1. Kodi n’ciyani comwe wanthu azinji ambacita ntsiku zino?

 PINANGO imwepo mudawona kale kuti wanthu azinji ntsiku zino ambafuna kwene-kwene kubziwonesera. Iwo ambaphatisa basa njira zakucezera za pa interneti kuti abziwonesere na kuwonesa wanthu bzinthu bzomwe akwanisa kucita. Ndipopa ni wanthu ang’ono-ng’ono omwe ambapereka ulemerero kwa Yahova Mulungu. Mu nkhani ino, tiniwona kuti kupasa ulemerero Yahova kumbathandauza ciyani na thangwe lomwe lin’funika kuticitisa kucita bzimwebzi. Tiniwonambo momwe tingapasire ulemerero Yahova na momwe iye an’dzapasira ulemerero dzina lace kutsogoloku.

KODI KUPASA ULEMERERO YAHOVA KUMBATHANDAUZA CIYANI?

 2. Kodi Yahova adalatiza tani ulemerero bwace pa Phiri la Sinai? (Onani cithunzi-thunzi.)

² Kodi ulemerero n’ciyani? M’Bibliya fala lakuti “ulemerero” lingathandauze cinthu ciri-centse comwe cingacitise munthu kudabwa. Pomwe padapita ntsiku zing’ono-ng’ono kucokera pomwe Yahova adatsudzula Ajirayeri ku ukapolo, iye adalatiza ulemerero bwace. Kumbukirani bzomwe bzidacitika pa ntsikuyo: Ajirayeri azinji akhadaima m’nyantsi mwa Phiri la Sinai kuti abve bzomwe Mulungu wawo akhafuna kuwauza. Phiriro lidampsinkhika na mtambo upswipa. Mwakusaya kudikhiririka, iwo adayamba kubva pantsi pakutekenyeka. Padayamba kucitika citeketeke ca mphanvu, kudabveka kugunda na bziphaliwali ndipo padabvekambo kulira kwa mphanvu kwa nyanga. (Ekisodo 19:16-18; 24:17; Salimo 68:8) Pomwe Yahova adalatiza ulemerero bwace mwa kucita bzimwebzi, Ajirayeriwo adadabwa kwene-kwene.

 3. Kodi tingapase tani Yahova ulemerero?

 ³ Yahova ni Mulungu wakudabwisa ndipo ifepano tingathandize anzathu kubvesesambo bzimwebzi. Njira ibodzi yakupasira ulemerero Yahova ndiyo kuuzambo wanthu winango bza mphanvu zace na makhalidwe yace yakudabwisa. Ndipo timbapasambo ulemerero Mulungu tikambamutumbiza thangwe ra bzomwe takwanisa kucita. (Zaiya 26:12) Mambo Davide adapasa ulemerero Yahova ndipo ifepano tingamutewezerembo. Pomwe iye akhapemba pa maso pa Ajirayeri, adauza Mulungu kuti: “Imwe Yahova, kukula, mphanvu, mbiri, kudeka na ulemu ni bzanu; pakuti bzentse bzomwe bziri kudzulu na pa dziko la pantsi mpsanu.” Pomwe Davide adamaliza mpembo wace, “Ajirayeri wentse adapereka ulemerero kwa Yahova.” — 1 Nkhani 29:11, 20.

 4. Kodi Jezu adapasa tani Yahova ulemerero?

⁴ Pomwe Jezu akhacita bzakudabwisa, iye nthawe zentse akhapereka ulemerero kwa Pai wace mwa kuuza wanthu kuti akhacita bzakudabwisabzo na mphanvu ya Yahova. (Marko 5:18-20) Jezu adaperekambo ulemerero kwa Yahova mwa mafala yomwe iye akhalewa pakulewa bza Yahovayo na momwe akhacitira bzinthu na wanthu winango. Ntsiku inango, Jezu akhapfunzisa mu nyumba yakunamatira. Pakati pa wanthu omwe akhamutetekera pakhana mkazi m’bodzi omwe akhadamala magole 18 akuboneresedwa na mzimu wakuipa. Mzimu wakuipayo ukhacitisa kuti msana wace ukhale wakugonyoka ndipo iye akhakwanisa lini kuuthamula. Mkaziyo akhabonera kwene-kwene! Jezu adamubvera ntsisi mkaziyo, adamufenderera ndipo adamuuza kuti: “Mkaziwe, wapozedwa matenda yako.” Jezuyo adaikha manja yace pa mkaziyo ndipo pa nthawe imweyoletu msana wace udathamuka. Pomwe iye adawona kuti alimba matenda yaceyo “[adayamba] kutumbiza Mulungu”! (Luka 13:10-13) Mkazi ule akhana mathangwe yomwe yadamucitisa kuti apereke ulemerero kwa Yahova ndipo ifepanombo tinayo mathangwe yakuperekera ulemerero kwa Yahova.

KODI N’CIYANI COMWE CIMBATICITISA KUPASA ULEMERERO YAHOVA?

 5. Kodi ni mathangwe yaponi yomwe yambaticitisa kuti tilemekeze Yahova?

⁵ Ifepano timbapereka ulemerero kwa Yahova thangwe ra kuti timbamulemekeza kwene-kwene. Pana mathangwe mazinji yomwe yambaticitisa kuti timulemekeze. Yahova ngwamphanvu kwene-kwene ndipo mphanvu zace ziribe malire. (Salimo 96:4-7) Iye ana nzeru kwene-kwene ndipo timbakwanisa kuwona nzeru zacezo kucokera pa bzomwe iye adalenga. Iye adatipasa moyo ndipo ambatipasa bzomwe timbafunikira kuti tipitirize kukhala na moyo. (Apokalipse 4:11) Iye ngwakukhulupirika. (Apokalipse 15:4) Bzentse bzomwe iye ambacita bzimbamufambira bwino ndipo ambacita bzomwe ambalewa. (Djoswa 23:14) Ndipopa timbadabwa lini na mafala yomwe Jeremiya adalewa pakulewa bza Yahova. Iye adati: “Pakati pa adziwi wentse wa mitundu ya wanthu na pakati pa maumambo yawo yentse. Palibe munthu wakundendemerana na imwepo”! (Jeremiya 10:6, 7) Kulewa cadidi, tina mathangwe mazinji yomwe yambaticitisa kulemekeza Pai wathu wakudzulu, Yahova. Tsono timbandolemekeza lini Yahova, ifepano timbamufunambo.

 6. Thangwe ranyi timbamufuna Yahova?

⁶ Timbapereka ulemerero kwa Yahova thangwe rakuti timbamufuna kwene-kwene. Onani makhalidwe yakusiyana-siyana yomwe Yahova anayo yomwe yambaticitisa kuti timufune. Iye ngwa ntsisi. (Salimo 103:13; Zaiya 49:15) Tikakhala tidasunama iye ambasunamambo. (Zakariya 2:8) Iye ambatithandiza kuti timudziwe nakuti tikhale naye pa uxamwali. (Salimo 25:14; Mabasa 17:27) Iye ngwakubzicepesa thangwe “ambabuluka pantsi kuti awone kudzulu na dziko la pantsi” ndipo “ambacosa munthu wakunyozeka pa mataka.” (Salimo 113:6, 7)  Mathangwe yentseneya yambaticitisa kuti tipereke ulemerero kwa Mulungu wathu. — Salimo 86:12.

 7. Kodi ni mwayi uponi omwe ifepano tinawo?

⁷ Timbapereka ulemerero kwa Yahova thangwe timbafuna kuti wanthu winango amudziwembo. Wanthu azinji ambadziwa lini cadidi pakulewa bza Yahova. Thangwe ranyi? Thangwe Sathani wampsinkha makumbukidwe yawo mwakulewa magunkha pakulewa bza Yahovayo. (2 Akolinto 4:4) Sathani wacitisa kuti wanthu akhulupire kuti Yahova ni mkali, alibe basa na mabvuto yomwe tikugumana nayo ndipo ndiye akucitisa kuti wanthu abonere. Tsono ifepano timbadziwa kuti bzimwebzi mpsakunama! Ifepano tina mwayi wakufotokozera wanthu cadidi ndipo tikacita bzimwebzi tin’dzakhala tikupereka ulemerero kwa Yahova. (Zaiya 43:10) Nfundo ikulu yomwe iri pa Salimo 96 njakupereka ulemerero kwa Yahova. Pomwe tikucezerana mafala ya Salimo limweri, onani momwe mungaperekere ulemerero kwa Yahova.

KODI TINGAPASE TANI YAHOVA ULEMERERO?

 8. Kodi ni njira iponi yomwe tingapasire ulemerero Yahova? (Salimo 96:1-3)

⁸ Werengani Salimo 96:1-3. Ifepano tingapereke ulemerero kwa Yahova na bzomwe timbalewa. M’mavesiya wanthu wa Yahova akuuzidwa kuti “aimbire Yahova,” “atumbize dzina lace,” “adziwise wanthu mafala yabwino yacipulumuso” na “kudziwisa bza ulemerero pakati pa mitundu ya wanthu.” Zimwezi ni njira zakusiyana-siyana za momwe tingaperekere ulemerero kwa Baba wathu wa kudzulu. Adjuda wakukhulupirika na Akristau wakuyambirira alibe kuzeza kuuzambo anzawo bzinthu bzabwino bzomwe Yahova adawacitira. (Daniyeli 3:16-18; Mabasa 4:29) Kodi ifepano tingacitembo tani bzimwebzi?

9-10. Kodi mwapfunza ciyani na bzomwe bzidacitikira Angelena? (Onani cithunzi-thunzi.)

⁹ Onani bzomwe bzidacitika na mpfumakazi inango yomwe imbakhala ku Estados Unidos yakucemeredwa Angelena. a Mpfumakaziyi idakhala yakukhwimika kugaza bzinthu bzakunama bzomwe wanthu akhalewa pakulewa bza Yahova ku basa kwace. Bzimwebzi bzidacitika pa nthawe yomwe mpfumakaziyi idapita basa pa empreza. Pa nthawe imweyi, emprezayo ikhapereka mpata kuna anyabasa anovu kuti auze anyabasa anzawo bza moyo wawo. Angelena adakonzekera mafoto kuti akalatize anzacewo momwe iye aliri wakukondwa thangwe ra kukhala Mboni ya Yahova. Pomwe ikhanati kukwana nthawe yakuti iye alewelewe, mwanzace wa ku basa adabzidziwikisa kwa anzacewo ndipo adalewa kuti  iye adaleredwa m’banja la Mboni za Yahova. Iye adayamba kulewa kuipa Mboni za Yahova. Angelena adati: “Mtima wangu udayamba kumenya. Tsono ndikhadziwa kuti bzomwe iye akhalewa pakulewa bza Yahova bzikhali bzakunama, tenepo ndidabziuza kuti: ‘Inepano ninganyamale lini, n’niwauza cadidi pakulewa bza Yahova.’”

¹⁰ Pomwe mwanzace wa ku basayo adamala kulewalewa, Angelena adacita mpembo wa mu mtima mwakamfulumize. Patsogolo pace, iye adayamba kuuza mwanzace wa ku basayo mwakuderekha kuti: “Bzakucitika pa moyo wako bzikundendemerana na bzangu. Inepano ndidakulirambo m’banja la Mboni za Yahova ndipo mpaka pano ndine Mboni ya Yahova.” Napo kuti Angelena akhacita mantha, iye adapitiriza kukhala wakugwa mpfuwa pomwe akhamulatiza bzithunzi-thunzi bzomwe adacoka pa mitsonkhano yakusiyana-siyana bzakulatiza kuti iye akhali wakukondwa ndipo adafotokozambo bzomwe ambakhulupira mwakugwa mpfuwa. (1 Pedru 3:15) Kodi phindu lace lidakhala liponi? Pomwe Angelena adamaliza kulewalewa mwanzaceyo adaderekha. Ndipo iye adakumbukirambo bza moyo wabwino omwe akhanawo pomwe akhali Mboni ya Yahova. Angelena adati: “Ifepano tin’funika lini kunyamala tikabva wanthu akumulewa kuipa Yahova. Ni mwayi ukulu kwene-kwene kwa ifepano kulewa cadidi pakulewa bza iye.” Ifepano tina mwayimbo wakutumbiza Yahova na kupereka ulemerero kwa iye napo kuti wanthu winango akupswipiza dzina lace.

11. Kodi atumiki wacadidi wa Yahova adateweza tani nfundo ya pa Salimo 96:8?

¹¹ Werengani Salimo 96:8. Ifepano tingapereke ulemerero kwa Yahova na bzinthu bzathu. Kuyambira kale-kale, atumiki wacadidi wa Yahova ambapereka ulemerero kwa iye mwa njira imweyi. (Mimwani 3:9) Ajirayeri adacita bzakupereka kuti templo imangidwe ndipo adacitambo bzakupereka kuti akonzembo bzinthu bzomwe bzikhadadzongeka mu templomo. (2 Amambo 12:4, 5; 1 Nkhani 29:3-9) Anyakupfunza winango wa Jezu adacita bzakupereka kuti Jezuyo na apostolo wace ‘agumane bzinthu bzomwe akhafunikira.’ (Luka 8:1-3) Akristau wakuyambirira adacitambo bzakupereka kuti athandize abale na mpfumakazi zawo omwe akhadagwedwa na njala. (Mabasa 11:27-29) Ntsiku zino, ifepano tingambaperekembo ulemerero kwa Yahova tikambacita bzakupereka.

12. Kodi bzakupereka bzathu bzingapase tani ulemerero Yahova? (Onani cithunzi-thunzi.)

¹² Onani nkhani ibodzi yomwe ikulatiza momwe bzakupereka bzathu bzimbapasira ulemerero Yahova. Mu 2020, ku Zimbabwe kudakhala na cirala. Pakuti kukhabvumba lini, bzimwebzi bzingadacitisa kuti wanthu abonere  na njala, kuphatanidzambo mpfumakazi yathu yakucemeredwa Prisca. Napo kuti bzinthu bzikhali tenepo, mpfumakazi Prisca idapitiriza kuteweza ndondomeko yace ya kumbayenda mu upalizi citatu na cixanu ciri-centse napo pa nthawe yakusakula. Avizinyu wace akhambamulewa kuipa thangwe ra kumbayenda mu upalizi m’mbuto mwakuyenda ku munda kukasakula. Iwo akhalewa kuti: “Iwepo unifa na njala gole lino.” Mpfumakazi Prisca ikhambawatawira mwakutsimikiza kuti: “Yahova ambasiya lini atumiki wace.” Pomwe padapita nthawe pang’ono, mpfumakaziyi idakhala na mwayi wakutambira cakudya comwe cikhaperekedwa na gulu lathu. Cakudyaci cidagulidwa mwakuphatisa basa bzakupereka bzathu. Pomwe avizinyu wa mpfumakazi Prisca adawona bzimwebzi, iwo adadabwa kwene-kwene, ndipo adalewa kuti: “Mulungu alibe kukusiyadi. Ifepano tikufuna kupfunzambo bza Mulungu wakoyo.” Avizinyu wace wakukwana 7 adayamba kumbagumanikambo pa mitsonkhano ya gwere.

13. N’ciyani comwe tin’funika kucita kuti tipase ulemerero Yahova? (Salimo 96:9)

¹³ Werengani Salimo 96:9. Tingapereke ulemerero kwa Yahova na makhalidwe yathu. Antsembe omwe akhatumikira pa templo ya Yahova akhafunika kusamba kuti akhale adacena. (Ekisodo 40:30-32) Ifepano tin’funikambo kukhala tidacena sikuti mwa kundosamba basi, koma mwa kumbatcenkha cinthu ciri-centse comwe Yahova ambawenga. (Salimo 24:3, 4; 1 Pedru 1:15, 16) Tin’funika kucita nyongo kuti ticose “unthu bwakale,” bomwe ni makhalidwe na bzinthu bzakuipa, ticibvala “unthu bupsa” bomwe ni kukumbuka na kucita bzinthu bzomwe bzimbabverana na makhalidwe yakucena ya Yahova. (Akolose 3:9, 10) Mwakuthandizidwa na Yahova, napo wanthu omwe ambacita bzinthu bza upombo na omwe ambacita bzinthu bza ciwembo angacinje acibvala unthu bupsa.

14. Kodi imwepo mwapfunza ciyani na bzomwe bzidacitikira Jack? (Onani cithunzi-thunzi.)

¹⁴ Onani nkhani ya munthu wakugopswa kwene-kwene omwe akhacita bza ciwembo wakucemeredwa Jack omwe adafika pakucemeredwa na dzina lakuti Ciwanda. Pakuti iye akhapha wanthu kwene-kwene, adatongedwa kuti aphedwe. Tsono pomwe Jack akhadikhirira kuphedwa adabvuma kupfunza Bibliya na m’bale omwe adayenda kukapalizira ku kawoko komwe iye akhali. Napo kuti Jack akhali munthu wakuipa kwene-kwene, iye adacinja makhalidwe yace ndipo adabatizidwa. Jack akhadacinja kwene-kwene mwakuti pa ntsiku yomwe iye adaphedwa, alindiri wa m’kawokomo adalira pomwe akhagonekana naye. Mcikunda m’bodzi omwe akhaphata basa pa kawoko imweyo adati: “Jack  akhali nyam’kawoko wakuipa kwene-kwene. Koma tsapano iye ni nyam’kawoko wabwino kwene-kwene.” Pomwe Jack adaphedwa, sumana ya mangwana yace abale adayenda pomwe ku kawokoko kukacitisa mitsonkhano. Ndipo iwo adawona nyam’kawoko munango omwe adabwera pa mitsonkhanopo kakuyamba. N’ciyani cidamucitisa kuti iye abwere ku mitsonkhanoko? Iye adadabwa thangwe ra kucinja komwe Jack adacita ndipo akhafuna kudziwa bzomwe angadacita kuti akhale mtumiki wa Yahova. Bzikuwonekeratu padeca kuti makhalidwe yathu yabwino yangapereke ulemerero kwa Baba wathu wakudzulu! — 1 Pedru 2:12.

KODI YAHOVA AN’DZACITA CIYANI KUTI APASE ULEMERERO DZINA LACE KUTSOGOLOKU?

15. Kodi Yahova an’dzacita ciyani kutsogoloku kuti apase ulemerero dzina lace? (Salimo 96:10-13)

¹⁵ Werengani Salimo 96:10-13. Mavesi yakumalizira ya Salimo 96 yambalewa kuti Yahova ni Mtongi na Mambo wacirungamo. Kodi Yahova an’dzacita ciyani kutsogoloku kuti dzina lace lipasidwe ulemerero? Iye an’dzatonga mwacirungamo. Tsapanopali iye an’pfudza magereja yentse yakunama thangwe rakuti yambapswipiza dzina lace. (Apokalipse 17:5, 16; 19:1, 2) Wanthu winango omwe an’dzawona kupfudzidwa kwa magereja yakunamaya angadzafune kuphatana nafe pa kunamata kwacadidi. Ndipo pa Armagedo, Yahova an’dzapfudza wanthu wentse wakuipa omwe ambapswipiza dzina lace acipulumusa wanthu omwe ambamufuna, ambamubvera na kupereka ulemerero pa dzina lace. (Marko 8:38; 2 Atesalonika 1:6-10) Pambuyo pa mayezo yakumalizira kuphampha kwa Magole 1000 ya Utongi bwa Kristu, Yahova an’dzakhala wacenesa dzina lace. (Apokalipse 20:7-10) Pa nthawe imweyo, “dziko la pantsi lin’dzadzala na cidziwiso ca ulemerero bwa Yahova, ninga momwe madzi yambadzazira nyanza.” — Habakuki 2:14.

16. Kodi imwepo mwatsimikiza kucita ciyani? (Onani cithunzi-thunzi.)

¹⁶ Bzin’dzakhala bzakudekeza kwene-kwene pa nthawe imweyo thangwe wanthu wentse an’dzapereka ulemerero kwa Yahova! Tsono napo kuti nthawe imweyo ikanati kufika, ifepano tingaphatise basa mipata yomwe tingakhale nayo kuti tipereke ulemerero kwa Mulungu. Kuti tibvesese bwino nfundo yakufunikayi, Bungwe Lakutonga lasankhula cinembo ca Salimo 96:8 kuti cikhale vesi la gole la 2025. Vesiri limbati: “Pasani Yahova ulemerero thangwe ra dzina lace.”