NKHANI YAKUPFUNZA 5
NYIMBO 108 Lufoyi la Mulungu Ndakukhulupirika
Bzisimbo Bzomwe Timbatambira Thangwe ra Lufoyi la Yahova
“Jezu adabwera pa dziko la pantsi kudzapulumusa anyapikado.” — 1 TIMOTIO 1:15.
CAKULINGA CA NKHANIYI
Tiniwona bzisimbo bzomwe timbakhala nabzo thangwe ra ntsembe yomwe Jezu adapereka na momwe tingalatizire kutenda Yahova.
1. Kodi tingakondwese tani Yahova?
TIYEZEZERE kuti imwepo mwapasa munthu omwe mumbamufuna mphaso yabwino kwene-kwene ndipo mphasoyo ingamuthandizembo munthuyo. Tsono munthuyo akuitenga aciyikoya mu kaxa ndipo akuiphatisa lini basa! Bzimwebzi bzingakusunamiseni kwene-kwene. Tsono mwakusiyana na bzimwebzi, munthuyo akaphatisa basa mphasoyo ndipo akakuuzani kuti akukomedwa nayo imwepo mungakomedwe kwene-kwene. Kodi nkhani imweyi ikubverana tani na ntsembe ya cakulombolera? Yahova adapereka Mwana wace kuti atipulumuse. Tenepo iye ambakomedwa kwene-kwene akawona kuti tikutenda mphaso imweyi pabodzi na lufoyi lomwe iye adalilatiza pakubvuma kuti Mwana waceyo adzatifere! — Juwau 3:16; Aroma 5:7, 8.
2. Kodi tin’pfunza ciyani mu nkhani ino?
2 Tsono pinango na kupita kwa nthawe, tingayebwe kuti cakulombolera ni mphaso yakufunika kwene-kwene yomwe Yahova adatipasa. Tikayebwa kuti Yahova adatipasa mphaso yabwinoyi bzingakhale ninga kuti tikutenga mphasoyo ticiikha pa mbuto yomwe tingakwanise lini kuikumbukira ayai kuiwona. Kuti bzimwebzi bzireke kucitika tin’funika kumbakumbukira bzomwe Yahova na Jezu adaticitira. Nkhani ino in’tithandiza kucita bzimwebzi. Tiniwona bzisimbo bzomwe tinabzo thangwe ra cakulombolera na bzomwe tin’dzakhala nabzo kutsogolo. Ndipo tiniwonambo bzomwe tingacite kuti tilatize kutenda lufoyi lomwe Yahova adatilatiza maka-maka zikakhala zikusala ntsiku zing’ono-ng’ono kuti Cikumbuso cicitike na pomwe cacitika kale.
BZISIMBO BZOMWE TINABZO TSAPANO
3. Kodi ni cisimbo cibodzi ciponi comwe tinaco tsapano thangwe ra cakulombolera?
3 Pana bzisimbo bzizinji bzomwe timbakhala nabzo ntsiku zino thangwe ra cakulombolera ca Jezu. Cisimbo cibodzi n’cakuti ntsembe ya cakulombolera ya Jezu imbacitisa kuti Yahova atilekerere pikado zathu. Iye ambacita lini kungingimizidwa kuti acite bzimwebzi. Iye ambafuna kutilekerera. Nyakunemba Salimo akhatenda kwene-kwene kulekerera kwa Yahova, ndipopa iye adalewa kuti: “Thangwe imwepo Yahova ndimwe wabwino, ndipo nthawe zentse ndimwe wakukonzeka kulekerera.” — Salimo 86:5; 103:3, 10-13.
4. Kodi cakulombolera cidaperekedwera yani? (Luka 5:32; 1 Timotio 1:15)
4 Wanthu winango angakumbuke kuti alibe kuthemera kulekereredwa na Yahova. Tsono cadidi n’cakuti tentsenefe tiribe kuthemera kulekereredwa. Mpostolo Paulo akhadziwa kuti iye “akhathemera lini kucemeredwa mpostolo.” Napo bziri tenepo, iye adalewa kuti: “Thangwe ra kudeka mtima kukulu kwa Mulungu, inepano ndine mpostolo.” (1 Akolinto 15:9, 10) Tikakungula pikado zathu Yahova ambatilekerera. Thangwe ranyi? Sikuti thangwe ra kuthemera, koma thangwe rakuti Yahova ambatifuna kwene-kwene. Tenepo imwepo mukasunama thangwe ra kukumbukira kuti ndimwe lini wakuthemera kulekereredwa na Yahova, kumbukirani kuti iye alibe kupereka ntsembe ya Mwana wace thangwe ra wanthu wakulungama. Iye adaipereka thangwe ra wanthu wa pikado kuti akakungula awalekerere. — Werengani Luka 5:32; 1 Timotio 1:15.
5. Kodi tin’funika kumbawona kuti Yahova akhafunika kutipasa cakulombolera?
5 Palibe munthu omwe an’funika kukumbuka kuti ngwakuthemera kubveredwa ntsisi na Yahova thangwe rakuti watumikira Yahovayo magole mazinji. N’cadidi kuti Yahova ambatenda ndipo ambakumbukira bzinthu bzomwe ifepano tamucitira. (Ahebereu 6:10) Tsono iye adapereka Mwana wace kwa ifepano ninga mphaso sikuti ninga pagamento ya basa lomwe ifepano tamucitira. Tenepo bzingakhale bzakuphonyeka kukumbuka kuti ndife wakuthemera kulekereredwa na Yahova thangwe rakuti tamucitira bzinthu bzizinji. Tikakumbuka tenepoyo bzingathandauze ninga kuti Jezu akhafunikira lini kutifera. — Ndendemezerani na Agalatiya 2:21.
6. Thangwe ranyi Paulo adacita nyongo yakucita bzizinji pakutumikira Yahova?
6 Paulo akhadziwa kuti Mulungu akhali lini wakungingimizidwa kuti amulekerere pikado zace. Tsono thangwe ranyi iye adacita bzizinji pakutumikira Yahova? Iye adacita bzimwebzi sikuti thangwe rakuti akhathemera kulekereredwa koma kuti alatize kuti akhatenda kudeka mtima komwe Yahova adamulatiza. (Aefezo 3:7) Ninga Paulo, ifepano timbacita bzizinji pakutumikira Yahova kuti tilatize kutenda kwathu lufoyi lomwe iye adatilatiza sikuti thangwe ra kufuna kulekereredwa pikado zathu.
7. Kodi ni cisimbo cinango ciponi comwe tinaco thangwe ra cakulombolera? (Aroma 5:1; Tiyago 2:23)
7 Cisimbo cinango comwe tinaco ntsiku zino thangwe ra ntsembe ya cakulombolera ya Jezu ni mwayi omwe tinawo wakukhala pa uxamwali bwakulimba na Yahova. a Ninga momwe tidawonera mu nkhani idapita ire, ifepano tikabadwa timbakhala tiri lini pa uxamwali na Mulungu. Tsono thangwe ra ntsembe ya cakulombolera ya Jezu timbakhala “pa mtendere na Mulungu” ticikhalambo pa uxamwali na iye. — Werengani Aroma 5:1; Tiyago 2:23.
8. Thangwe ranyi tin’funika kumbatenda mphaso ya mpembo yomwe Yahova adatipasa?
8 Phindu libodzi lomwe timbakhala nalo thangwe ra kukhala pa uxamwali na Yahova ndiro kupemba kwa iye. Yahova ambandotetekera lini mipembo yomwe timbacita tikakhala tiri pa mitsonkhano, koma iye ambabvambo mipembo yomwe ali-wentse wa ifepano ambacita akakhala ali payekha. Mpembo umbaderekhesa mtima wathu tikakhala tidasunama ndipo umbatithandizambo kuti tibzibve bwino. Tsono mpembo umbandotithandiza lini kubzibva bwino tikakhala kuti tidasunama, koma umbatithandizambo kuti tilimbise uxamwali bwathu na Mulungu. (Salimo 65:2; Tiyago 4:8; 1 Juwau 5:14) Pomwe Jezu akhali pa dziko la pantsi pano, iye akhapemba nthawe zentse thangwe akhadziwa kuti Yahova akhamutetekera ndipo iye akhadziwambo kuti mipembo ingadacitisa kuti uxamwali bwace na Yahova bupitirize kukhala bwakulimba. (Luka 5:16) Timbatenda kwene-kwene thangwe ra kudziwa kuti tingakwanise kukhala pa uxamwali na Yahova na kulewalewa naye mu mpembo thangwe ra ntsembe ya cakulombolera ya Jezu!
BZISIMBO BZOMWE TIN’DZAKHALA NABZO KUTSOGOLO
9. Kodi ni bzisimbo bziponi bzomwe atumiki wa Yahova an’dzakhala nabzo kutsogolo thangwe ra cakulombolera?
9 Kodi ni bzisimbo bziponi bzomwe atumiki wa Yahova an’dzatambira kutsogoloku thangwe ra ntsembe ya cakulombolera ya Jezu? Iwo an’dzatambira moyo wakusaya kumala. Wanthu azinji ambakumbuka kuti mpsakukwanisika lini kukhala na moyo wakusaya kumala thangwe rakuti wanthu ambafa kuyambira kale-kale. Tsono pomwe Yahova adalenga wanthu, cakulinga cace cikhali cakuti wanthuwo akhale na moyo wakusaya kumala. Adamu angadasaya kuphonya palibe munthu omwe angadakumbuka kuti mpsakukwanisika lini kukhala na moyo wakusaya kumala. Tsono napo kuti bzingatinese kubvesesa kuti munthu angakhale na moyo wakusaya kumala, ifepano tingakhulupire bzimwebzi thangwe tikudziwa kuti Yahova adapagali pereso yakuumira yomwe ni ntsembe ya cakulombolera ya Mwana wace kuti bzimwebzi bzikwanisike. — Aroma 8:32.
10. Kodi ni bzisimbo bziponi bzomwe anyakudzozedwa na Akristau wa mabira manango akudikhirira?
10 Moyo wakusaya kumala ni cisimbo comwe tin’dzatambira kutsogolo. Tsono Yahova akufuna kuti tibakakumbukireletu momwe moyoyo un’dzakhalira. Anyakudzozedwa akudikhirira kudzatambira moyo wakusaya kumala kudzulu nakuti adzatonge dzikoli pabodzi na Jezu. (Apokalipse 20:6) Akristau wa mabira manango akudikhirirambo kudzatambira moyo wakusaya mabvuto ne kuwawidwa pa dziko la pantsi pano. (Apokalipse 21:3, 4) Kodi imwepo mumbacita mbali ya wanthu omwe an’dzakhala na moyo wakusaya kumala pa dziko la pantsi? Lekani kukumbuka kuti mabaibai yamweya ni mang’ono pakuyandendemezera na wanthu omwe an’dzayenda kukakhala kudzulu. Yahova adalenga wanthu kuti akhale pa dziko la pantsi, ndipopa kukhala na moyo wakusaya kumala pa dziko la pantsi pano kun’dzakhala kwakudekeza kwene-kwene.
11-12. Kodi ni bzisimbo bziponi bzomwe tikufunisisa kudzakhala nabzo m’Paraizo? (Onani bzithunzi-thunzi.)
11 Kumbukirani momwe moyo un’dzakhalira m’Paraizo. Imwepo mun’dzacita lini pomwe mantha kuti mun’duwala ayai kufa. (Zaiya 25:8; 33:24) Yahova an’dzakupasani bzinthu bzentse bzabwino bzomwe imwepo mukufuna. Kodi n’ciyani comwe imwepo mukufuna kudzapfunza m’Paraizo? Kodi imwepo mukufuna kudzapfunza bzinthu bzizinji pakulewa bza bzirombo? Kodi mukufuna kudzapfunza kuimba mwakuphatisa basa bzakuimbira bzakusiyana-siyana? Kodi mukufuna kudzapfunza kudezenyali? M’Paraizo tin’dzafunikira wanthu omwe an’dzadezenyali momwe nyumba zin’funika kudzakhalira, anyakumanga na alimi. Tin’dzafunikirambo wanthu kuti adzaphike, kukonza bzinthu na kulima minda yomwe tin’dzakhala nayo. (Zaiya 35:1; 65:21) Imwepo mukadzatambira moyo wakusaya kumala, mun’dzakhala na nthawe yakucita bzentsenebzi na bzinango.
12 Ndokumbukirani momwe tin’dzakhalira wakukondwa tikadzatambira wale omwe adafa! (Mabasa 24:15) Ndokumbukiranimbo momwe bzin’dzakhalira bzabwino kupfunza bzinthu bzizinji pakulewa bza bzinthu bzomwe Yahova adalenga na kupfunzambo bzizinji bza Yahovayo. (Salimo 104:24; Zaiya 11:9) Kuthumizira bzimwebzi, imwepo mun’dzaphonya lini pomwe, mun’dzatumikira Yahova ndipo mun’dzafunikira lini pomwe kukumbira kuti mulekereredwe! Kodi mukuwona kuti bzina phindu kuluza bzinthu bzentsenebzi thangwe ra “bzinthu bza pikado bzakusaya kukhalisa”? (Ahebereu 11:25) Tin’dziwa kuti imwepo mukufuna lini bzimwebzi! Moyo wakusaya kumala omwe tin’dzakhala nawo un’dzakhala wabwino kwene-kwene kuposa cinthu ciri-centse comwe tingakhale naco m’dzikoli. Kumbukirani kuti Paraizo ni cinthu lini comwe tin’dzandokhala tikucidikhirira basi, koma in’dzafika nthawe yomwe tin’dzakhaladi m’Paraizomo. Bzimwebzi bzin’dzakwanisika thangwe Yahova adatifuna kwene-kwene mwakuti adapereka Mwana wace!
N’ciyani comwe mumbakomedwa naco kwene-kwene mukambakumbukira bzisimbo bzomwe mun’dzakhala nabzo mu dziko lipsa? (Onani ndime 11-12)
MBATENDANI LUFOYI LA YAHOVA
13. Kodi tingalatize tani kuti timbatenda mphaso ya cakulombolera? (2 Akolinto 6:1)
13 Kodi tingalatize tani kuti timbatenda ntsembe ya cakulombolera yomwe Yahova adatipasa? Mwa kuikha Umambo bwace pa mbuto yakuyamba pa moyo wathu. (Mateu 6:33) Thangwe ranyi tin’funika kucita bzimwebzi? Thangwe Jezu “adafera wanthu wentse, kuti wale omwe ana moyo, aleke kukhala na moyo kuti ambacite bzakufuna bzawo bzokha basi, koma ambacite kufuna kwa ule omwe adawafera, acilamusidwa.” (2 Akolinto 5:15) Yahova ngwakudeka mtima kwene-kwene ndipo ambatilekerera. Tikambacita bzentse bzomwe tingakwanise kuti timutumikire, timbalatiza kuti timbatenda bzinthu bzentse bzomwe iye ambaticitira. — Werengani 2 Akolinto 6:1.
14. Kodi timbalatiza tani kuti timbakhulupira malango ya Yahova?
14 Njira inango ya momwe tingalatizire kuti timbatenda lufoyi la Yahova ndiyo kuthemba malango yace ticimbayateweza. Kodi tingacite tani bzimwebzi? Pomwe tikucita bzakusankhula pa nkhani yakuyenda ku universidade ayai mtundu wa basa omwe tingaphate tin’funika kukumbukira bzomwe Yahova akufuna kuti ticite. (1 Akolinto 10:31; 2 Akolinto 5:7) Tikambacita bzakusankhula mwakubverana na momwe Yahova akufunira, cikhulupiro cathu, cidikhiro cathu na uxamwali bwathu na Yahova bzimbakula kwene-kwene. — Aroma 5:3-5; Tiyago 2:21, 22.
15. Kodi tingalatize tani kuti timbatenda Yahova pa nthawe ya Cikumbuso?
15 Njira inango yacitatu ya momwe tingalatizire kuti timbatenda lufoyi la Yahova ndiyo kuphatisa basa nthawe ya Cikumbuso kuti tilatize kwa Yahova kuti ntsembe ya cakulombolera njakufunika kwene-kwene kwa ifepano. Kuthumizira pa kukonzekera kuti tidzagumanike pa Cikumbuso, tingacemerembo winango kuti tidzakhale nawo pabodzi. (1 Timotio 2:4) Afotokozereni wanthuwo bzomwe bzin’kacitika pa Cikumbusoco. Ndipo bzingakhalembo bwino muciwalatiza mavidiyo ya msolo wakuti Thangwe Ranyi Jezu Adafa? na Mbakumbukirani Infa ya Jezu yomwe yali mu jw.org. Akulu an’funika kucita makonzedwe kuti adzacemerembo wale omwe adadjedjera mwauzimu. Ndokumbukirani cikondweso comwe cimbakhala ciripo kudzulu na pano pa dziko la pantsi bira m’bodzi wa Yahova omwe akhadataika akabwerera kwa iye! (Luka 15:4-7) Ndipopa pa Cikumbuso tin’funika lini kudzandomusa abale wathu okha basi, koma tin’funikambo kudzamusa wale omwe tawacemera kuphatanidzambo wale omwe akhadasiya kutsonkhana kwa magole mazinji. Tikufuna kuti iwo abzibve kuti atambiridwa! — Aroma 12:13.
16. Thangwe ranyi mpsabwino kucita bzizinji pa nthawe ya Cikumbuso?
16 Kodi imwepo mukufuna kucita bzizinji pomwe zikundosala ntsiku zing’ono-ng’ono kuti Cikumbuso cicitike na pomwe cacitika kale? Penu ndibzo, dziwani kuti imweyi ni njira yabwino yakulatizira kuti mumbatenda bzentse bzomwe Yahova adakucitirani. Tikambacita bzizinji mu utumiki tin’dzakwanisa kuwona kuti Yahova akutithandiza ndipo bzimwebzi bzin’dzaticitisa kuti timuthembe kwene-kwene. (1 Akolinto 3:9) Kuthumizira bzimwebzi, lekani kuyebwa kuteweza ndondomeko ya kuwerenga Bibliya pa nthawe ya Cikumbuso yomwe imbagumanika mu kabukhu kakuti Kupfunza Mavesi Ntsiku na Ntsiku ayai yomwe imbabwera mu kabukhu ka mitsonkhano ka pakati pa sumana. Imwepo mungasankhule kudzawerenga mavesi yamweya pa pfunziro lanu la pa mwekha.
17. N’ciyani comwe Yahova ambakomedwa naco? (Onani kwadru yakuti “ Bzomwe Tingacite Kuti Tilatize Kuti Timbatenda Lufoyi la Yahova.”)
17 Pinango thangwe ra momwe bzinthu bziriri pa moyo wanu mungakwanise lini kuphatisa basa nfundo zentse zomwe zafotokozedwa mu nkhani ino. Tsono kumbukirani kuti Yahova ambandendemezera lini bzomwe imwepo mumbacita na bzomwe wanthu winango ambacita. M’mbuto mwace, iye ambawona bzomwe bziri mu mtima mwanu ndipo ambakomedwa kwene-kwene akawona kuti mukulatiza kutenda mphaso ya cakulombolera yomwe iye adapereka. — 1 Samuyeli 16:7; Marko 12:41-44.
18. Thangwe ranyi timbatenda bzomwe Yahova na Jezu adaticitira?
18 Cakulombolera ndico comwe cimbacitisa kuti bzikhale bzakukwanisika kuti tilekereredwe pikado zathu, tikhale pa uxamwali na Yahova na kudzakhala na moyo wakusaya kumala kutsogolo. Ndipopa tin’funika kulatiza kuti timbatenda lufoyi la Yahova lomwe lidamucitisa kuti atipase bzisimbo bzimwebzi. (1 Juwau 4:19) Tin’funikambo kulatiza kuti timbatenda Jezu omwe adatifuna kwene-kwene mwakuti adapereka moyo wace thangwe ra ifepano! — Juwau 15:13.
NYIMBO 154 Lufoyi Limbamala Lini
a Yahova akhalekerera pikado za atumiki wace pomwe Jezu akhanati kupereka cakulombolera. Iye akhacita bzimwebzi thangwe akhana citsimikizo cakuti Mwana wace, Jezu, angadakhala wakukhulupirika mpaka kufika pa kufa. Ndipopa kwa Yahova cakulombolera cikhakhala ninga kuti cidaperekedwa kale napo kuti Jezu akhanati kufa. — Aroma 3:25.
