NKHANI YAKUPFUNZA 46
NYIMBO 49 Tikondwese Mtima wa Yahova
Abale, Kodi Mukucita Nyongo Kuti Mukhale Mtumiki Wakuthandiza?
“Kupasa kumbabweresa cikondweso cikulu kuposa kutambira.” — MABASA 20:35.
CAKULINGA CA NKHANIYI
Kulimbikisa abale wakubatizidwa kuti acite nyongo yakuti athemere kukhala atumiki wakuthandiza.
1. Kodi mpostolo Paulo akhawawona tani atumiki wakuthandiza?
ATUMIKI wakuthandiza ambacita mabasa yakufunika m’gwere. Mpostolo Paulo akhatenda kwene-kwene amuna wakukhulupirikawa. Mwa ciratizo, mu tsamba lomwe adanembera Akristau wa ku Filipi pomwe akhalewa bza akulu adagumambo atumiki wakuthandiza. — Afilipi 1:1.
2. Kodi m’bale wakucemeredwa Luis ambabva tani thangwe ra kukhala mtumiki wakuthandiza?
2 Abale wakubatizidwa omwe ni maswaka ayai acikulire ambakomedwa kwene-kwene kutumikira ninga atumiki wakuthandiza. Mwa ciratizo, Devan adaikhidwa kukhala mtumiki wakuthandiza pomwe akhana magole 18. Tsono m’bale wakucemeredwa Luis adakhala mtumiki wakuthandiza pomwe akhana magole yakupitirira 50. Kodi iye adabva tani thangwe ra kukhala na mwayi umweyu? Iye adati: “Nimbawona kuti ni mwayi ukulu kwene-kwene kwa inepano kutumikira ninga mtumiki wakuthandiza, maka-maka ndikakumbukira lufoyi lentse lomwe gwere landilatiza!”
3. Kodi mu nkhani ino tin’cezerana mibvunzo iponi?
3 Penu imwepo ndimwe m’bale wakubatizidwa ndipo mukanati kukhala mtumiki wakuthandiza, tani mucikhalambo na cakulinga cimweci? Kodi n’ciyani comwe cingakuthandizeni kufuna kukhala mtumiki wakuthandiza? Ndipo kodi ni makhalidwe yaponi yomwe Bibliya limbalewa yomwe yangakuthandizeni kuti muthemere kukhala mtumiki wakuthandiza? Mu nkhani ino, tiniwona mitawiro ya mibvunzo imweyi. Tsono cakuyamba, bwerani ticezerane mabasa yomwe mtumiki wakuthandiza ambacita.
KODI NI MABASA YAPONI YOMWE MTUMIKI WAKUTHANDIZA AMBACITA?
4. Kodi mtumiki wakuthandiza ambacita mabasa yaponi? (Onani cithunzi-thunzi.)
4 Mtumiki wakuthandiza ni m’bale wakubatizidwa omwe ambaikhidwa na mzimu wakucena kuti athandize akulu mwa kucita mabasa yakusiyana-siyana m’gwere. Atumiki wakuthandiza winango ambawonesesa kuti pana gawo lakukwanira kuti abale apalizire na mabukhu yomwe angayaphatise basa. Winango ambathandizira kucenesa na kukonza-konza bzinthu bzomwe bzadzongeka pa Nyumba ya Umambo. Atumiki wakuthandiza winango ambakhala alatizi ndipo winango ambaphata basa na bzakukuzira mafala na kuikha mavidiyo pa mitsonkhano ya gwere. Mabasa mazinji yomwe atumiki wakuthandiza ambacita nja mtundu umweyu. Cakufunika kwene-kwene n’cakuti atumiki wakuthandiza mbaamuna omwe ambalatiza kuti ambafuna Yahova ndipo ambakhala na moyo mwakubverana na mitemo yace. Ndipo iwo ambafunambo kwene-kwene abale na mpfumakazi. (Mateu 22:37-39) N’ciyani comwe m’bale wakubatizidwa angacite kuti athemere kukhala mtumiki wakuthandiza?
Atumiki wakuthandiza ambatewezera Jezu mwakubzipereka kuti athandize wanthu winango (Onani ndime 4)
5. N’ciyani comwe m’bale angacite kuti athemere kukhala mtumiki wakuthandiza?
5 Bibliya limbafotokoza makhalidwe yomwe wale omwe ambaikhidwa kukhala atumiki wakuthandiza an’funika kukhala nayo. (1 Timotio 3:8-10, 12, 13) Penu imwepo mukufuna kukhala mtumiki wakuthandiza, pfunzani makhalidwe yamweya mucicita nyongo yakukhala nayo. Tsono cakuyamba mun’funika kukumbukira thangwe lomwe likukucitisani kuti mufune kukhala mtumiki wakuthandiza.
N’CIYANI COMWE CIKUKUCITISANI KUTI MUFUNE KUKHALA MTUMIKI WAKUTHANDIZA?
6. Kodi n’ciyani comwe cin’funika kukucitisani kuti mufune kucita basa liri-lentse lakuthandiza abale na mpfumakazi zanu? (Mateu 20:28; onani cithunzi-thunzi ca pa tsamba lakuyamba.)
6 Ciratizo cathu cikulu pa nkhani imweyi ni Jezu Kristu. Thangwe ranyi? Thangwe cinthu ciri-centse comwe adacita, akhacicita thangwe ra kufuna Baba wace na wanthu. Lufoyi limweri ndiro lomwe lidamucitisa kuti aphate basa na nyongo na kucitambo mabasa yakunyozeka kuti athandize winango. (Werengani Mateu 20:28; Juwau 13:5, 14, 15) Penu imwepo mukufuna kukhala mtumiki wakuthandiza thangwe ra lufoyi, Yahova an’dzakusimbani ndipo an’dzakuthandizani kuti cakulinga canuco cikwanisike. — 1 Akolinto 16:14; 1 Pedru 5:5.
Jezu akutsuka minyendo ya apostolo wace kuti alatize momwe apostolowo angatumikirire winango mwakubzicepesa m’mbuto mwakufuna kukhala na maudindo yakulemekezeka (Onani ndime 6)
7. Thangwe ranyi m’bale an’funika kutcenkha mtima wakubzikuza?
7 Mu dzikoli, wanthu ambalemekeza wale omwe ambabzicitisa kukhala wakulemekezeka. Tsono m’gulu la Yahova mulibe bzimwebzi. M’bale omwe ana cakulinga cakukhala mtumiki wakuthandiza thangwe ra lufoyi, ninga momwe Jezu adacitira, ambayezera lini kucita ciri-centse kuti akhale na udindo bwakutonga anzace ayai kufuna kubziwonesa kuti ngwakufunika kuposa anzace. Munthu omwe ana mtima umweyu akaikhidwa kukhala mtumiki wakuthandiza m’gwere, iye angalambe mabasa yakunyozeka kuti athandize wanthu wa Yahova. Iye angawone kuti ngwakufunika ndipo angacite lini mabasa yakunyozekayo. (Juwau 10:12) Yahova an’dzasimba lini munthu ali-wentse omwe akucita nyongo kuti akhale mtumiki wakuthandiza penu akucita bzimwebzo thangwe ra mtima wakubzikuza. — 1 Akolinto 10:24, 33; 13:4, 5.
8. Kodi ni malango yaponi yomwe Jezu adapasa apostolo wace?
8 Pa nthawe inango, napo apostolo wa Jezu akhafuna kukhala na udindo koma na cakulinga cakuipa. Kumbukirani bzomwe mpostolo Tiyago na Juwau adacita. Iwo adakumbira Jezu kuti awapase mbuto yakulemekezeka mu Umambo bwace. Jezu alibe kukomedwa na bzomwe iwo adacitabzi. Ndipopa, iye adauza apostolo wentse 12 kuti: “Ali-wentse omwe an’funa kukhala mkulu pakati panu, akhale mtumiki wanu, ndipo ali-wentse omwe an’funa kukhala wakuyamba pakati panu, akhale kapolo wa wentse.” (Marko 10:35-37, 43, 44) Abale omwe ambafuna kukhala mtumiki wakuthandiza na cakulinga cakufuna kutumikira winango ambathandiza gwere mu njira zizinji. — 1 Atesalonika 2:8.
N’CIYANI CINGAKUTHANDIZENI KUTI MUFUNE KUTUMIKIRA ABALE WANU?
9. N’ciyani comwe mungacite kuti mukhale na cikhumbo cakufuna kutumikira winango?
9 Tikudziwa kuti imwepo mumbafuna Yahova ndipo mumbafunambo kutumikira anzanu. Napo bziri tenepo, imwepo mungakhale mulibe cikhumbo cakufuna kucita mabasa yomwe mtumiki wakuthandiza ambacita. N’ciyani comwe mungacite kuti mukhale na cikhumbo cakufuna kutumikira winango? Ni kukumbukira cikondweso comwe mungadzakhale naco mukambatumikira abale na mpfumakazi zanu. Jezu adati: “Kupasa kumbabweresa cikondweso cikulu kuposa kutambira.” (Mabasa 20:35) Ndipo Jezu adacita bzomwe adalewabzi. Iye akhakondwa kwene-kwene thangwe ra kuthandiza wanthu winango ndipo imwepo mungakhalembo wakukondwa.
10. Kodi Jezu adalatiza tani kuti akhakomedwa kutumikira winango? (Marko 6:31-34)
10 Onani ciratizo cibodzi comwe cikulatiza kuti Jezu akhakomedwa kuthandiza winango. (Werengani Marko 6:31-34.) Pa nthawe inango, Jezu na apostolo wace akhadaneta. Iwo adayenda ku mbuto inango komwe kukhalibe wanthu kuti akapume. Tsono thimu la wanthu ndiro lomwe lidayamba kufika komwe akhayendako, licidikhirira kuti Jezu adzalipfunzise. Jezuyo angadafuna angadawabweza wanthuwo, thangwe iye na apostolo wacewo “akhalibe nthawe yakupuma ne kudya.” Ayai angadandowapfunzisa bzinthu bzing’ono-ng’ono aciwauza kuti ayende. Tsono thangwe ra lufoyi lomwe iye akhanalo kuna wanthuwo, “adayamba kuwapfunzisa bzinthu bzizinji.” Iye adapitiriza kuwapfunzisa mpaka ‘kudoka.’ (Marko 6:35) Iye adacita bzimwebzi sikuti thangwe ra kungingimizidwa na munthu koma thangwe rakuti “adawabvera ntsisi.” Iye akhafuna kuwapfunzisa thangwe rakuti akhawafuna. Kutumikira wanthu winango kudacitisa kuti Jezu akhale wakukondwa.
11. Kuthumizira pa kupfunzisa wanthu, n’ciyani cinango comwe Jezu adacita kuti athandize wanthuwo? (Onani cithunzi-thunzi.)
11 Jezu adacita bzizinji sikuti kundopfunzisa thimu la wanthu lire. Iye adawapasambo bzomwe akhafunikira pa moyo wawo wa ku thupi. Mwakudabwisa, iye adacitisa kuti pagumanike cakudya cakukwana wanthu wentsenewo ndipo adauza anyakupfunza wace kuti agawanise wanthuwo cakudyaco. (Marko 6:41) Mwakucita bzimwebzi, iye adapfunzisa anyakupfunza wace kufunika kwa kutumikira wanthu winango. Iye adalatizambo kuti mabasa yomwe atumiki wakuthandiza ambacita njakufunika kwene-kwene. Ndokumbukirani momwe apostolowo adakhalira wakukondwa pomwe adathandizira cakudabwisa ca Jezu mwa kugawanisa wanthuwo cakudya mpaka wentsewo “[kudya] acikhuta”! (Marko 6:42) Ni pa nthawe imweyi lini yokha yomwe Jezu adaikha bzakufuna bza wanthu winango patsogolo pa bzakufuna bzace. Iye adaphatisa basa moyo wace wentse pa dziko la pantsi pano kuti athandize wanthu. (Mateu 4:23; 8:16) Jezu akhakomedwa kwene-kwene kupfunzisa wanthu na kuwapasa bzomwe akhafunikira pa moyo wawo. Kulewa cadidi, imwepo mun’dzakhalambo wakukondwa kwene-kwene mukabzipereka na mtima wanu wentse kuti mukhale mtumiki wakuthandiza.
Lufoyi lanu kwa Yahova na cikhumbo cakufuna kutumikira winango bzin’dzakucitisani kuti mufune kutumikira abale na mpfumakazi zanu mu njira zakusiyana-siyana (Onani ndime 11) a
12. Thangwe ranyi palibe omwe an’funika kubzibva kuti an’kwanisa lini kuthandiza gwere?
12 Penu imwepo mukukumbuka kuti mulibe luso lakupambulika lekani kubwerera m’mbuyo. Imwepo muna makhalidwe yomwe yangakucitiseni kuti mukhale wakufunika m’gwere. Kumbukirani bzomwe mpostolo Paulo adalewa pa 1 Akolinto 12:12-30 ndipo kumbirani Yahova kuti akuthandizeni kuwona momwe mungaphatisire basa nfundo zimwezi. Mafala ya Pauloya yakulatiza padeca kuti ninga mtumiki ali-wentse wa Yahova pana bzizinji bzomwe imwepo mungacite m’gwere. Penu imwepo mukanati kuthemera kukhala mtumiki wakuthandiza, lekani kubwerera m’mbuyo. M’mbuto mwace, citani nyongo kuti mutumikire Yahova na abale wanu. Khalani na citsimikizo centse cakuti akulu wa gwere an’dzakumbukira luso lomwe munalo akafuna kukupasani basa. — Aroma 12:4-8.
13. Thangwe ranyi m’bale ali-wentse angakwanise kukhala mtumiki wakuthandiza?
13 Kumbukiranimbo ibzi: Makhalidwe yomwe Bibliya limbalewa yomwe yambacitisa munthu kuti athemere kukhala mtumiki wakuthandiza, ni makhalidwe yomwe Mkristau ali-wentse an’funika kukhala nayo. Mkristau ali-wentse an’funika kukhala pa uxamwali bwakulimba na Yahova, an’funika kukhala wakupasa ndipo an’funikambo kukhala ciratizo cabwino kwa winango. Tenepo, pinango imwepo mwacita kale nyongo yakukhala na makhalidwe mazinji yakufunika yomwe yangakucitiseni kuthemera kukhala mtumiki wakuthandiza. N’ciyani maka-maka comwe m’bale an’funika kucita kuti athemere kukhala mtumiki wakuthandiza?
BZOMWE MUNGACITE KUTI MUTHEMERE KUKHALA MTUMIKI WAKUTHANDIZA
14. Kodi kukhala “wakukhwima m’makumbukidwe” kumbathandauza ciyani? (1 Timotio 3:8-10, 12)
14 Mbatiwoneni makhalidwe manango yomwe yambafotokozedwa pa 1 Timotio 3:8-10, 12. (Werengani.) Mtumiki wakuthandiza an’funika “kukhala wakukhwima m’makumbukidwe.” Mafala yamweya yangasanduliziridwembo kuti “wakuthemera kulemekezedwa” na wanthu. Bzimwebzi bzin’funa lini kulewa kuti imwepo mun’funika lini kuseka ayai kulewa nkhani zakusekesa. (Mpalizi 3:1, 4) Tsono kuti mulatize kuti ndimwe wakukhwima mun’funika kucita nyongo yakukwanirisa basa liri-lentse lomwe mwapasidwa. Imwepo mukadziwika kuti ndimwe wakukhulupirika ndipo ndimwe wakuthembeka, abale na mpfumakazi m’gwere an’dzakuthembani na kukulemekezani.
15. Kodi mafala yakuti “wakusaya kulewa pawiri” na “wakusaya kufuna kugumana phindu mwa cinyengo” yambathandauza ciyani?
15 Mafala yakuti “wakusaya kulewa pawiri” yambathandauza kuti imwepo mumbanama lini, ndimwe wakukhulupirika na wakuthembeka. Mumbacita bzomwe mumbalewa ndipo mumbanamiza lini wanthu winango. (Mimwani 3:32) Mafala yakuti “wakusaya kufuna kugumana phindu mwa cinyengo” yambathandauza kuti imwepo ndimwe wakukhulupirika pomwe mukucita malonda yanu na pomwe mukuphatisa basa kobiri. Imwepo mungaphatise lini basa uxamwali bomwe munabo na abale wanu wacikristau mwacinyengo na cakulinga cakuti mumbagumane kobiri.
16. (a) Kodi mafala yakuti “wakusaya kumwa kwene-kwene vinyu” yambathandauza ciyani? (b) Kodi mafala yakuti “wakusaya kuwapasa mulandu” yambathandauza ciyani?
16 Mafala yakuti “wakusaya kumwa kwene-kwene vinyu” yambathandauza kuti imwepo mumbamwa lini kwene-kwene ndipo ne mumbadziwika lini ninga munthu wa kumwa kwene-kwene. Mafala yakuti “wakusaya kuwapasa mlandu” yambathandauza kuti mumbakhala na moyo mwakubverana na mitemo ya Yahova. Napo kuti ndimwe lini wakulungamiratu, mumbakhala na mtendere omwe umbabwera thangwe ra kukhala pa uxamwali bwa bwino na Mulungu.
17. Kodi m’bale angalatize tani kuti ngwakuthembeka pomwe ‘akuyezedwa kuti awonedwe penu ngwakuthemera’? (1 Timotio 3:10; onani cithunzi-thunzi.)
17 Mafala yakuti “ayezedwe kuti awonedwe penu mbakuthemera” yakuthandauza kuti imwepo mwalatiza kale kuti mumbacita bwino-bwino mabasa yomwe mumbapasidwa. Tenepo, akulu wa gwere akakupasani basa kuti mucite, tewezani bwino-bwino malango yawo pabodzi na malango ya gulu la Mulungu. Tsimikizirani kuti mwabvesesa momwe basalo lin’funika kucitidwira na nthawe yomwe lin’funika kumalizidwa. Mukambacita basa lomwe mwapasidwa na nyongo, abale na mpfumakazi an’dzawona bzimwebzo ndipo iwo an’dzakutendani thangwe ra kuyenda patsogolo komwe mukucita. Akulu, onesesani kuti mukupfunzisa abale wakubatizidwa. (Werengani 1 Timotio 3:10.) Kodi mu gwere mwanu muna alumbwana wakubatizidwa omwe ana magole pakati pa 10 mpaka 14 ayai yakucepera yamweya? Kodi ambacita pfunziro lawo la pa okha na kukonzekera mitsonkhano? Kodi iwo nthawe zentse ambapereka mitawiro pa mitsonkhano na kuyenda kukapalizira? Penu ndibzo, apaseni mabasa yomwe yakubverana na msinkhu wawo. Mwa njira imweyi, abalewo an’dzakhala “[akuyezedwa] kuti awonedwe penu mbakuthemera.” Ndipo akadzapfitsa magole 17 ayai 19 pinango angadzathemere kukhala mtumiki wakuthandiza.
Akulu angayeze abale kuti awone penu “mbakuthemera” mwa kuwapasa mabasa yakusiyana-siyana (Onani ndime 17)
18. Kodi mafala yakuti “pakusaya mathangwe yakuwapasira mulandu” yambathandauza ciyani?
18 Mafala yakuti ‘wakusaya mathangwe yakuwapasira mulandu’ yambathandauza kuti mun’funika lini kulewedwa kuti mwacita cinthu cakuipa ndipo mucikhala mwacitadi cinthuco. N’cadidi kuti Akristau anganamiziridwe kuti acita cinthu cakuipa. Jezu adanamiziridwa bzinthu bzizinji ndipo adalewa kuti ateweri wace angadadzanamiziridwambo. (Juwau 15:20) Tsono mukakhala na makhalidwe yabwino ninga momwe Jezu adacitira, mun’dzakhala na mbiri yabwino m’gwere. — Mateu 11:19.
19. Kodi kukhala “mwamuna wa mkazi m’bodzi” kumbathandauza ciyani?
19 “Akhale na mkazi m’bodzi.” Penu imwepo mudalowola, mun’funika kuteweza mtemo wa Yahova pa nkhani ya malowozi, omwe ni kukhala na mkazi m’bodzi. (Mateu 19:3-9) Mkristau an’funika lini kucita upombo. (Ahebereu 13:4) Tsono mafala yamweya yakuthandauza pomwe bzinthu bzinango. Imwepo mun’funika kukhala wakukhulupirika kwa mkazi wanu. Tenepo mun’funika lini kulatiza kuti mumbafuna akazi winango. — Djobi 31:1.
20. Kodi mwamuna angalatize tani kuti ‘ambatsogolera bwino’ banja lace?
20 “Acimbatsogolera bwino wana wace pabodzi na banja lace.” Penu imwepo ndimwe msolo wa banja, mun’funika kucita nyongo kuti muteweze bwino-bwino udindo bwanu. Mbacitisani kunamata kwa pa banja nthawe zentse. Mbacitani ciri-centse kuti muyende mu upalizi na munthu ali-wentse wa m’banja mwanu. Thandizani wana wanu kuti akhale pa uxamwali na Yahova. (Aefezo 6:4) Mwamuna omwe ambakwanisa kusamalira bwino banja lace ambalatiza kuti angakwanisembo kusamalira gwere. — Ndendemezerani na 1 Timotio 3:5.
21. Penu imwepo mukanati kukhala mtumiki wakuthandiza n’ciyani comwe mungacite?
21 Abale, penu imwepo mukanati kukhala mtumiki wakuthandiza werengani nfundo zomwe ziri mu nkhani ino ndipo pembani kwa Yahova kuti akuthandizeni. Pfunzani makhalidwe yomwe atumiki wakuthandiza an’funika kukhala nayo ndipo citani nyongo ya kuyateweza. Kumbukirani bza lufoyi lomwe munalo kwa Yahova na kwa abale na mpfumakazi zanu. Citani nyongo kuti mukhale na cikhumbo cakufuna kuwatumikira. (1 Pedru 4:8, 10) Citani nyongo kuti mukhale mtumiki wakuthandiza ndipo imwepo mun’dzakhala wakukondwa pakutumikira abale na mpfumakazi zanu m’gwere. Yahova akusimbeni thangwe ra nyongo yomwe mukucita kuti muthemere kukhala mtumiki wakuthandiza! — Afilipi 2:13.
NYIMBO 17 ‘Ndin’funa’
a BZOMWE BZIKUCITIKA PA CITHUNZI-THUNZI: Kumadzere, Jezu akuthandiza anyakupfunza wace mwakubzicepesa; kumadidi, mtumiki wakuthandiza akuthandiza m’bale wacikulire m’gwere.
