Pomwe gole la 1924 likhanati kufika, abale wa pa Beteli akhadayamba kale kukonza radiyo yakucemeredwa WBBR ku Staten Island mu mzinda wa Nova Iorque. Pomwe adamala kukonza mbuto, iwo adamanga nyumba ikulu kuti wanthu omwe an’phata basalo akhale ndipo adakonzambo nyumba inango kuti ambaikhire mitcini ya radiyoyo. Pomwe adamala basa limweri, abalewo adayamba kulumikiza mitcini kuti radiyoyo iyambe “kuphata basa.” Tsono pakhana mphitca zizinji zomwe akhafunika kuzikunda.

Abalewo adaneseka kuti aimise antena ya radiyoyo. Antenayo ikhadatalimpha mametro 91 ndipo ikhafunika kudjimbikiridwa na maposto mawiri yomwe yakhadatalimpha mametro 61. Pomwe iwo adayezera kuiimisa, adatazira. Koma pakuti abalewo akhathemba Yahova adadzakwanisa. M’bale Calvin Prosser, omwe akhathandizirambo basali, adalewa kuti: “Tingadakwanisiratu kuimisa antenayo mwakusaya kugumana na mphitca, ifepano tingadabzitumbiza tekha mwa kulewa kuti: ‘Ife timbadziwa basa!’” Abalewo adalatiza kuti adakwanisa kucita basalo thangwe ra kuthandizidwa na Yahova, tsono mabvuto yawoyo yalibe kumala.

Pa nthawe imweyi, wanthu akhadayamba tsapanopa kuphatisa basa radiyo ndipo pakhakonzedwa lini mitcini ya radiyo kuti igulisidwe. Tenepo, abale adagula mtcini omwe ukhaphatisidwa kale basa wa 500 watts kumweko. M’mbuto mwakungula mikro, iwo adaphatisa basa mikro ya telefoni. Ntsiku inango usiku, m’mwezi wa Fevereiro, abalewo adawona kuti bzikhali bwino kuyezera mitciniyo kuti awone penu ingadaphata basa bwino. Iwo akhafunikira programa kuti ibveke mu radioyo, ndipopa adayamba kuimba nyimbo za Umambo. M’bale Ernest Lowe adakumbukira bzomwe bzidacitika pa ntsikuyo. Pomwe abalewo  akhaimba, iwo adaligaliridwi na Mtongi Rutherford a omwe adawabva mu radiyo yace na ku Brooklyn, pa mtantho wa makilometro 25.

Pakufuna kuseka nawo, M’bale Rutherford adawauza kuti: “Mukucita baludya. Mukukhala ningati mphaka zikumenyana!” Abalewo adaimisa programayo. Napo kuti adabva manyazi pang’ono, iwo adakomedwa thangwe ra kudziwa kuti radiyoyo ikhabveka.

Pa 24 Fevereiro, 1924, pomwe ikhamwazidwa programa yakuyamba ya radiyoyi, M’bale Rutherford adalewa kuti radiyoyo idakonzedwa kuti “ithandizire basa lomwe Mambo Jezu Kristu” adawapasa. Iye adalewa kuti: “Radiyoyi in’thandiza wanthu wentse kubvesesa Bibliya na thandauzo la nthawe yomwe tikukhala ino.”

Programa yakuyambayi idafamba bwino kwene-kwene. Radiyo WBBR idaphatisidwa basa magole 33 ndipo pa nthawe yentseneyi iyo idamwaza programa zakusiyana-siyana za gulu la Yahova.

Mu Julho 1924, Anyakupfunza wa Bibliya adacita mtsonkhano wa cigawo ku Columbus, Ohio. Abale wa m’madziko yakusiyana-siyana kuzungulira dziko lentse la pantsi adayenda ku mtsonkhanoyo, ndipo iwo adabva nkhani mu bzirewedwe bza Ciarabe, Cingirezi, Cifaransa, Cigerman, Cigerego, Cihungaro, Citaliyana, Cilituania, Cipoloneji, Cirusso, Ciukraniya na cirewedwe ca ku Escandinávia. Mbali zinango za mtsonkhanoyo zidamwazidwa pa radiyo, ndipo padacitidwa makonzedwe yakuti jornale ya kumweko imbanembe bzomwe bzikhacitika ntsiku iri-yentse pa mtsonkhanopo.

Pa cinai, 24 Julho, abale wakupitirira 5000 adayenda kukapalizira mu mzinda omwe ukhacitikira mtsonkhanoyo. Iwo adagawira mabukhu pafupi-fupi 30 000 ndipo adayambisa mapfunziro ya Bibliya mazinji kwene-kwene. Ntsanza ya Mulindiri idacemera ntsiku imweyi kuti “ntsiku yakudekeza kwene-kwene ya mtsonkhano.”

Pa cixanu, ntsiku ya 25 Julho pomwe M’bale Rutherford akhafotokoza nkhani yace, mwakukhwimika iye adalewa kuti akulu-akulu wa ndale, wa magereja na wa malonda “akucitisa kuti wanthu aleke kupfunza bza Umambo bwa Mulungu na bzomwe bun’dzaticitira kutsogolo.” Kuthumizira bzimwebzi, iye adalewa kuti wanthu amwewa akhawona ninga kuti “bungwe la Liga das Nações ‘ndiro lomwe lingadakwanisa kumalisa mabvuto ya wanthu pa dziko la pantsi, napo kuti ni Umambo bwa Mulungu bokha bomwe bungakwanise kucita bzimwebzi.’” Anyakupfunza wa Bibliya  akhafunika kukhala wakupirira na wakukhwimika kuti apalizire mafala yamweya kuna wanthu.

Pakufotokoza momwe mtsonkhanoyo udafambira, Ntsanza ya Mulindiri idalewa kuti: “Acikunda wa Mbuya wakucepa omwe akhali pa Mtsonkhano wa Cigawo wa ku Columbus uno alimbisidwa kwene-kwene cikhulupiro cawo . . . , ndipo mtsonkhanoyu wawathandiza kuti akhale wakukhwimika kuti apalizire napo pomwe akutsutsidwa.” Leo Claus, omwe akhalipombo pa mtsonkhanoyo, adalewa kuti: “Pambuyo pa mtsonkhano ule, ifepano tikhafunisisa kupalizira mafala yale ku gawo lathu.”

Mu Outubro, Anyakupfunza wa Bibliya adayamba kugawira tumatsamba tomwe tukhana msolo wakuti Ecclesiastics Indicted, (Abusa Omwe ana Mirandu) tomwe tukhana mafala yomwe M’bale Rutherford adayafotokoza pa mtsonkhano ule. Mu kamzinda kang’ono ku Cleveland, Oklahoma, Frank Johnson adamaliza kugawira tumatsamba pomwe pakhadasala mphindi 20 kuti anzace amalizembo. Iye akhafunika lini kuima padeca thangwe amuna wa mu mzindamo omwe akhadakalipa na basa lomwe iye akhacita akhamunyang’ana. M’bale Frank adakumbuka bza kuyenda kukabisalika mu gereja yomwe ikhali pafupi. Pakuti mu gerejamo mukhalibe wanthu, iye adasiya tumatsambato pa Bibliya la m’busa na pa kadera iri-yentse. Patsogolo pace, iye adabula mu gerejamo mwakamfulumize. Tsono pakuti nthawe yace ikhanati kumala, iye adapita pomwe m’magereja mawiri acicita bzibodzi-bodzibzi.

Frank adabwerera akuthamanga ku mbuto yomwe akhadapangana kuti akagumane na apalizi anzacewo. Iye adabisalika kuseri kwa mbuto yakugulisira mafuta ya karo acimbanyang’anisa wanthu omwe akhamunyang’anawo. Wanthuwo adagwata na karo, tsono alibe kumuwona. Pomwe amunawo adayenda, apalizi anzace wa Frank, omwe akhapalizirambo pafupi, adafika ndipo adamutenga aciyenda.

Pakukumbukira momwe basa limweri lidacitikira, m’bale m’bodzi omwe adacitambo basali adalewa kuti: “Pomwe tikhacoka mu kamzindako tidawona magereja matatu. Pa gereja iri-yentse pakhana wanthu pafupi-fupi 50. Winango akhawerenga tumatsambato ndipo winango akhalatiza abusa wawo. Ifepano tidacoka pomwe anyamadulanthaka wathu akhanati kufika ndipo bzimwebzi bzidacitisa kuti tileke kugumana na mabvuto! Timbatenda kwene-kwene Yahova Mulungu wathu thangwe ra kutikhotcerera na kutithandiza kudziwa bzomwe tingadacita kuti tipalizire mafala yale ticisaya kuphatidwa na anyamadulanthaka wa Umambo.”

M’madziko manango, Anyakupfunza wa Bibliya adalatizambo kuti akhali wakukhwimika pakupalizira. Ku norte kwa França, Józef Krett adapalizira wanthu wakucokera ku Polónia omwe akhaphata basa mu mgodi. Iye akhadasankhulidwa kuti adzafotokoze nkhani ya msolo wakuti “Kulamusidwa kwa Anyakufa Kun’citika Tsapanopali.” Pomwe micemo idaperekedwa mu mzindamo, padre wa mu mzindamo adauza wanthu wa gereja yace kuti aleke kuyenda kukabva nkhaniyo. Bzomwe adalewabzo bziribe kuphata basa. Wanthu wakupitirira 5000 adayenda kukabva nkhaniyo kuphatanidzambo padreyo! M’bale Krett adakumbira padreyo kuti afotokoze bzomwe ambakhulupira, tsono iye adalamba. M’bale Krett adagawira mabukhu yentse yomwe akhanayo thangwe adawona kuti wanthuwo akhafunisisa kubva Fala la Mulungu. — Amose 8:11.

Ku África, m’bale Claude Brown adafikisa mafala yabwino ya Umambo mu dziko la Costa de Ouro, lomwe tsapano limbadziwika na dzina lakuti Gana. Nkhani zace na mabukhu yomwe iye akhagawira bzidathandiza kuti wanthu azinji adziwe cadidi mu dzikolo. John Blankson, omwe akhapfunza kuti adzacite basa lakugulisa mankhwala, adatetekerambo nkhani ibodzi ya M’bale Brown. Mwakusaya kucedwa, iye adazindikira kuti akhadagumana cadidi. John adalewa kuti: “Ndidakomedwa kwene-kwene na cadidi comwe  ndidapfunzaco ndipo ndidakhala wakutsudzuka kuuzambo anzangu wa ku xikola.”

John adabvesesa kuti cipfunziso ca utatu cikhacokera lini m’Bibliya, tenepo ntsiku inango iye adayenda ku gereja ya Anglicana kuti akabvunze padre bza nkhani imweyi. Padreyo adamuthamangisa, ndipo mwakukuwa adamuuza kuti: “Iwepo ndiwe lini Mkristau, iwepo ndiwe munthu wa Sathani. Coka muno!”

Pomwe John adafika ku mui, iye adanembera tsamba padreyo acimukumbira kuti adzakhotcerere nkhani ya utatu pamaso pa wanthu azinji. Padreyo adatawira karta ya John mwa kumukumbira kuti adzagumane naye mu xikiritoriyo ya mpfunzisi wace. Pomwe adagumana, mpfunzisiyo adamubvunza Johnyo penu akhadamunemberadi tsamba padreyo.

John adatawira kuti: “Inde, ndanemba.”

Mpfunzisiyo adauza John kuti anembere tsamba padreyo kuti amupepese. Tenepo John adanemba kuti:

“Apadre, apfunzisi wangu andikumbira kuti ndikunembereni tsamba kuti ndikupepeseni. Inepano ndine wakukonzeka kukupepesani pokha-pokha mukabvuma kuti mumbapfunzisa bzinthu bzakunama.”

Mpfunzisiyo adaipidwa na mafala yomwe John akhanembayo ndipo adamubvunza kuti: “John, kodi mpsimwebzi bzomwe iwepo un’funa kunemba?”

John adatawira kuti: “Inde, apfunzisi. Bzimwebzi ndibzo bzomwe inepano ninganembe.”

Mpfunzisiyo adamutawira kuti: “Iwepo un’cosedwa xikola. Kodi unganesane tani na padre wa gereja ya boma ucipitiriza kuphatira basa boma?”

John adatawira kuti: “Tsono, apfunzisi, . . . imwepo mukakhala mukutipfunzisa, ifepano tikasaya kubvesesa bzinthu bzinango, kodi timbakubvunzani lini?”

Mpfunzisiyo adatawira kuti: “Mumbandibvunza.”

Ndipo John adalewa kuti: “Bzimwebzi ndibzo bzomwe bzacitika. A padre wale akhatipfunzisa Bibliya, tsono inepano ndidawacita mbvunzo. Penu iwo alibe kukwanisa kutawira mbvunzoyo, thangwe ranyi inepano nin’funika kuwapepesa?”

John alibe kucosedwa xikola. Ndipo alibembo kunemba tsamba kuti apepese padreyo.

Pakufotokoza bzomwe bzidacitika mu gole limweri, Ntsanza ya Mulindiri idalewa kuti: “Ninga Davide, ifepano tingalewe kuti: ‘[Mwandipasa] mphanvu kuti ndikwanise kumenya nkhondo.’ (Salimo 18:39) Goleli lakhala lakulimbikisa kwene-kwene thangwe Mbuya watithandiza. Atumiki wace wakubatizidwa acita basa lace mwakukondwa.”

Kuphampha kwa goleli, abale adacita makonzedwe kuti akhale na radiyo zinango. Iwo adayambambo kumbamwaza nkhani na radiyo inango yomwe ikhali ku Chicago. Radiyo imweyi ikhacemeredwa kuti WORD (mu Cinyungwe FALA). Radiyoyi idapasidwa dzina limweri thangwe rakuti ingadaphatisidwa basa pa kupalizira Fala la Mulungu. Pakuti radiyo WORD mphanvu yace ikhali ya 5000 watts, iyo ikhabveka pa mtantho wa makilometro mazinji kwene-kwene, mpaka ku norte kwa Canadá.

Gole la 1925 lidakhala lakudekeza kwene-kwene, thangwe gole limweri Anyakupfunza wa Bibliya adakhala na kabvesesedwe kapsa ka Apokalipse kapitulo 12. Thangwe ra kabvesesedwe kapsako, winango alibe kupitiriza kutumikira Yahova. Tsono winango adakomedwa kwene-kwene na kabvesesedwe kapsako komwe kakhalewa bza bzinthu bza kudzulu bzomwe bzimbawoneka lini na maso na momwe bzimwebzi bzingadathandizira wanthu wa Mulungu pa dziko la pantsi.