NKHANI YAKUPFUNZA 4
NYIMBO 18 Tinkutenda Cakulombolera
Kodi Cakulombolera Cimbatipfunzisa Ciyani?
“Mulungu adalatiza lufoyi lace.” — 1 JUWAU 4:9.
CAKULINGA CA NKHANIYI
Momwe cakulombolera cimbalatizira makhalidwe yabwino yomwe Yahova na Jezu anayo.
1. Thangwe ranyi mpsakufunika kwa ifepano kugumanika pa Cikumbuso gole liri-lentse?
YAHOVA adatipasa mphaso yabwino kwene-kwene pomwe adatumiza Mwana wace kuti adzatifere! (2 Akolinto 9:15) Thangwe ra Jezu, ifepano tingakhale pa uxamwali bwakulimba na Yahova ndipo tingakhalembo na mwayi wakudzakhala na moyo wakusaya kumala. Tina mathangwe mazinji yakutendera Yahova thangwe ra kutipasa cakulombolera comwe cimbalatiza kuti ambatifuna kwene-kwene! (Aroma 5:8) Kuti atithandize kupitiriza kulatiza kutenda kwathu cakulomboleraco, Jezu adatiuza kuti timbakumbukire infa yace gole liri-lentse. — Luka 22:19, 20.
2. Kodi tin’cezerana ciyani mu nkhani ino?
2 Gole lino, Cikumbuso cin’dzacitika pa sabudu 12 Abril, 2025. Kulewa cadidi, tentsenefe tikukonzekera kuti tidzagumanikembo pa ntsiku imweyi. Tin’dzagumana phindu kwene-kwene tikapambula nthawe pomwe Cikumbusoco cikanati kucitika na pomwe cacitika kale kuti tikumbukire a bzomwe Yahova na Jezu adaticitira. Mu nkhani ino, tiniwona bzomwe cakulombolera cimbatipfunzisa pakulewa bza Yahova na Mwana wace, Jezu. Mu nkhani yomwe ikubwerayi, tin’dzawona phindu lomwe tingakhale nalo thangwe ra cakulombolera na momwe tingalatizire kutenda kwathu.
KODI CAKULOMBOLERA CIMBATIPFUNZISA CIYANI BZA YAHOVA?
3. Kodi bzingakwanisike tani kuti ntsembe ya munthu m’bodzi ipulumuse wanthu azinji? (Onani cithunzi-thunzi.)
3 Cakulombolera cimbatipfunzisa kuti Yahova ni Mulungu omwe ambacita bzinthu mwacirungamo. (Deuteronomiyo 32:4) Mwa njira iponi? Kumbukirani ibzi: Pomwe Adamu alibe kubvera Mulungu, iye adakhala na pikado ndipo adafa. Pakuti ifepano ndife wana wa Adamuyo, tina pikado ndipo timbafambo. (Aroma 5:12) Kuti atitsudzule ku pikado na infa, Yahova adatuma Jezu kuti abwere kudzatifera. Tsono bzingadakwanisika tani kuti cakulombolera ca munthu m’bodzi wakulungama cilombole wanthu azinji? Mpostolo Paulo adalewa kuti: “Pakuti kuphonya kwa munthu m’bodzi [Adamu] kudacitisa kuti wanthu azinji akhale na pikado, tenepo kubverambo kwa munthu m’bodzi [Jezu] kun’dzacitisa kuti wanthu azinji adzakhale wakulungama.” (Aroma 5:19; 1 Timotio 2:6) Kulewa kunango, Paulo akhalewa kuti wanthu wentse ana pikado ndipo ambafa thangwe ra kusaya kubvera kwa munthu m’bodzi wakulungama. Ndipopa kuti titsudzulidwe ku pikado na infa pakhafunikambo munthu m’bodzi wakulungama kuti abvere Mulungu.
Thangwe ra munthu m’bodzi omwe ni Adamu tentsenefe tina pikado ndipo timbafa, tsono thangwe ra munthu m’bodzi omwe ni Jezu tentsenefe tingatsudzulidwe ku pikado na infa (Onani ndime 3)
4. Thangwe ranyi Yahova alibe kundolekerera kuti wana wakubvera wa Adamu akhale na moyo mpaka kale-kale?
4 Kodi Jezu akhafunikiradi kufa kuti atipulumuse? Thangwe ranyi Yahova alibe kundobvuma kuti wana wakubvera wa Adamu akhale na moyo wakusaya kumala? Kwa wanthu wakuperewerafe tingawone ninga kuti imweyi ikhali njira yabwino yakumalisira mabvuto. Tsono kwa Yahova, kucita bzimwebzi kungadalatiza lini kuti iye ambacita bzinthu mwacirungamo. Kucita bzimwebzi kungadakhala ninga kuti pikado ya Adamu ikhali lini ikulu ndipo wana wace angadakhala ninga kuti alibe pikado.
5. Thangwe ranyi tingakhale na citsimikizo cakuti, nthawe zentse, Yahova an’dzacita bzinthu mwacirungamo?
5 Yahova angadaleka kupereka cakulombolera acindobvuma kuti wana wa Adamu akhale na moyo wakusaya kumala napo kuti akhali wakuperewera bzingadalatiza kuti nthawe zinango iye ambacita lini bzinthu mwacirungamo. Bzimwebzi bzingadacitisa wanthu kukumbuka kuti iye angacinje bzinthu bzomwe adalewa kuti an’dzacita. Ndipo bzingadacitisambo wanthuwo kukumbuka kuti iye an’dzacita lini bzomwe adapicira kudzacita kutsogolo. Tsono ifepano tin’funika lini kucita thupo na bzimwebzi. Thangwe ranyi? Thangwe Yahova adalatiza kuti ambacita bzinthu mwacirungamo mwa kupereka Mwana wace, Jezu, ninga ntsembe. Ndipopa tingakhale na citsimikizo cakuti nthawe zentse iye an’dzacita bzinthu mwacirungamo.
6. Kodi cakulombolera cimbatithandiza kubvesesa ciyani? (1 Juwau 4:9, 10)
6 Cakulombolera cimbandotithandiza lini kokha kubvesesa kuti Yahova ambacita bzinthu mwacirungamo, koma cimbatithandizambo kubvesesa kuti iye ambatifuna kwene-kwene. (Juwau 3:16; werengani 1 Juwau 4:9, 10.) Ndipo cakulombolera cimbandolatizambo lini kuti Yahova akufuna kuti tikhale na moyo wakusaya kumala basi, koma cimbalatizambo kuti iye akufuna kuti ticite mbali ya banja lace. Kumbukirani kuti pomwe Adamu adacita pikado, Yahova adamucosa m’banja lace. Thangwe ra bzimwebzo, tentsenefe timbabadwira kunja kwa banja la Mulungu. Tsono pakuti cakulombolera cidaperekedwa, wanthu wentse omwe an’khulupira Mulungu na kumubvera angadzakhale pomwe m’banja la Mulungu. Napo tsapano Yahova angalekerere pikado zathu ndipo tingakhale pa uxamwali bwakulimba na iye pabodzi na abale na mpfumakazi zathu. Kulewa cadidi, Yahova ambatifuna kwene-kwene! — Aroma 5:10, 11.
7. Kodi kubonera komwe Jezu adacita kumbalatiza tani kuti Yahova ambatifuna?
7 Tingakwanise kubvesesa bwino-bwino momwe Yahova ambatifunira tikakumbukira momwe iye adabvera kuwawa pomwe adawona Mwana wace akuphedwa. Sathani adalewa kuti palibe mtumiki ali-wentse wa Yahova omwe an’dzapitiriza kukhala wakukhulupirika kwa Yahovayo bzinthu bzikafika pakumunesa. Kuti alatize kuti bzomwe Sathani adalewa mpsakunama, Yahova adalekerera kuti Mwana wace Jezu abonere pomwe akhanati kufa. (Djobi 2:1-5; 1 Pedru 2:21) Yahova akhawona pomwe wanthu akhatukwana Jezu, pomwe acikunda akhamumenya na pomwe akhamukhomerera pa muti. Ndipo iye akhawonambo pomwe Mwana wace akhabva kuwawa kwene-kwene pa muti pale mpaka kufika pakufa. (Mateu 27:28-31, 39) Yahova akhana mphanvu yakucitisa kuti bzimwebzi bzileke kucitika. Pomwe wanthu adalewa kuti: “Musiyeni Mulungu waceyo amupulumuse penu ambamufunadi,” iye angadapulumusadi Jezu. (Mateu 27:42, 43) Tsono iye angadacita bzimwebzo, cakulombolera cingadaperekedwa lini ndipo ifepano tingadakhala tiribe cidikhiro. Ndipopa Yahova adalekerera kuti Mwana wace abonere kwene-kwene mpaka kufa.
8. Kodi timbakwanisa tani kudziwa kuti Yahova bzidamuwawa kwene-kwene pomwe Mwana wace akhaboneresedwa? (Onani cithunzi-thunzi.)
8 Tin’funika lini kumbakumbuka kuti pakuti Mulungu ni Mkululetu bzimbamuwawa lini akawona bzinthu bzakuipa bzikucitika! Mulungu adatilenga kuti timbawawidwe mu mtima tikambawona cinthu cakuipa cikucitika. Pakuti tidalengedwa m’cifanikiso cace, tingalewe kuti Yahova ambawawidwambo mu mtima akawona cinthu cakuipa cikucitika. Bibliya limbalewa kuti Mulungu nthawe zinango ‘ambakalipambo’ ndipo ‘ambasunama.’ (Salimo 78:40, 41) Mbatikumbukireni nkhani ya Abulahamu na Izaki. Imwepo mukukumbukira kuti Yahova adauza Abulahamu kuti apereke mwana wace ninga ntsembe. (Genesesi 22:9-12; Ahebereu 11:17-19) Kodi mukukumbuka kuti Abulahamu adabva tani pomwe akhakonzeka kuti aphe mwana wace na cisu? Iye akhawawidwa kwene-kwene. Mpsibodzi-bodzimbo na Yahova. Iye adawawidwa kwene-kwene pomwe adawona Mwana wace akuboneresedwa na wanthu wakuipa acifika pa kuphedwa! — Onani mu jw.org vidiyo yakuti Tewezerani Cikhulupiro Cawo — Abalahamu, Mbali 2.
Yahova adabva kuwawa kwene-kwene pomwe akhawona Mwana wace akubonera (Onani ndime 8)
9. N’ciyani comwe tikupfunza pa Aroma 8:32, 38, 39 pakulewa bza lufoyi la Yahova?
9 Cakulombolera cimbalatiza kuti Yahova ambatifuna kwene-kwene kuposa momwe munthu wa m’banja mwathu ayai xamwali wathu wa ponda ndipondembo ambatifunira. (Werengani Aroma 8:32, 38, 39.) Tingakhale na citsimikizo cakuti Yahova ambatifuna kwene-kwene kuposa momwe timbabzifunira tekha. Kodi imwepo mukufuna kukhala na moyo wakusaya kumala? Yahova akufunisisa kwene-kwene kuti imwepo mukhale na moyo wakusaya kumala kuposa momwe imwepo mukufunira. Kodi imwepo mukufuna kulekereredwa pikado zanu? Yahova akufunisisa kulekerera pikado zanu kuposa momwe imwepo mukufunira. Bzomwe iye akufuna mpsakuti tibvume cakulombolera mwakulatiza cikhulupiro na kukhala wakubvera. Cakulombolera ni mphaso yabwino kwene-kwene yomwe imbalatiza kuti Yahova ambatifuna. Mu dziko lipsa, tin’dzapfunza bzinthu bzinango bzizinji bzomwe Yahova adacita bzomwe bzimbalatiza kuti ambatifuna. — Mpalizi 3:11.
KODI CAKULOMBOLERA CIMBATIPFUNZISA CIYANI BZA JEZU?
10. (a) Kodi Jezu akhana thupo na ciyani pakulewa bza infa yace? (b) Kodi Jezu adalatiza tani kuti Sathani ngwakunama? (Onani kwadru yakuti “ Kukhulupirika kwa Jezu Kudalatiza Kuti Sathani Ngwakunama.”)
10 Jezu ambacita thupo kwene-kwene na mbiri ya Pai wace. (Juwau 14:31) Pomwe iye akhanati kufa, adanamiziridwa kuti adanyoza Mulungu nakuti akhali kapondo. Bzomwe wanthu akhamunamizirabzo bzikhamucitisa thupo kwene-kwene thangwe bzingadacitisa kuti wanthu amuwone kuipa Pai waceyo. Ndipopa iye adapemba kuti: “Baba, penu mpsakukwanisika, kopo iyi indipitirire.” (Mateu 26:39) Jezu adapitiriza kukhala wakukhulupirika mpaka kufa kwace, ndipopa iye adakwanisa kulatiza kuti Sathani ngwakunama.
11. Kodi Jezu adalatiza tani kuti akhafuna kwene-kwene wanthu? (Juwau 13:1)
11 Cakulombolera cimbatipfunzisambo kuti Jezu ambacita thupo kwene-kwene na wanthu, koma maka-maka na anyakupfunza wace. (Mimwani 8:31; werengani Juwau 13:1.) Pomwe Jezu akhacita utumiki bwace, iye akhadziwa kuti angadagumana na mabvuto yakunesa kwene-kwene kuphatanidzambo infa yakuwawa. Tsono iye adakwanirisa utumiki bwace napo kuti bzikhali bzakunesa thangwe rakuti akhafuna kwene-kwene wanthu, sikuti thangwe rakuti adacita kuuzidwa na Pai wace. Iye adalatiza kuti akhafuna kwene-kwene wanthu mwa kuwapalizira, kuwapfunzisa na kuwathandiza pa bzomwe iwo akhafunikira. Napo pa ntsiku yomwe angadaphedwa, Jezu adapambula nthawe kuti atsuke minyendo ya apostolo wace, kuwapasa malango na kuwalimbikisa. (Juwau 13:12-15) Ndipo pomwe akhadakhomereredwa pa muti, Jezu adapasa cidikhiro kapondo omwe akhali pambali pace mwa kumuuza kuti angadadzakhala m’Paraizo, ndipo adalatizambo kuti akhacita thupo kwene-kwene na mai wace mwakukumbira Juwau kuti awasamalire. (Luka 23:42, 43; Juwau 19:26, 27) Bzimwebzi bzikulatiziratu kuti Jezu akhafuna kwene-kwene wanthu sikuti mwakundopereka moyo wace okha, koma na bzentse bzomwe iye adacita pomwe akhali pa dziko la pantsi pano.
12. Kodi Jezu akupitiriza kuticitira ciyani?
12 N’cadidi kuti Jezu adafa “kabodzi kokha mpaka kale-kale,” koma iye akupitiriza kuticitira bzinthu bzizinji kwene-kwene. (Aroma 6:10) N’ciyani comwe iye akucita? Iye akupitiriza kuphata basa kuti atipase bzinthu bzentse bzabwino bzomwe tsapano mpsakukwanisika thangwe ra cakulombolera. Iye akutumikira ninga Mambo, Mkulu wa Antsembe na msolo wa gwere. (1 Akolinto 15:25; Aefezo 5:23; Ahebereu 2:17) Iye adapasidwa basa la kutsonkhanisa anyakudzozedwa na wa thimu likulu, ndipo basa limweri lin’dzamala pomwe citsautso cikulu cikanati kumala. b (Mateu 25:32; Marko 13:27) Iye akuphatisambo basa kapolo wakukhulupirika na wanzeru kuti atipase cakudya cauzimu kuti tipitirize kutumikira Yahova mwakukhulupirika mu ntsiku zakumalizira zino. (Mateu 24:45) Ndipo m’magole 1000 yomwe iye an’dzakhala akutonga an’dzapitiriza kutithandiza. Pomwe Yahova adapereka Mwana wace alibe kumupereka kuti adzatifere basi, koma kuti adzaticitirembo bzinthu bzizinji kwene-kwene!
PITIRIZANI KUMBAPFUNZA BZINTHU BZIPSA
13. N’ciyani comwe cingakuthandizeni kupfunza bza lufoyi lomwe Yahova analo kwa ifepano?
13 Mungakwanise kupfunza bzizinji bza lufoyi lomwe Yahova na Jezu analo kwa imwepo mukambakumbukira bzinthu bzentse bzomwe iwo adakucitirani mpaka pano. Zikasala ntsiku zing’ono-ng’ono kuti Cikumbuso cicitike na pomwe cacitika kale, imwepo mungawerenge mabukhu manai yomwe yambalewa bza moyo wa Jezu. Tsono lekani kumbawerenga makapitulo mazinji kwene-kwene pa nthawe ibodzi. Ndipo lekanimbo kumbawerenga mwakuthamanga. Mbayezerani kugumana mathangwe manango yomwe yangakucitiseni kuti mufune Yahova na Jezu. Ndipo lekani kuyebwa kumbauzambo wanthu winango bzomwe mwapfunza pomwe mukhawerengapo.
14. Kodi kufufudza kungatithandize tani kupitiriza kupfunza bza cakulombolera na nkhani zinango? (Salimo 119:97) (Onani cithunzi-thunzi.)
14 Penu imwepo mudabatizidwa kale-kale, pinango mungakumbuke kuti palibe bzinthu bzipsa bzomwe mungapfunze pakulewa bza cirungamo ca Mulungu, lufoyi lace na cakulombolera. Tsono kulewa cadidi, nthawe zentse bzimbakhala bziripo bzinthu bzipsa bzomwe tingapfunze pa nkhani zimwezi. N’ciyani comwe imwepo mungacite? Werengani na kupfunza nkhani zakucokera m’Bibliya zomwe ziri m’mabukhu yathu. Imwepo mukawerenga nkhani inango m’Bibliya mucisaya kuibvesesa, fufudzani kuti muibvesese. Ndipo pomwe mukucita mabasa yanu ya ntsiku na ntsiku, kumbukirani bzomwe mwapfunza pakulewa bza Yahova, Mwana wace na lufoyi lomwe iwo analo kuna imwepo. — Werengani Salimo 119:97.
Napo kuti tina magole mazinji tiri n’cadidi, tingapitirize kucita bzizinji kuti tilatize kuti timbatenda ntsembe ya cakulombolera (Onani ndime 14)
15. Thangwe ranyi tin’funika kupitiriza kupfunza bzinthu bzipsa bza m’Bibliya?
15 Lekani kubwerera m’mbuyo mukasaya kugumana nfundo ipsa ayai yakudekeza pomwe mukuwerenga Bibliya ayai pomwe mukufufudza. Imwepo muli ninga munthu omwe akucera oro. Kazinji-kazinji munthu omwe ambacera oro ambamala nthawe izinji ayai ntsiku zizinji akucera oroyo ndipo nthawe zinango ambandogumana tuoro tung’ono-tung’ono basi. Napo bziri tenepo, iye ambabwerera lini m’mbuyo thangwe ambadziwa kuti kaoro kali-kentse n’kakufunika kwa iye. Kwa ifepano, cadidi comwe timbacigumana m’Bibliya n’cakufunika kwene-kwene kuposa oro! (Salimo 119:127; Mimwani 8:10) Ndipopa khalani wakupirira ndipo lekani kusiya kunyang’ana bzinthu bzipsa m’Bibliya. — Salimo 1:2.
16. Kodi tingatewezere tani Yahova na Jezu?
16 Pomwe mukupfunza, onani momwe mungaphatisire basa bzomwe mukupfunzabzo pa moyo wanu. Imwepo mungatewezere cirungamo ca Yahova mwakumbacita bzinthu na winango mwakusaya tsankhulo. Imwepo mungatewezerembo lufoyi lomwe Jezu analo kwa Yahova na kwa wanthu mwakukhala wakukonzeka kucita bzomwe Yahova ambafuna na kuthandiza winango napo kuti nthawe zinango kucita bzimwebzo kungakhale kwakunesa. Ndipo mungatewezerembo Jezu mwa kupalizira wanthu kuti akhale na mwayi wakudziwa bzinthu bzabwino bzomwe Yahova akucitira wanthu acikhulupirambo cakulombolera.
17. Kodi tin’dzapfunza ciyani mu nkhani ikubwerayi?
17 Tikambapfunza bza cakulombolera na kulatiza kutenda mphaso imweyi, lufoyi lathu kwa Yahova na Jezu lin’dzathumizirika. Ndipo bzimwebzi bzin’dzacitisambo kuti Yahova na Jezu atifune kwene-kwene. (Juwau 14:21; Tiyago 4:8) Na tenepo, mbatipitirizeni kuphatisa basa bzinthu bzakufufudzira bzomwe Yahova adatipasa kuti tipfunze bzizinji pakulewa bza cakulombolera. Mu nkhani yomwe ikubwerayi, tin’dzawona bzisimbo bzomwe tinabzo na bzomwe tin’dzakhala nabzo thangwe ra cakulombolera na momwe tingalatizire kuti timbatenda lufoyi la Yahova.
NYIMBO 107 Yahova ni Ciratizo Cabwino ca Lufoyi
a KAFOTOKOZEDWE KA MAFALA MANANGO: “Kukumbukira” kumbathandauza kuikha makumbukidwe yathu pa nkhani inango na kufufudza bzizinji pakulewa bza nkhaniyo na cakulinga cakufuna kuibvesesa bwino.
b Pa Aefezo 1:10 Paulo adalewa bza kutsonkhanisa “bzinthu bza kudzulu.” Pa Mateu 24:31 na Marko 13:27, Jezu adalewa bza kutsonkhanisa “anyakusankhulidwa.” Paulo na Jezu akulewa bza bzinthu bziwiri bzakusiyana. Paulo adalewa bza nthawe yomwe Yahova ambasankhula wale omwe an’dzakatonga na Jezu kudzulu aciwadzoza na mzimu wakucena. Tsono Jezu akulewa bza nthawe yomwe anyakudzozedwa omwe akali pa dziko la pantsi an’dzatsonkhanisidwa aciyenda kudzulu pa citsautso cikulu.
