NKHANI YAKUPFUNZA 51
NYIMBO 3 Ndimwe Mphanvu Yathu, Cidikhiro Cathu, Timbakukhulupirani
Yahova Ambakuwonani Mukakhala Mukulira
“Koyani misozi yangu mu nthawa yanu. Kodi misozi yangu iribe kunembedwa m’bukhu lanu?” — SALIMO 56:8.
CAKULINGA CA NKHANIYI
Kukumbukira kuti Yahova ambatiwona tikakhala tidasunama ndipo an’dzatipasa bzomwe tikufunikira kuti atitsangalaze.
1-2. Kodi ni mabvuto yaponi yomwe yangaticitise kulira?
TENTSENEFE timbacoka misozi nthawe zinango. Bzimwebzi bzimbacitika tikakhala tidakomedwa. Ndipo pinango imwepo mudacoka kale misozi thangwe ra cinthu cabwino comwe cidakucitikirani. Ninga kubadwa kwa mwana, kukumbukira cinthu cabwino comwe cidakucitikirani kale-kale ayai pomwe mudawonana na xamwali wanu omwe mukhadasiyana naye magole mazinji.
2 Tsono kazinji-kazinji timbacoka misozi thangwe ra kuwawidwa komwe timbakhala tikubva mu mtima. Ifepano tingalire mwanzathu akatisunamisa. Tingacoke misozi thangwe ra matenda yomwe tinayo yomwe yakumala lini ayai thangwe rakuti tafedwa wadzinza wathu. Tingabve ninga momwe mpolofeta Jeremiya adabvera pomwe Ababiloniya adapfudza mzinda wa Jeruzalemu. Iye adati: “Maso yangu yakucoka misozi ninga madzi yomwe yakuyerera . . . Maso yangu yan’dzapitiriza kucoka misozi.” — Maliro 3:48, 49.
3. Kodi Yahova ambabva tani akawona atumiki wace adasunama? (Zaiya 63:9)
3 Yahova ambadziwa kuwanda kwa misozi yomwe tacosa kale thangwe ra mabvuto yomwe tikugumana nayo. Bibliya likutitsimikizira kuti iye ambakhala tceru kuti awone mabvuto yentse yomwe atumiki wace akugumana nayo, nakuti ambatibva tikamulirira kukumbira thandizo. (Salimo 34:15) Kuthumizira pa kutibva, pana bzinthu bzinango pomwe bzomwe Yahova ambaticitira. Iye ni Pai wathu ndipo ambatifuna kwene-kwene. Ndipopa akatiwona tikulira, iye ambasunama kwene-kwene ndipo ambabwera kudzatithandiza. — Werengani Zaiya 63:9.
4. Kodi tin’cezerana bza wanthu aponi wa m’Bibliya, ndipo tin’pfunza ciyani pakulewa bza Yahova?
4 M’Bibliya, Yahova adalatiza momwe adabvera pomwe atumiki wace adacosa misozi. Mu nkhani ino, tin’cezerana bza Ana, Davide na Mambo Ezekiya. Tiniwona kuti thangwe ranyi iwo adalira, Yahova adawathandiza tani ndipo tiniwonambo momwe Yahova ambatithandizira tikakhala tidasunama, tikacitiridwa bzinthu bzakuipa ayai tikawona kuti palibe cidikhiro.
YAHOVA AMBAWONA TIKAKHALA TIKULIRA THANGWE RA KUFEDWA
5. Kodi Ana akhagumana na mabvuto yaponi, ndipo akhabva tani?
5 Ana adagumana na mabvuto mazinji yomwe yadamucitisa kuti alire. Bvuto libodzi lomwe iye akhagumana nalo ndakuti akhali pa cipali ndipo akhawengedwa na mkhaziba wace Penina. Kuthumizira bzimwebzi, Ana akhalibe wana, tsono Penina akhana wana azinji. (1 Samuyeli 1:1, 2) Penina akhandokhalira kumuseka Ana nthawe zentse thangwe rakuti iye akhabereka lini. Kodi mungadakhala ndimwepo mukugumana na mabvuto yamweya mungadabzibva tani? Ana adasunama kwene-kwene mwakuti “akhalira ndipo akhadya lini.” “Iye akhawawidwa mu mtima.” — 1 Samuyeli 1:6, 7, 10.
6. N’ciyani comwe Ana adacita kuti abzibve bwino?
6 Kodi Ana adacita ciyani kuti abve bwino? Cinthu cakuyamba comwe iye adacita ndico kuyenda ku tendi la mkonkhano kuti akanamate Yahova. Pinango pomwe iye adafika pafupi na tendi la mkonkhanolo “iye adayamba kupemba kwa Yahova, acilira kwene-kwene.” Iye adadandaulira Yahova kuti: “[Onani] kubonera kwa kapolo wanune mucindikumbukira.” (1 Samuyeli 1:10b, 11) Ana adauza Yahova momwe iye akhabvera. Pomwe Yahova adawona kulira kwaceko, iye adasunama kwene-kwene ndipo adafuna kumutsangalaza!
7. Kodi Ana adabva tani pomwe adauza Yahova bzentse bzomwe bzikhali mu mtima mwace?
7 Pomwe Ana adamala kufotokozera Yahova bzomwe bzikhamunesa mu mtima mwace, Mkulu wa Antsembe Eli adalewa kuti Yahova angadacita bzomwe Anayo adakumbira. Kodi Ana adabva tani na bzimwebzi? Bibliya limbati: “[Anayo] adayenda acikadya ndipo nkhope yace ikhawoneka lini pomwe kuti idasunama.” (1 Samuyeli 1:17, 18) Pa nthawe imweyi mabvuto ya Ana yakhanati kumala. Koma iye adabva bwino. Iye adakhulupira Yahova ndipo adasiya mabvuto yentse yomwe akhagumana nayo m’manja mwace. Yahova adawona kubonera kwace, adabva kulira kwace ndipo adamusimba mwakucitisa kuti akhale na wana. — 1 Samuyeli 1:19, 20; 2:21.
8-9. Thangwe ranyi tin’funika kucita nyongo kuti timbagumanike pa mitsonkhano nthawe zentse? (Ahebereu 10:24, 25) (Onani cithunzi-thunzi.)
8 Bzomwe tikupfunza. Kodi imwepo mukugumana na bvuto likulu lomwe likukucitisani kukhala mudasunama ayai kulira? Pinango mudasunama kwene-kwene thangwe ra kufedwa wadzinza wanu ayai xamwali wanu. Pa nthawe ninga zimwezi, imwepo mungandofune kukhala mwekha. Tsono ninga momwe Ana adatsangalazidwira thangwe ra kuyenda ku tendi la mkonkhano, imwepo mungatsangalazidwembo. Mukambayenda ku mitsonkhano napo mudaneta, mudasunama ayai mukubva utofu, Yahova an’dzakutsangalazani. (Werengani Ahebereu 10:24, 25.) Pa mitsonkhano, ifepano timbawerenga mavesi ya m’Bibliya yomwe yambatilimbikisa. Yahova an’dzatitsangalaza na kutilimbikisa tikayenda ku mitsonkhano napo kuti tiribe mphanvu yakucita bzimwebzo. Bzimwebzi bzin’dzatithandiza kuti tibzibve bwino napo kuti bvuto lathulo likanati kumala.
9 Pa mitsonkhano timbakhala na mwayi wakuceza na abale na mpfumakazi zathu omwe ambatifuna kwene-kwene, omwe ambatitsangalaza na kutilimbikisa. Ifepano timbabva bwino tikakhala pabodzi na iwo. (1 Atesalonika 5:11, 14) Mpainiya munango wakupambulika omwe adafedwa mkazace adatsangalazidwa thangwe ra kuyenda ku mitsonkhano. Iye adati: “Nthawe zinango nimbandofuna kukhala ndekha. Thangwe nimbandokhala ndicilira. Tsono ndikayenda ku mitsonkhano, inepano nimbabva bwino. Mafala yabwino yomwe abale na mpfumakazi ambandiuza na mitawiro yawo bzimbanditsangalaza kwene-kwene. Napo ndikakhala kuti ndidasunama kwene-kwene ntsiku imweyo, ndikayenda ku mitsonkhano nimbabzibva bwino.” Tikakhala tiri pa mitsonkhano, Yahova angaphatise basa abale na mpfumakazi zathu kuti atithandize.
Tingakhale wakutsangalazidwa tikabva mafala yabwino ya abale na mpfumakazi zathu (Onani ndime 8-9)
10. Kodi tingatewezere tani Ana tikakhala tidasunama kwene-kwene?
10 Ana adatsangalazidwambo thangwe ra kuuza Yahova bzentse bzomwe bzikhali mu mtima mwace. Imwepo mungatulirembo Yahova “thupo lanu lentse” mucikhulupira kuti iye an’dzakubvani. (1 Pedru 5:7) Mpfumakazi inango yomwe idakhala mamsiwa thangwe rakuti mwamuna wace adaphedwa na mbava, idati: “Ndidasunama kwene-kwene mwakuti ndikhakumbuka kuti ningadzakhale lini pomwe wakukondwa. Comwe cidanditsangalaza ndico kupemba kwa Pai wangu wa lufoyi Yahova. Nthawe zinango ndikhataza kulewa momwe ndikubvera. Napo bziri tenepo, iye akhandibvesesa. Pa nthawe yomwe ndikhakhala wakusunama kwene-kwene na wa thupo ndikhamukumbira kuti andithandize kuti ndibzibve bwino mu mtima. Ndipo pa nthawe ibodzi-bodziyo ndikhabzibva bwino.” Imwepo mukakhala wakutsudzuka kumuuza Yahova thupo lentse lomwe munalo, iye ambawona kusunama kwanuko ndipo ambabvesesa momwe mukubvera. Napo kuti bzinthu bzomwe bzikukucitisani thupobzo bzikanati kumala, Yahova angaderekhese mtima wanu ndipo imwepo mungabzibve bwino. (Salimo 94:19; Afilipi 4:6, 7) Yahova ambawona nyongo yomwe mukucita kuti mupitirize kukhala wakukhulupirika kwa iye ndipo an’dzakusimbani. — Ahebereu 11:6.
YAHOVA AMBAWONA TIKAKHALA TIKULIRA THANGWE RA KUSUNAMISIDWA
11. Kodi Davide adabva tani pomwe wanthu adamucitira bzinthu bzakuipa?
11 Pa moyo wace, Davide adagumana na mabvuto yakusiyana-siyana yomwe yadamucitisa kuti alire. Pakhana wanthu azinji omwe akhamuwenga ndipo wanthu winango omwe akhali axamwali wace caiwo na adzinza wace alibe kukhala wakukhulupirika kwa iye ndipo akhafuna kumupha. (1 Samuyeli 19:10, 11; 2 Samuyeli 15:10-14, 30) Iye adafika pakulewa kuti: “Ndaneta na kulira kwene-kwene; usiku bwentse nimbatotesa kama yangu na misozi; ndikakhala ndikulira nimbadzaza kama yangu na misozi.” N’ciyani cidacitisa Davide kuti abve tenepa? Iye adati: “Thangwe ra wanthu wentse omwe akundiboneresa.” (Salimo 6:6, 7) Bzinthu bzakuipa bzomwe iye akhacitiridwa bzidacitisa kuti iye awawidwe kwene-kwene ndipo akhandokhalira kulira.
12. Mwakubverana na Salimo 56:8, kodi Davide akhatsimikizira ciyani?
12 Napo kuti Davide akhagumana na mabvuto mazinji pa moyo wace, iye akhatsimikizira kuti Yahova akhamufuna. Iye adanemba kuti: “Yahova an’dzabva kulira kwangu.” (Salimo 6:8) Pa nthawe inango, Davide adanemba mafala yabwino yomwe timbayagumana pa Salimo 56:8. (Werengani.) Tikawerenga mafala ya vesi limweri timbakwanisa kubvesesa kuti Yahova ambatifuna ndipo ambacita nafe thupo tikakhala tikugumana na mabvuto. Kwa Davide bzikhakhala ninga kuti Yahova akukoya misozi yace mu combo ayai kuinemba m’bukhu. Davide akhadziwa kuti Yahova akhawona mabvuto yomwe iye akhagumana nayo. Ndipo iye akhatsimikizira kuti Yahova akhandowona lini mabvuto yomwe akhagumana nayoyo koma akhadziwambo momwe iye akubvera thangwe ra mabvutoyo.
13. Kodi n’ciyani comwe tin’funika kukumbukira wanthu winango akatisunamisa? (Onani cithunzi-thunzi.)
13 Bzomwe tikupfunza. Kodi imwepo mudasunama kwene-kwene thangwe rakuti mwacitiridwa bzinthu bzakusaya cirungamo ayai kunamizidwa na munthu omwe mumbamukhulupira? Pinango imwepo mudasunama thangwe rakuti makhadzi wanu wakulambani ayai banja lanu lamala ayai pinango munthu omwe imwepo mumbamufuna wasiya kutumikira Yahova. M’bale munango adagumana na bvuto ninga limweri. Mkazace adacita uputa ndipo patsogolo pace adamuthawa. M’baleyo adati: “Ndikhawona ninga ndikulota. Inepano ndikhadasunama, ndikhabva ciya ndipo ndikhabziwona kuti ndiribe na basalo.” Penu imwepo mukugumanambo na bvuto ninga limweri ayai mudacitiridwa bzinthu bzakusaya cirungamo, kumbukirani kuti Yahova an’dzakusiyani lini mwekha. M’bale umweyu adadzalewa kuti: “Inepano ndidazindikira kuti wanthu omwe timbawakhulupira angatisunamise. Tsono Yahova angatisunamise lini thangwe iye ni Tsendwa lathu. Nthawe zentse an’dzakhala nafe tikakhala tikugumana na mabvuto. Iye ambasiya lini wanthu omwe mbakukhulupirika kwa iye.” (Salimo 37:28) Ndipo mbakumbukiranimbo kuti lufoyi lomwe Yahova ambakulatizani ndikulu kwene-kwene kuposa lufoyi lomwe munthu ali-wentse angakulatizeni. Napo kuti kusiyidwa ayai kulambidwa na munthu omwe mumbamufuna kungakhale kwakuwawa kwene-kwene, kumbukirani kuti Yahova ambacinja lini. Iye ambacita thupo na imwepo ndipo ndimwe wakufunika kwene-kwene kwa iye. (Aroma 8:38, 39) Tenepo bzomwe tikupfunza mpsibzi: Pinango munthu angakucitireni bzinthu bzomwe bzingakuwaweni kwene-kwene, tsono dziwani kuti Pai wanu wa kudzulu Yahova ambakufunani kwene-kwene.
Bukhu la Masalimo limbatitsimikizira kuti Yahova ali pafupi na wanthu omwe akugumana na mabvuto (Onani ndime 13)
14. Kodi Salimo 34:18 ambatitsimikizira ciyani?
14 Penu imwepo mudasiyidwa ayai kulambidwa na mwanzanu wa m’banja, mungatsangalazidwe na mafala yomwe Davide adayalewa pa Salimo 34:18. (Werengani.) N’ciyani comwe Yahova ambacita kuti athandize wanthu omwe akukumbuka kuti bzinthu bzin’dzawafambira lini pomwe bwino kutsogolo? Ninga pai walufoyi omwe ambakumbatira mwana wace omwe akugumana na mabvuto kuti amutsangalaze, Yahova “ali pafupi” na ifepano. Iye nthawe zentse ambatibvera ntsisi ndipo ngwakukonzeka kutithandiza tikakhala tidasunama kwene-kwene thangwe rakuti munthu omwe timbamufuna kwene-kwene watisiya ayai watilamba. Yahova ambafuna kutitsangalaza na kuderekhesa mtima wathu tikakhala tikuwawidwa kwene-kwene. Iye ambatipasa bzinthu bzizinji bzomwe bzimbatithandiza kukumbukira momwe bzinthu bzin’dzakhalira kutsogolo. Bzinthu bzimwebzi bzimbatithandiza kupirira mabvuto yomwe tikugumana nayo. — Zaiya 65:17.
YAHOVA AMBAWONA TIKAKHALA TIKULIRA THANGWE RA MATENDA
15. Kodi n’ciyani comwe cidacitisa Ezekiya kulira?
15 Pomwe Mambo Ezekiya akhana magole 39, iye adadziwa kuti akhaduwala matenda yomwe yakhalibe mankhwala. Yahova adauza mpolofeta Zaiya kuti akauze Ezekiya kuti angadafa na matendayo. (2 Amambo 20:1) Pomwe Ezekiya adabva bzimwebzi adalira kwene-kwene. Patsogolo pace, iye adapemba kwa Yahova. — 2 Amambo 20:2, 3.
16. Kodi Yahova adatawira tani mpembo wa Ezekiya?
16 Pomwe Yahova adawona Ezekiya akulira acimudandaulira kuti apitirize kukhala na moyo, iye adamubvera ntsisi. Yahova adati: “Ndabva mpembo wako, ndipo ndawona misozi yako. Nin’kupoza.” Yahova adabvera ntsisi Ezekiya ndipo mwakuphatisa basa Zaiya, iye adalewa kuti an’dzamuthumizira ntsiku zace zakukhala na moyo nakuti angadapulumusa Jeruzalemu m’manja mwa Asiriya. — 2 Amambo 20:4-6.
17. Tikakhala tikuduwala matenda makulu, kodi tingalatize tani kuti timbathemba Yahova? (Salimo 41:3) (Onani cithunzi-thunzi.)
17 Bzomwe tikupfunza. Kodi imwepo mukuduwala ndipo bzikuwoneka kuti matenda yanuyo yalibe mankhwala? Pembani kwa Yahova ndipo muuzeni momwe mukubvera. Iye an’dzakutetekerani napo penu municita mpembo wanuyo uko mukulira. Bibliya limbatitsimikizira kuti: “Baba wa ntsisi kwene-kwene na Mulungu omwe ambatsangalaza wanthu” an’dzatitsangalaza pa mabvuto yathu yentse. (2 Akolinto 1:3, 4) Yahova angamalise lini mabvuto yathu yentse pomwe tikali mu dziko lakuipa lino, tsono tin’funika kuthemba iye kuti atitsangalaze na kutithandiza. (Werengani Salimo 41:3.) Yahova ambaphatisa basa mzimu wace wakucena kuti atipase mphanvu, nzeru na mtendere wa mu mtima kuti tikwanise kukhala wakulimba pomwe tikugumana na mabvuto. (Mimwani 18:14; Afilipi 4:13) Njira inango yomwe Yahova ambaphatisa basa kuti atitsangalaze ndiyo Bibliya. Tikawerenga Bibliya timbabva kuti iye an’dzamalisa matenda kutsogoloku. — Zaiya 33:24.
Yahova an’dzatawira mipembo yathu mwakutipasa mphanvu, nzeru na mtendere wa mu mtima (Onani ndime 17)
18. Kodi ni vesi liponi la m’Bibliya lomwe limbakutsangalazani mukakhala mukugumana na mabvuto makulu? (Onani kwadru yakuti “ Mafala Yomwe Yambaderekhesa Mtima Wathu.”)
18 Ezekiya adatsangalazidwa na mafala ya Yahova. Ifepano tingagumanembo mtsangalazo m’Bibliya. Yahova adacitisa kuti anembi wa Bibliya anembe mafala yomwe yambaderekhesa mtima wathu na yomwe yambatitsangalaza tikakhala tikugumana na mabvuto. (Aroma 15:4) Onani bzomwe mpfumakazi inango ya ku Madokero kwa África yomwe idagumanidwa na matenda ya kankro idalewa. Pomwe mpfumakaziyi idadziwa kuti ikhana matenda ya kankro ikhandokhalira kulira. Iyo idati: “Vesi la m’Bibliya lomwe limbanditsangalaza kwene-kwene ni Zaiya 26:3. Napo kuti nthawe zinango tingakwanise lini kumalisa bvuto lomwe tikugumana nalo, vesiri likulatiza kuti Yahova an’dzaderekhesa mtima wathu ndipo an’dzatithandiza kupirira bvutolo.” Tsono tanimbo imwepo? Kodi pana vesi la m’Bibliya lomwe limbaderekhesa mtima wanu mukakhala mukugumana na mabvuto yomwe mungakwanise lini kuyamalisa?
19. Kodi tikudikhirira ciyani kutsogoloku?
19 Ifepano tikukhala kuphampha kwa ntsiku zakumalizira, ndipopa tingadikhirire kugumana na mabvuto mazinji yomwe yangaticitise kulira. Tsono ninga momwe Yahova adacitira na Ana, Davide na Mambo Ezekiya, iye ambawona kulira kwathu ndipo ambatibvera ntsisi. Iye ambatifuna kwene-kwene akatiwona tikupitiriza kukhala wakukhulupirika kwa iye napo kuti tikubva kuwawa ndipo ambayebwa lini misozi yathu. Ndipopa mukakhala mukugumana na mabvuto makulu, muuzeni Yahova mu mpembo. Mbakhalani na nthawe ya kuceza na abale na mpfumakazi zanu mukakhala muli pa mitsonkhano ndipo mbawerengani Bibliya kuti mutsangalazidwe na Yahova. Mukapitiriza kupirira, mungakhale na citsimikizo cakuti Yahova an’dzakubairani. Mabaibai yamweya yambaphatanidza piciro lakuti tin’dzalira lini pomwe thangwe ra kufedwa wadzinza wathu, kusiidwa ayai kulambidwa na mwanzathu wa m’banja ndipo tin’dzalira lini pomwe thangwe ra matenda. (Apokalipse 21:4) Nthawe imweyo ikadzafika, ifepano tin’dzapitiriza kucosa misozi, tsono misozi yomwe tin’dzacosayo in’dzakhala yakukomedwa.
NYIMBO 4 ‘Yahova ni M’busa Wangu’
