NKHANI YAKUPFUNZA 47
NYIMBO 103 Akulu wa Gwere ni Mphaso Yakucokera kwa Yahova
Abale, Kodi Mukucita Nyongo Kuti Mutumikire Ninga Mkulu wa Gwere?
“Penu munthu an’funa kukhala nyakunyang’anira, akufuna basa labwino.” — 1 TIMOTIO 3:1.
CAKULINGA CA NKHANIYI
Mu nkhani ino, tiniwona bzinthu bzomwe abale an’funika kubzikwanirisa kuti athemere kukhala akulu wa gwere.
1-2. Kodi ni “basa [liponi] labwino” lomwe akulu ambacita?
PENU imwepo mukutumikira kale ninga mtumiki wakuthandiza, bzikuwonekeratu kuti mwakulisa kale makhalidwe yomwe yambafunikira kuti munthu akhale mkulu. Kodi imwepo mukufuna kucita “basa labwino” lomwe akulu ambacita? — 1 Timotio 3:1.
2 Kodi ni basa liponi lomwe akulu ambacita? Iwo ambatsogolera basa lakupalizira, ambacita ulendo bwa ubusa, kupfunzisa mwa kufotokoza nkhani pa mitsonkhano ya gwere na kulimbikisa gwere na bzomwe ambalewa na kucita. Ndipopa Bibliya limbacemera akulu kuti “amuna ninga mphaso.” — Aefezo 4:8.
3. Kodi n’ciyani comwe m’bale an’funika kucita kuti akhale mkulu wa gwere? (1 Timotio 3:1-7; Tito 1:5-9)
3 N’ciyani comwe imwepo mun’funika kucita kuti mukhale mkulu? Makhalidwe yomwe munthu ambafunikira kuti akhale mkulu njakusiyana na makhalidwe yomwe munthu ambafunikira kuti agumane basa. Penu mwayenda kukanyang’ana basa ndipo muna makhalidwe yomwe patrau omwe mun’funa kuphatira basayo an’funa, imwepo mumbapita basalo. Tsono kuti imwepo mukhale mkulu wa gwere, mun’funikira kukhala na makhalidwe manango sikuti kundokhala na luso lakupfunzisa na kupalizira basi. Imwepo mun’funika kukulisa makhalidwe yomwe akulu an’funika kukhala nayo yomwe yali pa 1 Timotio 3:1-7 na Tito 1:5-9. (Werengani.) Nkhaniyi in’fotokoza makhalidwe manango yomwe yambafotokozedwa m’mavesiya ndipo in’fotokozambo momwe m’bale angakhalire na mbiri yabwino, momwe angakhalire msolo wabwino wa banja na bzomwe bzingamuthandize kuti akhale wakukondwa pomwe akutumikira gwere.
KUKHALA NA MBIRI YABWINO
4. Kodi kukhala “wakusaya mulandu” kumbathandauza ciyani?
4 Kuti mukhale mkulu imwepo mun’funika kukhala “wakusaya mulandu,” bzimwebzi bzikuthandauza kuti imwepo mun’funika kukhala na mbiri yabwino m’gwere ndipo palibe omwe angalewe kuti mumbacita bzinthu bzakuipa. Kuthumizira bzimwebzi imwepo mun’funikambo kukhala na “mbiri yabwino” napo kunja kwa gwere. Wanthu winango pinango angakuleweni kuipa thangwe ra kukhala Mkristau, tsono palibe munthu omwe an’funika kupenukira kuti imwepo ndimwe wakukhulupirika nakuti ndimwe munthu wabwino. (Daniyeli 6:4, 5) Bzibvunzeni kuti: ‘Kodi inepano ndina mbiri yabwino mkati na kunja kwa gwere?’
5. Kodi n’ciyani comwe imwepo mun’funika kucita kuti “mumbafune bzabwino”?
5 Imwepo mun’funikirambo “[kufuna] bzabwino,” ayai imwepo mun’funikira kuwona bzinthu bzabwino bzomwe winango ambacita na makhalidwe yabwino yomwe iwo anayo. Ndipo imwepo mun’funikirambo kukhala wakukondwa na kumbacitira bzinthu bzabwino wanthu winango napo bzire bzomwe akhadikhirira lini kuti mungadawacitira. (1 Atesalonika 2:8) Thangwe ranyi khalidwe limweri ndakufunika kuti akulu akhale nalo? Thangwe iwo ambamala nthawe ikulu akusamalira gwere na kucita mbali zawo pa mitsonkhano. (1 Pedru 5:1-3) Napo bziri tenepo, iwo ambakomedwa kwene-kwene kutumikira winango kuposa basa lomwe ambacita. — Mabasa 20:35.
6. Kodi kukhala “wakutambira bwino alendo” kumbathandauza ciyani? (Ahebereu 13:2, 16; onani cithunzi-thunzi.)
6 Imwepo mumbalatiza kuti “[mumbatambira] bwino alendo” mukambacitira bzinthu bzabwino wanthu winango kuphatanidzambo wale omwe ni axamwali lini wanu. (1 Pedru 4:9) Pakulewa bza munthu omwe ambatambira bwino alendo, bukhu linango lidalewa kuti: “Munthu omwe ambatambira bwino alendo ngwakudeka mtima napo kwa wanthu omwe ambawadziwa lini, ndipo ambakondwa kuwacemera kuti abwere ku mui kwace.” Bzibvunzeni kuti: ‘Kodi inepano nimbadziwika ninga munthu omwe ambatambira bwino alendo omwe ambabwera kudzazungira gwere langu?’ (Werengani Ahebereu 13:2, 16.) Munthu omwe ambatambira bwino alendo, ambalatiza kudeka mtima na kupereka bzomwe angakwanise kwa wanthu wentse omwe ambabwera kudzazungira gwere. Bzimwebzi bzikuphatanidza wale omwe mbakusauka omwe angakwanise lini kubwezera cinthu ciri-centse, kwa abale wa m’magwere manango omwe ambabwera kudzafotokoza nkhani na winango omwe ambaphata basa na nyongo kuti alimbikise abale ninga anyakunyang’anira dera. — Genesesi 18:2-8; Mimwani 3:27; Luka 14:13, 14; Mabasa 16:15; Aroma 12:13.
Banja lomwe limbatambira bwino alendo likutambira nyakunyang’anira dera pabodzi na mkazace (Onani ndime 6)
7. Kodi mkulu wa gwere ambalatiza tani kuti “ambafunisisa lini kobiri”?
7 “Sikuti . . . wakufunisisa kobiri.” Bzimwebzi bzikuthandauza kuti imwepo mumbaikha lini makumbukidwe yanu pa bzinthu bzakuthupi. Nthawe zentse imwepo mumbaikha pa mbuto yakuyamba Umambo bwa Mulungu pa moyo wanu bziribe basa penu ndimwe wakudala ayai wakusauka. (Mateu 6:33) Imwepo mumbaphatisa basa nthawe yanu, mphanvu zanu na bzentse bzomwe munabzo kuti mutumikire Yahova, kusamalira banja lanu na kusamalira gwere. (Mateu 6:24; 1 Juwau 2:15-17) Bzibvunzeni kuti: ‘Kodi nimbaiwona tani kobiri? Kodi nimbawona kuti bzinthu bzomwe ndinabzo mpsakukwanira? Ayai nimbacita ciri-centse kuti ndikhale na kobiri zizinji ayai bzinthu bzizinji bzakuthupi?’ — 1 Timotio 6:6, 17-19.
8. Kodi mungalatize tani kuti “mumbacita bzinthu mwacikatikati” na kuti ndimwe “wakubziphata”?
8 Imwepo mukakhala munthu “wakucita bzinthu mwacikatikati” na “wakubziphata,” bzimwebzi bzikuthandauza kuti mumbacita bzinthu mwacikati-kati pa bzentse bzomwe mumbacita pa moyo wanu. Bzimbaphatanidzambo kubziikhira malire pa bzinthu ninga kudya, kumwa, kabvalidwe, momwe mumbabzidekesera na masenzeka. Imwepo mumbatewezera lini kabvalidwe ka wanthu omwe ambatumikira lini Yahova. (Luka 21:34; Tiyago 4:4) Imwepo mumbapitiriza kukhala wakugwa mpfuwa napo kuti wanthu winango akunyosani ayai akucitirani bzinthu mwakusaya kudeka mtima. Imwepo mun’funikambo lini “kukhala muledzeri”; ayai kudziwika ninga munthu omwe ambamwa kwene-kwene. Bzibvunzeni kuti: ‘Kodi momwe nimbacitira bzinthu pa moyo wangu, bzimbalatiza kuti ndine munthu wakucita bzinthu mwacikatikati na wakubziphata?’
9. Kodi kukhala munthu wakukumbuka “bwino” na “wakulinganizika” kumbathandauza ciyani?
9 Kuti imwepo mukhale munthu “wakukumbuka bwino,” mun’funika kumbawona nkhani iri-yentse mwakuphatisa basa nfundo za m’Bibliya. Imwepo mun’funika kumbakumbukira bwino-bwino momwe nfundo za m’Bibliya zikubveranira na nkhani iri-yentse. Mukacita bzimwebzi, mun’dzakwanisa kubvesesa bwino nkhaniyo mucicita bzakusankhula bza nzeru. Imwepo mumbacita lini cakusankhula pomwe mukanati kubvesesa bwino nkhani yentse. (Mimwani 18:13) Mukacita bzimwebzi, imwepo mun’dzakwanisa kukhala munthu wacikati-kati na omwe ambacita bzakusankhula mwakubverana na momwe Yahova ambakumbukira. Penu imwepo ndimwe “wakulinganizika,” mumbacedwa lini. Imwepo mumbadziwika ninga munthu wakuthembeka na omwe ambateweza malango. Makhalidwe yamweya yan’kuthandizani kuti mukhale na mbiri yabwino. Tsapano mbatiwoneni makhalidwe yomwe yambafotokozedwa m’Bibliya yomwe mun’funika kukhala nayo kuti mukhale msolo wabwino wa banja.
MOMWE MUNGAKHALIRE MSOLO WABWINO WA BANJA
10. Kodi mwamuna angakhale tani munthu “wakutsogolera bwino banja lace”?
10 Penu imwepo ndimwe msolo wa banja ndipo mukufuna kukhala mkulu, banja lanu lin’funika kukhala na mbiri yabwino. Ndipopa imwepo mun’funika kumbatsogolera bwino banja lanu. Bzimwebzi bzikuthandauza kuti imwepo mun’funika kusamalira banja lanu mwa lufoyi na kucita bzakusankhula bzabwino m’banjamo. Bzimwebzi bzikuphatanidza “kutsogolera” pa bzinthu bzentse bzauzimu. Thangwe ranyi bzimwebzi mpsakufunika? Mpostolo Paulo adalewa kuti: “Penu munthu akukwanisa lini kutsogolera wanthu wa m’banja mwace, kodi an’dzakwanisa tani kusamalira gwere la Mulungu?” — 1 Timotio 3:5.
11-12. Thangwe ranyi mbiri ya wanthu wa banja la m’bale omwe an’funa kukhala mkulu wa gwere in’funika kukhala yabwino? (Onani cithunzi-thunzi.)
11 Pai an’funika kukhala na “wana wakumubvera na mtima wentse.” Penu imwepo ndimwe pai, mun’funika kupfunzisa wana wanu mu njira ya lufoyi. N’cadidi kuti imwepo mukufuna kuti wana wanu akhale wakukondwa na kuti ambasenzeke ninga momwe wana wentse ambacitira. Tsono imwepo mukawapfunzisa bwino, bzin’dzawathandiza kuti akhale wakubvera, wa ulemu na wa makhalidwe yabwino. Kuthimizira bzimwebzi, imwepo mun’funika kucita bzomwe mungakwanise kuti muthandize wana wanu kuti akhale pa uxamwali bwakulimba na Yahova, kubvera mitemo ya m’Bibliya na kukula mwauzimu acifika pa kubatizidwa.
12 “Akhalembo na wana wakukhulupira, omwe alibe mbiri ya makhalidwe yakuipa ayai wakusaya kubvera.” Mwana omwe ni Mboni ya Yahova akacita pikado ikulu, kodi n’ciyani comwe cingacitikire pai wace? Penu paiyo alibe kumupfunzisa na kumukonzekeresa ninga momwe bzimbafunikira, iye an’themera lini pomwe kukhala mkulu wa gwere. — Onani Ntsanza ya Mulindiri ya 15 Outubro, 1996, tsa. 21, ndi. 6-7 (Chichewa).
Pai wacikristau an’funika kupfunzisa bwino wana wace kuti iwo ambacite bzinthu bzomwe bzimbakondwesa Yahova na kuthandiza m’gwere (Onani ndime 11)
KUTUMIKIRA GWERE
13. Kodi imwepo mungalatize tani kuti ndimwe wakukonzeka “kubvuma” na “wakusaya kufuna bzanu bzokha”?
13 Abale omwe ana makhalidwe yabwino mbakufunika kwene-kwene m’gwere. Munthu omwe “ngwakukonzeka kubvuma” ambacita nyongo yakukhala pa mtendere na anzace. Penu imwepo mun’funa kudziwika ninga munthu omwe ngwakukonzeka kubvuma bzomwe winango ambalewa, mbabvumani bzomwe anzanu ambalewa na kubvumambo kuti bzomwe iwo ambalewa bziphatisidwembo basa. Pa mtsonkhano wa akulu, kodi imwepo mun’dzabvuma kuti nzeru ya winango iphatisidwe basa ikakhala kuti ikupitana lini na mitemo ya m’Bibliya? Imwepo mun’funika lini kumbandofuna“[bzanu] bzokha” ayai kumbangingimira kuti bzinthu bzicitike ninga momwe imwepo mun’funira. Imwepo mun’funika kulemekeza bzomwe anzanu anilewa. (Genesesi 13:8, 9; Mimwani 15:22) Imwepo mun’funika lini kukhala “waukali” ayai “kukalipa kamangu.” Bzimwebzi bzikuthandauza kuti imwepo mun’funika lini kukhala munthu wakusaya ulemu ayai kumbandokhalira kupopotezana na anzanu. M’mbuto mwace, imwepo mun’funika kumbaceza nawo mu njira yabwino. Mukakhala munthu wa mtendere mun’dzacita ciri-centse kuti mukhale pa mtendere na wanthu winango napo bzicikhala bzakunesa. (Tiyago 3:17, 18) Imwepo mukambalewalewa na wanthu wentse mu njira yabwino kuphatanidzambo na wale omwe ni Mboni lini, mun’dzawathandiza kuti akhale wa kugwa mpfuwa acimalisa ukali bwawo. — Atongi 8:1-3; Mimwani 20:3; 25:15; Mateu 5:23, 24.
14. Kodi mafala yakuti “aleke kukhala munthu omwe wakhala Mkristau tsapanopa” na “wakukhulupirika” yambathandauza ciyani?
14 M’bale omwe an’funa kukhala mkulu an’funika lini “kukhala munthu omwe wakhala Mkristau tsapanopa.” Mpsakufunika lini kuti iye akhale Mkristau omwe adabatizidwa kale-kale, koma an’funika kukhala na nthawe yakukwanira kuti akhale Mkristau wakukhwima mwauzimu. Ninga Jezu, pomwe imwepo mukanati kuikhidwa kukhala mkulu, mun’funika kucita nyongo yakulatiza kuti ndimwe wakubzicepesa na wakupirira mucidikhirira nthawe yakuthemera yomwe Yahova angadzakupaseni maudindo manango yakuthumizirika. (Mateu 20:23; Afilipi 2:5-8) Imwepo mungalatize kuti ndimwe “wakukhulupirika” mukambakhala na moyo wakubverana na mitemo yakulungama ya Mulungu na kubvera malango yomwe yambaperekedwa na gulu lace. — 1 Timotio 4:15.
15. Kodi munthu an’funika kukhala na luso la kufotokoza bwino nkhani kuti akhale mkulu? Fotokozani.
15 Bibliya limbafotokoza mwakubveka bwino kuti akulu an’funika kukhala “wakuthemera kupfunzisa.” Kodi bzimwebzi bzin’funa kuthandauza kuti wale omwe alibe luso la kufotokoza bwino nkhani angathemere lini kukhala akulu? Mtawiro ngwakuti ne. Thangwe ranyi? Thangwe Akulu azinji wabwino napo wale omwe alibe luso la kufotokoza bwino nkhani, ambapfunzisa bwino mu upalizi na pomwe akucita ulendo bwa ubusa. (Ndendemezerani na 1 Akolinto 12:28, 29 na Aefezo 4:11.) Napo penu mulibe luso la kufotokoza bwino nkhani, imwepo mun’funika kucita nyongo kuti mukhale mpfunzisi wabwino. Kodi mungacite tani bzimwebzi?
16. Kodi imwepo mungakhale tani mpfunzisi wabwino? (Onani cithunzi-thunzi.)
16 “Aciteweza bwino-bwino mafala yakukhulupirika.” Kuti mukhale pfunzisi wabwino, mbaphatisani basa Bibliya nthawe zentse pomwe mukupfunzisa na pomwe mukupereka malango. Kuti mukwanise kucita bzimwebzi, imwepo mun’funika kumbapfunza Bibliya pabodzi na mabukhu yathu. (Mimwani 15:28; 16:23) Pomwe mukupfunza, khalani tceru kuti muwone penu mukuphatisa basa bwino nfundo zomwe mukupfunzazo. Pomwe mukupfunzisa citani nyongo yakuthandiza wanthu kufuna kwene-kwene Yahova na kuwalimbikisa kuti ambaphatise basa bzomwe akupfunzabzo. Imwepo mungakhalembo mpfunzisi wabwino mukambakumbira na kuphatisa basa bwino malango yomwe akulu wa nzeru angakupaseni. (1 Timotio 5:17) Akulu an’funika “kulimbikisa” abale na mpfumakazi zawo. Tsono nthawe zinango an’funikambo kuwapasa malango na “kuwatsimula.” Pomwe akucita bzimwebzi, akulu an’funika kukhala wakudeka mtima. Imwepo mukambalewalewa bwino na mwa lufoyi na kuphatisa basa bwino Fala la Mulungu pakupfunzisa, mun’dzakhala mpfunzisi wabwino thangwe mun’dzakhala mukutewezera Mpfunzisi Mkulu, Jezu Kristu. — Mateu 11:28-30; 2 Timotio 2:24.
Mtumiki wakuthandiza akupfunza na mkulu wa luso momwe angaphatisire basa Bibliya pakupfunzisa. Mtumiki wakuthandizayo akubziwona pa supedyo pomwe akukonzekera nkhani yace (Onani ndime 16)
PITIRIZANI KUCITA NYONGO KUTI MUKHALE MKULU WA GWERE
17. (a) N’ciyani comwe cingathandize mtumiki wakuthandiza kuti acite nyongo yakukhala mkulu? (b) N’ciyani comwe akulu an’funika kukumbukira akafuna kuikha m’bale kuti akhale mkulu? (Onani kwadru yakuti “ Lekani Kudikhirira Kuti Munthu Omwe Mukufuna Kumuikha Kuti Akhale Mkulu Akhale Wakulungamiratu.”)
17 Pambuyo pakuwona makhalidwe yomwe munthu an’funika kukhala nayo kuti akhale mkulu, atumiki winango wakuthandiza angayambe kuwona ninga kuti angakwanise lini kukhala na makhalidwe yamweya. Tsono kumbukirani kuti Yahova na gulu lace ambadikhirira lini kuti abale akhale wakulungamiratu pakulatiza makhalidwe yamweya. (1 Pedru 2:21) Ndipo ni mzimu wakucena wa Mulungu omwe un’dzakuthandizani kuti mukulise makhalidwe yamweya. (Afilipi 2:13) Kodi pana khalidwe linango lomwe mukuwona kuti mun’funika kukhala nalo? Muuzeni Yahova mu mpembo. Fufudzani nkhani yomwe ikulewa bza khalidwero ndipo kumbirani malango kwa mkulu munango kuti akuthandizeni kuwona bzomwe mun’funika kucita kuti mukwanise kukhala na khalidwero.
18. N’ciyani comwe atumiki wentse wakuthandiza an’funika kucita?
18 Tentsenefe kuphatanidzambo wale omwe mbakulu kale, tin’funika kucita nyongo yakulatiza makhalidwe yomwe yafotokozedwa mu nkhani ino. (Afilipi 3:16) Penu imwepo ndimwe mtumiki wakuthandiza, khalani na cakulinga cakufuna kupitiriza kuthandiza abale. Pembani kwa Yahova kuti akuthandizeni na kukupfunzisani kuti mumbaphatisidwe basa m’gwere. (Zaiya 64:8) Yahova an’dzakusimbani mukacita nyongo yakufuna kutumikira ninga mkulu.
NYIMBO 101 Kuphata Basa Pabodzi Mwakuphatana
