NKHANI YAKUPFUNZA 45
NYIMBO 138 Kudeka kwa Invi
Bzomwe Tingapfunze na Mafala Yakumalizira Yomwe Amuna Wakukhulupirika Adayalewa
“Kodi nzeru zimbagumanika lini pakati pa acikulire, ndipo ni moyo lini utali omwe umbacitisa munthu kuti akhale na luso lakubvesesa bzinthu?” — DJOBI 12:12.
CAKULINGA CA NKHANIYI
Kubvera Yahova Mulungu kumbaticitisa kuti tisimbidwe tsapano nakuti tidzatambire moyo wakusaya kumala kutsogolo.
1. Thangwe ranyi tingapfunze bzizinji na acikulire?
TENTSENEFE timbafunikira malango kuti ticite bzakusankhula bzabwino pa moyo wathu. Ifepano tingatambire malango yamweya kwa akulu wa gwere na Akristau wakukhwima mwauzimu. Munthu omwe akutipasa malangoyo akakhala kuti ni mkulu kwene-kwene kuposa ifepano, tin’funika lini kukumbuka kuti malango yaceyo njakale-kale ndipo yangatithandize lini. Yahova akufuna kuti tipfunze na acikulire. Iwo ana magole mazinji kuposa ifepano, ambadziwa na kubvesesa bzinthu bzizinji ndipo ana nzeru kuposa ifepano. — Djobi 12:12.
2. Kodi tin’cezerana ciyani mu nkhani ino?
2 Mu nthawe za m’Bibliya, Yahova adaphatisa basa acikulire wakukhulupirika kuti alimbikise na kutsogolera wanthu wace. Mwa ciratizo, iye adaphatisa basa Mozeji, Davide na mpostolo Juwau. Iwo adakhala mu nthawe zakusiyana ndipo bzakucitika pa moyo wawo bzikhali bzakusiyanambo kwene-kwene. Tsono pomwe iwo akhadasala pang’ono kufa adapereka malango ya nzeru kwa maswaka. Amuna wacikulire wakukhulupirikawa adalatiza kuti kubvera Mulungu ni cinthu cakufunika kwene-kwene. Yahova adacitisa kuti mafala yawoyo yanembedwe m’Bibliya kuti yatithandizembo mu ntsiku zathu zino. Tentsenefe tingagumane phindu mwakucezerana mafala yawoyo bziribe basa penu ndife maswaka ayai ndife wacikulire. (Aroma 15:4; 2 Timotio 3:16) Mu nkhani ino, tin’cezerana mafala yomwe amuna amwewa adayalewa pomwe akhadasala pang’ono kufa ticiwonambo bzomwe tingapfunze na bzomwe iwo adalewabzo.
“IMWEPO MUN’DZAKHALA NA MOYO UTALI”
3. Kodi ni mabasa yaponi yomwe Mozeji adacita?
3 Mozeji adatumikira Yahova moyo wace wentse. Iye adatumikira ninga mpolofeta, mtongi, mtsogoleri na munembi. Mozeji adapfunza bzinthu bzizinji thangwe ra bzomwe adacita na bzomwe bzidamucitikira pa moyo wace! Iye adatsogolera mtundu wa Ajirayeri mwa kuwacosa mu Edjipito ndipo adawonambo bzakudabwisa bzizinji bza Yahova. Yahova adamuphatisambo basa kuti anembe mabukhu maxanu ya m’Bibliya, Salimo 90 ndipo pinango adanembambo Salimo 91. Bzikuwoneka kuti ndiye omwe adanembambo bukhu la Djobi.
4. Kodi Mozeji adalimbikisa yani, ndipo thangwe ranyi?
4 Pomwe Mozeji akhana magole 120 ndipo akhadasala pang’ono kufa, iye adatsonkhanisa Ajirayeri wentse kuti awakumbuse bzinthu bzomwe iwo akhadawona Yahova akuwacitira. Pomwe akhali wana, winango wa iwo adawona bzakudabwisa bzizinji bzomwe Yahova adacita na momwe adalangira Aedjipito. (Ekisodo 7:3, 4) Iwo adafamba na pakati pa Nyanza Ifuira yomwe ikhadagawanika ndipo adawonambo kupfudzidwa kwa acikunda wa Farawo. (Ekisodo 14:29-31) Mu dambo, Yahova adawakhotcerera na kuwasamalira. (Deuteronomiyo 8:3, 4) Pomwe mtundu wa Ajirayeri ukhadasala pang’ono kupita mu Dziko Lakupiciridwa Mozeji adawona kuti bzikhali bwino kuti aphatise basa mpata wakumalizira omwe akhanawo kuti alimbikise wanthuwo. a
5. Kodi mafala yakumalizira ya Mozeji yomwe yambagumanika pa Deuteronomiyo 30:19, 20 yadawatsimikizira ciyani Ajirayeri?
5 N’ciyani comwe Mozeji adalewa? (Werengani Deuteronomiyo 30:19, 20.) Iye adakumbusa mtundu wa Ajirayeri kuti angadakakhala na moyo wabwino mu Dziko Lakupiciridwa. Thangwe ra kusimbidwa na Yahova, Ajirayeri angadakakhala na moyo utali mu dziko lomwe iye adawapicira kuwapasa. Ndipo dzikolo likhali lakudeka na la ndovolo! Mozeji adawafotokozera momwe dzikolo likhaliri mwa kulewa kuti: “Dziko lomwe lina mizinda mikulu-mikulu yabwino yomwe imwepo mulibe kuimanga, mizinda yomwe ina nyumba zakudzala na bzinthu bzabwino bzakusiyana-siyana bzomwe imwepo mulibe kubziphatira basa, micera yomwe mulibe kuicera ndimwepo, minda ya uva na miti ya maolivera yomwe imwepo mulibe kuibzala.” — Deuteronomiyo 6:10, 11.
6. Thangwe ranyi Mulungu adalekerera kuti mitundu minango ikunde Ajirayeri?
6 Mozeji adapasambo Ajirayeri mcenjezo. Kuti iwo apitirize kukhala mu dziko lakudekalo, akhafunika kupitiriza kubvera malamulo ya Yahova. Mozeji adawakumbusa kuti iwo akhafunika “kusankhula moyo” mwa kubvera Yahova na “kumuphatisisa.” Tsono Ajirayeri alibe kubvera Yahova. Thangwe ra bzimwebzi, Mulungu adalekerera kuti Asiriya ndipo patsogolo pace Ababiloniya akunde Ajirayeri aciwayendesa ku ukapolo. — 2 Amambo 17:6-8, 13, 14; 2 Nkhani 36:15-17, 20.
7. Kodi tingapfunze ciyani na mafala ya Mozeji? (Onani cithunzi-thunzi.)
7 Kodi tikupfunza ciyani? Kubvera kun’dzapulumusa moyo wathu. Ninga Ajirayeri omwe akhadasala pang’ono kupita mu Dziko Lakupiciridwa, ifepanombo tasala pang’ono kuti tipite mu dziko lipsa lomwe Yahova adatipicira ndipo iro lin’dzakhala paraizo. (Zaiya 35:1; Luka 23:43) Mu dzikolo mun’dzakhala mulibe Sathani na madimonyo yace. (Apokalipse 20:2, 3) Mu dzikolo mun’dzakhala mulibe magereja yomwe yambapfunzisa bzinthu bzakunama pakulewa bza Yahova. (Apokalipse 17:16) Ndipo mun’dzakhala mulibembo maboma yomwe yambaboneresa wanthu. (Apokalipse 19:19, 20) Yahova an’dzalekerera lini kuti m’Paraizo mukhale na apanduki. (Salimo 37:10, 11) Kuli-kwentse wanthu an’dzabvera malamulo yakulungama ya Yahova yomwe yambacitisa kuti wanthu akhale wakuphatana na wa mtendere. Ndipopa iwo an’dzafunana na kumbakhulupirana. (Zaiya 11:9) Tikudikhirira bzinthu bzabwino kwene-kwene! Ndipo kuthumizira bzimwebzi, ifepano tikabvera Yahova tin’dzapitiriza kukhala mu paraizo pa dziko la pantsi pano sikuti kwa magole yakucepa koma mpaka kale-kale. — Salimo 37:29; Juwau 3:16.
Ifepano tikabvera Yahova tin’dzapitiriza kukhala mu paraizo pa dziko la pantsi pano sikuti kwa magole yakucepa koma mpaka kale-kale (Onani ndime 7)
8. Kodi piciro lakukhala na moyo wakusaya kumala lidathandiza tani misiyonario munango? (Djuda 20, 21)
8 Tikambakumbukira kwene-kwene bza piciro la Mulungu la kutipasa moyo wakusaya kumala, ifepano tin’dzafunisisa kumubvera bziribe basa mabvuto yomwe tikugumana nayo. (Werengani Djuda 20, 21.) Piciro limweri lingatipasembo mphanvu kuti tipitirize kucita bzomwe Yahova ambafuna napo nthawe zinango bzingakhale bzakunesa. M’bale munango omwe adamala magole mazinji akutumikira ninga misiyonario ku África, adalewa kuti kazinji-kazinji, akhayezedwa kuti acite cinthu comwe cimbakondwesa lini Yahova. Iye adati: “Kukumbukira kuti bzimwebzi bzingadacitisa kuti ndiluze moyo wakusaya kumala kudandicitisa kuti ndifunisise kulimbana na bvuto langulo ndicidandaulirambo Yahova mu mpembo kuti andithandize. Na thandizo lace, inepano ndidakwanisa kukunda bvutolo.”
“BZINTHU BZIN’DZAKUFAMBIRA BWINO”
9. Kodi ni mabvuto yaponi yomwe Davide adagumana nayo pa moyo wace?
9 Davide akhali mambo wabwino. Iye akhali muimbi, akhanemba nyimbo, akhali mcikunda ndipo akhali mpolofeta. Iye adagumana na mabvuto mazinji pa moyo wace. Adamala magole mazinji akukhala mwakuthawa-thawa thangwe akhafuna kuphedwa na Mambo Sauli omwe akhamucitira njiru. Pomwe Davide adakhala mambo adafunikambo kuthawa pomwe mwana wace Abisalomu akhafuna kumupha kuti amutengere umambobo. Napo kuti Davide adagumana na mabvuto mazinji ndipo adaphonyambo bzinthu bzinango, iye adalatiza kuti akhali wakukhulupirika kwa Mulungu mpaka kuphampha kwa moyo wace. Yahova adalewa kuti Davideyo ‘akhali munthu omwe akhakondwesa mtima wace.’ Ndipopa tin’funika kutetekera malango yanzeru yomwe iye adalewa! — Mabasa 13:22; 1 Amambo 15:5.
10. Thangwe ranyi Davide adapasa malango mwana wace Salomau omwe angadakhala mambo m’mbuto mwace?
10 Mwa ciratizo, onani malango yomwe Davide adapasa mwana wace Salomau omwe adadzakhala mambo m’mbuto mwace. Davide adapasa malango Salomauyo thangwe rakuti akhadasankhulidwa na Yahova kuti amange templo yomwe wanthu angadaiphatisa basa pa kunamata Yahova. (1 Nkhani 22:5) Pakhana basa lizinji kuti licitidwe ndipopa iye akhafunika kuthandizidwa na Yahova kuti akwanise kutsogolera wanthuwo. Kodi n’ciyani comwe Davide angadalewa kwa iye? Mbatiwoneni.
11. Mwakubverana na 1 Amambo 2:2, 3, kodi Davide adamutsimikizira ciyani Salomau, ndipo n’ciyani comwe cidacitika pomwe iye adabvera malango ya Yahova? (Onani cithunzi-thunzi.)
11 N’ciyani comwe Davide adalewa? (Werengani 1 Amambo 2:2, 3.) Davide adatsimikizira mwana wace kuti angadabvera Yahova bzinthu bzingadamufambira bwino pa moyo wace. Ndipo bzimwebzi bzidacitikadi. Pomwe Salomau adabvera malango ya Yahova, Yahovayo adamupasa bzinthu bzizinji bzabwino ndipo adamuthandiza mu njira zizinji. (1 Nkhani 29:23-25) Iye adamanga templo yakudeka kwene-kwene ndipo adanembambo mabukhu manango ya m’Bibliya. Adakhala wakubvekera thangwe ra cuma cace na nzeru zace. (1 Amambo 4:34) Tsono ninga momwe Davide adalewera, kuti bzinthu bzimufambire bwino Salomauyo, iye akhafunika kupitiriza kubvera Yahova Mulungu. Bzakupasa ntsisi mpsakuti na kupita kwa nthawe Salomau adayamba kunamata mirungu inango. Yahova alibe kukomedwa na bzimwebzi ndipo iye adasiya kumupasa nzeru kuti atonge wanthu wa Mulungu mu njira yabwino na yacirungamo. — 1 Amambo 11:9, 10; 12:4.
Mafala yakumalizira yomwe Davide adauza mwana wace Salomau yambatithandiza kuwona kuti tikabvera Yahova, iye angatipase nzeru kuti ticite bzakusankhula bzabwino (Onani ndime 11-12) b
12. Kodi tikupfunza ciyani na mafala ya Davide?
12 Kodi tikupfunza ciyani? Kubvera kun’dzacitisa kuti bzinthu bzitifambire bwino. (Salimo 1:1-3) N’cadidi kuti Yahova angatipase lini cuma ayai ulemerero ninga momwe adacitira na Salomau. Tsono tikabvera Mulungu wathu, iye an’dzatipasa nzeru zomwe zin’dzatithandiza kucita bzakusankhula bzabwino. (Mimwani 2:6, 7; Tiyago 1:5) Nfundo za m’Bibliya zomwe iye adatipasa zingatithandize pa nkhani yakusankhula basa, mapfunziro, masenzeka na momwe tingambaphatisire basa kobiri. Tikaphatisa basa nzeru za Mulungu pa moyo wathu ifepano timbakhotcerera uxamwali bwathu na iye ndipo tin’dzatambira moyo wakusaya kumala. (Mimwani 2:10, 11) Timbakhala na axamwali wabwino ndipo banja lathu limbakhala lakukondwa.
13. Kodi n’ciyani cidathandiza Carmen kuti bzinthu bzimufambire bwino pa moyo wace?
13 Carmen, omwe ambakhala ku Moçambique, akhakumbuka kuti mapfunziro yapadzulu ndiyo yangacitise munthu kuti akhale na moyo wabwino. Tenepo iye adayamba kupfunza ku universidade ndipo adasankhula kucita kurso ya bzakumanga-manga. Iye adati: “Inepano ndikhakomedwa kwene-kwene na bzomwe ndikhapfunzabzo. Tsono bzimwebzi bzikhandimalira nthawe na mphanvu. Tikhayamba kupfunza 7:30 ndipo tikhakotoka 18:00. Ndikhambatazira kuyenda ku mitsonkhano ndipo ndikhadawofoka mwauzimu. Pomwe ndidaikumbukira bwino nkhaniyi ndidawona kuti ndikhabvera lini malango ya Yahova.” (Mateu 6:24) Iye adaipempherera nkhaniyi ndipo adafufudza m’mabukhu yathu. Iye adati: “Pambuyo pa kutambira malango kwa abale wakukhwima mwauzimu na kwa mai wangu, ndidawona kuti bzikhali bwino kusiya kupfunza ku universidade kuti ndicite utumiki bwa nthawe zentse. Bzimwebzi bzidandithandiza kucita bzakusankhula bzabwino pa moyo wangu ndipo nimbakhumbula lini.”
14. Kodi nfundo ikulu ya mafala ya Mozeji na Davide njiponi?
14 Mozeji na Davide akhafuna Yahova ndipo akhadziwa kuti kubvera Yahovayo cikhali cinthu cakufunika kwene-kwene. Mafala yomwe iwo adalewa pomwe akhadasala pang’ono kufa yadalimbikisa wanthu omwe adayabva kuti atewezere ciratizo cawo mwakupitiriza kukhala wakukhulupirika kwa Yahova Mulungu wawo. Iwo adacenjezambo kuti omwe an’siya Yahova angaluze uxamwali na iye pabodzi na bzisimbo bzomwe iye adapicira. Malango yawo njakufunikambo kwa ifepano ntsiku zino. Pambuyo pa kupita magole mazinji, mtumiki winango wakukhulupirika wa Yahova adalatizambo kuti kukhala wakukhulupirika kwa Mulungu n’cinthu cakufunika kwene-kwene.
“NDIRIBE CIKONDWESO CIKULU”
15. Kodi ni mwayi uponi omwe mpostolo Juwau adakhala nawo pa moyo wace?
15 Juwau akhali xamwali wa ponda ndipondembo wa Jezu Kristu. (Mateu 10:2; Juwau 19:26) Juwau adafamba pabodzi na Jezu pomwe akhapalizira, adawona bzakudabwisa bzomwe Jezu adacita ndipo adapitiriza kukhala wakukhulupirika kwa Jezuyo pa nthawe yomwe iye adagumana na mabvuto. Iye adawona pomwe Jezu akhaphedwa ndipo adamuwonambo pomwe iye adalamusidwa. Iye adawona gwere lacikristau likukula ndipo adakhalambo na moyo mpaka pomwe mafala yabwino yadapaliziridwa pa “cirengedwe centse ca pa dziko la pantsi.” — Akolose 1:23.
16. Kodi mbani omwe adagumana phindu na matsamba ya mpostolo Juwau?
16 Juwau adakhala na moyo utali. Tsono pomwe iye akhadasala pang’ono kufa adakhala na mwayi wakunemba mabukhu ya m’Bibliya. Iye adanemba bukhu la Apokalipse. (Apokalipse 1:1) Juwau adanembambo bukhu libodzi lomwe limbalewa bza moyo wa Jezu lomwe limbadziwika na dzina lace. Ndipo iye adanembambo matsamba matatu. Tsamba lacitatu lomwe iye adanemba, adanembera Mkristau wakukhulupirika wakucemeredwa Gayo, omwe Juwau akhamuwona ninga mwana wace. (3 Juwau 1) Pa nthawe imweyire, pakhana wanthu azinji omwe Juwau akhawawona ninga wana wace wauzimu. Bzomwe munthu wakukhulupirikayu adanemba bzidalimbikisa ateweri wa Jezu ndipo bzin’limbikisambo ifepano ntsiku zino.
17. Mwakubverana na 3 Juwau 4, kodi n’ciyani comwe cimbaticitisa kuti tikondwe?
17 Kodi n’ciyani comwe Juwau adanemba? (Werengani 3 Juwau 4.) Juwau adalewa kuti akhakomedwa kwene-kwene thangwe ra kuwona kuti abale na mpfumakazi akhapitiriza kubvera Mulungu. Tsono pa nthawe yomwe iye adanemba tsamba lace lacitatu wanthu winango akhamwaza bzipfunziso bzakunama mu gwere bzomwe bzidacitisa kuti gwere likhale lakugawanika. Napo bziri tenepo, winango adapitiriza “kufamba m’cadidi.” Iwo akhabvera Yahova ndipo ‘akhafamba mwakubverana na lamulo yace.’ (2 Juwau 4, 6) Akristau wakukhulupirikawa adakondwesa Juwau pabodzi na Yahova. — Mimwani 27:11.
18. Kodi tingapfunze ciyani na mafala ya Juwau?
18 Kodi tikupfunza ciyani? Tikakhala wakukhulupirika kwa Yahova tin’dzakhala wakukondwa ndipo tin’dzacitisambo anzathu kuti akhalembo wakukondwa. (1 Juwau 5:3) Mwa ciratizo, timbakhala wakukondwa tikadziwa kuti tikukondwesa Yahova. Iye ambakomedwa kwene-kwene akawona tikulamba mayezo yomwe timbagumana nayo mu dzikoli ticibvera malamulo yace. (Mimwani 23:15) Anjo kudzulu ambakondwambo. (Luka 15:10) Ifepano timbakhalambo wakukondwa tikambawona anzathu akupitiriza kukhala wakukhulupirika maka-maka akakhala akugumana na mabvuto ayai mayezo. (2 Atesalonika 1:4) Ndipo dzikoli likadzapfudzidwa, ifepano tin’dzakhala wakukondwa kwene-kwene thangwe ra kudziwa kuti tidakhala wakukhulupirika kwa Yahova mu dziko lomwe likhatongedwa na Sathani.
19. Kodi mpfumakazi Rachel idalewa ciyani pa nkhani yakupfunzisa winango cadidi? (Onani cithunzi-thunzi.)
19 Ifepano timbakomedwambo kwene-kwene tikambauza winango cadidi ca m’Bibliya. Rachel, omwe ambakhala ku República Dominicana, ambawona kuti kupfunzisa munthu bza Mulungu wathu wakudabwisa omwe timbamutumikira ni mwayi ukulu kwene-kwene. Iye adathandiza wanthu azinji kuti ayambe kutumikira Yahova. Iye adati: “Nimbakomedwa kwene-kwene kuwona wanthu omwe ndawapfunzisa Bibliya akufuna Yahova, kumukhulupira na kucinja bzinthu pa moyo wawo kuti amukondwese. Nimbakhala wakukondwa kwene-kwene mwakuti ne nimbakumbukira lini nyongo yomwe ndidacita kuti ndiwapfunzise.”
Ifepano tingakhale wakukondwa tikambapfunzisa wanthu winango kuti afune na kubvera Yahova (Onani ndime 19)
GUMANANI PHINDU NA MAFALA YAKUMALIZIRA YA AMUNA WAKUKHULUPIRIKA
20. Kodi tidandendemerana na Mozeji, Davide na Juwau pa bzinthu bziponi?
20 Mozeji, Davide na Juwau adakhala mu nthawe yakusiyana na yathu ndipo moyo wawo udakhalambo wakusiyana na wathu. Tsono tidandendemerana nawo pa bzinthu bzizinji. Iwo adatumikira Mulungu wacadidi ndipo ifepano timbatumikirambo Mulungu wacadidi. Ninga iwo, ifepano timbapemba kwa Yahova ndipo timbathemba iye kuti atipase malango. Ndipo ninga amuna wacikulirewa ifepanombo timbakhulupira kuti iye ambasimba wale omwe ambamubvera.
21. Kodi wale omwe ambabvera malango ya amuna wakukhulupirika ninga Mozeji, Davide na Juwau an’dzatambira bzisimbo bziponi?
21 Tenepo bwerani titeweze malango yomwe amuna wacikulirewa adayalewa mwakubvera malamulo ya Yahova. Tikacita bzimwebzi, bzinthu bzin’dzatifambira bwino pa cinthu ciri-centse comwe tin’dzacita. Tin’dzakhala na moyo “utali,” inde, mpaka kale-kale! (Deuteronomiyo 30:20) Ndipo tin’dzakhala wakukondwa thangwe ra kudziwa kuti tikukondwesa Baba wathu wakudzulu Yahova omwe an’dzatisimba mu njira yomwe tingayidikhirire lini. — Aefezo 3:20.
NYIMBO 129 Ifepano Tin’dzapitiriza Kupirira
a Ajirayeri azinji omwe adawona bzakudabwisa bza Yahova pa Nyanza Ifuira alibe kupita mu Dziko Lakupiciridwa. (Numero 14:22, 23) Yahova adalewa kuti wentse omwe akhana magole 20 kuyenda kutsogolo angadafera mu dambo. (Numero 14:29) Tsono azinji omwe akhanati kupfitsa magole 20 alibe kufa. Iwo, Djoswa, Kalebe na Alevi ndiwo adayambuka Mkulo wa Jordano acipita mu Dziko Lakupiciridwa. — Deuteronomiyo 1:24-40.
b BZOMWE BZIKUCITIKA PA CITHUNZI-THUNZI: Kumadzere: Pomwe Davide asala pang’ono kufa iye akupasa mwana wace Salomau malango. Kumadidi: Abale na mpfumakazi akutambira malango ya nzeru yakucokera kwa Yahova pa Xikola ya Utumiki bwa Upainiya.
