Templo ya Salomau ikhana khonde lomwe likhana msuwo wakupitira mu Mbuto Yakucena ya temployo. Mwakubverana na Bibliya Lakusanduliziridwa la Dziko Lipsa lomwe lidacosedwa pomwe likhanati kufika gole la 2023, “khonde la kutsogolo likhana khwankhwa lakundendemerana na la temployo, lomwe likhadatalimpha makovado 20 [mametro 9] ndipo kucokera pantsi mpaka m’dzaulu likhadatalimpha 120,” yomwe ni mametro 53. (2 Nkhani 3:4) Mabibliya manango yambalewambo kuti khondero likhadatalimpha “makovado 120” yomwe ni mametro 53 kucokera pantsi mpaka m’dzaulu!

Tsono pakulewa bza nkhonde la templo ya Salomau, Bibliya Lakusanduliziridwa la Dziko Lipsa lomwe lidadindidwa mu 2023 limbalewa kuti iro “likhadatalimpha makovado 20,” ayai mametro pafupi-fupi 9 kucokera pantsi mpaka m’dzaulu. a Mbatiwoneni mathangwe yomwe yadacitisa kuti pakhale kucinja kumweku.

Kutalimpha kwa khonde kucokera pantsi mpaka m’dzaulu kumbafotokozedwa lini pa 1 Amambo 6:3. Pa vesi limweri, Jeremiya adalewa bza khwankhwa na kutalimpha kwa m’mphepete mwa khondero, alibe kulewa bza kutalimpha kwa kucokera pantsi mpaka m’dzaulu. Ndipo mu kapitulo ya kutsogolo, iye adalewa bzinthu bzinango bza pa templopo, kuphatanidzambo Tanki ya simbi yakusungunusa, ngolo zakukwana 10 na pilare ziwiri za mkuwa zomwe zikhali m’mphepete mwa khondero. (1 Amambo 7:15-37) Penu khondero likhadatalimphadi mametro yakupitirira 50 kucokera pantsi mpaka m’dzaulu licipitirira temployo, thangwe ranyi Jeremiya alibe kulewa bzimwebzi? Napo pomwe padapita magole mazinji, Adjuda wakunemba nkhani za m’Bibliya adalewa kuti khondero likhali lini litali kuposa templo ya Salomau.

Anyakufufudza nkhani ambapenukira penu parede za temployo zingadapitiriza kukhala zakulimba bzingadakhala kuti khondero likhadatalimphadi makovado 120 kucokera pantsi mpaka m’dzaulu. Nyumba na bzinthu bzinango bzitali-bzitali bzomwe wanthu akhambakonza na minyala ayai na matijolo mu nthawe za m’Bibliya, ninga m’misuwo ya templo za ku Edjipito mukhana aliserse ya khwankhwa ikulu ndipo paredezo zikhambayenda zicicepa kudzulu kwace. Tsono bzikhali bzakusiyana na templo ya Salomau. Anyakufufudza ambakhulupira kuti ntcinya ya parede za templo ya Salomau ikhali ya makovado yakupitirira 6 ayai mametro 2,7. Munthu m’bodzi wa bzakumanga-manga wakucemeredwa Theodor Busink adalewa kuti: “Pakukumbukira ntcinya ya [pa msuwo wakupitira mu] templo, bzingadakwanisika lini kuti khondero litalimphe makovado 120 [kucokera pantsi mpaka m’dzaulu].”

Pinango cinembo ca 2 Nkhani 3:4 cidakopiyaridwi mwakuphonyeka. Napo kuti mipukutu minango imbalewa kuti khondero likhadatalimpha “120” kucokera pantsi mpaka m’dzaulu pa vesi limweri, pana mipukutu minango yakuthembeka yomwe idanemba “makovado 20.” N’ciyani comwe pinango cidacitisa kuti munembi aphonye acinemba “120” m’mbuto mwakunemba “makovado 20”? Mafala yakuti “cem” na “makovado” yadandendemerana mu Cihebereu. Ndipopa bzikhali bzakupusa munembi kunemba “cem” m’mbuto mwakunemba “makovado.”

N’cadidi kuti tingayezere kubvesesa bwino-bwino momwe templo ya Salomau ikhaliri, tsono cakufunika kwene-kwene ndico kukumbukira bzomwe temployo imbaimira. Iyo imbaimira templo ikulu yauzimu. Ndipo tentsenefe timbatenda kwene-kwene Yahova thangwe ra kuticemera kuti tikhale atumiki wace na kumunamata mu templo imweyi! — Ahebereu 9:11-14; Apokalipse 3:12; 7:9-17.