1. Kodi ciyani comwe atumiki wa Yahovafe timbadziwa?

 ATUMIKI wa Yahovafe timbadziwa kuti Yahova ambatifuna ndipo ambafunambo kuti tikhale na moyo wabwino. (Aroma 8:35-39) Ndipo timbadziwa kuti timbagumana phindu tikaphatisa basa mitemo ya m’Bibliya. (Zaiya 48:17, 18) Kodi tingacite ciyani tikagumana na mabvuto yomwe tikhayadikhirira lini?

2. Kodi ni mabvuto yaponi yomwe tingagumane nayo, ndipo yangaticitise kubzicita mibvunzo iponi?

² Atumiki wentse wa Yahova ambagumana na mabvuto. Wanthu wa m’banja mwathu angatikhumudwise, tingaduwale matenda makulu yomwe yangatitazise kucita bzinthu bzizinji pakutumikira Yahova, tingabonere na malengwa ya pantsi ayai tingazunzidwe thangwe ra bzomwe timbakhulupira. Bzimwebzi bzikaticitikira, tingabzibvunze kuti: ‘Thangwe ranyi bzimwebzi bzikundicitikira? Ndaphonyanyi? Kodi bzimwebzi bzin’funa kulatiza kuti Yahova akukomedwa lini nande?’ Kodi bzimwebzi bzidakucitikirani kale? Penu munti inde, lekani kubwerera m’mbuyo. Dziwani kuti atumiki azinji wa Yahova adagumanambo kale na mabvuto mabodzi-bodziya. — Salimo 22:1, 2; Habakuki 1:2, 3.

3. Kodi tingapfunze ciyani na nfundo zomwe zimbafotokozedwa pa Salimo 34:19?

³ Werengani Salimo 34:19. Onani nfundo ziwiri zakufunika mucinemboci: (1) Nyakulungama ambagumana na matsoka mazinji. (2) Yahova ambamupulumusa pa matsoka yentseneyo. Kodi Yahova ambatipulumusa tani? Njira ibodzi yomwe iye ambacitira bzimwebzi ni kutithandiza kudziwa momwe bzinthu bziriri m’dzikoli. Napo kuti Yahova adalewa kuti tin’dzakondwa tikamutumikira, iye alibe kulewa kuti tin’dzakhala na moyo  wakusaya mabvuto. (Zaiya 66:14) Iye ambatiuza kuti timbakhulupire bzinthu bzomwe bzin’dzacitika kutsogolo, pa nthawe yomwe tin’dzakhala na moyo wakusaya mabvuto. (2 Akolinto 4:16-18) Pomwe nthaweyo ikanati kufika, iye ambatithandiza kuti tipitirize kumutumikira. — Maliro 3:22-24.

4. Kodi tin’pfunza ciyani mu nkhani ino?

⁴ Mbatiwoneni bzomwe tingapfunze na atumiki wa Yahova wakukhulupirika wakale-kale na wa ntsiku zino. Ninga momwe tawonera kale, tingagumane na mabvuto yomwe tikhayadikhirira lini. Tsono tikakhulupira Yahova, iye an’dzatisiya lini. (Salimo 55:22) Pomwe mukupfunza nkhani za atumiki wa Yahova amwewa, bzibvunzeni kuti: ‘Kodi ningadacita tani bzingadakhala kuti bzimwebzi bzacitikira inepano? Kodi nkhani zimwezi zingandithandize tani kuthemba Yahova? Kodi ningaziphatise tani basa pa moyo wangu?’

5. Kodi ni bzinthu bziponi bzakusaya cirungamo bzomwe Djakobo adacitiridwa na Labani? (Onani cithunzi-thunzi ca pa tsamba lakuyamba.)

⁵ Atumiki wa Yahova wakale-kale adagumana na mabvuto yakusaya kudikhiririka. Mbatiyambeni kucezerana bza Djakobo. Iye adauzidwa na pai wace kuti akalowole mwana wa Labani thangwe akhatumikira Mulungu, ndipo pai wacewo adamutsimikizira kuti Yahova angadamusimba. (Ciyambo 28:1-4) Djakobo adacita bzinthu mwanzeru. Iye adacoka ku Kanani ndipo adacita ulendo bwa kuyenda ku mui kwa Labani. Ndipo Labaniyo akhana wana awiri wacikazi omwe akhali Leya na Rakeli. Djakobo akhafuna kulowola Rakeli omwe akhali ng’ono, ndipo adabvuma kuphatira basa pai wace wa Rakeliyo magole 7 kuti amulowole. (Ciyambo 29:18) Tsono bzinthu bziribe kucitika ninga momwe iye akhafunira. Labani adamunamiza Djakobo mwa kumupasa Leya m’mbuto mwa Rakeli. Ndipo Labaniyo adauza Djakobo kuti penu akhafuna kutenga pomwe Rakeli, akhafunika kumuphatira pomwe basa magole 7. (Ciyambo 29:25-27) Ndipo Labani adamucitira bzinthu bzakusaya kulungama Djakobo pomwe akhamuphatira basa. Djakobo adakhala kapolo wa Labani magole 20! — Ciyambo 31:41, 42.

6. Kodi ni mabvuto yanango yaponi yomwe Djakobo adagumana nayo?

⁶ Djakobo adagumana pomwe na mabvuto manango. Iye akhana wana azinji, tsono wana wacewo akhabverana lini. Iwo adafika pakugulisa m’bale wawo Zuze kuti akakhale kapolo ku Edjipito. Wana awiri wa Djakobo, Simiyoni na Levi, adanyozesa banja lawo pabodzi na Yahova. Rakeli omwe akhali mkazi wa Djakobo adafa pomwe akhabereka mwana wace waciwiri. Ndipo thangwe ra njala, Djakobo adacoka komwe akhakhala aciyenda ku Edjipito pomwe iye akhadakalamba. — Ciyambo 34:30; 35:16-19; 37:28; 45:9-11, 28.

7. Kodi Yahova adalatiza tani kuti akhakomedwa na Djakobo?

⁷ Napo kuti Djakobo adagumana na mabvuto yentseneya, iye adapitiriza kukhulupira kuti Yahova angadadzacita bzomwe adalewa. Yahova adalatiza Djakobo kuti akhakomedwa naye. Napo kuti Djakobo adanamizidwa na Labani, Yahova adamupasa bzinthu bzizinji. Ndokumbukirani momwe Djakobo adakomedwera pomwe adagumana pomwe na mwana wace Zuze omwe akhakumbuka kuti adafa. Uxamwali bomwe Djakobo akhanabo na Yahova budamuthandiza kuti akunde mabvuto yomwe akhagumana nayo. (Ciyambo 30:43; 32:9, 10; 46:28-30) Tikakhalambo pa uxamwali bwakulimba na Yahova, iye an’dzatithandiza kukunda mabvuto yomwe tikhayadikhirira lini.

8. Kodi Mambo Davide akhafunisisa kucita ciyani?

⁸ Mambo Davide alibe kukwanisa kucita  bzinthu bzentse bzomwe akhafuna kucitira Yahova. Davide akhafunisisa kumangira Yahova templo. Ndipo iye adauza bzimwebzi mpolofeta Natani. Nataniyo adamuuza kuti: “Citani bzomwe mtima wanu ukufuna, thangwe Mulungu wacadidi anamwe.” (1 Nkhani 17:1, 2) Kulewa cadidi, mafalaya yadamupasa mphanvu kwene-kwene Davide. Pinango-pentse iye adayambiratu kukonzekera bzinthu kuti amange temployo.

9. Kodi n’ciyani comwe Davide adacita pomwe adabva kuti ndiye lini omwe angadamanga templo?

⁹ Mpolofeta wa Yahova ule adayenda pomwe kukaceza na Davide. Iye akhalibe nkhani yabwino. “Usiku bumwebule,” Yahova adauza Natani kuti angadakhala lini Davide omwe angadamanga temployo, koma angadakhala m’bodzi mwa wana wace. (1 Nkhani 17:3, 4, 11, 12) Kodi n’ciyani comwe Davide adacita pomwe adabva mafalaya? Iye adacinja bzomwe akhafuna kucitabzo. Iye adayamba kucita basa lakukonkhobza bzinthu bzomwe mwana wace Salomau angadadzabziphatisa basa pa kumanga temployo. — 1 Nkhani 29:1-5.

10. Kodi Yahova adasimba tani Davide?

¹⁰ Pomwe Yahova adauza Davide kuti ndiye lini omwe angadamanga templo, adacita naye mpangano. Yahova adauza Davide kuti dzinza lace lingadadzatonga mpaka kale-kale. (2 Samuweri 7:16) Ndokumbukirani momwe Davide an’dzakhalira wakukondwa mu dziko lipsa akadzabva kuti Mambo omwe akutonga magole 1000 adacokera mu dzinza lace! Nkhaniyi ikutipfunzisa kuti napo kuti tingakwanise lini kucita bzizinji bzomwe tikhafuna kucitira Yahova, tingakhale na citsimikizo cakuti Yahova an’dzatipasa mabaibai yomwe tikhayadikhirira lini.

11. Napo kuti Umambo bwa Mulungu bulibe kubwera pa nthawe yomwe Akristau wakuyambirira akhaidikhirira, kodi iwo adasimbidwa tani? (Mabasa 6:7)

¹¹ Akristau wakuyambirira adagumana na mabvuto yomwe akhayadikhirira lini. Iwo akhadikhirira na mtima wentse kubwera kwa Umambo bwa Mulungu. Tsono iwo akhadziwa lini kuti ni lini pomwe Umambobo mungadabwera. (Mabasa 1:6, 7) N’ciyani comwe iwo adacita? Iwo adakhala wakutanganika pa basa lakupalizira. Pomwe iwo akhapalizira ku mbuto zakusiyana-siyana, adakwanisa kuzindikira kuti Yahova akhawathandiza. — Werengani Mabasa 6:7.

12. N’ciyani comwe Akristau wakuyambirira adacita pomwe adagwedwa na njala?

¹² Pomwe padapita nthawe, padadzakhala na njala “pa dziko lentse la pantsi.” (Mabasa 11:28) Akristau wakuyambirirawo adabonerambo na njalayo. Ndokumbukirani momwe bzinthu bzikhaliri bzakunesa pa nthawe imweyire. Amuna akhakhala na thupo kuti an’pasa ciyani mabanja yawo. Kodi njalayo idatazisa maswaka mazinji kucita bzizinji pa kutumikira Yahova? Kodi iwo adawona kuti bzikhali bwino kudzacita bzimwebzo njalayo ikamala? Napo kuti Akristauwo akhagumana na mabvuto, iwo adapitiriza kucita bzomwe angadakwanisa mwakubverana na momwe bzinthu bzikhaliri pa moyo wawo. Iwo adapitiriza kupalizira na nyongo ndipo adapereka bzinthu bzomwe akhanabzo kuti athandize abale wawo wa ku Djudeya. — Mabasa 11:29, 30.

13. Kodi Akristau wakuyambirira adasimbidwa tani na Yahova pa nthawe ya njala?

¹³ Kodi ni bzisimbo bziponi bzomwe Akristau wakuyambirira adakhala nabzo pa nthawe ya njala? Wale omwe adatambira thandizo kucokera kwa abale wawo adazindikira kuti Yahova akhawathandiza. (Mateu 6:31-33) Bzimwebzi bzidawacitisa kuti akhale wakubverana na abale wawo omwe adawathandizawo. Ndipo wale omwe adacita bzakupereka na wale omwe adathandiza mu njira inango adakwanisa kuwona kuti kupasa kumbabweresa cikondweso.  (Mabasa 20:35) Yahova akhawasimba thangwe rakuti iwo akhacita bzinthu mwakubverana na momwe bzinthu bzikhaliri pa moyo wawo.

14. Kodi n’ciyani cidacitikira Barnaba na mpostolo Paulo, ndipo ni phindu liponi lomwe iwo adakhala nalo? (Mabasa 14:21, 22)

¹⁴ Akristau wakuyambirira adazunzidwa pa nthawe yomwe akhaidikhirira lini. Onani bzomwe bzidacitikira Barnaba na mpostolo Paulo pomwe akhapalizira ku Listra. Pakuyamba, iwo adatambiridwa bwino na wanthu omwe akhawatetekera. Tsono patsogolo pace, anyakuwatsutsa “adapumpsa thimu la wanthulo.” Ndipo iwo adayamba kuboma mpostolo Paulo mpaka iye kusala pang’ono kufa. (Mabasa 14:19) Napo bzikhali tenepo, Barnaba na Paulo adapitiriza kupalizira ku mbuto zinango. Kodi ni phindu liponi lomwe iwo adakhala nalo? Iwo ‘adathandiza wanthu kuti akhale anyakupfunza,’ ndipo adalimbikisa Akristau winango na mafala yawo na kupirira kwawo. (Werengani Mabasa 14:21, 22.) Napo kuti Barnaba na Paulo akhazunzidwa kazinji-kentse, wanthu adagumana phindu thangwe ra kupirira kwawo. Tikapitiriza kupalizira, Yahova an’dzatisimba.

15. Kodi mwapfunza ciyani na bzomwe M’bale A. H. Macmillan adacita?

¹⁵ Pomwe gole la 1914 likhanati kufika, wanthu wa Yahova akhadikhirira kuti gole limweri likafika pangadacitika bzinthu bzinango. Mbaticezeraneni nkhani ya M’bale A. H. Macmillan. Pa nthawe imweyire M’bale Macmillan pabodzi na wanthu winango akhakumbuka kuti likafika gole limwelire iwo angadayenda kudzulu. Pomwe iye akhafotokoza nkhani inango mu Setembro, 1914, adalewa kuti: “Pinango nkhani yomwe ndikufotokozayi njakumalizira.” Tsono nkhaniyo iribe kukhala yakumalizira. Pomwe padapita nthawe, M’bale Macmillan adalewa kuti: “Azinji wa ifepano tikhakumbuka kuti tingadayenderatu kudzulu pa nthawe imweyire.” Iye adalewa pomwe kuti: “Pakuti bzimwebzi bziribe kucitika, tidawona kuti bzikhali bwino kutanganidwa pa basa la Mbuya.” Bzimwebzi ndibzo bzomwe M’bale Macmillan adacita. Iye akhapalizira mwa nyongo. Iye adakhala na mwayi wakulimbikisa abale azinji omwe akhali m’kawoko thangwe ra kulamba kupitira nkhani za ndale. Iye adapitiriza kutsonkhana mwakukhazikika napo kuti akhadakalamba. Kodi ni phindu liponi lomwe M’bale Macmillan adakhala nalo thangwe ra kucita bzimwebzi? Pomwe iye akhadasala pang’ono kufa mu 1966, adanemba kuti: “Cikhulupiro cangu n’cakulimba kwene-kwene kuposa kale-kale.” Ifepano tin’funikambo kumutewezera m’bale umweyu, maka-maka tikakhala tikugumana na mabvuto mazinji yomwe tikhayadikhirira lini! — Ahebereu 13:7.

16. Kodi ni bvuto liponi lakusaya kudikhiririka lomwe Herbert Jennings na mkazace adagumana nalo? (Tiyago 4:14)

¹⁶ Atumiki azinji wa Yahova ambaduwala mwakusaya kudikhiririka. Pomwe M’bale Herbert Jennings b akhafotokoza bza moyo wace, adanemba momwe iye na mkazi wace adakhalira wakukondwa pomwe adauzidwa kuti akakhale amisiyonario ku Gana. Pomwe padapita nthawe, iye idawonedwa kuti ana matenda makulu kwene-kwene. Mwakubverana na Tiyago 4:14, M’bale Jennings adalewa kuti bzomwe akhagumana nabzobzo bzikhali “bzinthu bzomwe akhabzidikhirira lini.” (Werengani.) Iye adanemba kuti: “Tidacoka ku Gana ndipo tidasiya axamwali wathu wapamtima ticiyenda ku Canadá kuti ndikalapidwe.” Yahova adathandiza M’bale Jennings na mkazace kuti apitirize kumutumikira napo kuti akhagumana na mabvuto.

17. Kodi bzomwe M’bale Jennings adacita bzidalimbikisa tani abale na mpfumakazi?

 ¹⁷ Mafala yomwe M’bale Jennings adafotokoza mu nkhani ya moyo wace yadathandiza wanthu azinji. Mpfumakazi inango idanemba kuti: “Pomwe ndidawerenga nkhani ya M’bale Jennings ndidakomedwa kwene-kwene. Ndidawona kuti iye akhafunika kusiya utumiki bwace kuti asamalire thanzi lace. Bzimwebzi bzidandithandiza kuti nimbabziwone mwakuthemera.” M’bale munango adanembambo kuti: “Ndidatumikira ninga mkulu wa gwere magole 10, ndipo patsogolo pace ndidafunikira kusiya utumikibo thangwe ra matenda. Inepano ndikhabzibva kuti ndikhakwanisa lini kucita cinthu ciri-centse, ndipo ndikhambafuna lini kuwerenga nkhani za moyo wa abale. . . . Tsono nkhani ya M’bale Jennings idandipasa mphanvu.” Bzimwebzi bzikutikumbusa kuti tikapirira mabvuto yakusaya kudikhiririka yomwe timbagumana nayo, timbalimbikisambo anzathu. Napo kuti bzinthu bzingatifambire lini bwino pa moyo wathu, tingapitirize kukhala wakukhulupirika na wakupirira ndipo bzimwebzi bzin’dzathandizambo anzathu. — 1 Pedru 5:9.

18. Ninga momwe mukuwonera pa mafotopa, kodi mwapfunza ciyani na mamsiwa wa ku Nigéria?

¹⁸ Atumiki azinji wa Yahova adagumana na mabvuto yakusiyana-siyana kuphatanidzambo COVID-19. Mkazi munango wa ku Nigéria omwe ni mamsiwa akhalibe kobiri yakugulira cakudya. Ntsiku inango, mwana wace wacikazi adamubvunza kuti angadadya ciyani pomwe adaphika kopo yakumalizira ya mpunga. Mpfumakazi yathuyo idauza mwana waceyo kuti akhalibe kobiri yakugulira cakudya cinango. Koma akhafunika kutewezera mkazi mamsiwa wa ku Zarefati; akhafunika kumaliza kuphika cakudyaco acikhulupira Yahova na mtima wentse. (1 Wamambo 17:8-16) Pomwe iwo akhanati kukumbukira kuti angadadya ciyani midiya, abale adawatumizira cakudya. Cakudyaco cikhali cizinji kwene-kwene mwakuti adadya  kupitirira sumana ziwiri. Mpfumakaziyo idalewa kuti ikhadziwa lini momwe Yahova akhatetekerera pomwe iyo ikhaceza na mwana wace. Tikathemba Yahova, mabvuto yomwe timbagumana nayo yan’dzaticitisa kuti tikhale wakufendererana naye. — 1 Pedru 5:6, 7.

19. Kodi ni cizunzo ciponi comwe M’bale Aleksey Yershov adagumana naco?

¹⁹ M’magole yakumalizira yano, abale na mpfumakazi azinji agumana na mazunzo yomwe ne akhayadikhirira lini. Onani bzomwe bzidacitikira M’bale Aleksey Yershov omwe ambakhala ku Rússia. Pomwe M’bale Yershov adabatizidwa mu 1994, wanthu wa Mulungu akhazunzidwa lini. Tsono pomwe padapita nthawe bzinthu bzidacinja ku Rússia. Mu 2020, wanthu adapita mwamphanvu m’nyumba mwa M’bale Yershov, ndipo adatenga bzinthu. Ndipo pomwe padapita minyezi, boma lidamunamizira bzinthu bzizinji M’bale Yershov. Ndipo bzinthu bzidafika pakuipiratu pomwe bomalo lidalatiza tribunale vidiyo zomwe zikhalatiza iye akucitisa pfunziro la Bibliya munthu omwe akhanamizira kuti akufuna kupfunza Bibliya. Bzomwe munthu umweyu adacitabzi bzikhali bzakuipa kwene-kwene!

20. Kodi M’bale Yershov adalimbisa tani uxamwali bwace na Yahova?

²⁰ Kodi pana cinthumbo cabwino comwe M’bale Yershov adagumana naco thangwe ra kuzunzidwako? Inde ciripo. Uxamwali bwace na Yahova budalimba kwene-kwene. Iye adati: “Inepano na mkazangu tikhambapemba nthawe zentse. Bzingadakhala kuti Yahova alibe kundithandiza, ningadakwanisa lini kukunda cizunzo cire.” Ndipo adathimizira kulewa kuti: “Pfunziro lapandekha lidandithandiza kukhala na mphanvu. Nimbakumbukira nkhani za atumiki wa Yahova wakukhulupirika wakale-kale. Pana nkhani zizinji za m’Bibliya zomwe zimbalatiza kufunika kwa kukhala wakuderekha na kupitiriza kukhala wakukhulupirika kwa Yahova.”

21. Kodi tapfunza ciyani mu nkhani ino?

²¹ Kodi tapfunza ciyani mu nkhani ino? Mu ntsiku zakumalizira zino, moyo ngwakunesa kwene-kwene. Napo bziri tenepo, Yahova ambathandiza atumiki wace omwe ambamuthemba. Cinembo comwe cikutsogolera nkhani ino cimbati: “Nyakulungama ambagumana na matsoka mazinji, koma Yahova ambamupulumusa pa matsoka yentseneyo.” (Salimo 34:19) Mbatilekeni kumbakumbukira bza mabvuto yomwe timbagumana nayo, koma timbathembe mphanvu ya Yahova. Tikacita bzimwebzi, ninga mpostolo Paulo, tingalewembo kuti: “Pa bzinthu bzentse nimbakwanisa kukhala na mphanvu thangwe ra ule omwe ambandipasa mphanvu.” — Afilipi 4:13.