Kodi imwepo mwawerenga bwino-bwino nkhani za gole lino mu Ntsanza ya Mulindiri? Penu mun’ti inde, yezerani kutawira mibvunzo iri m’nyantsiyi:

Kodi Yahova ambacita tani bzinthu na akazi?

Iye ambacita nawo bzinthu mwakusaya tsankhulo ndipo ambawona lini kuti amuna mbakufunika kwene-kwene kuposa iwo. Yahova ambawatetekera ndipo ambacita nawo thupo. Ndipo ambawakhulupira mwakuwapasa mwayi wakucita basa lace. — w24.01, matsa. 15-16.

Kodi tingaphatise tani basa Aefezo 5:7, omwe ambati: “Lekani kumbacitambo nawo bzimwebzi”?

Mpostolo Paulo adaticenjeza kuti tileke kubverana na wanthu omwe angatitazise kubvera malamulo ya Yahova. Wanthu amwewa angakhale wale omwe timbaceza nawo maso na maso ayai wale omwe timbaceza nawo pa mbuto zakucezera za pa interneti. — w24.03, matsa. 22-23.

Kodi tin’funika kubzikhotcerera ku nkhani ziponi zakunama?

Tin’funika kucita mphole na nkhani zomwe axamwali wathu angatiuze zomwe alibe kutsimikizira kuti n’zacadidi, mensaje zakucokera kwa wanthu omwe timbawadziwa lini na apanduki omwe ambanamizira ninga kuti akufuna kupfunza Bibliya. — w24.04, tsa. 12.

Kodi n’ciyani comwe timbadziwa na comwe timbadziwa lini bza momwe Yahova an’dzatongera Mambo Salomau, wale omwe adapfudzidwa m’mizinda ya Sodoma na Gomora na omwe adapfudzidwa pa Cigumula ca Madzi?

Tikudziwa lini penu Yahova adawapfudziratu ndipo an’dzawalamusa lini pomwe. Koma bzomwe tikudziwa mpsakuti Yahova ndiye omwe akudziwa bzentse nakuti iye ni Mulungu wantsisi zikulu. — w24.05, matsa. 3-4.

Kodi kudziwa kuti Yahova ni “Tsendwa” kumbatitsimikizira ciyani? (Deuteronomiyo 32:4)

Tingathawire kwa Yahova. Iye ngwakuthembeka, thangwe nthawe zentse ambakwanirisa bzomwe ambapicira. Ndipo iye ambacinja lini makhalidwe yace na cakulinga cace. — w24.06, matsa. 26-28.

N’ciyani comwe cingakuthandizeni kuti muzolowere gwere lipsa?

Mbathembani Yahova, ndipo an’dzakuthandizani ninga momwe adacitira na atumiki wace m’mbuyomu. Tcenkhani kumbandendemezera gwere lanu lakale na lipsalo. Mbacitani bzizinji mu gwere lanu lipsalo ndipo khalani na axamwali wapsa. — w24.07, matsa. 26-28.

N’ciyani comwe tingapfunze na bziratizo bzitatu bza Jezu bzomwe bziri pa Mateu kapitulo 25?

Ciratizo ca mabira na mbuzi cimbalatiza kuti tin’funika kukhala wakukhulupirika. Ciratizo ca madende yakucenjera na yakupusa cimbalatiza kuti tin’funika kukhala wakukonzeka na watceru. Ndipo ciratizo ca matalento cimbalatiza kuti tin’funika kuphata basa na nyongo. — w24.09, matsa. 20-24.

Kodi khonde la templo ya Salomau likhadatalimpha mametro mangasi?

Pa 2 Nkhani 3:4, Mabibliya manango yakale-kale yadanemba “makovado 120,” yomwe ni mametro 53 kucokera pantsi mpaka m’dzaulu. Tsono Mabibliya manango yadanemba “makovado 20,” yomwe ni mametro 9. Ndipo nfundo yakumalizirayi ikubverana na khwankhwa la parede ya temployo. — w24.10, tsa. 31.

Kodi mafala yakuti mtumiki wakuthandiza an’funika ‘kukhala na mkazi m’bodzi’ yambathandauza ciyani? (1 Timotio 3:12)

Yambathandauza kuti iye an’funika kulowola mkazi m’bodzi ndipo an’funika lini kucita upombo. Ndipo an’funikambo lini kumbacita tsantsa na akazi winango. — w24.11, tsa. 19.

Thangwe ranyi tingalewe kuti mafala yomwe yali pa Juwau 6:53 yakulewa lini bza Cilaliro ca Mbuya?

Juwau 6:53 ambalewa bza kufunika kwa kudya thupi na kumwa mulopa wa Jezu. Jezu adalewa mafalaya ku Galileya mu gole la 32 pomwe Kristu akhadabwera kale ndipo akhauza Adjuda kuti akhafunikira kumukhulupira. Tsono Jezu adayambisa msinda wa Cilaliro ca Mbuya ku Jeruzalemu pomwe padapita gole libodzi. Ndipo pamwepa Jezu akhali pabodzi na wale omwe an’dzakatonga naye pabodzi kudzulu. — w24.12, matsa. 10-11.