NKHANI YAKUPFUNZA 2
NYIMBO 132 Tsapano Ndife Thupi Libodzi
Amuna, Mbalemekezani Akazanu
“Imwe amuna, . . . alemekezeni.” — 1 PEDRU 3:7.
CAKULINGA CA NKHANIYI
Momwe amuna angalemekezere akazawo m’mafala na m’bzicito.
1. Kodi thangwe libodzi lomwe lidacitisa kuti Yahova ayambise banja ndiponi?
YAHOVA ni “Mulungu wakukondwa” ndipo iye akufuna kuti tikhalembo wakukondwa. (1 Timotio 1:11) Yahova adatipasa mphaso zizinji zomwe zimbatithandiza kukhala wakukondwa. (Tiyago 1:17) Ibodzi mwa mphaso zimwezi ni malowozi. Mwamuna na mkazi akalowolana, iwo ambapicira kuti an’dzafunana na kulemekezana. Mwamuna na mkazi akapitiriza kumbafunana, iwo angakhale wakukondwa. — Mimwani 5:18.
2. N’ciyani comwe cimbacitika m’mabanja mazinji ntsiku zino?
2 Bzakupasa ntsisi mpsakuti mabanja mazinji ntsiku zino yambayebwa mapiciro yomwe adayacita pa ntsiku ya malowozi yawo. Ndipopa, mabanja mazinji yambakhala lini yakukondwa. Kafukufuku munango adalewa kuti amuna azinji ambamenya azikazawo, ambawatukwana na kuwaboneresa mu njira zizinji. Amuna winango ambalemekeza akazawo pakakhala pana wanthu, koma akakhala ali pawokha ambawalemekeza lini. Kuthumizira bzimwebzi, mabanja mazinji yambagumana na mabvuto mwamuna akambawona pornografia.
3. Thangwe ranyi amuna winango ambaboneresa azikazawo?
3 Thangwe ranyi amuna winango ambaboneresa azikazawo? Winango wa iwo ambacita bzimwebzi pinango thangwe rakuti pai wawo akhambaboneresambo mai wawo, ndipopa ambawona kuti kuboneresa akazi n’kwakuphonyeka lini. Winango ambacita bzimwebzo thangwe ra kutewezera cikhalidwe ca komwe ambakhala. Wanthu wa m’bzikhalidwe bzinango ambalewa kuti “mwamuna caiye” ngule omwe ambacita bzinthu mwaukali na mkazace kuti alatize kuti ndiye omwe ambatonga pa muipo. Amuna winango alibe kupfunzisidwa momwe angakhalire wakubziphata akakhala ana ciya. Kuthumizira bzimwebzi, amuna winango angambawone akazi na malume ya pa mphasa mu njira yakuphonyeka thangwe rakuti ambandokhalira kuwona pornografia. Ndipo kafukufuku munango adalewa kuti pa nthawe ya COVID-19 bzinthu bzimwebzi bzidathumizika kwene-kwene. Tsono palibe thangwe lomwe lin’funika kucitisa mwamuna kuboneresa mkazace.
4. Kodi n’ciyani comwe amuna wacikristau an’funika kucita naco mphole, ndipo thangwe ranyi?
4 Amuna wacikristau an’funika kucita mphole kuti aleke kutewezera makumbukidwe yakuphonyeka ya momwe dzikoli limbawonera akazi. a Thangwe ranyi? Thangwe libodzi ndakuti bzomwe munthu ambakumbuka ndibzo bzomwe ambadzacita. Mpostolo Paulo adacenjeza Akristau wa ku Roma kuti: “Lekani kutewezera makumbukidwe ya m’dzikoli.” (Aroma 12:1, 2) Pomwe Paulo adawanembera mafala yamweya, iwo akhali kale Akristau kwa magole mazinji. Napo bzikhali tenepo, mafala ya Pauloya yakulatiza kuti Akristau winango mu gwere limwelire akhatewezera makhalidwe na kakumbukidwe ka ku dziko. Ndipopa Paulo adawauza kuti akhafunika kucinja makumbukidwe na makhalidwe yawo. Malango yamweya yakuyendambo kwa amuna wacikristau ntsiku zino. Bzakupasa ntsisi mpsakuti winango wa iwo ambatewezera makumbukidwe ya m’dzikoli ndipo bzimwebzi bzimbawacitisa kuti ambabonerese azikazawo. b Kodi Yahova ambafuna kuti mwamuna ambacite tani bzinthu na mkazace? Mtawiro wa mbvunzo umweyu uli pa cinembo comwe cikutsogolera nkhani ino.
5. Mwakubverana na 1 Pedru 3:7, kodi mwamuna an’funika kumbacita naye tani bzinthu mkazace?
5 Werengani 1 Pedru 3:7. Yahova akufuna kuti amuna ambalemekeze azikazawo. Mwamuna omwe ambalemekeza mkazace ambacita naye bzinthu mwa lufoyi na mwakudeka mtima. Mu nkhani ino, tiniwona momwe mwamuna angalatizire kuti ambalemekeza mkazace. Pomwe tikanati kucezerana bzimwebzi, tiniwona makhalidwe yomwe yangalatize kuti mwamuna akulatiza lini lufoyi na ulemu kwa mkazace.
LEKANI KUCITA BZINTHU BZOMWE BZINGASUNAMISE MKAZANU
6. Kodi Yahova ambawawona tani amuna omwe ambamenya azikazawo? (Akolose 3:19)
6 Mwamuna an’funika lini kumbamenya mkazace. Yahova ambawenga munthu wa ndewo. (Salimo 11:5) Yahova ambakomedwa lini na mwamuna omwe ambamenya mkazace. (Malakiya 2:16; werengani Akolose 3:19.) Mwakubverana na cinembo ca 1 Pedru 3:7 comwe cikutsogolera nkhani ino, mwamuna omwe ambaboneresa mkazace uxamwali bwace na Yahova bungadzongeke. Ndipo bzimwebzi bzingacitise kuti Yahova aleke kubva mipembo yace.
7. Mwakubverana na Aefezo 4:31, 32, n’ciyani comwe amuna an’funika kutcenkha? (Onani “Kafotokozedwe ka Mafala Yanango.”)
7 Mwamuna an’funika lini kutukwana mkazace. Amuna winango ambalewalewa na akazawo mwa ukali ndipo ambalewa mafala yomwe yambawasunamisa. Tsono Yahova ambawenga “ukali, ciya, kupopota [na] mafala yakupusa.” c (Werengani Aefezo 4:31, 32.) Yahova ambabva bzentse. Ndipopa iye ambafuna kuti mwamuna ambalewelewe na mkazace mu njira yabwino napo akakhala ali pa okha. Mwamuna omwe ambalewalewa na mkazace mwa ukali ambandodzonga lini banja lace, koma ambadzongambo uxamwali bwace na Yahova. — Tiyago 1:26.
8. Kodi Yahova ambaiwona tani pornografia, ndipo thangwe ranyi?
8 Mwamuna an’funika lini kumbawona pornografia. Kodi Yahova ambaiwona tani pornografia? Iye ambaiwenga kwene-kwene. Mwamuna omwe ambawona bzithunzi-thunzi bzakuipa ambadzonga uxamwali bwace na Yahova ndipo ambalemekeza lini mkazace. d Yahova ambafuna kuti mwamuna akhale wakukhulupirika kwa mkazace. Mwamuna omwe ngwakukhulupirika angacite lini upombo na mkazi munango ne kukumbukira kucita bzimwebzi. Jezu adalewa kuti mwamuna omwe ambapitiriza kunyang’anisisa mkazi mpaka kumukhumba wacita naye kale upombo “mu mtima mwace.” e — Mateu 5:28, 29.
9. Thangwe ranyi Yahova ambakomedwa lini mwamuna akangingimiza mkazace kuti acite cinthu comwe akufuna lini pomwe akucita malume ya pa mphasa?
9 Mwamuna an’funika lini kungingimiza mkazace kuti acite bzinthu bzomwe akufuna lini pomwe akucita malume ya pa mphasa. Amuna winango ambangingimiza akazawo kuti acite bzinthu bzakupasa manyazi pomwe akucita malume ya pa mphasa, bzomwe bzimbawacitisa kubzibva wakusaya kulemekezedwa ayai kucita bzinthu bzomwe mtima wace ukulamba. Khalidwe limweri ndakuipa ndipo ndakusaya lufoyi, ndipopa Yahova ambawenga bzimwebzi. Yahova ambafuna kuti mwamuna afune mkazace na kuleka kumungingimiza kucita bzinthu bzomwe iye akufuna lini. (Aefezo 5:28, 29) Tsono tani penu mwamuna, omwe ni Mkristau, ana kale msambo wa kumbaboneresa mkazace na kumbawona pornografia? Kodi iye angacinje tani makumbukidwe yace na makhalidwe yace yakuphonyekayo?
N’CIYANI COMWE MWAMUNA ANGACITE KUTI ACINJE KHALIDWE LACE LAKUIPA?
10. Kodi amuna angatewezere tani Jezu?
10 N’ciyani comwe cingathandize mwamuna kuti aleke kumbaboneresa mkazace na kumbamungingimiza kuti acite bzinthu bzakupasa manyazi? Njira ibodzi yomwe iye angacitire bzimwebzo ndiyo kucita nyongo yakutewezera Jezu Kristu. Napo kuti Jezu akhalibe kulowola, amuna angamutewezere mwa kumbawona momwe iye akhambacitira bzinthu na anyakupfunza wace. (Aefezo 5:25) Mbatiwoneni bzomwe mwamuna angapfunze na momwe Jezu akhambacitira bzinthu na apostolo wace na momwe iye akhambalewalewera nawo.
11. Kodi Jezu akhacita tani bzinthu na apostolo wace?
11 Nthawe zentse, Jezu akhambacita bzinthu mwakudeka mtima na mwa ulemu na apostolo wace. Iye akhambacita lini nawo bzinthu mu njira yakuipa ndipo akhambawaponderera lini. Napo kuti iye akhali Mbuya na Pfunzisi wawo, akhaphatisa lini basa mphanvu yace kuti apostolowo abzibve kuti akhalibe na basalo ayai kuti apostolowo amugope. M’mbuto mwace akhambacitira apostolowo mabasa yakunyozeka. (Juwau 13:12-17) Pa nthawe inango, iye adauza anyakupfunza wacewo kuti: “Pfunzani kwa ine, pakuti ndine wakuderekha na wa mtima wakubzicepesa, ndipo mun’dzagumana mtsangalazo pa moyo wanu.” (Mateu 11:28-30) Mafalaya yakulatiza kuti Jezu akhali wakuderekha. Munthu wakuderekha ngwakusaya lini mphanvu. Iye ngwamphanvu koma ambakwanisa kubziphata. Napo akakhala kuti wanyosedwa, ambakwanisa kukhala wakugwa mpfuwa ndipo ambabziphata.
12. Kodi Jezu akhalewalewa tani na wanthu winango?
12 Jezu akhambalewa mafala yabwino kuti atsangalaze na kulimbikisa wanthu. Iye akhalewalewa lini na anyakupfunza wace mwa ukali. (Luka 8:47, 48) Nthawe zinango anyamadulanthaka wace akhambamulewa kuipa na cakulinga cakuti amukalipise, tsono “iye akhabwezera lini.” (1 Pedru 2:21-23) Pa nthawe zinango Jezu adawona kuti bzikhali bwino kundonyamala m’mbuto mwakutawira mwa ukali. (Mateu 27:12-14) Bzimwebzi ndibzo bzomwe amuna wacikristau an’funika kucita!
13. Mwakubverana na Mateu 19:4-6, kodi mwamuna angakhale tani “wakuphatana na mkazace”? (Onani cithunzi-thunzi.)
13 Jezu adalewa kuti amuna an’funika kupitiriza kukhala wakukhulupirika kwa akazawo. Iye adaphatisa basa mafala ya Pai wace kuti auze amuna kuti an’funika kukhala ‘wakuphatana na akazawo.’ (Werengani Mateu 19:4-6.) Fala la Cigerego lomwe lidasanduliziridwa pa cinemboci kuti “kuphatana” limbathandauza “kumatirira.” Bzimwebzi bzin’funa kulewa kuti mwamuna na mkazi an’funika kufunana kwene-kwene kukhala ninga kuti adamatirirana. M’bodzi wa iwo akacita cinthu comwe cingasunamise mwanzace awiriwo anibva kuwawa. Mwamuna omwe ambafuna mkazace an’dzatcenkha kuwona mtundu uli-wentse wa pornografia. Mwakamfulumize iye an’dzacitisa kuti maso yace yaleke “kuwona bzinthu bzapezi-pezi.” (Salimo 119:37) Ninga Djobi, iye an’dzacita mpangano na maso yace ndipo an’dzanyang’anisisa lini mkazi omwe ngwace lini mu njira yakuphonyeka. — Djobi 31:1.
Mwamuna omwe ngwakukhulupirika kwa mkazace akulamba kuwona pornografia (Onani ndime 13) g
14. N’ciyani comwe mwamuna omwe ambaboneresa mkazace angacite kuti akhale pomwe pa uxamwali bwakulimba na Yahova na kukhalambo pa uxamwali na mkazace?
14 Mwamuna omwe ambamenya mkazace ayai kumutukwana an’funika kucita bzinthu bzinango kuti akhale pomwe pa uxamwali na Yahova na kukhalambo pa uxamwali na mkazace. N’ciyani comwe iye an’funika kucita? Cakuyamba, iye an’funika kubvesesa kuti ana bvuto likulu kwene-kwene. Yahova ambakwanisa kuwona bzomwe iye ambalewa na kucita. (Salimo 44:21; Mpalizi 12:14; Ahebereu 4:13) Caciwiri, iye an’funika kucinja khalidwe lace na kuleka kuboneresa mkazace. (Mimwani 28:13) Cacitatu, iye an’funika kucita ciri-centse kuti alekereredwe na Yahova na kulekereredwambo na mkazace. (Mabasa 3:19) Iye an’funikambo kudandaulira Yahova kuti amuthandize kufuna kucinja na kukwanisambo kukumbuka, kulewalewa na kucita bzinthu bzomwe Yahova ambakomedwa nabzo. (Salimo 51:10-12; 2 Akolinto 10:5; Afilipi 2:13) Cacinai, iye an’funika kucita bzinthu mwakubverana na mipembo yace ndipo an’funikambo kuwenga ndewo pabodzi na mafala yakuipa. (Salimo 97:10) Cacixanu, iye an’funika kukumbira thandizo kwa akulu wa gwere mwakamfulumize. (Tiyago 5:14-16) Cacitanthatu, iye an’funika kukumbukiriratu bzomwe ati adzacite kutsogolo kuti aleke kudzaboneresa pomwe mkazace. Mwamuna akakhala ambawona pornografia, iye an’funikambo kuteweza nfundo zitanthatuzi. Akacita tenepo, Yahova an’dzamuthandiza kuti acinje khalidwe lace. (Salimo 37:5) Tsono kundosiya bzinthu bzomwe bzingasunamise mkazace mpsakukwanira lini. Iye an’funikambo kupfunza momwe angalemekezere mkazaceyo. Kodi iye angacite tani bzimwebzi?
KODI MWAMUNA ANGAMBALEMEKEZE TANI MKAZACE?
15. Kodi mwamuna angalatize tani kuti ambafuna mkazace?
15 Mulatizeni mkazanu kuti mumbamufuna. Abale winango omwe ali pa banja, ambawonesesa kuti ntsiku iri-yentse ambacita cinthu comwe cimbalatiza kuti ambafuna mkazawo. (1 Juwau 3:18) Mwamuna angalatize kuti ambafuna mkazace mwakumbacita tubzinthu tung’ono-tung’ono, ninga kumuphata boko pomwe akufamba mu njira ayai kumukumbatira. Pomwe iye ali kutali na mkazaceyo angambamutumizire mensaje yakulewa kuti: “Ndakusuwa” ayai kumubvunza kuti: “Kodi ntsiku yako ikukufambira tani?” Nthawe zinango angambamunembere mafala yabwino patsamba yakulatiza kuti iye ambamufuna. Mwamuna akambacita bzinthu bzimwebzi ambalatiza kuti ambalemekeza mkazace ndipo ambacitisa kuti banja lace likhale lakulimba.
16. Thangwe ranyi mwamuna an’funika kumbatenda mkazace?
16 Mbamuuzani mkazanu kuti iye ngwakufunika kwene-kwene kwa imwepo. Mwamuna omwe ambalemekeza mkazace ambamuuza mafala yomwe yambacitisa kuti mkaziyo abzibve bwino. Njira ibodzi yomwe mwamuna angacitire bzimwebzi ndiyo kumbatenda mkaziyo pa bzentse bzomwe ambacita kuti amuthandize. (Akolose 3:15) Mwamuna akambatenda mkazace na kumbamuuza thangwe lomwe ambamufunira, mkaziyo ambabzibva kuti ngwakukhotcerereka ndipo ambawona kuti ambafunidwa na kulemekezedwa. — Mimwani 31:28.
17. Kodi mwamuna angalatize tani kuti ambalemekeza mkazace?
17 Mbacitani bzinthu mwakudeka mtima na mwaulemu na mkazanu. Mwamuna omwe ambafuna mkazace ambawona mkazaceyo kuti ngwakufunika kwene-kwene ndipo ni mphaso yabwino yakucokera kwa Yahova. (Mimwani 18:22; 31:10) Ndipopa iye nthawe zentse ambacita naye bzinthu mwakudeka mtima na mwaulemu napo pa nthawe yomwe akucita malume ya pamphasa. Ndipopa iye an’dzamungingimiza lini kuti acite malume ya pamphasa mu njira yomwe ingamudekere lini ayai yomwe ingamucitise kubzibva wakusaya kulemekezedwa ne kucita cinthu comwe cingamunyantsire. f Kuthumizira bzimwebzi, mwamuna an’dzacitambo nyongo kuti aleke kucita bzinthu bzomwe bzingacitise kuti mtima wace umunese. — Mabasa 24:16.
18. N’ciyani comwe amuna an’funika kutsimikiza kucita? (Onani kwadru yakuti: “ Bzinthu Bzinai Bzomwe Bzingalatize Kuti Mwamuna Akulemekeza Mkazace.”)
18 Amuna, Yahova ambakomedwa kwene-kwene akakuwonani kuti mukucita nyongo yakulatiza kuti mumbalemekeza akazanu m’mafala na m’bzicito. Khalani wakutsimikiza kumbalemekeza akazanu ndipo lekani kucita bzinthu bzomwe bzingawasunamise. M’mbuto mwace, mbacitani nawo bzinthu mwakudeka mtima, mwaulemu na mwalufoyi. Mukacita tenepo, iwo an’dzakwanisa kuwona kuti mumbawafuna nakuti mumbawawona kuti mbakufunika. Mukambalemekeza akazanu, imwepo mun’dzapitiriza kukhala pa uxamwali na Yahova. — Salimo 25:14.
NYIMBO 131 “Comwe Mulungu Wacimanga Pabodzi”
a Nkhani yakuti “Kodi Mumbawona Akazi Ninga Momwe Yahova Ambawawonera?” yomwe iri mu Ntsanza ya Mulindiri ya Janeiro 2024 ingathandize kwene-kwene amuna.
b Penu mwanzanu wa m’banja ambakumenyani, nkhani yakuti “Mfundo Zothandiza Anthu Omwe Achitiridwa Nkhanza Zosiyanasiyana” yomwe iri pambali yakuti “Nkhani Zina” mu jw.org na mu JW Library® ingakuthandizeni kwene-kwene.
c KAFOTOKOZEDWE KA MAFALA MANANGO: “Mafala yakutukwana” ni mafala yentse yakuipa yomwe munthu angalewe na cakulinga cakusunamisa ayai kucitisa kuti munthu omwe akulewedwayo abzibve kuipa. Ndipo yambaphatanidzambo kulewa bzinthu bzomwe munthuyo ambakwanisa lini kucita ayai bzinthu bzomwe ambakomedwa lini nabzo kwa munthuyo. Ndipopa cinthu ciri-centse comwe mwamuna angalewe comwe cingakhale cakupasa manyazi, cakuipa ayai comwe cingasunamise mkazace cingacemeredwe mafala yakutukwana.
d Onani nkhani yakuti “Kuonera Zolaula Kungasokoneze Banja Lanu” mu jw.org na mu JW Library.
e Mkazi omwe mwamuna wace ambawona pornografia angathandizidwe kwene-kwene na nkhani yakuti: “Bzomwe Mungacite Penu Mwanzanu wa m’Banja Ambawona Pornografia” yomwe iri mu Ntsanza ya Mulindiri ya Agosto 2023.
f Bibliya limbalewa lini momwe malume ya pamphasa pakati pa mkazi na mwamuna yan’funika kucitidwira. Ndipopa tingalewe lini kuti bzomwe mwamuna na mkazi ambacita pa nthawe yakucita malume ya pamphasa mpsabwino ayai mpsakuipa. Pa nkhani ninga zimwezi, banja lacikristau ndiro lomwe lingasankhule momwe lingacitire. Tsono iwo an’funika kuwonesesa kuti bzomwe ambacitabzo bzimbakondwesa Yahova, wentse ambakomedwa nabzo ndipo bziniwacitisa lini kuti abzipase mulandu. Mabanja yangauze lini munthu nkhani zimwezi.
g BZOMWE BZIKUCITIKA PA CITHUNZI-THUNZI: M’bale munango omwe ali ku basa akuuzidwa na anzace kuti awone bukhu lomwe lina bzithunzi-thunzi bza pornografia.
