NKHANI YAKUPFUNZA 16
“M’bale Wako An’dzamuka”!
“Jezu adati kwa [Marta]: ‘M’bale wako an’dzamuka.’” — JUWAU 11:23.
NYIMBO 151 Iye An’dzawacemera
BZOMWE TIN’PFUNZA a
1. Kodi mulumbwana m’bodzi adalatiza tani kuti akhana cikhulupiro cakuti wanthu wakufa an’dzalamusidwa?
MULUMBWANA m’bodzi wakucemeredwa Matthew ambaduwala-duwala, ndipopa iye ambacitidwa operasau kawiri-kawiri. Pomwe iye akhana magole 7, adawona programa ya JW Broadcasting® na abereki wace. Kuphampha kwa vidiyoyi, b iwo adawona vidiyo yakulatiza wanthu akutambira adzinza wawo omwe akhadafa. Pomwe vidiyoyo idamala, Matthew adafenderera abereki wace, adawaphata manja aciwauza kuti: “Mamã na Papá, mwawona? Napo inepano ndicifa nin’dzalamusidwa. Inepano ndikafa lekani kucita thupo ikadzakwana nthawe yace, Yahova an’dzandilamusa.” Kodi mukukumbuka kuti aberekiwo adabva tani pomwe adabva mafala yakulatiza kuti mwana wawo ana cikhulupiro cakuti wanthu wakufa an’dzalamusidwa?
2-3. Thangwe ranyi tin’funika kumbakumbukira bza nkhani yakulewa bza kulamusidwa kwa anyakufa?
2 Nthawe zinango mpsakufunika kumbakumbukira bzomwe Bibliya limbalewa bzakuti wanthu an’dzalamusidwa kutsogoloku. (Juwau 5:28, 29) Thangwe ranyi? Thangwe mwakusaya kudikhiririka ifepano tingaduwale mwa penu-penu ayai wadzinza wathu angasaike. (Mpalizi 9:11; Tiyago 4:13, 14) Tikakhala na cikhulupiro cakuti wanthu wakufa an’dzalamusidwa, ifepano tin’dzakhala wakulimba tikakhala tikugumana na mabvuto yamweya. (1 Atesalonika 4:13) Bibliya limbalewa kuti Pai wathu wakudzulu ambatidziwa bwino ndipo ambatifuna. (Luka 12:7) Cinthu comwe cimbalatiza kuti Yahova ambatidziwa bwino n’cakuti iye an’dzatilamusa na makhalidwe yathu yomwe ifepano tikhanayo pomwe tikhanati kufa. Yahova ambatifuna kwene-kwene, ndipopa adacita makonzedwe yakuti tidzakhale na moyo wakusaya kumala. Napo ticifa, iye an’dzatilamusa!
3 Mu nkhani ino, cakuyamba tin’cezerana kuti thangwe ranyi tin’funika kukhulupira kuti wanthu wakufa an’dzalamusidwa. Tikamala, tin’dzawona nkhani ya m’Bibliya yomwe ina vesi lomwe likutsogolera nkhani yathuyi ndipo tin’dzawona kuti nkhani imweyi imbalimbisa tani cikhulupiro cathu cakuti wanthu omwe adafa an’dzalamusidwa. Mafala ya vesiri yambati: “M’bale wako an’dzamuka.” (Juwau 11:23) Pakumalizira, tin’dzapfunza kuti tingacite tani kuti timbakhulupire kwene-kwene kuti wanthu omwe adafa an’dzalamusidwa.
THANGWE RANYI TIMBAKHULUPIRA KUTI ANYAKUFA AN’DZALAMUSIDWA?
4. Kuti tikhulupire piciro, n’ciyani comwe tin’funika kutsimikizira? Fotokozani.
4 Munthu akalewa kuti an’cita cinthu, kuti tikhulupire kuti cinthuco cin’citikadi, cakuyamba tin’funika kukhulupira kuti munthuyo akufuna ndipo ana mphanvu yakucita cinthuco. Tiyezezere kuti nyumba yanu yapfudzidwa na conzi. Ndipo mwanzanu akukuuzani kuti ‘an’kuthandizani kukonza nyumbayo.’ Iye ambanama lini ndipo imwepo mukutsimikiza kuti iye akufuna kukuthandizani. Penu iye ambalidziwa basalo ndipo ana maferamenta yakukonzera, imwepo mungatsimikizire kuti an’kuthandizani kukonza nyumbayo. Imwepo mungakhulupire bzomwe iye akuuzanibzo. Tsono tani pakulewa bza piciro la Mulungu la kudzalamusa wanthu wakufa? Kodi Mulungu akufunisisa kulamusa wanthu wakufa ndipo iye ana mphanvu yakucita bzimwebzo?
5-6. Thangwe ranyi tingatsimikizire kuti Yahova akufunisisa kudzalamusa wanthu omwe adafa?
5 Kodi Yahova akufuna kulamusa anyakufa? Inde, iye akufuna. Iye adacitisa anembi wa Bibliya kuti anembe bzomwe akufuna kudzacita kutsogolo. (Zaiya 26:19; Ozeya 13:14; Apokalipse 20:11-13) Yahova nthawe zentse ambacita bzomwe ambalewa. (Djoswe 23:14) Yahova akufunisisa kudzalamusa anyakufa. Thangwe ranyi tingalewe tenepo?
6 Onani mafala yomwe Djobi adalewa. Iye akhakhulupira kuti akafa, Yahova angadadzamulamusa acikhala pomwe na moyo. (Djobi 14:14, 15) Yahova akufunisisa kudzalamusa atumiki wace wentse omwe adafa. Iye akufunisisa kuti iwo adzakhale na moyo wa thanzi na wacikondweso. Tsono tani bza wanthu azinji omwe adafa omwe alibe kupfunza bza Yahova? Mulungu wathu wa lufoyi akufuna kudzawalamusambo. (Mabasa 24:15) Iye akufunisisa kuti iwo adzakhale axamwali wace na kupitiriza kukhala na moyo pa dziko la pantsi. (Juwau 3:16) Bzimwebzi bzikulatiza kuti Yahova akufunisisa kudzalamusa anyakufa.
7-8. Thangwe ranyi tingakhulupire kuti Yahova ana mphanvu yakulamusa wanthu omwe adafa?
7 Kodi Yahova ana mphanvu yakulamusa anyakufa? Inde anayo! Bibliya limbalewa kuti iye ni “Wamphanvu-zentse.” (Apokalipse 1:8) Iye ana mphanvu zakukunda anyamadulanthaka ali-wentse kuphatanidzambo infa. (1 Akolinto 15:26) Tikadziwa bzimwebzi ifepano timbakhala wamphanvu. Onani bzomwe bzidacitikira Mpfumakazi Emma Arnold. Iye pabodzi na adzinza wace adagumana na mayezo pa nthawe ya Nkhondo Yaciwiri ya pa Dziko Lentse. Kuti athandize mwana wace omwe akhakumbukira adzinza wawo omwe adafa pa nthawe yomwe akhazunzidwa na partido ya Nazi, Emma adalewa kuti: “Infa ingadakhala yakuyenda na kuyenda, kodi ingadakhala lini ya mphanvu kuposa Mulungu?” Palibe cinthu comwe cina mphamvu kwene-kwene kuposa Yahova! Mulungu wamphanvu zentse omwe adakonza moyo, ana mphanvu yakupasa pomwe moyo wanthu omwe adafa.
8 Cinthu cinango comwe cimbatitsimikizira kuti Mulungu an’kwanisa kulamusa wanthu omwe adafa n’cakuti iye ana nzeru zakusaya malire. Iye ambadziwa madzina ya nyenyezi zentse. (Zaiya 40:26) Ndipo iye ambakumbukirambo wanthu wentse omwe adafa. (Djobi 14:13; Luka 20:37, 38) Iye ambakumbukira bzinthu bzomwe munthu ali-wentse adacita pomwe akhanati kufa.
9. Thangwe ranyi mumbakhulupira kuti Yahova an’dzalamusa wanthu omwe adafa?
9 Ifepano tingakhulupire kuti Yahova an’dzacita bzomwe adalewa bzakuti an’dzalamusa wanthu omwe adafa thangwe timbadziwa kuti iye akufuna ndipo ana mphanvu yakucita bzimwebzi. Thangwe linango lomwe limbatitsimikizira kuti Yahova an’dzalamusa wanthu omwe adafa ndakuti: Iye adalamusa kale wanthu m’mbuyomu. M’mbuyomu iye adapasa mphanvu wanthu wakukhulupirika kuphatanidzambo Jezu kuti alamuse wanthu wakufa. Bwerani ticezerane bza cakudabwisa comwe Jezu adacita ca kulamusa munthu comwe cidanembedwa pa Juwau kapitulo 11.
XAMWALI M’BODZI WA JEZU ADAFA
10. Kodi n’ciyani comwe cidacitika pomwe Jezu akhapalizira pafupi na Mkulo wa Jordano, ndipo n’ciyani comwe iye adacita? (Juwau 11:1-3)
10 Werengani Juwau 11:1-3. Kumbukirani bzomwe bzidacitika ku Betaniya kumamaliziro kwa gole la 33 EC. Jezu akhana axamwali ku mudzi umweyu. Axamwali wacewo akhali Lazaro na mpfumakazi zace ziwiri, Mariya na Marta. (Luka 10:38-42) Tsono Lazaroyo adaduwala ndipo pomwe mpfumakazi zace zidawona bzimwebzo zidakhala na thupo kwene-kwene. Iwo adatumiza mafala kwa Jezu kuti amudziwise bza nkhaniyo. Ndipo pa nthawe imweyo Jezu akhali pafupi na Mkulo wa Jordano ndipo kuti afike ku Betaniya, iye akhafunika kufamba ntsiku ziwiri. (Juwau 10:40) Bzakupasa ntsisi mpsakuti Lazaro adafa pa nthawe yomwe munthu omwe akhadatumidwayo akhafikisa mafalayo kwa Jezu. Napo kuti Jezu akhadziwa kuti xamwali wace wafa, iye adapitiriza kukhala komwe akhaliko ntsiku ziwiri ndipo patsogolo pace iye adadzacita ulendo bwakuyenda ku Betaniya. Pa nthawe yomwe Jezu adafika, Lazaro akhadamala kale ntsiku zinai adafa. Jezu akhafuna kucita cinthu comwe cingadathandiza axamwali wacewo na kutumbizisambo Mulungu. — Juwau 11:4, 6, 11, 17.
11. Kodi nkhaniyi ikutipfunzisa ciyani bza uxamwali?
11 Nkhani imweyi ikutipfunzisa cinthu cinango comwe axamwali ambacitirana. Kumbukirani kuti: Pomwe Mariya na Marta adatumiza mafala kwa Jezu, iwo alibe kumukumbira kuti iye ayende ku Betaniya. Iwo akhandofuna kumudziwisa Jezuyo kuti xamwali wace akhaduwala. (Juwau 11:3) Pomwe Lazaro adafa, Jezu angadamulamusa na kutaliko. Tsono, iye alibe kucita bzimwebzo, Jezu adafuna kufendera pafupi, ndipopa iye adayenda ku Betaniya kuti akawonane na axamwali wacewo, Mariya na Marta. Kodi muna xamwali omwe ambabwera kudzakuthandizani napo kuti imwepo mulibe kumukumbira? Penu munaye, ndiye kuti xamwali umweyo mumbamuthemba kwene-kwene pa “[nthawe za] mabvuto.” (Mimwani 17:17) Ifepano tin’funika kutewezera Jezu. Tin’funika kumbathandiza anzathu napo kuti alibe kutikumbira! Mbatibwerereni pomwe pa nkhani ire kuti tiwone bzomwe bzidadzacitika.
12. Kodi n’ciyani comwe Jezu adauza Marta, ndipo thangwe ranyi Martayo akhafunika kukhulupira bzimwebzo? (Juwau 11:23-26)
12 Werengani Juwau 11:23-26. Pomwe Marta adadziwa kuti Jezu akhafika ku Betaniya, iye adayenda kukagumana naye, ndipo adamuuza kuti: “Mbuya, bzingadakhala kuti mukhali kuno, m’bale wangu angadafa lini.” (Juwau 11:21) Bzomwe Marta adalewabzi bzikhali bzacadidi. Lazaro angadafa lini thangwe rakuti Jezu angadamupoza. Tsono Jezu akhafuna kucita cinthu cakudabwisa kwene-kwene. Iye adauza Marta kuti: “M’bale wako an’dzamuka.” Ndipo iye adamuuzambo Marta mathangwe yomwe iye akhafunikira kukhulupira bzimwebzi, pomwe adalewa kuti: “Inepano ndine kumuka na moyo.” Mulungu adapasa Jezu mphanvu yakulamusa wanthu wakufa. Iye akhadalamusa kale wanthu wakufa. Iye adalamusa ka mtsikana komwe kakhadafa tsapanopa na mulumbwana omwe bzikuwoneka kuti akhadafa ntsiku imweyo. (Luka 7:11-15; 8:49-55) Tsono angadakwanisambo kulamusa munthu omwe akhadamala ntsiku zinai wakufa ndipo thupi lace likhadayamba kale kudzongeka?
“LAZARO BULA!”
Jezu adabva ntsisi kwene-kwene pomwe adawona axamwali wace akulira (Onani ndime 13-14)
13. Mwakubverana na Juwau 11:32-35, kodi n’ciyani comwe Jezu adacita pomwe adawona Mariya na wanthu winango akulira? (Onani cithunzi-thunzi.)
13 Werengani Juwau 11:32-35. Kumbukirani bzomwe bzidacitika patsogolo pace. Mariya omwe akhali mpfumakazimbo ya Lazaro adayendambo kukagumana na Jezu. Iye adalewambo mafala yomwe Marta adalewa, yakuti: “Mbuya, bzingadakhala kuti mukhali kuno, m’bale wangu angadafa lini.” Iye pabodzi na wanthu omwe akhanaye akhadasunama kwene-kwene. Pomwe Jezu adawawona akulira, iye adasunamambo kwene-kwene. Bzimwebzi bzidacitisa kuti iye ayambembo kulira. Iye adakwanisa kuwona kuti bzimbakhala bzakuwawa kwene-kwene munthu akafedwa. Ndipopa, iye akhafunisisa kucosa cinthu comwe cikhawacitisa kuti alire!
14. Kodi tikupfunza ciyani bza Yahova tikawona bzomwe Jezu adacita pomwe adawona Mariya akulira?
14 Bzomwe Jezu adacita pomwe adawona Mariya akulira bzimbatipfunzisa kuti Yahova ni Mulungu wa ntsisi kwene-kwene. Thangwe ranyi tikulewa bzimwebzi? Mu nkhani yomwe idapita ire, ifepano tidawona kuti Jezu ambalatiza makhalidwe yomwe Baba wace anayo. (Juwau 12:45) Ndipopa tikambawerenga kuti Jezu adabva ntsisi kwene-kwene pomwe adawona axamwali wace akulira, bzimwebzi bzimbaticitisa kukhulupira kuti Yahova ambawawidwa kwene-kwene akatiwona tidasunama. (Salimo 56:8) Bzimwebzi bzimbaticitisa kufuna kukhala pa uxamwali na Mulungu wathu wantsisi.
Jezu adalatiza kuti ana mphanvu yakulamusa wanthu omwe adafa (Onani ndime 15-16)
15. Mwakubverana Juwau 11:41-44, fotokozani bzomwe bzidacitika ku thenje lomwe Lazaro akhadaikhidwa. (Onani cithunzi-thunzi.)
15 Werengani Juwau 11:41-44. Jezu adayenda ku thenjeko ndipo adakumbira kuti wanthu acose cimwala comwe cikhadampsinkha nthutu ya Lazaro. Marta adauza Jezu kuti pinango pa nthawe imweyo iye akhayamba kale kununkha. Jezu adatawira Martayo kuti: “Ndiribe kukuuza kuti ukakhulupira un’dzawona ulemerero bwa Mulungu?” (Juwau 11:39, 40) Jezu adanyang’anisa kudzulu ndipo adapemba patsogolo pa wanthu wentse. Iye akhafuna kuti Yahova ndiye apasidwe ulemerero pa bzomwe bzingadacitikabzo. Ndipo Jezu adakuwa kuti: “Lazaro bula!” Ndipo Lazaroyo adabula m’thenjemo! Jezu adacita bzinthu bzomwe wanthu akhawona kuti bzingadakwanisika lini.
16. Kodi nkhani ya pa Juwau kapitulo 11 imbalimbisa tani cikhulupiro cathu cakuti wanthu wakufa an’dzalamusidwa?
16 Nkhani ya pa Juwau kapitulo 11 imbalimbisa cikhulupiro cathu pa nkhani ya kulamusidwa kwa anyakufa. Thangwe ranyi tikulewa tenepoyo? Kumbukirani mafala yomwe Jezu adauza Marta. Iye adati: “M’bale wako an’dzamuka.” (Juwau 11:23) Ninga Pai wace, Jezu akufunisisa ndipo ana mphanvu yakucita bzimwebzi. Kulira komwe iye adacita kumbalatiza kuti iye akufunisisa kudzamalisa mabvuto yomwe yambabwera thangwe ra kufedwa. Ndipo kubula kwa Lazaro mu thenjemo, kudalatiza kuti Jezu ana mphanvu yakulamusa wanthu wakufa. Ndipo kumbukiranimbo bzomwe Jezu adamukumbusa Marta. Iye adati: “Ndiribe kukuuza kuti ukakhulupira un’dzawona ulemerero bwa Mulungu?” (Juwau 11:40) Ifepano tina mathangwe yomwe yambaticitisa kukhulupira kuti bzomwe Mulungu adalewa bzin’dzacitikadi. Tsono, n’ciyani comwe tingacite kuti timbakhulupire na mtima wathu wentse kuti bzimwebzi bzin’dzacitikadi?
BZOMWE TINGACITE KUTI TIMBAKHULUPIRE KUTI WANTHU WAKUFA AN’DZALAMUSIDWA
17. Kodi n’ciyani comwe tin’funika kumbakumbukira tikakhala tikuwerenga nkhani za m’Bibliya za wanthu omwe adalamusidwa?
17 Mbawerengani na kumbakumbukira bza wanthu omwe adalamusidwa kale-kale. Bibliya limbafotokoza bza wanthu 8 omwe akhadafa ndipo adalamusidwa. c Pfunzani nkhani zimwezi mwa kamderekho. Pomwe mukucita bzimwebzi, mbakumbukirani kuti wanthu amwewa akhalimbo wanthu ninga ifepano. Iwo akhali amuna, akazi na wana. Mbawonani bzomwe mungapfunze na nkhanizo. Mbayezerani kukumbukira kuti nkhanizo zikulatiza tani kuti Mulungu akufuna ndipo ana mphanvu yakulamusa wanthu wakufa. Ndipo kuposa bzentse, mbakumbukirani bza munthu wakufunika kwene-kwene omwe adalamusidwa, Jezu. Kumbukirani kuti pomwe iye adalamusidwa, wanthu wakupitirira 500 adamuwona ndipo bzimwebzi bzimbatipasa cikhulupiro cakuti wanthu omwe adafa an’dzalamusidwadi. — 1 Akolinto 15:3-6, 20-22.
18. Kodi mungaphatise tani basa bwino nyimbo zomwe zimbafotokoza bza kulamusidwa kwa anyakufa? (Onani mafala ya m’nyantsi.)
18 Phatisani bwino basa “nyimbo” zomwe zimbafotokoza bza kulamusidwa kwa anyakufa. d (Aefezo 5:19) Nyimbo zimwezi zimbatithandiza kulimbisa cikhulupiro cathu cakuti wanthu omwe adafa an’dzalamusidwadi. Mbazitetekerani, mbaziimbani kawiri-kawiri ndipo mbacezeranani bza mafala yace pa kunamata kwanu kwa pa banja. Mbaikhani mafala yace mu msolo na mu mtima mwanu. Ndipo mukadzaduwala mwakuti penu-penu ayai mukadzafedwa adzinza wanu, Yahova an’dzaphatisa basa mafala ya m’nyimbozo kuti akutsangalazeni.
19. Kodi n’ciyani comwe tingakumbukire pa nkhani ya kulamusidwa kwa anyakufa? (Onani kwadru yakuti “ Kodi n’Ciyani Comwe Mungafune Kudzawabvunza?”)
19 Mbayezerani kukumbukira kuti muli m’dziko lipsa. Yahova adatipasa luso la kumbabziwona ninga kuti tiri dziko lipsa. Mpfumakazi inango idalewa kuti: “Nimbamala nthawe ndikukumbukira kuti ndiri mu dziko lipsa ndipo ndikubva kununtcira kwa mafolori mu Paraizo.” Mbakumbukirani kuti mukuwonana na amuna na akazi wakukhulupirika omwe ambafotokozedwa m’Bibliya. Kodi mbanthu aponi omwe imwepo mukufunisisa kudzawawona? Kodi mukadzawonana nawo mun’dzawabvunza ciyani? Mbakumbukiranimbo kuti mukuwonana pomwe na adzinza wanu omwe adasaika. Mbakumbukiranimbo bzomwe mun’dzacita mukadzawonana nawo kakuyamba, mafala yomwe mun’dzalewa, momwe mun’dzawatambirira na kukomedwa komwe mun’dzakhala nako.
20. Kodi n’ciyani comwe mwatsimikiza kucita?
20 Timbatenda kwene-kwene Yahova thangwe ra kutipasa cidikhiro cakuti wanthu omwe adafa an’dzalamusidwa! Ifepano tin’funika kukhulupira kuti bzimwebzi bzin’dzacitikadi thangwe Yahova akufuna ndipo ana mphanvu yakucita bzimwebzi. Bwerani tipitirize kulimbisa cikhulupiro cathu cakuti wanthu omwe adafa an’dzalamusidwa. Tikacita bzimwebzi, tin’dzakhala wakufendererana na Mulungu omwe akutitsimikizira kuti ‘adzinza wathu an’dzamuka!’
NYIMBO 147 Tinkudikhirira Moyo Wakusaya Kumala Kutsogolo
a Penu imwepo mudafedwa kale wadzinza wanu, nkhani ya kulamusidwa kwa anyakufa imbakutsangalazani kwene-kwene. Tsono, kodi munthu acikubvunzani kuti thangwe ranyi mumbakhulupira nkhani imweyi, kodi mungamufotokozere tani? Ndipo kodi mungalimbise tani cikhulupiro canu cakuti wanthu omwe adafa an’dzalamusidwa? Cakulinga ca nkhaniyi n’cakutithandiza kuti tilimbise cikhulupiro cathu cakuti wanthu omwe adafa an’dzalamusidwa.
b Nyimbo yomwe iwo akhawonayo ina msolo wakuti Dziko Lipsa Lafendera, ndipo nja broadcasting wa Novembro 2016.
c Onani kwadru yakuti “Anthu 8 Otchulidwa M’Baibulo Amene Anaukitsidwa” mu Ntsanza ya Mulindiri ya 1 Agosto, 2015, tsa. 4 (Chichewa).
d Onani nyimbo izi mu bukhu lakuti Imbirani Yahova Mwakukondwa: “Bziyezezereni Kuti Muli M’paraizo” (Nyimbo 139), “Pitirizani Kudikhirira Mabaibai!” (Nyimbo 144) na “Iye An’dzawacemera” (Nyimbo 151). Ndipo mungawonembo nyimbo zathu zinango, ninga nyimbo yakuti: “Dziko Lipsa Lafendera,” “Moyo m’Dziko Lipsa Lomwe Likubwera” na nyimbo yakuti “Tikumbukire Tiri m’Paraizo”
