NKHANI YAKUPFUNZA 19
Kodi Tingalimbise Tani Cikhulupiro Cathu Cakuti Yahova An’dzabweresa Dziko Lipsa?
“Kodi [Yahova] akalewa cinthu, ambacicita lini?” — MIREWENGO 23:19.
NYIMBO 142 Tiphatisise Cidikhiro Cathu
BZOMWE TIN’PfUNZA a
1-2. Kodi n’ciyani comwe tin’funika kucita pomwe tikudikhirira dziko lipsa?
IFEPANO timbakhulupira ndipo timbatenda piciro la Yahova lakuti an’dzacosa dziko lakuipali acibweresa dziko labwino. (2 Pedru 3:13) Napo kuti timbadziwa lini bwino-bwino kuti ni lini pomwe dziko lipsalo lin’dzabwera, pana umboni buzinji bomwe bukulatiza kuti bzimwebzi bzin’citika tsapanopapa. — Mateu 24:32-34, 36; Mabasa 1:7.
2 Bziribe basa kuti tamala magole mangasi tiri n’cadidi, tentsenefe tin’funika kulimbisa cikhulupiro cathu pa piciro limweri. Thangwe ranyi? Thangwe napo munthu omwe ana cikhulupiro cakulimba angawofoke. Ndipopa mpostolo Paulo adacemera kusaya cikhulupiro kuti “pikado yomwe ingatigwese mwakusaya kunesa.” (Ahebereu 12:1) Kuti tileke kuwofoka, tin’funika nthawe zentse kumbapfunza umboni bwakulatiza kuti dziko lipsa lin’bwera tsapanopapa. — Ahebereu 11:1.
3. Kodi tin’cezerana ciyani mu nkhani ino?
3 Mu nkhani ino, tin’cezerana bzinthu bzitatu bzomwe bzingalimbise cikhulupiro cathu cakuti Yahova an’dzabweresa dziko lipsa: (1) Kumbakumbukira bza cakulombolera, (2) kumbakumbukira kuti Yahova ana mphanvu na (3) kubzipereka pa kucita basa la Mulungu. Ndipo tikamala tin’dzacezerana momwe mafala yomwe Yahova adauza Habakuki yambalimbisira cikhulupiro cathu ntsiku zino. Cakuyamba, bwerani tiwone mabvuto yomwe tikugumana nawo ntsiku zino yomwe yangatiwofokese ticitazira kukhulupira kuti Mulungu an’dzabweresa dziko lipsa.
MABVUTO YOMWE YANGATEPESE CIKHULUPIRO CATHU
4. Kodi ni bzakusankhula bziponi bzomwe bzimbafuna cikhulupiro cakulimba?
4 Timbafunika kukhala na cikhulupiro cakulimba kuti ticite bzakusankhula bzabwino ntsiku zentse. Ifepano timbasankhula axamwali omwe tin’funa kukhala nawo, masenzeka, mapfunziro, malowozi, wana omwe tingakhale nawo na basa. Tingacite bwino kumbabzibvunza kuti: ‘Kodi bzomwe nimbasankhula bzimbalatiza kuti dzikoli lin’mala tsapanopali ndipo tsapanopa Mulungu anibweresa dziko labwino? Ayai nimbatewezera wanthu omwe ambakumbuka kuti munthu akafa bzamaliratu?’ (Mateu 6:19, 20; Luka 12:16-21) Tikakhulupira kuti dziko lipsa liri pafupi tin’dzacita bzakusankhula bzabwino.
5-6. Thangwe ranyi tin’funika kumbakhala na cikhulupiro cakulimba tikakhala tikugumana na mabvuto? Fotokozani.
5 Timbagumanambo na mabvuto yomwe yambayeza cikhulupiro cathu. Ifepano tingazunzidwe, tingaduwale ayai tingagumane na mabvuto manango yomwe yangatiwofokese. Pakuyamba, ifepano tingakhale wakulimba. Tsono bvutolo likasaya kumala, ifepano tin’funika kupitiriza kukhala na cikhulupiro cakulimba kuti titumikire Yahova. — Aroma 12:12; 1 Pedru 1:6, 7.
6 Tikakhala tikugumana na mabvuto pinango tingakumbuke kuti dziko lipsa lin’bwera lini. Kodi bzimwebzi bzin’funa kulewa kuti tiribe cikhulupiro cakulimba? Ne ndibzo lini. Kumbukirani ibzi. Tikakhala tiri pa nthawe yakudjedjera pinango tingakumbuke kuti kudjedjerako kunimala lini. Tsono nthawe yakupsa imbadzafika basi. Mpsibodzi-bodzimbo na ifepano. Tikakhala tikugumana na mabvuto, tingawone ninga kuti dziko lipsa likucedwa kubwera. Tsono tikakhala na cikhulupiro cakulimba tin’dzakhala na citsimikizo cakuti bzomwe Mulungu adalewa bzin’dzakwanisikadi. (Salimo 94:3, 14, 15; Ahebereu 6:17-19) Bzimwebzi bzin’dzatithandiza kuti tipitirize kumbaikha kunamata Yahova pa mbuto yakuyamba pa moyo wathu.
7. Kodi ni nzeru ziponi zomwe tin’funika kuzitcenkha?
7 Kuti ticite basa lakupalizira timbafunikambo kukhala na cikhulupiro cakulimba. Wanthu azinji omwe timbawapalizira “mafala yabwino” yakulewa bza dziko lipsa ambakumbuka kuti bzimwebzi bzingacitike lini. (Mateu 24:14; Zakiyeri 33:32) Ifepano tin’funika lini kukhala na nzeru ninga zawozi. Ndipopa kuti bzimwebzi bzireke kuticitikira tin’funika kupitiriza kulimbisa cikhulupiro cathu. Bwerani tiwone momwe tingacitire bzimwebzi.
MBAKUMBUKIRANI BZA CAKULOMBOLERA
8-9. Kodi kukumbukira bza cakulombolera kungalimbise tani cikhulupiro cathu?
8 Njira ibodzi yakulimbisira cikhulupiro cathu ndiyo kumbakumbukira bza cakulombolera. Cakulombolera cimbatitsimikizira kuti Mulungu an’dzacita bzinthu bzentse bzomwe adalewa. Tikambakumbukira bwino-bwino thangwe lomwe lidacitisa Mulungu kuti apereke Mwana wace, timbalimbisa cikhulupiro cathu pa mapiciro ya Mulungu yakuti mu dziko lipsa lomwe likubweralo wanthu an’dzakhala na moyo wakusaya kumala. Thangwe ranyi tikulewa bzimwebzi?
9 Kodi n’ciyani comwe Mulungu adacita kuti tikhale na cakulombolera? Yahova adatumiza Mwana wace wakuyamba omwe akhali xamwali wace wa pa mtima kuti abwere pa dziko la pantsi pano ninga munthu wakulungama. Pomwe Jezu akhali pa dziko la pantsi pano, iye adapirira mabvuto yakusiyana-siyana. Patsogolo pace iye adafa infa yakuwawa kwene-kwene. Bzimwebzi bzikhali lini bzakupusa! Mulungu wathu walufoyi angadabvuma lini kuti Mwana wace abonere acifa kuti ifepano tikhale na moyo wa kanthawe kakucepa basi. (Juwau 3:16; 1 Pedru 1:18, 19) Bzomwe Yahova adacitabzi bzikulatiza kuti iye akufuna kuti wanthu adzakhale na moyo wakusaya kumala mu dziko lipsa.
MBAKUMBUKIRANI KUTI YAHOVA ANA MPHANVU
10. Mwakubverana na Aefezo 3:20, kodi n’ciyani comwe Yahova ambakwanisa kucita?
10 Njira yaciwiri yomwe ingatithandize kulimbisa cikhulupiro cathu ndiyo kumbakumbukira kuti Yahova ana mphanvu. Iye ana mphanvu yakucita bzinthu bzentse bzomwe adalewa. N’cadidi kuti kwa wanthufe bzingawoneke ninga kuti bzingakwanisike lini kuti Yahova acite bzomwe adalewa bzakuti wanthu an’dzakhala na moyo wakusaya kumala mu dziko lipsa. Kawiri-kawiri Yahova ambalewa bzinthu bzomwe wanthu angakwanise lini kubzicita. Iye ni Mulungu Wamphanvu-zentse. (Djobi 42:2; Marko 10:27) Ndipopa ifepano timbadabwa lini iye akalewa kuti an’dzacita bzinthu bzomwe kwa wanthufe bzingakwanisike lini. — Werengani Aefezo 3:20.
11. Fotokozani bzinthu bzomwe Yahova adacita bzomwe bzikhawoneka ninga kuti bzingadacitika lini. (Onani kwadru yakuti “ Mapolofesiya ya m’Bibliya Yomwe Yadakwanisika.”)
11 Onani bzinthu bzinango bzomwe Yahova adauza wanthu kuti iye angadacita bzomwe bzikhawoneka ninga kuti bzingadacitika lini. Iye adatsimikizira Abalahamu na Sara kuti iwo angadakhala na mwana napo kuti akhadakalamba. (Ciyambo 17:15-17) Ndipo iye adalewambo kuti mbadwo za Abalahamuyo zingadadzapasidwa dziko la Kanani. Mbadwo za Abulahamuyo, omwe akhali Ajirayeri, adakhala ku Edjipito magole mazinji ninga akapolo, ndipo bzimwebzi bzikhawacitisa kukumbuka kuti bzomwe Mulunguyo adalewa bzin’citika lini. Tsono bzidadzacitika. Ndipo pomwe padapita nthawe, Yahova adalewa kuti Elizabeti angadadzakhala na mwana. Ndipo iye adauzambo Mariya omwe akhali dende kuti angadadzabereka Mwana omwe Yahova akhadamulewa kale-kale mu zunde la Edeni, ndipo bzimwebzi bzidacitikadi! — Ciyambo 3:15.
12. Kodi Djoswe 23:14 na Zaiya 55:10, 11 ambatitsimikizira ciyani?
12 Tikambakumbukira bzinthu bzentse bzomwe Yahova adalewa na kucita, ifepano timbakwanisa kubvesesa kuti iye ana mphanvu ndipo bzimwebzi bzimbaticitisa kuti tikhulupirembo kuti bzomwe iye adalewa bzakuti an’dzabweresa dziko lipsa bzin’dzacitikadi. (Werengani Djoswe 23:14; Zaiya 55:10, 11.) Bzimwebzi bzimbatikonzekeresa kuti tikwanisembo kuthandiza anzathu kudziwa kuti nkhani yakuti Mulungu an’dzabweresa dziko lipsa ni maloto lini, koma ni bzinthu bzomwe bzin’dzacitikadi. Yahova caiyeyo adacita kulewa bza kudzulu kupsa na dziko la pantsi lipsa, kuti: “Mafala yamweya njakukhulupirika na yacadidi.” — Apokalipse 21:1, 5.
CITANI BZINTHU BZOMWE BZINGAKUTHANDIZENI KUKHALA WAKUFENDERERANA NA YAHOVA
MITSONKHANO YA GWERE
Kodi kucita bzinthu bzauzimubzi kungalimbise tani cikhulupiro cathu? (Onani ndime 13)
13. Kodi mitsonkhano ya gwere imbalimbisa tani cikhulupiro cathu? Fotokozani.
13 Cinthu cacitatu comwe cingatithandize kulimbisa cikhulupiro cathu ndico kumbakhala na nthawe yakucita bzinthu bzauzimu. Kumbukirani momwe mitsonkhano yathu yacikristau imbatithandizira. Mpfumakazi inango yakucemeredwa Anna idamala magole mazinji ikucita utumiki bwa nthawe zentse. Iyo idati: “Mitsonkhano imbandithandiza kukhala na cikhulupiro cakulimba. Napo kuti mfotokozi wa nkhani angakhale alibe luso la kufotokoza nkhani ayai angalewe lini cinthu cipsa, koma nthawe zentse ndikakhala pa mitsonkhano nimbabva cinthu comwe cimbandithandiza kubvesesa bwino cadidi ca m’Bibliya ndipo bzimwebzi bzimbalimbisa cikhulupiro cangu.” b Ndipo cikhulupiro cathu cimbakhalambo cakulimba tikabva mitawiro ya abale na mpfumakazi zathu pa mitsonkhano. — Aroma 1:11, 12; 10:17.
BASA LA KUPALIZIRA
Kodi kucita bzinthu bzauzimubzi kungalimbise tani cikhulupiro cathu? (Onani ndime 14)
14. Kodi kucita basa la kupalizira kumbalimbisa tani cikhulupiro cathu?
14 Ifepano timbalimbisambo cikhulupiro cathu tikambacita basa la kupalizira. (Ahebereu 10:23) Barbara, omwe amala magole yakupitirira 70 akutumikira Yahova, adalewa kuti: “Nimbawona kuti basa la kupalizira limbandithandiza kukhala na cikhulupiro cakulimba. Ndikambauza wanthu winango bzomwe Yahova an’dzacita kutsogoloku, cikhulupiro cangu cimbapitiriza kukhala cakulimba.”
PFUNZIRO LA PATEKHA
Kodi kucita bzinthu bzauzimubzi kungalimbise tani cikhulupiro cathu? (Onani ndime 15)
15. Kodi pfunziro la patekha limbalimbisa tani cikhulupiro cathu? (Onani bzithunzi-thunzi.)
15 Onani cinthu cinango comwe cingalimbise cikhulupiro cathu: Pfunziro la patekha. Mpfumakazi Susan idawona kuti bzimbakhala bzakuthandiza kukhala na ndondomeko yakuti ambacite pfunziro la payekha. Mpfumakaziyi idati: “Pa dumingu nimbakonzekera Pfunziro la Ntsanza ya Mulindiri la sumana yakutewera. Pa ciposi na cipiri nimbakonzekera mitsonkhano ya pakati pa sumana. Ntsiku zomwe zasalazi nimbacita pfunziro la pandekha.” Mpfumakazi Susan ikupitiriza kulimbisa cikhulupiro cace mwa nthawe zentse kumbakhala na ndondomeko yakuti ambapfunze. Mpfumakazi Irene yomwe yamala magole mazinji ikutumikira ku likulu lathu la pa dziko lentse, idawona kuti mpsakuthandiza kwene-kwene kupfunza mapolofesiya ya m’Bibliya. Mpfumakaziyo idati: “Mpsakudekeza kwene-kwene kuwona kuti Yahova ambakwanirisa mapolofesiya, napo yale yomwe ni mang’ono-mang’ono.” c
“PAKUTI YAN’DZACITIKADI”
16. Thangwe ranyi mafala ya pa Habakuki yadanembedwerambo Akristau ntsiku zino? (Ahebereu 10:36, 37)
16 Atumiki winango wa Yahova akudikhirira kumala kwa dzikoli kuyambira kale-kale. Kwa wanthu bzimwebzi bzingawoneke ninga kuti bzikucedwa. Ndipo Yahova ambadziwa kuti atumiki wace angawonembo tenepoyo, ndipopa iye adauza Habakuki kuti: “Masomphenyaya yakudikhira nthawe yace, ndipo yakuthamangira ku mamaliziro yace; yaninama lini. Napo yacedwe, pitiriza kuyadikhirira pakuti yan’dzacitikadi mwakusaya kucedwa!” (Habakuki 2:3) Kodi Yahova akhanembera Habakuki basi mafala yamweya? Ayai akhanemberambo ifepano ntsiku zino? Mwa kutsogoleredwa na mzimu wakucena wa Mulungu, mpostolo Paulo adalatiza kuti mafalaya yadanembedwerambo Akristau omwe akudikhirira dziko lipsa. (Werengani Ahebereu 10:36, 37.) Ifepano tin’funika kutsimikizira kuti napo kuti kupulumusidwa kwathu kungawoneke ninga kuti kukucedwa, ‘iko kun’dzacitikadi mwakusaya kucedwa!’
17. Kodi mpfumakazi inango idaphatisa tani basa malango yomwe Yahova adapasa Habakuki?
17 Atumiki wa Yahova azinji akuphatisa basa malango yamweya yakuti: “Pitiriza kuyadikhirira.” Mpfumakazi yakucemeredwa Louise idayamba kutumikira Yahova mu 1939. Mpfumakaziyo idati: “Pa nthawe imweyo ndikhakumbuka kuti Armagedo in’bwera pomwe ndikanati kumaliza kupfunza. Bzimwebzi bziribe kucitika. Ndidawona kuti bzikhali bwino kuti nimbawerenge nkhani zomwe ndidazicemera kuti ‘nkhani za kudikhirira.’ Ndikhambawerenga nkhani za Nowa, Abalahamu, Zuze na wanthu winango omwe adamala nthawe ikulu akudikhirira kuti atambire mabaibai yomwe Yahova adawapicira. Kukhulupira kuti Mulungu an’dzacita bzomwe adalewa kwandithandiza ndipo kwathandizambo wanthu winango kukhala na citsimikizo cakuti dziko lipsa lafendera.” Abale na mpfumakazi winango omwe akutumikira Yahova kuyambira kale-kale angatawirizembo bzimwebzi!
18. Kodi kuwona cirengedwe kungalimbise tani cikhulupiro cathu cakuti dziko lipsa lin’bwera?
18 Dziko lipsa likanati kubwera. Kumbukirani bzinthu bzomwe bziripo, ninga nyenyezi, miti, bzirombo na wanthufe. Pa nthawe inango bzinthu bzimwebzi pakhalibe, koma tsapano ibzo bziripo. Bzinthu bzimwebzi bziripo thangwe Yahova adabzilenga. (Ciyambo 1:1, 26, 27) Mulungu wathu akufunambo kubweresa dziko lipsa. Iye an’dzacita bzomwe adalewa. Mu dziko lipsa wanthu an’dzakhala na moyo wakusaya kumala ndipo an’dzakhala na thanzi labwino. Ifepano tingatsimikize kuti nthawe yace ikadzakwana, Mulungu an’dzabweresa dziko lipsa. — Zaiya 65:17; Apokalipse 21:3, 4.
19. Kodi mungalimbise tani cikhulupiro canu?
19 Pomwe mukudikhirira bzimwebzi, phatisani basa mpata uli-wentse omwe mungakhale nawo kuti mulimbise cikhulupiro canu. Nthawe zentse mbatendani Mulungu thangwe ra kutipasa cakulombolera. Mbakumbukirani kuti Yahova ana mphanvu. Mbakhalani na nthawe yakucita bzinthu bzauzimu. Mukacita bzimwebzi mun’dzakhala pakati pa wanthu “omwe mwa cikhulupiro na kupirira, akutambira utaka bomwe adauzidwa kuti angadadzapasidwa.” — Ahebereu 6:11, 12; Aroma 5:5.
NYIMBO 139 Bziyezezereni Kuti Muli M’paraizo
a Wanthu azinji ambakhulupira lini bzomwe Bibliya limbalewa pakulewa bza dziko lipsa. Iwo ambakumbuka kuti ni maloto ndipo ni bzinthu bzomwe bzingacitike lini. Tsono ifepano timbakhulupira kuti bzinthu bzentse bzomwe Yahova adalewa bzin’dzacitikadi. Napo bziri tenepo, kuti cikhulupiro cathu cikhale camphanvu tin’funika kupitiriza kucilimbisa. Kodi tingacite tani bzimwebzi? Nkhani ino in’tifotokozera.
b Madzina yanango yacinjidwa.
c Nkhani zizinji zakulewa bza mapolofesiya ya m’Bibliya mungazigumane mwa kunyang’ana mu Índice das Publicações da Torre de Vigia pa msolo wakuti “Profecias.” Mwa ciratizo, mungawone nkhani yakuti “O que Jeová prediz se cumpre,” mu Ntsanza ya Mulindiri ya 1 Janeiro, 2008, (Cipwitikizi).
