NKHANI YAKUPFUNZA 43
NYIMBO 90 Timbalimbisane
Bzomwe Mungacite Kuti Muleke Kumbapenukira
“Onesesani bzinthu bzentse.” — 1 ATESALONIKA 5:21.
CAKULINGA CA NKHANIYI
Mu nkhani ino, tiniwona bzomwe tingacite kuti timalise kupenukira pomwe tikutumikira Yahova.
1-2. (a) Kodi atumiki winango wa Yahova angapenukire ciyani maka-maka? (b) Kodi tin’pfunza ciyani mu nkhani ino?
WANTHU wa misinkhu yentse nthawe zinango ambapenukira. a Mwa ciratizo, tswaka lingapenukire penu Yahova ambaliwona kuti ndakufunika. Thangwe ra bzimwebzi, tswakalo lingazeze kubatizidwa. Ayai kumbukirani bza m’bale omwe pomwe akhali tswaka adasankhula kuikha bzinthu bza Umambo pa mbuto yakuyamba pa moyo wace m’mbuto mwakusankhula kugumana basa lomwe lingadamupasa kobiri zizinji. Tsono pomwe iye wakula, akundokwanisa kugumana kobiri za kudyesa banja lace basi. Bzimwebzi bzingamucitise kupenukira penu adasankhula bwino pomwe akhali tswaka. Kumbukiranimbo bza mpfumakazi yacikulire yomwe iribe mphanvu zizinji. Iyo ingakhale yakusunama thangwe rakuti ikukwanisa lini kucita bzomwe ikhacita kale-kale. Kodi mudabzicitambo kale mibvunzo ninga yakuti: ‘Kodi Yahova ambandiwona kuti ndine wakufunika? Kodi bzakusankhula bzomwe ndidacita kuti nditumikire Yahova bzina phindu liri-lentse? Kodi ndikana phindu kwa Yahova?’
2 Tikasaya kunyang’ana mitawiro ya mibvunzo imweyi, ifepano tingasiye kukhulupira Yahova ndipo tingafike pakusiya kumutumikira. Mu nkhani ino, tin’pfunza momwe Bibliya lingatithandizire penu tikukumbuka (1) kuti ndife lini wakufunika kwa Yahova, (2) kuti tidacita bzakusankhula bzakuphonyeka ayai (3) kuti tiribe pomwe phindu kuna Yahova.
BZOMWE MUNGACITE KUTI MULEKE KUMBAPENUKIRA
3. Kodi ni njira ibodzi iponi yomwe ingatithandize kumalisa kupenukira?
3 Cinthu cibodzi comwe tingacite kuti timalise kupenukira ndico kufufudza m’Bibliya kuti titawire mibvunzo yomwe tinayo. Tikacita bzimwebzi, cikhulupiro cathu kwa Yahova cin’dzakhala cakulimba, uxamwali bwathu na iye bun’dzakhala bwamphanvu ndipo bzimwebzi bzin’dzatithandiza kuti “[tipitirize] kukhala wakulimba m’cikhulupiro.” — 1 Akolinto 16:13.
4. Kodi “[timbawonesesa tani] bzinthu bzentse”? (1 Atesalonika 5:21)
4 Werengani 1 Atesalonika 5:21. Onani kuti Bibliya likutiuza kuti “[tiwonesese] bzinthu bzentse.” Kodi tingacite tani bzimwebzi? Tingatsimikizire kuti bzomwe timbakhulupira mpsacadidi tikambabzindendemezera na bzomwe Bibliya limbalewa. Mwa ciratizo, mbatiwoneni bza tswaka lire lomwe likukumbuka kuti Mulungu ambaliwona lini kuti ndakufunika. Kodi iro lin’funika kukumbuka kuti Yahova ambaliwona lini kuti ndakufunika thangwe ra kuti likupenukira? Ne, tswakali lin’funika “[kuwonesesa] bzinthu bzentse” mwa kupfunza Bibliya kuti lidziwe momwe Yahova ambaliwonera.
5. Kodi n’ciyani comwe tingacite kuti tikwanise “kubva” Yahova akutawira mibvunzo yathu?
5 Pomwe tikuwerenga Fala la Mulungu “timbabva” Yahova akulewalewa nafe. Tsono kuti tibvesese momwe iye ambaiwonera nkhani yomwe ifepano tikuibvesesa lini bwino pambafunika nyongo. Tin’funika kupfunza nkhani ya m’Bibliya yomwe ikubverana na nkhani yomwe tikuibvesesa liniyo. Tingacite bzimwebzi mwakufufudza m’mabukhu yakusiyana-siyana yomwe gulu la Yahova limbatipasa. (Mimwani 2:3-6) Tingapembe kwa Yahova kuti atitsogolere pomwe tikufufudza nakuti atithandize kubvesesa makumbukidwe yace pakulewa bza nkhaniyo. Tikamala tinganyang’ane nfundo za m’Bibliya zomwe zikubverana na nkhaniyo na kuwona momwe tingaziphatisire basa. Tingagumanembo phindu tikawerenga nkhani za m’Bibliya za wanthu omwe akhana nzeru ninga zomwe tinazozo.
6. Kodi mitsonkhano imbatithandiza tani kumalisa kupenukira?
6 “Timbabvambo” Yahova akulewalewa nafe tikakhala tiri pa mitsonkhano. Tikasaya kumbalova ku mitsonkhano, ifepano tingadzabve nfundo kucokera mu nkhani ayai mu mtawiro omwe m’bale ayai mpfumakazi apereka omwe ungatawire mbvunzo omwe tinawo. (Mimwani 27:17) Tsapano bwerani tiwone bzomwe bzingatithandize kugumana mitawiro ya mibvunzo yomwe tinayo.
MUKAMBAKUMBUKA KUTI MULUNGU AMBAKUWONANI KUTI NDIMWE WAKUSAYA KUFUNIKA
7. Kodi tingabzicite mbvunzo uponi?
7 Kodi imwepo mudabzibvunza kale kuti: ‘Kodi Yahova ambandiwona kuti ndine wakufunika?’ Mukambabziwona kuti mulibe na basalo, imwepo mungawone ninga kuti mpsakukwanisika lini kuti munthu akhale xamwali wa Mulengi wa kudzulu na dziko la pantsi. Mambo Davide adakhalambo na nzeru ninga zimwezi. Iye adadabwa pomwe adadziwa kuti Yahova ambafuna kwene-kwene wanthu ndipo adabvunza kuti: “Imwe Yahova, kodi mbani munthu kuti mumukumbukire, ndipo mbani mwana wa munthu wakucokera ku pfumbi kuti mumutetekere?” (Salimo 144:3) Kodi n’kuponi komwe tingagumane mtawiro wa mbvunzo umweyu?
8. Mwakubverana na 1 Samuyeli 16:6, 7, 10-12, kodi Yahova ambawona ciyani kwa wanthu?
8 Bibliya limbalatiza kuti wale omwe ambawoneka ninga kuti mbakusaya kufunika kwa wanthu winango Yahova ambawawona kuti mbakufunika. Mwa ciratizo, Yahova adatuma Samuyeli kuti ayende ku mui kwa Jese kuti akadzoze mwana wace m’bodzi kuti adzakhale Mambo wa Jirayeri. Jese akhana wana 8 wacimuna, tsono iye adacemera wana wace 7 kuti akagumane na Samuyeli, koma alibe kucemera Davide thangwe rakuti akhali mwana. b Tsono Yahova akhadasankhula Davideyo. (Werengani 1 Samuyeli 16:6, 7, 10-12.) Yahova adawona mu mtima mwa Davide ndipo adawona kuti Davideyo akhafuna kwene-kwene Yahovayo.
9. Kodi n’ciyani comwe cimbakutsimikizirani kuti Yahova ambakuwonani kuti ndimwe wakufunika? (Onani cithunzi-thunzi.)
9 Kumbukirani momwe Yahova walatizira kale kuti ambakuwonani kuti ndimwe wakufunika. Iye ambakupasani malango mwakubverana na bzomwe mukufunikira. (Salimo 32:8) Kodi iye angadacita tani bzimwebzi bzingadakhala kuti ambakudziwani lini bwino? (Salimo 139:1) Mukambaphatisa basa malango ya Yahova na kuwona momwe yakukuthandizirani, imwepo mun’dzakhala na citsimikizo cakuti iye ambakuwonani kuti ndimwe wakufunika. (1 Nkhani 28:9; Mabasa 17:26, 27) Yahova ambawona nyongo yanu. Iye ambawonambo makhalidwe yabwino yomwe munayo ndipo ambafuna kukhala Xamwali wanu. (Jeremiya 17:10) Ndipo iye ambakomedwa kwene-kwene imwepo mukabvuma kukhala xamwali wace. — 1 Juwau 4:19.
“Ukamulinga [Yahova], iye an’dzabzicitisa kuti umugumane.” — 1 Nkhani 28:9 (Onani ndime 9) c
MUKAMBAKUMBUKA KUTI MUDACITA BZAKUSANKHULA BZAKUPHONYEKA M’MBUYO
10. Tikambakumbukira bzakusankhula bzomwe tidacita kale-kale, ni mibvunzo iponi yomwe tingakhale nayo?
10 Pakapita magole, wanthu winango angayambe kukumbuka kuti bzakusankhula bzomwe adacita m’mbuyo bziribe kukhala bzabwino. Pinango adabvuma kusiya basa lomwe likhawapasa kobiri zizinji ayai negosiyo yabwino yomwe akhacita kuti acite bzizinji pakutumikira Yahova. Bzimwebzi pinango bzingakhale bzidacitika magole mazinji m’mbuyomu. Ndipo iwo angawone anzawo omwe adacita bzakusankhula bzakusiyana na bzawobzo tsapano ana moyo wabwino ndipo ana kobiri zizinji. Bzimwebzi bzingawacitise kubzibvunza kuti: ‘Kodi cakusankhula comwe ndidacita ca kutumikira Yahova cina phindu liri-lentse? Ayai kodi cakusankhulaco cidacitisa kuti ndiluze mwayi unango omwe ningadakhala nawo?’
11. Kodi ni makumbukidwe yaponi yakuphonyeka yomwe nyakunemba Salimo 73 akhanayo?
11 Penu imwepo munayombo mibvunzo ninga imweyi, onani momwe nyakunemba Salimo 73 adabvera. Iye adawona wanthu omwe akhatumikira lini Yahova akupfatsa na moyo, ana cuma ndipo akhawoneka ninga kuti akhagumana lini na mabvuto. (Salimo 73:3-5, 12) Pomwe iye akhakumbukira bzimwebzo, adayamba kuwona ninga kuti kutumikira Yahova kukhalibe phindu. Iye ‘akhabonera ntsiku yentse’ na makumbukidwe yakuphonyekaya. (Salimo 73:13, 14) Kodi n’ciyani comwe iye adacita kuti amalise makumbukidwe yamweya?
12. Mwakubverana na Salimo 73:16-18, kodi nyakunemba salimoyi adacita ciyani kuti amalise thupo lace?
12 Werengani Salimo 73:16-18. Nyakunemba salimoyu adapita mu nyumba ya Yahova yomwe ikhali mbuto yakuderekha kuti akakwanise kukumbukira bwino-bwino bza nkhani imweyi. Iye adakwanisa kuwona kuti napo kuti wanthu amwewa akhawoneka ninga kuti akhana moyo wabwino, iwo akhalibe tsogolo labwino. Makumbukidwe yamweya yadamucitisa kubzibva bwino ndipo adawona kuti adasankhula bwino kwene-kwene kutumikira Yahova. Bzimwebzi bzidamucitisa kuti akhale wakutsimikiza kufuna kupitiriza kutumikira Yahova. — Salimo 73:23-28.
13. N’ciyani comwe mungacite penu mumbapenukira kuti mudacita cakusankhula cabwino? (Onani cithunzi-thunzi.)
13 Imwepo mungabvembo bwino mu mtima mwanu mukathandizidwa na Fala la Mulungu, Bibliya. Mwa njira iponi? Mbakumbukirani bzisimbo bzomwe Yahova ambakupasani bzomwe bzimbaphatanidza kufunidwa na iye ndipo mbakumbukiranimbo kuti wanthu omwe ambamutumikira lini alibe bzisimbo bzimwebzi. Iwo ambandothemba bzinthu bzomwe anabzo ndipo alibe cidikhiro ca kutsogolo. Tsono kuthumizira pa bzinthu bzabwino bzomwe Yahova ambakupasani tsapano, imwepo mukudikhirirambo kudzatambira bzinthu bzinango bzabwino kwene-kwene kutsogoloku bzomwe pinango ne mukanati na kubzikumbukirako. (Salimo 145:16) Ndipo kumbukiranimbo ibzi: Mukudziwa lini momwe moyo wanu ungadakhalira tsapano bzingadakhala kuti mwacita cakusankhula cakusiyana na comwe mudacitaco. Tsono comwe mungatsimikizire n’cakuti: Mukacita cakusankhula thangwe rakuti mumbafuna Mulungu na wanthu, nthawe zentse mun’dzakhala na bzinthu bzomwe bzin’dzakucitisani kuti mukhale wakukondwa pa moyo wanu.
Mbakumbukirani bzisimbo bzomwe Yahova an’dzakupasani kutsogolo (Onani ndime 13) d
MUKAMBAKUMBUKA KUTI MULIBE POMWE PHINDU KUNA YAHOVA
14. Thangwe ranyi wanthu winango ambakumbuka kuti alibe pomwe phindu kuna Yahova, ndipo ni mbvunzo uponi omwe iwo angabzicite?
14 Atumiki winango wa Yahova ambakwanisa lini kucita bzinthu bzizinji ninga momwe akhacitira kale-kale thangwe ra kukalamba ayai thangwe ra matenda. Bzimwebzi bzingawacitise kukumbuka kuti alibe pomwe phindu kuna Yahova. Ndipo iwo angabzibvunze kuti: ‘Kodi inepano ndikana phindu kuna Yahova?’
15. Kodi nyakunemba Salimo 71 akhana citsimikizo ciponi?
15 Nyakunemba Salimo 71 adakhalambo na thupo libodzi-bodziri. Iye adapemba kuti: “Mphanvu zangu zikamala lekani kundisiya.” (Salimo 71:9, 18) Napo bziri tenepo, nyakunemba salimoyu akhana citsimikizo cakuti akapitiriza kutumizira Yahova mwakukhulupirika, Yahovayo angadadzamutsogolera na kumuthandiza. Iye adapfunza kuti Yahova ambakomedwa na wale omwe ambacita nyongo pakumutumikira napo kuti angakwanise lini kucita bzizinji thangwe ra mabvuto yomwe anayo. — Salimo 37:23-25.
16. Kodi n’ciyani comwe acikulire angakwanise kucitira Yahova? (Salimo 92:12-15)
16 Penu imwepo ndimwe wacikulire, mbakumbukirani momwe Yahova ambakuwonerani. Iye angakuthandizeni kuti mumutumikire mwakukhulupirika napo kuti mukukwanisa lini kucita bzizinji thangwe ra mabvuto yomwe munayo. (Werengani Salimo 92:12-15.) M’mbuto mwa kumbakumbukira bzinthu bzomwe mun’kwanisa lini kucita, mbakumbukirani bzomwe mungakwanise kucita. Mwa ciratizo, Imwepo mungalimbikise winango mwa kupitiriza kukhala wakukhulupirika kwa Yahova na kucitambo nyongo yakuwalatiza kuti mumbacita nawo thupo. Mungawafotokozere momwe Yahova wakusamalirirani na mapiciro ya m’Bibliya yomwe mukufunisisa kudzayawona yakukwanisika. Ndipo lekani kuyebwa kuti mipembo yomwe mumbacitira abale ingawathandize kwene-kwene. (1 Pedru 3:12) Bziribe basa momwe bzinthu bziriri pa moyo wathu, tentsenefe tingacitire bzinthu Yahova na wanthu winango.
17. Thangwe ranyi tin’funika lini kumbabzindendemezera na winango?
17 Penu imwepo mwasunama thangwe rakuti mukutazira kucita bzizinji pa kutumikira Yahova, khalani na citsimikizo cakuti iye ambakomedwa na bzomwe mumbakwanisa kucita. Pinango imwepo mungayambe kundendemezera bzomwe mumbacita na bzomwe winango ambacita. Tsono lekani kucita bzimwebzi! Thangwe ranyi? Thangwe Yahova ambatindendemezera lini na wanthu winango. (Agalatiya 6:4) Mwa ciratizo, Mariya adapasa Jezu mafuta yakuumira kwene-kwene. (Juwau 12:3-5) Mwakusiyana na bzimwebzi, mamsiwa wakusauka adathusa tukobiri tuwiri twakucepa mphanvu mu kaxa ya bzakupereka. (Luka 21:1-4) Tsono Jezu alibe kundendemezera bzomwe akazi awiriwa adacitabzi, koma adawona kuti wentse akhana cikhulupiro. Pai wace, Yahova, ambatenda bzentse bzomwe imwepo mumbamucitira thangwe ra cikhulupiro na lufoyi lomwe munalo kwa iye napo kuti bzomwe mucitebzo bzingawoneke ninga mpsing’ono-ng’ono.
18. Kodi n’ciyani comwe cingatithandize kuti tileke kumbapenukira? (Onani kwadru yakuti “ Fala la Mulungu Lingakuthandizeni Kuti Muleke Kumbapenukira.”)
18 Nthawe zinango, tentsenefe timbapenukira. Tsono ninga momwe tawonera, Fala la Mulungu, Bibliya, lingatithandize kukunda makumbukidwe yamweya. Tenepo, citani nyongo yakuti mumbaleke kupenukira ndipo bzimwebzi bzin’dzakuthandizani kuti mukhale na cikhulupiro m’mbuto mwakucita thupo. Kulewa cadidi, Yahova ambakuwonani kuti ndimwe wakufunika pa mwekha. Iye ambawona nyongo yomwe mumbacita pakumutumikira ndipo an’dzakusimbani. Khalani na citsimikizo cakuti Yahova ambawona atumiki wace wentse wakukhulupirika kuti mbakuthemera kufunidwa na iye.
NYIMBO 111 Bzomwe Bzimbatikondwesa
a KAFOTOKOZEDWE KA MAFALA YANANGO: Nkhaniyi ikulewa lini bza kupenukira kwakusaya cikhulupiro pa mapiciro ya Yahova komwe kumbafotokozedwa m’Bibliya. M’mbuto mwace ikufotokoza bza kupenukira komwe tingacite penu ndife wakufunika kwa Yahova ayai ne, ayai kupenukira bza cakusankhula comwe tidacita m’mbuyomu.
b Napo kuti Bibliya limbalewa lini magole yomwe Davide akhanayo pomwe Yahova adamusankhula kuti akhale mambo, tsono bzikuwoneka kuti iye akhanati kupfitsa magole 20. — Onani Ntsanza ya Mulindiri ya 1 Setembro, 2011, tsa. 29, ndi. 2 (Chichewa).
c BZOMWE BZIKUCITIKA PA CITHUNZI-THUNZI: Mpfumakazi yacitswaka ikulinga Yahova mwa kufufudza m’Bibliya kuti iwone malango yomwe yangamuthandize.
d BZOMWE BZIKUCITIKA PA CITHUNZI-THUNZI: M’bale akuphata basa la kupukuta mavidru kuti akwanise kusamalira banja lace, tsono iye akukumbukira momwe moyo wace un’dzakhala m’Paraizo.
