NKHANI YAKUPFUNZA 40
NYIMBO 30 Baba Wangu, Mulungu Wangu na Xamwali Wangu
Yahova “Ambapoza Omwe ana Mtima Wakusweka”
“Iye ambapoza omwe ana mtima wakusweka; iye ambamanga bzironda bzawo.” — SALIMO 147:3.
CAKULINGA CA NKHANIYI
Yahova ambacita thupo kwene-kwene na wale omwe adasunama. Nkhaniyi in’tithandiza kuwona momwe iye ambatithandizira na momwe tingatsangalazire wanthu winango.
1. Kodi Yahova ambabzibva tani na atumiki wace?
YAHOVA ambadziwa bzomwe atumiki wace ambagumana nabzo. Iye ambatiwona tikakhala tidakondwa na pomwe tidasunama. (Salimo 37:18) Iye ambakomedwa kwene-kwene akawona kuti tikucita nyongo yakuti timutumikire napo kuti tikugumana na mabvuto yakusiyana-siyana! Kuthumizira bzimwebzi, iye akufunisisa kutithandiza na kutitsangalaza.
2. N’ciyani comwe Yahova ambacita kwa wale omwe ana mtima wakusweka, ndipo tingagumane tani phindu na thandizo lacero?
2 Salimo 147:3 ambafotokoza kuti Yahova “ambamanga bzironda” bza wale omwe ana mtima wakusweka. Cinemboci cikulatiza momwe Yahova ambathandizira wale omwe adasunama. Tsono n’ciyani comwe tingacite kuti tithandizidwe na Yahova? Mbatiwoneni ciratizo. Dotolo waluso angacite bzizinji kuti apoze munthu omwe akuduwala. Tsono kuti munthuyo alimbe, iye an’funika kuteweza bwino-bwino malango ya dotoloyo. Mu nkhani ino, tiniwona bzomwe Yahova ambauza wale omwe adasunama mwakuphatisa basa Fala lace ndipo tiniwonambo momwe tingaphatisire basa malango yace yalufoyi.
YAHOVA AMBATITSIMIKIZIRA KUTI NDIFE WAKUFUNIKA KWA IYE
3. Thangwe ranyi wanthu winango ambakumbuka kuti alibe na basalo?
3 Bzakupasa ntsisi mpsakuti mu dzikoli wanthu azinji alibe lufoyi na anzawo ndipo nthawe zinango iwo angabonerese anzawowo na kuwacitisa kubzibva ninga alibe na basalo. Mpfumakazi inango yakucemeredwa Helen a idalewa kuti: “Ndidakulira m’banja lomwe mukhalibe lufoyi. Pai wangu akhana vinga ndipo akhatiuza ntsiku zentse kuti tikhalibe na basalo.” Pinango munthu munango adakucitirani bzinthu bzakuipa, kukutukwanani ayai kukucitisani kubzibva ninga kuti mulibe na basalo. Bzimwebzi bzingakucitiseni kuwona ninga kuti palibe munthu omwe ambakufunani.
4. Mwakubverana na Salimo 34:18, kodi n’citsimikizo ciponi comwe Yahova ambatipasa?
4 Napo kuti wanthu winango adakuboneresani, imwepo mungakhale na citsimikizo cakuti Yahova ambakufunani ndipo ambawona kuti ndimwe wakufunika. Iye “ali pafupi na wale omwe adasweka mtima.” (Werengani Salimo 34:18.) Napo kuti imwepo ‘mudawofoka,’ kumbukirani kuti Yahova adakubweresani mu gulu lace thangwe adawona bzinthu bzabwino bzomwe bziri mu mtima mwanu. (Juwau 6:44) Nthawe zentse, iye ngwakukonzeka kukuthandizani thangwe ndimwe wakufunika kwene-kwene kwa iye.
5. Kodi tingapfunze ciyani na momwe Jezu akhacitira bzinthu na wale omwe akhanyozedwa na wanthu winango?
5 Ciratizo ca Jezu cingatithandize kubvesesa bwino momwe Yahova ambatiwonera. Pomwe Jezu akhali pa dziko la pantsi pano, iye akhalatiza kudeka mtima kwa wanthu omwe akhabziwona kuti akhalibe na basalo thangwe ra kulewedwa kuipa na winango. (Mateu 9:9-12) Pomwe mkazi munango adakhuya cakubvala cace na cikhulupiro cakuti angadapozedwa matenda makulu yomwe akhanayo, Jezu alibe kumukalipira koma adamutenda thangwe ra cikhulupiro cace. (Marko 5:25-34) Jezu ambatewezera bwino Pai wace. (Juwau 14:9) Ndipopa imwepo mungakhale na citsimikizo cakuti Yahova ambakuwonani kuti ndimwe wakufunika, ambawona makhalidwe yanu yabwino, cikhulupiro canu na lufoyi lomwe munalo kwa iye.
6. N’ciyani comwe imwepo mungacite penu mumbabzibva kuti ndimwe lini wakufunika?
6 N’ciyani comwe mungacite penu mukupitiriza kubziwona kuti ndimwe lini wakufunika? Werengani mavesi ya m’Bibliya yomwe yangakutsimikizireni kuti Yahova ambakuwonani kuti ndimwe wakufunika ndipo mbayakumbukirani. b (Salimo 94:19) Penu imwepo mwatazira kucita bzomwe mukhafuna ayai mwasunama thangwe rakuti mukukwanisa lini kucita bzomwe anzanu ambacita, lekani kubzipasa mulandu. Yahova ambadikhirira lini kuti mucite bzinthu bzomwe mungabzikwanise lini. (Salimo 103:13, 14) Penu imwepo mudacitiridwa bzinthu bzakuipa kale-kale ninga kutukwanidwa, kumenyedwa ayai kupswithidwa, lekani kubzipasa mulandu na bzimwebzi! Kumbukirani kuti Yahova an’dzatonga munthu omwe adakucitirani bzinthu bzakuipayo sikuti imwepo. (1 Pedru 3:12) Sandra, omwe adacitiridwa bzinthu bzakuipa pomwe akhali mwana, adalewa kuti: “Nimbapemba kwa Yahova ntsiku zentse kuti andithandize kubziwona mu njira yakuthemera ninga momwe iye ambandiwonera.”
7. Kodi tingaphatise tani basa bzomwe bzidaticitikira pa moyo wathu pomwe tikutumikira Yahova?
7 Lekani kupenukira kuti Yahova angakuphatiseni basa kuti muthandize winango. Iye adakupasani mwayi wakuphata naye basa pabodzi mu utumiki. (1 Akolinto 3:9) Bzomwe bzidakucitikirani pa moyo wanu bzingakucitiseni kuti mumbabvere ntsisi anzanu na kubvesesa momwe iwo akubvera. Ndipo imwepo mungacite bzizinji kuti muwathandize. Helen, omwe wafotokozedwa kale ule, adathandizidwa ndipo iye tsapano ambathandizambo wanthu winango. Iye adalewa kuti: “Ndikhabziwona kuti ‘ndikhalibe na basalo,’ tsono Yahova akundicitisa kubzibva kuti nimbafunidwa, ndipo ambandiphatisa basa kuti ndithandizembo wanthu winango.” Tsapano Helen ngwakukondwa ndipo akutumikira ninga mpainiya wakukhazikika.
YAHOVA AMBAFUNA KUTI TIBVUME KUTI ADATILEKERERA
8. Kodi pa Zaiya 1:18 pambatitsimikizira ciyani?
8 Atumiki winango wa Yahova ambacita thupo na pikado zomwe adacita m’mbuyo pomwe akhanati kubatizidwa ayai pomwe akhadabatizidwa kale. Tsono bzingakhale bwino kukumbukira kuti Yahova adapereka cakulombolera thangwe rakuti ambatifuna. Ndipo iye an’funa kuti tibvume mphaso imweyi. Yahova akutitsimikizira kuti ‘tikacezerana naye nkhani zathu,’ c iye an’dzatilanga lini thangwe ra pikado zomwe tidacita m’mbuyo. (Werengani Zaiya 1:18.) Timbatenda kwene-kwene Pai wathu wa lufoyi, Yahova, thangwe rakuti ambakumbukira lini pomwe bza pikado zathu za m’mbuyo! Ndipo iye ambayebwa lini bzinthu bzabwino bzomwe timbacita. — Salimo 103:9, 12; Ahebereu 6:10.
9. Thangwe ranyi tin’funika kumbakumbukira bzomwe tikucita tsapano na bzomwe tin’dzacita kutsogolo sikuti bzomwe tidacita m’mbuyo?
9 Penu imwepo mudasunama thangwe ra bzomwe mudacita m’mbuyo, citani ciri-centse kuti mumbakumbukire bzomwe mukucita tsapano na bzomwe mun’dzakwanisa kucita kutsogolo. Onani bzomwe mpostolo Paulo adacita. Iye adasunama thangwe rakuti kale-kale akhazunza Akristau, tsono akhadziwa kuti Yahova akhadamulekerera. (1 Timotio 1:12-15) Kodi iye adapitiriza kumbakumbukira pikado zomwe akhadacita m’mbuyo? Iye alibe kucita bzimwebzo ndipo alibembo kumala nthawe akukumbukira bzomwe adacita kuti akhale Mfarizeu wakulemekezeka. (Afilipi 3:4-8, 13-15) M’mbuto mwace, Paulo adacita basa lakupalizira na nyongo ndipo akhanyang’anisa kutsogolo. Ninga Paulo, imwepo mun’funika kukumbukira bzomwe mukucita tsapano na bzomwe mun’dzacita kutsogolo thangwe mungakwanise lini kucinja bzomwe mudacita m’mbuyo. Tsono imwepo mungatumbize Yahova na kumukondwesa tsapano, ndipo mungakumbukire tsogolo labwino lomwe iye adakupicirani.
10. N’ciyani comwe tingacite penu bzomwe tidacita m’mbuyo bzidasunamisa wanthu winango?
10 Imwepo mungasuname thangwe ra bzinthu bzinango bzomwe mudacita m’mbuyo bzomwe bzidasunamisambo wanthu winango. N’ciyani comwe imwepo mungacite? Citani bzentse bzomwe mungakwanise kuti mukonze bzomwe mudaphonyabzo ndipo apepeseni. (2 Akolinto 7:11) Pembani kwa Yahova kuti athandize wanthu omwe mudawasunamisawo. Iye angathandize imwepo pabodzi na wale omwe mudawasunamisa kupirira na kukhala pomwe na mtendere.
11. Kodi tingapfunze ciyani na ciratizo ca mpolofeta Djona? (Onani ca pa tsamba lakuyamba.)
11 Pfunzani na pikado zomwe mudacita m’mbuyo ndipo khalani wakukonzeka kubvuma kuti Yahova akuphatiseni basa mu njira yomwe iye akufuna. Onani ciratizo ca mpolofeta Djona. M’mbuto mwa kuyenda ku Ninive komwe Yahova akhadamutuma, iye adayenda ku mbuto inango. Yahova adalanga Djona, ndipo Djonayo adapfunza na kuphonya kwaceko. (Djona 1:1-4, 15-17; 2:7-10) Yahova alibe kumusiya Djona. Mulungu adamupasa pomwe Djona mwayi wakuti ayende ku Ninive, ndipo Djonayo adabvuma. Napo kuti akhadasunama thangwe ra bzomwe akhadacita, Djona adacita bzomwe Yahova adamuuza. — Djona 3:1-3.
Pomwe mpolofeta Djona adapulumuka m’mimba mwa cintsomba cikulu, Yahova adamuuza pomwe kuti ayende ku Ninive kuti akapalizire fala lace (Onani ndime 11)
YAHOVA AMBATITSANGALAZA MWAKUPHATISA BASA MZIMU WACE WAKUCENA
12. Kodi Yahova ambatitsangalaza tani tikakhala tikugumana na mabvuto? (Afilipi 4:6, 7)
12 Cinthu cakuipa cikaticitikira, Yahova ambatitsangalaza mwakuphatisa basa mzimu wace wakucena. Onani bzomwe bzidacitikira Ron na Carol. Mwana wawo wacimuna adabzipha. Iwo adati: “Tikhadagumana kale na mabvuto yakunesa m’mbuyomu, tsono bvuto limweri lidakhala likulu kwene-kwene. Tikhambapemba kazinji-kentse usiku pomwe tikhatazira kugona ndipo tidakwanisa kubva mtendere wa Mulungu omwe umbafotokozedwa pa Afilipi 4:6, 7.” (Werengani.) Penu imwepo mudasunama thangwe ra cinthu cinango cakuipa comwe cidakucitikirani, muuzeni Yahova momwe mukubvera, ndipo imwepo mungaceze naye pa nthawe iri-yentse yomwe mukufunayo. (Salimo 86:3; 88:1) Kumbirani Yahova kazinji-kentse kuti akupaseni mzimu wace wakucena. Iye an’dzakuthandizani nthawe zentse. — Luka 11:9-13.
13. Kodi mzimu wakucena ungatithandize tani? (Aefezo 3:16)
13 Kodi pana bvuto linango lomwe lakucitisani kumala mphanvu? Mzimu wakucena ungakuthandizeni kuti mupitirize kutumikira Yahova mwakukhulupirika. (Werengani Aefezo 3:16.) Onani bzomwe bzidacitikira mpfumakazi inango yakucemeredwa Flora. Iye na bayace akhatumikira ninga amisiyonario pomwe bayaceyo adacita upombo ndipo iwo adalambana. Iye adati: “Ndidasunama kwene-kwene na bzomwe iye adacitabzo ndipo ndikhandokhalira kubzikumbukira basi. Ndidapemba kwa Yahova kuti andipase mzimu wace wakucena kuti ndikwanise kupirira. Yahova adandipasa bzomwe ndikhafunikira kuti ndikwanise kupirira bvuto lomwe pakuyamba ndikhawona kuti ningadakwanisa lini kulipirira.” Flora adakwanisa kuwona kuti Yahova adamuthandiza kumuthemba ndipo ana citsimikizo cakuti iye an’dzapitiriza kumuthandiza pa mabvuto yentse yomwe an’dzagumana nayo kutsogolo. Flora adalewa momwe mafala ya pa Salimo 119:32 yambalatizira momwe Yahova adamuthandizira. Vesiri limbati: “Nin’dzafulumiza kutewera njira ya malamulo yanu, pakuti mwayakonzera mbuto mu mtima mwangu.”
14. N’ciyani comwe tingacite kuti titambire mzimu wakucena wa Mulungu?
14 Imwepo mukapemba kwa Yahova kuti akupaseni mzimu wakucena, n’ciyani comwe mun’funika kucita kuti mutambire mzimuyo? Citani bzinthu bzomwe bzin’dzakuthandizani kutambira mzimu wakucena wa Mulungu. Bzinthubzo bzimbaphatanidza kutsonkhana na kupalizira. Werengani Fala la Mulungu ntsiku zentse. Bzimwebzi bzin’dzakuthandizani kuti mumbakumbukire bza nzeru zace. (Afilipi 4:8, 9) Pomwe mukuwerenga, onani wanthu wa m’Bibliya omwe adagumana na mabvuto ninga yomwe mukugumana nayoyo ndipo onani momwe Yahova adawathandizira kupirira. Sandra, omwe wafotokozedwa kale ule, adagumana na mabvuto mazinji. Iye adati: “Nkhani ya Zuze imbandilimbikisa kwene-kwene. Iye alibe kulekerera kuti mabvuto yomwe akhagumana nayo na bzinthu bzakusaya cirungamo bzomwe akhacitiridwa bzidzonge uxamwali bwace na Yahova.” — Genesesi 39:21-23.
YAHOVA AMBATITSANGALAZA MWAKUPHATISA BASA ATUMIKI WACE
15. Kodi mbani omwe angatipase mtsangalazo, ndipo iwo angacite tani bzimwebzi? (Onani cithunzi-thunzi.)
15 Tikakhala tikugumana na mabvuto, abale na mpfumakazi zathu angakhale “mtsangalazo ukulu” kwa ifepano. (Akolose 4:11) Yahova ambaphatisa basa abale na mpfumakazi zathu kuti alatize kuti ambatifuna. Iwo angatitsangalaze mwakukhala nafe pabodzi pa nthawe za mabvuto ayai angatitetekere mwatceru pomwe tikufotokoza momwe tikubvera. Iwo angatiwerengere vesi la m’Bibliya ayai kupemba nafe pabodzi. d (Aroma 15:4) Nthawe zinango m’bale ayai mpfumakazi angatikumbuse momwe Yahova ambakumbukirira, ndipo bzimwebzi bzingatithandize kuwona bzinthu mu njira yakuthemera. Abale na mpfumakazi zathu angatithandizembo mu njira zinango ninga kutipasa cakudya.
Axamwali wakukhwima mwauzimu na wakukhulupirika angatitsangalaze na kutithandiza (Onani ndime 15)
16. N’ciyani comwe tingacite kuti tithandizidwe na wanthu winango?
16 Kuti titambire thandizo kuna wanthu winango, pinango tingafunike kucita kulikumbira. Abale na mpfumakazi zathu ambatifuna ndipo ambafuna kutithandiza. (Mimwani 17:17) Tsono pinango iwo angadziwe lini momwe tikubvera na bzomwe tikufunikira. (Mimwani 14:10) Penu imwepo mudasunama, mungaceze na axamwali wanu muciwauza momwe mukubvera. Auzeni momwe angakuthandizireni. Imwepo mungaceze na mkulu m’bodzi ayai akulu awiri omwe mumbatsudzuka nawo. Mpfumakazi zinango zimbatsangalazidwa kwene-kwene zikaceza na mpfumakazi zomwe n’zakukhwima mwauzimu.
17. N’ciyani cingatitazise kutambira thandizo kwa wanthu winango, ndipo tingakunde tani bvuto limweri?
17 Tcenkhani kumbakhala kwa mwekha. Nthawe zinango imwepo mungakhale mudasunama kwene-kwene ndipo mungafune kumbandokhala mwekha-mwekha. Ndipo nthawe zinango abale na mpfumakazi angakukumbukireni kuipa ayai angalewe lini mafala yabwino. (Tiyago 3:2) Lekani kulekerera kuti bzinthu ninga bzimwebzi bzikutaziseni kutambira thandizo lomwe mukufunikira. Mkulu munango wa gwere wakucemeredwa Gavin, omwe ana matenda ya makumbukidwe, adalewa kuti: “Kazinji-kazinji nimbafuna lini kuceza ayai kukhala pabodzi na axamwali wangu.” Tsono Gavin ambacita nyongo yakukhala pabodzi na abale ndipo iye ambabzibva bwino akacita bzimwebzi. Mpfumakazi inango yakucemeredwa Amy idalewa kuti: “Thangwe ra bzomwe bzidandicitikira m’mbuyo bzimbandinesa kukhulupira wanthu winango. Tsono ndikupfunza kufuna na kukhulupira abale wangu ninga momwe Yahova ambacitira. Ndikudziwa kuti kucita bzimwebzi kumbakondwesa Yahova ndipo kumbandikondwesambo.”
MAPICIRO YA YAHOVA YAKULEWA BZA KUTSOGOLO YANGATITSANGALAZE
18. N’ciyani comwe Yahova an’dzaticitira kutsogolo, ndipo n’ciyani comwe tingacite tsapano?
18 Tsapanopali Yahova an’cosa cinthu ciri-centse comwe cimbatisunamisa na kuwawa kwentse komwe timbabva. (Apokalipse 21:3, 4) Bzimwebzi bzikacitika, bzinthu bzentse bzakuipa bzomwe tidagumana nabzo “bzin’dzabwerera lini mu mtima.” (Zaiya 65:17) Ninga momwe tawonera, Yahova ‘ambamanga bzironda bzathu’ napo ntsiku zino. Na tenepo, bvumani njira zakusiyana-siyana zomwe iye ambaziphatisa basa kuti akutsangalazeni na kukuthandizani. Ndipo lekani kumbapenukira kuti “iye ambakukonkhobzani.” — 1 Pedru 5:7.
NYIMBO 7 Yahova ni Mphanvu Yathu
a Madzina yacinjidwa.
b Onani kwadru yakuti “ Yahova Ambakuwonani Kuti Ndimwe Wakufunika.”
c Kuti ‘ticezerane nkhani zathu’ na Yahova, tin’funika kulatiza kuti takungula mwakukumbira kuti atilekerere pikado zathu ticicinja makhalidwe yathu. Ndipo tikacita pikado ikulu, tin’funika kukumbira thandizo kwa akulu wa gwere. — Tiyago 5:14, 15.
d Mwa ciratizo, onani mavesi ya m’Bibliya yomwe yali pa misolo yakuti “Nkhawa” na “Chitonthozo” mu bukhu lakuti Malango Yakucokera m’Fala la Mulungu (Chichewa).
