1. Kodi wanthu winango ambabzibva tani akambalewalewa na wanthu mu upalizi? (Onani cithunzi-thunzi.)

 NINGA wanthu wa Yahova, timbapalizira mafala yabwino kwa wanthu winango thangwe timbafuna Baba wathu wakudzulu ndipo tikufuna kuthandiza wanthu winango kuti amudziwe. Apalizi azinji ambafuna basa la kupalizira. Tsono winango, bzimbawanesa kukhala wakukondwa pa kupalizira. Thangwe ranyi? Winango ana manyazi ndipo ambawona kuti angakwanise lini kupfunzisa munthu. Winango ambawona kuti mpsabwino lini kuyenda kumui kwa wenekaciro pomwe alibe kucemeredwa. Winango ambagopa kuti wanthu angawakalipire. Ndipo winango ambagopa kukalipisa wanthu. Napo kuti abale na mpfumakazi amwewa ambafuna kwene-kwene Yahova, bzimbawanesa kupalizira mafala yabwino kwa wanthu omwe ambawadziwa lini. Napo bziri tenepo, iwo ambawona kufunika kwa basa limweri ndipo ambalicita nthawe zentse. Yahova ambakomedwa kwene-kwene na bzimwebzi!

2. Penu munthu munango ambakomedwa lini na kupalizira, thangwe ranyi an’funika lini kuwofoka?

² Kodi imwepo nthawe zinango bzimbakunesani kukhala wakukondwa mu upalizi thangwe ra bzimwebzi? Penu ndibzo, lekani kuwofoka. Kucita bzimwebzi kumbalatiza kuti imwepo ndimwe wakubzicepesa ndipo mumbafuna lini kubziwonesera. Palibe munthu omwe ambafuna kukalipisa munthu munango, maka-maka akakhala akufuna kumucitira bzinthu bzabwino. Baba wanu wakudzulu akudziwa bza mabvuto yomwe imwepo mukugumana nayo ndipo akufuna kukuthandizani. (Zaiya 41:13) Mu nkhani ino, tiniwona bzinthu bzixanu bzomwe bzingatithandize kukunda makumbukidwe yamweya na momwe tingakhalire wakukondwa mu upalizi.

 BVUMANI KUTI FALA LA MULUNGU LIKULIMBIKISENI

3. Kodi n’ciyani comwe cidathandiza mpolofeta Jeremiya kuti apalizire wanthu?

³ Kuyambira kale-kale, Fala la Mulungu lidalimbikisa atumiki wa Yahova pomwe iwo akhacita basa lakunesa. Mwa ciratizo, mbatiwoneni bzomwe bzidacitikira mpolofeta Jeremiya. Iye adacita mantha pomwe Yahova adamupasa basa la kupalizira. Iye adati: “Nin’kwanisa lini kulewalewa ine, thangwe ndine mwana.” (Jeremiya 1:6) N’ciyani comwe cidamuthandiza kuti akhale wakukhwimika acikwanisa kupalizira? Iye adagumana mphanvu m’Fala la Mulungu. Iye adati: “Fala lace lidakhala ninga moto ukugaka mu mtima mwangu, wafungiriridwa m’mafupa mwangu ndipo ndidaneta kuyabisa.” (Jeremiya 20:8, 9) Napo kuti Jeremiya akhali mu gawo lakunesa, mafala yomwe adapasidwa kuti apalizireyo yadamupasa mphanvu kuti alicite basalo.

4. Kodi n’ciyani comwe cimbacitika tikambawerenga Fala la Mulungu na kukumbukira? (Akolose 1:9, 10)

⁴ Akristau ambalimbikisidwa na Fala la Mulungu. Pomwe mpostolo Paulo adanembera tsamba Akristau wa ku Kolose, iye adalewa kuti kupfunza bzizinji pakulewa bza Yahova kungadathandiza abale wacewo kuti apitirize “kubala bzisapo pa basa lentse labwino,” ndipo mwa njira imweyo iwo ‘angadafamba mwakuthemera ninga momwe Yahova akufunira.’ (Werengani Akolose 1:9, 10.) Basa labwino limweri limbaphatanidza kupalizira mafala yabwino. Na tenepo, tikambawerenga Fala la Mulungu na kukumbukira bzomwe tawerengabzo, cikhulupiro cathu kwa Yahova cimbalimba ndipo timbakwanisa kubvesesa kufunika kwa kupalizira mafala yabwino ya Umambo.

5. Kodi tingagumane tani phindu pa kupfunza na kuwerenga Bibliya?

⁵ Kuti tigumane phindu na Fala la Mulungu, tin’funika lini kuwerenga, kupfunza na kukumbukira mwakuthamanga. Imwepo mukagumana cinembo comwe mukucibvesesa lini, lekani kucimoga. M’mbuto mwace phatisani basa Índice das Publicações da Torre de Vigia ayai Bukhu Lakufufudzira Nkhani la Mboni za Yahova kuti mugumane nfundo zomwe zin’kuthandizani kubvesesa vesiro. Imwepo mukacita nyongo yakupfunza, mun’dzalimbisa cikhulupiro canu ndipo mun’dzakhala na citsimikizo cakuti bzentse bzomwe Bibliya limbalewa mpsacadidi. (1 Atesalonika 5:21) Imwepo mukatsimikizira bzimwebzi, mun’dzafuna kuuzambo winango bzomwe mukupfunzabzo.

 MBAKONZEKERANI BWINO UPALIZI BWANU

6. Thangwe ranyi tin’funika kumbakonzekera bwino kuti tikapalizire?

⁶ Imwepo mukakonzekera bwino upalizi, mun’dzacita lini mantha kuti mukapalizire. Jezu adakonzekeresa anyakupfunza wace pomwe akhanati kuwatumiza kuti akapalizire. (Luka 10:1-11) Thangwe ra kuphatisa basa bzomwe Jezu adawauza, anyakupfunza wacewo adakhala wakukondwa thangwe ra bzomwe adakwanisa kucita. — Luka 10:17.

7. Kodi tingakonzekere tani kuti tikapalizire? (Onani cithunzi-thunzi.)

⁷ Kodi tingakonzekere tani kuti tikapalizire? Tin’funika kukumbukira bzomwe tingakalewelewe na mafala yathu-yathu na mu njira yomwe wanthu ambalewalewera. Kumbukirani momwe wanthu angakatawirire na bzomwe imwepo mungakafunikire kucita. Na tenepo, tikambaceza na wanthu tin’funika kumbawasekerera na kulewalewa nawo mwa uxamwali.

8. Kodi ni mwa njira iponi Akristau ali ninga bzombo bza dongo mu ciratizo ca mpostolo Paulo?

⁸ Mpostolo Paulo adauza abale na mpfumakazi zace kuti: “Tina cuma cimweci m’bzombo bza dongo.” (2 Akolinto 4:7) Kodi cuma cimweci n’ciponi? Ni basa la kupulumusa wanthu lomwe ni kupalizira mafala yabwino ya Umambo. (2 Akolinto 4:1) Kodi bzombo bza dongo bzimbaimira yani? Bzimbaimira atumiki wa Mulungu omwe ambapalizira mafala yabwino kwa wanthu winango. Mu nthawe ya Paulo, anyakugulisa malonda akhaphatisa basa bzombo bza dongo kuti anyamulire bzinthu bzakufunika ninga cakudya, vinyu na kobiri. Mwakundendemerana na bzimwebzi, Yahova ambatiphatisa basa kuti tipalizire mafala yabwino. Na thandizo la Yahova tin’dzagumana mphanvu kuti tipalizire.

PEMBANI KUTI MUKHALE WAKUKHWIMIKA

9. Kodi tingakunde tani mantha ya kugopa wanthu na kutsutsidwa? (Onani cithunzi-thunzi.)

⁹ Nthawe zinango tingagope kutsutsidwa. Kodi tingacite tani kuti tikunde mayezo yamweya? Onani mpembo omwe apostolo adaucita pomwe adauzidwa kuti aleke kupalizira. M’mbuto mwakugopa, iwo adakumbira Yahova kuti awathandize ‘kupitiriza kulewalewa mafala [yace] mwakukhwimika.’ Ndipo Yahova adatawiriratu mpembo wawoyo pa  nthawe imweyoletu. (Mabasa 4:18, 29, 31) Ifepanombo tikacita mantha nthawe zinango, tin’funika kupemba kwa Yahova ticimukumbira kuti atithandize. Kumbirani Yahova kuti akuthandizeni kukunda mantha na kukulisambo lufoyi lanu kuna wanthu.

10. Kodi Yahova ambatithandiza tani kuti tikwanirise udindo bwathu ninga Mboni zace? (Zaiya 43:10-12)

¹⁰ Yahova adatisankhula kuti tikhale Mboni zace ndipo adapicira kuti an’dzatithandiza kuti tikhale wakukhwimika. (Werengani Zaiya 43:10-12.) Onani njira zinai za momwe iye adacitira bzimwebzi. Yakuyamba, Jezu ambakhala nafe tikakhala tikupalizira mafala yabwino. (Mateu 28:18-20) Yaciwiri, Yahova ambaphatisa basa anjo kuti atithandize. (Apokalipse 14:6) Yacitatu, Yahova adatipasa mzimu wace wakucena kuti utithandize kukumbukira bzinthu bzomwe timbapfunza. (Juwau 14:25, 26) Yacinai, Yahova adatipasa abale na mpfumakazi kuti timbayende nawo kukapalizira. Na thandizo la Yahova pabodzi na la abale wathu pa dziko lentse la pantsi, tin’dzakhala wakukhwimika ticipitiriza kupalizira.

ADZIWENI BWINO WANTHU WA M’GAWO LANU NDIPO MBAWONANI BZINTHU MWAKUTHEMERA

11. Tikakhala mu upalizi, kodi tingacite tani kuti tipalizire wanthu azinji? (Onani cithunzi-thunzi.)

¹¹ Kodi imwepo mumbasunama mukasaya kugumana wanthu nyumba zizinji? Bzibvunzeni kuti: ‘Kodi wanthu wa mu gawo langu nthawe ino angakhale ali kuponi?’ (Mabasa 16:13) ‘Kodi ali ku basa ayai ayenda kukagula bzinthu?’ Penu bziri tenepo, kodi mungakapalizire mu njira kuti mugumane wanthu azinji? M’bale munango, omwe ambacemeredwa Joshua, adalewa kuti: “Pomwe ndikhafamba, tidakhala na mwayi wakupalizira ku mbuto zakugulisira bzinthu na mbuto zomwe zimbagumanika wanthu azinji.” Iye na mkazace, Bridget, akhagumana wanthu azinji m’mii mwawo usiku na dumingu ku maulo. — Aefezo 5:15, 16.

12. Kodi tingazindikire tani bzomwe wanthu ambakhulupira na bzomwe bzimbawacitisa thupo?

¹² Penu wanthu ambatetekera lini, yezerani kuzindikira bzomwe ambakhulupira na bzomwe bzikuwacitisa thupo. Joshua na Bridget ambaphatisa basa mbvunzo omwe umbagumanika  pa tumatsamba kuti ayambise maceza. Mwa ciratizo, mwakuphatisa basa katsamba kakuti Kodi mumbaliwona tani Bibliya? iwo ambalewa kuti: “Wanthu winango ambawona kuti Bibliya ni Fala la Mulungu ndipo winango ne. Kodi imwepo mumbaliwonambo tani?” Kucita bzimwebzi kumbacitisa kuti iwo ayambise maceza.

13. Thangwe ranyi tin’funika kupitiriza kukhala wakukondwa napo kuti wanthu akutitetekera lini? (Mimwani 27:11)

¹³ Napo kuti wanthu angatetekere lini pomwe tikuwapalizira, ifepano timbakwanirisa basi cakulinga cathu. Thangwe ranyi? Thangwe tacita bzomwe Yahova na Mwana wace Jezu ambafuna kuti ticite, bzomwe ni kupalizira. (Mabasa 10:42) Napo kuti tingagumane lini wanthu kuti ticeze nawo ayai ticitsutsidwa, timbakhala wakukondwa thangwe timbadziwa kuti tikukondwesa Baba wathu wakudzulu. — Werengani Mimwani 27:11.

14. Thangwe ranyi tin’funika kukhala wakukondwa mpalizi mwanzathu akagumana munthu omwe akufuna kudziwa bzizinji?

¹⁴ Timbakhala wakukondwa tikadziwa kuti mpalizi mwanzathu wagumana munthu omwe akufuna kudziwa bzizinji. Ntsanza ya Mulindiri inango idandendemezera basa lathu la kupalizira na kunyang’ana mwana omwe ataika. Mwanayo akagumanika, wentse ambakhala wakukondwa sikuti munthu omwe amugumanayo basi. Mwakundendemerana na bzimwebzi, basa la kupalizira limbaphatidwa na wanthu azinji. Wentse ambafunikira kuti apalizire gawo ndipo wentse ambakomedwa munthu m’bodzi akayamba kutsonkhana.

KULISANI LUFOYI LANU KWA YAHOVA NA KWA WANTHU WINANGO

15. Kodi bzomwe Mateu 22:37-39 ambalewa, bzingatithandize tani kuthumizira cikondweso cathu mu utumiki? (Onani cithunzi-thunzi )

¹⁵ Tingathumizire lufoyi lathu kwa Yahova tikambafuna Yahovayo na wanthu winango. (Werengani Mateu 22:37-39.) Ndokumbukirani momwe Yahova ambakhalira wakukondwa akatiwona tikucita basali na momwe wanthu ambakhalira wakukondwa akayamba kupfunza Bibliya! Ndipo kumbukiranimbo momwe wale omwe ambatetekera mafala yabwino angadzakhalire na moyo mpaka kale-kale akasankhula kutumikira Yahova. — Juwau 6:40; 1 Timotio 4:16.

16. Kodi mungakhale tani wakukondwa mu utumiki napo kuti tikucoka lini pa mui? Fotokozani.

 ¹⁶ Kodi imwepo mukucoka lini pa mui thangwe ra bvuto linango? Penu mun’ti inde, onani bzomwe mungacite kuti mukulise lufoyi lanu kwa Yahova na kwa wanthu winango. Pa nthawe ya matenda ya COVID-19, Samuel na Dania akhacoka lini pamui. Pa nthawe yakunesayi, iwo akhapalizira mwanyongo mwakuphatisa basa telefoni, kunemba matsamba na kucitisa mapfunziro ya Bibliya pa Zoom. Samuel adapalizira wanthu omwe adadziwana nawo ku xipitali pomwe akhatambira thandizo la ulapi la matenda yomwe akhaduwala ya kankro. Iye adalewa kuti: “Tikakhala tikugumana na mabvuto, tingacite thupo, tinganete ndipo cikhulupiro cathu cingayezedwe. Tin’funika kukhala wakukondwa pa basa la kutumikira Yahova.” Kuthumizira bzimwebzi, Dania adagwa ndipo adakhala ku xipitali kwa minyezi mitatu. Patsogolo pace, iye adafamba na kanjinga ka anyakulemala kwa minyezi 6. Iye adati: “Ndidayezera kucita bzentse bzomwe ningadakwanisa. Ndidapalizira omwe akhandisamalira ndipo ndidapalizirambo omwe akhabwera kudzandisiyira bzinthu kumui. Ndipo ndidacezambo na mkazi munango omwe akhaphata basa ku xipitali.” Napo kuti Samuel na Dania akhacita lini bzinthu ninga momwe akhacitira kale-kale, iwo adacita bzomwe angakwanise ndipo adakhala wakukondwa thangwe ra kucita bzimwebzi.

17. Kodi mungagumane tani phindu na nfundo zomwe zafotokozedwa mu nkhani ino?

¹⁷ Yezerani kuphatisa basa nfundo zixanu zomwe zafotokozedwa mu nkhani ino. Nfundo iri-yentse iri ninga tempero yomwe imbaikhidwa m’cakudya. Imwepo mukaikha tempero zentse cakudyaco cimbakoma. Tikaphatisa basa nfundo zentse tin’dzakwanisa kulimbana na makumbukidwe yakuphonyeka ndipo tin’dzapitiriza kukhala wakukondwa mu upalizi.