Kodi Mukhadziwa?
N’ciyani comwe cikulatiza kuti nyimbo zikhali zakufunika kwa Ajirayeri?
AJIRAYERI akhambafuna kwene-kwene nyimbo. Kazinji-kazinji Bibliya limbalewa bza wanthu omwe akhaimba nyimbo na bzakuimbira na omwe akhaimba na mulomo. Mbali ikulu ya m’Bibliya ni nyimbo. Mwa ciratizo, mabukhu ya Masalimo, Nyimbo ya Salomau na Maliro ni nyimbo. Bukhu linango lakulewa bza wanthu wakale-kale limbafotokoza kuti Bibliya kazinji-kazinji limbalatiza kuti “Ajirayeri akhambaimba nyimbo pomwe akhambacita mabasa yakusiyana-siyana pa moyo wawo.”
Nyimbo pa moyo wa ntsiku na ntsiku. Ajirayeri akhaimba nyimbo kuti alatize momwe akubvera. (Zaiya 30:29) Akazi akhaimba tamburena acibzina pa msinda wa kuikha mambo mupsa, acikunda akakunda ku nkhondo na pa nthawe ya maphwando. (Atongi 11:34; 1 Samuyeli 18:6, 7; 1 Amambo 1:39, 40) Ajirayeri akhambaimbambo nyimbo kuti alatize kusunama kwawo pa nkhawa. (2 Nkhani 35:25) Mwakubverana na bukhu linango, “bzikuwoneka padeca kuti Ajirayeri akhafuna kwene-kwene nyimbo.”
Nyimbo ku nyumba ya mambo. Amambo wa Jirayeri akhafuna kwene-kwene nyimbo. Mambo Sauli adacemera Davide kuti akakhale ku mui kwace kuti ambamuimbire nyimbo. (1 Samuyeli 16:18, 23) Patsogolo pace, pomwe Davideyo adakhala mambo, iye adakonza bzakuimbira nyimbo, adanemba nyimbo zakudekeza ndipo adakhazikisa thimu la anyakuimba kuti ambaimbe ku templo ya Yahova. (2 Nkhani 7:6; Amose 6:5) Mambo Salomau akhana aimbi amuna na akazi omwe akhambaimba ku mui kwace. — Mpalizi 2:8.
Nyimbo pakunamata. Kuposa bzentse, Ajirayeri akhambaimba nyimbo pakunamata Yahova. Wanthu wakukwana 4000 akhambaimba nyimbo na bzakuimbira ku templo ku Jeruzalemu. (1 Nkhani 23:5) Iwo akhambaimba na bzakuimbira bza simbi, maviyola, bzimbututu na bzakuimbira bzinango. (2 Nkhani 5:12) Tsono wanthu walusowa ndiwo lini okha omwe akhambaimba pakunamata Yahova. Ajirayeri azinji akhambaimba nyimbo pa ulendo bwakuyenda kukacita maphwando ya pa gole ku Jeruzalemu ndipo zikhacemeredwa Nyimbo Zakukwirira. (Masalimo 120-134) Mwakubverana na bzinembo bzacidjuda, Ajirayeri akhambaimba Masalimo ya Aleluya a pa nthawe yomwe akhacita Paskwa.
Nyimbo n’zakufunikambo kwa wanthu wa Mulungu ntsiku zino. (Tiyago 5:13) Kuimba kumbacita mbali ya kunamata kwathu. (Aefezo 5:19) Nyimbo zimbaticitisa kuti tikhale wakuphatana na Akristau anzathu. (Akolose 3:16) Ndipo izo zimbatilimbisa tikakhala tikugumana na mabvuto. (Mabasa 16:25) Kuimba ni njira yabwino yakulatizira kuti timbakhulupira Yahova nakuti timbamufuna.
a Adjuda akhambacemera Masalimo 113 mpaka 118 kuti Masalimo ya Aleluya, yomwe yakhaphatisidwa basa pa kutumbiza Yahova.
