NKHANI YAKUPFUNZA 15
Kodi Tingapfunze Ciyani na Bzakudabwisa Bzomwe Jezu Adacita?
“Iye adafamba m’bzigawo bzentse acimbacita bzinthu bzabwino na kupoza wanthu.” — MABASA 10:38.
NYIMBO 13 Kristu ni Ciratizo Cathu
BZOMWE TIN’PFUNZA a
1. Fotokozani bzomwe bzidacitika pomwe Jezu adayenda ku festa ya kazamento.
KUMBUKIRANI kuti bzinthu bzikhali tani mu gole la 29 EC pomwe Jezu adayamba basa lace. Jezu, mai wace na anyakupfunza wace adacemeredwa ku kazamento yomwe idacitikira ku Kana, m’mudzi omwe ukhali ku phiri kwa Nazareti. Mariya akhali xamwali wa anyakulowolanawo, ndipo akhawathandiza kutambira wanthu omwe akhabwera ku kazamentoko. Pomwe kazamentoyo ikhali mkati, padacitika cinthu cinango comwe cingadapasisa manyazi anyakulowolanawo na famidya zawo. Vinyu idamala. b Bzimwebzi bzidacitika pinango thangwe rakuti wanthu omwe adayenda ku festayo akhali azinji kwene-kwene. Mariya adafenderera mwana wace Jezu, acimuuza kuti: “Vinyu yamala.” (Juwau 2:1-3) Kodi n’ciyani comwe Jezu adacita? Iye adacita cakudabwisa; adasandusa madzi kukhala “vinyu yabwino.” — Juwau 2:9, 10.
2-3. (a) Kodi ni bzakudabwisa bziponi bzomwe Jezu adacita? (b) Kodi ni phindu liponi lomwe tingakhale nalo tikambapfunza bzakudabwisa bza Jezu?
2 Pomwe Jezu akhali pa dziko la pantsi adacita bzakudabwisa bzizinji kwene-kwene. c Iye adaphatisa basa mphanvu yomwe akhanayo yakucita bzakudabwisa kuti athandize wanthu azinji. Pa bzakudabwisa bziwiri bzakudyesa wanthu bzomwe adacita, iye adadyesa amuna 5000 ndipo patsogolo pace adadyesa pomwe amuna 4000. Kuphatanidza akazi na wana omwe akhalipo, akukwana wanthu wakupitirira 27 000 omwe iye adawadyesa. (Mateu 14:15-21; 15:32-38) Pa bzakudabwisa bziwiribzi, Jezu adapozambo wanthu azinji omwe akhaduwala. (Mateu 14:14; 15:30, 31) Kumbukirani momwe wanthu adakhalira wakukondwa pomwe adapozedwa na kudyesedwa na Jezu!
3 Ntsiku zino tingapfunze bzizinji na bzakudabwisa bzomwe Jezu adacita. Mu nkhani ino, tin’cezerana bzomwe tingapfunze na bzakudabwisa bzomwe Jezu adacita. Ndipo tiniwona bzomwe tingacite kuti titewezere kubzicepesa na ntsisi zomwe Jezu akhalatiza pomwe akhacita bzakudabwisabzo.
BZAKUDABWISA BZINGATIPFUNZISE BZIZINJI PAKULEWA BZA YAHOVA NA JEZU
4. Kodi bzakudabwisa bzomwe Jezu adacita bzimbatipfunzisambo bza yani?
4 Bzakudabwisa bzomwe Jezu adacita bzimbandotipfunzisa lini bza iye basi, koma bzimbatipfunzisambo bza makhalidwe ya Baba wace, Yahova. Yahova ndiye adapasa mphanvu Jezu kuti acite bzakudabwisa. Pa Mabasa 10:38 pambati: “Mulungu adamudzoza [Jezu] na mzimu wakucena acimupasa mphanvu, iye adafamba m’bzigawo bzentse acimbacita bzinthu bzabwino na kupoza wanthu omwe akhaboneresedwa na Dyabu ndipo akhacita bzimwebzi thangwe Mulungu akhanaye.” Bzakudabwisa bzomwe Jezu akhacita na momwe iye akhacitira bzinthu akhatewezera Baba wace. (Juwau 14:9) Mbatiwoneni bzinthu bzitatu bzomwe tingapfunze na bzakudabwisa bzomwe Jezu adacita.
5. Thangwe ranyi Jezu akhacita bzakudabwisa? (Mateu 20:30-34)
5 Cakuyamba, Jezu na Baba wace ambatifuna kwene-kwene. Pomwe Jezu akhali pa dziko la pantsi pano adalatiza kuti ambafuna wanthu mwa kuphatisa basa mphanvu zomwe anazo kuti awathandize. Pa nthawe inango, azimola awiri adamukumbira kuti awathandize. (Werengani Mateu 20:30-34.) Jezu adawapoza thangwe rakuti “adawabvera ntsisi.” Fala la Cigerego lomwe lidasanduliziridwa kuti “adawabvera ntsisi” limbathandauza momwe munthu ambabvera mu mtima mwace. Ntsisi zimwezi ndizo zidacitisa kuti Jezu adyese wanthu omwe akhana njala na kupoza omwe akhana mapere. (Mateu 15:32; Marko 1:41) Tingatsimikize kuti Yahova, Mulungu wa “ntsisi zikulu” na Mwana wace ambatifuna kwene-kwene ndipo ambawawidwa akatiwona tikubonera. (Luka 1:78; 1 Pedru 5:7) Iwo akufunisisa kumalisa mabvuto yomwe wanthu akugumana nayo!
6. Kodi Mulungu adapasa Jezu mphanvu zakucita ciyani?
6 Caciwiri, Mulungu adapasa Jezu mphanvu kuti amalise mabvuto ya wanthu. Pomwe Jezu akhacita bzakudabwisa, iye adalatiza kuti an’kwanisa kumalisa mabvuto yomwe ifepano tingakwanise lini kuyamalisa tekha. Iye ana mphanvu zakumalisa mabvuto yentse yomwe wanthu ambagumana nayo, yomwe yadabwera thangwe ra pikado, ninga kuduwala na kufa. (Mateu 9:1-6; Aroma 5:12, 18, 19) Bzakudabwisa bzomwe iye adacita bzikulatiza kuti iye angapoze matenda “ya mtundu uli-wentse” na kumusa wanthu omwe adafa. (Mateu 4:23; Juwau 11:43, 44) Ndipo iye ana mphanvu yakuimisa conzi camphanvu na kucosa mizimu yakuipa. (Marko 4:37-39; Luka 8:2) Mpsabwino kudziwa kuti Yahova adapasa Mwana wace mphanvu zakucita bzentsenebzi!
7-8. (a) Kodi bzakudabwisa bzomwe Jezu adacita bzimbatitsimikizira ciyani? (b) Kodi ni cakudabwisa ciponi comwe imwepo mukufunisisa kudzaciwona mu dziko lipsa?
7 Cacitatu, tingakhulupire na mtima wathu wentse kuti bzinthu bzentse bzomwe Mulungu adalewa bzin’dzacitikadi mu Umambo bwace. Bzakudabwisa bzomwe Jezu adacita pantsi pano bzimbalatiza bzomwe an’dzacita akadzayamba kutonga dziko la pantsi. Kumbukirani momwe bzinthu bzin’dzakhalira Kristu akadzayamba kutonga. Tin’dzakhala na manungo yabwino, thangwe kun’dzakhala kulibe matenda na bzinthu bzentse bzomwe bzimbaboneresa wanthu. (Zaiya 33:24; 35:5, 6; Apokalipse 21:3, 4) Tin’dzabonera lini pomwe na njala ayai na malengwa ya pantsi. (Zaiya 25:6; Marko 4:41) Tin’dzakomedwa kwene-kwene kuwona wanthu omwe ali “m’thenje” akumusidwa. (Juwau 5:28, 29) Kodi ni cakudabwisa ciponi comwe imwepo mukufunisisa kudzaciwona mu dziko lipsa?
8 Pomwe Jezu akhacita bzakudabwisa, iye akhalatiza makhalidwe yakubzicepesa na ntsisi. Ndipo ifepano tin’funikambo kumutewezera. Mbaticezeraneni bzinthu bziwiri bzomwe tingapfunze na festa ya kazamento ya ku Kana.
CAKUDABWISA COMWE CIMBATIPFUNZISA KUKHALA WAKUBZICEPESA
9. Kodi n’ciyani comwe Jezu adacita pa festa ya kazamento? (Juwau 2:6-10)
9 Werengani Juwau 2:6-10. Pomwe vinyu idamala pa festa ya kazamento ire, kodi Jezu adangingimizidwa kuti acite cakudabwisa? Ne. Thangwe ranyi tikulewa tenepoyo? Thangwe pakhalibe polofesiya iri-yentse yomwe ikhalewa kuti Mesiya angadadzasandusa madzi yacikhala vinyu. Kodi imwepo mungabve tani bzakumwa bzicimala pa kazamento yanu? Jezu adabvera ntsisi banjalo, ndipo akhafuna lini kuti iro libve manyazi. Ndipopa, ninga momwe tafotokozera kale pakuyamba pale, iye adacita cakudabwisa. Iye adasandusa madzi yacikhala vinyu yabwino kwene-kwene, malitru yakukwana 390. Iye adacita bzimwebzi kuti vinyuyo ikwane wanthu wentse omwe akhali pa festapo ndipo pinango akhafuna kuti ikasala idzaphatisidwe basa kutsogolo ayai kuti igulisidwe kuti banjalo likawone pakuyambira. Banja lipsalo lidatenda kwene-kwene kudeka mtima komwe Jezu adawalatiza!
Tewezerani Jezu mwa kuleka kumbabziwonesera pa bzomwe mumbacita (Onani ndime 10-11) e
10. Kodi ni bzinthu bziponi bzomwe Jezu adacita pa festa ire bzomwe timbabzigumana pa Juwau kapitulo 2? (Onani cithunzi-thunzi.)
10 Onani bzinthu bzinango bzomwe bzidacitika pa festayi bzomwe bzimbafotokozedwa pa Juwau kapitulo 2. Kodi mwawona kuti ni Jezu lini omwe adadzaza mitsuko ire na madzi? Iye alibe kufuna kubziwonesera kwa wanthu, ndipopa adauza anyabasa omwe akhali pamwepo kuti adzaze mitsukoyo na madzi. (Mavesi 6, 7) Pomwe iye adamala kusandusa madziyo yacikhala vinyu, alibe kutenga vinyuyo aciyenda kukapasa munthu omwe akhanyang’anira festayo. Iye adauza anyabasawo kuti acite bzimwebzo. (Vesi 8) Jezu alibe kutenga kopo ya vinyu aciyenda kutsogolo kwa wanthu acilewa kuti: ‘Lawidzani vinyu yomwe ndakonzayi!’
11. Kodi tingapfunze ciyani na bzakudabwisa bzomwe Jezu adacita?
11 Kodi tingapfunze ciyani na cakudabwisa ca Jezu cakusandusa madzi kukhala vinyu yabwino? Tikupfunza kuti tin’funika kumbakhala wakubzicepesa. Jezu alibe kubziwonesera pomwe adacita cakudabwisa cire; ndipo alibe kubziwoneserambo pa bzinthu bzentse bzomwe iye akhacita. Koma nthawe zentse, iye akhambatumbiza Baba wace. (Juwau 5:19, 30; 8:28) Tikakhala wakubzicepesa ninga Jezu tin’dzabziwonesera lini pa bzomwe timbacita. Ifepano tikacita bzinthu bzizinji pa basa la Yahova, tin’funika lini kumbabzitumbiza, koma tin’funika kumbatumbiza Mulungu omwe timbamutumikira. (Jeremiya 9:23, 24) Ifepano tin’funika kucita bzimwebzi thangwe timbazindikira kuti bzakwanisika na thandizo la Yahova. — 1 Akolinto 1:26-31.
12. N’cinthu ciponi cinango comwe tin’funika lini kucita kuti titewezere kubzicepesa kwa Jezu? Fotokozani.
12 Mbatiwoneni cinthu cinango comwe tingacite kuti titewezere kubzicepesa kwa Jezu. Onani nkhaniyi: Mkulu munango wa gwere athandiza tswaka linango lomwe ni mtumiki wakuthandiza kukonzekera nkhani ya wentse. Bzimwebzi bzacitisa kuti tswakalo lifotokoze bwino kwene-kwene nkhani yaceyo. Pomwe mitsonkhanoyo yamala, m’bale munango akuuza mkulu wa gwereyo kuti: ‘M’bale ule wafotokoza bwino kwene-kwene nkhani yace ire, ndibzo lini?’ Kodi mkuluyo angafunikire kulewa kuti: ‘Inde, ndidamala nthawe ikulu kwene-kwene kuti ndimuthandize’? Ayai, mwakubzicepesa angandolewe kuti: ‘Inde, iye wafotokoza bwino kwene-kwene. Nkhani ire yandidekera kwene-kwene’? Tikakhala wakubzicepesa, tin’dzabziwonesera lini tikacitira cinthu wanthu winango. Timbakhala wakukondwa pakudziwa kuti Yahova ambawona bzentse bzomwe timbacita. (Ndendemezerani na Mateu 6:2-4; Ahebereu 13:16) Tikatewezera kubzicepesa kwa Jezu tin’dzakondwesa Yahova. — 1 Pedru 5:6.
CAKUDABWISA COMWE CIMBATIPFUNZISA KUKHALA NA NTSISI
13. Kodi n’ciyani comwe Jezu adawona pomwe akhali pafupi na mzinda wa Naini, ndipo n’ciyani comwe iye adacita? (Luka 7:11-15)
13 Werengani Luka 7:11-15. Kumbukirani bzomwe bzidacitika pa nthawe inango pomwe Jezu akhacita utumiki bwace. Iye adacita ulendo bwakuyenda ku Naini, mzinda wa ku Galileya omwe ukhali kufupi na ku Sunemu, komwe mpolofeta Elizeu adalamusa mwana wa mamsiwa magole 900 m’mbuyo mwace. (2 Wamambo 4:32-37) Pomwe Jezu adafika pafupi na mzindayo, adawona wanthu akuyenda kukapendesa nkhawa. Bzimwebzi bzikhali bzakupasa ntsisi kwene-kwene thangwe mkazi mamsiwayo akhana mwana m’bodziyo basi. Tsono mkaziyo akhali lini yekha. Iye akhali pabodzi na wanthu azinji wa mu mzindamo. Jezu adaimisa wanthuwo acilamusa mwana wa mkaziyo. Cimweci cikhali cakudabwisa cakuyamba ca kulamusa munthu pa bzakudabwisa bzitatu bzomwe bzimbafotokozedwa m’Mavanjedyo.
Tewezerani Jezu mwa kulatiza ntsisi kwa wanthu omwe afedwa (Onani ndime 14-16)
14. Kodi ni bzinthu bziponi bzinango bzomwe Jezu adacita pa kulamusa mwana wa mamsiwa bzomwe bziri pa Luka kapitulo 7? (Onani cithunzi-thunzi.)
14 Mbatiwoneni bzinthu bzinango bzomwe bzidacitika pa cakudabwisa cimweci bzomwe bzimbafotokozedwa m’bukhu la Luka kapitulo 7. Kodi n’ciyani comwe Jezu adacita pomwe “adawona mkaziyo” akulira? Bibliya limbalewa kuti “iye adamubvera ntsisi.” (Vesi 13) Pinango Jezu adawona mkaziyo akufamba pafupi na mtembo wa mwana wace uko akulira. Bzimwebzi bzidamucitisa kuti abve ntsisi kwene-kwene. Jezu alibe kundomubvera ntsisi basi, koma adamucitira cinthu. Iye adalalewa naye mwakuderekha acimuuza kuti: “Leka kulira.” Patsogolo pace, iye adacita pomwe cinthu cinango. Iye adalamusa mwanayo ndipo “adamupereka kwa mai wace.” — Mavesi 14, 15.
15. Kodi tingapfunze ciyani na cakudabwisa comwe Jezu adacita?
15 Kodi tingapfunze ciyani na cakudabwisa comwe Jezu adacita ca kulamusa mwana wa mamsiwa? Tikupfunza kuti tin’funika kumbabvera ntsisi wanthu omwe akubonera. Tikudziwa kuti tingakwanise lini kulamusa anyakufa, ninga momwe Jezu adacitira. Tsono kuti tilatize ntsisi ninga Jezu, tin’funika kukhala tceru kuti tiwone omwe akutsautsika na mabvuto. Tingawalatize ntsisi mwa kuwacitira cinthu ayai kuwafotokozera mafala yakuwatsangalaza. d (Mimwani 17:17; 2 Akolinto 1:3, 4; 1 Pedru 3:8) Napo mafala mang’ono-ng’ono yomwe tingalewe yangawatsangalaze.
16. Ninga momwe cikulatizira cithunzi-thunzici, kodi mukupfunza ciyani na mpfumakazi yomwe idafedwa mwana wace?
16 Onani bzomwe mpfumakazi inango idacita. Pomwe mpfumakaziyo ikhaimba nyimbo mu Nyumba ya Umambo, idakwanisa kuwona kuti mpfumakazi yomwe ikhali pafupi na iye ikhalira. Nyimbo yomwe iwo akhaimba ikhalewa bza cidikhiro comwe anyakufa anaco, ndipo mpfumakazi yomwe ikhalirayo ikhadafedwa mwana wace. Pomwe mpfumakazi ire idawona bzimwebzi, idamufenderera icimuphata boko lace iciimba naye pabodzi nyimboyo. Patsogolo pace, mpfumakazi yomwe idafedwa ire idalewa kuti: “Abale akhandilatiza lufoyi likulu kwene-kwene.” Mpfumakaziyi idakomedwa kwene-kwene thangwe ra kuyenda ku mitsonkhano ntsiku imweyire. Mpfumakaziyo idalewa pomwe kuti: “Ku Nyumba ya Umambo ndiko komwe timbagumana thandizo.” Yahova ambawona bzomwe timbacita kuti tithandize “wale omwe adawofoka.” — Salimo 34:18.
KUPFUNZA BZAKUDABWISA BZA JEZU KUNGALIMBISE CIKHULUPIRO CATHU
17. Kodi tapfunza ciyani mu nkhani ino?
17 Tingapfunze bzizinji tikakhala na nthawe ya kumbapfunza nkhani zakulewa bza bzakudabwisa bzomwe Jezu adacita. Nkhani zimwezi zimbatipfunzisa kuti Yahova na Jezu ambatifuna kwene-kwene, Jezu ana mphanvu zakumalisa mabvuto yentse yomwe wanthu ambagumana nayo nakuti tingakhulupire na mtima wentse kuti bzentse bzomwe Yahova adalewa bzin’dzacitikadi Jezu akadzayamba kutonga pa dziko la pantsi. Tikakhala tikupfunza nkhani zimwezi, timbacite nyongo ya kuwona momwe tingatewezerere Jezu. Tingapfunze nkhani zimwezi mwa kucita pfunziro la patekha ayai pa Kunamata kwa pa Banja. Mbawonani bzomwe mukupfunza na bzakudabwisabzo ndipo mbauzanimbo anzanu. Mukacita bzimwebzi, imwepo mun’dzakhala na maceza yabwino kwene-kwene! — Aroma 1:11, 12.
18. Kodi tin’dzacezerana ciyani mu nkhani ikubwerayi?
18 Kuphampha kwa utumiki bwace, Jezu adacita pomwe cakudabwisa ca kulamusa munthu. Tsono cimweci cikhali cakusiyana na bziwiri bzomwe iye akhadacita kale. Iye adalamusa xamwali wace. Kodi tingapfunze ciyani na cakudabwisaci? Ndipo kodi tingalimbise tani cikhulupiro cathu pa nkhani ya cilamuso? Nkhani ikubwerayi in’dzatawira mibvunzo imweyi.
NYIMBO 20 Mudapereka Mwana Wanu Wakubadwa Yekha
a Iye adaimisa conzi, adapoza omwe akhaduwala ndipo adamusa anyakufa. Bzimwebzi ni bzakudabwisa bzing’ono-ng’ono pa bzakudabwisa bzizinji bzomwe Jezu adacita! Nkhani zimwezi ziribe kunembedwa m’Bibliya kuti timbandokomedwe nazo basi tikambaziwerenga. Izo zidanembedwa kuti zimbatipfunzise. Tikambawerenga nkhani zimwezi, cikhulupiro cathu kwa Yahova na Jezu cimbalimba ndipo zimbatithandiza kudziwa makhalidwe yomwe tin’funika kukhala nayo.
b Mdziwi munango wa nkhani za m’Bibliya adalewa kuti: “Mu nthawe za m’Bibliya, wanthu akhawona kuti kutambira alendo cikhali cinthu cakufunika kwene-kwene. Iwo akhafunika kuwapasa alendowo bzinthu bzentse bzomwe akhafunikira.”
c M’Mavanjedyo (Mateu, Marko, Luka na Juwau) mumbagumanika bzakudabwisa bzakupitirira 30 bza Jezu. Jezu adacita bzakudabwisa bzinango bzizinji, koma Bibliya limbafotokoza lini cakudabwisa ciri-centse pacokha. Pa nthawe inango “wanthu wentse wa mu mzinda” unango adabwera kuna iye ndipo “adapoza wanthu azinji omwe akhaduwala.” — Marko 1:32-34.
d Kuti mudziwe bzomwe mungalewe ayai kucita kuti mutsangalaze wanthu omwe afedwa, onani nkhani yakuti “Muzitonthoza Anthu Amene Aferedwa, Ngati Mmene Yesu Anachitira,” mu Ntsanza ya Mulindiri ya 1 Novembro, 2010 (Chichewa).
e BZOMWE BZIKUCITIKA PA CITHUNZI-THUNZI: Jezu adaima ndipo akunyang’anisisa banja lipsa na wanthu omwe akumwa vinyu yomwe iye asandusa.
