1. Kodi paraizo wauzimu n’ciyani, ndipo tin’funika kutsimikiza kucita ciyani?

 NTSIKU ZINO, pa dziko la pantsi pana paraizo wakuyezezera omwe una wanthu azinji omwe ambacita bzinthu bzabwino. Ndipo udadzala na wanthu wazinji omwe ali pa mtendere wacadidi. Omwe ali m’paraizo umweyu, mbakutsimikiza kuleka kucoka. Ndipo iwo akufuna kuti wanthu azinji akhalembo m’mwemu. Muponi? M’paraizo wauzimu! a

2. Kodi ni cinthu ciponi cakudabwisa comwe ciri mu paraizo wauzimu?

² Bzikuwonekeratu kuti Yahova adakhazikisa mbuto yakuyezezera yomwe wanthu wace mba mtendere na wakuphatana napo kuti akukhala mu dziko lakuipa na lakugopswa la Sathani lomwe wanthu wace ambawengana. (1 Juwau 5:19; Apokalipse 12:12) Pai wathu wakudzulu ambakwanisa kuwona kuti dzikoli limbadzonga wanthu, tsono iye ambacitisa kuti atumiki wace akhale wakukhotcerereka kuti akwanise kumutumikira mwakukondwa. Fala lace limbalewa kuti paraizo wauzimu ali ninga “mbuto yakuthawira” na yakukhotcerereka ayai ninga “munda wa mnyontho.” (Zaiya 4:6; 58:11) Thangwe ra kusimbidwa na Yahova wale omwe ali m’paraizo umweyu, mbakukondwa ndipo ambabzibva kuti mbakukhotcerereka mu ntsiku zakumalizira zino. — Zaiya 54:14; 2 Timotio 3:1.

3. Kodi n’kukwanisika kuponi kwakuyambirira kwa kapitulo ya 65 ya Zaiya?

³ Mwakuphatisa basa mpolofeta Zaiya, Yahova adalewa momwe angadadzakhalira wale omwe angadabvuma kupitiriza kukhala m’paraizo wauzimu. Imwepo mungakwanise kuwona bzimwebzo mu cinembo ca Zaiya 65, comwe pakuyamba cidakwanisika mu gole la 537 AEC. Pa nthawe imweyire, Adjuda omwe akhadakungula  adatsudzulidwa ku ukapolo bwa ku Babiloniya ndipo adabwerera kumui kwawo. Yahova adasimba na kuthandiza wanthu wace kumanga pomwe mzinda wakudeka wa Jeruzalemu pabodzi na templo yomwe ikhali likulu lakunamata kwacadidi ku Jirayeri. — Zaiya 51:11; Zakariya 8:3.

4. Kodi n’kukwanisika kuponi kwa ciwiri kwa kapitulo 65 ya Zaiya?

⁴ Kukwanisika kwa ciwiri kwa polofesiya ya Zaiya kudayamba mu gole la 1919 EC, pomwe anamati wapsa wa Yahova adatsudzulidwa ku ukapolo bwa ku Babiloniya mkulu. Patsogolo pace paraizo wauzimu adayamba kukula. Apalizi Wanyongo wa Umambo adakhazikisa magwere mazinji ndipo adalatiza makhalidwe yabwino yauzimu. Amuna na akazi omwe pakuyamba akhacita bzinthu bza ciwembo na bzinthu bza upombo ‘adabvala unthu bupsa bomwe budalengedwa mwakubverana na kufuna kwa Mulungu.’ (Aefezo 4:24) Kulewa cadidi, bzisimbo bzizinji bzomwe bzidanembedwa na Zaiya bzin’dzakwanisika kutsogolo mu dziko lipsa. Napo tsapano timbagumana phindu likulu kwene-kwene thangwe ra kukhala mu paraizo wakuyezezerayu. Mbatiwoneni momwe ifepano timbacitira mbali ya paraizo umweyu ndipo thangwe ranyi tin’funika lini kucoka m’paraizomu.

KODI WALE OMWE AMBAKHALA M’PARAIZO WAUZIMU AMBABZIBVA TANI?

5. Mwakubverana na Zaiya 65:13, kodi ni phindu liponi lomwe timbakhala nalo mu paraizo wauzimu?

⁵ Mbakudyesedwa bwino na wakulimbikisidwa. Polofesiya ya Zaiya imbalatiza kusiyana komwe kulipo kwa wale omwe ali m’kati mwa paraizo wauzimu na wale omwe ali kunja kwa paraizo wauzimuyu. (Werengani Zaiya 65:13.) Yahova ambapasa atumiki wace bzentse bzomwe ambafunikira kuti apitirize kukhala pa uxamwali na iye. Tina mzimu wakucena, Fala lace, na cakudya cizinji cauzimu kuti ‘tidye. . . timwe. . . [na] kukhala wakukondwa.’ (Ndendemezerani na Apokalipse 22:17.) Tsono mpsakusiyana kwene-kwene na wale omwe ali lini m’paraizo wauzimu. Iwo ‘ambakhala na njala. . . , ambakhala na nyota. . . , [ndipo] ambanyala.’ Iwo ambamudziwa lini Mulungu. — Amose 8:11.

6. Ninga momwe Joweli 2:21-24 ambalewera, kodi ni bzisimbo bziponi bzomwe timbakhala nabzo mu paraizo wauzimu, ndipo ni phindu liponi lomwe tingakhale nalo?

⁶ Mu polofesiya yace, Joweli adaphatisa basa bzakudya ninga, tirigu, vinyu, na mafuta kuti alatize momwe Yahova ambatipasira bzomwe tikufunikira kuti tipitirize kukhala na cikhulupiro cakulimba kuphatanidzambo malango ya m’Bibliya. (Joweli 2:21-24) Yahova ambacita bzimwebzi mwakuphatisa basa Bibliya, mabukhu yathu, webisaite yathu, mitsonkhano yathu ya gwere, mitsonkhano ya dera na yacigawo. Timbagumana phindu na makonzedwe yamweya ndipo timbakhalambo na thanzi labwino na wakulimbikisidwa.

7. N’ciyani comwe cimbatipasa “mkhalidwe wabwino wa mtima”? (Zaiya 65:14)

⁷ Mbakukondwa. Wanthu wa Mulungu ‘ambakuwa mwa cikondweso’ thangwe ambatenda kwene-kwene bzomwe Yahova ambawacitira. (Werengani Zaiya 65:14.) Cadidi ca m’Bibliya comwe cimbalimbisa cikhulupiro cathu pabodzi na mapiciro yakutsangalaza yakucokera m’Fala la Mulungu kuphatanidzambo cidikhiro cakutsimikizirika comwe tinaco cakutsogolo thangwe ra ntsembe ya cakulombolera ya Jezu Kristu bzimbatipasa “mkhalidwe wabwino wa mtima.” Kumbaceza na abale na mpfumakazi kumbaticitisa kuti tikhale wakukondwa. — Masalimo 34:8; 133:1-3.

8. Kodi njaponi makhalidwe mawiri yomwe njakufunika mu paraizo wauzimu?

⁸ Lufoyi na kubverana kwa wanthu wa Yahova ni makhalidwe mawiri yakufunika kwene-kwene m’paraizo wauzimu. Kubverana kumweku kumbalatiza momwe moyo un’dzakhalira mu dziko  lipsa pomwe atumiki wa Yahova an’dzalatizana lufoyi na kubverana kukulu kwene-kwene kuposa ntsiku zino. (Akolose 3:14) Mpfumakazi inango idafotokoza bzomwe idawona pakati pa wanthu wa Mulungu pomwe idawadziwa. Iyo idati: “Inepano ndikhadziwa lini kuti ningakhale tani wakukondwa napo m’banja mwangu. Ulendo bwakuyamba pomwe ndidawona lufoyi lacadidi ni pakati pa Mboni za Yahova.” Munthu ali-wentse omwe akufuna kukhala wakukondwa a’funika kukhala mu paraizo wauzimu. Bziribe basa bzomwe wanthu angakumbuke pakulewa bza atumiki wa Yahova, iwo ana dzina lakulemekezeka, makhalidwe yabwino na abale pa dziko lentse la pantsi. — Zaiya 65:15.

9. Kodi Zaiya 65:16, 17 ambapicira ciyani pakulewa bza mabvuto yomwe timbagumana nayo pa moyo wathu?

⁹ Mbakugwa mpfuwa na wakuderekha. Zaiya 65:14 ambalewa kuti wale omwe ambasankhula kukhala kunja kwa paraizo wauzimu ‘ambalira thangwe ra kuwawa kwa mtima wawo acikuwa thangwe ra kusweka kwa mtima.’ Tsono tani pakulewa bza bzinthu bzomwe bzacitisa kuti wanthu wa Mulungu abve kuwawidwa mu mtima na kubonera? Pakumalizira pace bzinthu bzimwebzi ‘bzin’dzayebwedwa ndipo bzin’dzawoneka lini m’maso mwa [Mulungu].’ (Werengani Zaiya 65:16, 17.) Yahova an’dzamalisa mabvuto yathu ndipo ifepano tin’dzayakumbukira lini pomwe.

10. Thangwe ranyi imwepo mukuwona kuti ni cisimbo cikulu kukhala pabodzi na abale na mpfumakazi zathu? (Onani cinthunzi-thunzi.)

¹⁰ Napo ntsiku zino timbakhala wakugwa mpfuwa tikakhala tiri ku mitsonkhano thangwe timbakumbukira lini bzinthu bzomwe bzimbaticitisa thupo mu dziko lakuipali. Ndipo timbathandiza abale na mpfumakazi zathu kuti akhale wakugwa mpfuwa tikambawalatiza lufoyi, cikondweso, mtendere, kudeka mtima na kuderekha bzomwe bzimbacita mbali ya bzisapo bza mzimu. (Agalatiya 5:22, 23) Timbatenda kwene-kwene kucita mbali ya gulu la Mulungu. Omwe anipitiriza kukhala m’paraizo wauzimu an’dzawona kukwanisika kwa piciro la Mulungu lakulewa bza “kudzulu kupsa na dziko lipsa.”

11. Mwakubverana na Zaiya 65:18, 19, kodi tin’funika kumbamuwona tani paraizo wauzimu omwe Yahova adaukhazikisa?

¹¹ Mbakutenda na wakukomedwa. Patsogolo pace Zaiya adafotokoza kuti n’thangwe ranyi “tin’funika kukondwa na kukomedwa” m’paraizo wauzimu. Paraizo wakuyezezerayu udakonzedwa na Yahova. (Werengani Zaiya 65:18, 19.) Na tenepo, Yahova ambatiphatisa basa kuti tithandize wanthu kuti asiye mabungwe ya wanthu wa dzikoli omwe ambapfunzisa lini cadidi pakulewa bza iye nakuti tithandize wanthu kuti acite mbali ya paraizo wakudeka wakuyezezerayu. Timbakomedwa kwene-kwene na bzisimbo  bzomwe timbakhala nabzo thangwe ra kukhala n’cadidi ndipo bzimwebzi bzimbaticitisa kuti tiuzembo wanthu winango. — Jeremiya 31:12.

12. Kodi imwepo mumbabzibva tani mukambakumbukira mapiciro yomwe yali pa Zaiya 65:20-24, ndipo n’thangwe ranyi?

¹² Ndife wakukondwa na wakutenda na cidikhiro comwe tinaco thangwe ra kukhala pa mtendere na Yahova. Kumbukirani bzinthu bzentse bzomwe tin’dzawona m’dziko lipsa la Mulungu. Bibliya limbapicira kuti: “Kumweko kun’dzakhala lini pomwe tcece lomwe lin’dzakhala na moyo ntsiku zing’ono-ng’ono, ne mkhalamba yakusaya kupfitsa ntsiku zentse za moyo wace.” ‘Tin’dzamanga nyumba, ticikhala m’mwemo; tin’dzalima minda ya mipesa, ticidzadya bzisapo bzace.’ ‘Tin’dzaphatira lini basa papezi’ thangwe tentse ‘tin’dzasimbidwa na Yahova.’ Iye akutipicira moyo wakukhotcerereka, wabwino na wacadidi. ‘Pomwe munthu akanati kumucemera,’ iye an’dzadziwiratu bzomwe munthuyo akufunikira ndipo ‘an’dzacita bzomwe camoyo centse cimbakhumba.’ — Zaiya 65:20-24; Salimo 145:16.

13. Kodi Zaiya 65:25 ambafotokoza ciyani pakulewa bza momwe wanthu ambacinjira bzinthu pa moyo wawo akayamba kutumikira Yahova?

¹³ Mbakukhotcerereka. Na thandizo la mzimu wakucena wa Mulungu azinji omwe akhana makhalidwe yakuipa adacinja bzinthu pamoyo wawo. (Werengani Zaiya 65:25.) Iwo adacita nyongo yakucinja makhalidwe yawo yakuipa. (Aroma 12:2; Aefezo 4:22-24) Tsono pakuti wanthu wa Mulungu akali wakuperewera an’dzapitiriza kuphonya. Na tenepo, Yahova adatsonkhanisa “wanthu wa mitundu yentse” omwe ambamufuna ndipo ambafunana, thangwe ra bzimwebzi iwo ana mtendere ndipo mbakubverana. (Tito 2:11) Bzimwebzi mpsakudabwisa thangwe ni Mulungu yekha wamphanvu zentse omwe angakwanise bzinthu bzimwebzi.

14. Kodi Zaiya 65:25 adakwanisika tani kwa m’bale munango?

¹⁴ Kodi mpsakukwanisika wanthu wakuipa kucinja makhalidwe yawo? Mbatiwoneni ciratizoci. Tswaka linango la magole 20 lidaikhidwa m’kawoko thangwe rakuti likhacita bzinthu bza upombo ndipo likhali kapondo. Iye adaikhidwa m’kawoko thangwe ra kuba karo na bzinthu bzinango bzomwe akhadacita. Iye nthawe zentse akhali wa ndewo. Pomwe iye adayamba kubva cadidi ca m’Bibliya na kumbagumanika pa mitsonkhano ya Mboni za Yahova, adakhala na citsimikizo cakuti akhadagumana moyo wathandauzo omwe ni kunamata Yahova mu paraizo wauzimu. Kucokera pomwe adabatizidwa, nthawe zentse iye akhambakumbukira momwe Zaiya 65:25 akhaphatira basa pa moyo wace. Iye adasiya kukhala kapondo ninga mphondolo, acikhala munthu wa mtendere ninga mwana wa bira.

15. Thangwe ranyi tikufuna kuthandiza wanthu winango kuti akhalembo mu paraizo wauzimu, ndipo tingacite tani bzimwebzi?

¹⁵ Zaiya 65:13 ambayamba na mafala yakuti: “Yahova, Mbuya Mkululetu, akuti.” Vesi 25 limbamaliza na mafala yakuti “walewa tenepo Yahova.” Mafala yace nthawe zentse yambakwanisika. (Zaiya 55:10, 11) Paraizo wauzimu alipo kale ntsiku zino. Yahova adakhazikisa banja la pa dziko lentse. Thangwe ra kucita mbali ya banja limweri tina mtendere ntsiku zino ndipo timbabzibva kuti ndife wakukhotcerereka mu dziko lakuipali. (Salimo 72:7) Thangwe ra bzimwebzi, tikufuna kuthandiza wanthu azinji kuti akhale m’banja lathu lauzimu la pa dziko lentse. Tingacite bzimwebzi mwakuthandiza wanthu azinji kuti akhale anyakupfunza wa Kristu. — Mateu 28:19, 20.

THANDIZANI WANTHU WINANGO KUKHALAMBO M’PARAIZO WAUZIMU

16. Kodi wanthu ambabweresedwa tani mu paraizo wauzimu?

¹⁶ Munthu ali-wentse an’funika kucita mbali yace kuti acitise wanthu winango kufuna kupitambo  m’paraizo wauzimu. Kuti bzimwebzi bzikwanisike tin’funika kutewezera Yahova. Iye ambangingimiza lini wanthu kuti acite mbali ya gulu lace. M’mbuto mwace, iye ‘ambabweresa’ wanthuwo m’gulu lace mwakudeka mtima. (Juwau 6:44; Jeremiya 31:3) Yahova ambabweresa m’gulu lace wanthu omwe ana mitima yabwino omwe ambapfunza bza lufoyi lace na makhalidwe yace yabwino. Kodi tingathandize tani wanthu kuti abwere mu paraizo wauzimu na makhalidwe yathu na bzicito bzathu?

17. Kodi tingathandize tani wanthu winango kuti akhale mu paraizo wauzimu?

¹⁷ Njira ibodzi ya momwe tingathandizire wanthu kuti akhalembo mu paraizo wauzimu ndiyo kumbacitira bzinthu abale na mpfumakazi zathu mwa lufoyi na mwakudeka mtima. Wanthu akabwera kudzatsonkhana nafe, tikufuna kuti awonembo bzinthu mu njira ibodzi-bodzi ninga momwe adawonera wanthu omwe adatsonkhana ku Kolinto. Iwo adalewa kuti: “Kulewa cadidi, Mulungu ali pakati panu.” (1 Akolinto 14:24, 25; Zakariya 8:23) Na tenepo, tin’funika kupitiriza kuphatisa basa malango yakuti “khalani mwa mtendere pakati panu.” — 1 Atesalonika 5:13.

18. Kodi n’ciyani cingacitise wanthu kuti abwere mu paraizo wauzimu?

¹⁸ Tin’funika kumbawona abale na mpfumakazi zathu ninga momwe Yahova ambawawonera. Tingacite bzimwebzi mwakumbawona makhalidwe yawo yabwino sikuti bzakuphonya bzawo. Tingamalise kusaya kubvesesana kuli-kwentse pakati pathu mu njira ya lufoyi ticimbakhala nthawe zentse ‘wakudeka mtima ticimbabverana ntsisi, na kumbalekererana na mtima wentse.’ (Aefezo 4:32) Tikacita bzimwebzi, wanthu omwe akufuna kucitiridwambo bzinthu mu njira imweyi an’dzafunambo kucita mbali ya paraizo wauzimu. b

 PITIRIZANI KUKHALA MU PARAIZO WAUZIMU

19. (a) Ninga momwe ikulatizira kwadru yakuti “Iwo Adacoka Ndipo Adabwerera,” n’ciyani comwe wanthu winango adalewa pambuyo pakubwerera mu paraizo wauzimu? (b) Kodi n’citsimikizo ciponi comwe tin’funika kukhala naco? (Onani cinthunzi-thunzi.)

¹⁹ Ifepano timbatenda kwene-kwene kukhala m’paraizo wauzimu. Ni paraizo wakudeka ndipo ambakhalidwa na wanthu omwe ambatumbiza Yahova. Tenepo mbatitendeni Yahova thangwe ra kutikonzera paraizo wauzimu umweyu. Munthu ali-wentse omwe akufuna kukhala wakulimbikisidwa, wakukondwa, wakugwa mpfuwa na wakukhotcerereka an’funika kupita mu paraizo wauzimu umweyu acileka kucoka. Tsono khalani tceru thangwe Sathani akucita ciri-centse comwe angakwanise kuti aticose mu paraizo wauzimuyu. (1 Pedru 5:8; Apokalipse 12:9) Ndipo tin’funika lini kulekerera kuti iye atikunde. Mbaticiteni nyongo kuti tikhotcerere kudeka, kucena na mtendere wa mu paraizo wauzimu.