NKHANI YAKUPFUNZA 44
NYIMBO 33 Tulirani Yahova Thupo Lanu
Bzomwe Mungacite Mukacitiridwa Bzinthu Bzakusaya Cirungamo
“Lekani kubvuma kukundidwa na cakuipa, tsono pitirizani kukunda cakuipa mwakucita cabwino.” — AROMA 12:21.
CAKULINGA CA NKHANIYI
Tin’pfunza bzomwe tingacite wanthu akaticitira bzinthu bzakusaya cirungamo na momwe tingacitire bzinthu mu njira yomwe ingatibweresere lini mabvuto.
1-2. Thangwe ranyi bzimbatidabwisa lini tikacitiridwa bzinthu bzakusaya cirungamo?
JEZU adafotokoza ciratizo ca mkazi mamsiwa omwe adangingimiza nyakutonga mirandu kuti atonge nkhani yace mwacirungamo. Anyakupfunza wa Jezu adabvesesa ciratizoci thangwe mu nthawe imweyire wanthu wakusauka akhambacitiridwa bzinthu mwakusaya cirungamo. (Luka 18:1-5) Ndipo ciratizo cimweci n’cakufunikambo kwa ifepano ntsiku zino, thangwe rakuti nthawe zinango timbacitiridwambo bzinthu bzakusaya cirungamo.
2 Mu dzikoli wanthu azinji mbatsankhulo, alibe lufoyi ndipo mbaumbombo. Ndipopa bzimbatidabwisa lini tikacitiridwa bzinthu mwakusaya cirungamo na iwo. (Mpalizi 5:8) Tsono ifepano tingadikhirire lini kucitiridwa bzinthu mwakusaya cirungamo na m’bale ayai mpfumakazi; koma napo bziri tenepo bzimwebzi bzingacitike. N’cadidi kuti abale na mpfumakazi zathu ambatsutsa lini cadidi. Koma iwo mbakuperewera. Ifepano tingapfunze na bzomwe Jezu adacita pomwe akhacitiridwa bzinthu mwakusaya cirungamo na wanthu wakuipa. Penu tingakwanise kukhala wakupirira pomwe tikucitiridwa bzinthu mwakusaya cirungamo na wanthu wakuipa, tin’funikambo kupirira tikacitiridwa bzinthu bzakusaya cirungamo na abale wathu wacikristau! Kodi Yahova ambabva tani tikacitiridwa bzinthu mwakusaya cirungamo na wanthu wakunja kwa gwere ayai na wanthu wa m’gwere? Kodi iye ambacita thupo na bzomwe bzikuticitikirabzo?
3. Kodi Yahova ambacita thupo tikacitiridwa bzinthu mwakusaya cirungamo, ndipo thangwe ranyi?
3 Yahova ambacita thupo tikacitiridwa bzinthu mwakusaya cirungamo. Timbadziwa bzimwebzi thangwe “Yahova ambafuna cirungamo.” (Salimo 37:28) Jezu adatitsimikizira kuti Yahova “an’dzawonesesa . . . kuti . . . [tacitiridwa] cirungamo mwakamfulumize” pa nthawe yakuthemera. (Luka 18:7, 8) Ndipo tsapanopali iye an’malisa mabvuto yentse yomwe tikugumana nayo ndipo an’pfudza kusaya cirungamo kwentse. — Salimo 72:1, 2.
4. Kodi ni thandizo liponi lomwe Yahova ambatipasa ntsiku zino?
4 Pomwe tikudikhirira dziko la cirungamo, Yahova ambatithandiza kuti tikwanise kupirira bzinthu bzakusaya cirungamo bzomwe bzimbaticitikira. (2 Pedru 3:13) Iye ambatipfunzisa kuti ticite bzinthu mwa nzeru tikacitiridwa bzinthu mwakusaya cirungamo. Yahova ambaphatisa basa ciratizo ca Mwana wace kuti atithandize kudziwa bzomwe tingacite tikacitiridwa bzinthu bzakusaya cirungamo. Ndipo iye ambatipasambo malango yomwe tingaphatise basa tikacitiridwa bzinthu mwakusaya cirungamo.
CITANI MPHOLE NA BZOMWE MUNGACITE MUKACITIRIDWA BZINTHU MWAKUSAYA CIRUNGAMO
5. Thangwe ranyi tin’funika kucita mphole na bzomwe tingacite tikacitiridwa bzinthu bzakusaya cirungamo?
5 Tikacitiridwa bzinthu mwakusaya cirungamo, ifepano tingabve ciya ndipo tingasuname. (Mpalizi 7:7) Atumiki winango wakukhulupirika wa Yahova ninga Djobi na Habakuki, adabvambo tenepayu. (Djobi 6:2, 3; Habakuki 1:1-3) Kubzibva tenepa n’kwakuphonyeka lini thangwe ndife wanthu, tsono tin’funika kucita mphole kuti bzimwebzi bzileke kuticitisa kucita bzinthu mwakusaya nzeru.
6. Kodi bzomwe Abisalomu adacita bzikutipfunzisa ciyani? (Onani cithunzi-thunzi.)
6 Tikacitiridwa bzinthu mwakusaya cirungamo tingafune kuimalisa nkhaniyo tekha ayai kubwezera bzomwe tacitiridwabzo. Kucita bzimwebzi kungandocitise kuti bzinthu bzilemweretu. Mbatiwoneni bzomwe Abisalomu mwana wa Mambo Davide adacita. Iye adabva ciya kwene-kwene pomwe mpfumakazi yace Tamara idapswithidwa na Amnoni omwe akhali m’bale wace wa pai m’bodzi koma mai wace-wace. Mwakubverana na Lamulo la Mozeji, Amnoni akhafunika kuphedwa thangwe ra bzomwe adacitabzo. (Levitiko 20:17) Napo kuti Abisalomu akhana mathangwe yakukhalira adakalipa, iye akhalibe ugo bwakumalisa nkhaniyo yekha. — 2 Samuyeli 13:20-23, 28, 29.
Abisalomu alibe kubziphata thangwe ra bzinthu bzakusaya cirungamo bzomwe mpfumakazi yace Tamara idacitiridwa (Onani ndime 6)
7. Kodi nyakunemba Salimo adacita ciyani pomwe adawona bzinthu bzakusaya cirungamo?
7 Tikawona ninga kuti wanthu omwe akucita bzinthu mwakusaya cirungamo akulangidwa lini, tingabzibvunze penu kucita bzinthu bzabwino kuna phindu. Onani bzomwe bzidacitikira nyakunemba Salimo omwe akhawona ninga kuti wanthu wakuipa akhakhala na moyo wabwino thangwe ra kupundiza wanthu wakulungama. Iye adati: “Awa ni wanthu wakuipa omwe ambakhala mwakusaya thupo nthawe zentse.” (Salimo 73:12) Iye adasaya cakucita thangwe ra bzinthu bzakusaya cirungamo bzomwe akhawona ndipo adayamba kukumbuka kuti kutumikira Yahova kulibe phindu. Iye adati: “Pomwe ndikhayezera kuti ndibvesese bzinthu bzimwebzi, ndidasaya cakucita.” (Salimo 73:14, 16) Ndipo iye adazimbula kuti: “Tsono ine ndikhadasala pang’ono kusocera; ndikhadasala pang’ono kupsereruka.” (Salimo 73:2) Bzinthu ningati bzimwebzi bzidacitikirambo m’bale wakucemeredwa Alberto. a
8. Kodi n’ciyani comwe m’bale munango adacita pomwe adacitiridwa bzinthu bzakusaya cirungamo?
8 Alberto adanamiziridwa kuti aba kobiri za gwere. Bzimwebzi bzidacitisa kuti iye aluze udindo bomwe akhanabo m’gwere ndipo abale omwe adadziwa nkhaniyi adasiya kumulemekeza. Iye adati “Inepano ndikhabva ukali na ciya.” Iye adalekerera kuti kuwawa komwe akhabva kumucitise kuwofoka mwa uzimu ndipo adamala magole 5 ne kuyenda ku mitsonkhano. Bzimwebzi bzikulatiza bzomwe bzingacitike tikakhala na cakumtima thangwe ra bzinthu bzakusaya cirungamo bzomwe tidacitiridwa.
TEWEZERANI BZOMWE JEZU ADACITA POMWE AKHACITIRIDWA BZINTHU BZAKUSAYA CIRUNGAMO
9. Kodi ni bzinthu bzakusaya cirungamo bziponi bzomwe Jezu adacitiridwa? (Onani cithunzi-thunzi.)
9 Jezu adatipasa ciratizo cabwino kwene-kwene ca bzomwe tingacite tikakhala tikucitiridwa bzinthu mwakusaya cirungamo. Onani bzomwe iye adacitiridwa na adzinza wace pabodzi na wanthu winango. Adzinza wace omwe akhamukhulupira lini adamulewa kuti akhapenga, atsogoleri wa magereja adamulewa kuti akhaphatisidwa basa na madimonyo ndipo acikunda wa Aroma adamunyoza, kumumenya na kumupha. (Marko 3:21, 22; 14:55; 15:16-20, 35-37) Napo bziri tenepo, Jezu adapirira bzinthu bzentsenebzi ndipo alibe kuwabwezera. Kodi tingapfunze ciyani na ciratizo caceci?
Jezu adapereka ciratizo cabwino kwene-kwene ca bzomwe tingacite tikacitiridwa bzinthu mwakusaya cirungamo (Onani ndime 9-10)
10. Kodi Jezu adacita ciyani kuti apirire bzinthu bzakusaya cirungamo? (1 Pedru 2:21-23)
10 Werengani 1 Pedru 2:21-23. b Jezu adatisiyira ciratizo cabwino kwene-kwene kuti timutewezere tikakhala tikucitiridwa bzinthu mwakusaya cirungamo. Iye akhadziwa nthawe yakunyamala na nthawe yakulewalewa. (Mateu 26:62-64) Iye alibe kutawira mafala yentse yakunama yomwe wanthu akhambamulewa. (Mateu 11:19) Pomwe iye akhawatawira, akhawatukwana lini ne kuwagopswa. Iye akhabziphata thangwe “akhasiya [bzentse] m’manja mwa Ule omwe ambatonga mwacirungamo.” Jezu akhadziwa kuti Yahova akhawona kuti akucitiridwa bzinthu mwakusaya cirungamo. Iye akhakhulupira kuti Yahova angadadzamalisa bzinthu bzakusaya cirungamo pa nthawe yace.
11. Kodi n’ciyani comwe cingatithandize kuti timbalewelewe mu njira yabwino? (Onani bzithunzi-thunzi.)
11 Tingatewezere Jezu mwa kucita mphole na bzomwe tingalewe tikacitiridwa bzinthu mwakusaya cirungamo. Bzinthu bzinango bzomwe tingacitiridwe bzingakhale bzing’ono, tenepo bzingakhale bwino kundobzisiya tenepo. Ayai tingasankhule kunyamala kuti bzinthu bzileke kulemweratu. (Mpalizi 3:7; Tiyago 1:19, 20) Nthawe zinango tingafunike kulewalewa tikawona bzinthu bzakusaya cirungamo bzikucitika ayai kuti tikhotcerere cadidi. (Mabasa 6:1, 2) Penu tikuwona kuti mpsabwino kulewalewa, tingacite bwino kulewalewa mwakuderekha na mwaulemu. — 1 Pedru 3:15. c
Tikacitiridwa bzinthu mwakusaya cirungamo, tingatewezere Jezu mwa kuwona penu tingalewelewe na pa nthawe yomwe tingalewelewe (Onani ndime 11-12)
12. Kodi tingakhulupire tani “Ule omwe ambatonga [bzinthu bzentse] mwacirungamo”?
12 Tingatewezerembo Jezu mwa kusiya bzentse m’manja mwa “Ule omwe ambatonga mwacirungamo.” Wanthu akatilewa kuipa ayai akaticitira bzinthu mwakusaya cirungamo, timbakhulupira kuti Yahova akudziwa cadidi ca nkhaniyo. Bzimwebzi bzimbatithandiza kupirira pomwe tikucitiridwa bzinthu mwakusaya cirungamo thangwe timbadziwa kuti Yahova an’dzakonza bzentse pa nthawe yace. Tikasiya bzentse m’manja mwa Yahova, bzimbatithandiza kuti tileke kukhala na ciya pabodzi na kukoya cakumtima. Thangwe bzimwebzi bzingaticitise kucita bzinthu bzakuipa, kuleka kukhala wakukondwa na kudzonga uxamwali wathu na Yahova. — Salimo 37:8.
13. Kodi n’ciyani comwe Yahova adatipasa kuti atithandize kupirira pomwe tikucitiridwa bzinthu mwakusaya cirungamo?
13 N’cadidi kuti tin’dzakwanisa lini kutewezera bwino-bwino ciratizo ca Jezu. Nthawe zinango tingacite ayai kulewa cinthu comwe patsogolo pace tingadzakhumbule naco. (Tiyago 3:2) Ndipo nthawe zinango bzinthu bzomwe wanthu angaticitire bzingatiwawe kwene-kwene ndipo bzingatibweresere mabvuto kwa moyo wathu wentse. Penu ndibzo bzomwe bzikukucitikirani, khalani na citsimikizo cakuti Yahova akudziwa bzimwebzi. Ndipo Jezu omwe adabonerambo thangwe ra bzinthu bzakusaya cirungamo akubvesesambo momwe mukubvera. (Ahebereu 4:15, 16) Yahova adatipasa ciratizo cabwino comwe ni Jezu. Ndipo kuthumizira bzimwebzi, iye adatipasambo malango yomwe yambatithandiza kupirira bzinthu bzakusaya cirungamo bzomwe tikucitiridwa. Mbatiwoneni mavesi mawiri ya bukhu la Aroma yomwe yangatithandize.
“SIYIRANI MPATA UKALI BWA MULUNGU”
14. Kodi “[kusiyira] mpata ukali bwa Mulungu” kumbathandauza ciyani? (Aroma 12:19)
14 Werengani Aroma 12:19. Mpostolo Paulo adalimbikisa Akristau kuti “[asiyire] mpata ukali bwa Mulungu.” Timbasiyira mpata ukali bwa Mulungu tikasiya kuti iye an’dzamalise bzinthu bzakusaya cirungamo pa nthawe yace na mu njira yomwe iye ambaiwona kuti njakuthemera. Pomwe m’bale munango wakucemeredwa John adacitiridwa bzinthu mwakusaya cirungamo, iye adati: “Ndidafunika kucita nyongo kuti nditcenkhe kucita bzinthu bzakuphonyeka, tsono bzikhali lini bzakupusa. Cinembo ca Aroma 12:19 cidandithandiza kuti ndidikhirire Yahova.”
15. Thangwe ranyi mpsabwino kusiya kuti Yahova ndiye amalise bzinthu bzakusaya cirungamo?
15 Timbagumana phindu tikasiya kuti Yahova ndiye amalise bzinthu bzakusaya cirungamo bzomwe tacitiridwa. Tikacita bzimwebzi, tin’dzatcenkha kukhala wakusunama thangwe ra kuyezera kumalisa tekha bzinthu bzakusaya cirungamobzo. Yahova ali wakukonzeka kutithandiza. Bziri ninga kuti iye akutiuza kuti: “Siyani bzinthu bzakusaya cirungamo m’manja mwangu; inepano nin’dzabzimalisa.” Tikakhulupira kuti Yahova an’dzabwezera wale omwe ambaticitira bzinthu mwakusaya cirungamo, tin’funika lini kupitiriza kukhala tidakalipa, thangwe tikudziwa kuti iye an’dzacita bzinthu bzacirungamo. Bzimwebzi ndibzo bzomwe bzidathandiza John, omwe wafotokozedwa kale ule. Iye adati: “Inepano ndikasiya nkhaniyo m’manja mwa Yahova, iye an’dzaimalisa mu njira yabwino kuposa momwe inepano ningadacitira.”
“PITIRIZANI KUKUNDA CAKUIPA MWAKUCITA CABWINO”
16-17. Kodi mpembo ungatithandize tani “[kupitiriza] kukunda cakuipa mwakucita cabwino”? (Aroma 12:21)
16 Werengani Aroma 12:21. Paulo adalimbikisambo Akristau kuti “[apitirize] kukunda cakuipa mwakucita cabwino.” Pa Nkhani ya pa Phiri, Jezu adati: “Pitirizani kufuna anyamadulanthaka wanu na kupempherera omwe ambakuzunzani.” (Mateu 5:44) Bzimwebzi ndibzo bzomwe iye adacita. Jezu adacitiridwa bzinthu bzakuipa kwene-kwene ndipo adapirira kuwawa komwe akhabva. Tingakwanise lini kubvesesa bwino-bwino momwe iye adabonerera.
17 Jezu alibe kukundidwa na bzinthu bzakusaya cirungamo bzomwe akhacitiridwa. M’mbuto mwa kutemberera acikunda wale, iye adapemba kuti: “Baba, alekerereni, thangwe iwo an’dziwa lini bzomwe akucita.” (Luka 23:34) Tikambapempherera wale omwe akuticitira bzinthu mwakusaya cirungamo, bzimwebzi bzingatithandize kuti tileke kukoya cakumtima pabodzi na ciya na wanthu omwe akuticitira bzinthu bzakuipawo ndipo bzingatithandizembo kucinja momwe timbawawonera.
18. Kodi mpembo udathandiza tani Alberto na John kupirira pomwe adacitiridwa bzinthu mwakusaya cirungamo?
18 Mpembo udathandiza abale awiri omwe afotokozedwa mu nkhani inowa kuti akwanise kupirira pomwe adacitiridwa bzinthu mwakusaya cirungamo. Alberto adati: “Inepano ndidapempherera abale omwe adandicitira bzinthu mwakusaya cirungamo wale. Ndidakumbira kwa Yahova mwakubwereza-bwereza kuti andithandize kuyebwa bzomwe adandicitirabzo.” Bzakudekeza mpsakuti, Alberto akutumikira pomwe Yahova mwakukhulupirika. John adati: “Kazinji-kentse inepano ndidapempherera m’bale omwe adandicitira bzinthu mwakusaya cirungamo ule. Ndidakumbira Yahova kuti andithandize kumulekerera ndipo Yahova adandithandizadi kuti ndileke kukhala wa ukali na bzomwe adandicitirabzo nakuti ndisiye kumbamuwona kuipa. Ndipo mipembo imweyi idandithandizambo kukhala na mtendere wa mu mtima.”
19. Kodi n’ciyani comwe tin’funika kucita mpaka kuphampha kwa dzikoli? (1 Pedru 3:8, 9)
19 Pomwe dzikoli likuyenda kuphampha, ifepano tingacitiridwe bzinthu mwakusaya cirungamo. Bzimwebzi bzikaticitikira timbapembe kwa Yahova kuti atithandize. Kuthumizira bzimwebzi, titewezere bzomwe Jezu adacita pomwe akhacitiridwa bzinthu mwakusaya cirungamo ndipo tipitirize kuphatisa basa nfundo za m’Bibliya. Tikacita bzimwebzi, tingakhale na citsimikizo cakuti Yahova an’dzatisimba. — Werengani 1 Pedru 3:8, 9.
NYIMBO 38 Yahova An’dzakulimbisa
a Dzinali lacinjidwa.
b Mu kapitulo 2 na 3 ya tsamba la mpostolo Pedru, iye adafotokoza bza Akristau wakuyambirira omwe adacitiridwa bzinthu mwakusaya cirungamo na azipatrau wawo ayai na azibayawo omwe akhatumikira lini Yahova. — 1 Pedru 2:18-20; 3:1-6, 8, 9.
c Onani mu jw.org vidiyo yakuti Momwe Lufoyi Limbatsogolera ku Mtendere Wacadidi.
