NKHANI YAKUPFUNZA 42
NYIMBO 103 Akulu wa Gwere ni Mphaso Yakucokera kwa Yahova
Mbatendani Amuna Omwe Yahova na Jezu Ambawaphatisa Basa m’Gwere
“Pomwe adakwira kudzulu . . . , adapereka amuna ninga mphaso.” — AEFEZO 4:8.
CAKULINGA CA NKHANIYI
Mu nkhani ino, tiniwona momwe atumiki wakuthandiza, akulu wa gwere na anyakunyang’anira dera ambatithandizira ndipo tiniwonambo momwe tingalatizire kuti timbatenda bzomwe amuna wakukhulupirikawa ambacita.
1. Kodi ni mphaso zinango ziponi zomwe tidatambira kwa Jezu?
PALIBE munthu omwe adacita kale bzizinji kuti athandize wanthu ninga momwe Jezu adacitira. Pomwe akhali pa dziko la pantsi pano, iye adaphatisa basa mphanvu yomwe akhanayo yakucita bzakudabwisa kuti athandize wanthu. (Luka 9:12-17) Iye adapereka mphaso ikulu kwene-kwene mwa kupereka moyo wace thangwe ra ifepano. (Juwau 15:13) Pomwe Jezu adalamusidwa adapitiriza kutithandiza. Ninga momwe adapicirira, iye adakumbira Yahova kuti atipase mzimu wace wakucena kuti utipfunzise na kutitsangalaza. (Juwau 14:16, 17, mafala ya nyantsi; 16:13) Ndipo mwakuphatisa basa mitsonkhano ya gwere, Jezu akupitiriza kutipasa bzomwe tikufunikira kuti tikwanise kupfunzisa wanthu Bibliya pa dziko lentse la pantsi kuti akhalembo anyakupfunza wace. — Mateu 28:18-20.
2. Kodi “amuna ninga mphaso” omwe ambalewedwa pa Aefezo 4:7, 8 ni mbani?
2 Onani mphaso inango yomwe Jezu adatipasa. Mpostolo Paulo adanemba kuti pomwe Jezu adayenda kudzulu, iye “adapereka amuna ninga mphaso.” (Werengani Aefezo 4:7, 8.) Paulo adafotokoza kuti Jezu adapereka mphaso zimwezi na cakulinga cakuti zithandize gwere mu njira zakusiyana-siyana. (Aefezo 1:22, 23; 4:11-13) Ntsiku zino, “amuna ninga mphaso” ambaphatanidza atumiki wakuthandiza, akulu wa gwere na anyakunyang’anira dera. a Tsono amuna amwewa mbakuperewera ndipo nthawe zinango angaphonyembo. (Tiyago 3:2) Napo bziri tenepo, Mbuya wathu Jezu Kristu ambawaphatisa basa kuti atithandize. Iwo ni mphaso kwa ifepano.
3. Fotokozani momwe tentsenefe tingathandizire “amuna ninga mphaso.”
3 Jezu adasankhula “amuna ninga mphaso” kuti ambalimbikise gwere. (Aefezo 4:12) Tsono ifepano tingawathandize kuti akwanise kucita basa lakufunikali. Tingandendemezere bzimwebzi na basa lakumanga Nyumba ya Umambo. Pana wanthu omwe ambacita basa lakumanga. Tsono winango ambathandizira basalo mwa kuwaphikira, kuwapasira bzinthu bzakuphatira basa ayai kuwathandiza mu njira zinango. Mwa njira ibodzi-bodziyi, tentsenefe tingathandizire nyongo ya atumiki wakuthandiza, akulu wa gwere na anyakunyang’anira dera mwa bzomwe timbalewa na kucita. Mbatiwoneni momwe tingagumanire phindu na basa lomwe iwo ambacita na momwe tingalatizire kutenda bzomwe iwo ambacita na kutendambo Jezu omwe adatipasa “amuna ninga mphaso” amwewa.
ATUMIKI WAKUTHANDIZA AMBACITA “MABASA YAKUTHANDIZA”
4. Kodi ni “mabasa yakuthandiza” yaponi yomwe atumiki wakuthandiza akhacita mu nthawe ya Akristau wakuyambirira?
4 Mu nthawe ya Akristau wakuyambirira, abale winango adasankhulidwa kuti akhale atumiki wakuthandiza. (1 Timotio 3:8) Bzikuwoneka kuti ndiwo omwe akhacita “mabasa yakuthandiza” ninga momwe Paulo adalewera pa 1 Akolinto 12:28. Bzikuwoneka kuti atumiki wakuthandiza akhambacita mabasa mazinji yakufunika. Bzimwebzi bzikhathandiza akulu kuti akwanise kucita mabasa yawo yomwe njakupfunzisa na kusamalira mabira ya Mulungu. Mwa ciratizo, atumiki wakuthandiza akhakopiyari Bzinembo na kugula bzinthu bzomwe bzikhafunikira kuti basa la kukopiyarilo licitidwe.
5. Kodi ni mabasa yaponi yomwe atumiki wakuthandiza ambacita ntsiku zino?
5 Onani mabasa manango yomwe atumiki wakuthandiza ambacita m’gwere mwanu. (1 Pedru 4:10) Iwo ambacita basa lakusamalira kobiri za gwere ayai magawo, kukumbira na kupereka mabukhu kwa abale, basa la kuikha maaudiyo na mavidiyo pa mitsonkhano ya gwere, kukhala alatizi ayai kukonza bzinthu bzomwe bzadzongeka mu Nyumba ya Umambo. Mabasa yentseneya njakufunika kuti bzinthu bzifambe bwino m’gwere. (1 Akolinto 14:40) Kuthumizira bzimwebzi, atumiki winango wakuthandiza ambacita mbali pa Mtsonkhano wa Moyo Wathu Wacikristau na Utumiki na kufotokoza nkhani za wentse. Mtumiki wakuthandiza ambakhalambo mthandizi wa nyakunyang’anira grupo ya utumiki bwakumunda. Nthawe zinango atumiki wakuthandiza wakuthemera ambayenda pabodzi na akulu kukacita ulendo bwa ubusa.
6. Thangwe ranyi timbatenda mabasa yomwe atumiki wakuthandiza ambacita?
6 Kodi ni phindu liponi lomwe gwere limbakhala nalo thangwe ra basa lomwe atumiki wakuthandiza ambacita? Mpfumakazi inango ya ku Bolívia, yakucemeredwa Beberly, b idalewa kuti: “Nimbatenda kwene-kwene basa lomwe atumiki wakuthandiza ambacita. Bzimwebzi bzimbandithandiza kuti ndigumane phindu na mitsonkhano. Thangwe ra basa lomwe iwo ambacita nimbakwanisa kuimba, kupereka mitawiro, kutetekera nkhani zomwe zimbafotokozedwa na kupfunza na mavidiyo na bzithunzi-thunzi bzomwe bzimbalatizidwa. Iwo ambatsimikizira kuti wale omwe ali pa mitsonkhano ali wakukhotcerereka ndipo ambathandiza wale omwe ambakwanisa lini kufika pa mitsonkhanopo kuti akwanise kuwona mitsonkhanoyo na ku mui kwawo. Pambuyo pa mitsonkhano, iwo ambapsaira mu Nyumba ya Umambo, kusamalira bzakupereka na kutipasa mabukhu yomwe tikufunikira. Nimbatenda kwene-kwene basa lomwe iwo ambacita!” Leslie, omwe ambakhala ku Colômbia ndipo bayace ambatumikira ninga mkulu, adalewa kuti: “Abayangu ambathemba atumiki wakuthandiza kuti akwanise kucita mabasa yakusiyana-siyana. Abayanguwo angadasaya kuthandizidwa na atumiki wakuthandiza angadakhala wakutanganidwa kwene-kwene, ndipopa nimbatenda kwene-kwene nyongo yawo na kubzipereka kwawo.” Ndipo tentsenefe timbatendambo kwene-kwene mabasa yakusiyana-siyana yomwe atumiki wakuthandiza ambacita. — 1 Timotio 3:13.
7. Tingalatize tani kuti timbatenda basa lomwe atumiki wakuthandiza ambacita? (Onani cithunzi-thunzi.)
7 Napo kuti timbakomedwa na mabasa yakusiyana-siyana yomwe atumiki wakuthandiza ambacita, Bibliya limbatiuza kuti: “Mbatendani nthawe zentse.” (Akolose 3:15) Mkulu munango wa ku Finlândia, wakucemeredwa Cristóvão, adalewa momwe ambalatizira kutenda kwace. Iye adati: “Nimbatumiza mensaje yomwe ina cinembo ayai kufotokoza mbali yomwe mtumiki wakuthandizayo wacita yomwe yandilimbikisa na thangwe lomwe likundicitisa kutenda bzomwe acitabzo.” Pascal na Jael, omwe ambakhala ku Nova Caledônia, ambapempherera atumiki wakuthandiza. Pascal adalewa kuti: “Tsapano m’mipembo yathu yakutenda timbaguma abale amwewa.” Yahova ambabva mipembo imweyi ndipo gwere lentse limbagumana phindu. — 2 Akolinto 1:11.
AKULU WA GWERE “AMBAPHATA BASA NA NYONGO PAKATI PANU”
8. Thangwe ranyi Paulo adalewa kuti akulu wa gwere wa mu nthawe ya Akristau wakuyambirira ‘akhaphata basa na nyongo’? (1 Atesalonika 5:12, 13)
8 Mu nthawe ya Akristau wakuyambirira, akulu akhaphata basa na nyongo kwene-kwene m’gwere. (Werengani 1 Atesalonika 5:12, 13; 1 Timotio 5:17) Iwo ‘akhambatsogolera’ gwere mwa kumbacitisa mitsonkhano na kucita bzakusankhula ninga bungwe la akulu. Iwo ‘akhambapasambo malango’ abale na mpfumakazi zawo mwakudeka mtima kuti akhotcerere gwere. (1 Atesalonika 2:11, 12; 2 Timotio 4:2) Ndipo amuna amwewa akhafunikambo kuphata basa na nyongo kuti asamalire mabanja yawo acipitiriza kulimbisa cikhulupiro cawo na uxamwali bwawo na Yahova. — 1 Timotio 3:2, 4; Tito 1:6-9.
9. Kodi ni mabasa yaponi yomwe akulu ambacita ntsiku zino?
9 Ntsiku zino, akulu ambakhala wakutanganika kwene-kwene. Iwo ni apalizi. (2 Timotio 4:5) Iwo ambapereka ciratizo cabwino mwa kupalizira na nyongo, kukonzekeresa basa lakupalizira na kutipfunzisa momwe tingapalizirire bwino. Ndipo iwo ambalatizambo ntsisi mwa kutonga mwakusaya tsankhulo. Munthu akacita pikado ikulu m’gwere, akulu ambamuthandiza kuti akhale pomwe pa uxamwali bwakulimba na Yahova. Pa nthawe ibodzi-bodziyo, iwo ambacita ciri-centse kuti gwere lipitirize kukhala lidacena. (1 Akolinto 5:12, 13; Agalatiya 6:1) Tsono akulu ambadziwika kwene-kwene ninga amakabusa. (1 Pedru 5:1-3) Iwo ambafotokoza bwino nkhani mwakuphatisa basa Bibliya, ambacita nyongo yakudziwa m’bale ali-wentse m’gwere na kucita ulendo bwa ubusa. Akulu winango ambathandizira basa lakumanga Nyumba za Umambo, kukonza-konza Nyumba za Umambo zomwe zadzongeka, kukonzekera mitsonkhano ya cigawo, kuphata basa m’Makomiti Yakucezerana na Nyumba za Ulapi na Mathimu Yakuzungira Atenda. Iwo ambacita bzentsenebzi napo kuti ana kale mabasa manango yakucita. Akulu ambaphata basa na nyongo kwene-kwene!
10. Thangwe ranyi timbatenda basa lomwe akulu wa gwere ambacita?
10 Yahova adalewa kuti akulu angadadzatisamalira bwino ndipo ifepano “[tingadadzabva] lini pomwe mantha ne kugopa.” (Jeremiya 23:4) Mpfumakazi inango ya ku Finlândia, yakucemeredwa Johanna, idakwanisa kuwona mafala yamweya yakukwanisika pomwe mai wace akhaduwala matenda makulu. Iye adalewa kuti: “Napo kuti bzimbandinesa kufotokozera winango momwe ndikubvera, mkulu munango wa gwere omwe nimbamudziwa lini bwino-bwino adakhala wakupirira nande, akhapemba nande ndipo akhanditsimikizira kuti Yahova ambandifuna. Ndikukumbukira lini bwino-bwino bzomwe iye adalewa, tsono ndikukumbukira kuti ndidabzibva kuti ndine wakukhotcerereka. Ndikukhulupira kuti Yahova ndiye omwe adamutuma kuti adzandithandize pa nthawe yomwe ndikhafunikira.” Kodi akulu wa m’gwere mwanu adakuthandizanimbo tani?
11. Tingalatize tani kuti timbatenda basa lomwe akulu ambacita? (Onani cithunzi-thunzi.)
11 Yahova akufuna kuti timbatende akulu “thangwe ra basa lawo.” (1 Atesalonika 5:12, 13) Mpfumakazi inango yomwe imbakhalambo ku Finlândia, yakucemeredwa Henrietta, idalewa kuti: “Akulu ambatithandiza kwene-kwene, tsono bzimwebzi bzikuthandauza lini kuti iwo ana nthawe na mphanvu kwene-kwene ayai kuti ambagumana lini na mabvuto pa moyo wawo. Nthawe zinango nimbandowauza kuti: ‘Mun’dziwa? Imwepo ndimwe mkulu wabwino. Ndikufuna kuti imwepo mudziwe bzimwebzi.’” Mpfumakazi inango ya ku Turquia, yakucemeredwa Sera, idalewa kuti: “Akulu ambafunika ‘kulimbikisidwa’ kuti apitirize kucita basa lawo. Tenepo, ifepano tingambawanembere tsamba, kuwacemera kuti tidzadye nawo pabodzi pa mui pathu ayai kuyenda nawo pabodzi mu utumiki.” Alipo mkulu munango omwe imwepo mumbatenda nyongo yomwe ambalatiza? Nyang’anani njira za momwe mungamulatizire kutenda. — 1 Akolinto 16:18.
Imwepo “mungalimbikise” akulu kuti apitirize kucita basa lawo (Onani ndime 7, 11, 15)
ANYAKUNYANG’ANIRA DERA AMBALIMBIKISA ABALE
12. Kodi ni amuna winango aponi omwe Jezu adawasankhula kuti ambalimbikise gwere? (1 Atesalonika 2:7, 8)
12 Jezu adasankhula “amuna ninga mphaso” kuti atumikire m’gwere mu njira inango. Mwakutsogoleredwa na Jezu, akulu wa ku Jeruzalemu adasankhula Paulo, Barnaba na winango kuti atumikire ninga anyakunyang’anira dera. (Mabasa 11:22) Thangwe ranyi? Pa thangwe libodzi-bodzi lomwe akulu na atumiki wakuthandiza ambasankhulidwira lomwe ni: kulimbikisa abale m’gwere. (Mabasa 15:40, 41) Abale amwewa ambabvuma kuluza bzinthu bzizinji ndipo nthawe zinango ambaikha moyo wawo pa ngozi kuti akapfunzise na kulimbikisa winango. — Werengani 1 Atesalonika 2:7, 8.
13. Kodi ni mabasa yaponi yomwe anyakunyang’anira dera ambacita?
13 Anyakunyang’anira dera ambakhazikika lini mbuto ibodzi. Winango ambacita ulendo bwa makilometro mazinji kuti akazungire gwere. Sumana iri-yentse, nyakunyang’anira dera ambafotokoza nkhani zakusiyana-siyana, ambacita ulendo bwa ubusa, ambacitisa mtsonkhano wa apainiya, mtsonkhano wa akulu na mitsonkhano ya upalizi bwakumunda. Iye ambakonzekera nkhani na kukonzekerambo mitsonkhano ya dera na ya cigawo. Iye ambapfunzisa xikola ya apainiya, ambacita makonzedwe kuti acite mitsonkhano na apainiya wa mu dera lace, ndipo ambafunikambo kucita mabasa manango yomwe ambapasidwa na mthambi.
14. Thangwe ranyi timbatenda basa lomwe anyakunyang’anira dera ambacita?
14 Kodi ni phindu liponi lomwe gwere limbakhala nalo likazungiridwa na nyakunyang’anira dera? Pakulewa bza kuzungiridwa na nyakunyang’anira dera, m’bale munango wa ku Turquia adalewa kuti: “Nthawe zentse kutizungira kwawo kumbandicitisa kuti ndifune kumala nthawe izinji ndikuthandiza abale na mpfumakazi zangu. Ndidadziwana na anyakunyang’anira dera azinji ndipo palibe nthawe yomwe iwo adandiuza kale kuti ali wakutanganika kwene-kwene ayai alibe nthawe yakuceza nande.” Johanna, omwe wafotokozedwa kale ule, adayenda kukapalizira pabodzi na nyakunyang’anira dera tsono alibe kugumana wanthu m’mii. Napo bziri tenepo, iye adati: “Nin’dzayebwa lini ntsiku imweyire. Abale wangu awiri wacikazi akhadafuluka ndipo ndikhadawasuwa kwene-kwene. Nyakunyang’anira derayo adandilimbikisa ndipo adandithandiza kuwona kuti mu dziko lino bzingakhale bzakunesa kukhala nthawe izinji pabodzi na adzinza wathu ayai axamwali wathu, tsono mu dziko lipsa tin’dzakhala na mwayi wakukhala nthawe izinji tiri pabodzi.” Tentsenefe timbatendambo bzomwe anyakunyang’anira dera adacita kuti atithandize. — Mabasa 20:37–21:1.
15. (a) Mwakubverana na 3 Juwau 5-8, tingalatize tani kuti timbatenda basa lomwe anyakunyang’anira dera ambacita? (Onani cithunzi-thunzi.) (b) Thangwe ranyi tin’funika kumbatenda akazi wa abale omwe ana maudindo m’gwere, ndipo tingacite tani bzimwebzi? (Onani kwadru yakuti “ Mbatendani Akazi wa Abale Omwe ana Maudindo.”)
15 Mpostolo Juwau adalimbikisa Gayo kuti ambatambire bwino abale omwe akhabwera kudzazungira magwere nakuti acite bzentse bzomwe angakwanise kuti “[awathandize] mu njira yomwe ingakondwese Mulungu.” (Werengani 3 Juwau 5-8.) Njira ibodzi ya momwe ifepano tingacitire bzimwebzi ndiyo kucemera anyakunyang’anira dera kuti adzadye nafe pabodzi. Njira inango ndiyo kuthandizira makonzedwe ya utumiki yomwe nyakunyang’anira derayo ambacitisa. Leslie, omwe wafotokozedwa pakuyamba ule, ambalatiza kutenda kwace mu njira inango. Iye adalewa kuti: “Nimbapemba kwa Yahova kuti awapase bzomwe iwo akufunikira. Inepano na bayangu timbawanembera katsamba ticiwauza momwe kutizungira kwawo kudatithandizira.” Kumbukirani kuti anyakunyang’anira dera ambagumanambo na mabvuto ndipo ambaneta ninga momwe ifepano timbacitira. Nthawe zinango ambaduwala, ambakhala na thupo ndipo ambawofoka. Pinango mafala yanu yabwino na mphaso zomwe mungawapase kungakhale kutawiridwa kwa mipembo yawo! — Mimwani 12:25.
“AMUNA NINGA MPHASO” MBAKUFUNIKA KWA IFEPANO
16. Mwakubverana na Mimwani 3:27, kodi ni mibvunzo iponi yomwe abale an’funika kumbabzicita?
16 Pa dziko lentse la pantsi pakufunikira abale azinji kuti apasidwe maudindo. Penu ndimwe m’bale wakubatizidwa, kodi ‘mungakwanise kuthandiza’ mwa njira imweyi? (Werengani Mimwani 3:27.) Kodi imwepo ndimwe wakukonzeka kucita nyongo kuti muthemere kukhala mtumiki wakuthandiza? Penu imwepo ndimwe mtumiki wakuthandiza, kodi mungacite nyongo kuti muthemere kutumikira ninga mkulu wa gwere? c Kodi muli wakukonzeka kucinja bzinthu bzinango pa moyo wanu kuti mukwanise kuyenda ku Xikola ya Apalizi wa Umambo? Xikola imweyi ingakukonzekereseni na kukuthandizani kuti mukhale wakuthemera kuphatisidwa basa kwene-kwene na Jezu. Penu mukuwona kuti mungakwanise lini kucita bzimwebzi, pembani kwa Yahova. Mukumbireni kuti akuthandizeni kucita bwino mabasa yomwe mumbapasidwa. — Luka 11:13; Mabasa 20:28.
17. Kodi “amuna ninga mphaso” ambalatiza ciyani pakulewa bza Mambo wathu, Jezu Kristu?
17 Basa la abale omwe Jezu adawasankhula kuti awapase maudindo limbalatiza kuti iye akutitsogolera mu ntsiku zakumalizira zino. (Mateu 28:20) Timbatenda kwene-kwene thangwe ra kukhala na Mambo walufoyi na wakudeka mtima omwe ambadziwa bzomwe timbafunikira na kutipasa abale kuti atithandize. Ndipopa nyang’anani njira za momwe mungalatizire kutenda basa lomwe amuna amwewa ambacita. Ndipo lekani kuyebwa kutenda Yahova thangwe iye ni Mpasi wa “mphaso iri-yentse yabwino na yakulungama.” — Tiyago 1:17.
NYIMBO 99 Tina Abale Azinji
a “Amuna ninga mphaso” amwewa ambaphatanidzambo akulu omwe ambatumikira m’Bungwe Lakutonga, athandizi wa Bungwe Lakutonga, wa m’Komiti ya Mthambi na omwe ambacita mabasa manango.
b Madzina manango yacinjidwa.
c Kuti mudziwe bzizinji bzomwe mungacite kuti muthemere kukhala mtumiki wakuthandiza ayai mkulu, onani nkhani zakuti “Abale, Kodi Mukucita Nyongo Kuti Mukhale Mtumiki Wakuthandiza?” na “Abale, Kodi Mukucita Nyongo Kuti Mutumikire Ninga Mkulu wa Gwere?” mu Ntsanza ya Mulindiri ya Novembro 2024.
