kuti an’dzapulumuka ‘akandokhulupira Jezu’ na kubvuma kuti iye ni mpulumusi wawo. (Juwau 6:29) Tsono bzimwebzi mpsakukwanira lini. Pakhana wanthu winango omwe pakuyamba akhamukhulupira Jezu, tsono mu nthawe yakucepa iwo adasiya kumukhulupirako. N’thangwe ranyi?
13. N’ciyani comwe wanthu an’funika kucita kuti akhaledi anyakupfunza wa Jezu?
13 Wanthu azinji akhatewera Jezu thangwe rakuti iye akhawapasa bzomwe iwo akhafuna. Wanthuwo akhandofuna kuti Jezu awapoze, awapase cakudya na kuwauza bzinthu bzomwe bzikhawadekera. Tsono Jezu adawalatiza kuti akhafunika kucita bzinthu bzinango kuti akhaledi anyakupfunza wace. Iye adalatiza kuti alibe kundobwera pa dziko la pantsi kuti adzandopase wanthu bzinthu bza ku thupi. Wanthuwo akhafunika kubvuma ‘mcemo’ wace mwa kuteweza bzentse bzomwe iye akhapfunzisa. — Juwau 5:40; 6:44.
14. N’ciyani comwe tin’funika kucita kuti tidzatambire moyo wakusaya kumala?
14 Jezu adapfunzisa kuti kupereka thupi lace na mulopa wace ninga ntsembe kungadacitisa kuti wanthu adzatambire moyo wakusaya kumala. Tsono kuti wanthuwo adzatambire moyo wakusaya kumala, iwo akhafunika kukhulupira bzimwebzi. Bzimwebzi bzikhali bzakufunika kwa Adjuda ndipo mpsakufunikambo kwa ifepano ntsiku zino. (Juwau 6:40) Tenepo bzomwe Jezu adalewa pa Juwau 6:53 bzimbalatiza kuti ifepano tin’funika kukhulupira ntsembe ya cakulombolera kuti tidzakhale na moyo wakusaya kumala. Bzimwebzi mpsakukwanisika kwa wanthu azinji. — Aefezo 1:7.
15-16. Kodi ni bzinthu bziponi bzakufunika bzomwe tapfunza mu kapitulo 6 ya Juwau?
15 Bzomwe Bibliya limbalewa pa Juwau kapitulo 6 mpsakufunika kwene-kwene kwa tentsenefe. Kapitulo imweyi imbalatiza kuti Jezu ambafuna kwene-kwene wanthu. Pomwe iye akhali ku Galileya, adapoza atenda, adapfunzisa wanthu bza Umambo bwa Mulungu ndipo adawapasa cakudya. (Luka 9:11; Juwau 6:2, 11, 12) Ndipo cakufunika kwene-kwene n’cakuti adapfunzisa wanthuwo kuti iye ni “pau ya moyo.” — Juwau 6:35, 48.
16 Akristau omwe ana cidikhiro ca kudzakhala na moyo pa dziko la pantsi ambadya lini pau na kumwa vinyu pa Cilaliro ca Mbuya. (Juwau 10:16) Napo bziri tenepo, iwo ambadya pau ya moyo mwakuyezezera. Kodi iwo ambacita tani bzimwebzi? Iwo ambacita bzimwebzi mwakukhulupira ntsembe ya cakulombolera ya Jezu Kristu na bzinthu bzabwino bzomwe bzin’dzakwanisika thangwe ra ntsembeyo. (Juwau 6:53) Tsono wale omwe ambadya pau na kumwa vinyu ambalatiza kuti akucita mbali ya mpangano upsa ndipo an’dzakatonga pabodzi na Jezu Kristu. Tenepo bziribe basa penu ndife anyakudzozedwa ayai wa mabira manango, mafala ya pa Juwau kapitulo 6 njakufunika kwa ifepano. Mafalaya yambatipfunzisa kuti tin’funika kukhulupira ntsembe ya cakulombolera kuti tidzatambire moyo wakusaya kumala.
NYIMBO 150 Lingani Yahova Kuti Mudzapulumuke
a Cinembo ca Juwau 6:5-35 cidafotokozedwa mu nkhani idapita ire.
b Madzi yomwe Jezu adalewa yambathandauza bzinthu bzentse bzomwe Yahova adacita na bzomwe akucita kuti wanthu adzatambire moyo wakusaya kumala.
