NKHANI YAKUPFUNZA 15
NYIMBO 124 Kukhala Wakukhulupirika Nthawe Zense
Pitirizani Kumbakhulupira Gulu la Yahova
“Kumbukirani wale omwe akutsogolera pakati panu, omwe ambakufotokozerani mafala ya Mulungu.” — AHEBEREU 13:7.
CAKULINGA CA NKHANIYI
Bzomwe tin’funika kucita kuti nthawe zentse timbalemekeze na kukhulupira gulu la Yahova.
1. Kodi gulu la Yahova lidacita ciyani pomwe magwere yadakhazikisidwa mu nthawe ya Akristau wakuyambirira?
YAHOVA akapasa basa atumiki wace, iye ambafuna kuti iwo alicite basalo. (1 Akolinto 14:33) Mwa ciratizo, bzomwe Mulungu akufuna mpsakuti mafala yabwino ya Umambo yapaliziridwe pa dziko lentse la pantsi. (Mateu 24:14) Yahova adapasa udindo Jezu kuti atsogolere basa limweri. Ndipo Jezu adalewa kuti bzimwebzi bzikhafunika kucitika mu njira yakulinganizika. Pomwe magwere yadakhazikisidwa mu nthawe ya Akristau wakuyambirira, padasankhulidwa akulu kuti ambatsogolere na kupereka malango. (Mabasa 14:23) Bungwe la akulu wa ku Jeruzalemu omwe akhali apostolo lidacita bzakusankhula bzomwe gwere lentse likhafunika kubziteweza. Pomwe magwere yadakhazikisidwa ku mbuto zakusiyana-siyana, akulu wa m’magwereyo akhadziwisa abale bza nkhaniyo. (Mabasa 15:2; 16:4) Thangwe ra kubvera malango yomwe akhapasidwa, ‘magwereyo yakhayenda yacithumizirika ntsiku na ntsiku.’ — Mabasa 16:5.
2. Kuyambira 1919, kodi Jezu akuphatisa basa yani kuti apereke malango na cakudya cauzimu?
2 Yahova akupitiriza kulinganiza gulu lace ntsiku zino. Kuyambira mu gole la 1919, Jezu mwakutsogoleredwa na Yahova akuphatisa basa kagrupo ka amuna wakudzozedwa kuti kalinganize basa lakupalizira na kupereka malango yakucokera m’Fala la Mulungu kwa ateweri wace pa nthawe yakuthemera. a (Luka 12:42) Bzikuwonekeratu padeca kuti Yahova akusimba basa lomwe kagrupo kamweka kakucita. — Zaiya 60:22; 65:13, 14.
3-4. (a) Kodi ni phindu liponi lomwe timbakhala nalo thangwe ra kukhala wakulinganizika? (b) Kodi tin’cezerana ciyani mu nkhani ino?
3 Bzingadakhala kuti ndife lini wakulinganizika tingadakwanisa lini kucita basa lomwe Jezu adatipasa. (Mateu 28:19, 20) Mwa ciratizo, bzingadakhala kuti abale ambalinganiza lini mbuto yakupalizira; munthu ali-wentse angadandombapalizira mbuto yomwe an’funayo. Tingadandombapalizira mbuto ibodzi na ibodzi mwakubwereza-bwereza ndipo tingadambapalizirambo lini ku mbuto zinango. Kodi imwepo mukukwanisa kuwona phindu linango lomwe timbakhala nalo thangwe ra kukhala wakulinganizika?
4 Ninga momwe Jezu adalinganizira ateweri wace pomwe akhali pa dziko la pantsi pano, iye akupitiriza kulinganiza wanthu wa Mulungu ntsiku zino. Mu nkhani ino, tin’cezerana bza ciratizo ca Jezu na momwe gulu lathu limbatewezerera ciratizo cace. Ndipo tin’cezeranambo momwe tingalatizire kuti timbakhulupira gulu la Yahova.
GULU LATHU LIMBATEWEZERA CIRATIZO CA JEZU
5. Kodi tingatewezere tani Jezu? (Juwau 8:28)
5 Jezu adapfunza na Baba wace wakudzulu bzomwe akhafunika kucita na kulewa. Gulu la Yahova limbatewezera ciratizo ca Jezu mwa kuphatisa basa Fala la Mulungu kuti litithandize kudziwa cabwino na cakuipa na kutipasa malango yomwe yambatithandiza pa moyo wathu. (Werengani Juwau 8:28; 2 Timotio 3:16, 17) Nthawe zentse timbakumbusidwa kuti tin’funika kumbawerenga na kuphatisa basa Fala la Mulungu. Kodi ni phindu liponi lomwe timbakhala nalo tikambabvera malango yamweya?
6. Kodi ni phindu liponi lomwe timbakhala nalo pakupfunza Bibliya?
6 Timbagumana phindu likulu kwene-kwene tikambapfunza Bibliya mwakuphatisa basa mabukhu yathu. Mwa ciratizo, tingambandendemezere bzomwe Bibliya limbalewa na malango yomwe timbatambira m’gulu lathu. Tikambakwanisa kuwona kuti malango yomwe gulu limbatipasa yambacokera m’Bibliya, bzimbaticitisa kuti tilikhulupire kwene-kwene gululo. — Aroma 12:2.
7. Kodi Jezu adapalizira ciyani, ndipo gulu la Yahova limbatewezera tani ciratizo cace?
7 Jezu adapalizira “mafala yabwino ya Umambo bwa Mulungu.” (Luka 4:43, 44) Jezu adauzambo ateweri wace kuti ambapalizire bza Umambo bwa Mulungu. (Luka 9:1, 2; 10:8, 9) Ntsiku zino, wentse omwe ali mu gulu la Yahova ambapalizira mafala yabwino bziribe basa komwe iwo ambakhala ayai udindo bomwe iwo anabo m’gulu la Yahova.
8. Kodi ifepano tina mwayi uponi?
8 Ni mwayi ukulu kwene-kwene kwa ifepano kuuza winango bza Umambo bwa Mulungu! Ni wanthu lini wentse omwe ana mwayi umweyu. Mwa ciratizo, pomwe Jezu akhali pa dziko la pantsi, iye alibe kulekerera kuti madimonyo yalewe bza iye. (Luka 4:41) Ntsiku zino, kuti munthu ayambe kupalizira, cakuyamba iye an’funika kucita bzinthu mwakubverana na momwe Yahova ambafunira. Timbalatiza kuti timbatenda mwayi umweyu tikambauza wanthu bza Umambo bwa Mulungu kuli-kwentse komwe timbawagumana. Tikufuna kukhala ninga Jezu, ndipopa timbacita bzomwe tingakwanise kuti tipalizire wanthu winango mwakuwapfunzisa cadidi. — Mateu 13:3, 23; 1 Akolinto 3:6.
9. Kodi gulu la Mulungu limbacita tani kuti lipalizire bza dzina la Mulunguyo?
9 Jezu adadziwisa dzina la Mulungu. Jezu adapemba kwa Baba wace kuti: “Inepano ndawadziwisa dzina lanu.” (Juwau 17:26) Gulu la Mulungu limbatewezera ciratizo ca Jezu mwakucita ciri-centse comwe iwo angakwanise kuti athandize wanthu winango kulidziwa dzina la Mulungu. Ndipo njira ibodzi ya momwe iwo ambacitira bzimwebzi ndiyo kuphatisa basa Bibliya Lakusanduliziridwa la Dziko Lipsa. Bibliya limweri lidabwezeresa dzina la Mulungu m’mbuto zomwe dzinalo likhadacosedwa ndipo Bibliya lakusanduliziridwa limweri likugumanika m’bzirewedwe bzakupitirira 270. Mu m’Bibliya la Chichewa mu Zakumapeto A4 na A5, mun’dzakwanisa kugumana nfundo zomwe zimbafotokoza mwakubveka bwino bza kubwezeresedwa kwa dzina la Mulungu. Apêndice C yomwe imbagumanika mu Bibliya Lakupfunzira lomwe limbagumanika pa webisaite yathu limbalatiza padeca kuti dzina la Mulungu likhafunika kugumanika m’Bzinembo Bzacigerego Bzacikristau m’mbuto zakukwana 237.
10. Kodi mwapfunza ciyani na bzomwe mkazi omwe ambakhala ku Myanmar adalewa?
10 Ninga Jezu tikufuna kuthandiza wanthu azinji kuti alidziwe dzina la Mulungu. Pomwe mkazi munango wa magole 67 omwe ambakhala ku Myanmar adadziwa kuti Mulungu ana dzina, adalira ndipo adalewa kuti: “Pa moyo wangu wentse n’kuyamba kubva kuti dzina la Mulungu ni Yahova. . . . Imwepo mwandipfunzisa cinthu cakufunika kwene-kwene comwe ndikhafunikiradi kucipfunza.” Ninga momwe cikulatizira ciratizoci, wanthu akadziwa bza dzina la Mulungu moyo wawo ungacinje.
PITIRIZANI KULATIZA KUTI MUMBAKHULUPIRA GULU LA YAHOVA
11. Kodi akulu angalatize tani kuti ambakhulupira gulu la Yahova? (Onani cithunzi-thunzi.)
11 Kodi akulu angalatize tani kuti ambakhulupira gulu la Yahova? Gulu la Yahova likapereka malango kwa akulu, iwo an’funika kucita ciri-centse kuti ayawerenge malangoyo na kuyaphatisa basa. Mwa ciratizo, iwo ambandotambira lini malango ya momwe angambacitire mbali zawo pa mitsonkhano na momwe angambacitire mpembo m’gwere, koma ambatambirambo malango ya momwe angambasamalirire mabira ya Kristu. Akulu akambaphatisa basa malango yentse yomwe ambapasidwa na gulu la Yahova, bzimbacitisa kuti abale akwanise kuwona kuti Yahova ambawafuna ndipo ambawasamalira.
Akulu ambatithandiza kuti tikhulupire malango yomwe timbapasidwa na gulu la Yahova (Onani ndime 11) b
12. (a) Thangwe ranyi tin’funika kubvera wale omwe ambatsogolera? (Ahebereu 13:7, 17) (b) Thangwe ranyi tin’funika kumbawona makhalidwe yabwino ya wale omwe ambatsogolera?
12 Tikambatambira malango na akulu tin’funika kumbayateweza. Tikacita tenepo, bzin’dzakhala bzakupusa kwa wale omwe ambatsogolera pakati pathu kuti acite basa lawo. Bibliya limbatilimbikisa kuti tin’funika kumbabvera wale omwe ambatsogolera pakati pathu. (Werengani Ahebereu 13:7, 17.) Tsono nthawe zinango kucita bzimwebzi kumbakhala lini kwakupusa. Thangwe ranyi? Thangwe rakuti amuna amwewa mbakuperewera. Ndipopa tikambandokhalira kumbawona bzakuphonya bzawo m’mbuto mwakumbawona makhalidwe yawo yabwino, tin’dzakhala tikuthandizira anyamadulanthaka wathu. Thangwe ranyi tikulewa tenepoyo? Thangwe anyamadulanthaka wathu akufuna kuti tipenukire kuti Yahova akuphatisa basa gulu lace kuti atitsogolere. Na tenepo, tikambakumbukira kuipa akulu bzin’dzaticitisa kuti tiyambembo kupenukira gulu la Yahova ticileka kulikhulupira. Kodi n’ciyani comwe ifepano tingacite kuti tizindikire na kulamba magunkha yomwe anyamadulanthaka wathu ambalewa?
LEKANI KUBVUMA KUTI WINANGO AKUCITISENI KULEKA KUKHULUPIRA GULU LA YAHOVA
13. Kodi anyamadulanthaka wa Mulungu ambacita tani kuti wanthu aleke kukhulupira gulu la Yahova?
13 Anyamadulanthaka wa Mulungu ambayezera kucitisa kuti bzinthu bzabwino bza gulu lathu bziwoneke ninga mpsakuipa. Tsono, Yahova akufuna kuti thupi lathu na bzicito bzathu bzikhale bzakucena kuti timunamate mu njira yomwe iye ambakomedwa nayo. Iye ambalewa kuti munthu ali-wentse omwe anicita bzinthu bzakuipa ndipo acisaya kufuna kucinja makhalidwe yaceyo, an’funika lini kupitiriza kucita mbali ya gwere. (1 Akolinto 5:11-13; 6:9, 10) Ifepano timbabvera lamulo limweri. Thangwe ra kubvera lamulo limweri, anyakutsutsa ambalewa kuti timbafuna lini wanthu, timbawawenga nakuti timbafuna lini munthu ali-wentse omwe ngwakusiyana na ifepano.
14. Mbani omwe ambacitisa kuti gulu lathu lilewedwe kuipa?
14 Zindikirani kuti ni mbani omwe ambacitisa bzimwebzi. Sathani Dyabu ndiye omwe ambalewa nkhani zakunama pakulewa bza gulu lathu. Iye ni “baba wakunama.” (Juwau 8:44; Genesesi 3:1-5) Na tenepo, tin’funika kudziwa kuti Sathani an’dzaphatisa basa anyamadulanthaka wathu kuti amwaze nkhani zakunama pakulewa bza gulu la Yahova. Bzimwebzi ndibzo bzomwe bzidacitikira Jezu pabodzi na Akristau wakuyambirira.
15. N’ciyani comwe atsogoleri wa magereja adacitira Jezu na ateweri wace?
15 Napo kuti Mwana wa Mulungu, Jezu Kristu, akhali wakulungama ndipo akhacita bzakudabwisa bzakusiyana-siyana, Sathani adaphatisa basa wanthu winango kuti amwaze nkhani zakunama pakulewa bza Jezu. Mwa ciratizo, atsogoleri wa magereja adauza wanthu kuti mphanvu yomwe Jezu akhaphatisa basa kuti acosere bziwanda akhadapasidwa na “mtongi wa bziwandayo.” (Marko 3:22) Pomwe Jezu akhatongedwa, atsogoleri wa magerejawo adamunamizira kuti iye akhalewa bzinthu bzakunama ndipo iwo adalimbikisa wanthu kuti akumbire iye aphedwe. (Mateu 27:20) Patsogolo pace, pomwe ateweri wa Kristu akhapalizira mafala yabwino ya Umambo, wale omwe akhawatsutsa “adapumpsa wanthu” kuti abonerese Akristauwo. (Mabasa 14:2, 19) Pakulewa bza Mabasa 14:2, Ntsanza ya Mulindiri ya 1 Dezembro, 1998, idafotokoza kuti wale omwe akhathandizira Sathani adalamba kubva mafala yabwino yomwe Akristau akhapalizira ndipo adalewa bzinthu bzakuipa pakulewa bza iwo kuti wanthu aleke kubva mafalayo aciwawenga kwene-kwene Akristauwo.
16. N’ciyani comwe tin’funika kumbakumbukira tikambabva nkhani zakunama zakulewa bza gulu lathu?
16 Sathani akadapitiriza kunama ntsiku zino. Iye akupitiriza ‘kupumpsa dziko lentse la pantsi.’ (Apokalipse 12:9) Imwepo mukabva bzinthu bzakuipa pakulewa bza gulu lathu ayai abale omwe akutsogolera, kumbukirani momwe anyamadulanthaka wathu adaboneresera Jezu pabodzi na Akristau wakuyambirira. Jezu adalewa kuti wanthu angadadzatsutsa wale omwe ambatumikira Yahova ndipo angadalewa bzinthu bzakunama pakulewa bza iwo ndipo bzimwebzi ndibzo bzomwe bzikucitika ntsiku zino. (Mateu 5:11, 12) Tin’dzakhulupira lini nkhani zakunama tikakumbukira mbani omwe akubzicitisa ndipo tin’dzacita ciri-centse kuti tibzikhotcerere. Kodi tingabzikhotcerere tani?
17. N’ciyani comwe tingacite kuti tileke kumbakhulupira nkhani zakunama? (2 Timotio 1:13) (Onani kwadru yakuti “ Bzomwe Mungacite Mukabva Nkhani Zakunama.”)
17 Lekani kubvuma kunamizidwa na nkhani zakunama. Mpostolo Paulo adalewa bzomwe tin’funika kucita tikabva nkhani zakunama. Iye adauza Timotio kuti ‘apereke malango yamphanvu kwa wanthu winango kuti aleke. . . kubvesera nkhani zakunama’ nakuti ‘alambe nkhani zakunama.’ (1 Timotio 1:3, 4; 4:7) Kumbukirani ibzi: Mwana angatenge cinthu cakupswipa acidya, tsono mkulu angacite lini bzimwebzo thangwe ambadziwa kuti akadya cinthu cakupswipaco angaduwale. Timbalamba nkhani zakunama thangwe timbakhala tikudziwa komwe nkhanizo zikucokera. M’mbuto mwace, timbabva “mafala yabwino” yacadidi. — Werengani 2 Timotio 1:13.
18. Kodi tingalatize tani kuti timbatenda gulu la Yahova?
18 Mu nkhani ino, tandocezerana bzinthu bzitatu bza momwe gulu la Yahova limbatewezerera Jezu. Pomwe mukupfunza Bibliya yezerani kugumana bzinthu bzinango bza momwe gulu la Yahova limbatewezerera Jezu. Thandizani wanthu winango m’gwere mwanu kuti apitirize kumbakhulupira gulu la Yahova. Ndipo pitirizani kulatiza kuti mumbatenda mwayi omwe munawo wakutumikira Yahova mwakukhulupirika na kupitirizambo kukhala wakuphatana na gulu lace lomwe iye ambaliphatisa basa kuti licite kufuna kwace. (Salimo 37:28) Mbatipitirizeni nthawe zentse kumbatenda mwayi omwe tinawo wakukhala m’gulu la Yahova lomwe ndalufoyi na lakukhulupirika kwa Yahova.
KODI MUNGATAWIRE TANI?
-
Kodi wanthu wa Mulungu ambatewezera tani Jezu?
-
Kodi tingapitirize tani kulatiza kuti timbakhulupira gulu la Yahova?
-
N’ciyani comwe tingacite tikanamiziridwa bzinthu bzakunama?
NYIMBO 103 Akulu wa Gwere ni Mphaso Yakucokera kwa Yahova
a Onani kwadru yakuti “Por que 1919?” mu bukhu lakuti A Adoração Pura de Jeová É Restaurada! matsa. 102-103.
b BZOMWE BZIKUCITIKA PA CITHUNZI-THUNZI: Pambuyo pa akulu kucezerana bza makonzedwe ya upalizi, nyakunyang’anira grupo ya utumiki akupereka malango kwa apalizi ya momwe angakhalire pa mbuto yomwe akupalizira.
