NKHANI YAKUPFUNZA 18
Bwerani Timbalimbikisane pa Mitsonkhano ya Gwere
“Bwerani timbakumbukirane kuti timbalimbikisane.” — AHEBEREU 10:24, 25.
NYIMBO 88 Tidziwiseni Njira Zanu
BZOMWE TIN’PFUNZA a
1. Thangwe ranyi timbatawira pa mitsonkhano?
THANGWE ranyi ifepano timbayenda ku mitsonkhano ya gwere? Cakuyamba, timbatsonkhana kuti titumbize Yahova. (Salimo 26:12; 111:1) Timbatsonkhanambo pabodzi kuti timbalimbikisane pa nthawe zino zakunesa. (1 Atesalonika 5:11) Tikambaimisa boko ticipereka mtawiro, timbakhala tikucita bzimwebzi.
2. Kodi ni mbali ziponi zomwe tingapereke mitawiro pa mitsonkhano ya gwere?
2 Sumana iri-yentse timbakhala na mwayi wakupereka mitawiro pa mitsonkhano ya gwere. Pa mitsonkhano ya kuphampha kwa sumana, tingapereke mitawiro pa Pfunziro la Ntsanza ya Mulindiri. Ndipo pa mitsonkhano ya pakati pa sumana, tingapereke mitawiro pa mbali ya Cuma Cauzimu, Pfunziro la Bibliya la Gwere na mbali zinango zomwe zina mibvunzo.
3. Kodi ni bzinthu bziwiri bziponi bzomwe tingagumane nabzo, ndipo Ahebereu 10:24, 25 angatithandize tani?
3 Tentsenefe timbafuna kutumbiza Yahova na kulimbikisa abale wathu wacikristau. Tsono pomwe tikufuna kupereka mtawiro, tingagumane na mphitca. Tingacite mantha kutawira ayai tingafune kutawira tsono tingalatidwe lini kawiri-kawiri. N’ciyani comwe cingatithandize kukunda bzimwebzi? Bzomwe Paulo adanembera Ahebereu bzingatithandize kugumana mtawiro wace. Pomwe iye akhafotokoza bza kufunika kwa kumbatsonkhana, adalewa kuti tin’funika ‘kumbalimbikisana.’ (Werengani Ahebereu 10:24, 25.) Tikazindikira kuti wanthu winango angalimbikisidwe na mitawiro yathu, bzin’dzaticitisa kuti timbapereke mitawiro. Napo kuti tingalatidwe lini kawiri-kawiri, tin’dzakomedwa kuwona winango akukhalambo na mwayi wakutawira. — 1 Pedru 3:8.
4. Kodi ni nfundo zitatu ziponi zomwe tin’pfunza mu nkhani ino?
4 Mu nkhani ino, tin’pfunza momwe tingalimbikisirane mu gwere lomwe lina abale wakucepa. Tikamala, tin’dzapfunza momwe tingalimbikisirane mu gwere lomwe lina abale azinji omwe ambaimisa manja kuti atawire. Ndipo pakumalizira tin’pfunza momwe mitawiro yathu ingalimbikisire anzathu.
MBALIMBIKISANI ANZANU MU GWERE LING’ONO
5. Kodi tingalimbikise tani anzathu napo kuti tiri mu gwere lomwe lina wanthu ang’ono-ng’ono?
5 Mu gwere ling’ono mumbakhala mulibe abale azinji omwe ambapereka mitawiro. Nthawe zinango, munthu omwe akutsogolerayo angafunike kudikhira pang’ono kuti munthu aimise boko. Ndipo mitsonkhanoyo ingawoneke ninga kuti ikudekeza lini ndipo njakusaya kulimbikisa. N’ciyani comwe imwepo mungacite? Mbaimisani boko kawiri-kawiri. Mukacita bzimwebzi, wanthu winango an’dzafunambo kutawira.
6-7. Kodi n’ciyani comwe tingacite kuti tileke kubva mantha pomwe tikupereka mtawiro?
6 Kodi mungacite ciyani penu mumbabva mantha kutawira? Wanthu azinji ambabzibvambo tenepoyo. Tsono kuti mukwanise kulimbikisa abale na mpfumakazi zanu nyang’anani njira zakumalisira manthayo kuti mumbakwanise kutawira. Kodi mungacite tani bzimwebzi?
7 Pinango nfundo zomwe tidapfunza mu Ntsanza ya Mulindiri m’mbuyomu zingakuthandizeni. b Cinthu cibodzi comwe mungacite ndico kumbakonzekera bwino. (Mimwani 21:5) Imwepo mukabvesesa bwino nfundo zomwe mun’kapfunza, bzin’dzakupusirani kuti muimise boko kuti mutawire. Ndipo cinthu cinango, mbaperekani mitawiro yacigwatira. (Mimwani 15:23; 17:27) Imwepo mun’dzacita lini mantha mukadziwa kuti mafala yomwe mun’funa kulewayo ni mang’ono-ng’ono. Mungapereke mtawiro ufupi mwa kundofotokoza nfundo yakufunika, ndipo bzimwebzi bzin’dzathandiza abale kubvesesa bzomwe mwafotokoza kusiyana na mtawiro utali omwe una nfundo zizinji. Mukapereka mtawiro wacigwatira mwa kufotokoza mafala yanu-yanu, imwepo mun’dzalatiza kuti mwakonzekera bwino ndipo mwaibvesesa bwino nkhaniyo.
8. Kodi Yahova ambawona tani nyongo yathu?
8 Penu imwepo mukuyezera kuphatisa basa nfundo zimwezi koma mukadapitiriza kucita mantha kutawira, dziwani kuti Yahova ambawona nyongo yanu kuti mutawire. (Luka 21:1-4) Yahova angakukumbireni lini kuti mucite bzinthu bzomwe mungabzikwanise lini. (Afilipi 4:5) Yezerani kuwona bzomwe mungakwanise kucita ndipo mbapembani kuti mukhale wakuderekha pomwe mukutawira. Kucita bzimwebzi kun’dzakuthandizani kuti mupereke mtawiro wacigwatira.
MBALIMBIKISANI ANZANU MU GWERE LIKULU
9. Kodi ni bvuto liponi lomwe tingagumane nalo mu gwere lomwe lina wanthu azinji?
9 Penu mu gwere mwanu muna apalizi azinji, imwepo mungagumane na bvuto linango lakusiyana na lomwe tamala kufotokozali. Pinango mu gwere mwanu muna abale na mpfumakazi azinji omwe ambaimisa manja kuti atawire ndipo imwepo mumbalatidwa lini kawiri-kawiri. Mpfumakazi Danielle imbafuna kwene-kwene kupereka mitawiro pa mitsonkhano. c Iyo imbawona kuti bzimwebzi bzimbacita mbali ya kunamata kwace, bzimbalimbikisa abale ndipo bzimbamuthandiza kuti alimbise cikhulupiro cace pa bzomwe ambapfunza m’Bibliya. Tsono pomwe iye adacinja gwere aciyenda ku gwere likulu akhambalatidwa lini kawiri-kawiri. Ndipo nthawe zinango pa sumana akhandotawira kabodzi basi. Iye adati: “Ndikhambabva ciya; ndikhabva ninga kuti ndaluza mwayi unango. Bzimwebzi bzikacitika, ndikhawona ninga kuti abalewo akucita utowa.”
10. N’ciyani cinango comwe tingacite kuti timbatawire pa mitsonkhano?
10 Kodi imwepo mudabzibvambo kale ninga momwe Danielle akhabvera? Penu munti inde, bzimwebzi bzingakucitiseni kuti muleke kumbatawira mucimbandotetekera mitsonkhanoyo basi. Tsono, lekani kuleka kumbapereka mitawiro. Kodi mungacite ciyani kuti mupitirize kumbapereka mitawiro? Imwepo mungambakonzekere mitawiro mizinji pa mtsonkhano uli-wentse. Penu imwepo mungalatidwe lini pa kuyamba kwa pfunzirolo, mungadzakhale na mwayi wa kutawira kuphampha kwa pfunzirolo. Pomwe mukukonzekera Pfunziro la Ntsanza ya Mulindiri, mbawonani momwe ndime iri-yentse ikubveranirana na msolo wa nkhaniyo. Mukacita tenepo, mungadzakhale na mwayi wakupereka mtawiro pa nthawe iri-yentse pomwe pfunzirolo liri mkati. Ndipo imwepo mungakonzekere kuti mudzapereke mtawiro pa ndime zomwe n’zakunesa kuzibvesesa. (1 Akolinto 2:10) Thangwe ranyi? Thangwe pa ndime zimwezi mbanthu ang’ono-ng’ono omwe angaimise manja. Imwepo mukawona kuti napo kuti mumbaimisa boko koma mumbalatidwa lini basi, mungauze m’bale omwe ambatsogolera pfunzirolo ndime zomwe mukufuna kudzatawira.
11. Kodi Afilipi 2:4 ambatiuza kuti ticite ciyani?
11 Werengani Afilipi 2:4. Mwakutsogoleredwa na mzimu wa Mulungu, mpostolo Paulo adauza Akristau kuti ambakumbukirembo anzawo. Kodi tingaphatise tani basa malango yamweya pa mitsonkhano? Tingacite bzimwebzi mwa kumbakumbukira kuti anzathu ambafunambo kutawira.
Ninga momwe imwepo mumbafunira kuti anzanu alalewembo pomwe mukuceza nawo, mbasiyanimbo kuti anzanu atawirembo pa mitsonkhano (Onani ndime 12)
12. Kodi ni njira iponi yomwe tingalimbikisire anzathu pa mitsonkhano? (Onani cithunzi-thunzi.)
12 Tiyezezere tenepa. Imwepo mukakhala mukuceza na axamwali wanu, kodi mumbandolalewa ndimwepo mwekha ndipo anzanuwo ambandokhala adanyamala? Bzikuwonekeratu kuti ne. Imwepo mumbafuna kuti iwo alalewembo. Mpsibodzi-bodzimbo na pa mitsonkhano. Timbafuna kuti wanthu azinji atawirembo. Njira ibodzi yakulimbikisira abale na mpfumakazi zathu ndiyo kuwapasa mpata kuti atawirembo. (1 Akolinto 10:24) Mbatiwoneni kuti tingacite tani bzimwebzi.
13. Kodi n’ciyani comwe mungacite kuti mupasembo mpata wanthu winango kuti atawirembo?
13 Cinthu cibodzi comwe tingacite ndico kupereka mitawiro yathu mwacigwatira kuti tipase mpata anzathu kuti atawirembo. Akulu wa gwere pabodzi na abale winango wakukhwima mwauzimu ndiwo an’funika kuyamba kumbacita bzimwebzi. Imwepo mukapereka mtawiro wacigwatira, tcenkhani kumbalalewa bzinthu bzizinji. Imwepo mukalewa bzinthu bzizinji bzomwe bziri pa ndimepo, winango an’dzasaya bzakulewambo. Mu ndime ino, muna nfundo ziwiri izi: Kupereka mitawiro yacigwatira na kutcenkha kulalewa bzizinji. Penu imwepo ndimwe munthu wakuyamba omwe walatidwa kuti mutawire ndime imweyi, yezerani kutawira nfundo ibodzi.
Kodi ni pa nthawe iponi pomwe tingaimise lini boko pa mitsonkhano? (Onani ndime 14) f
14. N’ciyani comwe tin’funika kukumbukira tikafuna kuimisa boko? (Onani cithunzi-thunzi.)
14 Pomwe tikufuna kupereka mitawiro yathu, tin’funika kumbakumbukirambo anzathu. Tikambaimisa boko kawiri-kawiri, tin’dzacitisa kuti m’bale omwe akucitisa pfunziroyo ambalate ifepano basi napo kuti pana wanthu winango omwe aimisambo manja omwe akanati kutawira. Bzimwebzi bzingawacitise kuleka kumbaimisa boko. — Mpalizi 3:7.
15. (a) N’ciyani comwe tin’funika lini kucita tikasaya kulatidwa? (b) Kodi omwe akucitisa mbali ya mibvunzo na mitawiro angalatize tani kuti ambakumbukira wanthu wentse? (Onani kwadru yakuti “ Pomwe Mukucitisa Mbali ya Mibvunzo na Mitawiro.”)
15 Penu m’gwere mwanu muna abale azinji omwe ambaimisa manja, ifepano tin’dzakwanisa lini kutawira ndime zentse zomwe takonzekera, thangwe nyakutsogolera angalate munthu munango. Bzimwebzi bzikacitika, tin’funika lini kukalipa. — Mpalizi 7:9.
16. Kodi tingalimbikise tani omwe ambapereka mitawiro?
16 Penu imwepo mumbatawira lini kawiri-kawiri pa mitsonkhano, mbatetekerani mwatceru pomwe winango akupereka mitawiro yawo. Ndipo kuphampha kwa mitsonkhanoyo, mungawatende thangwe ra mitawiro yawoyo. Abale na mpfumakazi angabzibve kukhala wakulimbikisidwa imwepo mukambawatenda kuposa mitawiro yomwe imwepo mwapereka. (Mimwani 10:21) Tikambatenda anzathu thangwe ra mitawiro yomwe apereka, timbawalimbikisa.
NJIRA ZINANGO ZA MOMWE TINGALIMBIKISIRE ANZATHU
17. (a) Kodi abereki angathandize tani wana wawo kukonzekera mitawiro? (b) Mwakubverana na vidiyoyi, kodi ni njira zinai ziponi zomwe mungaziphatise basa pa kukonzekera mitawiro? (Onani mafala ya m’nyantsi.)
17 Kodi n’ciyani cinango comwe tingacite kuti timbalimbikisane pa mitsonkhano? Penu imwepo muna wana, mbathandizani wana wanuwo kukonzekera mitawiro yawo. (Mateu 21:16) Ndime zinango zingakhale zakunesa kuti wana wanu azibvesese, koma munganyang’ane ndime zakupusa kuti wana wanuwo atawirembo. Ndipo thandizanimbo wana wanuwo kubvesesa kuti ni nthawe lini zentse zomwe an’dzalatidwa akaimisa boko. Kubvesesa bzimwebzi kun’dzawathandiza kuti aleke kudzakalipa nyakucitisa akadzalata wanthu winango. — 1 Timotio 6:18. d
18. Kodi tingatcenkhe tani kulewa bzizinji bza ifepano pomwe tikupereka mtawiro? (Mimwani 27:2)
18 Tentsenefe tingakonzekere mitawiro yomwe ingatumbizise Yahova na kulimbikisambo abale wathu wacikristau. (Mimwani 25:11) Napo kuti nthawe zinango tingafotokoze bza moyo wathu pomwe tikutawira, tin’funika kutcenkha kulalewa bzinthu bzizinji. (Werengani Mimwani 27:2; 2 Akolinto 10:18) Koma mitawiro yathu in’funika kulatiza kuti tikutumbiza Yahova, tikulewa bzinthu bzomwe bziri m’Fala lace na kulewa bzinthu bzomwe bzingalimbikise atumiki wace wentse. (Apokalipse 4:11) Tsono ndimeyo ikalewa kuti tin’funika kulewa bza moyo wathu, tingacite bzimwebzo. Ndime ikubwerayi ina mbvunzo omwe un’tipasa mwayi wakuti ali-wentse alewe bza moyo wace.
19. (a) Tikambakumbukira anzathu pomwe tiri pa mitsonkhano, kodi tin’dzakhala na phindu liponi? (Aroma 1:11, 12) (b) N’ciyani comwe imwepo mumbafuna kutawira pa mitsonkhano?
19 Napo kuti palibe malamulo ya momwe tingambaperekere mitawiro, tentsenefe tingacite nyongo ya kumbapereka mitawiro yomwe inilimbikisa abale na mpfumakazi zathu. Bzimwebzi bzin’funa kulewa kuti tingafunike kumbatawira kawiri-kawiri. Ayai tingafunike kumbakomedwa na mwayi omwe timbakhala nawo wakupereka mitawiro na kukomedwambo anzathu akapereka mitawiro. Tikambakumbukira anzathu pomwe tiri pa mitsonkhano, ifepano ‘tin’dzalimbikisana m’cikhulupiro.’ — Werengani Aroma 1:11, 12.
NYIMBO 93 Simbani Mitsonkhano Yathu
a Timbalimbikisana tikambapereka mitawiro pa mitsonkhano. Tsono wanthu winango ambacita mantha kutawira. Winango ambafuna kwene-kwene kutawira ndipo ambafunambo kuti ambalatidwe kawiri-kawiri. Kodi tingalatize tani kuti timbakumbukirana kuti tentse tikhale wakulimba? Kodi tingapereke tani mitawiro yomwe ingathandize abale na mpfumakazi zathu kulatizana lufoyi na mabasa yabwino? Nkhani ino in’tawira mibvunzo imweyi.
b Kuti muwone nfundo zakuthumizirika, werengani Ntsanza ya Mulindiri ya Janeiro, 2019, matsa. 8-13 na ya 1 Setembro, 2003, matsa. 19-22 (Chichewa).
c Dzinali lacinjidwa.
d Onani pa jw.org vidiyo yakuti Khala Xamwali wa Yahova — Mbakonzekerani Mitawiro Yanu.
e Onani Ntsanza ya Mulindiri ya 15 Julho, 2013, tsa. 32 na ya 1 Setembro, 2003, matsa. 20-22 (Chichewa).
f BZOMWE BZIKUCITIKA PA CITHUNZI-THUNZI: M’gwere lomwe lina wanthu azinji, m’bale omwe atawira kale akupasa mpata abale winango kuti atawirembo.
