NKHANI YAKUPFUNZA 3
NYIMBO 35 ‘Tsimikizani Kuti Mpsiponi Bzinthu Bzakufunika Kwene-kwene’
Citani Bzakusankhula Bzomwe Bzimbakondwesa Yahova
“Kugopa Yahova ni ciyambi ca nzeru, ndipo kudziwa Wakucenesesa ni kubvesesa bzinthu.” — MIMWANI 9:10.
CAKULINGA CA NKHANIYI
Tiniwona momwe tingaphatisire basa nzeru, kubvesesa bzinthu na kuzindikira kuti ticite bzakusankhula bzanzeru.
1. N’ciyani comwe tentsenefe timbafunika kucita?
IFEPANO timbafunika kucita bzakusankhula ntsiku zentse. Bzakusankhula bzinango bzimbakhala bzakupusa. Ifepano tingasankhule bzomwe tin’funa kudya macibese ayai nthawe yakugona. Tsono bzakusankhula bzinango mpsakunesa kubzicita. Thangwe tikasankhula bwino, ifepano na banja lathu tingakhale na thanzi labwino, tingakhale wakukondwa ndipo tingatumikire bwino Yahova. Tsono tikasankhula kuipa, tingakhale na bvuto la thanzi, tingakhale lini wakukondwa ndipo bzingatinese kutumikira Yahova. Ndipopa tikufuna kuti bzakusankhula bzathu bzitibweresere phindu na kubwereserambo phindu wanthu wa m’banja mwathu. Ndipo cakufunika kwene-kwene n’cakuti tin’funa kuti bzakusankhula bzathubzo bzikondwese Yahova. — Aroma 12:1, 2.
2. Kodi ni bzinthu bziponi bzomwe bzingakuthandizeni kucita bzakusankhula bzanzeru?
2 Kuti ticite bzakusankhula bzanzeru, tin’funika (1) kubvesesa nkhani yentse, (2) kuwona momwe Yahova ambaiwonera nkhaniyo na (3) kukumbukira bwino-bwino bzomwe tin’funa kusankhulabzo. Nkhani ino in’fotokoza nfundo zitatu zimwezi ndipo in’tithandiza kuwona momwe tingaphatisire basa mphanvu yathu yakubvesesa bzinthu kuti ticite bzakusankhula bzanzeru. — Mimwani 2:11.
BVESESANI NKHANI YENTSE
3. Fotokozani ciratizo comwe cikuwonesa kuti mun’funika kubvesesa nkhani yentse pomwe mukanati kucita cakusankhula.
3 Cinthu cakuyamba comwe tin’funika kucita kuti ticite bzakusankhula bzanzeru ndico kubvesesa nkhani yentse. Thangwe ranyi bzimwebzi mpsakufunika? Tiyezezere kuti munthu omwe akuduwala wayenda ku xipitali ndipo akuuza dotolo kuti akubva lini bwino. Kodi dotoloyo angamunembere mankhwala munthuyo uko akanati kumupima ayai kumucita mibvunzo inango? Bzikuwonekeratu kuti ne. Cakuyamba dotoloyo aniyamba kumupima ayai kumucita mibvunzo inango pomwe akanati kumunembera mankhwala. Kuti imwepo mucite bzakusankhula bzanzeru, cakuyamba mun’funikambo kubvesesa nkhani yentse pakulewa bza cakusankhula comwe mun’funa kucitaco. Kodi mungacite tani bzimwebzi?
4. Mwakubverana na Mimwani 18:13, kodi imwepo mungatsimikizire tani kuti mukubvesesa nkhani yentse? (Onani cithunzi-thunzi.)
4 Imwepo mungabvesese nkhani yentse mukacita mibvunzo. Tiyezezere kuti mwacemeredwa ku festa. Kodi imwepo mungayende ku festako? Penu mumbamudziwa lini bwino-bwino munthu omwe wakucemerani ku festayo ayai mukudziwa lini bwino-bwino bzomwe bzin’kacitika kumweko, mungabvunze munthu omwe wakucemeraniyo mibvunzo ninga iyi: “Kodi festayo in’dzacitikira kuponi ndipo in’dzacitika lini? Kodi ni wanthu angasi omwe an’dzakhala alipo pa festapo? Mbani omwe an’dzanyang’anira festayo? Mbani omwe an’dzakhala alipo pa festapo? N’ciyani comwe cin’dzacitika pa festapo? Kodi pa festapo pan’dzamwedwa?” Mitawiro ya mibvunzo imweyi in’dzakuthandizani kuti mucite bzakusankhula bzanzeru. — Werengani Mimwani 18:13.
Bvesesani nkhani yentse mwakucita mibvunzo (Onani ndime 4) a
5. N’ciyani comwe mun’dzakwanisa kucita mukabvesesa nkhani yentse?
5 Mukakhala na mitawiro ya mibvunzo yentseneyi mun’dzakwanisa kubvesesa momwe bzinthu bzingadzakhalire pa festayo. Tsono tani penu mwadziwa kuti pa festapo pan’dzabwera wanthu omwe ambabvera lini mitemo ya m’Bibliya ayai kuti pan’dzakhala palibe munthu wakunyang’anira wanthu kuti aleke kumwa kwene-kwene? Kodi mukukwanisa kuwona ngozi yomwe ingakhale iripo pamwepa? (1 Pedru 4:3) Ayai tani penu nthawe yomwe in’citika festayo ni nthawe yomwe mumbayenda ku mitsonkhano ayai mu upalizi? Mukakwanisa kubvesesa nkhani yentse bzin’dzakhala bzakupusa kuti mucite cakusankhula ca nzeru. Tsono pana cinthu pomwe cinango comwe mun’funika kucita. Imwepo mwakwanisa kubvesesa nkhani yentse; tsono tanimbo Yahova, kodi akuiwona tani nkhaniyo? — Mimwani 2:6.
KUMBUKIRANI MOMWE YAHOVA AKUIWONERA NKHANIYO
6. Mwakubverana na Tiyago 1:5, thangwe ranyi tin’funika kupemba kuti Yahova atithandize?
6 Kumbirani Yahova kuti akuthandizeni kubvesesa momwe iye akuiwonera nkhaniyo. Yahova adalewa kuti an’dzatipasa nzeru kuti tikwanise kubvesesa penu bzakusankhula bzomwe tikucita bzikumukondwesa ayai ne. Iye ambapereka nzeruzo “na manja mawiri kwa wentse ndipo ambaperekambo mwakusaya kutombodzera.” — Werengani Tiyago 1:5.
7. N’ciyani comwe mungacite kuti mubvesese makumbukidwe ya Yahova? Fotokozani.
7 Mukamala kupemba kwa Yahova kuti akutsogolereni, khalani tceru kuti muwone momwe akukutawirirani. Tiyezezere kuti imwepo mwataika pomwe mukucita ulendo. Imwepo mungabvunze munthu omwe ali komwe muliko kuti akupanganizeni njira. Kodi imwepo mungayambe kuyenda uko munthuyo akanati kukuuzani ciri-centse? Mungacite lini bzimwebzo. Imwepo mungamutetekere bwino-bwino pomwe iye akukupanganizani. Mwakundendemerana na bzimwebzi, mukakumbira Yahova kuti akuthandizeni, yezerani kugumana mtawiro wa mpembo wanu mwa kunyang’ana malamulo na nfundo za m’Bibliya zomwe zikubverana na cakusankhula comwe mukufuna kucitaco. Pa nkhani ya festa yomwe tailewa kale ire, kuti mudziwe penu imwepo mungayende ku festako ayai ne, mungawone bzomwe Bibliya limbalewa pa nkhani ya mafesta ya baludya, kubverana na wanthu wakuipa na kuikha Umambo bwa Mulungu pa mbuto yakuyamba m’mbuto mwa bzakufuna bzanu. — Mateu 6:33; Aroma 13:13; 1 Akolinto 15:33.
8. N’ciyani comwe mungacite mukafuna thandizo kuti mugumane nkhani yomwe mukuinyang’ana? (Onani cithunzi-thunzi.)
8 Napo bziri tenepo, nthawe zinango mungafunike kuthandizidwa kuti mugumane nfundo zomwe mun’funa. Imwepo mungaphatise basa malango yomwe mungapasidwe na m’bale ayai mpfumakazi yakukhwima mwauzimu. Tsono imwepo mungagumanembo nfundo zakuthandiza mukambafufudza mwekha. Imwepo mungagumane nfundo zizinji m’mabukhu yathu yakufufudzira ninga Bukhu Lakufufudzira Nkhani la Mboni za Yahova na Malemba Othandiza pa Moyo wa Chikhristu. Tsono pomwe mukucita bzimwebzi, mbakumbukirani kuti cakulinga canu n’cakuti mucite cakusankhula comwe cimbakondwesa Yahova.
Kumbukirani momwe Yahova akuiwonera nkhaniyo (Onani ndime 8) b
9. Kodi tingadziwe tani penu bzomwe tasankhula kucita bzingakondwese Yahova? (Aefezo 5:17)
9 Kodi tingatsimikizire tani kuti bzomwe tasankhula Yahova an’komedwa nabzo? Cinthu cakuyamba comwe tin’funika kucita ndico kumudziwa bwino Yahovayo. Bibliya limbati: “Kudziwa Wakucenesesa ni kubvesesa bzinthu.” (Mimwani 9:10) Mafala yamweya yakuthandauza kuti nzeru zimbabwera thangwe ra kudziwa makhalidwe ya Yahova, cakulinga cace, bzomwe iye ambafuna na bzomwe ambawenga. Ndipopa bzibvunzeni kuti: ‘Pakuti nimbamudziwa bwino Yahova, kodi ni cakusankhula ciponi comwe cingamukondwese?’ — Werengani Aefezo 5:17.
10. Thangwe ranyi kuteweza mitemo ya m’Bibliya n’kwakufunika kwene-kwene kuposa kuteweza cikhalidwe ca komwe timbakhala?
10 Nthawe zinango, bzakusankhula bzomwe tingacite kuti tikondwese Yahova, bzingasunamise adzinza wathu. Abereki omwe akufuna kuti mwana wawo wacikazi akhale na moyo wabwino, angangingimize mwanayo kuti alowodwe na mwamuna wakudala ayai omwe angawapagali kobiri zizinji za lobolo napo kuti mwamunayo ngwakuwofoka mwauzimu. N’cadidi kuti iwo akufuna kuti mwana wawo aleke kubonera, tsono mbani an’dzamuthandiza kuyenda patsogolo mwauzimu? Kodi Yahova akuiwona tani nkhani imweyi? Tingagumane mtawiro pa Mateu 6:33. Pamwepa Jezu akulimbikisa Akristau kuti aikhe “Umambo bwa Mulungu . . . pa mbuto yakuyamba.” Napo kuti timbalemekeza abereki wathu na wanthu wa komwe timbakhala, cinthu cakufunika kwene-kwene kwa ifepano ndico kukondwesa Yahova.
KUMBUKIRANI BWINO-BWINO BZOMWE MUN’FUNA KUSANKHULA
11. Kodi ni khalidwe liponi lomwe likufotokozedwa pa Afilipi 1:9, 10 lomwe lin’dzakuthandizani kukumbukira bwino-bwino bzomwe mukufuna kusankhula?
11 Kuthumizira pa kuphatisa basa nfundo za m’Bibliya pomwe mukufuna kucita cakusankhula, cinthu cinango comwe mun’funika kucita ndico kukumbukira bwino-bwino bzomwe mun’funa kusankhulabzo. (Werengani Afilipi 1:9, 10.) Khalidwe la kuzindikira ndakufunika kwene-kwene thangwe lin’dzakuthandizani kudziwa bzomwe mungadzagumane nabzo pa cakusankhula comwe mungacite. Nthawe zinango pangakhale na cakusankhula cakupusa kucicita. Tsono n’bzakusankhula lini bzentse bzomwe bzidapusa kubzicita. Kuzindikira kun’dzakuthandizani kuti mucite bzakusankhula bzanzeru napo pa nkhani zakunesa.
12-13. Kodi kuzindikira kun’dzakuthandizani tani kucita cakusankhula ca nzeru pomwe mukunyang’ana basa?
12 Tiyezezere tenepa. Imwepo mukunyang’ana basa kuti muthandize banja lanu. Pagumanika mabasa mawiri. Imwepo mwakumbukira bzentse pakulewa bza mabasayo. Mwabvunza nthawe yomwe mun’dzamala mukuphata basa, mwawona nthawe yomwe mun’dzamala mukumbayenda ku basako na bzinthu bzinango. Mwawona kuti mabasa yentseneyo yali bwino thangwe yakupitana lini na mitemo ya m’Bibliya. Tsono mwasankhula basa libodzi pinango thangwe ra kukomedwa na basalo ayai thangwe rakuti mun’dzatambira kobiri zizinji. Pana bzinthu bzinango pomwe bzomwe mun’funika kubzikumbukira pomwe mukanati kucita cakusankhula.
13 Kodi basalo lin’dzakutazisani lini kufika pa mitsonkhano nthawe zentse? Kodi basalo lin’dzakucitisani lini kuti musaye nthawe yakuceza na banja lanu na kucita bzinthu bzauzimu na banja lanulo? Kubzicita mibvunzo ninga imweyi kun’dzakuthandizani kuti muikhe bzinthu “bzakufunika pa mbuto yakuyamba” bzomwe ni kutumikira Yahova na kuthandiza banja lanu m’mbuto mwa kuikha bzinthu bzakuthupi pa mbuto yakuyamba. Mukacita bzimwebzi, Yahova an’dzasimba cakusankhula comwe mun’dzacita.
14. Kodi kuzindikira na kufuna anzathu bzin’dzatithandiza tani kuti tileke kusunamisa winango?
14 Kuzindikira kun’dzatithandizambo kuti tikumbukire momwe wanthu winango angawonere bzakusankhula bzathu kuti tileke “kukhukhumudwisa winango.” (Afilipi 1:10) Bzimwebzi mpsakufunika tikakhala tikucita bzakusankhula pa nkhani ya bzakubvala na kubzidekesa. Pinango ifepano tingakomedwe na mtundu unango wa bzakubvala ayai kubzidekesa. Tsono tani penu wanthu winango wa m’gwere ayai wa kunja kwa gwere akukomedwa lini na kabvalidwe kathuko ayai na kubzidekesa kwathuko? Kuzindikira kun’dzatithandiza kuti tilemekeze momwe iwo akubvera. Lufoyi lin’dzaticitisa kuti timbacite bzinthu “bzakudekerambo winango” na kukhala wakubzicepesa. (1 Akolinto 10:23, 24, 32; 1 Timotio 2:9, 10) Tikacita bzimwebzi, tin’dzacita cakusankhula comwe cin’dzalatiza kuti timbafuna anzathu ndipo timbawalemekeza.
15. N’ciyani comwe mun’funika kukumbukira pomwe mukanati kucita cakusankhula cikulu?
15 Imwepo mukafuna kucita cakusankhula cikulu, mbakumbukirani bzomwe mun’dzafunika kucita kuti mucite bzinthu mwakubverana na bzomwe mwasankhulabzo. Jezu adatilimbikisa kuti tinati kucita cakusankhula, tin’funika ‘kuyamba kukhala pantsi’ kuti tiwone penu tin’kwanisa kucita cinthuco. (Luka 14:28) Ndipopa pomwe mukanati kucita cakusankhula, cakuyamba mun’funika kukumbukira nthawe, bzinthu bzomwe mun’dzadzonga na nyongo yomwe mun’dzafunika kucita kuti cakusankhulaco cifambe bwino. Nthawe zinango bzingakhale bwino kuuzambo wanthu wa m’banja mwanu bza cakusankhulaco kuti ali-wentse awone bzomwe angacite kuti akuthandizeni. Thangwe ranyi bzimwebzi mpsakufunika? Thangwe bzin’dzakuthandizani kuzindikira bzinthu bzinango bzomwe mungafunike kucinja ayai bzingakupaseni mwayi wakuti muphatise basa nzeru yomwe mungapasidwe. Ndipo imwepo mukauza adzinza wanu bzinthu bzomwe mun’funa kucita na kutetekera malango yomwe iwo angakupaseni, iwo an’dzakhala wakukonzeka kukuthandizani pa cakusankhula canuco. — Mimwani 15:22.
MUKASANKHULA BZINTHU MWA NZERU BZINTHU BZIN’DZAKUFAMBIRANI BWINO
16. Kodi ni nfundo ziponi zomwe zin’dzakuthandizani kuti bzomwe mwasankhula bzikufambireni bwino? (Onani kwadru yakuti “ Bzomwe Bzingakuthandizeni Kuti Mucite Bzakusankhula Bzanzeru.”)
16 Penu imwepo mukufuna kucita cakusankhula ndipo mwateweza malango yomwe tacezeranaya, dziwani kuti ndimwe wakukonzeka kucita cakusankhula ca nzeru. Imwepo mwabvesesa nkhani yentse ndipo mwawona nfundo za m’Bibliya zomwe zin’dzakuthandizani kucita cakusankhula comwe cingakondwese Yahova. Mukamala kucita bzimwebzi, ndiye kuti tsapano mungakumbire Yahova kuti akuthandizeni kuti bzomwe mukufuna kucitabzo bzifambe bwino.
17. Kodi n’ciyani comwe cingakuthandizeni kucita bzakusankhula bzabwino?
17 Napo kuti mudacita kale bzakusankhula bzizinji m’mbuyomu ndipo bzidakufambirani bwino, kumbukirani kuti cinthu cakufunika comwe cingakuthandizeni kuti mucite bzakusankhula bzanzeru ndico kuthemba nzeru zakucokera kwa Yahova m’mbuto mwa kuthemba nzeru zanu ayai bzinthu bzomwe mumbadziwa kale. Yahova ndiye yekha omwe angakupaseni nzeru zacadidi, kubvesesa bzinthu na kuzindikira. (Mimwani 2:1-5) Yahova angakuthandizeni kucita bzakusankhula bzomwe bzingamukondwese. — Salimo 23:2, 3.
NYIMBO 28 Kukhala Xamwali wa Yahova
