Mpostolo Paulo adauza mkulu wa gwere mwanzace Timotio kuti: “Ndikukucenjeza mwamphanvu pamaso pa Mulungu na pa Jezu Kristu pabodzi na anjo wakusankhulidwa, kuti uteweze malango yamweya mwakusaya tsankhulo ayai mwakusaya kunyang’ana nkhope.” — 1 Timotio 5:21.

Cakuyamba, kuti tiwadziwe anjo amwewa mbatiwoneni kuti vesiri likulewa lini bza anjo aponi. Anjo amwewa ni wa 144 000 lini. Thangwe ranyi tikulewa tenepoyo? Thangwe pa nthawe yomwe Paulo adanembera mafalaya Timotio, anyakudzozedwa akhanati kuyamba kulamusidwa kuti ayende kudzulu. Apostolo na anyakudzozedwa winango akhanati kukhala bzakulengedwa bzauzimu, ndipopa iwo angakhale lini “anjo wakusankhulidwa” omwe akulewedwa pa vesiri. — 1 Akolinto 15:50-54; 1 Atesalonika 4:13-17; 1 Juwau 3:2.

“Anjo wakusankhulidwa” angakhalembo lini anjo wale omwe alibe kubvera Yahova pa Cigumula ca Madzi. Anjo amwewale adasankhula kukhala ku mbali ya Sathani. Iwo adakhala madimonyo ndipo adakhala anyamadulanthaka wa Jezu. (Genesesi 6:2; Luka 8:30, 31; 2 Pedru 2:4) Kutsogolo kuno, iwo an’dzafungiridwa ku ciphompho magole 1000 ndipo patsogolo pace an’dzapfudzidwa pabodzi na Sathani. — Djuda 6; Apokalipse 20:1-3, 10.

Na tenepo, “anjo wakusankhulidwa” omwe mpostolo Paulo adawalewa ni anjo omwe akhathandiza ‘Mulungu na Jezu Kristu’ kudzulu, omwe agumidwambo pa vesiri.

Alipo anjo azinji wakukhulupirika. (Ahebereu 12:22, 23) Tsono iwo ambapasidwa lini mabasa mabodzi-bodzi. (Apokalipse 14:17, 18) Kumbukirani kuti pa nthawe inango, Yahova adatuma anjo m’bodzi kuti akapfudze acikunda wakukwana 185 000 wa Asiriya. (2 Amambo 19:35) Anjo winango adapasidwa basa la “[kutsonkhanisa] wanthu wentse omwe ambacitisa anzawo pikado na anyakusaya kubvera malamulo, aciwacosa mu Umambo [bwa Jezu].” (Mateu 13:39-41) Pinango winango adapasidwa basa la ‘kutsonkhanisa anyakusankhulidwa’ kudzulu. (Mateu 24:31) Ndipo winango adapasidwa basa la ‘kutikhotcerera kuli-kwentse komwe tingayende.’ — Salimo 91:11; Mateu 18:10; ndendemezerani na Mateu 4:11; Luka 22:43.

“Anjo wakusankhulidwa” omwe ambalewedwa pa 1 Timotio 5:21 pinango akhali anjo omwe adapasidwa basa lakusamalira nkhani za m’gwere. Nkhani yentse ya vesi limweri imbalatiza kuti Paulo adapereka malango ya momwe akulu akhafunikira kusamalira gwere nakuti gwere likhafunika kumbalemekeza akuluwo. Akuluwo akhafunika kuphata basa lawo “mwakusaya tsankhulo ayai mwakusaya kunyang’ana nkhope” ndipo akhafunika lini kucita cakusankhula ayai kutonga nkhani uko akanati kuibvesesa bwino-bwino. Ndipo thangwe lomwe lingacitise akulu kubvera malango ya Pauloya ndakuti iwo akutumikira abale wawo “pamaso pa Mulungu na pa Jezu Kristu pabodzi na anjo wakusankhulidwa.” Bzikuwonekeratu padeca kuti anjo winango ambapasidwa basa la kusamalira magwere. Ndipo iwo ambakhotcererambo atumiki wa Mulungu, ambanyang’anira basa la kupalizira na kuuza Yahova momwe bzinthu bzikufambira. — Mateu 18:10; Apokalipse 14:6.